Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë, ushtrim fushor “Marsi 2014”

by

Nga B.Jashari/.-Ministria e Forcës së Sigurisë së Kosovës bën të ditur se njëra nga njësitë e Komandës së Doktrinës dhe Stërvitjes (KDS), Qendra e Studimeve Universitare e FSK-së, ka realizuar ushtrimin fushor  të koduar “Marsi 2014”.

Pjesa teorike u realizua në hapësirat e Kazermës “Skënderbeu”, ndërsa vlerësimi final është se ky ushtrim ka qenë mjaft frytdhënës dhe ka ndihmuar kadetët që të shohin sfidat me të cilat mund të ballafaqohen gjatë karrierës së tyre ushtarake, dhe vendimet të cilat duhet t’i marrin.

Në njoftimin e zyrës së shtypit të FSK-së theksohet se, kadetët gjatë periudhës 4 vjeçare realizojnë disa ushtrime fushore.

 

Basha: Kjo qeveri, kampione e zhbërjes dhe e goditjes së ligjit

by

”Ne kemi një qeveri gënjeshtare, kampione e zhbërjes dhe e goditjes së ligjit sikuse edhe e shkurtimeve nga puna”, deklaroi sot Kreu i PD-së, Lulzim Basha.Gjatë mbledhjes së grupit parlamentar demokrat Basha solli si alarmante sigurinë e qytetarëve, ku sipas tij, “rendi nuk është më zgjidhja e sigurisë, por e pasigurisë. Vetëm dy javë e para të këtij muaj, shifrat e krimit janë me të larta se ndonjëherë, vjedhjet kanë arritë kulmin, ndërsa shkalla e zbulushmërisë në rënie”.

Kryetari i Partisë Demokratike, Lulzim Basha analizoi bilancin 6 mujor të qeverisë, duke evidentuar dështimet dhe përkeqësimet në ekonomi, siguri publike, e në gjendjen e demokracisë dhe institucioneve në vend.

“Asnjë qeveri nuk ka startuar me një dështim të këtyre përmasave në 23 vitet e fundit, si qeveria e sotme Rama-Meta, dështimi në raport me premtimet dhe pritshmëritë është vetëm gjysma e së keqes”, u shpreh ai.

Gjithashtu Basha, bëri një ekspoze të situatës ekonomike dhe premtimeve të qeverisë, ku sipas tij, “çdo gjë është e errët, mbi 97% e shqiptarëve paguajnë më shumë taksa, në spitale barnat po i blejnë vetë, shqiptarëve u hiqet asistenca dhe u ofrohet puna e detyrueshme. Pagat e mësuesve, pensionistët, fondi i të përndjekurve është dy herë më pak sikurse edhe fondi për kompensimin e pronave”

Putin nënshkruan dekretin për njohjen e pavarësisë së Krimesë

by

MOSKË, 17 mars / Presidenti rus, Vladimir Putin nënshkroi sot një dekret që njeh pavarësinë e gadishullit separatist ukrainas të Krimesë, njoftoi Kremlini.

Rusia duke u bazuar në vullnetin e popullit të Krimesë të shprehur gjatë referendumit më 16 mars 2014, vendosi të njohë Republikën e Krimesë si shtet sovran dhe i pavarur ku qyteti i Sevastopolit ka një statut të veçantë, sipas tekstit të dekretit të publikuar nga presidenca ruse.
Dekreti hyn në fuqi ditën e nënshkrimit të tij.
Krimeja e zaptuar prej më shumë se dy javësh nga trupat ruse, votoi dje masivisht për bashkimin e Rusisë ku referendumi u cilësua i jashtëligjshëm nga Kievi dhe komuniteti ndërkombëtar.
Parlamenti vendosi sot në unanimitet të kërkojë zyrtarisht integritetin e Krimesë në Federatën e Rusisë

MALAJZI – Fluturimi MH370: Dy pilotët e ekuipazhit epiqendra e hetimit

by

Nga Vila Bytyci/ KUALA LUMPUR– Pista e hetimit të sotëm për fluturimin MH370 u fokusua në kabinën e pilotit në lidhje me fjalët e fundit të transmetuara në tokë nga piloti i dytë, të cilat përkojnë me një interval kohor prej disa minutash me çaktivizimin e vullnetshëm të sistemeve kryesore të njësisë së komunikimit.

Në orën 01:19 të së shtunës, më 8 mars, ose 38 minuta pas nisjes së avionit Boeing 777 nga pista e Kuala Lumpurit me destinacion Pekinin, kontrolli ajror regjistroi komunikimin e fundit zanor transmetuar nga kabina e pilotimit drejtuar atij “Gjithçka në rregull, natën e mirë”.
Fjalët në anglisht (“All right, good night”), të formuluara në mënyrë të shkujdesur sipas autoriteteve malajziane vinin si përgjigje ndaj kontrollorëve të cilë njoftonin ekuipazhin se avioni po bëhej gati të linte hapësirën ajrore malajziane.
Hetimet paraprake tregojnë se ishte ndihmëspiloti ai që fliste, njoftoi sot drejtori i përgjithshëm i Malaysia Airlines, Ahmad Jauhari Yahya, gjatë një konference për shtyp.
Ky informacion mund të jetë vendimtar në përcaktimin se cili kontrollonte avionin në momentin kur u zhduk nga ekrani i radarëve civilë në lidhje me atë që autoritetet malajziane e kanë cilësuar si veprim i paramenduar.

 

Në Europa Plaza në Fier, kremtohet , “San Patrick’s Day”

by

Nga Flora NIKOLLA/

Fier, 17 Mars/ATSH/- Në  Europa Plaza, në qytetin e Fierit u kremtua sot,  Festa Kombëtare e Irlandës ose siç njihet nga Irlandezët,  ”San Patrick’s Day”, në kuadër  të një iniciative të Bashkisë së qytetit të Fierit dhe  ideatorit dhe realizuesit të Europa Plaza, artistit, Fate Velaj.

Në ceremoninë e  organizuar në Europa Plaz , ishte   i pranishëm Kryetari i Bashkisë së Fierit, z. Baftjar  Zeqo, nën kujdesin e të cilit do të organizohet kjo iniciativë e cila ka marrë përsipër të kremtojë festat kombëtare të vendeve pjesmarrëse të Bashkimit Europian, në qytetin e Fierit, i njohur si qyteti  i bashkëjetesës  dhe harmonisë.

Ekzekutimi i Himneve kombëtare të dy shteteve,(Shqipëri dhe Irlandë) shënoi nisjen zyrtare të  kësaj  ceremonie dhe ngritjen e flamurit të Irlandës , ku  ishin të pranishëm personalitete të Fierit  dhe qytetarë  Fierakë.
Europa Plaza, ideuar e projektuar nga Fate Velaj, një  artist i njohur me një karrierë brilante në Austri dhe jo vetëm , aktualisht , këshilltar pranë kryeministrit  Edi Rama për diplomacinë kulturore, u inaugurua më  24 Nentor 2012 me rastin e  100 vjetorit të Pavarësisë së Shqipërisë.

Europa Plaza, është  konceptuar  si simbol  i faktit që Shqipëria është  pjesë e Europës dhe e së ardhmes së përbashket Europiane. Duke u mbështetur në këtë  koncept, në çdo  festë kombetare të shteteve anëtare te BE, në Europa Plaza, në qëndër të qytetit të Fierit,  do të organizohet një ceremoni e veçantë e cila do të  shoqërohet me ngritjen e flamurit të shtetit  kur ai kremton  ditën e tij  kombëtare.

Pak ditë më parë në ceremoni të veçantë , në këtë shesh u organizua festa Kombëtare e Bullgarisë.Europa Plaza është një koncept që ka fituar zemrat e te gjithë diplomatëve të huaj në Tiranë dhe ka bërë jehonë  ndërkombëtare .