Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Lirohen rreth 130 asete nga shfrytëzuesit joligjorë në Kosovë

by

-Agjencia Kosovare e Privatizimit, Prokurori i Shtetit dhe Policia e Kosovës të vendosura për lirimin e të gjitha pronave shoqërore nga shfrytëzuesit joligjorë/

PRISHTINË, 26 Maj 2016-B.Jashari/Agjencia Kosovare e Privatizimit dhe Policia e Kosovës njoftuan sot se që nga marrja e vendimit nga Agjencia për lirimin e aseteve të ndërmarrjeve shoqërore nga poseduesit dhe shfrytëzuesit e paligjshëm ka arritur të bëjë lirimin e rreth 130 aseteve nga shfrytëzuesit joligjorë.

“Gjithë rezultati i arritur është mundësuar me mbështetje të plotë të Policisë së Kosovës, e cila me kërkesë të AKP-së po asiston në aksione në terren sipas nenit 26 të ligjit të AKP-së si dhe vendimeve të Prokurorive kompetente”, deklarohet në komunikatën e përbashkët.

Theksohet se, vendimi për lirimin e aseteve nga shfrytëzuesit e paligjshëm është marrë nga Agjencia, në përputhje me Ligjin e AKP-së, i cili ligj i jep autorizim Agjencisë që të administroj me të gjitha asetet në pronësi shoqërore në territorin e Republikës së Kosovës.

“AKP, Prokurori i Shtetit dhe Policia e Kosovës shprehin vendosmërinë për të vazhduar me lirimin e pronave të ndërmarrjeve shoqërore në gjithë territorin e Republikës së Kosovës pa dallim dhe siguron se të gjitha asetet e ndërmarrjeve shoqërore të cilat janë nën juridiksionin e AKP-së do të lirohen nga posedimet/përdorimet e jashtëligjshme apo uzurpimet, në përputhje me vendimin bazuar në mandatin ligjor të dhënë me Ligjin e AKP-së të miratuar nga Kuvendi i Republikës së Kosovës”, thekson komunikata.

Referuar kërkesës së AKP-së, adresuar Policisë së Kosovës për dhënie të asistencës policore në lirimin e disa objekteve në Veri të Mitrovicës e cila ka qenë e paraparë për realizim sot, e njëjta paraprakisht është shtyrë për realizim dhe kjo është bërë në bashkëpunim dhe koordinim të plotë në mes të AKP-se dhe Policisë së Kosovës.

“Andaj, referuar bashkërendimeve ndërinstitucionale të planifikuara me kohë dhe të bëra pas adresimit të shkresës së dt.18 maj 2016, njoftojmë opinionin e gjerë se nuk ka pasur planifikim të realizimit të ndonjë operacioni sot dhe nuk bëhet fjalë për dështim të shtetit apo institucioneve gjegjëse, siç potencohet në disa shkrime të portaleve të ndryshme”, thuhet në në komunikatë.

Njoftohet se ditëve të ardhshme do të ndërmerren veprime me mbështetjen e plotë të Policisë së Kosovës për lirimin e të gjitha pronave shoqërore në gjithë territorin e Republikës së Kosovës.

Kosova do thellojë reformat ekonomike dhe sociale me BE-në

by

Foto Gazeta DIELLI – Behlul Jashari: Kryeqyteti i Kosovës, Prishtina – Sheshi Skënderbej/

-Kosova është pajtuar që të themelojë një mekanizëm të pavarur për rishikim të politikës fiskale/

Bruksel/Prishtinë, 25 maj 2016/ Në një dialog ndër-ministror me BE-në, i mbajtur sot në Bruksel, Ballkani Perëndimor dhe Turqia janë zotuar se do të thellojnë reformat ekonomike dhe sociale për të fuqizuar stabilitetin makroekonomik dhe për të rritur konkurrencën dhe zhvillimin.

Në konkluzionet e aprovuara në këtë takim, u aprovuan rekomandimet për politika të secilit prej shtatë partnerëve në zgjerim, me një fokusim të veçantë në reformat strukturore.

“Një objektivë thelbësore e strategjisë së BE-së për zgjerim është rritja e zhvillimit ekonomik dhe social në të gjitha vendet tona partnere. Sot kemi fokusuar diskutimin tonë në mënyrën e zbatimit të reformave ekonomike, për të cilat jemi pajtuar me BE-në. Jam i kënaqur që të gjitha vendet në zhvillim kanë treguar angazhim të madh në këtë detyrë, përfshirë një fokusim më të madh në reformat strukturore dhe sociale”, tha Johannes Hahn, Komisioneri për Politikë Evropiane të Fqinjësisë dhe Negociata për Zgjerim, i cituar në njoftimin e dërguar sot nga Zyra e BE në Kosovë.

“Ne mbështesim plotësisht përpjekjet e vendeve në zgjerim drejt konsolidimit të mëtejshëm fiskal, veçanërisht duke pasur parasysh shqetësimet rreth niveleve të larta dhe ende në rritje të borxhit tek një numër i vendeve tona partnere. Në të gjitha vendet, besueshmëria fiskale dhe qëndrueshmëria fiskale do të përfitonin shumë nga një planifikim buxheti më transparent, nga korniza fiskale afatmesme më të fuqishme dhe paraqitje ose aplikimi konsistent i rregullave fiskale të përcaktuara mirë, të cilat mund të shpijnë tek pritjet”, tha Valdis Dombrovskis, Zëvendës President i Komisionit për Euro dhe Dialog Social.

“Në mes tjerash, Kosova është pajtuar që të themelojë një mekanizëm të pavarur për rishikim të politikës fiskale, për të siguruar se investimet publike mbahen mirë dhe zbatohen, dhe për të adresuar shkaqet themelore për normat e larta të interesit në kredi bankare. Autoritetet janë zotuar që do të zbatojnë planin e veprimit për ekonominë joformale dhe të rrisin sigurinë e energjisë, në veçanti përmes mbështetjes së masave për efikasitet të energjisë në sektorin e banimit. Kosova është pajtuar që të përgatisë një plan veprimi për të adresuar papunësinë e të rinjve, për të përmirësuar trajnimin e mësimdhënësve dhe pjesëmarrjen e femrave në tregun e punës si dhe për të fuqizuar Agjencinë e Punësimit”, tha Samuel Zhbogar, Shefi i Zyrës së BE-së në Kosovë/Përfaqësuesi Special i BE-së.

Udhëzuesi i aprovuar i politikave të përbashkëta bazohet në Programe të Reformës Ekonomike, të cilat autoritet i përgatisin për çdo vit dhe ua dorëzojnë BE-së në fund të muajit janar. Këto programe zhvillohen për tre vjet. Ato përbëjnë një kornizë të politikës makroekonomike dhe asaj fiskale si dhe reformat strukturore prioritare për rritjen e zhvillimit dhe të konkurrencës. Këto reforma strukturore shtrihen prej liberalizimit të tregjeve të energjisë, transportit dhe telekomit, duke adresuar normat shumë të lara të papunësisë, rritjen e cilësisë së sistemit arsimor, përmirësimin e mjedisit afarist dhe tërheqjen e investimeve midis tjerash.

Kjo detyrë nënkupton që të ndihmohen partnerët në zgjerim të BE-së për të rritur zhvillimin e tyre ekonomik dhe social, dhe për t’i mbështetur  ata në plotësimin gradual të kritereve ekonomike për pranim, thekson njoftimi./b.j/

 

Sot nisin punimet për gazsjellësin TAP

by

Sot mbasdite, në Selanik zhvillohet ceremonia e përurimit të fillimit të punimeve për gazsjellësin Trans-Adriatik (TAP), tubacionit që do të transportojë gaz natyror nga rajoni i Kaspikut në drejtim të Europës. Kalimi i tij nëpërmjet Greqisë së Veriut dhe Shqipërisë, duke përshkuar më pas detin Adriatik, me destinacion përfundimtar lidhjen me rrjetin italian të gazit natyror, shndërron Shqipërinë dhe Greqinë në dy nyje të rëndësishme energjetike në rajon.
Në ceremoninë e përurimit që do të hapet nga vet kryeministri grek, Alexis Tsipras, kanë konfirmuar pjesëmarrjen e tyre në nivel të lartë edhe Shqipëria, me zv.kryeministrin Niko Peleshi dhe ministrin e Energjetikës, Damian Gjiknuri; Italia, si dhe shumë vende të korridorit të ri jugor, si Azerbajxhani, Gjeorgjia, Turqia dhe Bullgaria. Gazsjellësi do të sjellë fillimisht hapjen e mbi 8.000 vendeve të punës në Greqi dhe mbi 2.000 në Shqipëri, ndërsa më pas, mijëra vende të tjera pune do të krijohen nga kontratat e reja me kompani vendase dhe të huaja, si dhe nga stimulimi i aktivitetit ekonomik. Gjithashtu përfitim do të kenë edhe qytetarët e të dy vendeve nga përdorimi i gazit natyror.
Vlen të përmendet se, 10 ditë më pas në Athinë mbërrin edhe Presidenti rus, Vladimir Putin, i cili sipas informacioneve ende të pakonfirmuara, do të sjellë propozime të reja për transportin e gazit natyror të “Gazprom”-it në BE, nëpërmjet shfrytëzimit të tubacionit në fjalë.

Kosovë-Shqipëri, ministritë e financave bashkëpunim intensiv

by

-Delegacioni i Ministrisë së Financave të Shqipërisë vizitë zyrtare në Kosovë. Mbahet tryeza “Dialogu ndërshtetëror: Të bërit biznes – sfidat e qasjes në tregjet respektive”/

-Dakordim që pas analizimit të të gjitha hapave, Porti detar i Durrësit të ketë procedura unike për eksportuesit nga Kosova, pra kjo të jetë ndalesa e vetme e bizneseve kosovare/

 PRISHTINË, 16 Maj 2016-B.Jashari/ Në Prishtinë po qëndron sot për vizitë zyrtare një delegacion i Ministrisë së Financave të Republikës së Shqipërisë, i prirë nga ministri Arben Ahmetaj, të cilin e priti ministri kosovar i Financave Avdullah Hoti. Në ambientet e qeverisë së Kosovës u mbajt tryeza “Dialogu ndërshtetëror: Të bërit biznes – sfidat e qasjes në tregjet respektive”. Në këtë tryezë u morën pjesë delegacioni i Ministrisë së Financave të Republikës së Shqipërisë i kryesuar nga  ministri i Financave Arben Ahmetaj, delegacioni i Ministrisë së Financave të Republikës së Kosovës i kryesuar nga ministri i Financave Avdullah Hoti,  si dhe përfaqësues të odave/dhomave ekonomike të të dy vendeve. Vizita zhvillohet derisa po bëhen përgatitjet për mbledhjen e tretë të përbashkët të Qeverisë së Kosovës dhe Këshillit të  Ministrave të Shqipërisë në 3 qershor 2016 në Prishtinë, në ambientet e Bibliotekës Kombëtare, të tretën pas të parës historike në Prizren në 11 janar 2014 dhe të dytës në Tiranë në 23 mars 2015.Deklaratë e përbashkët e Ministrit të Financave të Republikës së Kosovës Avdullah Hoti dhe Ministrit të Financave të Republikës së Shqipërisë Arben Ahmetaj , nga vizita zyrtare e ministrit Ahmetaj  në Prishtinë:

Ministria e Financave e Kosovës dhe Ministria e Financave e Shqipërisë, kanë një bashkëpunim intensiv me qëllim krijimin e një klime të favorshme për sipërmarrjet në të dy vendet. 

Ne kemi arritur një numër marrëveshjesh që kanë ndikim të drejtpërdrejtë në krijimin e një ambienti të favorshëm të të bërit biznes. Gjithashtu, në mbledhjen e përbashkët të dy qeverive që do të mbahet me 3 qershor, do të nënshkruhen dy marrëveshje mjaft të rëndësishme në drejtim të unifikimit të tregjeve dhe lehtësimit të procedurave. Jemi dakorduar gjithashtu për ngritjen e grupeve teknike të përbashkëta të punës për shqyrtimin e propozimeve të reja.

U dakorduam që pas analizimit të të gjitha hapave, Porti detar i Durrësit të ketë procedura unike për eksportuesit nga Kosova, pra kjo të jetë ndalesa e vetme e bizneseve kosovare. 

Një tjetër çështje e dakorduar është që shumë shpejt të bëhet njohja reciproke e të gjitha certifikatave dhe licencave të lëshuara nga autoritetet të shteteve përkatëse.

Në vlerësimin tonë një çështje mjaft e rëndësishme, me impakt të drejtpërdrejtë në shkëmbimet tregtare të zonave kufitare të dy vendeve, është që bizneseve që shtrihen në një zonë me rreze prej 20 km, t’u mundësohet shkëmbimi tregtar me procedurë të thjeshtësuar. 

Puna e Doganës shqiptare në 24 në 7 dhe dakordimi për funksionimin e kanalit të gjelbër për kalimin e produkteve të freskëta është një hap konkret në bashkëpunimin tonë.  Një progres tjetër që është bërë në bashkëpunimin tonë është edhe tek çështja e licencimit të produkteve farmaceutike.

Krijimi i një zyre të përbashkët doganore është një pikë tjetër me të cilën ne sot bashkërisht u dakorduam që të punojmë intensivisht që të realizohet shumë shpejt. Çështja e kostos së qëndrimit në terminalet doganore është një shqetësim i sipërmarrjes, të cilin jemi duke e adresuar së bashku me ekipet tona në të dy Ministritë në mënyrë që të ofrojmë së shpejti një zgjidhje në favor të sipërmarrjes.

Kosova organizon për herë të parë takimet vjetore të Konstituencave të BB-së dhe FMN-së

by

 -Në Prishtinë mbahen takimet vjetore të Konstituencave të Bankës Botërore dhe Fondit Monetar Ndërkombëtar/

*Vendet pjesëmarrëse në Konsituencat e Bankës Botërore dhe Fondit Monetar Ndërkombëtar në  këto takime vjetore nw Kosovw janë: Austria, Turqia, Sllovenia, Republika Çeke, Hungaria, Sllovakia, Bjellorusia, Luksemburgu dhe Belgjika. /

 PRISHTINË,  6 Maj 2016-B.Jashari/ Në Prishtinë sot, për herë të pare, janë mbajtur punimet e takimeve vjetore të Konstituencave të Fondit Monetar Ndërkombëtar dhe Bankës Botërore. Kosova është e anëtarësuar me të drejta të plota në Fondin Monetar Ndërkombëtar dhe në Bankën Botërore në vitin 2009, një vit pas shpalljes së pavarësisë në 17 shkurtin historik 2008. Punimet e Konstituencave të Fondit Monetar Ndërkombëtar dhe Bankës Botërore janë organizuar nga  Ministria e Financave  dhe Banka Qendrore e Kosovës. Mbledhjet e Konstituencave të Fondit Monetar Ndërkombëtar dhe të Bankës Botërore janë mbledhje vjetore ku diskutohet rreth zhvillimeve të përgjithshme ekonomike globale, sfidave rajonale, si dhe çështjeve të brendshme të Konstituencave. Gjatë punimeve të Konstituencës së Fondit Monetar Ndërkombëtar dhe Bankës Botërore në Prishtinë të pranishëm ishin ministri kosovar i Financave Avdullah Hoti, guvernatori i Bankës Qendrore të Kosovës Bedri Hamza dhe zyrtarë tjerë të lartë të institucioneve publike të Republikës së Kosovës, Delegacionet e Konsituencave të Bankës Botërore dhe Fondit Monetar Ndërkombëtar të kryesuara nga zëvendëspresidenti për Evropë dhe Azinë Qendrore në Bankën Botërore Cyrril Muller, drejtori ekzekutiv i Bankës Botërore Franciskus August Godts,  zëvendësdrejtori menaxhues i Fondit Monetar Ndërkombëtar Mitsuhiro Furusawa,  drejtori ekzekutiv i Fondit Monetar Ndërkombëtar Ibrahim Halil Canakci, si dhe përfaqësues të Korporatës Ndërkombëtare Financiare (IFC).

 Vendet pjesëmarrëse në Konsituencat e Bankës Botërore dhe Fondit Monetar Ndërkombëtar në  këto takime vjetore nw Kosovw janë: Austria, Turqia, Sllovenia, Republika Çeke, Hungaria, Sllovakia, Bjellorusia, Luksemburgu dhe Belgjika.  Gjatë punimeve të mbledhjeve vjetore të Konstituencave janë diskutuar shumë tema ekonomike me të cilat po preokupohen vendet e Konstituencave: si çmimi i ulët i naftës dhe ndikimi i saj në inflacion, ngadalësimi i rritjes ekonomike kineze, kriza e refugjatëve në Evropë dhe reformat e nevojshme që janë të domosdoshme për një rritje më të madhe ekonomike.  Gjithashtu gjatë këtyre takimeve u shkëmbyen edhe përvojat në mes të vendeve pjesëmarrëse.

 Organizimi i mbledhjeve të Konstituencave të Fondit Monetar Ndërkombëtar dhe Bankës Botërore në Prishtinë tregon shumë për rolin konstruktiv dhe partneritetin e fuqishëm që ka Kosova me Fondit Monetar Ndërkombëtar, Bankën Botërore, dhe këto nëntë shtete. Por, gjithashtu është dëshmi se institucionet e Kosovës po i forcojnë edhe më shumë lidhjet ekonomike dhe politike me organizatat financiare ndërkombëtare dhe shtetet anëtare të Konstituencave të FMN-së dhe Bankës Botërore.

 Kosova është pjesë e Konstituencës së Evropës Qendrore dhe Lindore në FMN së bashku me vendet e tjera si Austria, Turqia, Sllovenia, Republika Çeke, Hungaria, Sllovakia dhe Bjellorusia.  Këto vende dhe Luksemburgu e Belgjika bëjnë pjesë në Konstituencën e Bankës Botërore.