Presidentja e Republikës së Kosovës, Vjosa Osmani, ka pritur në takim ambasadoren e Shtetit të Izraelit në Republikën e Kosovës, Tamar Ziv.

Në takim u diskutua për bashkëpunimin në mes të dy shteteve, si dhe për marrëveshjet ndërshtetërore në fusha të ndryshme të cilat pritet të nënshkruhen së shpejti.

Ambasadorja Ziv e njoftoi Presidenten Osmani se pas kërkesës së Presidentes drejtuar institucioneve të Izraelit, qeveria e Izraelit ka shprehur pajtueshmërinë për miratimin e marrëveshjes për heqjen e vizave për qytetarët e Kosovës.

Në këtë drejtim, të dy ministritë përkatëse do të vazhdojnë me procedurat e nënshkrimit të marrëveshjes dhe qytetarët do të njoftohen sapo vendimi të hyjë në fuqi. Përmes kësaj marrëveshje, qytetarëve të Kosovës do t’u mundësohet udhëtimi pa viza në Izrael për qëllime turistike.

Presidentja Osmani e falënderoi ambasadoren Ziv për këtë vendim, si zhvillim pozitiv i cili do t’i hapë rrugë bashkëpunimit më të thelluar në mes të dy vendeve.

Tutje, me rastin e përvjetorit të Ditës së Kujtimit të viktimave të Holokaustit, Presidentja Osmani përsëriti se Kosova kujton miliona njerëz të pafajshëm të humbur në një nga kapitujt më të errët të historisë së njerëzimit, dhe se kjo ditë shërben si rikujtim për pasojat shkatërruese që rrjedhin nga urrejtja dhe paragjykimi.

Ambasadorja Ziv e informoi për situatën e sigurisë në Izrael, ndërsa Presidentja Osmani e informoi ambasadoren për zhvillimet e fundit në vend dhe rajon.

Fejton nga Rafael Floqi/

Në rrugën e ngjarjeve plot humor dhe ngjarje që mahnitin opinionin publik, nga SPAK një shprehje vjen natyrshëm në mendje: “Ndiq paranë” ose, në anglisht, “Follow the money”. Kjo shprehje bëhet edhe më thelbësore kur hedhim një vështrim në detajet e çështjes së Agron Nezaj dhe Charles McGonigal, duke u fokusuar tek lidhjet e dëshmuara dhe rrugën e parave.

Në këtë rreth, Agron Nezaj u bë burim konfidencial i FBI-së, megjithatë një pyetje po del në sipërfaqe: Pse?

Duke “ndjekur paratë”, shqetësimet dhe lidhjet fillojnë të dalin në dritë. McGonigal pranon se ka marrë 225,000 dollarë nga Nezaj dhe justifikon këtë me presionin financiar dhe shpenzimet e universitetit për fëmijët e tij. Po ku shkojmë, në një sitcom apo një dramë teatri? Pse dhe të kujt ishin paratë?

Kryeministri Rama dëshmon se nuk ka njohur Nezaj-n dhe ka qenë i pranishëm vetëm me McGonigalin. Pyetja e natyrshme që lind: Përse Nezaj bëhet burim konfidencial dhe pse McGonigal përfshihet në këtë grumbullim ngjarjesh? Ndoshta ky është momenti kur shprehja “Ndiq paranë” merr një kuptim të plotë.

Në një ngjarje të papritur që po forcon besimin tek drejtësia shqiptare, Agron Nezaj, një shqiptaro-amerikan i cili u bë burim konfidencial i FBI-së, po përballet me sfidën e Prokurorisë së Posaçme për lidhjet e tij me ish-zv. drejtorin e FBI-së, Charles McGonigal. Ngjarjet e fundit kanë tërhequr vëmendjen e opinionit publik dhe medias shqiptare, por në një atmosferë të pasigurt, një fakt mbetet i qartë: Nezaj u thirr për 6 orë në Prokurorinë e Posaçme dhe refuzoi të jepte deklarata. Kaq mjafton për të filluar të krijojmë një skenar satirik për këtë “komedi të re shqiptare”.

Çështja filloi kur deputeti demokrat Gazmend Bardhi vendosi të hedhë në arenë një paditë për hetime ndaj kryeministrit Edi Rama dhe ish-zv. drejtorit të FBI-së, McGonigal. Këtu nisi loja e shqiptaro-amerikanit Nezaj, që u bë burim konfidencial i FBI-së për të hedhur dritë mbi lobistin amerikan. Megjithatë, kur u thirr për të dalë në skenë, Nezaj e mbuloi tërë ngjarjen me heshtjen e tij që solli nostalgji për ditët e kinematografisë klasike shqiptaretw socializmit, po që përhapi si thashetheme pyetjen . ”A është bërë Neza burim konfidencial edhe për SPAK-un?

Ndërkohë, McGonigal pranoi më vonë fajësinë për të pasuruar veten me 225,000 dollarë nga Nezaj. Shpërthimi i tij komik i justifikimeve për pagesën është po aq absurd sa një sitcom i Hollywood-it.

Dokumentat e Drejtësisë amerikane sjellin detaje të hetimeve, ku paratë duket se kanë një rol kyç. Nezaj, si burim konfidencial, tregon për lidhjet e McGonigal me kryeministrin dhe sponsorizon udhëtimet e dëshmitarëve për takimet me FBI-në.

Zoti McGonigal ka pranuar të gjithë akuzat që kishin të bënin me Shqipërinë, përfshirë kontaktet me kryeministrin Rama dhe zotin Duçka.

I pyetur nga gjykatësja Colleen Kollar-Kotelly, nëse më 25 nëntor, se ai kishte “informuar Prokurorin e Departamentit të Drejtësisë … për një hetim të mundshëm kriminal për një shtetas amerikan, që ishte regjistruar për të bërë lobizëm ‘për një parti që nuk ishte e kryeministrit Rama’, zoti McGonigal u përgjigj “Po”. Në akt-padi nuk identifikohet lobuesi amerikan dhe as partia shqiptare. “Rregulli i artë është që nuk ka rregulla të arta.” shkruante George Bernard Shaw.

Por më 14 nëntor të vitit 2017, lobisti Nick Muzin, depozitoi në Departamentin e Drejtësisë, ndonëse me vonesë, dokumentet mbi aktivitetin lobues të disa muajve më parë për llogari të PD-së. Ish zyrtari i FBI-së informoi Departamentin amerikan të Drejtësisë për këtë rast, më 25 nëntor, “pasi një ditë më parë ai kishte marrë informacion mbi lobistin amerikan nga personi B”, i identifikuar si Dorian Duçka. Në atë kohë, pikërisht dy ditë më parë, më 22 nëntor, BIRN, kishte bërë publik faktin se Muzin kishte deklaruar se kishte marrë 500 mijë dollarë nga Partia Demokratike. Ndërsa në janar 2018, ish zyrtari i FBI-së, merr sërish informacion, këtë herë nga shqiptaro-amerikani Nezaj. Ky i fundit, sipas aktakuzës, e ka marrë informacionin nga zyra e kryeministrit të Shqipërisë.

Nëse dëshironi të kuptoni çdo problem në Amerikë, duhet të përqendroheni te ai që fiton nga ky problem, jo tek ai që vuajti nga ky problem.”, thoshte Dr. Amos Wilson për këto soj çështjesh.

Vitin e kaluar kur foli në parlament për këtë çështje zoti Rama tha se “koha së cilës i referohet ky moment, përkon me ditët pasi skandali kishte dalë në media këtu dhe unë apo zyra ime, nuk kishim asgjë tjetër lidhur me këtë, përveç informacioneve të dala në media se po t’i kishim, si do i mbanim, të fshehura?”, duke shtuar se “po të kisha patur çfarëdo informacioni, më shumë se ato që dolën në media, për faktin e tmerrshëm që rusët financonin opozitën më të madhe të këtij vendi për të rrëzuar qeverinë, do t’ia kisha përcjellë kujtdo që të mundja, pa asnjë diskutim, nga organizatat partnerë të ndjeshme për këto çështje dhe FBI-së patjetër, të parës fare”.

Tani pyetja shtrohet: Kush po ndjek paratë, kush i dha dhe për çfarë qëllimi?

“Ndiqni paratë. Gjithmonë ndiqni paratë.” dëshmoi Deep Throat (informatori i Watergate). Kur bëhet fjalë për korrupsion, nuk bëhet fjalë për njerëzit që mund t’u besosh; është për njerëzit që nuk mund t’u besosh. Ndaj pastaj, koha e McGonigal të dalë në skenë duke pranuar fajësinë për fshehjen e parave dhe gënjeshtrën ndaj FBI-së. Për shkeljen e sanksioneve ndaj Rusisë, shprehja “Ndiq paranë” duket se ka arritur një pikë kulmore. A mund të jetë ky një moment që do të shfaqet në komedinë shqiptare të tij?

Si përfundim, në një ngjarje që përshkon lidhjet diplomatike, paratë, dhe marrëdhëniet e dyshimta, shprehja “Ndiq paranë” bëhet një farë thirrjeje për të hedhur dritë mbi ngjarje dhe për të ndjekur rrugën e parave. Ndoshta, në fund të kësaj telenovele, do të shohim se kush ka ndjekur paratë me sukses dhe kush ka pasur një humor ta fshehur në gjithë këtë skenar, mund të pyesë me humor :

-Pse dollari shkoi tek terapisti?

-Sepse kishte shumë probleme me “ndjekjen e parave”

Dr. Bledar Kurti/

Sot më 27 janar, në përvjetorin e Ditës Ndërkombëtare të Kujtesës së Holokaustit, ne kujtojmë – e gjithë bota kujton – miliona jetë hebrenjsh të humbur gjatë Holokaustit. Kjo ditë nuk i kushtohet vetëm 6 milionë hebrenjve të vrarë nga regjimi çnjerëzor nazist por edhe miliona jetëve të tjera hebreje të shuara nga një regjim tjetër po aq makabër si ai komunist nën diktatin e Jozef Stalinit.

Ne jemi krenarë që Shqipëria ishte kombi i vetëm në të cilin numri i hebrenjve ishte më i madh pas Luftës së Dytë Botërore se para luftës, sepse familjet shqiptare, të të gjitha feve, të krishterë dhe myslimanë, mbrojtën popullin hebre në Shqipëri gjatë atyre viteve të errëta.

Asnjë hebre nuk iu dorëzua nazistëve dhe asnjë jetë hebreje nuk humbi në Shqipëri. Sepse shqiptarët e vlerësojnë jetën dhe mbrojnë dinjitetin njerëzor pavarësisht fesë dhe prejardhjes.

Shqiptarët e të gjitha feve kanë jetuar ndër shekuj në paqe, harmoni dhe tolerancë. Prandaj të gjithë ne jemi krenarë që vendi ynë është shembull për mbarë botën, me një harmoni unike ndërfetare.

Zemra e madhe shqiptare jo vetëm që u mishërua te Nënë Tereza e cila i tregoi botës dashurinë e madhe që buron nga kombi ynë, por edhe nga akte reale vetëmohimi siç ishte mbrojtja e hebrenjve në kushtet e rrezikimit të jetës së familjeve shqiptare.

Nuk ka sakrificë më të madhe se të rrezikosh jetën për tjetrin. Kësisoj, Shqipëria jonë e vogël, e munduar, e varfër dhe periferike në vëmendjen botërore, ka arsye të qenësishme historike të krenohet e të jetë ballëlart për zemrën e madhe që ka, për guximin dhe qëndresën, e mbi të gjitha për respektin ndaj dinjitetit njerëzor, pa asnjë dallim feje e kombësie.

F.S / RTKlive/

Presidentja e Kosovës, Vjosa Osmani, ka emëruar Vehbi Miftarin ambasador në Misionin e Posaçëm në Vatikan.

Nga 1 shkurti, Miftari do të udhëheqë misionin e sapothemeluar të Kosovës në Vatikan, duke lënë pozitën e këshilltarit politik të presidentes Osmani.

Lajmin e ka bërë të ditur vetë ai përmes një postimi në Facebook.

“Sot, pas tri vjetësh angazhimi si këshilltar politik i Presidentes Vjosa Osmani, e përmbylla angazhimin tim në Zyrën e Presidentes së Kosovës. Ka qenë përvojë fort e vyer në shërbim të Republikës”.

“E falënderova Presidenten për bashkëpunimin e shkëlqyer dhe besimin e saj dhe të institucioneve të vendit që nga 1 shkurti të udhëheq misionin e sapothemeluar të Kosovës në Selinë e Shenjtë/Vatikan”, ka shkruar Miftari në Facebook.

Ndryshe, Osmani dy javë më parë ka dekretuar hapjen e Misionit të Posaçëm të Kosovës në Selinë e Shenjtë në Vatikan. Ajo ka thënë se dekretimi formal i Misionit të Posaçëm të Kosovës në Selinë e Shenjtë vjen pas dy vite përpjekjesh intensive së bashku me lidershipin e Vatikanit.

Gazeta DIELLI nga korrespondenti në Kosovë Behlul Jashari/

PRISHTINË, 25 Janar 2024/ Shqiptarët e Luginës së Preshevës, rajon me shumicë shqiptare në jug të Serbisë, do fitojnë të drejta pronësore në Kosovë, duke përjashtuar në këtë rast parimin e reciprocitetit. Qeveria e Republikës së Kosovës në një mbledhje ku ka miratruar Programin Legjislativ të saj për vitin 2024 ka miratuar Projektligjin për ndryshimin dhe plotësimin e Ligjit për të Drejtat Pronësore të Shtetasve të Huaj në Republikën e Kosovës. “Me propozimin e ri nga Ministria e Drejtësisë, qytetarët shqiptarë, pra personat fizik dhe juridik nga Presheva, Medvegja dhe Bujanoci do të mund të fitojnë të drejta pronësore në Kosovë, sipas kushteve të parapara me ligj, duke përjashtuar në këtë rast parimin e reciprocitetit”, bën të ditur komunikata e dërguar nga Kryeministria.

Komunikata thekson edhe se, Qeveria e Kosovës ka “aprovuar pagesën për 375 specializantë me vetëfinancim, si dhe 21 specializantë me vetëfinancim nga Presheva, Medvegja e Bujanoci, dhe Mali i Zi”.

Kabineti qeveritar, mes tjerash, ka miratuar edhe nismën për negocimin e Marrëveshjes Financiare të Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Investime (BEI) për Projektin “Energjia Diellore Fotovoltaike në KEK – Porta Globale”.

“Ky projekt ka për qëllim ngritjen e kapacitetit gjenerues të energjisë elektrike përmes burimeve të ripërtëritshme në Kosovë. Kostoja totale e projektit është vlerësuar 107 milionë e 200 mijë euro”, vijon komunikata nga mbledhja e 186-të e Qeverisë e Republikës së Kosovës.