Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KUJTESE-156 mijë shtetas shqiptarë duhet të riaplikojnë për pasaporta për fëmijët e tyre

by

U prodhuan gabim me afat 10-vjeçar, 156 mijë fëmijë shqiptarë, riaplikim për pasaporta/
156 mijë shtetas shqiptarë duhet të riaplikojnë për pasaporta për fëmijët e tyre, për shkak të një gabimi teknik gjatë prodhimit të dokumentit biometrik në vitet 2009-2010.
Drejtoresha e sistemeve informatike në Drejtorinë e Pergjithshme të Gjendjes Civile, Miranda Harizaj, sqaron se pasaportat, për shtetasit deri në 16 vjeç, aksidentalisht janë prodhuar me afat 10-vjeçar, ndërsa duhet të ishin me afat përdorimi për 5 vite. “Siç dihet, në ligjin për pajisjen me pasaportë të shtetasve shqiptarë, afati i vlefshmërisë për shtetasit nën 16 vjeç është 5 vite. Për periudhën Prill 2009-Korrik 2010, Ministria e Punëve të Brendshme ka prodhuar 156 mijë pasaporta për shtetasit nën 16 vjeç në momentin e aplikimit, të cilët kanë pasur afat të pasaktë vlefshmërie. Afati i tyre i vlefshmërisë, në vend që të ishte për 5 vite, ishte bërë 10 vite. Kjo ka ndodhur për shkak të një gabimi teknik në sistem, që u konstatua me vonesë dhe ndryshimet e nevojshme për përmirësimin e sistemit bënë, që të identifikoheshin gjatë kësaj periudhe pasaportat e tyre. Ky korrigjim ka filluar në korrik të vitit 2010 dhe pas kësaj date është vijuar me prodhimin e pasaportave me afatet e duhura”, shprehet Miranda Harizaj, Drejtore e Sistemeve informatike. Por a janë të informuar qytetarët për këtë ndryshim? Për më tepër që mjaft familjarë udhëtojnë jashtë vendit së bashku me fëmijët në këtë periudhë për pushimet e verës? “Me konstatimin e këtij problemi, le të themi me afrimin e periudhës së skadimit të atyre pasaportave, në sistemin TIMS të kontrollit të kufirit – ku vlerësohen dokumentet e identifikimit të të gjithë shtetasve që dalin apo hyjnë në Shqipëri, – është bërë zëvendësimi. Për menaxhimin e këtij problemi, pasi e vlerësoi me ekspertët përkatës, Ministria e Punëve të Brendshme propozoi shtyrjen e afatit të vlefshmërisë së këtyre pasaportave për këta shtetas me 1 vit, në mënyrë që t’iu lihej kohë për njoftimin dhe për pajisjen me dokumentin e ri. Në këtë kuadër, ky akt kalimtar ligjor për shtyrjen e tyre me 1 vit ka hyrë në fuqi më 21 prill 2014, kohë gjatë së cilës Ministria e Punëve të Brendshme menjëherë ka realizuar planin dhe ka menaxhuar situatën për njoftimin e këtyre shtetasve që janë në list”, vijoi më tej Miranda Harizaj. Sipas Harizajt, kërkesat e shtetasve për të ribërë pasaportën për fëmijët e tyre ka ndikuar që të ketë radhë në sportele, duke qenë se gjatë verës mjaft emigrantë aplikojnë për pasaportën biometrike kur kthehen në atdhe.

Masa të rrepta në kufi për parandalimin e azilkërkuesve

by

Çeshtja e azilkerkuesve eshte bere problem ne Gjermani e ne krejt BE. Ndaj doli sot numri nje i Policise shqiptare. “Të gjithë strukturat policore janë të angazhuara për të ndaluar çdo lloj organizimi për qëllim azilkërkimi”. Kështu është shprehur Drejtori i Përgjithshëm i Policisë së Shtetit, Haki Çako në një deklaratë për mediat nga aeroporti i Rinasit ku inspektoi masat e marra nga policia për parandalimin e azilkërkuesve.
Haki Çako gjithashtu tha se Policia Shqiptare është në partneritet të ngushtë me autoritetet gjermane dhe të vendeve të tjera të BE-së për të ndaluar këto iniciativa. Ndërkaq drejtori Çako i bëri apel te gjithe qytetareve qe deshirojne te punojne ne vendet e BE-se ta bejne nepermjet procedurave ligjore.
“Këto veprime jo vetëm penalizojnë vetë qytetarët sepse u digjet mundësia për të lëvizur lirshëm për arsye turizmi apo nevoja të tjera, por krijojnë dhe një imazh jo të duhur për Shqipërinë.Por u sigurojmë që çdo mundësi që është bazë ligjore për të krijuar mundësi punësimi të ligjshme, e u sigurojmë bazën e nevojshme për të mos qëndruar nëpër kampe si dhe i krijojmë lehtësira për udhëtime të qeta.” u shpreh Drejtori i Përgjithshëm.
Çako shtoi se pikat kufitare ne Shqiperi jane nen masa te rrepta monitorimi.
Çako: “Të gjitha pikat e kontrollit kufitar në Shqipëri janë të përforcuara e të monitoruara me masa të rrepta, pasi jemi në bashkëpunim me një sërë projektesh të BE-së në konsolidimin e stabilitetin e objektivave të policisë së shtetit shqiptar”
Drejtori i Përgjithshëm i Policisë së Shteti tha se në Shqipëri kanë hyrë e kanë dalë 9 milion qytetarë në 6 maujt e parë të këtij viti, nga këta 2.2 milion të huaj që e kanë vizituar Shqipërinë
“Sot Shqipëria është ndër destinacionet më të preferuara e të frekuentuara qoftë në turizëm por edhe për investime pasi vetëm në 6 muaj të këtij viti, Shqipëria është vizituar nga 9 milion qytetarë të ndryshëm që kanë hyrë e dalë në Shqipëri. Shifër e rëndësishme është hyrja e dalja e shtetasve të huaj, rreth 2.2 milion shtetas të huaj kanë ardhur në Shqipëri për interesa të ndryshme” tha Çako.

10-fishohet numri i shqiptarëve azilantë në korrik

by

Askush nuk e di me saktësi se sa shqiptarë e lënë vendin e tyre çdo ditë, por Frankfurter Allgemeiner Zeitung shkruan se korriku ka shënuar një tjetër rekord shqiptarësh që kërkojnë azil.
Sipas FAZ, janë plot 7 mijë shqiptarë që kanë kërkuar azil në këtë muaj, ndërkohë që vitin e shkuar ishin vetëm 766, pra një rritje e dhjetëfishtë.
Gazeta më e madhe gjermane, Bild raporton për një studim të fondacionit Fridrish Ebert, që arrin në përfundimin se 66.7 përqind e të rinjve shqiptarë duan të largohen nga vendi.
Destinacioni i preferuar: Gjermania, Zvicra dhe Britania.
Shqiptarët janë në vend të parë përsa i përket dëshirës për të emigruar.Më pas vijnë kosovarët me 55 përqind dhe maqedonasit me 52 përqind.
Ndërkohë këtë javë në vendin tonë do të mbërrijnë nga Gjermania dy avionë charter me azilkërkues shqiptarë.
Lajmin për riatdhesimin e ka bërë të ditur ambasada e Gjermanisë në Tiranë. Dy avionët do të mbërrijnë në Shqipëri ditën e mërkurë dhe të enjte.
1.Të mërkurën, më 12.08.2015, ora 15.50 mbërrin në aeroportin “Nënë Tereza” nga Kasseli (Hessen) një avion charter me një numër prej 70 shqiptarësh të dëbuar.
2.Të enjten, më 13.08.2015, ora 13:00 mbërrin në aeroportin “Nënë Tereza” në Tiranë një tjetër avion charter me një numër prej 125 persona, të cilët do të kthehen vullnetarisht.
Më tej në njoftimin e ambasadës gjermane bëhet e qartë se nuk ka azil ekonomik dhe ata që janë do të kthehen, ndërsa shpenzimet për kthim do të bëhen nga vetë azilkërkuesit.
“Në Gjermani nuk ka azil ekonomik! Ndërkohë aplikimet për azil nga Shqipëria do të përpunohen më shpejt. Shpenzimet për kthimin në atdhe duhet t’i paguajnë azilkërkuesit. Ato janë më të mëdha se ndihma që marrin azilkërkuesit në Gjermani”, thuhet në njoftimin e ambasadës gjermane.
Për ta bërë edhe më të qartë dhe më të besueshme, ambasada ka bërë publike edhe një email që ka ardhur në adresë të saj më 6 gusht nga një familje shqiptare që ndodhet për azil në Gjermani.
Familja shqiptarë shpreh zhgënjimin e madh dhe kërkon kthimin ne atdhe.
“Përshëndetje,ne jemi një familje shqiptare. Para disa ditësh mbërritëm në Gjermani dhe aplikuam për azil në Mynih (München). Tre ditë më pas u transferuam në Eisenberg. Këtu po shohim se gjërat nuk janë ashtu si na thonin të tjerët kur ishim në Shqipëri. Duam të kthehemi përsëri në vendin tonë pasi kemi dy fëmijë të mitur dhe një grua të moshuar, të cilët qajnë gjithë ditën. Administrata e azilit këtu na thotë se duhet të presim katër javë dhe duhet të paguajmë vetë biletat e kthimit. Por ne i kemi shpenzuar të gjitha paratë për të ardhur këtu dhe ndërkohë nuk kemi marrë para ndihmë. Ajo çka duam është vetëm të kthehemi në Shqipëri. Ju lutem na ndihmoni!”

Kthehen 25 azilkërkues nga Gjermania/ Ju bllokohet viza Schengen

by

Kanë zbarkuar dje pasdite pasdite në aeroportin e Rinasit 25 shtetas shqiptarë që kishin shkuar në Gjermani për të kërkuar azil.
Lajmin e bëjnë të ditur burime zyrtare, sipas të cilave të gjithë personave në fjalë kërkesa u është refuzuar nga autoritetet gjermane, duke çuar në kthimin e tyre në vendlindje. 
Nga burimet mësohet se 25 shtetasve në fjalë u është ndaluar hyrja në hapësirën Schengen për një periudhë 2-vjeçare. 
Në fund të muajit të kaluar, të paktën 70 persona janë kthyer nga Gjermania, pas pesë muajsh qëndrim në kampet e azilantëve në pritje të azilit ekonomik.
Shumica e tyre, kryesisht të rinj, u kthyen me dëshirën e tyre pasi vunë re pamundësinë e fitimit të azilit në shtetin gjerman.

Emigrantët e paligjshëm dhe patentat

by

Emigrantët pa dokumente në Kaliforni tani mund të ngasin makinën në bazë të një ligji të ri të këtij shteti. Më shumë se një milion njerëz pritet të aplikojnë për patentë. Dhjetëra mijëra emigrantë tashmë kanë aplikuar. Edhe pse Kalifornia nuk është shteti i parë me një ligj të tillë, ajo ka numrin më të madh të emigrantëve pa dokumente në Shtetet e Bashkuara.
Emigrantët presin për disa orë në radhë të gjata për të hyrë në këtë zyrë ku jepen patentat, por shumica e këtyre njerëzve, përfshirë Christian Alvaradon, nuk e kanë bezdi.
“Jam shumë i gëzuar. Kam pritur një kohë të gjatë për të marrë patentën”.
Alvarado dhe motra e tij me origjinë nga El Salvadori janë emigrantë pa dokumenta.
Ai erdhi në SHBA tetë vjet më parë dhe kjo është hera e parë që ai mund të aplikojë për patentë shoferi në Kaliforni. Pasi të dëshmojë identitetin e tij dhe qëndrimin në Kaliforni, të kalojë testin e shikueshmërisë, testin me shkrim dhe testin e ngarjes së makinës, ai mund të marrë patentën.
“Gjithmonë jemi të frikësuar nga policia. Ata mund ta marrin makinën dhe duhet të paguash për ta rimarrë atë”.
Zoti Alvarado në të kaluarën është kapur duke ngarë makinën pa patentë dhe u detyrua të paguante 800 dollarë, një dënim i madh për këtë kopshtar.
Para ligjit të ri, ai dhe shumë emigrantë pa dokumente i përdornin makinat pa patentë.
Ndërsa ligji i ri lehtëson frikën e shumë emigrantëve pa dokumente, por krijon edhe shqetësime të reja. Ata shqetësohen nga dorëzimi i informacionit personal në një agjenci qeveritare dhe frika nga deportimi në të ardhmen. Por zëdhënësi i Departamentit të Transportit në Kaliforni, Armando Botello thotë se njerëzit nuk duhet të shqetësohen.
“Departamenti i Transportit në Kaliforni nuk i ndan të dhënat me autoritetet. Kjo ndodh vetëm në raste të veçanta kur dikush është i dyshuar ose hetohet për një krim. Këto raste janë specifike dhe duhet të ketë një kërkesë nga autoritetet”.
Patenta e re duket si një patent e rregullt përveç një mbishkrimi ku thuhet “Mund t’i nënshtrohet kufizimeve federale”, pra ajo nuk mund të përdoret për të udhëtuar me avion apo për të hyrë në një ndërtesë federale.
Ana Garcia e organizatës Central American Resource Center thotë se disa emigrantë kanë një tjetër shqetësim.
“Ata kanë frikë se do të trajtohen ndryshe, ata kanë frikë se mund të diskriminohen apo se policët mund ta kuptojnë që ata janë pa dokumente dhe mund të njoftojnë autoritetet”.
Por jo të gjithë e mbështesin këtë ligj të ri, thotë profesor Dan Schnur.
“Argumenti kundër projekt-ligjit për patentat për shumë vite është parë si një shpërblim për veprimet e paligjshme”.
Por profesor Schnur thotë se opinioni publik në Kaliforni ka ndryshuar në favor të emigrantëve pa dokumente.
“Shumica e votuesve të rinj të bardhë janë në favor të reformës gjithpërfshirëse të imigracionit përfshirë çështjen e dhënies së patentave sepse ata janë rritur në një shoqëri më të larmishme kulturore sesa prindërit apo gjyshërit e tyre”.
Profesor Shnur thotë se me kalimin e kohës ndryshimet në qëndrimin ndaj ligjeve të imigracionit do të përhapen edhe në pjesën tjetër të vendit.(Kortezi:Zeri I Amerikes)