Emigracion – Page 162 – Dielli

Diaspora- Festim madheshtor në Kircheim –Teck Gjermani

December 9, 2016 by dgreca

15369988_1695104327467087_2830902251375146181_o

Festa e flamurit për 28 Nëntorin madhështore dhe festive u mbajt në Kircheim –Teck Gjermani/

Shkruan Asllan Dibrani/

Kudo gëzime ,hare dhe festim përmbajtjesore po mbahen në shtetet e perëndimit. Kush me herët e kush me vonë rreth ditës së madhe të ngritjes s e flamurit tonë në Vlorë po mobilizohen qe vlerat veta ti çmojnë me ç’rast shpalli pavarësinë e vet nga perandoria osmane në vitin 1912. Po, ashtu edhe Shoqata “Kadri Zeka” nga Nürtingeni , për nderë të 28 Nëntorit festës Kombëtare dhe ditëlindjes së Legjendës Adem Jasharit,organizuan në Kircheim –Teck një tubim dinjitoz madhështor dhe me program artistik . Data e 04.12.2016 nga kjo Shoqatë u shënua në mënyrë dinjitoze dhe të kulturuar manifestimi i radhës së 104-vjetorit për ditën e pavarësisë së Shqipërisë. Salla ishte e madhe dhe plotë më bashkatdhetar. Nën antonimin e Himnit kombëtarë dhe më pas një minutë heshtje përkujtuan dëshmorët e Kombit.Në tubim kishte mjaft pjesëmarrës përveç, konsujve, z. Arjan Kashtanjeva, Besnik Miftaraj dhe bashkëpunëtorja e tyre zonja Hanife Statovci,në sallë ishin prezent edhe bashkëveprimtarët e Jusuf Gërvallës, Kadri Zekës dhe Bardhosh Gërvallës, Faridin Tafallari, Kolë Merturi dhe Nami Ramadani.

Përpos tyre ishte edhe i burgosuri politik dhe veprimtari Asllan Dibrani, Jahja Gashi, kryetar i Shoqatës “Nëna Terezë”, Fatmir Rakipi, hoxhë, Arben Berisha, ish kryetar i Klubit futbollistik në Bernhausen, Tahir Boqolli , e Muhamet Hoxhaj, veprimtar e tjerë. Zoti Xhafer Leci, Kryetar Nderi, i Shoqatës “Kadri Zeka “ uroj festën dhe ditëlindjen e komandantit legjendar Adem Jashari, përshëndeti të pranishmit dhe mysafirët qe morën pjesë në këtë mbrëmje të vlerave tona kombëtare. Selami Morina, nënkryetar, lexoj fjalën e rastit për këtë ditë madhështore…Në emër të Konsullatës së R,së Kosovës në Stuttgart, foli z. Arijan Kashtanjeva. Mirënjohjet për 15 veprimtarë të Shoqatave, klubeve dhe shoqërive i ndau Taxhidin Bakiu, kryetar i Shoqatës “Kadri Zeka “. Poeti i njohur Mentor Thaqi, recitoj një poezi të shkëlqyer për pavarësinë. Të rinjtë Besnik e Arlinda Bekteshi kënduan një këngë për Pavarësinë.

Skenën e stolisen me ngjyrat tona kuq e zi Ansambli “Pavarësia” nga Shoqata “Pavarësia” në Stuttgart, i cili shkëlqeu para masës së tubuar duke e mirëpritur me duartrokitje frenetike !

Me këtë rast u ndanë 15 mirënjohje për aktivistë të dëshmuar nga fusha të ndryshme të kulturës dhe jetës shoqërore në mërgim .Ato u ndanë nga i z.Taxhidin Bakiu – Kryetar i Shoqatës, z. Xhafer Leci dhe biznesmen . Z. Mejdi Laçaj, moderoj në këtë manifestim nga e cila la përshtypjet e se është akoma në vlugun e vullnetit te madh ne aktivitetet e ndryshëme në kohën e veprimtarisë për Pavarësinë e Kosovës..Mirënjohje ju ndanë këtyre personave si me poshtë :

1.- Vitor Spaqi, kryetar QKSH Suttgart,
2.- Osman Ferizi, Shoqata Sali Çekaj Pfaffenhoffen,
3.- Naser Hoxhajj, Shoqata Dardania Mannheim,
4.- Gjylije Lecaj, veprimtare e dalluar shumëvjeçare,
5.- Lekë Preçi, arsimtar dhe veprimtar shumëvjeçar,
6.- Zef Prenka, veprimtar dhe drejtues i revistës Rrezore,
7.- Hazbi Sylejmani, Imam në Xhaminë e Stuttgartit,
8.- Qani Rexhepi, drejtues i Radio Kosova Stuttgart,
9.- Nue Lekaj, veprimtar dhe zyrtar i Komunës Wernau,
10.- Afrim Sylejmani, ish kryetar shumëvjeçar Klubi Kulturor “B.Gërvalla”në Ludwigsburg,
11.- Baki Mustafi, kryetar i Shoqatës “Pavarësia”në Stuttgart,
12.- Lon Karrica, Këshilltar i Kishës Katolike në Stuttgat,
13,- Halil Zemaj, sekretar i Shoqatës “Atdheu “në Schwäbisch Gmü
14.- Bedrush Nezaj, kryetar i Klubit Kulturor “Bardhosh Gërvalla “
15.- Rrustem Selca,veprimtar, baletistë-koreografë(pas vdekjes)…
Ndërkohë u përvodh një kohe e shkurtër sa për ti kujtuar tre atdhetar te këtij rrethi qe lane gjurmët të mëdha të cilët nuk jetojnë më, Qemajl Morina, Emin Fazlija dhe Zenel Jashari.
Kënduan këngëtarët e mirënjohur: Bujar Osaj, Afërdita Bajrami dhe instrumentistët vëllazërit Gjocaj.

Pamje e një grupi të ftuar në këtë festë madhështore. Për mos me i hyrë në hak e falënderojmë publikisht zotin Taxhidin Bakiu – Kryetar i Shoqatës, qe shtroj darke me mjetet në këtë mbrëmje.

Pastaj, festa vazhdoi më pjesën argëtuese ku e tërë masa u kënaqën më muzikë dhe valle më motive dhe veshje kombëtare deri në ora 23 qe u përmbyll ky manifestim i shenjtë në thesarin e vlerave tona kombëtare.

Foto-Reportazh Kircheim-Teck Dhjetor 2016

NJË VATRAN PËR PARLAMENTIN E MAQEDONISË

December 2, 2016 by dgreca

Intervistë e Editorit të Gazetës”DIELLI” në SHBA , Dalip Greca, me kandidatin për deputet, vatranin dhe biznesmenin e sukseshëm, prej 13 vitesh në Dibër, z. Ibrahim Kolari./

* Përse votuesit duhet ta votojnë Ibrahim Kolarin?/

I.Kolari: Sepse Ibrahim Kolari, ka një rezyme të pastër si Loti, është i pakorruptuar, u sjell shpresën, e një njeriu që vjen nga SHBA dhe njeh rregullat e demokracisë së pastër, -demokracisë amerikane. Unë, si veprimtar i dalluar në USA, Kosove, Shqiperi, dhe gjithe trojet shqiptare, sjell një frymë të re. Po ashtu unë kam më shumë se tre dekada në Vatër, në Bordin e saj, si dhe kontribues në Ligën Qytetare Shqiptaro Amerikane, ç’ka më bën më të sigurtë në përcjelljen e frymës Kombëtare. Për mua Vatra ka qenë një Universitet më vete….Kam 13 vjet që kam cuar investimet e mia në Diber…/

NGA DALIP GRECA/

Mesazhi: I nderuar z. Kolari, në emër të Kryesisë së Federatës VATRA në SHBA dhe Gazetës së Saj “Dielli” uroj që të dilni fitues në zgjedhjet e afërta Parlamentare për në Kuvendin e Maqedonisë. Vatranët dhe lexuesit e Diellit po e ndjekin me emocion e vëmëndje garën tuaj. Tash që fushatës po i afrohet fundi, do të donim për të informuar më mirë vatranët dhe lexuesit e Diellit në SHBA,Kanada, Australi, Europë, vendlindje, të sillnim më shumë informacion përmes bashkëbisedimit në online.

Ibrahim Kolari: Eshtë kënaqësi të bashkëbisedoj me gazetën më të vjetër të botës shqiptare,zërin e vatranëve, që vijon të botohet në Shtetet e Bashkuara të Amerikës që prej 107 vitesh.

Pyetje: Si po ndjeheni tash që dita e zgjedhjeve është në prag? Sa optimist jeni për fitoren?

I.Kolari: Natyrisht ndjehem shumë mirë. Kam përcjellë mesazhe të qarta për elektoratin duke e garantuar se gjithçka kam premtuar do ta realizoj gjatë mandatit tim. Jam i gatshëm t’i shërbej popullit tim. Jam optimist për fitore. Fitorja do të jetë në anën tonë sepse ne sjellim shpresë për ndryshim.

Pyetje: – Si e kanë pritë bashkatdhetarët kandidaturën e një vatrani, e një biznesmeni, që po kontribuon aq shumë në vendlindjen e vet prej 13 vitesh?

I.Kolari: Bashkatdhetarët dhe Vatranet, prej momentit kur u shpall kandidatura ime, reaguan pozitivisht. Unë mora urime të shumta për të fituar mandatin e deputetit, më ofruan mbështetje të pakufishme. Unë nuk do t’i zhgënjej, do të luftoj deri në momentin e fundit, kur të mbyllet fushata, me 11 Dhjetor 2016.

Pyetje: – Ju e provuat si kandidat i pavarur në zgjedhjet lokale për mandatin e kryetarit të Dibrës, por nuk ia dolët, edhe pse fituat shumë vota. Si e justifikoni rikthimin, jo si kandidat i pavarur por me mbështetje politike?

I.Kolari: Po ju them një fakt: Ne vitin 2015, kur lideri i Opozites Maqedonase z. Zoran Zaev, shpalli të dhënat nga përgjimet-bomba, që tronditën Maqedoninë; doli dhe fakti se votat e mia, si kandidat i pavarur, ishin manpuluar, ishin vjedhur, madje edhe blerë me $20.00 për çdo votues(për dibranët e varfër janë shumë edhe 20 dollarë). Unë nga ana ime e kisha konstatuar manipulimin, vjedhjen, dhe e denonçova me forçë, kritikova ashpër Komisionin Qendror të Zgjedhjeve në Shkup, mirëpo ishte e kote mbasi VMRO & BDI ishin ne koaliçion te ngushte, të lidhura fort si vëllezërit siamezë dhe mbrojtën me forçë manipulimin. Ata ishin regjizoret dhe ekzekutuesit e maniopulimit. Unë isha pa mbështetje për të mbrojtë votat që dibranët mi patën dhënë.

Pyetje:-Si do t’i përgjigjeshit pyetjes: Përse votuesit duhet ta votojnë Ibrahim Kolarin?

I.Kolari: Sepse Ibrahim Kolari, ka një rezyme të pastër si Loti, është i pakorruptuar, u sjell shpresën, e një njeriu që vjen nga SHBA dhe njeh rregullat e demokraçisë së pastër, -demokraçisë amerikane. Unë, si veprimtar i dalluar në USA, Kosove, Shqiperi, dhe gjithe trojet shqiptare, sjell një frymë të re. Po ashtu unë kam më shumë se tre dekada në Vatër, në Bordin e saj, c’ka më bën më të sigurtë në përçjelljen e frymës Kombëtare. Për mua Vatra ka qenë një Universitet më vete.

Jam nga të paktët shqiptaro-amerikan që fitimet në shtetin amerikan i kam sjellë në vendlindje, ku po jap kontribut me investimet e mia, duke punësuar popullin tim dhe duke zbutur varfërinë e papunësinë. Shumë herë qytetarët e Dibres më drejtohet per shume halle, per çdo dite duke mu ankuar se u mungon sigurimi shendetsor, duke mu ankuar për mungesën e vendeve të punës, për jetën e vështirë, ku mungon shpresa për një të nesërme të pasigurtë. Unë konstatoj se qytetartë janë të pasigurtë për të nesërmen, pa perspektivë, të friksuar deri në palçë nga partitë politike, nga pushteti.Të gjithë këtu, si të moshuarit ashtu edhe të rinjët ndjehen të pakënaqur nga pushteti. Unë shpresoj shumë se do të jem fitues në këto zgjedhje sepse kam çfarë u jap qytetarëve, kam garanci karakterin tim, përvojën që sjell, aftësitë, investimet e mia në vendlindje.

Me Experiencen time, dhe me mbeshtetjet e popullit dibran si në Diber ashtu edhe ne diaspore do të jemi fitues ne keto zgjedhje.

Pyetje- Sa ju ndihmon fryma Kombëtare e Vatrës dhe kontributi juaj prej më shumë se 30 Vjetë në Vatër?

I.Kolari: Natyrisht që fryma vatrane që unë sjell këtu në Dibër është një arsye më shumë përse qytetarët dibranë duhet të votojnë për mua. Vatra ka të shenjtë çështjen Kombëtare dhe me këtë frymë jam edukuar unë. Vatra ka ndikimin e vet,jo vetëm në diasporë por edhe në të gjitha trevat etnike të banuara nga shqiptarët, pra edhe këtu në Maqedoni, edhe në Dibër. Në Mandatin tim në Parlamentin e Maqedonisë, do të keë edhe mbështetjen e Vatrës, edhe frymën e Vatrës. Unë do të jem një zë I dobishëm për popullin tim, unë besoj në Demokraci dhe sjell përvojën e demokracisë amerikane, ku kam qenë I përfshirë aktivisht, me lidhje në politikën amerikane. Si pjesë e Ligës Qytetare Shqiptaro Amerikane dhe Vatrën, lidhjet e mia me politikën amerikane, veçanërisht me Republikanët e Presidentit të zgjedhur Donald Trump, do të jenë të dobishme për elektoratin tim.

Zeri im do të jete shume i fuqishem ne Parlamentin e MK, mbasi besoj ne Demokraci, dhe në shtetin ligjor. Pa zbatim korrekt të ligjeve nuk funksionon shteti,nuk ka ekonomi të zhvilluar, kjo është fryma që sjell unë.

Pyetje – Ju keni drejtuar Shoqatën Atdhetare “Dibra” në SHBA”, përbën ky fakt një plus në konkurimin Tuaj?

I.Kolari: Shiko, unë jam dibran, jamë pjesë e popullit tim.Kjo ka qenë arsyeja që po u kërkoj votën qytetarëve të mi, por edhe mandatin që më patën dhënë dibranët e Amerikës për ta drejtuar shoqatën, përbën një besueshmëri Plus.

Sherbeva në Shoqatën Demokratike Dibrane në SHBA për dy mandate të suksesshme. Unë do të jemë përherë në anën e dibranëve dhe askush nuk do t’më infektojë nga mikrobi i korrupsionit. Unë do të jem një avokat i fuqishëm i qytetarëve që përfaqësoj. Në fund të mandatit unë jam i bindur se do të jem po aq faqebardhë sa ç’jam para hyrjes në Parlament.

Pyetje:- Po formacioni i dr.Seles, që keni zgjedhur, sa ju ndihmon në mision tuaj për të qenë pjesë e Parlamentit?

I.Kolari: Se pari, kur une pranova ftesen nga dr.Sela qe te behem pjese LRPDSH, e Pyeta z. Sela per Platformen politike, për motivin e marrjes së tij me politikë, pashë rezymenë e tij, dhe u binda se une tek formacioni i tij gjeja veten dhe e pranova bashkëpunimin. Sot ne jemi në ALEANCE per Shqiptaret, kemi bërë bërë kualicion me dy partitë të tjera, UNITETIN që ka në krye Gjeneralin, Gezim Ostrenin, dhe RDK, me kryetar , Vesel Mehmeti. Kemi gjëra të përbashkëta dhe luftojmë me një Platformë që do të rikthejë shpresën e humbur të qytetarëve. Jemi një formacion politik qe besojmë se do të kurorëzohemi me fitore, natyrisht nëse do të respektohet ligji i zgjedhjeve, nëse zgjedhjet do të jenë të qeta dhe demokratike.

Pyetje: Çfarë mendoni Ju se i mungon Dibrës dhe çfarë do t’i jepni Ju asaj.

I.Kolari: Z.Editor i Diellit; Dibra per çdo dite po zbrazet nga nataliteti, por edhe po shkatrohet nga infrastruktura, ish,Myftiu i Dibres, sot Kryetar I Dibrës, po e drejton Dibren si mos më keq, po e keqmenaxhon qytetin, nuk respekton ligjin. Të gjitha premtimet e tij elektorale i ka marrë era, asgjë nuk ka realizuar. Ai po e drejton Dibrën sikur ta ketë çiflik të tij, nuk ka një plan urbanistik, nuk ka ujë në periudhën e Verës kur vijnë emigrantët, shumë punime në qytet nisin dhe nuk përfundojnë jo për një muaj e dy, por me vite, mbeten nëpër këmbë. Kur bashkëbisedoj me qytetarët, më thonë se janë shpresëhumbur, vetëm vizat për të ikur mund t’i shpëtojnë nga jeta mizerabël që bëjnë, ku mungon gjithçka. Duke qenë se unë vij nga Diaspora, e di se çfarë u duhet ofruar qytetarëve dibranë. Jam i bindur se Misioni im do të jetë i dobishëm për dibranët.Unë kam premtuar në elektorat se pagën time të deputetit do ta përdor për studentët e elitës dibrane, që nuk kanë mundësi financiare për t’u shkolluar.

– Cili është mesazhi Juaj për dibranët në prag të zgjedhjeve?

I.Kolari: Mesazhi im është i thjeshtë: Dibranë, ma jepni votën sepse do të jem zëri dhe shërbëtori Juaj në Parlament. Kam që në vitin 2003, që solla nga SHBA në Dibër investimet e mia, dhe nuk jam larguar edhe pse nuk kam pasë mbështetje, ç’ka tregon vendosmërinë time për të qenë pranë Jush.

Unë u bëj thirrje bashkqytetarëve të mi dibranë që së bashku ta largojmë me votë të keqen që është instaluar në Maqedoni që nga viti 2001, duke u bërë gangrenë e Demokracisë.Ju risjell në vëmendje dibranëve dhe të gjithë shqiptarëve, video incizimin që shpërndau në FB Gazmend Kërkuti, duke iu drejtue dibraneve, m’jaft i duartrokitët ata qe ju shkatërrojnë per çdo dite, ata qe vendin e kane shnëdrrue ne Anarki.. Dibranet jane ata qe lotojnë jo vetem në morte, kur vajtojne, por fatkeqsisht edhe dasmat po i lajne me Lot…Le t’i themi ndal këtij relaiteti fatkeq të gatuar nga pushtetarët aktualë.MJAFT!

Partia Aleanca per Shqiptaret , me jep mbështetje te jashtzakonshme… Besoj se ketij vendi do i kthehet dinjiteti. Qytetarë, Ju garnatoj, ne nuk jemi Ata, Jemi Ndryshe..!

Zoti e bekoftë popullin shqiptar, Zoti i bekofte Shtetet e Bashkuar të Amerikes, dhe falenderim i veçantë per shpëtimin e Kosovës..!

-Faleminderit për Intervistën

Nju Jork-Dibër, 2 Dhjetor 2016

FILADEFIA, KRONIKË E DITËVE, ME FLAMURIN KOMBËTAR SHQIPTAR

December 1, 2016 by dgreca

Nga Llazar Vero/Filadelfia,SHBA/

Pesëmbëdhjetë vite më parë e elektronike, te ndërtesa e lartë e PECO-s, me urimin për ditën e Pavarësisë së Shqipërisë dhe, më e rëndësishmja, ngritja e Flamurit tonë Kombëtar te sheshi i Bashkisë së qytetit, filluam me një mbrëmje festive për Ditën e Flamurit. Kështu vazhduam për disa vite me radhë, por me ndryshime nga viti në vit.

Pastaj erdhi viti 2012, 100-vjetori i Pavarësisë së Shqipërisë dhe diçka më shumë ndryshoi. Shoqata Atdhetare-Kulturore “Bijtë e Shqipes”, në qytetin e Filadelfias i nisi më herët përgatitjet. Porositi më shumë flamuj, jo vetëm për manifestimin dhe mbrëmjen festive, por edhe për t’i shpërndarë ndër familjet e bashkatdhetarëve tanë. Bluzat e kuqe, me shqiponjë, flamuj sticker për mbrëmjen dhe manifestimet dhe realizimi i një reklame ishin të rejat, që e pasuruan këtë ditë të shënuar për Kombin tonë. I njëjti skenar edhe për dy vite të tjerë që pasuan.

Dhe erdhi 2016-a, më e pasur me veprimtari:

1)20 Nëntor: Parada e Thanksgiving-ut, me Flamurin tonë

Ajo zhvillohet rregullisht, për 40 vite me radhë, në Northeast të Filadelfias. Ne do të merrnim pjesë për herë të parë. Ishte nisma e antarit të Këshillit Drejtues të Shoqatës, Sadik Elshani, pjesëmarrja jonë në këtë veprimtari dhe mbështetja nga të gjithë antarët e këtij këshilli, realizimi i kësaj veprimtarie, që ishte edhe një risi për vetë këtë paradë, ku marrin pjesë, çdo vit, me dhjetëra e dhjetëra organizata, shkolla dhe institucione të tjera të ndryshme. Shoqata jonë do të merrte pjesë me nxënësit e Shkollës Shqipe “Gjuha Jonë”, mësues dhe prindër të fëmijëve dhe antarë të Këshillit Drejtues të kësaj Shoqate etj. Fëmijët ishin veshur me kostume kombëtare dhe ndër duar mbanin flamurët e vegjël të Amerikës dhe Shqipërisë. Të rriturit, me flamuj të mëdhenjë të dy vendeve, ecnin pas fëmijëve. Dy ditë më parë, nënkryetari i shoqtës Dritan Matraku kishte siguruar një numër të mirë flamujsh shqiptarë dhe amerikanë, të mëdhenjë dhe të vegjël. Në krye të grupit tonë printe makina e kuqe, me një shqiponjë të madhe, të pikturuar në kapakun e motorit dhe në dy anët e saj ishin shkruar dy emra të dashur: SHQIPËRIA dhe KOSOVA. Labinot Zogaj, një i ri 17-vjeçar, i sapo ardhur nga Prishtina, ishte shoferi dhe përgjegjësi i muzikës, që do ta shoqëronte grupin. Bashkë me të ishte i vëllai, Arlindi dhe shoku i tyre nga Vlora, Elion Meminaj, me detyrën e flamurmbajtësëve.

Ishte një ditë shumë e ftohtë për Filadelfian. Temperatura i afrohej zeros Celsius. Por të gjithë, të mëdhenjë dhe të vegjël, sikur ngroheshin nga këngët dhe marshet atdhetare dhe valëvitja e flamurëve, shqiptarë dhe amerikanë.

Shikuesit, në të dy anët e Frankford Ave., të tërhequr nga muzika, kostumet kombëtare dhe flamurët e shumtë mbi kryet tona, herë pyesnin dhe herë thërrisnin: “Albania, Albania !”

2) 25 Nëntor: Ngritja e Flamurit tonë Kombëtar

Bashkia e Filadelfias caktoi datën 25 Nëntor për ceremoninë e ngritjes së Flamurit tonë Kombëtar. Ai do të qendronte i ngritur deri më datën 29 Nëntor 2016.

Që në mëngjes herët, anëtari i Këshillit Drejtues të Shoqatës “Bijtë e Shqipes”, Haki Çollaku kishte vendosur dekorin festiv, të përgatitur nga ai prej ditësh më parë, një kopyim flamurësh, shqiptarë e amerikanë dhe në mes të tyre portretet e heronjëve tanë kombëtarë, Gjergj Kastriot Skënderbeu dhe Ismail Qemali.

Në një kënd të ballkonit gjigand, përball ndërtesës së adminstratës së Bashkisë së Filadelfias, Dj Ervin Cara dhe kameramani “veteran” Florian Bezhani po përgatiteshin për fillimin e ceremonisë. Nga të gjitha drejtimet vazhdonin të vinin bashkatdhetarë të moshave të ndryshme, të veshur si për festë. Kryetari i Shoqatës sonë,Tajar Domi kalonte sa nga nëra anë në tjetrën, duke takuar të sapoardhurit,duke kontrolluar nëse çdo gjë ishte gati. Në lëvizje ishin të gjithë antarët e Këshillit Drejtues: nënkryetari i saj Bujar Gjoka, sekretari Vlashi Fili, Llazar Vero, Bujar Çela, Bashkim Bërdufi, Suela Teme, Sadik Elshani etj. Ndërkohë, nga një kënd i këtij sheshi vijnë një grup të rinjësh, nxënës të Northeast High School. Nuk ishin pak, 20-30-40 djem dhe vajza, që na kanë shoqëruar çdo vit në manifestimet e ngritjes së Flamurit, që nga 100-vjetori i festimit të Pavarësisë së Shqipërisë. Të gjithë ndjehemi më mirë, kur kemi këta të rinjë mes nesh. Ata janë të lidhur shpirtërisht me Flamurin, me Shqipërinë, me traditat më të mira të vendit tonë. Para pak kohësh, ata krijuan në shkollën e tyre “Alba Club”, një qendër që do t’i mbajë ata më afër njëri-tjetrit dhe atdhedashurisë. Disa ishin të veshur me bluza të kuqe, ku spikaste shqiponja jonë dykrenare dhe të tjerë me flamujt ndër duar, u futën vrullshëm nën ritmet e valleve tona popullore. Dhe i kërcejnë aq bukur dhe me aq krenari e dashuri, sa do t’i kishin zili edhe profesionistët.

Pastaj erdhi çasti për ngritjen e Flamurit. Pranë shtizës afrohet çifti Elvira dhe Besnik Budo, ndër të parët anëtarë të Shoqatës “Bijtë e Shqipes”. Pas nderimit të Himnit të Shteteve të Bashuara të Amerikës, dëgjohen tingujt e Himnit tonë Kombëtar dhe Flamuri ynë filloi të ngrihej lart dhe më lart në shtizë, pranë shtizës së flamurit amerikan. Të gjithë janë të mbushur me emocione në këta minuta dhe me kokën lart shoqërojnë ngritjen e Flamurit tonë. Pas kësaj, të pranishmit i përshëndeti Llazar Vero, anëtar i Këshillit Drejtues të Shoqatës. Në emër të Bashkisë së Fildelfias përshëndeti znj. Hani Vhite. .

Festa vazhdoi ndrmet tingujve të këngëve nga grupi fëmijëve të shkollës shqipe “Gjuha Jonë”.Nën drejtimin e mjeshtrit Hamdi Gjana ata kënduan dy këngë patriotike, si dhe vallet shqiptare kërceheshin aq bukur nga të rrinjtë tanë.

Në mbyllje të kësaj ceremonie të bukur, Tajar Domi i ftoi pjesëmarrësit në mjediset e Qendrës Kulturore të Shoqatës, për të festuar dhe gëzuar së bashku.

Për mbrëmje të tilla Shoqata jonë ka më shumë përvojë. Dritani, Llazari dhe Hakiu me kohë kishin biseduar me drejtues të restorantit për menunë, pijet dhe çdo gjë tjeter të nevojshme, për mbarëvajtjen e kesaj mbrëmjeje. Kryetari i Shoqatës kishte siguruar këngëtarët e njohur: Altin Sulku, Anjeza Ndoi, Nexhip Dida, bashkë me instrumentistët, që ishin të gjithë të mirë. Me zërat e tyre të bukur, ata sollën këngë nga të gjitha krahinat e vendit tonë, duke plotësuar kështu kërkesat e tërë pjesëmarrësve, në këtë mbrëmje.

Por, përveç muzikës, këngëve dhe valleve, mbrëmja kishte edhe një kronikë tjetër. Pas ekzekutimit të Himneve të Amerikës dhe Shqipërisë, nënkryetari i Shoqatës, Dritan Matraku, me një fjalë të shkurtër, i përshendeti tërë pjesëmarrësit dhe u uroi të gjithë bashkatdhetarëve Ditën e Pavarësisë dhe të çlirimit të Atdheut. Më vonë, sekretari i Shoqatës, Vlashi Fili, në emër të Këshillit Drejtues të saj, ndau disa vlerësime. Me vlerësimin “Nderi i Komunitetit” u nderua Tajar Domi; me vlerësimin “Njeriu i Vitit” u nderua Bujar Gjoka, nënkryetar dhe shef i sektorit të financës së kësaj Shoqate; me “Çertifikatë Mirënjohje” u nderuan anëtarët e Shoqatës: Sami Zaimaj dhe Eldjon Pajollari. Përsëri këngë dhe valle nga të gjitha krahinat dhe, ndërmjet tyre, njoftime e falenderime të tjera. Një nga këto ishte dhe falenderimi që Llazar Vero bëri, në emër të Shoqatës, për djemtë dhe vajzat e Northeast High School, që manifestuan me këngë dhe valle gjatë ceremonisë së ngritjes së Flamurit në qëndër të Filadelfias. Pranë tij ishin dhe dy nga pjesëmarrësit në këtë manifestim, Arjol Shpuza e Toni Hasani, dy nga valltarët më të mirë dhe më të palodhur të këtij grupi. Në fund të falenderimit të tij, në shënjë mirënjohjeje, ai tha se Shoqata jonë, me ndihmën e bashatdhetarëve, do të sigurojë 20 kostume kombëtare shqiptare, për grupin e vallëtarëve të kësaj shkolle.

Mbrëmja festive dukej sikur nuk do të kishte fund. Shumë vonë, pas orës 23.00 filluan largimet e para. Bashkatdhetarët tanë ishin më të gëzuar, më të dashur dhe të ngrohtë me njëri-tjetrin. Ishte Flamuri, që i kishte bashkuar.

4)28 Nëntor: Përsëri për Flamur, në Harrisburg

Ditën e hënë, në mëngjes herët, një varg makinash, me drejtues dhe anëtarë të Shoqatës “Bijtë e Shqipes”, nisen nga Filadelfia, drejt Harrisburgut, kryeqytetit të shtetit të Pensilvanisë. Ndërmjet tyre ishte edhe makina e kuqe, me shqiponjën dykrenare. E drejtonte Labinot Zogaj, që udhëtonte me mikun e tij, të riun vlonjat, Elion Meminaj dhe të të vëllanë, Arlind Zogaj.

Në bashkëpunim me zyrën e Zëvëndësgovernatorit, Departmentit të Shtetit dhe Shoqatës së Trupave Konsullore në Harrisburg, do të organizohej ceremonia e Ditës së Pavarësisë së Shqipërisë. Ceremonia do të zhvillohej në Harrisburg Capital East Ëing Rotunda. Mjedisi qe zbukuruar me flamurët e Shqipërisë, Amerikës, Shtetit të Pensilvanisë etj. Në krahë të tyre ishin vendosur dy tavolina, që paraqesnin në foto kostumet tona kombëtare dhe punime artistike tradicionale shqiptare.

Pas përshëndetjeve të rastit, fjalën e mori z. Pedro Cortes, Sekretar i Shtetit të Pensilvanisë. Pasi ua uroi mirëseardhjen të pranishmëve, foli për Ditën e Pavarësisë së Shqipërise dhe marrëdheniet miqësore ndërmjet dy vendeve tona dhe për emigrantët shqiptarë në Pensilvani, që japin ndihmesën e tyre të vyer në këtë vend etj. Pas kësaj u ekzekutuan Himnet Kombëtare të Amerikës dhe Shqipërisë. Më tej, e mori fjalën Jimmy Daku, përfaqësues i Shqipërisë në Shtetin e Pensilvanisë, i cili foli shkurt për peshën e Ditës së Pavarësisë, në historinë e Shqipërisë. Fjala e tij u pasua nga përshëndetja e kryetarit të Shoqatës Atdhetare-Kulturore “Bijtë e Shqipes”, në Filaddelfia, Tajar Domi. Shkurtimisht, ai paraqiti rrugëtimin historik të popullit tonë për pavarësi dhe ndihmesën e Amerikës për mbrojtjen e saj nga fqinjët grabitqarë. Pasi theksoi se kjo ndihmesë konkretizoi edhe pavarësinë e Kosovës, ai dha disa shembuj të ndihmesës së emigrantëve shqiptarë në Amerikë, në të gjitha fushat: Arsim, kulturë e art, shkencë dhe biznese.

Ceremonia vazhdoi me paraqitjen e dokumentit, për kremtimin e Ditës së Pavarësisë së Shqipërisë, të dalë nga Zyra e zëvendës Governatorit Mike Stack. Dokumentin e lexoi z. Matthe Franchak, shef i Personelit të kësaj zyre.

Ceremonia vazhdoi me përshëndetjen e z. Peter Longstreth, President i Shoqatës së Trupave Consullore të Filadelfias dhe Consull Nderi i Republikës së Uruguajt. “Unë jam president i konsujve të 44 vendeve -tha ai me mënçuri dhe humor,- por asnjë nuk është më i rëndësishëm se Shqipëria.”

Veprimtarinë e mbylli, midis një atmosfere me të vërtetë miqësore, sekretari i Shtetit të Pensilvanisë, z. Pedro Cortes. Ndërkohë, u shkëmbyen dhurata simbolike.

Pastaj për pjesëmarrësit u organizua vizita në zyrat e Zëvendësgovernatorit, Mike Stack, të sekretarit të Shtetit Pedro Cortes, në sallat e Kongresit dhe të Senatit të Pensilvanisë etj.

…Ishte një ditë e bukur dhe e mbushur me mbresa të bukura dhe ndjenjë krenarie për mikun e madh, Shetet e Bashkuara të Amerikës.

Një vit i madh na pret përpara: 105-vjetori i Pavarësisë së Atdheut tonë të dashur.

Filadelfia, Nëntor 2016

LAJM MORTOR- NDERROI JETE NE NJU JORK ZIZA GECAJ BAJRAKTARI

November 30, 2016 by dgreca

Ka nderruar Jete ne moshen 83 vjeçare, nena e Harry Bajraktarit, motra e Rrustem Gecaj- Ziza Gecaj Bajraktari  /

Ne Foto: Ziza Gecaj Bajraktari  1933-2016/

Gazeta “Dielli” ka marre kete njoftim nga familja Bajraktari dhe Gecaj: Me dhimbje dhe pikëllim të thellë lajmërojmë farefisin, miqtë, dashamirët dhe komunitetin tonë në SHBA se sot, me 30 nentor, në New York në moshën 83 vjeçare, ndërroi jetë nëna jonë e dashur.

Ajo vdiq duke na lënë të përlotur, por krenarë që patëm një nënë të dashur dhe bujare e cila na rriti, edukoi dhe tek ne mbolli dashurinë e pakufishme për familje dhe atdhe.

Gjithmonë do të jemi borxhli ndaj saj dhe i përjetshëm do të jetë kujtimi për të.

Funerali do të mbahet të premten më 2 dhjetor, 2016

prej orës 2:00 pas dite deri në orën 9:00 të mbrëmjes në

Coxe & Graziano Funeral Home

767 E. Boston Post Road, Mamaroneck, NY 10543

Tel: 914-698-5968

Varrimi i të së ndjerës do të bëhet të shtunën me 3 dhjetor, 2016 në Washington Memorial Park

855 Canal Rd., Mt. Sinai, NY 11766

Tel: 631-473-0437

Ceremonia lamtumirëse fillon në orën 11:00 paradite në Chapel të varrezave, kurse varrimi menjëherë pas ceremonisë.

Të pikëlluarit: Djemtë, Harry dhe Miftari, vajzat Nurija, Litafetja dhe Hatemja dhe familja e gjerë Bajraktari,

Vëllau, Rrustemi, motra Ajmonja dhe familja Gecaj

PËRTEJ PERDES SË QELQTË

November 30, 2016 by dgreca

Nga Grigor Banushi/*

Kur isha fëmijë, më ka qëlluar dy a tri herë të shkoja në Radio Tirana ( e vetmja në atë kohë) dhe ajo që më impresiononte shumë ishte perdja e qelqtë pas mikrofonit ku më duhej të flisja apo të recitoja ndonjë poezi. Sa herë shkoja në Radio, madje më qëlloi të merrja pjesë edhe në konkurset radiofonike kur isha në shkollë të mesme, dritarja e madhe, përtej së cilës shihej çdo gjë por nuk dëgjoj asnjë tingull, ma shtonte kërshërinë dhe më mbushte me mister. Megjithatë pas xhamit ndarës shihja ndonjë fytyrë gruaje a vajze të bukur që më buzëqeshte për të më qetësuar, apo të ndonjë babaxhani i cili më bënte shenjë për të më dhënë kurajo.

Më vonë mësova se ajo anije gjigande e fjalës dhe mendimit, e artit e muzikës, lundronte pikërisht në saje të asaj që ndodhej përtej perdes së tejdukshme e njëkohësisht të shurdhët. Fjalët e folësve, vargjet e poetëve, deklamimet e aktorëve dhe këngët përcilleshin për në eter pikërisht nga ato aparatura e çelësa dhe nga dikush i heshtur që i lëvizte ato me mjeshtri dhe siguri. Këtë e zbulova më vonë, kur kureshtja më bëri të shkoja në mjedisin pas perdes së qelqtë dhe sidomos kur vite më vonë fillova punë pikërisht në atë vend të cilin e kisha ëndërruar. Ndodhesha mes mjeshtrave të zërit të Radio Tiranës, të cilët u bënë dëgjuesit e mij të parë dhe kritikët e parë dashamirës të punës time.

Njërin prej këtyre mjeshtrave e kam njohur rreth njëzet vjet më parë, kur unë nuk isha tashmë ai djaloshi që më dridhej zëri para mikrofonit, ndërsa ai hidhte hapat e parë në rrugën e mjeshtrisë së zërit, punës me të, regjistrimit dhe përcjelljes së tij tek dëgjuesit.

Elton Verzivolli që fillim dukej se e kishte kuptuar punën që duhej të bënte dhe e mori atë seriozisht e me guxim. Si gazetar i radios, por edhe si shkrimtar, skenarist i radionovelës së parë shqiptare, më ka lidhur ngushtë puna me operatorin e zërit, Elton Verzivolli. Puna në pultin e regjistrimit nuk është një punë thjesht teknike, apo mekanike. Si në fillimet e saj, kur studiot ishin tejet modeste, kur punohej me shirita e kur montazhi, prejret e ngjitjet bëheshin me dorë, ose e thënë më saktë, me vesh, ashtu edhe më vonë, kur në studiot e regjistrimit hyri teknologjia e re dixhitale, puna e mjeshtrit të zërit e kalon punën e teknikut. Do të thosha pa frikë se ajo është një punë artistike në krejt kuptimin e fjalës. Dhe këtë e demonstronte më së miri mjeshtri i zërit Elton Verzivolli.

Në punën time tridhjetë e pesë vjeçare si gazetar në radio Tirana, ka shumë ngjarje dhe episode të cilat i kujtoj mer mall dhe që i marr si shembull të devotshmërisë e pasionit. Natyrisht këtu bën pjesë edhe njohja ime me mjeshtrin Verzivolli dhe puna për gati njëzetvjet për të realizuar e prodhuar emisione me cilësi e për të përcjellë tek dëgjuesi vlera dinjitoze dhe një realizim profesional. Kam shumë raste të punës time të efektshme në saje të përkushtimit të inxhinierit Elton Verzivolli.

Më 10 qershor 2007 Presidenti i Shteteve të Bashkuara George W. Bush bëri një vizitë në Shqipëri. Është i kuptueshëm impenjimi dhe mobilizimi i mediave për ta pasqyruar sa më saktë e në kohë reale vizitën e kreut të vendit më të madh në botë, mikut dhe aleatit të popullit shqiptar. Edhe Radio Tirana u angazhua e u mobilizua me të gjitha forcat për pasqyrimin e kësaj vizite historike. Isha në grupin e gazetarëve të ngarkuar për pëprcjelljen tek dëgjuesi nëpërëmjet kronikave, radioreportazheve, lidhjeve direkte dhe intervistave të presidentit amerikan. Elton Verzivolli ishte drejtuesi teknik i studios së transmetimit i cili bëri një punë mjeshtërore për ta realizuar transmetimin e vizitës së George W. Bush në parametrat optimale dhe në cilësinë më të lartë. E shoh me vend të vë në dukje se ndonëse një punë e tillë nuk ishte e lehtë, ai ia arriti më së miri ta përmbushte misionin e tij në saj të aftësive për veprim e reagim të shpejtë, për zgjidhje të efektshme dhe të menjëhershme të situatave e sidomos për një punë përgatitore, ku kishte parashikuiar çdo gjë deri në detaje. Kështu materialet ndihmëse si rasdiokronika të kaluara nga radioarkivi, intervista të parapërgatitura, informacione të nevojshme e të tjera, ishin ralizuar më parë e tashmë ndodheshin në tryezën e punës së mjeshtrit pranë pultit të transmetimit. E përmenda këtë episod sepse unë dhe gazetarët e tjerë mbetëm mjaft të kënaqur nga puna e mjeshtrit të zërit Elton Verzivolli.

Janë sa e sa emisione dhe programe radiofonike të realizuara në bashkëpunim me mjeshtrin e zërit, inxhinierin Elton Verzivolli. Janë të paharruara mbrëmjet e vona madje shpesh edhe netët e gjata që kalonim në studio sëbashku me Tonin. I përpiktë në punën e tij, ai ngulte këmbë që ta bënim sa më mirë regjistrimin, duke kërkuar përsosmëri. Na kthente disa herë deri sa të arrihej qëllimi e nuk donte t’ia dinte për kohën që kalonte e që të nesërmen që në mëngjes duhej të vinim përsëri në studio. Dhe puna nuk mbaronte kurre se edhe Eltoni nuk lodhej e nuk mërzitej kurrë. Shpesh kam pyetur veten nëse një artist kur interpreton në skenë disa herë apo një këngëtar që këndon të njëjtën këngë për disa ditë me radhë, a e ruan dëshirën , pasionin dhe emocionet për të dhënë gjithmonë maksimumin? Këto mund ta pohoj me siguri për punën e palodhur të mjeshtrit të zërit Elton Verzivolli. Sa herë punoje me të, ai shfaqte pasion dhe dukej i mbushur me energji, çka dëshmonte se ishte tërësisht i motivuar në punë. Na ndodhte që për të bërë një sigël, transmetimi i së cilës mund të zgjaste njëzet sekonda, Toni shpenzonte një kohë të gjatë. Përpiqej të gjente muzikën më të mirë dhe më të përshtatshme dhe kërkonte nga unë që teksti të ishte konçiz, i qartë, domethënës dhe të përmbidhte përmbajtjen e programit radiofonik. Pastaj punonte duke kërkuar vazhdimisht përsosmërinë në kombinimin e tekstit me muzikë deri sa produkti ishte i arrirë nga ana cilësore, i përsosur artistikisht, i qartë, i përmbledhur dhe kuptimplotë.

Në këtë mënyrë, me pasion e këmbëngulje, me përkushtim e me profesionalizëm ka punuar Elton Verzivolli kur regjistronim e montonim programet radifonike të tilla si “Maratona 70 vjeçare e fjalës së muzikës”, një program me rastin e 70 vjetorit të krijimit të radio Tiranës, ciklin e emisioneve me rastin e 100 vjetorit të shpalljes së pavarësisë së Shqipërisë, emisionin nokturn informativ e argëtues “Natën Vonë”, apo emisionin konkurs me nxënlësit e shkollave të mesme të Tiranës “Eurotunel”, një program që pasqyronte rrugën e gjatë të Shqipërisë drejt Bashkimit Europian. Lista e emisionev të realizuara me mjeshtrin Elton Verzivolli është e gjatë. Mund të përmend tituj, emra e shifra pa mbarim, por ajo që mbetet është pasioni i mjeshtrit të Radio Tiranës. Fakti që ai zotëron mjeshtrinë e zërit por tashmë edhe të punës me figurën tregon për profesionalizmin dhe përkushtimin e tij. Ai sot punon në Nju Jork të Shteteve të Bashkuara të Amerikës dhe ndjen erën e suksesit. Elton Verzivolli është i angazhuar me projekte televizive pranë kompanive prestixhioze si Hudson Creative Production dhe Hi Tech Photography.

Emri i tij i shqiptuar disa herë në ditë nga spikerët dhe gazetarët: mjeshtër zëri, tashmë del i shkruar edhe me titra në punët e tij të suksesshme dhe spikat gjithmonë dukshëm:Elton Verzivolli.

*Shkruar nga Grigor Banushi, gazetar, shkrimtar.