Featured – Page 111 – Dielli

TRI GJENERATA NË FESTËN E DY SHENJTËVE

June 29, 2021 by dgreca

TRI GJENERATA TË FAMILJES BALAJ NË FESTËN E DY SHENJTËVE, SHËN PJETRIT E SHËN PALIT/

Të hënën e 28 Qershorit, në mjediset luksoz të Royal Regency Hotel në Yonkers New York, tri gjeneratat e Familjes së madhe Balaj ishin mbledhur për të festuar festën e Shën Pjetrit e Shën Palit. Kjo është një festë e shenjtë për besimtarët katolikë, edhe për viset shqiptare. Kisha Katolike e kremton me solemnitet Shën Pjetrin e Shën Palin Apustuj, të cilëve Jezu Krishti u besoi lartësimin e Kishës Katolike. Ajo kremton dy njerëz që u persekutuan për vdekje, shënohet në literaturën kishtare katolike. Shën Pjetri e Shën Pali, para se të ktheheshin në shenjtë, ishin njerëz të zakonshëm; një peshkatar e një çadërpunues. Jeta e tyre përfundoi tragjikisht për shkak të urrejtjes kundër mesazhit që përfaqësonin, mesazh që nuk e mohuan deri në flijim të jetës.

Kisha Katolike e kremton festën e shën Pjetrit e Palit Apostujt çdo 28-29 qershor. Besimtarët u janë mirënjohës Shenjtëve sepse me gjakun e tyre mbijetoi dhe lulëzojë Kisha në shekuj. Dy Shenjtorët-Apostuj janë Pajtorë të qytetit të Romës. Trupi i Shën Pjetrit pushon në paqe në Bazilikën e Vatikanit, ndërsa ai i Shën Palit, në Bazilikën Ostienses në Romë.

Familja e madhe BALAJ,kurrë nuk ka heqë dorë nga festimi i festës së Dy Shenjtëve, edhe në vendlindje, edhe në Kosovë kur u arratisën për t’i shpëtuar përndjekjes komuniste, edhe në Itali ku qëndruan pak kohë, ndërsa në Amerikë festimi ka qenë përherë masiv, me shumë pjesmarrës.

Zef Balaj, që ishtë në krye të festës këtë 28 qershor në Royal Regency, beson fort se fisi Balaj do ta vijojë edhe në brezat e ardhshëm t’i nderojë dhe të lutet për shënjtët. Fisi Kabashi, fis që i përkasin Balajt, e kanë të shenjtën festën dhe besojnë se festa dhe lutjet e ndihmojnë.

Zefi kujton se 70 vite të shkuara, në 28-29 Qershorin e largët të vitit 1951, familja pasi ka kremtuar Shenjtët në vendlindje, në Mëzi të Pukës,edhe pse e rrethuar, ka arritur që ta çajë atë dhe ka marrë rrugën e vështirë të arratisjes. Ai mendon se ishte dhe besimi tek shenjtët që ata si familje, në grup, me të rritur e fëmijë, arritën që të dilnin gjallë nga kufiri me tela me gjemba i Shqipërisë komuniste me ndihmën e grupit të nacionalisëtve që i komandonte Kolë Bib Mirakaj. Madje Zefi, fëmijë 8 vjeçar, në errësirën e natës e humbi përkohësisht familjen gjatë arratisjes, por Zoti, thotë ai- më bashkoi sërish.Ndoshta, mrekullia ndodhi nga që Apostujt e morën në mbrojtjen familjen fisnike.

Festa e 28 Qershorit e organizuar mbrëmjen e së Hënës kishte mbledhë të tri gjeneratat e familjes, pasardhës të të ndjerit Gjelosh Balaj, të Pjetrit, dhe më të voglit të vëllezërve, Zefit. Janë rreth 100 pjesmarrës në këtë festë. Zefi i shoqëruar nga i biri Davidi, nipi Valentini dhe dom Nikolin Pergjini, u urojnë mirëseardhjen.

Davidi si përfaqësues i gjeneratës së dytë, përcjell mesazhin e vazhdimsisë në emër të fisit Balaj dhe ndjehet i gëzuar që të tri gjeneratat e përjetojnë së bashku festën e Shenjëtve.

Dom Nikolini ndez Qiririn dhe bekon darkën. Ai Lutet dhe uron familjen Balaj që festa t’i ndihmojë.

Zef Balaj i drejtohet pjesmarrësve me urimin e përvitshëm, duke shprehur gëzimin dhe shpresën se të tria gjeneratat do të vijojnë ta çojnë më tej traditën e trashëguar.

Përveç familjes së madhe Balaj, miqëve të tyre, të ftuarit e festës, ishim dhe ne tre vatranë: Agim Rexhaj-President nderi i Vatrës, Asllan Bushati-ish nën/kryetar i Vatrës dhe shkruesi i kësaj kronike. Z. Rexhaj na tregoi se ai ka 30 vjet që e ndjek familjen Balaj në festën e Dy shenjtëve dhe ka përjetuar gëzimin e tyre.

Gjatë darkës u servirën ushqime të shumëllojta dhe pije, ndërkohë që të rinjët dhe fëmijët, kërcenin nën ritmin e valleve tradicionale shqiptare!(dg)

KUJTOJMË AT ZEF PLLUMIN, SIMBOLIN E KUJTESËS -PËRBALLË HARRESËS

June 29, 2021 by dgreca

NË DITËN NDËRKOMBËTARE TË KUJTESËS SË VIKTIMAVE TË TORTURAVE, KUJTOJMË AT ZEF PLLUMIN, SIMBOLIN E KUJTESËS – PËRBALLË HARRESËS /Nga Frank Shkreli/

26 Qershori shënoi Ditën Ndërkombëtare të Kombeve të Bashkuara në Mbështetje të Viktimave të Torturës – një ditë kjo kur — anë e mbanë botës — kujtohen e nderohen viktimat e torturës, ndërkohë që të mbijetuarve të torturave në të kaluarën, u ofrohet mbështetje.

Anë e mbanë botës kjo ditë u shënua në mënyra të ndryshme duek filluar nga Organizata e Kombeve të Bashgkuara () dhe nga shtete të ndryshme siç janë Shtetet e Bashkuara të Amerikës (SHBA). Në një deklaratë me rastin e kësaj dite përkujtimore, Sekretari i Përgjithshëm i OKB-së, Antonio Gutierrez tha se “Tortura është një praktikë e neveritshme dhe urrejtëse, njëkohësisht edhe një dhunim i dinjitetit njerëzor dhe shkelje e të drejtave të njeriut.”

Ndërsa Presidenti i Shteteve të Bashkuara, Joe Biden në mesazhin e tij në ditën ndërkombëtare të kujtesës së viktimave të torturës u shpreh se “Tortura kudo dhe kurdoherë që të përdoret, përbën një njollë të zezë në ndërgjegjen tonë morale. Të gjithë ne duhet të dyfishojmë përpjekjet tona për tu dhënë fund një herë e mirë praktikave të tilla jo njerëzore.” Edhe Sekretari Amerikan i Shtetit, Antony J. Blinken në deklaratën e tij në Ditën Ndërkombëtare në Mbështetje të Viktimave të Torturës iu drejtua, shteteve anë e mbanë botës si dhe të gjithë atyre që janë kundër përdorimit të torturave, me këto fjalë: “Sot është një rast që vendet anëtare të Kombeve të Bashkuara, shoqëritë civile dhe individët e interesuar anë e mbanë botës të bashkohen kundër përdorimit të torturave dhe të bëjnë thirrje për zbulimin e të vërtetës, për drejtësi dhe për ndëshkueshmëri për dhunuesit dhe shkelsit e të drejtave të njeriut. Për derisa në botë ekzistojnë të tillë individë që përdorin torturën si mjet ndëshkimi për kundërshtarët, Shtetet e Bashkuara nuk do të heqin dorë nga angazhimi i tyre për ta zhdukur torturën njëherë e mirë”, ka deklaruar kyrediplomati amerikan në mesazhin e tij, në Ditën Ndërkombëtare të Kujtesës së Viktimave të Torturës.

Ndonëse nuk pashë asnjë lajm në media as deklaratë në lidhje me këtë ditë, nga Tirana dhe Prishtina zyrtare – megjithëse të dy vendet janë ndër vendet më të njohura ku tortura përdorej rregullisht dhe ashpërsisht ndaj kundërshtarëve të regjimit komunist, si në Shqipëri ashtu edhe në Kosovë. Për këtë arsye, modestësisht, me rastin e Ditës Ndërkombëtare të Kujtesës së Viktimave të Torturës, po kujtoj me pak fjalë, At Zef Pllumin —Frank Shkreli: At Zef Pllumi – Krenaria e Shkrelit dhe Nderi i Kombit | Gazeta Telegraf — i cili për fatin tonë dhe për hir të së vërtetës, “rrnoi për me tregue” për torturat e regjimit komunist të Enver Hoxhës, jo vetëm ndaj tij dhe shumë vëllëzërve të tij françeskanë, por edhe për vuajtjet dhe torturat ndajë përfaqsuesve – kundërshtarë të tjerë të regjimit komunist — më të dalluar të ajkës së Kombit shqiptar të gjysëm shekullit të kaluar.

Po e kujtoj At Zef Pllumin me rastin e Ditës Ndërkombëtare të Kujtesës së Viktimave të Torturave, sidomos për veprën e tij monumentale, “Rrno Për me Tregue”, me të cilën ka lenë pas një dëshmi të gjallë historike dhe të vërtetën mbi torturat e tmershme të shqiptarit kundër shqiptarit dhe një histori vuajtjesh të pa imagjinueshme të një pjese të madhe të shqiptarëve, nën regjimin komunist të Enver Hoxhës.

Dita Ndërkombëtare e Kujtesës së Viktimave të Torturës është një ditë me rëndësi edhe për shqiptarët. Duke kujtuar këtë ditë fund javën që kaloi, Presidenti Joe Biden, besoj se u shpreh për të gjithë njerëzit vullnet mirë, kur tha se, “Torturat, kudo dhe kurdoherë përbëjnë një njollë të zezë në ndërgjegjen tonë morale…”. Ismail Kadare gjithashtu e ka vlerësuar librin “Rrno për me Tregue” – si një përshkrim të tmershëm të vuajtjeve mizore të ndërmarra nga një regjim i pamëshirshëm kundër një popullësie të pafajashme – si një vepër për të cilën, sipas Kadaresë, “Gjithë shoqëria shqiptare ka nevojë për këtë vepër. Kanë nevojë për të ata që e kanë jetuar atë kohë, e po aq, në mos për më tepër, ata që s’e kanë jetuar. Kanë nevojë të shtypurit e të nëpërkëmburit, e po aq, e mos më tepër, ata që shtypën të tjerët. Kanë nevojë antikomunistët, e po aq, ndoshta më tepër, komunistët. Shkurt për të ka nevojë ndërgjegja jonë”, ka thënë Kadare.

Dua të shtoj se në këtë Ditë Ndërkombëtare të Kujtesës së Viktimave të Torturës – në mungesë të ndonjë deklarate zyrtare në kujtim të viktimave të torturës në Shqipëri dhe në Kosovë – ia vlen që vepra e At Zef Pllumit të shërbejë si pikënisje për kujtimin e viktimave të torturës komuniste në trojet shqiptare, si një përpjekje e domosdoshme për pajtim kombëtar. Sidomos në këtë periudhë sot, kur jo vetëm indidvidë dhe organizata shtetërore e madje edhe përfaqsues të qeverisë shqiptare kanë bërë deklarata favorizuese për ish- regjimin komunist të Enver Hoxhës, që ka shkaktuar aq shumë vuajtje që përshkruhen me aq hollësi nga At Zef Pllumi – deklarata të zyrtarëve të lartë shqiptarë që, fatkqesisht, duket sikur kanë për qëllim jo vetëm shtrembërimin e fakteve historike, por edhe mohimin e tyre. Madje edhe 30-vjet “post-komunizëm”, At Zef Pllumi nuk u lë të mohoni as të shtrembëroni historinë e vërtetë të vuajtjeve të shqiptarëve nën komunizëm!

“Torturuesit duhet të ndëshkohen për krimet e tyre dhe regjimet të cilat mundësojnë torturat duhet të shemben ose të transformohen”, tha Sekretari i Përgjithëshëm i Kombeve të Bashkuara, Antonio Gutierres, duke shtuar se “Tortura është një krim kundër njerëzimit”. Kombet e Bashkuara e kanë dënuar që në fillim torturën si një nga aktet më të shëmtuara e të liga të njeriut kundër njeriut. Tortura, sipas Kombeve të Bashkuara, ka për qëllim të asgjësojë personalitetin e viktimës, të mohojë dhe të dhunojë dinjitetin ekzistencial të njeriut.

At Zef Pllumi nuk është më midis nesh fizikisht – por është gjithnjë me ne ashtu siç qëndronte gjithmonë — i pamposhtur, shpirtërisht dhe moralisht. Prandaj me rastin e Ditës Ndërkombëtare të Kujtesës së Viktimave të Torturës, të kujtojmë atë dhe dëshmitë e tija si due vikimat e torturave të ish-regjimit diktatorial komunist – ndër më të egërit e ish-botës komuniste. Ashtuqë nepërmjet dëshmive të tija t’i bashkohemi botës së qytetëruar – të cilët si më sipër, me deklaratat e tyre shënuan këtë ditë për të kujtuar e nderuar mijëra viktima – të gjallë e të vdekur, “heronjë të heshtur” — të regjimit komunist të Enver Hoxhës që humbën jetën nga torturat më çnjerëzore, përballë një qëndrese paqësore. Sidomos sot, 30-vjet “post-komunizëm”, kur heshtja zyrtare për krimet komuniste është mbytëse dhe refuzimi zyrtar i politikës shqiptare për tu përballur me atë të kaluar të errët të historisë kombëtare, ndërkohë që shumica e të mbijetuarve të torturave për të cilat ka dëshmuar At Zef Pllumi në librin e tij monumental, “Rrno për me Tregue”, po vdesin dalngadalë, ndërsa njohuria për “gulagun komunist shqiptar” po zhduket gjithashtu, sidomos në radhët e brezit të ri. Ndoshta ky është edhe objektivi, jo vetëm i përpjekjeve të viteve të fundit për të promovuar “të mirat” dhe “anën pozitive” të ish-regjimit komunist, siç kemi dëgjuar kohët e fundit nga zyrtarët më të lartë të qeverisë dhe të shtetit shqiptar, por edhe i heshtjes së Tiranës zyrtare me rastin e Ditës Ndërkombëtare të Kujtesës së Viktimave të Torturës.

“Çdo gjë ka stinën e vet, çdo situatë ka një kohë nën qiell; një kohë për të grisur dhe një kohë për të qepur, një kohë për të heshtur dhe një kohë për të folur…” (Dhiata e Vjetër, Predikuesi 3:

Bashkohuni me botën e qytetëruar! Ka ardhur koha për të FOLUR dhe për të kujtuar viktimat e pafajshme të torturave si dhe krimet e komunizmit gjysëm shekullore, në përgjithësi!

. … Disa nga udhëheqsit botëror që shënuan Ditën Ndërkombëtare të Kujtesës së Viktimave të Torturave me 26 qershor, 2021 – Presidenti I Shteteve të Bashkuara, Joe Biden – Sekretari i Përgjithshëm i Kombeve të Bashkuara, Antonio Gutierres dhe Sekretari Amerikan i Shtetit, Antony J. Blinken

SHQIPTARËT, DINJITOZË NË FESTËN E UNITETIT PËRMES DIVERSITETIT..

June 26, 2021 by dgreca

Shqiptarët në Zonën e Uashington DC përfaqësuan me dinjitet kulturën dhe traditat shqiptare në Shtetet e Bashkuara të Amerikës./

Të premten në mbrëmje me 25 datën Qershor 2021 u mbajt një Meshë për të festuar Unitetin përmes Diversitetit duke sjellë bashkë komunitetet etnike që përfaqësohen në Dioqezën e Arlingtonit,Virxhinia, në Katedralen që mban emrin Shen Thomas More në qytezën Arlington, Virxhinia. Meshën e drejtoi Ipeshkvi i dioqezës, Shkëlqesia e tij Michael Burbidge dhe u bashkëcelebrua nga shumë mështarë dioqezanë të cilët u shërbejnë komuniteteve etnike. Në këtë dioqezë marrin pjesë rreth dyzet komunitete etnike që sjellin kulturë, tradita e histori shumë unike e të veçanta. Mes tyre është edhe komuniteti shqiptar që është integruar në këtë

dioqezë. Ky komunitet është i vogël por vibrant. Në mbështetje të këtij komuniteti, në këtë datë,Ansambli i Këngëve dhe Valleve Popullore në Uashington DC interpretoi këngë e valle që sjellin traditën, historinë dhe kulturën tonë pranë publikut amerikan dhe ndër kulturat e traditat e kombeve të tjerë.

Aktiviteti u mbulua nga media amerikane dhe “Dielli” ka kënaqësinë të sjellë një reportazh për lexuesin. Evisa Selimaj bëri disa paraqitje live në fejsbuk, ku dhe intervistoi në gjuhën shqipe udhëheqësit e grupit artistik si dhe interpretuesit. Kreda Boci, veprimtare e dalluar, e njohur në komunitet si organizatore dhe promovuese e vlerave kombëtare, prezantoi grupin Shqiptar dhe spjegoi mesazhin e këngëve“Vajta Kalova Gjithë Kalabrinë” dhe “Moj e Bukura More”, Vallen “Katjushka”- kërcyer nga të rinjtë shqiptaro-amerikanë.

Ajo tregoi gjatë transmetimit “Live nga Evisa”se si ky komunitet funksionon dhe tregoi për dëshirën për të mbajtë gjallë traditën dhe kulturën si dhe për sfidat e së ardhmes.Kreda foli për rëndësinë e të qenit bashkë dhe për të përçuar gjuhën dhe kulturën mes të rinjve.

Në këto biseda Evisa solli dhe një komunikim me zonjën Anisa Papadhima e cila është themeluese e ansamblit dhe drejtuese artistike. Anisa udhëtoi nga Florida dhe komunikoi me kolegët e Albanian Heritage of Tampa Bay Area me kryetare zj. Eri Pasko. Faleminderit AHTBA dhe shumë faleminderit Ardian Kraja. Vjollca Musabelliu, një artiste e njohur shqiptare e vendosur tashmë në SHBA, i solli aktivitetit një prezencë të bukur dhe plot gjallëri me performancën e saj ajo solli një eksperiencë të pashijuar më parë në këtë aktivitet dhe ngriti peshë zemrat e të parnishmëve tek proklamoi Lavdinë e Zotit dhe bekimin e tij. Vjollca ishte e vshur e zbukuruar si arbëreshe dhe mbante në duar një pëllumb të bardhë që simbolizon shpirtin e Shenjtë.

Dy vajzat të reja, Laura Boci dhe Laura Koye, të dyja të lindura në SHBA, interpretuan perfekt dhe me shumë emocione, njëra me piano dhe tjetra me zë, “Moj e bukura More” dhe tek Vjollca iu bashkëngjit tek ripërsëritja e vargjeve” E lule-lule maca amaca..”.ato ngritën sallën në këmbë me magjinë e zërit. Pa frikë mund të themi se perfomanca shqiptare ishte nga më të bukurat. Shoqëruesit familjarë, miq e shoqëri që kishin ardhur për aktivitetin duartrokisnin dhe dhe shoqëronin interpretuesit. Valltarët :Anisa Papadhima, Chris Luku, Laura Boci, Justin Qejvani, Daniel Boci, Briana Shehu, Ryan Ndreu, Agnes Vasho, David Qejvani, Sarah Ndreu, i bënë për vete shikuesit e shumtë me vallet e bukura shqiptare. Ata përcuan me bukuri të vecantë vallet plot kolorit, ku kombinohej ritmi, lëvizjet, eleganca … Ato sollën më të mirën e valleve shqiptare.

Në këtë aktivitet morën pjesë qindra komunitarë që përfaqësuan kombe edhe nga Afrika, Azia, e kontinente të tjerë, duke sjellë kultura dhe veshje karakteristike. Në aktivitët u shërbyen edhe ushqimet e përgatitura me receta nga vende të ndryshme. Pati dhe vazhdim të vallzimit shqiptar në parkingun e Katedrales,pasi njerëzit shijonin motin e bukur, por më së shumti praninë e njeri-tjetrit.

U takofshim në të tjera gëzime….(Dielli)

Marjan Cubi, a Longtime Activist and Humanist, in a New Documentary

June 26, 2021 by dgreca

by Rafaela Prifti/

Marjan Cubi has already made a name in the community through his tireless activism. His daughter, Aferdita, encapsulated that sentiment this way: “People who don’t know me, when they hear my last name say: Cubi? You are the daughter of Marjan Cubi.” So the idea of a documentary film that captures his commitment to family, faith and country started from a father-and-son-chat, said Ilir Cubi. The project was meant to showcase the accomplishments Marjan achieved in a land where he was given the opportunities that would lead to a life of prosperity.

It seems clear that in drawing the sharp contrast between the restrictions under Kosovo’s communist rule when Marjan lived through his teenage years and the freedom that he found here, the documentary film is as much a tribute to the new homeland, America, as it is to him. “The project started with a conversation between me and my father. I wanted to find a way to not only show appreciation for what my father had accomplished as a patriot, man of faith and a person who always has the undying devotion to fight for human rights. He had a rough upbringing, the communist rule in Kosova gave him a childhood of little food, not being able to read in Albanian, nor the chance to flourish in his homeland, on account of being Albanian. He worked so hard for others and his family. I felt I was obligated that my fathers hard work and devotion to the Albanians and family not be forgotten,” said Ilir.

The director and screenwriter of the documentary film, Ilir Bucpapaj who has built his long career at Albania’s Radio and TV national network (RTSH) was excited to be working on this project. He sees in Marjan Cubi “a personality that for half a century has contributed and contributes for the betterment of the nation. As a marathon runner he has come up against obstacles and has overcome them,” said Ilir Bucpapaj. His own encounter with Marjan dates back in his first visit in the States in the year 2000. The director recalls being impressed by the qualities and good nature of Marjan Cubi.

“I would see him at Vatra, at the Catholic Church, at the Cultural Center Mother Teresa, at Independence Day celebrations, the 60^th anniversary commemoration of Bujan Conference, at 100 anniversary of Vatra and many more,” said Mr. Bucpapaj. In the course of his assignments he had interviewed Marjan as the Democratic League of Kosovo (LDK) representative for the Tri-state area during a very difficult time for Kosova, in fundraising campaigns through Vatra to help Kosovo’s Albanians efforts to defend themselves and also the needy families. As far as memories go, Vatra’s Chairman Elmi Berisha recalled meeting Marjan about 35 years back when Democratic League of Kosovo (LDK) led by Kosovo’s President Ibrahim Rugova was actively campaigning to bring Kosovo to the forefront of the US Foreign Policy. Footage of rallies in DC, New York, news clips, dozens of interviews with clergy, community leaders, Vatra executives, and hundreds of photos, even family videos are all part of a two hour documentary that centers on Marjan. The Cubi family showed a screening on June 13 at Our Lady of Shkodra (Zoja e Shkodres) where friends and family gathered to watch it in the Sunday afternoon.

For the director and screenwriter, “Marjan is unique in the way he is committed to a wide-range of engagements from LDK, Vatra Federation, Catholic Church aside from his role in various fundraising efforts. “To describe Marjan, I will borrow a quote from him: I believe in God, have faith in the US and am a follower of the philosophical, political and humanistic vision of the historic president of Kosova, Ibrahim Rugova,” said Ilir Bucpapaj, adding that “Marjan is still going in his Marathon track as he continues to stay active and to contribute to the Albanian national cause in America and Kosova.”

Marjan Cubi has been involved in numerous events of political, religious, or cultural importance for over four and a half decades in the United States. He is member of Vatra’s Executive Board and serves as its Treasurer. At the center of his qualities is his public service, rooted in his Catholic faith and love for his homeland and family. Marjan sees the Church as one of the pillars of the nation and is mindful of the past sacrifices of the Catholic clergy patriots to advance the nation’s interests and the severe persecution they suffered under the communist rule.

Since father and son are both Vatra members, I asked Ilir Cubi what it the purpose of the documentary for the next generation of Albanian Americans in the Cubi family. “As a son of a man who never gave up no matter how dim it looked, or what the outcome might be, he showed me that with hard work and great friends anything is possible. Vatra and its members have an undying devotion to help others, keep an open heart to the suffering of people in need. The Vatra members do not make money for caring, taking time away from their families, and making time to meet with men and women who can make a difference in their lives. The “profit” is what they receive in their soul and the knowledge that they helped someone. We helped a people in need, a people who also deserve to speak Albanian, read Albanian and of course, dance Albanian. We are the Illyrian people and I am proud to hold the name my father gave me at birth: ILIR,” he said.

The Cubi family’s pride of Albanian ancestry is featured prominently in the documentary film. The appreciation of Albanian traditions has been passed down from their grandparents who lived in the multi-generational family home in New York until they passed away. Marjan Cubi and his life partner, Dile have kept the tradition alive with their three children, Ilir, Aferdita, Teresa, and five grandchildren. The oldest grandson, Josef, who said that he had not seen the documentary prior to its screening, remarked with emotion “I am proud to be a Cubi!” after seeing the film.

Gresa Caka-Nimani, Kryetare e Gjykatës Kushtetuese të Republikës së Kosovës

June 25, 2021 by dgreca

-U mbajt ceremonia e pranim-dorëzimit të detyrës së Kryetarit të Gjykatës Kushtetuese/

-Gresa Caka-Nimani është e certifikuar në çështjet e drejtësisë dhe të qeverisjes, duke përfshirë Qendrën Federale Gjyqësore të Shteteve të Bashkuara të Amerikës dhe programet për lidership strategjik nga Instituti Federal Ekzekutiv Amerikan… Është dekoruar me një numër dekoratash dhe mirënjohjesh. Ndër të tjera, ajo është vlerësuar me pesë “Çmime të Merituara Nderi” nga Departamenti Amerikan i Shtetit, për kontribut të vlefshëm në fushën e sundimit të ligjit dhe me çmimin “Michael K. White Memorial Award” për kontribut të veçantë në hartimin e Kushtetutës së Republikës së Kosovës/

Gazeta DIELLI nga korrespondenti në Kosovë Behlul Jashari

PRISHTINË, 25 Qershor 2021/Me një ceremoni zyrtare të mbajtur në Gjykatën Kushtetuese të Republikës së Kosovës, sot u bë pranim-dorëzimi solemn i detyrës së Kryetarit të Gjykatës Kushtetuese të Kosovës ndërmjet kryetares së deritanishme, znj. Arta Rama – Hajrizi dhe kryetares së zgjedhur, znj. Gresa Caka – Nimani.

Në fjalimin e saj përshëndetës, znj. Rama – Hajrizi foli për sfidat e përballura dhe të arriturat e Gjykatës Kushtetuese gjatë dy mandateve në krye të këtij institucioni, me ç’rast përveç gjyqtarëve falënderoi edhe të gjithë stafin e Gjykatës për bashkëpunimin dhe për punën e tyre të palodhur, duke theksuar se, “vetëm me përkushtimin dhe punën e përbashkët Gjykata arriti të kaloj me sukses të gjitha sfidat, duke filluar me tranzicionin nga përbërja e përzier ndërkombëtare në atë vendore, përmirësimin e dukshëm të kualitetit të vendimeve dhe arsyetimeve të shkruara, rritjen e integritetit dhe respektit të publikut ndaj Gjykatës, dhe çka është më e rëndësishmja, konsolidimin e rolit burimor të Gjykatës, e që është mbrojtja e frymës së Kushtetutës, e sistemit kushtetues dhe e të drejtave dhe lirive të secilit qytetar të Republikës së Kosovës”. Tutje ajo rikujtoi se, “përmes vendimeve që kemi marrë jemi vlerësuar si një prej gjykatave më të mira në rajon dhe, si rrjedhojë, kemi arritur të forcojmë bashkëpunimin me gjykatat e tjera, partneritetin me Komisionin e Venecias, bashkëpunimin me Këshillin e Evropës dhe së fundi edhe me Gjykatën Evropiane për të Drejtat e Njeriut”.

Në fund, znj. Rama-Hajrizi shprehu bindjen se nën udhëheqjen e kryetares Caka–Nimani, Gjykata Kushtetuese e Kosovës do të shënojë suksese të reja në të ardhmen dhe do të konsolidojë edhe më tej praktikën e saj gjyqësore në harmoni me standardet evropiane të drejtësisë kushtetuese.

Pas pranimit ceremonial të detyrës, kryetarja Caka-Nimani nënvizoi rëndësinë e pavarësisë së Gjykatës Kushtetuese dhe rolit të saj përcaktues në ruajtjen e rendit e kushtetues dhe vlerave kushtetuese, balancimin dhe ndarjen e pushteteve, avancimin e sundimit të ligjit e rendit demokratik, si dhe mbrojtjen e të drejtave dhe lirive themelore të të gjithë qytetarëve të Republikës së Kosovës. Ajo gjithashtu vuri theks edhe në nderin dhe përgjegjësinë e saj, që në bashkëpunim me të gjithë gjyqtarët e Gjykatës dhe stafin mbështetës, të kontribuojë në konsolidimin dhe avancimin e mëtejmë të drejtësisë kushtetuese në Republikën e Kosovës. Duke folur në emër të të gjithë gjyqtarëve dhe zyrtarëve të Gjykatës, kryetarja Caka-Nimani e falënderoi znj. Rama-Hajrizi për përkushtimin dhe punën e palodhur gjatë mandatit të saj si gjyqtare dhe kryetare e Gjykatës Kushtetuese për dy mandate, në rritjen e standardeve të gjykimit dhe të cilësisë së vendimeve të Gjykatës Kushtetuese, si dhe për kontributin e jashtëzakonshëm të saj në mbrojtjen e pavarësisë institucionale të Gjykatës.

Mandati i kryetares së Gjykatës Kushtetuese të Kosovës, znj. Gresa Caka-Nimani, është tri vjet.

BIOGRAFIA

Gresa Caka-Nimani është dekretuar gjyqtare e Gjykatës Kushtetuese të Republikës së Kosovës, më 30 dhjetor 2015.

Deri në emërimin e saj, gjyqtarja Caka-Nimani ka shërbyer si Këshilltare e Lartë Ligjore dhe Udhëheqëse e Ekipit të Zyrës për Demokraci dhe Qeverisje në Agjencinë Amerikane për Zhvillimin Ndërkombëtar (USAID). Gjatë shërbimit të saj në USAID, ndër të tjera, ajo ka qenë përgjegjëse për të këshilluar në hartimin e strategjive të USAID-it; dhënien e këshillave dhe të opinioneve rreth ligjeve të aplikueshme e Kushtetutës; menaxhimin e portfolios së programeve të sundimit të ligjit, përfshirë reformat në drejtësi.

Gjyqtarja Caka-Nimani ka qenë pjesëmarrëse në grupe të ndryshme punuese për hartimin e legjislacionit në fushën e sundimit të ligjit. Gjatë viteve 2006-2008, ajo ka qenë koordinatore dhe këshilltare e mbështetjes së Qeverisë Amerikane për Grupin Punues, dhe më pas, Komisionit Kushtetues, përgjegjës për hartimin e Kushtetutës së Republikës së Kosovës. Për kontributin e dhënë në këtë proces, gjyqtarja Caka-Nimani është vlerësuar me disa çmime dhe dekorata nga USAID në Kosovë, por edhe me disa Çmime të Merituara Nderi nga Departamenti Amerikan i Shtetit.

Studimet për drejtësi, gjyqtarja Caka-Nimani i ka kryer në Fakultetin Juridik të Universitetit të Prishtinës (2004), ndërsa magjistraturën në fushën e integrimeve evropiane dhe regjionalizmit e ka përfunduar në Universitetin e Grazit, Austri (2007). Ajo aktualisht vijon studimet për doktoratë në fushën e së drejtës kushtetuese në Universitetin e Grazit, duke u fokusuar në ndërkombëtarizimin e kushtetutbërjës.

Gjyqtarja Caka-Nimani është gjithashtu bartëse e provimit të jurisprudencës dhe atij për përmbarues privat (2013). Ajo është e certifikuar në çështjet e drejtësisë dhe të qeverisjes, duke përfshirë Qendrën Federale Gjyqësore të Shteteve të Bashkuara të Amerikës dhe programet për lidership strategjik nga Instituti Federal Ekzekutiv Amerikan. Që nga viti 2017, ajo bashkëpunon me Institutin Ndërkombëtarë për Demokraci dhe Asistencë Elektorale (International IDEA), me seli në Hagë, dhe është autore e kapitullit “Kushtetuta e Pavarësisë së Kosovës: Përkushtimi i Njëanshëm për një Kushtetubërje të Ndërkombëtarizuar”, në kuadër të librit “Kushtetutbërësit për Kushtetutbërjën”, të edituar nga Tom Ginsburg, Universiteti i Chicago-s dhe Sumit Bisarya, International IDEA, që do të publikohet nga Cambridge University Press në vitin 2022.

Gjyqtarja Caka-Nimani është gjithashtu pjesëmarrëse e shumë konferencave vendore dhe ndërkombëtare në fushën e drejtësisë, përfshirë si paneliste lidhur me “Kushtetutbërjën në Shoqëri pas Konflikteve” në Forumin Botërorë të Drejtësisë V (Hagë, Holandë 2017) dhe në konferencën ndërkombëtare për “Gratë dhe Kushtetutat pas Konflikteve” të organizuar nga Universiteti William and Mary (Williamsburg, SHBA, 2018).

Gjyqtarja Caka-Nimani është dekoruar me një numër dekoratash dhe mirënjohjesh. Ndër të tjera, ajo është vlerësuar me pesë “Çmime të Merituara Nderi” nga Departamenti Amerikan i Shtetit, për kontribut të vlefshëm në fushën e sundimit të ligjit dhe me çmimin “Michael K. White Memorial Award” për kontribut të veçantë në hartimin e Kushtetutës së Republikës së Kosovës.

Gjyqtarja Caka-Nimani është e martuar dhe ka dy vajza.