Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVA SOT DHE ULJA NË BISEDIME ME ARMIKUN

by

Nga MA.Agim Aliçkaj*/

I dashur Ambasador Kosnett,/

Jam krenar që jam shqiptaro-amerikan se e dua atdheun tim Kosovën dhe e adhuroj këtë të ri ku jetoj, Shtetet e Bashkuara të Amerikës. Shqiptarët, kudo ku jetojnë, sinqerisht dhe me gjithë zemër, e duan Amerikën si asnjë komb tjetër mbi tokë. Pa Amerikën nuk mund të ketë bisedime me Serbinë, as zgjidhje të konfliktit shqiptaro-serb dhe as të ardhme për popullin shqiptar. Është mjaft zemërdhënëse kur sheh Amerikën tërërisht të angazhuar përsëri për të gjetur një zgjidhje të drejtë dhe përfundimtare të këtij problemi të madh.

 Faleminderit zoti Ambasador për punën tuaj të madhe dhe mundësinë për të folur me ju lidhur me këtë situatë.

E kuptoj që takimi i sotëm është më shumë për investimet e jashtme në Kosovë, mirëpo pa qëndrueshmërinë politike, nuk do të jetë e lehtë. Si e thatë edhe ju vetë, as Amerika nuk mund të detyrojë biznemenët të investojnë në një vend të caktuar. Janë të pavarur në vendimet që marrin për biznesin.

Shqiptarët janë pasardhës të ilirëve, populli më i lashtë në Ballkan. Pas rënies së Perandorisë Otomane, në 1912, Shqipëria shpalli pavarësinë e saj e cila përfshiu më pak se 40% të trojeve shqiptare. Pjesë të mëdha të territorit shqiptar iu dhanë nga Fuqitë e Mëdha Europiane, të ndikuara nga Rusia, fqinjve grykës, agresivë, shtypës, hegjemonikë, e armiqësorë sllavë e ortodoksë: Serbisë, Malit të Zi dhe Greqisë.

Për më shumë se një shekull, populli shqiptar nën pushtim ka vuajtur dhe është bërë pre e shtypjes sistematike, të planifikuar me kujdes, diskriminimit, shfarosjes, shpërnguljes dhe asmilimit. Qindra mijëra civilë të paarmatosur shqiptarë dhe familjet e tyre u vranë ose u detyruan me dhunë që të shpërnguleshin në Turqi. Qeveritë serbe në koordinim me kishën ortodokse zbatuan një program të detajuar në pamfletin e përgatitur nga Vaso Cubrilovic me titullin “Dëbimi i shqiptarëve”.

Shqiptarët e kanë provuar që janë një komb paqedashës, tolerant, joagresiv, gjatë gjithë historisë së tyre të lavdishme por të vështirë. Do të doja të përmendja një shembull, gjatë Holokaustit, shqiptarët i bënë ballë Gjermanisë Naziste dhe ia dolën të shpëtojnë që të gjithë hebrenjtë që jetonin apo kishin mbërritur në trojet shqiptare. Jam shumë krenar që i ndjeri babai im, Arif Aliçkaj, ishte pjesë e këtij akti fisnik. Kjo është shpalosur në dy libra, rezultat i punës së madhe të Ligës Qytetare Shqiptaro-Amerikane, të udhëhequr nga ish-kongresisti Joseph DioGuardi dhe gruaja e tij, Shirley Cloyes DioGuardi.

Dy dekada më parë, shteti terrorist komunist i Serbisë, filloi dhe humbi katër luftra mizore, në zemër të Evropës. Përveç diktatorit Millosheviq dhe pak kriminelë të tjerë të luftës, ajo nuk u ndëshkua kurrë për krimet e kryera kundër njerëzimit. Pretendon se tani është bërë demokratike, por ende sundohet nga anëtarë të regjimit të tij vrasës. Synimet e tyre dashakeqëse për të shkatërruar Kosovën dhe të gjithë popullin shqiptar nuk kanë ndryshuar, vetëm sa janë transformuar në metoda të reja veprimi. Serbia po punon hapur kundër interesave të Kosovës, duke nxitur pakicën serbe kundër vendit të tyre Kosovës, ndërkohë që në mënyrë të vazhdueshme shtypin pakicën shqiptare në Preshevë, Bujanoc dhe Medvegjë. Ndërkohë, duke përdorur gënjeshtra dhe propagandë të përditshme e paraqet veten si një “viktimë e pafajshme”. Për shkak të mungesës së pjesëmarrjes aktive amerikane për disa vjet, Europa është munduar ta marrë me të mirë Serbinë, duke u përpjekur që ta nxjerrë jashtë sferës së ndikimit të Rusisë, në kurriz të popullin shqiptar. Ne besojmë fuqimisht se Serbia, nëse nuk mbahet nën kontroll, do të jetë gjithmonë një “kalë Troje”, brenda Evropës, për të promovuar interesat hegjemonike ruse në Ballkan.

Gjatë 12 viteve të pavarësisë së kufizuar, Kosova nuk ka fituar asgjë nga bisedimet me Serbinë. Vetëm ka humbur. Bisedimet për pavarësinë përfunduan me planin e Presidentit Ahtissari. Kosova bëri lëshime maksimale. Pakica serbe mori të drejta e privilegje maksimale si asnjë pakicë tjetër në botë. Pavarësia u njoh nga Amerika, shumica e vendeve evropiane dhe shumë vende të botës. Një dobësim i mëtejshëm i pavarësisë, integritetit territorial, sovranitetit është i papranueshëm. Nuk do të sillte as zgjidhje të drejtë e as përfundimtare të problemit dhe do të ishte kundër interesave të Kosovës, Amerikës, Europës, madje edhe vetë Serbisë. Serbia nuk arrin ta kuptojë se është e verbuar nga urrejtja për shqiptarët .

Qeveria e re e shpresës e zgjedhur nga populli i Kosovës, në zgjedhje të lira dhe demokratike, nuk mund të vazhdojë në të njëjtën rrugë negative. Tarifat ndaj mallrave serbe të vendosura nga Prishtina në nëntor 2018 ishin të nevojshme dhe shumë të justifikuara. Për Kosovën ato ishin të njëjta si sanksionet e Amerikës ndaj Iranit dhe Koresë së Veriut. Jo në të njëjtën shkallë por nuk ka ndonjë ndryshim mes Iranit dhe Serbisë. Diktaturat dhe regjimet armiqësore kuptojnë vetëm gjuhën e forcës dhe presionin e vërtetë ndërkombëtar. Ne e kemi të vështirë ta kuptojmë se pse duhen hequr sanksionet që të kënaqim Serbinë dhe t’i lutemi asaj që të bisedojmë diçka që do të sillte vetëm shkatërrim të mëtejshëm të Kosovës. Përfaqësuesit serbë janë duke e thënë hapur se edhe nëse u plotësohen kushtet, ata nuk do ta njohin kurrë pavarësinë e Kosovës. Në këto rrethana, çfarë kuptimi ka të bisedojmë më armikun? Amerika është përfshirë tashmë dhe po kërkon nga Kosova që të heqë pa kushte tarifën. Qeveria e Kosovës nuk ka rrugëdalje tjetër përveçse të pranoi këshillën e mikut të vetëm të vërtetë, SHBA-së. Populli i Kosovës mund ta pranojë vetëm nga dashuria, respekti, dhe besimi te Amerika. Në këtë kuadër, do të doja t’ju drejtoja pyetjet e mëposhtme:

1) Në vijë me deklaratat tuaja dhe të tjera zyrtare nga SHBA për mbështetje të plotë të pavarësisë së Kosovës, jemi kureshtarë, çfarë plani ka SHBA për të bindur Serbinë që ta pranojë?

2) Sa të shqetësuar duhet të jemi për mundësinë që pas këtyre bisedimeve Kosova të përfundojë një shtet i dështuar, jofunksional?

3) A është e shqetësuar Amerika për armatimet e rënda moderne që Rusia po i jep Serbisë?

4) A do të negociohet edhe për të drejtat e shqiptarëve që jetojnë në trojet e tyre të lashta brenda kufijve të Serbisë, në të njëjtën mënyrë si për të drejtat e pakices serbe në Kosovë?

Faleminderit edhe njëherë, zoti Ambasador.

Zoti i bekoftë kombin amerikan dhe kombin shqiptar!

*Fjala e mbajtur në takimin me ambasadorin amerikan në Kosovë Philip S. Kosnett. Autori është Anëtar i Bordit Ekzekutiv të Ligës Shqiptaro Amerikane dhe Këshillit të Vatrës

Pushteti është i juaji!

by

Nga Ilir LEVONJA/ Florida/

Soji më regresiv këto orët e fundit janë ata që hedhin idenë se në protestën e nesërme po suportohet Ilir Meta, jo Presidenti, jo Kushtetuta. Dhe ajo që të habit është fakti se për këta të gjithë janë të tillë, prandaj nuk ia vlen të ngrihen e të dalin nesër në shesh. Ky që po del është një hajdut, ai që po qeveris po ashtu, por edhe ai në opozitë i tillë është.

Ta marrim të mirëqënë këtë, a thua se ky është justifikim për ta lënë kështu evazive situatën në vend. Të paktën nga kjo trio hajdutësh ky i presidencës ka deklaruar publikisht që vendi ka nevojë për një president që ta zgjedhi populli. Jepjani vetes këtë shans dhe kërkojeni në shesh që kjo të bëhet publike, madje filloni të firmosni se mund të jetë pragu i nisjes së një epoke të re që aq të domosdoshme e ka Shqipëria.

Në këto 30 vjet demokraci numrat me shumicë dërrmuese të Kuvendit prodhuan vetëm kriza politike, mendoni se si i dhatë fronin një ushtaraku që ishte duke luajtur domino, por edhe të tjerët që keni sjellur kanë qënë butaforik për shkak të kompetencave false. Rasti më i përkryer është ky aktuali…, shtypi rilindas nuk ka mbetur gjë pa thënë, Rama po tall bythën me të në çdo dalje publike.

Nëse do ishin të sinqertë me ju dhe vendin e tyre sidomos shtypistat duhet të kishin qenë kaq agresivë edhe kur nënshkruan aleancën në Shkodër në vitin 2013. Atëherë kishin të freskët akoma 21 janarin e 2011-ës, por nuk e bënë. Ju mbyllën gojën duke thënë që pa këtë aleancë nuk vihet në pushtet. Madje i dhatë kreun e Kuvendit dhe Iliri nuk ishte hajdut, nuk ishte vrasës, nuk ishte ky që është sot për ju, horri, atentatori, shkelësi i Kushtetutës. Biles, biles e bëtë edhe President për shkak të përvojës dhe eksperiencës në politikë, por edhe si i vetmi për të komunikur dhe bërë pakte si me të majtët ashtu edhe me të djathtët.

Nga ana tjetër ka edhe një shpurë të ashtuqujturish demokratë që edhe pse ka kaluar 30 vjet akoma nuk e kanë kuptuar abc-në e opozitarizmit, sheshi është flori për frymën opozitare. Akoma nuk e kanë kuptuar se opozita nuk është më njëshi, sidomos në kushtet e sotshme, por tërësia e mendimeve sado fort ato ta kundërshtojnë njëri-tjetrin, madje mesatarja e artë del pikërisht nga kjo vlojë.

Nganjëherë opozitarizmi është më shumë se njëshi sidomos kur ai i lëvizë fjalës së dhënë, nuk njeh sakrificën dhe i druhet si dreqi franksioneve brenda frymës. Nuk mund të bësh opozitarin duke thënë po shkoj në pushime, shihemi në vjeshtë kur ta zëmë se studenti proteston, bujku hedh prodhimet në fushë, minatori në grevë, naftëtari po ashtu. Dhe për më keq akoma në një institucion drejtësie flenë me dhjetra dosje përgjimesh ku vetë i madhi është i implikuar në vjedhjen e votës. Një opozitë që fal një skandal të tillë duke shkuar e negociuar me hajdutin ka asgjësuar vetveten. Pa përmendur rënien ekonomike apo borxhin publik, përkrahjen lëmoshë, kultivimin e lëndëve narkotike. Dhe raca më e mbrapshtë janë listat apo listaxhinjtë që mbajtën më këmbë një Kuvend me idenë se po i shërbenin vendit, në fakt i shërbyen xhepit dhe menderes me cektësinë e fshatarit që vuri një kollare dhe u bë akademik. Ata e varën në litar demokracinë e për rrjedhojë vendin duke i dhënë pushtet absolut një dështaku me shallvare që vetëm fyen dhe pështyn lart e poshtë. Shkoni në protestë edhe për të mos parë më kongrese të tillë se ta dini me aq shpenzime sa janë hedhur aty mund të ishin paguar furgonët për ata të dializës.

I shikoni se si rropaten për pak jetë sepse paratë i hanë pankartat dhe sloganet e kongreseve. Madje përbuzni ato forca politike që bëjnë nga 3 ditë kongrese, vetëm vrulle altoparlantësh, përshëndetje propogande arritjesh, kur nuk gjëkundi se çfarë parametrash aktual ka ekonomia jonë, sa është borxhi publik aktualisht, sa janë të ardhurat për frymë, sa është mundësia e punësimit, fermeri, minatori, naftëtari, klima tregtare dhe e investimit. Dhe a e dini përse, se, ne kurrë nuk ngritëm dot ca intstiucione të pavarura si balancim i propagandave të çdo lloj qeverie. Jeta është arithmetikë o njerëz, jo veprat e Edvinit. Dilni dhe nëse dilni mos u ngrini e të ikni duke thënë se do dilni prapë në vjeshtë, por nguluni në shesh dhe jepni vendit pushtetin tuaj.

Shqiptarët e Nju Jork-ut festuan“International Language Day “

by

Komuniteti shqiptaro amerikan në Nju Jork festoi për herë të pare “International Language Day “/

Nga Marjana Bulku/*

Shkolla shqipe “Children of the eagle” dhe The Association of Albanian American Dual Language & Culture AADLC me themeluese Drita Gjongecaj në këto katër vite përvojë i ofruan (komunitetit shqiptaro amerikan një ditë festive mes valleve, kostumeve dhe muzikës shqiptare ku kryefjala ishte gjuha shqipe, mbajtja gjallë e saj në Amerikë e kudo ku jetojnë shqiptarët .(Festa i dedikohej ditës ndërkombëtare të gjuhës amtare, ditë kjo që nxënësit (e shkollës shqipe “ Children of the eagle “ kishin zgjedhur ta festonin me MIQTË e saj, ata që e përkrahin në çdo ditë këtë program në misionin e saj e ku padyshim të parët renditen prindërit, mêsuesit, drejtuesit e komunitetit, Televizioni Albanian Culture ,shoqata mike Vatra, Motrat Qiriazi dhe perfaqsite tona konsullore e diplomatike kanë një rol të veçantë.(Festa u çel me himnin amerikan, himnin e këtij vendi mundësish ku edhe gjuha shqipe ka shansintë jetojë përjetë falë iniciativave të bukura dhe vullneteve të forta siç êshtë edhe rasti i Drejtueses Drita Gjongecaj e cila edhe pse e angazhuar në arsimin public, fundjavat e saj ia kushton gjuhes shqipe përmes këtij programi sa gjuhsor po aq edhe kulturor, historik etj.Mjaft bukur u shpalos himni shqiptar nën interpretimin e vogëlushëve të cilët kënduan shqip himnin e të parëve tanë veshur me kostume shqiptare .(Festa u çel me mesazhet e Marjana Bulkut, e cila uroi që Miqtë e Shkollēs shqipe nga viti në vit tështohen sepse kështu e përmes gjuhës dhe punës forcohen komunitetet dhe mbahen gjallë kulturat.(Zonja Drita Gjongecaj solli përmes falenderimeve në skenë mësueset plot me buqeta lulesh dhe mirnjohje të shumfishtë për punën e palodhur të një proçesi që zgjat sa jeta. Pastaj ajo falenderoi të gjithë ata që e bëjnë të mundur këtë program dy gjuhsor dhe multi kulturor ;fëmijët, prindërit e tyre , por nuk la pa përmendur Miqte e përhershëm që edhe pse nuk janë çdo ditë aty ku dija latohet , e japin kontributin e tyre me dashuri dhe përkrahje sistematike siç Konsullata e Kosovës dhe zonja Teuta Sahatqija kanë dëshmuar në çdo kohë .(Kêshilltari Mark Gjonaj, një politikan patriot i cili admirimin dhe vlerësimin për Children of the eagle shprehu çiltërsisht në fjalën e tij e cila u fokusua tërësisht në vlerat historike dhe vitale që gjuha jonë ruan e do të luajë në të ardhmen tonë . Pastaj ai nderoi Shkollën Shqipe” (Children of the eagle “ dhe drejtuesen e saj Drita Gjongecaj me një vlerësim të veçantë dhe mjaft simbolik ku vleresohet kontributi I AADLC dhe shkolles Children of the Eagle ndaj komunitetit shqiptar ne Qytetin e New Yorkut. E veçantë dhe e mirëpritur ishte prezenca e legjislatorit të Westchester, David Tubiolo dhe Vedat Gashi të cilët e përshëndetën këtë veprimtari fëmijësh por që i flet të ardhmes.(Ne emer te Bordit te Legjislatorve te Westchester County, shkolles Childen of the Eagle ata I dorezuan znj. Drita Gjongecaj nje Proklamate ku po ashtu vleresohet kontributi në drejtim të ruajtjes së gjuhes dhe kultures në zonen e Westchester në NY. Misioni i Shkollës Children of the eagle” eshtë promovimi i atdhedashurisë dhe krenarisë për prejardhjen e të parëve përmes ruajtjes së gjuhës shqipe, historisë, traditave dhe trashëgimnisë tonē kulturore, por më shumë se vizioni dhe misioni foli puna dhe arritjet e atyre fëmijëve ku shqipja e rrjedhshme, recitimet e poetëve dhe e mendimtarëve, këngët dhe vallet tona dëshmuan se sa i bukur është ky mision që vazhdon të mbjellë e të vjelë produkte Pune.
Marjana Bulku & Drita Gjongecaj & Children of ?.
Me fëmijët dhe për fëmijët.
Shkurt 2020

*Me shume fotografi shihni ne fb Dielli vatra

Eliot Engel, miku i shqiptarëve, jo i politikanëve, u prit me respekt në Vatër

by

– Federata Pan Shqiptare e Amerikës ” Vatra” e nderoi mikun e shqiptarëve, Kongresmenin Eliot Engel, me Mirënjohje për Kontributin e dhënë për Pavarësinë e Kosovës, demokratizimin e Shqipërisë dhe avancimin e shqiptarëve në Ballkan-

– Kryetari i Vatrës, z. Elmi Berisha, i kërkoj  Z.Engel, nësë është e mundur ,që ai të bëjë më shumë lobim për sistemin e vizave të punës për Shqiptarët. Z.Engel e priti më shumë kënaqësi këtë gjë dhe premtoi se do bëjë të pamundurën. 

Nga Ilirjan Blloshmi*/

Në datë 29 shkurt, Vatrën e vizitoi një mik i  njohur i shqiptarëve, kongresmeni Eliot Engel, mbrojtës i njohur i çështjes tonë Kombëtare, veçanërisht asaj të Kosovës, por edhe “avokat i njohur” për  të gjithë Kombin Shqiptar, Kongresmeni Eliot Engel, aktualisht Kryetar i Komisionit për Politikën e Jashtme të Kongresit Amerikan.

        Z.Engel,- i shoqëruar nga biznesmeni i njohur dhe veprimtar i diasporës shqiptare, një lobues i fuqishëm për çështjen shqiptare në SHBA, mik i kongresmenit, Harry Bajraktari,-  u prit nga kryetari i Vatrës Elmi Berisha, presidenti i nderit i Vatrës Agim Rexhaj, nën/kryetarët Ervin Dine dhe dr. Pashko Camaj, si dhe nga anëtarë të kryesisë dhe Këshillit të  Vatrës. Në fjalën tij, Kongresmeni Engel, foli për punën që është bërë për çështjën e Kosovës dhe Shipërise. Gjithashtu ai tregoi edhe për “kapriçot e politikanve” të Tiranës zyrtare dhe Prishtinës zyrtare. Në sytë e tij kishte një dashuri të admirushme për shqiptarët, por jo për ata që drejtojnë. 

Më pas Z.Engel, mirëpriti pyetjet nga të pranishëmit, të ciliat ishte nga më të ndryshmet. Gjatë këti bashkëbisedimi kryetari i Vatrës, z. Elmi Berisha, i kërkoj  Z.Engel nësë është e mundur që ai të bëjë më shumë lobim për sistemin e vizave të punës për Shqiptarët. Z.Engel e priti më shumë kënaqësi këtë gjë dhe premtoi se do bëjë të pamundurën për këtë kërkesë.

Bashkëbisedimi me kongresmenin ka vazhduar për rreth dy orë dhe ai i ka dëgjuar të gjitha shqetësimet e vatranëve për bisedimet Kosovë-Serbi, për agresivitetin e diplomacisë serbe, që ka synuar barazimin e agresorit me viktimën, për presionin që i bëhet qeverisë së Kosovës, për deklaratat e Serbisë se kurrë nuk do ta njohë Kosovën, për veriun e Kosovës ku dikton Serbia, për totalitarizmin e rilindur në Shqipëri, ku është vënë në pikëpyetje demokracia, kapja e të gjithë pushteteve nga një forcë politike, të drejtat e mohuara të shqiptarëve nën Serbi-Luginën e Preshevës, dhe në rajonin e Ballkanit, për çështjen çame etj.

Kongresisti Engel është Njeriu që të  “inponon” respekt dhe ka bërë shumë për çështjen shqiptare, prandaj duhet ta mbështesim. 

Eliot Engel kandidon për kongres në Brox, në Distriktin 16 në Bronx, New York, Zonë që ka komunitet shqiptar, ajo që mua më bëri përshtypje ishte se ai nuk kërkojë, që ne ta ndihmonim, përkundrazi as që e përmendi këtë gjë. Por duke parë se çfarë ka bërë, dhe po bën për Shqiptarët ky njeri të inponon respekt dhe dashuri. Parandaj unë kam një thirrje për gjithë bashkëkombasit e mij. Mbështeteni këtë burrë që dashuron pa limit Kosovën dhe Shqipërinë! Le të tregohemi falenderues ndaj një njëriu që është marrë me Shqipërinë dhe Kosovën për më shumë se 30 vite. Le ti lëmë anash bindjet tona politike dhe të bashkohemi për të mirën e kombit tonë. 

Një falenderim! 

Si përfundim duhet të falenderoj gjithë organizuesit e këti takimi, duke filluar nga kryesia e Vatres, Herry Bajraktarin, të pranishmit, ata që e informuan Z.Engel për realitetin në Shqipëri dhe Kosovë. Zoti e bekoftë Shqiperinë,Kosovën dhe Amerikën! 

                   Federata Pan Shqiptare e Amerikës ” Vatra” e nderoi mikun e shqiptarëve, Kongresmenin Eliot Engel, me Mirënjohje për Kontributin e dhënë për Pavarësinë e Kosovës, demokratizimin e Shqipërisë dhe avancimin e shqiptarëve në Ballkan.

*Autori është anëtar i këshillit të Vatrës

Kosova, se shpejti nderon Senatorin Dole, mikun e saj të madh

by

Disa ditë më parë, Ambasadori i Shteteve të Bashkuara në Republikën e Kosovës, z.. Filip Kosnett, e vizitoi ish-Senatorin amerikan, z.. Robert Dole, në zyrën e tij në Washington. Kryediplomati amerikan në Prishtinë njoftoi se së shpejti në Prishtinë do të ngritet shtatorja e z. Dole.

“Ishte kënaqësi për mua t’ia dorëzoja personalisht Senatorit Dole fotografinë e shtatores së tij që do të zbulohet së shpejti në Prishtinë, (punuar nga skulptori Luan Mulliqi), për këtë burrë të shquar e plot merita”, shkroi ambasadori Kosnett.

Senatori Dole, nga ana e tij, shprehu kënaqësinë për ngroitjen e shtatores së tij në Prishtinë dhe e falënderoi përfaqësuesin e lartë diplomatik amerikan në Kosovë për vizitën. Ai e lavdëroi ambasadorin për punën e tij në Kosovë.

“Po bën një punë të mrekullueshme, si përfaqësues i Shteteve të Bashkuara në Kosovë”, shkroi Z. Dole në portalin e tij.

Ambasadori i Shteteve të Bashkuara në Prishtinë, Philip Kosnett, duke i dorëzuar ish-Senatorit Robert Dole fotografinë e shtatores së tij që do të ngritet në Prishtinë./

Autoritetet e Republikës së Kosovës kishin marrë vendim për t’i ngritur shtatore ish-Senatorit republikan Bob Dole në Prishtinë, në vitin 2018, me rastin e 95-vjetorit të ligjvënësit amerikan, njërit ndër politikanët më të respektuar amerikanë të fund shekullit të kaluar, për përpjekjet e tij në mbështetje të çlirimit dhe të pavarësisë së Kosovës. Shtatorja e Senatorit Dole do të vendoset në cep të Rrugës Bob Dole dhe Bulevardit Bill Clinton, rrugë këto që, siç tha ambasadori amerikan Kosnett, janë emërtuar sipas dy kundërshtarëve politikë amerikanë, përfaqësues të dy partive të ndryshme politike, njëri republikan e tjetri demokrat, që me gjithë dallimet e tyre në rrafshin e zhvillimeve politike në Amerikë, ishin miq të ngushtë me njëri-tjetrin. Ambasadori Kosnet tha se ata (Dole dhe Clinton) kishin të njëjtën dashuri për Atdheun e tyre dhe ishin të përkushtuar ndaj shërbimit për të tjerët, ndërkohë që përpiqeshin të bashkëpunonin kurdoherë që ishte e mundur.

“Do të bënim mirë të gjithë, në qoftë se do ta përqafonim filozofinë e Senatorit Bob Dole, sepse në politikë kemi kundërshtarë, por jo armiq”, u shpreh Kosnett.

Senatori Robert Dole me tre ish-presidentët amerikanë, Xhorxh Bushin e vjetër, Bill Klinton dhe Xhorxh Bushin e ri, mbështetësve të mëdhenj për lirinë dhe pavarësinë e Kosovës. Bushi i vjetër e tërhoqi “vijën e kuqe”për Serbinë,Clintoni e mobilzoi NATO-n për çlirimin e Kosovës, kurse Bushi i ri e publikoi vendimin për shpalljen e pavarësisë së Kosovës në Tiranë…

Senatori Robert Dole, ish-veteran i Luftës së Dytë Botërore, Kongresmen dhe Senator nga shteti Kansas, udhëheqës i republikanëve në Senat dhe kandidat i Partisë Republikane për President të Shteteve të Bashkuara, e kishte bërë çështjen e Kosovës kauzë të tij, që në fillim të viteve 90 të shekullit të kaluar.

Në një letër dërguar Dr. Ibrahim Rugovës, më 19 shtator 1991, Senatori Dole, në atë kohë udhëheqës i republikanëve në Senat dhe kryetar i Komisionit të Senatit për Punë të Jashtme dhe Senatori demokrat Claiborne Pell, shprehnin shqetësimin për gjendjen e rëndë në Kosovë.

“Siç e dini, ne jemi shumë të shqetësuar për gjendjen në Kosovë. Për vite të tëra popullsia shqiptare në Kosovë është objekt shtypjesh dhe mohimesh të të drejtave të njeriut nga regjimi i egër komunist i Republikës së Serbisë…”, shkruanin ata.

Senatorët amerikanë e kuptonin se situata në Kosovë ishte e rrezikshme dhe e paparashikueshme.  Ata e ftonin Dr. Ibrahim Rugovën që të vizitonte Washingtonin, sa më parë që të ishte e mundur për, siç shkruanin, “për t’u takuar me ta dhe me senatorë të tjerë të interesuar për gjendjen në Kosovë, për t’u këshilluar me ju për hapat më të mirë që duhet të merren, individualisht dhe në bashkëpunim me njëri-tjetrin”.

Kështu filloi edhe ndërkombëtarizimi i çështjes së Kosovës, fillimisht me sensibilizimin e popullit amerikan dhe të përfaqësuesve të tij në Kongres. Senatori Bob Dole, me letrat e tij të shumta dërguar udhëheqësve të botës, tërhiqte vërejtjen për gjendjen në Kosovë. Kështu ai e sensibilizoi edhe opinionin ndërkombëtar për shkejljen e të drejtave të shqiptarëve të Kosovës dhe për aspiratat e tyre për një Kosovë të lirë dhe të pavarur.

Angazhimi dhe roli i tij, brenda dhe jashtë vendit, në atë kohë, ishte krucial për zhvillimin e punëve në favor të Kosovës, sidomos gjatë dekadës së fundit të shekullit të kaluar, që kulmuan me çlirimin e Kosovë dhe më pas edhe me pavarësinë e saj.

Shtatorja e Senatorit republikan Robert Dole në Prishtinë u bashkohet shtatores së ish-presidentit amerikan demokrat Bill Klinton dhe bustit të bashkëpuntores së tij të ngushtë, ish-Sekretares së Shtetit, Madeleine Albright. Kjo është edhe një simbolikë e frymës së bashkëpunimit të dy partive kryesore amerikane në mbështetje të aspiratave të Kosovës për liri e pavarësi.  Kjo frymë bashkëpunimi midis liderëve e përfaqësuesve të dy partive amerikane, republikanëve dhe demorkatëve, përsa i përket Kosovës, vazhdon edhe sot.

Ambasadori Philip Kosnett në ceremoninë e inaugurimit të vendit ku do të ngritet shtatorja e Senatorit Dole, Prishtinë, 22korrik, 2019..

Duke folur për angazhimin e ish-Senatorit Bob Dole për lirinë dhe të drejtat e poullit të Kosovës, gjatë inaugurimit të vendit ku do të ngritet shtatorja e Senatorit Dole, Ambasadori Kosnett zgjodhu fjalët më të mira për Z. Dole.

“Një udhëheqës në promovimin e kauzës së lirisë anembanë botës. Nuk është për t’u çuditur që ai u bë një mbështetës i pazevëndsueshëm i Kosovës, duke qëndruar pranë dhe në mbështetje të popullit të këtij vendi, në përpjekjet e tij për të ndërtuar një shtet të fortë dhe të lirë”, ka thënë me atë rast kryediplomati amerikan në Prishtinë.

Duhet thënë se kjo frymë bashkëpunimi është njohur dhe vlerësuar shumë prej popullit të Kosovës, ndihma e burrave dhe grave amerikane në mbështetje të Kosovës gjatë dekadave.  Siç është shprehur edhe Ibrahim Rugova, shpresojmë që, më në fund, kjo frymë bashkëpunimi të sigurojë një miqësi të përhershme, jo vetëm midis Shteteve të Bashkuara e Kosovës, por edhe midis Kombit Amerikan dhe Kombit Shqiptar, në përgjithësi.

Me gjithë grindjet dhe mosmarrëveshjet midis partive të ndryshme politike në Kosovë dhe në Shqipëri, duket se kjo miqësi është e pacenueshme dhe ngritja e shtatores së ish-Senatorit Republikan Robert Dole në Prishtinë e shpreh mirënjohjen e gjithë klasës politike shqiptare dhe të popullit të Kosovës ndaj burrave të shtetit amerikan që kontribuan në thememlimin e shtetit të pavarur e të lirë të Kosovës.

Ambasadori amerikan në Prishtinë, Filip Kosnett, me rastin e inaugurimit të vendit ku do të vendoset shtatorja e Senatorit Dole në Prishtinë, ka theksuar se miqësia e Kosovës me Shtetet e Bashkuara nuk varet nga një parti apo nga një individ, sepse ajo është miqësi mes dy popujve.

“Qeveritë tona nuk do të pajtohen gjithmonë për politikat e ndryshme dhe do të nevojitet punë serioze për të mbajtur qëndrimet tona në përputhje me njëra-tjetrën, ndërsa partneriteti i Kosovës me Shtetet e Bashkuara rritet.  Por, një gjë është e qartë: miqësia e qëndrueshme midis popullit të Kosovës dhe popullit të Shteteve të Bashkuara nuk varet nga ndonjë parti politike apo nga ndonjë individ, në veçanti, sepse janë lidhje ndërmjet dy popujve tanë”, është shprehur ambasadori amerikan në Prishtinë.

Po e përfundoj këtë shkrim me fjalët e ambasadorit amerikan në Prishtinë, Z. Kosnett që i tha në inaugurimin e vendit ku do të ngritet së shpejti shtatorja e Senatorit Dole në Prishtinë, me shpresë që zbulimi i shtatores së Senatorit Amerikan Robert Dole në Prishtinë do të jetë një moment që të fokusohemi në vlerat që i kanë bashkuar popullin e Shteteve të Bashkuara dhe popullin e Kosovës.

“Le të frymëzojë ky monument i Bob Dolit për përpjekje të reja për të ndërtuar një atdhe që e meritojnë fëmijët e Kosovës, një Kosovë që do të jetojë në paqe me fiqnjët e saj, një vend me drejtësi dhe mundësi të barabarta për të gjithë, pa dallim”, është shprehur ambasadori amerikan në Kosovë, Filip Kosnett.

Shpresojmë që ashtu do të jetë!

Autori (Frank Shkreli) me Senatorin Robert Dole, në darkën e dekorimit të tij me çmimin “Duart e Shpresës”, nga Këshilli Kombëtar Shqiptaro-Amerikan, Washington, shtator, 2005