LIBRI ENCIKLOPEDIK” BARDHESITE E ATDHEUT” PROMOVOHET EDHE NE TIRANE

December 8, 2016 by dgreca

Interviste ekskluzive per gazeten ” DIELLI” qe botohet ne SHBA,me autorin e librit monografik ” Bardhesite e Atdheut”,Afrim Mustafa./

NGA LULZIM MULLIQI/SHBA/Libri monografik,” Bardhesite e Atdheut” me autor,publicistin,reporterin dhe veteranin e UCK-se,Afrim Mustafa,tashme ka marre jehonen dhe eshte bere i kerkuar,jo vetem ne Kosove,Shqiperi,Maqedoni,Lugine te Presheves e ne Mal te Zi,por edhe ne vende te ndryshme te botes,kudo ku veprojne,punojne,frymojne dhe jetojne shqiptaret.Ky eshte nje Liber-Enciklopedi,ne te cilin jane perjetesuar te gjithe deshmoret e kombit ne nje monografi te perbashket.Monografia ” Bardhesite e Atdheut ” eshte i pari dokument i cili perfshine te gjithe deshmoret qe kane rene ne tri lufterat clirimtare,ne Kosove,Lugine te Presheves,dhe se fundi ne Maqedoni.Gjithsejte jane te perfshire 2225 deshmoret e tri lufterave clirimtare.
Ajo qe e fuqizon kete liber te vecante publicistik dhe monografik,eshte edhe perfshirja ne liber e dy anetareve te nderit,Rifat Jashari,vellau i kryekomandantit legjendar te UCK-se,Adem Jashari dhe Sali Bajra (postmortum),veprimtarit te madh te kombit shqiptar,njeri nga kryengritesit e hershem kunder regjimeve sllaviste te kohes.Libri ka gjithsejte 530 faqe,gjithashtu sukseset dhe Jehona e librit ” Bardhesite e Atdheut” po vazhdon pandalshem dhe me plot gojen mund te themi se ky liber e mban epitetin e Enciklopedise,te dhene nga tre akademiket eminente te Kosovës dhe gjithe kombit shqiptar:Esat Stavileci,Pajazit Nushi(te ndjere) dhe Mehmet Halimi,por edhe personalitete te tjera te jetes publike,shkencore,akademike dhe institucionale te Kosovës,si: Dr.Jakup Krasniqi,Gjeneralmajor,Bislim Zyrapi,Gjeneral,Kudusi Lama,Rrustem Berisha,ambasadore dhe veprimtari,dr.Sabri Kicmari,dr.Hajdin Abazi,dr.Jahja Drancolli.dr.Selim Daci,Gjeneralmajor,Shukri Buja,veprimtari,prof.Behram Hoti dhe nje numer te veprimtareve,intelektualeve,dhe atdhetareve te tjere te kombit shqiptar.Autori i ketij libri Enciklopedik,Afrim Mustafa,per Gazeten ” DIELLI ” qe botohet ne SHBA rrefen me nder dhe krenari per fillimin e krijimit te ketij libri enciklopedik,te cilin e ka nisur qysh ne frontet e luftes,ku ai ishte reporter i drejtperdrejte nga zonat dhe vatrat e luftes ne disa treva te Kosovës.Se pari,Afrim Mustafa rrefen me modesti per raportet e tij te drejtperdrejta nga lufterat e lavdishme te UCK-se, ne Drenice,perkatesisht nga Prelloci,Likoshani,Qirezi,Gllanasella,Likoci,Dobrosheci e vise te tjera drenicase,ku reporteri,Afrim Mustafa kishte shkuar nder te paret nga maji i vitit 1998 dhe kishte raportuar per Radiotelevizionin Shqiptar-TVSH,Radio Tiranen,por edhe media te tjera te huaja,si Dojce Wele,BBC etj.Per here te pare monografia
gjitheperfshirese me 2225 deshmoret e lufterave te UCK- se,doli ne mars te vitit 2008,me rastin e pervjetorit te renies se kryekomandantit legjendare te UCK-se,Adem Jashari dhe 52 familjareve te tij.Ne rrugetimin e librit” Bardhesite e Atdheut”,kjo monografi ka perjetuar kater ribotime dhe disa promovime gjate ketyre viteve te prezantimit per opinionin e gjere publik shqiptar brenda dhe jashte Kosovës.Autori Afrim Mustafa na rrefen se Enciklopedia per here te pare eshte promovuar ne Ferizaj me 12 qershor 2009 ,organizuar dhe realizuar nga komuna e Ferizajt dhe ish kryetari i saj,Bajrush Xhemaili ne bashkepunim me Shoqaten e Familjeve te Deshmoreve te UCK- se,ne nivel te Republikes se Kosovës.Ne kete promovim kishte referuar i nderuari,Xhavit Jashari, ish kryetar i SHFDUCK- se, te Kosovës,pastaj Gjeneralmajor,Shukri Buja dhe shume foles te tjete.Nderkaq,kjo dritare e lufterave te UCK- se, per heren e dyte eshte promovuar ne Struge,me 10 gusht 20010,nen patronazhin e ish kryetarit te ketij qyteti,Ramiz Merko,bashke me Forumin e Intelektualeve Shqiptare te ketij vendi buze liqenit.Promovimi i trete eshte realizuar me 28 maj 2011,ne Ferizaj nga Universiteti i ketij qyteti,” Humanistika”.Promovimi i radhes tregon autori,Afrim Mustafa eshte mbajtur ne Shkup,organizuar nga ” TV ERA” dhe emisioni konaku.
Ky emision,i udhehequr nga moderatori i vyeshem,Fadil Zeqiri u shfaq ne nentor te vitit 2011 dhe kishte arritur shikueshmeri te larte.Gjithashtu autori Afrim Mustafa falenderoi edhe gazetarin dhe moderatorin,Lulzim Mulliqi dhe Stafin e Televizionit ILIRIA, ne Feniks te SHBA-ve,qe prezantoi me mjaft profesionalizem te larte nje emision special kushtuar prezantimit te librit monografik” Bardhesite e Atdheut”dhe kishte arritur nje shikueshmeri shume te larte ne mesin Komunitetit shqiptaro- amerikan.Sipas autorit te ketij libri,Afrim Mustafa,promovimi i radhes se Enciklopedise,” Bardhesite e Atdheut” do te promovohet edhe ne kryeqytetin e Shqiperise,ne Tirane me daten,10 dhjetor 2016,duke filluar nga ora 14:00.
Promovues: SHFDUCK-Prishtine-Tirane dhe Ministria e Mbrojtjes se Republikes se Shqiperise.Sipas autorit te librit,Afrim Mustafa,monografia ” Bardhesite e Atdheut” tashme ka filluar te perkthehet edhe ne anglisht,ndersa me vone do te perkthehet edhe ne gjuhen italiane,frenge dhe gjermane.Autori theksoi se,perkthimi I librit ne gjuhes te ndryshme te botes eshte edhe nje sukses dhe arritje e madhe per Kosoven,Shqiperine dhe gjitha trojet tona etnike,e posaqerisht per vlerat e larta te lavdishme dhe historike te tri lavdive,te cilat perhere i kane sjellur liri dhe krenari te gjithe shqiptareve,kudo ne trojet shqiptare dhe ne bote. Ne fund publicisti,Afrim Mustafa,falenderon edhe gazeten e Komunitetit shqiptaro- amerikan dhe gazeten me te vjeter ne gjithe boten shqiptare” DIELLI ” e cila gjithmone na informon ne kohe reale,te sakte dhe objektive per ngjarjet me te rendesishme,kulturore,informative dhe kombetare te shqiptareve te mergates se Amerikes dhe e mban gjithmone te ndezur zjarrin e atdhedashurise dhe nostalgjine per vendlindjen dhe ceshtjen shqiptare.

Regjisori Jotti Ejlli, një yll në ngjitje

December 6, 2016 by dgreca

Nga Mimoza Dajçi/

M.D – Përshëndetje Z. Ejlli, gëzohem që jemi së bashku në këtë bisedim artistik, për të folur rreth kinematografisë shqiptare. Ju edhe pse i ri në moshë, keni arritur sukses si kineast. Si ja dolët, kujt ja dedikoni këto arritje?

Jotti Ejlli – Përshëndetje Mimoza edhe unë ju falenderoj për këtë bisedë, por është akoma herët për të folur për suksese, janë gjëra të vogla që bëhen të mëdha me kalimin e kohës. Ndonëse mosha më tregon të ri, unë kam mbi 12 vite që jam pjesë e skenës artistike. Ose më saktë prapaskenës artistike. Çdo gjë i dedikohet viteve të gjata shkolle dhe pune.

M.D – Si lindi tek ju pasioni për artin skenik?

– Jotti Ejlli – Kam qenë gjithmonë i tërhequr nga arti, duke filluar që në moshë të vogël me dhuntinë time për pikturën, pasionin për muzikën dhe prodhimet kinematografike me të cilat unë kam ndarë një pjesë të madhe të fëmijërisë dhe adoleshencës. Pavarsisht pasjonit tim për muzikën nuk ishte dëshira ime që të profilizohesha në një fushë të veçantë.Pasioni im dalë nga dalë u shëndërrua duke krijuar mundësitë për të tjerët që të shfaqin talentet e tyre. Unë isha inicjator i shumë evenimenteve artistike në qytetin tim të vogel duke nxjerrë shumë talente që më pas hynë dhe në skenën kombëtare shqiptare. Kuptova që më pëlqente të isha pas skenës dhe të organizoja të tjerët me qëllimin për të argëtuar publikun. Me kohën kuptova që mënyra e shprehjes së artit tim ishte të qëndroja pas skenës, ose në rastin konkret pas kameras.

M.D – Pas shkollës së mesme në Shqipëri, ju ndoqët studimet në Universitetin e Firences (Itali) dega kinematografi. Pse u përqëndruat pikërisht në këtë fushë, menduat se këtu mund të shkëlqenit si artist?

Jotti Ejlli – (Disiplinat e Artit të Muzikës dhe Spektaklit) ishte dega ku unë u magjepsa dhe e ndoqa me shumë interes. Më interesonte të dija çdo detaj të artit në përgjithësi, gjatë viteve të studimeve kuptova që pasjoni im dhe ku gjeja më shumë veten ishte Kinemaja. Pasion të cilin e ndoqa duke ndjekur profilizimin në Kritikën e Kinemasë.Pas diplomimit u regjistrova në një shkollë profesionale për filmmaking, për të thelluar më shumë dijet e mija në këtë fushë.Kinemaja si arti i 7-të është për mendimin tim forma më e madhe e shprehjes artistike.

M.D – Duke mos lënë në harresë muzikën, ju në Itali Jotti studjuat edhe për muzikë, a menduat se muzika do t’ju shërbente për një përsosmëri të bukur mes filmit me muzikën?

Jotti Ejlli – Muzika padyshim më ka skalitur shumë shqistat, më saktë kur unë punoja si DeeJay dhe vendosja muzikën për qindra njerëz që unë nuk i njihja, ishte detyra ime që të argëtoheshin. Ndjesi e emocioneve që të jep kjo punë nuk mësohet në shkollë dhe pothuajse në asnjë vend tjetër. Me kalimin e viteve unë krijova një ndjesi perceptimi të ndjenjave të shumë njerëzve pa komunikuar në mënyrë direkte me to. Dhe ky është ndjesia e ritmit. Dhe është pikerisht ritmi pika ime me e forte ne prodhhimet kinematografike, ritmi i tregimit të ngjarjes, ndërthurja e saj me muzikën dhe sekuencat e imazheve.

M.D – Filmi juaji i parë është “Rosso Fuoco”. Film i cili arriti të mbërthente audiencën pa frymë përballë ekranit të vogël. Si u ndjetë pas këtij realizimi?

Jotti Ejlli – “Rosso Fuoco” ishte një detyrë që duhet të kryeja, praktikisht diçka që po e tregoja prej shumë kohësh me fjalë por që nuk kuptohej mjaftueshëm idea. Kishte nevojë që mendimet të ktheheshin në imazhe. Prodhimi u mirëprit nga audienca e cila është gjithmonë e vëmëndshme kur bëhet fjalë për forcën e kinemasë, për atë emocion që vetëm kjo fushë mund të përcjellë. Unë u ndjeva i kënaqur dhe i konfirmova vetes vazhdimin e përcjelljeve të emocioneve në këtë fushë.

M.D – Shumë të rinj shqiptarë pasi kanë përfunduar studimet jashtë, kanë preferuar të qëndrojnë përsëri atje. Po ju, pse u kthyet në atdhe? A shikonit ndonjë dritë jeshile në horizontin e punës tuaj krijuese? Apo nëse më lejohet arsye familjare?

Jotti Ejlli – Shqipëria është një vend që ka nevojë për njerëz që të vazhdojnë trashëgiminë kulturore. Besoj fort se kinematografia shqiptare ka shumë për të dhënë. Ne jemi një popull me një shumëllojshmëri kulturash. Vetë pozicioni gjeografik i Shqipërisë bën që të jemi pothuajse një nga vendet e veçanta ku ndërthuret kultura lindore dhe ajo perëndimore, por me baza shumë të hershme autoktone.Kthimi në Shqipëri ishte rezultat i shumë faktorëve, po mbi të gjitha është nevoja e zbulimit të brendshëm artistik ku çdo artist me kalimin e kohës duhet ta gjejë dhe ta amplifikojë. Dhe mendoj që unë këtë “un” artistik duhet ta gjeja në Shqipëri.

M.D – Shumë shpejt do të vinte tek ju filmi “Hije”, ku në nëntor të vitit 2015, Qendra Kombëtare Kinematografike në Tiranë do t’ju suportonte në një konkurs me një shumë të konsiderueshme të hollash. Çfarë ishte për ju ky film, sa i rëndësishëm ishte për audiencën shqiptare veçanerisht?

Jotti Ejlli – Hije sjell realitetin shqiptar duke reflektuar në të kaluarën. Unë kam jetuar për shumë vjet jashtë Shqipërisë dhe ndoshta këtë realitet e shoh në një mënyrë më të ftohtë. “Hije” sjell një hishtori shqiptare në një gjuhë filmike të pa exploruar në Shqipëri. Realizimi i një filmi thriller në Shqipëri është akoma një eksperiment i cili do vlerësohet nga publiku.Prodhimi kinematografik kalon në disa faza shumë komplekse dhe ka shumë nevojë për mbështetje financiare. Por kur është dëshira vullneti dhe puna, një zgjidhje gjendet gjithmonë.

Projekti nisi me mbështetjen e Kinostudio “Dardan” e cila propozoi projektin në Qendrën Kombëtare të Kinematografisë për ndihmë financiare. Dua të them që forca e skenarit e bëri projektin të vazhdonte në hapa të sigurtë, ku aktorët elitë të Shqipërisë pranuan të ishin pjesë e projektit ndonëse buxheti ishte shumë i vogël.

Një ndihmë e madhe erdhi dhe nga bashkëpuntorët e mi në Itali, të cilët iu përgjigjën kërkesës time për një bashkëpunim. Mbështetja e madhe erdhi nga SAE Institute Milano e cila mundësoi disa hapa deçiziv të realizimit të filmit.

M.D – A mund të njihemi me personazhet kryesore të këtij filmi dhe nga kush interpretohen ato?

Jotti Ejlli – Personazhet janë karaktere të veçantë të cilët janë sjell në jetë nga një kastë mjaft prestigjoze aktorësh. Kam patur nderin të bashkëpunoj me profesionistët si Alfred Trebicka, Gent Kame, Eglantina Ceno, Sokol Angjeli, Kastiot Shehi si dhe aktorë të rinj që vijnë për herë të parë në ekran, por kanë surprizuar me talentin e tyre, Antonio Kowdrin, Kol Kunora etj…

M.D – Po artistë të huaj, kanë qenë protagonistë të filmit tuaj?

Jotti Ejlli – Jo të gjithë artistët ishin shqiptarë.

M.D – A mendoni se filmi “Hije” ishte një produksion i mirëfilltë i juaji si regjisor i ri?

Jotti Ejlli – Hije është një film i mirëfilltë indipendend. Ka një gjuhë shumë të qartë kinematografike dhe një forcë të madhe në përcjelljen e idesë. Pavarësisht se më sipër përmenda buxhetin e vogël, në prodhimin e filmit nuk kam bërë asnjë kompromis në humbjen e kualitetit teknik dhe human. Filmi është realizuar në të gjitha parametrat filmike botërore. Ishte një sfidë e përditshme me kohën, por në fund çdo lodhje paguhet.Artisti s’është asnjëherë i kënaqur me punën e tij, por kinemaja ka të përfshirë shumë faktor. Unë e shoh këtë prodhim me këmbë në tokë dhe jam mëse i kënaqur me produktin e realizuar.

M.D – Pak kohë më parë ju Z. Ejlli ishit i ftuar në Javën e Festivalit të Filmit Shqiptar në New York, ku ishit fitues i dy Çmimeve?

Jotti Ejlli – Në Javën e Filmit Shqiptar në New York ishte Rosso Fuoco i cili mori dy çmime. Çmimin e kolonës zanore më të mirë, dhe surpriza ime e madhe, ishte Çmimi e publikut. Them surpriza e madhe sepse filmi ishte në gjuhën Italiane, nuk e prisja të përcillej kaq fort mesazhi. Jam ndjerë vërtet shumë i nderuar dhe i emocionuar, sepse misioni i një filmi është të përcjellë një ndjenjë, dhe kur kjo vlersohet nga publiku mund të them që është vlersimi më i madh që mund të marrësh.

M.D – Cili është regjisori apo regjisoria juaj e preferuar shqiptare, qoftë edhe e/i huaj?

Jotti Ejlli – Të flasësh për kinematografinë shqiptare është pak delikate, sepse prodhimet para ’90 kanë pasë një ngurtësim në shprehje, pra sado që kanë shumë vlerë për kohën, nuk mendoj që regjisorët kanë dhënë një mendim të plotë mbi perceptimin e tyre.Preferencat e mia janë ato produkte filmike ku regjisorët e kanë kaluar cakun e përcjelljes thjeshtë të imazheve. Më pëlqen kinematografia simbolike dhe metaforike, filmi komunikon në mënyrë direkte dhe indirekte me publikun. Mund të përmend këtu të gjithë fimografinë e Stanley Kubrick.

D – A mendon se filmografia shqiptare ka avancuar, si e sheh prespektivën e saj?

Jotti Ejlli – Mendoj që është akoma herët, kinemaja shqiptare nuk ka avancuar me hapin e kohës. Pas viteve ’90 u ndje një frymë e kthimit në prodhimin e filmave neorealist. Ishin vitet kyçe ku në botë kishte një boom në zhvillimin e zhanerave të ri kinematografik, me mundësitë e teknikave që erdhën në ato vite. Dëshira për tu kthyer në prodhimin e filmave Neorealist që fqinjët tanë i kishin prodhuar para 50 viteve nuk ndihmoi në zhvillimin e kinematografisë. Dhe pasojat ndjehen në çdo prodhim shqiptar të këtyre 25 viteve, sepse janë filma pa identitet. Mund të them në vendin e gabuar në Kohën e gabuar.

Një përgjegjësi e madhe është dhe sistemi arsimor në Shqipëri i cli, në mendimin tim, nuk ka avancuar me kohën por ka ngelur shumë shumë prapa. Unë jam shume dakort që duhet studiuar e kaluara dhe bazat e kinematografisë, por ato principe janë evoluar aq shumë saqë sot nuk i përgjigjen nevojave të prodhimit dhe kreativitetit.

M.D – Sa i ndjekur është filmi në Shqipëri, a tregohen dashamirës shqiptarët ndaj një produksioni vendas, krahasuar me atë të huaj në përgjithësi?

Jotti Ejlli – Fatkeqësisht kjo është pasoja më e madhe e mos-avancimit që përmendëm më sipër. Publiku sot ka një pafundësi zgjedhjesh në mbarë botën dhe nëse do ti tërheqësh vëmendjen duhet të flasësh me gjuhën që bota flet. Në Shqipëri Filmbërësit e kanë harruar publikun, dhe si pasojë publiku e ka harruar filmin shqiptar.

Më vjen shumë keq për këtë, dhe nëse kjo duhet të ndryshojë duhen mbështetur breza të rinj të cilët kanë dëshirë dhe kurajo për të eksperimentuar dhe ndryshuar gjërat. Edhe pse diçka ka filluar të nuhatet, akoma shikohet me skepticizëm ky ndryshim.

M.D – Cilat janë planet tuaja për të ardhmen?

Jotti Ejlli – Planet janë të shumta, gjithmonë në prodhimin kinematografik. Një film i ri do fillojë së shpejti njëkohësish po punojmë fort në krijimin e kontakteve që të forcojmë prodhimin në Shqipëri dhe ti kthejmë vëmendjen studiove ndërkombëtare në mbështetjen e produktit shqiptar. Duhet punë dhe mbështetje, uroj të gjejmë gjuhen e duhur në Shqipëri që të kemi një zë më të fortë jashtë saj.

M.D – A e shikoni ju Z. Ejlli se një ditë në duart tuaja, mund të keni një “Oskar” si Dhuratë?

Jotti Ejlli – Nuk dua të tregohem modest, por synimi im nuk janë çmimet. Oskari për mua është çdo njeri që shkon në kinema dhe ndan kohën e tij me mua. Mund të ketë shumë arsye ku ti mund të marresh një vlerësim nga profesionistët, por çmimi më i madh që mund të marrësh është sinqeriteti I publikut të thjeshtë.

M.D – Faleminderit Jotti

Jotti Ejlli – Faleminderit edhe juve Mimoza

SABRI FEJZULLAHU-NJE JETE E SKALITUR NE KENGE

December 1, 2016 by dgreca

Interviste ekskluzive per gazeten ” DIELLI” qe botohet ne SHBA,me kengetarin dhe aktorin e mirenjohur nga Kosova,Sabri Fejzullahu.
NGA LULZIM MULLIQI/SHBA/
Bashkebiseduesi yne eshte nje kengetar dhe aktor i njohur dhe i afirmuar ne Kosove dhe ne gjithe boten shqiptare.Eshte kenga ne skenen tone muzikore qe e beri te njohur gjitheandej ne trojet shqiptare.Jetegjatesia e pakundershtueshme
artistike per pese dekada me radhe e ka shpallur pa zyrtarizim hit te muzikes shqiptare.Gjate pervojes se tij ne skenen muzikore si kengetar,ai ka performuar ne shume festivale dhe koncerte te ndryshme qe u organizuan jo vetem ne Kosove,por edhe ne Shqiperi dhe vende te tjera dhe kudo u prit me duartrokitje qe flisnin shqip,duke e bere Sabriun te dashur per te gjithe fansat e tij.Gjate ketyre pese dekadave ne skenen muzikore kendoi shume kenge,te gjitha keto te interpretuara me nje emocion te papare nga ai,duke e bere ate njeren prej kengetareve me te vecante nga kengetaret e tjere te estrades muzikore .Ai ne kete interviste ekskluzive na rrefen per fillimin dhe hapat e pare ne karrieren e tij artistike,per minikoncertin e tij te shfaqur keto dite ne SHBA,me rastin e shenimit te 104 vjetorit te shpalljes se Pavaresise se Shqiperise,pastaj pershtypjet e tij per publikun shqiptaro- amerikan si dhe planet dhe projeksionet e tij ne kete pjese te fundvitit.Te gjitha keto do t’i kuptoni nga biseda qe zhvilluam me Sabri Fejzullahu.

DIELLI:Se pari na tregoni kur keni filluar te kendoni dhe te merreni me kengen?
Sabri Fejzullahu: Une,me kengen kam filluar te merrem heret si nxenes qysh ne bangat e shkolles fillore.Organizonim atehere koncerte me rastin e kremtimit te dites se shkolles dhe te festave te ndryshme.Me vone,si nxenes i shkolles se mesme,bashke me nje grup,shoke te mi kendonim dhe organizonim mbremje vallezimi per te rinj.Kam pasur arsye te gezohem ngase atehere incizova edhe kengen time te pare dhe pastaj linden edhe ditet qe ne mua zgjuan ambicje me te medha qe t’i perkushtohem kenges dhe ta interpretoj ate gjithnje e me bukur.
DIELLI:Cili eshte zhanri me i preferuar muzikor per Ju,qe e interpretoni me bukur?
Sabri Fejzullahu: Une,kam interpretuar me mjaft sukses kenget argetuese ku isha pjesemarres i shume festivaleve muzikore dhe jam shperblyer disa here me vendin e pare,sic ishte festivali “Akordet e Kosovës”natyrisht isha fitues i ketij festivali dhe i shperblyer me Okarinen e arte te ketij festivali tradicional.Kenget qe me pershtaten me se shumti jane ato te te cilat mund t’i kendoj edhe populli yne.
DIELLI: Ne Akordet e Kosovës keni kenduar edhe kenge te zhanrit popullore?
Sabri Fejzullahu:Se pari kam filluar te kendoj kenge popullore,te cilat I dua dhe i pelqej t’i interpretoj.Dua te shkoj edhe kete se pa e njohur melosin popullore nuk mund te behesh nje kengetar i kompletuar dhe i pranuar per masen e gjere.

DIELLI: Pos kengetar,ju ishit edhe aktor,cila ishte lidhjen juaj me artin skenik?
Sabri Fejzullahu:Per shume vite isha edhe aktor i teatrit te Prishtines dhe kam interpretuar nje numer te madh rolesh ne Teatrin e atyre viteve dhe kjo me ka dhene mundesi t’i jap me shume shpirt kenges gjate interpretimit ne skene.
DIELLI:Kritiket e artit muzikor ju kane quajtur dikur kengetar avangarde te muzikes moderne ne Kosove,cili eshte realisht sot mendimi i juaj per kete?
Sabri Fejzullahu: Kjo ishte shume vite me pare kur muzike e huaj nuk kishte arritur te depertonte ne mase te madhe gjate atyre viteve ne Kosove dhe Une,qysh heret kisha filluar t’i degjoj grupe te ndryshme muzikore si: Beatles,Toto Kotunjo,Adriano Celentano,Rolling Stones nga te cilet u frymezova dhe krijoja duke u bazuar ne disa kenge te tyre,te cilat edhe i kam imituar disa here.
DIELLI:Kenga eshte nje vlere muzikore qe trashegohet sot ne familjen tuaj?
Sabri Fejzullahu:Kenga eshte nje pasion i shpirtit dhe si e tille edhe trashegohet tek gjeneratat e reja.Ne familjen time po thuajse te gjithe merremi me kengen.Vajza ime Buleza qe jeton ne Nju Jork eshte marrur aktivitet me kendimin,qysh ne moshen e femijerise.Poashtu edhe Armendi,i cili jeton ne Londer,merret me artin muzikor.Ndersa Ermali eshte i njohur dhe tash e disa vite me radhe ka bere nje emer te nderuar dhe te admiruar ne fushen e muzikes.
DIELLI:Ne cilat qytete amerikane keni shfaqur minikoncertin tuaj?
Une,isha i ftuar ne nje turne nga mergata shqiptare e Amerikes me rastin e shenimit te 104 vjetorit te shpalljes se Pavaresise se Shqiperise.Fillimisht kam dhene koncertin e pare per bashkeatdhetaret tane ne Feniks,Arizona,pastaj ne Orllando,te Florides, ne Cikago dhe diten e fundit do te shfaqim koncertin festiv per Komunitetin shqiptaro-amerikan te Nju Jorkut,ku do te performojme se bashku me mikun dhe kolegun tim te karrieres muzikore,Sinan Vllasaliun.
DIELLI: Cili eshte mendimi i juaj per publikun tone shqiptaro-amerikane?
Une,per publikun e mergates shqiptare te Amerikes kam vleresime te shkelqyera,per menyren e organizimin te koncerteve dhe ruajtjes se gjuhes,traditave dhe kultures shqiptare ne pergjithesi.Kudo neper koncertet e shfaqura ne SHBA,mergata shqiptare ishte e organizuar dhe me plot ndjenja kombetare,ku keto ndjenja po barten edhe te brezat e rinj,duke u bere nje trashegimi e rendesishme kulturore dhe kombetare per mergaten tone ne SHBA.
DIELLI: Cilat jane planet dhe projektet tuaja per te ardhmen?
Sabri Fejzullahu: Ne ditet ne vijim jam,duke e pergatitur nje kenge te re dhe videoklipin e kenges me rastin e festes se vitit te ri.Tekstin e ka shkruar Ylli Limani,nderasa kompozimin e ka bere kompozitori i mirenjohur,Xhevdet Gashi.
Ne nje te ardhme te afert do te pergatiti edhe nje album me kenge te reja.
Ne fund te gjithe bashkeatdhetareve tane me banim ne SHBA,Ju uroj gezuar festat e fundvitit dhe shume gezime ne vatrat tuaja familjare!Faleminderit…!

Bisede me Violonçelistin virtuoz Redi Hasa

November 14, 2016 by dgreca

redi-violencelsti

Nga Mimoza Dajci/Pak ditë më parë në NYU Skirball Center for the Performing Arts në Manhattan, orkestra spektakolare e pianistit e kompozitorit italian Ludovico Einaudi, mbajti një koncert artistik si pjesë e turneut të tyre botëror me pjesëmarrjen e mijëra artëdashësve si dhe muzikantëve profesionistë të nacionaliteteve të ndryshme. Eshtë një ansambël muzikor i përbërë prej instrumentistësh me famë botërore, ku bën pjesë edhe violonçelisti virtuoz shqiptar Redi Hasa.

Kryesisht meloditë e kompozimet e tyre performohen si kolona zanore nëpër filma të suksesshëm Hollivudian si: “The Intouchables”, “Doctor Zhivago”, “I’m Still Here”, “Nocturnal Animals”, etj.

Me Redin zhvilluam biseden e meposhtme:

-Përshëndetje Redi!

-Përshëndetje!

-Për ju është hera e parë që vini në SHBA si violonçelist së bashku me orkestrën e njohur me famë botërore të Ludovico Einaudi-t?

Redi Hasa:- Eshtë hera e dytë, që vij si instrumentist. Herën e parë kam ardhur në mos gaboj, para 2 vitesh, me albumin TimeLapse gjithnjë me Ludovico Einaudi-n.

-Po në Shqipëri a keni patur rast të performoni me këtë orkestër?

Redi Hasa – Në Shqipëri ende jo. Por po flitet ndoshta për të organizuar një Koncert në Teatrin e Operas dhe Baletit në Tiranë. Të shikojmë, mbase nga viti tjetër.

-Sa kohë keni që bashkëpunoni me Ludovicon?

– Redi Hasa – Bashkëpunimi me Ludovicon ka nisur rreth 4 vite më parë, në jugun e Italisë ku unë jetoj prej 20 vitesh. Ludovico ishte i ftuar në një festival shumë të madh që mbahet në Itali dhe që quhet La Notte della Taranta. Ky është ndër festivalet më të mëdhenj në Europë që vlerëson traditën e muzikës tradicionale të territorit, të Lecce-s. Ludovico ka qenë i ftuar si drejtor artistik dhe drejtor gjeneral i orkestrës së Tarantës, që përbëhej nga 36 elementë pak a shumë.

-Si muzikant i talentuar, si janë raportet tuaja me skenën e muzikës shqiptare?

– Redi Hasa – Kam 20 vjet që mungoj nga Shqipëria. Fatkeqësisht jam shkëputur pak edhe nga territori, por kam një dëshirë shumë të madhe të kthehem dhe të prek skenën e Shqipërisë. Eshtë një mall, një dëshirë…. Më mungon jashtë mase.

-Ju Redi, keni edhe një vëlla pianist. Sikurse edhe ju, ai ka arritur majat e suksesit në Itali, apo jo?

– Redi Hasa – Po, është e vërtetë. Im vëlla është pianist klasik dhe shpeshherë organizon koncerte me orkestrën e Teatrit të Operas ne Tiranë.

-Edhe ai jeton në Itali?

– Redi Hasa – Po, edhe ai jeton në Itali, por i ka ruajtur të themi kontaktet. Ndërsa unë jam larguar nga Shqipëria i vogël, kështu që kam humbur pak kontaktet me artin në Shqipëri, por e ndjek nga larg dhe jam shumë i informuar për gjithçka ndodh atje.

-Sa ju ndjek publiku shqiptar?

– Redi Hasa – Sinqerisht nuk e di.

-Mendoni se ka pasur artëdashës shqiptarë sonte në koncertin tuaj, këtu në Manhattan?

– Redi Hasa – Shpresoj që po.

-Planet tuaja për të ardhmen në fushën e muzikës?

– Redi Hasa – Kam një projekt në dorë. Sapo kam rregjistruar një disk që do të dalë në shkurt. Eshtë një duet me violonçel dhe vokal. Inçizimet i kemi realizuar në Londër në studion e Peter Gabriel “Real World”. Jemi në pritje të publikimit të këtij disku dhe jemi shumë të kënaqur. Eshtë një projekt që shikon nga njëra anë Shqipërinë dhe nga ana tjetër vendin ku unë jetoj prej shumë vitesh. Gjithmonë kam lidhje me Shqipërinë, nuk jam ndarë asnjëherë edhe pse larg. Eshtë një lidhje që dua ta forcoj sa më shumë dhe t’i afrohem sa më shumë vendit tim.

– A keni koncerte të tjera pas New York-ut, si pjesë e këtij turneu botëror?

Po, patëm dy performanca dy netë me rradhë në New York, ku sonte ishit edhe ju që na ndoqët. Ndalesa tjetër do të jetë në Washington, DC. Kemi bërë gati 15 koncerte deri më tani, kemi qenë në San Francisco, më pas në Kanada, Toronto e Montreal. Kemi bërë një turne të Amerikës dhe shpresojmë të kthehemi përsëri.

-Nga instrumentet që pamë në skenë, dukej sikur kishit përfshirë edhe instrumente popullore.

– Redi Hasa – Magjia e këtij koncerti është ndërthurrja e instrumenteve. Ludovico i ka zgjedhur instrumentet me shumë kujdes. Ka nga ato që vijnë nga tradicione popullore dhe ka të tjera që shohin eksperimentimin e zërit, eksperimentimin e tingullit.

-Sa vura re orkestra juaj ishte e pajisur me instrumente tepër interesantë. Më tërhoqi syrin edhe një vaskë xhami me ujë. Cili është roli i saj në orkestër, ç’farë impakti muzikor i jep pllaka e metalit vendosur brenda saj?

– Redi Hasa – Instrumenti në ujë është thjesht një vaskë me ujë. Duke futur brenda një peshë metali, një pllakë metali, nga uji dalin tinguj shumë natyral dhe kjo shërben për të marrë tingujt e natyrës, për t’i marrë dhe për t’i organizuar. Ludovico ka bërë një punë jashtë mase të mirë në organizimin e të gjithë tingujve, që në fakt quhen “Elemente”, ashtu si edhe titulli i albumit, pra duke marrë elementet dhe duke i bashkuar bashkë.

-Shumë faleminderit Redi dhe suksese! Ishte vërtetë kënaqësi që u takuam.

– Redi Hasa – Faleminderit edhe juve. Shumë kënaqësi edhe për mua.

New York, 2016

Shqiptaret e Maqedonise dhe Marrëveshja e Ohrit

November 13, 2016 by dgreca

Ahmeti: Shqiptarët me Marrëveshjen e Ohrit fituan lirinë, tani na duhet barazia/

Shqiptarët në Maqedoni, me arritjen e Marrëveshjes së Ohrit e fituan lirinë, mirëpo tani, një nga prioritetet e BDI-së do të jetë që kjo liri të materializohet edhe me barazinë, tha në një intervistë për Radion Evropa e Lirë, kryetari i Bashkimit Demokratik për Integrim, Ali Ahmeti.

Radio Evropa e Lirë: Zoti Ahmeti, Bashkimi Demokratik për Integrim, në zgjedhjet e parakohshme parlamentare të dhjetorit, shohim se ka vendosur të garojë me emra të rinj të panjohur. Pse vendosët për një variant të këtillë?

Ali Ahmeti: Ky është vullneti i shumicës së anëtarëve të Bashkimit Demokratik për Integrim. BDI-ja funksionon si një lëvizje mjaft demokratike, ku respektohet vullneti i shumicës, ku respektohet vullneti i ndryshimeve, sigurisht që edhe në të ardhmen do të ketë prurje të reja. Dhe, ky rend do të vazhdojë edhe në të ardhmen, do të thotë gjithçka bëhet me mirëkuptim, gjithçka bëhet me dialog, me kompromise dhe të gjitha përpjekjet i bëjmë për të gjetur zgjidhje sa më të mirë.

E kemi shumë vështirë në Bashkimin Demokratik për Integrim që të bëhen diferencime, sepse pjesa dërmuese janë njerëz që kanë kontribuar dhe vazhdojnë të kontribuojnë, njëherësh kanë aftësi menaxhuese, drejtuese, por ky është vullneti i shumicës.

Radio Evropa e Lirë: Zoti Ahmeti, 14 vjet jeni në pushtet. Çka do t’u ofroni votuesve në këto zgjedhje, në çka do të fokusohet fushat e juaj?

Ali Ahmeti: Shqiptarët në Maqedoni me arritjen e Marrëveshjes së Ohrit sigurisht se fituan lirinë, mirëpo tani, një nga prioritetet Bashkimit Demokratik për Integrim do të jetë që kjo liri të materializohet edhe me barazinë, sepse duke mos pasur barazi, sigurisht se edhe liria nuk mund të jetë ajo e tëra për të cilën kanë shpresuar qytetarët. Liri po, por edhe barazi.

Dhe, kjo barazi duhet të arrihet dhe të kemi mirëkuptim nga të gjitha palët, nga të gjitha komunitet si në aspektin ekonomik, pra barazi në ekonomi, barazi në ndarjen e përgjegjësive për të administruar me shtetin, barazi në të gjitha fushat, si në investime, si në arsim, si në ushtri, polici, administratë – do të thotë këto janë disa çështje shumë të rëndësishme që kanë të bëjnë drejt për së drejti edhe me forcimin e marrëdhënieve ndëretnike në Republikën e Maqedonisë.

Marrëdhëniet ndëretnike janë një nga segmentet më të forta, ku duhet të investojnë të gjitha palët, sepse ky vend do të ketë të ardhme më të mirë duke pasur marrëdhënie të mira mes etnive dhe barazia e shqiptarëve në të gjitha fushat në këtë shtet, do të jetë në të mirë të proceseve në të ardhmen.

Radio Evropa e Lirë: Zoti Ahmeti, po flisni për barazi… pse nuk e realizuat këtë gjatë ushtrimit të pushtetit deri më tani?

Ali Ahmeti: Është punuar në vazhdimësi për barazi, mirëpo ne kemi pasur çështje jashtëzakonisht të rëndësishme për të përmbyllur, e të cilat çështje burojnë nga Marrëveshja e Ohrit për materializimin e kësaj marrëveshjeje – duke filluar që nga liria kombëtare, në radhë të parë, që u ka munguar shqiptarëve, e deri te përfaqësimi i drejtë, ekonomia. Në aspektin ekonomik është dashur shumë më shumë kohë dhe investime për të qenë pjesë e barabartë.

Radio Evropa e Lirë: Për integrimin e vendit (Maqedonisë) në Bashkimin Evropian dhe NATO, duhet të zgjidhet çështja e emrit, madje në disa deklarata ju thatë se prisni që Qeveria e ardhshme ta zgjidhë çështjen e emrit. Do të bënit koalicion me VMRO DPMNE-në nëse në këtë drejtimçojnë rezultatet zgjedhore?

Ali Ahmeti: Tani është një realitet në Republikën e Maqedonisë, ku qytetarët akoma janë të organizuar në parti politike mbi baza etnike. BDI-ja nuk preferon se cila bazë është më e pranueshme, cila parti është më e mira nga komuniteti maqedonas, sepse nga komuniteti maqedonas është elektorati maqedonas ai i cili vendos se kush do të jetë përfaqësuesi i tyre legjitim.

Se cila forcë politike do të marrë legjitimitetin, kjo do të varet prej vullnetit të shumicës së maqedonasve, dhe ne nuk mund të imponojmë vullnetin e BDI-së, apo të themi vullnetin e shqiptarëve se kush është më i preferuari te pala e komunitetit maqedonas. Përderisa kemi një realitet të tillë ku akoma jemi të organizuar mbi baza etnike, përderisa jemi të organizuar dhe votojmë mbi parti politike me etni dhe përkatësi kombëtare shqiptare dhe maqedonase, duhet respektuar në parim vullneti i shumicës së elektoratit, pavarësisht se kujt komuniteti është.

Mirëpo, do të varet shumë nga negociatat, të cilat do të zhvillohen në të ardhmen; do të varet shumë nga platformat që do të kenë palët në të ardhmen. Sigurisht se në të ardhmen do të zhvillohen negociata mbi bazë të programeve politike, mbi bazë të programeve partiake, mbi bazë të synimeve dhe qëllimeve që kanë partitë politike. Kuptohet se mund të ketë dallime në drejtim të vizionit që kanë për të ardhmen partitë politike. Bashkimi Demokratik për Integrim ka vizion të vetin, ka ndërtuar koncept, opsion të vetin, se si mund t`i realizojë qëllimet në drejtim, të, siç theksuat dhe ju, proceseve euroatlantike.

Ne kemi bindje të fortë se e ardhmja e këtij vendi është në BE dhe NATO, e ardhmja e këtij vendi është në ndërtimin e fortë të marrëdhënieve mes shqiptarëve dhe maqedonasve, e ardhmja e këtij vendi është të ndërtojë raporte të mira me të gjithë fqinjët përreth, e ardhmja e këtij vendi është që të gjitha komunitet të jenë të barabarta në të gjitha fushat e jetës së shtetit.

Radio Evropa e Lirë: Besoj i keni dëgjuar bisedat e përgjuara që i publikoi opozita… Nuk ju ka goditur juve, personalisht, ajo se si anëtarë të Kryesisë së VMRO DPMNE-së i quajnë shqiptarët?

Ali Ahmeti: Jo, për ne nuk është shqetësuese absolutisht, sepse shqiptarët dinë se për kë duhet të përcaktohen. Për fat të keq, deri më tani nuk ka ndodhur akoma që një parti politike maqedonase t’i mbrojë të drejtat e shqiptarëve apo të kërkojë pa frikësim avancimin e këtyre të drejtave dhe sigurisht se interesat politike, interesat kombëtare – përderisa kemi një organizim dhe një realitet të këtillë – të drejtat e shqiptarëve dhe avancimin e këtyre të drejtave i mbrojnë partitë politike shqiptare.

Radio Evropa e Lirë: Ish-kryeministri Nikolla Gruevski, me partinë e të cilit jeni pjesë e koalicionit qeveritar, personalisht, u është falënderuar se Prokuroria Speciale Publike do të punojë derisa Maqedonia të futet në BE dhe NATO që nënkupton zgjidhjen e çështjes së emrit.Ku qëndron ndërlidhja e këtyre dy çështjeve, mund të precizoni deklaratën tuaj?

Ali Ahmeti: Unë kam bërë një deklaratë shumë transparente përderisa të gjitha palët jemi marrë vesh, si parti politike, mendoj katër partitë kryesore politike të përfaqësuara në Parlament për Marrëveshjen e Shkupit, që ju e quani Marrëveshja e Përzhinos, dhe njëra prej vendimeve që ka dalë nga ato takime me lehtësimin nga ana e komunitetit ndërkombëtar, si nevojë për të tejkaluar krizën, në të cilën ndodhet vendi dhe për ta futur në binarë për zgjidhje të situatës, vendosëm që të krijohet dhe Prokuroria Speciale Publike për t`ju dhënë fund të gjitha pikëpyetjeve, të gjitha dilemave.

Prandaj, ne, e kemi përkrahur dhe vazhdojmë ta përkrahim edhe më tej Prokurorinë Speciale që të mos mbeten dilema te qytetarët se kush është i inkriminuar; të mos lihet hapësirë për manipulime dhe spekulime partive politike, që më pas ata të mund të shpallin fajtorë njerëz të pafajshëm, përderisa ata nuk përballen me gjyqin dhe drejtësinë dhe drejtësia të jetë ajo që do të thotë fjalën e fundit.

Për këtë arsye, ne kemi kërkuar mandate të përhershëm të Prokurorisë Speciale Publike, deri në mbylljen e të gjitha këtyre dilemave. Kjo është në të mirë të vendit, është në të mirë të stabilitetit që të mos u lihet hapësirë spekulimeve, hakmarrjeve politike për qëllime të politikës ditore, të mos u lihet hapësirë njerëzve, funksionarëve të caktuar apo partive politike që përmes manipulimeve ata të arrijnë deri në pushtet.

Radio Evropa e Lirë: Zoti Ahmeti në disa deklarata për opinionin ju flisni për qendra, të cilat nuk ia duan të mirën Maqedonisë dhe të cilët qëndrojnë pas krizës. Konkretisht kush janë ato qendra?

Ali Ahmeti: Ka shumë qendra, të cilat punojnë në dëm të integrimit të vendit në Bashkimin Evropian dhe sidomos të integrimit të vendit tonë në NATO. Ka shumë qendra, të cilat punojnë dhe veprojnë në drejtim të krijimit të një kaosi dhe mosbesimi mes dy etniteteve më të mëdha në Maqedoni, përkatësisht në mes të shqiptarëve dhe maqedonasve.

Kjo sepse ato qendra sigurisht se nuk janë pa përvojë dhe e dinë se harmonia, afërsia dhe mirëkuptimi në mes shqiptarëve dhe maqedonasve për të çuar vendin përpara, është një çështje shumë e mirë është një çështje në të mirë të Republikës së Maqedonisë dhe si të thuash kanë hedhur xixa që këto raporte të keqësohen, të vështirësohen.

Unë këtu nuk flas dhe nuk akuzoj qeveritë e vendeve fqinje, por në të gjitha vendet ka grupe dhe grupime që nuk u intereson e ardhmja e mirë e Republikës së Maqedonisë, nuk duan që Republika e Maqedonisë të jetë pjesë e NATO-s dhe BE-së.

Pra, ka grupe dhe grupime në të gjitha vendet fqinje brenda rajonit, që janë të interesuara që këtë vend ta ndajnë për interesa të ndryshme. Por këtu, pa u keqkuptuar, nuk flas për qeveri të vendeve të rajonit, por flas për grupe dhe grupime që nuk janë pa ndikim dhe influencë në vendet e tyre, ku ata veprojnë – qoftë duke depërtuar dhe me idetë e tyre edhe në vendin tonë në Shkup dhe në qytetet tjera në Republikën e Maqedonisë, duke promovuar idetë e tyre, platformën e tyre në një formë përmes rrugëve legale dhe gjysmë-ilegale, po pjesërisht duke vepruar dhe ilegalisht.