Haradinaj: Kosovën e presin shumë punë

October 22, 2017 by dgreca

-Kyeministri Haradinaj, thirrje qytetarëve që të dalin dhe të votojnë në zgjedhjet lokale/

PRISHTINË, 22 Tetor 2017-Gazeta DIELLI/ Kryeministri i Republikës së Kosovës, Ramush Haradinaj, së bashku me bashkëshorten, Anita Haradinaj, ka votuar sot në zgjedhjet lokale për kryetar komune dhe asambleistët e kuvendit komual të Prishtinës, në vendvotimin në Shkollën e Mjekësisë “Ali Sokoli”.Kryeministri Haradinaj ka kërkuar nga të gjithë qytetarët e vendit që të votojnë.“Ftoj të gjithë qytetarët e vendit që të dalin e të votojnë. Kosovën e presin shumë punë, një pjesë e punëve të rëndësishme ndodhin në komuna. Janë me rëndësi komunat, kryetarët e komunave, asambletë komunale dhe vetëm me punë mund të shkojmë kah zhvillimi, kah rritja e gjithmbarshme e vendit dhe kjo rritje kërkon edhe rolin aktiv të qytetarit, pra votën e qytetarit. Prandaj, votoni të gjithë. Me fat” tha kryeministri.Thirrje për të votuar ka bërë edhe bashkëshortja e kryeministrit, Anita Haradinaj. “I bëjë thirrje të gjithë qytetarëve që të shfrytëzojnë të drejtën e tyre, të votojnë për kuvendet komunale, për kryetarë të komunave, për ata që punojnë, për ndryshimin në Kosovë”, tha ajo

Ish Presidenti Bush “Prish” rregullin” kritika për Trump

October 21, 2017 by dgreca

Bushi gjykon ashpër Trumpin/Ish- presidentë të SHBA shprehen rrallë për mënyrën si punojnë pasardhësit e tyre. Aq më shumë të tërheq vëmendjen që veç Obamas, edhe një ish-banor tjetër i Shtëpisë së Bardhë e vuri në shënjestër Donald Trumpin.

Ish-Presidenti i SHBA, George W. Bush ka kaluar ndjeshëm në distancë ndaj shefit aktual të shtetit Donald Trump, pa e përmendur këtë me emër. Në një fjalim që mbajti Bushi në New York kundër “fanatizmit”, ai u shpreh kundër pikëpamjeve për sundimin e të bardhëve dhe “kthimin e klimës izolacioniste”.

Bushi u tregua i shqetësuar për tendencat e ndarjes në shoqëri. Konfliktet politike rrëshkasin “shumë lehtë në armiqësi”, u ankua Bush, që ka qenë që prej vitit 2001 deri në 2009 President i SHBA. “Nganjëherë duket sikur forcat, që na ndajnë, janë më të forta se forcat që na mbajnë të bashkuara.”

Kundër zellit të verbër dhe nacionalizmit

Ish-Presidenti, që është republikan si Trumpi, u distancua edhe nga iniciativat e tij, për ta vështirësuar imigrimin në SHBA. “E kemi harruar dinamikën, që ka ardhur herë pas here nga imigrimi në SHBA. Ndryshe nga kombet e tjera, identiteti ynë nuk përcaktohet nga gjeografia, përkatësia etnike, gjaku dhe toka”, u shpreh më tej Bush. “Kjo do të thotë se njerëzit e çdo etnie, feje ose përkatësie mund të bëhen amerikanë me të drejta të barabarta. Kjo do të thotë që zelli i verbër dhe nacionalizmi i çdo forme e turpërojnë kredon e Amerikës.”

71 vjeçari u ankua edhe për “besimin në humbje” në tregjet e lira dhe te shkëmbimet tregtare të përbotshme. Ai u rekomandoi qytetarëve të SHBA që të kujtojnë “vlerat” e tyre tradicionale.

Kundër mobbing dhe paragjykimeve

Bushi u shpreh edhe kundër mobbing dhe paragjykimeve. Përmes shprehjeve të tilla hapet rruga për dhunën dhe fanatizmin, tha ai. “E vetmja rrugë për t’i përcjellë vlerat qytetare është t’i demonstrosh ato”. Ai nënkuptoi me këto deklarata stilin e Trumpit, i cili përdor herë pas here emra fyes për rivalët e tij. Kështu, rivalen e tij demokrate, Hillary Clinton ai e ka quajtur “mashtruese”, kurse senatorin republikan kritik, Bob Corker e ka quajtur “Liddle”- e prejardhur nga “little” (i vogël).

Ky fjalim tërhoqi shumë vëmendjen në SHBA. Shumë komentues lëvduan fjalët e hapura të Bushit, por njëkohësisht u shqiptuan edhe kritika të ashpra. Në luftërat e Bushit kundër Afganistanit dhe Irakut vlerat e supozuara të larta amerikane patën vlejtur po aq sa kur u forcuan në mënyrë të jashtëzakonshme shërbimet e fshehta në mandatin e tij, u tha në rrjetet sociale. Një përdorues tjetër shkroi: “Deri këtu ka ardhur puna me Trumpin, sa më duhet të quaj me vend atë që thotë George W. E pabesueshme”.(DW)

Qeveria e Kosovës, qasje me aktive ndaj Luginës së Preshevës

October 18, 2017 by dgreca

-Ministri Tahiri viziton Komunën e Bujanocit/BUJANOC, 18 Tetor 2017-Gazeta DIELLI/ Ministri i Drejtësisë i Republikës së Kosovës, Abelard Tahiri, i shoqëruar nga Ambasadori Valdet Sadiku, vizituan Komunën e Bujanocit, ku u takuan me Kryetarin e kësaj Komune, Shaip Kamberi.Gjatë takimit, Ministri Tahiri shprehu përkushtimin e tij dhe të Qeverisë së Republikës së Kosovës për të thelluar bashkëpunimin në mes institucioneve të Kosovës dhe komunave të Luginës së Preshevës, veçmas në fushat që lidhen me mirëqenien e qytetareve të kësaj zone. Ministri Tahiri u zotua se Qeveria e Kosovës do të ketë qasje me aktive ndaj Luginës së Preshevës, të cilën institucionet e Kosovës do ta konkretizojnë me hapa të matshëm. Përveç kësaj, Ministri i inkurajoi banorët e Bujanocit që të vazhdojnë të jetojnë në vendin e tyre dhe të mos shpërngulen, sepse përkushtimi i Qeverisë së Kosovës për ta nuk do të mungojë.

Në anën tjetër, Kryetari Kamberi shprehu falënderimin e veçantë për Ministrin Tahiri me rastin e vizitës, të cilën e konsideroi si shenjë inkurajimi për të gjithë banorët e Luginës së Preshevës. Ai njoftoi Ministrin për sfidat dhe problemet me të cilat ballafaqohen qytetarët e Bujanocit dhe Luginës në përgjithësi, dhe shprehu pritjet dhe gatishmërinë e komunave të Luginës për të rritur bashkëpunimin në fushat socio-ekonomike dhe kulturore.

Ministri Tahiri takoi edhe përfaqësuesit e Këshillit Kombëtar Shqiptar me të cilët ndanë perspektivat e përbashkëta për rritjen e bashkëpunimit në fushën e zhvillimit kulturor dhe edukativ të qytetarëve të kësaj ane.

Po ashtu, Ministri Tahiri takoi edhe përfaqësuesit e subjekteve politike opozitare me të cilët diskutuan për zhvillimet politike dhe sociale të Bujanocit dhe komunave tjera të Luginës së Preshevës./b.j/

DHUNIMI I GAZETARIT NË KOSOVËN E LIRË-LAJM I KEQ!

October 14, 2017 by dgreca

Nga Sinan KAMBERAJ/ Shpreh keqardhje tê thellë për sulmet fizike që ndodhen kohëve të fundit mbi gazetarët në Kosovē. Siç u njoftua, i fundit ndodhi pardje mbi njērin prej gazetarëve më të mirë e më të guximshëm në Kosovë, Vehbi Kajtazit.
Dhunuesi duhet të ndëshkohet simbas Ligjit. Në të kundërtên, për moszbardhen e krimit, turpi bie mbi pushtetin, duke lënë hapësirë për dyshim se struktura të tij mund të qëndrojnë mbrapa këtij akti barbar.
Kajtazi, gazetar hulumtues, redaktor i Portalit prestigjioz ‘Isajderi’, bashkë me kolegun e tij, Pajtim Olluri, drejtor i Portalit, (i cili kohë më parë u sulmua poashtu mizorisht), kanë kritikuar rreptë kriminalizimin e çdoditshëm të shumë hallkave dhe strukturave të shtetit të Kosovës. Tashmë êshtë shumë e qartë se struktura kriminale nē pushtet, ose të lidhura me pushtetin (me ‘Hymnin’ e tyre -“Pronto” në gojē), po ua nxijnë jetën qytetarëve të pafat shqiptarë, të “zënë peng” brenda kufijve të Kosovës.
Këta hajdutë janë edhe injorantē.
Si analfabetë që janë, ata nuk e dijnē se ‘Lajmësi’(pra gazetari) ishte i mbrojtur me shekuj, edhe me Kodin Moral – Juridik Shqiptar – Kanunin e Lekë Dukagjinit! (“Lajmêsi nuk vritet”, thotë një Nen i Kanunit).
Le të kujtojmë me kētë rast se vetēm në vendet me regjime diktatoriale dhunohen e vriten gazetarët.
Breza të tërë të gazetarëve shqiptarë, përgjatë pesë decenieve, janë vrarë e dhunuar nga ana e regjimit serb në Kosovē.
Është lajm i keq, lajmi i dhunimit të gazetarit në Kosovën e Lirē!

Presidenti Trump nuk e çertifikon marrëveshjen me Iranin

October 14, 2017 by dgreca

Presidenti amerikan Donald Trump parashtroi të enjten nga Shtëpia e Bardhë një strategji të re, më të rreptë të Shteteve të Bashkuara për Iranin.Presidenti nuk e çertifikoi marrëveshjen bërthamore të vitit 2015 mes SHBA, vendeve aleate dhe Teheranit, por nuk e hodhi poshtë të gjithë marrëveshjen.Ai tha se marrëveshja e Iranit nuk është në interesat e sigurisë kombëtare amerikane.

President Donald Trump speaks about the Iran deal from the Diplomatic Reception Room at the White House in Washington, Friday, Oct. 13, 2017. (AP Photo/Susan Walsh)

Presidenti tha se Irani udhëhiqet nga një qeveri agresive, përgjegjëse për gjakderdhjen në rajonin e Gjirit Persik dhe që mbështet terrorizmin. Ai tha se Teherani është shkaktar i dhunës sektare në Irak dhe një prej shkatarëve të dhunës në Siri dhe Jemen.Mosçertifikimi i marrëveshjes i hap rrugën një periudhe 60 ditore, gjatë së cilës Kongresi duhet të vendosë nëse do të rivendosë disa, apo të gjitha sanksionet ekonomike që janë hequr si pjesë e marrëveshjes me Iranin.Presidenti Trump e quajti marrëveshjen me Iranin “një nga marrëveshjet më të këqija që kanë nënshkruar ndonjëherë ndonjëherë Shtetet e Bashkuara”. Ai kishte sugjeruar vazhdimisht se mund të largohej prej saj. Presidenti tha se Irani nuk ka “mishëruar thelbin” e marrëveshjes dhe nuk i ka zbatuar kërkesat e saj.

Administrata Trump e ka akuzuar vazhdimisht Iranin për sponsorizim të terrorizmit, për kërcënim të aleatëve të Shteteve të Bashkuara në Lindjen e Mesme dhe për prova me raketa balistike. Presidenti Trump ka thënë publikisht se marrëveshja nuk i mbulon këto çështje..Zyrtarët iranianë kanë theksuar se marrëveshja nuk mund të rinegociohet. Presidenti Iranian Hassan Rouhani ka kërcënuar të largohet nga marrëveshja “brenda pak orësh” në se Shtetet e Bashkuara vendosin sanksione të reja.Në fjalimin e tij në Shtëpinë e Bardhë, udhëheqësi amerikan parashtroi jo vetëm kundërshtimet ndaj marrëveshje bërthamore, por edhe sjelljen e qeverisë iraniane, përfshirë programin e tyre të raketave, mbështetjen për presidentin sirian Bashar al Assad, dhe lidhjet e Teheranit me terrorizmin.Ai tha se adminsitrata do të përpiqet t’i kundërvihet aktiviteteve destabilizuese të Teheranit dhe do të vendosë sanksione të tjera shtesë ndaj regjimit iranian, për të bllokuar financimin e terrorizmit prej tij.Presidenti tha gjithashtu se strategjia e re do të prekë edhe përhapjen e armëve dhe raketave të Iranit dhe se do t’i mbyllë Teheranit të gjitha rrugët për të zhvilluar armë bërthamore.Trump se ai do ta urdhërojë administratën e tij të punojë nga afër me Kongresin për të trajtuar “shumë të meta të marrëveshjes” dhe për të siguruar që Teherani të mos mund t’i kërcënojë asnjëherë Shtetet e Bashkuara me armë bërthamore.Presidenti tha se nëse Kongresi nuk harton një legjislacion të ri, ai do t’i japë fund marrëveshjes. Çdo vendim për të ri-vendosur sanksionet e lidhura me programin bërthamor, do ta tërhiqte automatikisht Amerikën nga marrëveshja.Lëvizja e zotit Trump është në thelb një kompromis që e lejon atë të dënojë një marrëveshje, por jo ta shfuqizojë atë.Presidenti Trump tha se po godet Gardën Revolucionare të Iranit me sankione për mbrojtjen që i bën terrorizmit.Përcaktimi i ri përdor autoritetin ekzistues të sanksioneve krijuar përmes një urdhëri ekzekutiv të vitit 2001. Departamenti i Thesarit tha se dënimet kanë në objektiv forcat kude, një njësi e Gardës Revolucionare të Iranit. Departamenti i Thesarit tha gjithashtu se Garda Revolucionare ka mbështetur aktivitete vdekjeprurëse nga Hezbollahu dhe Hamasi, si dhe fushatën brutale të presidentit sirian Bashar Assad kundër njerëzve të tij.

Por Shtetet e Bashkuara nuk e shtuan Gardën Revolucionare në listën zyrtare të organizatave të huaja terroriste. Ky hap do ta detyronte Uashingtonin të merrte hapa të mëtejshme kundër Gardës Revolucionare që Sekretari i Shtetit Rex Tillerson ka thënë se mund të krijojë probleme.(Kortezi VOA)