Qeveria: Kosova nuk ka humbur asnjë metër katror territor

March 3, 2017 by dgreca

unnamed -Qeveria e Kosovës miratoi Raportin Faktografik të Komisionit të ekspertëve për matjen e territorit të Republikës së Kosovës/

-Kryeministri i Republikës së Kosovës, Isa Mustafa, vlerësoi faktin se qëndrimet e Departamentit të Shtetit të SHBA-ve, vlerësimet e Komisionit Ndërkombëtarë i cili është përcaktuar nga presidentja Jahjaga, por edhe konkludimet e Komisionit Shtetëror të mëparshëm për Shënimin e Vijës Kufitare me Malin e Zi, përputhen në mënyrë të plotë me rezultatet faktografike të këtij Raporti/

unnamed (1) -“Padrejtësitë historike nuk mund t’i korrigjojmë”, tha Akademik Hivzi Islami. Në mbledhje ishin të pranishëm edhe kryeshefi i Agjencisë Pyjore të Kosovës, Ahmet Zejnullahu dhe drejtori i Agjencisë Kosovare të Privatizimit, Ekrem Hajdari/

PRISHTINË, 3 Mars 2017-Gazeta DIELLI/ Qeveria e Republikës së Kosovës, e udhëhequr nga kryeministri Isa Mustafa, ka mbajtur sot pasdite mbledhjen e 135-të me radhë, në të cilën ka miratuar Raportin Faktografik të Komisionit të ekspertëve për matjen e Territorit të Republikës së Kosovës.Kryetari i Komisionit, Akademik Hivzi Islami, njoftoi kabinetin qeveritar lidhur me punën e bërë nga ekspertët dhe bëri të ditur se para se të mbyllet raporti përfundimtar me konstatimet përmbledhëse, ekspertët morën edhe rezultatet e debatit publik dhe më pas, në konkluzat e dërguara në Qeveri, ata kumtuan rezultatin që madhësia territoriale është 10 mijë e 905.25 kilometra katrorë.“Kur u matën të gjitha sipërfaqet e komunave administrative, u matën 38 komuna, u matën sipërfaqet e 1 mijë e 305 zonave kadastrale, që pajtoheshin zonat me kumulativin e sipërfaqes së komunave administrative. Kjo u bë një kohë të gjatë dhe u bë disa herë, minus ndryshimi që ndodhi me Planin e Ahtisaarit me Maqedoninë, doli kjo shifër që e kemi, dhe ne mendojmë që kjo shifër, sipas ekspertëve, është absolutisht e saktë, e tolerueshme me këto gabimet minimale. Prandaj, ta kemi ndërgjegjen e pastër dhe të fashiten emocionet. Kosova nuk humb asnjë metër katror. Atë që e kemi pas, e kemi. Padrejtësitë historike nuk mund t’i korrigjojmë”, tha ndër të tjera Akademik Hivzi Islami.Në mbledhje ishin të pranishëm edhe kryeshefi i Agjencisë Pyjore të Kosovës, Ahmet Zejnullahu dhe drejtori i Agjencisë Kosovare të Privatizimit, Ekrem Hajdari.Ahmet Zejnullahu foli për çështjen e 614 hektarëve të pyjeve që më herët janë menaxhuar nga Agjencia Pyjore, ndërkaq nuk janë të regjistruar në regjistrat kadastral të Pejës.

Ekrem Hajdari siguroi se bazuar në shënimet kadastrale që i ka Agjencia e Privatizimit në dispozicion, shënime këto të dhëna të bazuara në shënimet kadastrale të Republikës së Kosovës, AKP mund të konfirmoj lirisht që pronat e ish ndërmarrjeve shoqërore përgjatë brezit kufitar me Malin e Zi, nuk preken fare nga procesi i shënimit të vijës kufitare.Qëndrimet e tyre në mbledhjen e Qeverisë i kanë shfaqur edhe zëvendëskryeministrat Hajredin Kuçi dhe Ramiz Kelmendi, ministri i Punëve të Jashtme, Enver Hoxhaj dhe ministri i Kulturës, Rinisë dhe Sportit, Kujtim Shala.Kryeministri i Republikës së Kosovës, Isa Mustafa, vlerësoi faktin se qëndrimet e Departamentit të Shtetit të SHBA-ve, vlerësimet e Komisionit Ndërkombëtarë i cili është përcaktuar nga presidentja Jahjaga, por edhe konkludimet e Komisionit Shtetëror të mëparshëm për Shënimin e Vijës Kufitare me Malin e Zi, përputhen në mënyrë të plotë me rezultatet faktografike të këtij Raporti.“Kjo na jep të drejtë të jemi të sigurt se Kosova edhe për këtë gjeneratë edhe për gjeneratat e ardhshme mund të konfirmoj se nuk e ka humbur asnjë metër katror në Shënimin e Vijës Kufitare me Malin e Zi. Është fakt notor, që Qeveria e Republikës së Kosovës ka qenë gjithmonë e gatshme që përmes ekspertizës dhe nuk ka hezituar në asnjë moment që të punojë dhe të konstatoj gjendjen reale të kufirit tonë me Malin e Zi ashtu siç nuk do të hezitojmë në asnjë rast që këtë ta bëjmë edhe me Serbinë më vonë, në mënyrë që Kosovës të mos i cenohet asnjë metër katrorë të territorit në përcaktimin e vijave kufitare përkatësisht në shndërrimin e vijave administrative që i kemi pasur ne përpara me shtetet fqinje ose me Republikat fqinje tani në kufij ndërkombëtarë dhe të arrijmë atë që ministri i Punëve të Jashtme e tha këtu që këto konstatime dhe këto rezultate t’i depozitojmë edhe në Kombet e Bashkuara.

Ne kemi një përkushtim të madh edhe sot, dhe kemi argumente të plota dhe të pakontestueshme që Republika e Kosovës nuk ka humbur asnjë metër katror gjatë shënjimit të vijës kufitare dhe shpresoj se me këtë hapet një proces i ratifikimit të Marrëveshjes me Malin e Zi.

Unë jam shumë i bindur se qytetarët e Republikës së Kosovës por edhe ekspertët, njerëzit edhe të pozitës edhe të opozitës do të kenë arsyen që të konkludojnë mbi bazën e fakteve sepse ne nuk mund të ndryshojmë faktet dhe që vendimi i mëvonshëm do të merret mbi këtë bazë.

Ne, këtë raport pasi që Qeveria të deklarohet për këtë, do ta publikojmë në faqen zyrtare të Qeverisë së Republikës së Kosovës, do t’ia përcjellim Presidentit të Republikës së Kosovës për informim dhe njoftim, do t’ia përcjellim deputetëve të Kuvendit të Republikës së Kosovës në mënyrë që çdonjëri të ketë qasje të informohet dhe të njoftohet lidhur me këto rezultate. Po ashtu, do të bëjmë përpjekje që ta prezantojmë në forma të ndryshme, përmes mjeteve të informimit, dhe kanaleve tjera edhe para qytetarëve të Republikës së Kosovës në mënyrë që çdo qytetar i Republikës së Kosovës ta ketë këtë dokument dhe të ketë rezultatet e një Komisioni shumë kredibil, profesional e shkencor i cili ka punuar.

Unë jam i bindur se edhe ky raport do të jap rezultate pozitive në unifikimin e spektrit politik dhe apeloj që ky spektër politik të unifikohet rreth një çështje madhore dhe në interes të vendit siç është shënjimi i vijës kufitare, do të ndikoj në përparimin e perspektivës euroatlantike të vendit tonë, në fuqizimin e marrëdhënieve me SHBA-të, BE-në dhe vendet e tjera mike”, tha kryeministri.

Në fund, kryeministri Mustafa ka falënderuar Komisionin Qeveritar të Ekspertëve, akademik Hivzi Islamin dhe dy kryeshefat që prezantuan gjendjen reale që ata kanë në Agjencionet e tyre para Qeverisë së Republikës së Kosovës.

“Kjo gjendje është marrë në mënyrë faktografike dhe kështu është shënuar edhe në Raport dhe unë e konsideroj këtë si një kontribut të veçantë edhe të kësaj seance por edhe të Raportit Faktografik të Komisionit”, tha kryeministri Mustafa./b.j/

VULGARITET KUNDËR RAMUSH HARADINAJT

March 2, 2017 by dgreca

NGA ASLLAN BUSHATI/

VULGARITET KUNDËR RAMUSH HARADINAJT/

Po bëhemi dëshmitar të një cfaqeje teatrlalo-gjyqësore në Colmar të Francës, vetëm se nuk kemi patur mundësinë të marrim pjesë në duartrokitje për skenat komiko-tragjike. Por këtë mangesi duartrokitjesh po e konsumojmë në media dhe në rrjetet sociale. Ja për shembull, kur klloni i Colmarit njoftoi shtyrjen e gjyqit për datën 6 prillë- thashë me vehte mos e ka gabim se ndoshta duhej thënë 7 prille. Po c’rënëdsi ka 6 apo 7, prit prap thashë se shqiptarët kanë kujtesë historike për 7 prillin.

E po mirë atëhere të futet në kujtesë edhe 6-ta se janë fqinjë me 7-tën. Mirpo një miku im më ndihmoi duke më thënë: mos u mërzit se edhe me 6 nuk do të ketë gjyq, se Serbia më datën 1 prillë do të dërgojë disa dokumente të reja qe mbajnë fort vulën e vërtetësisë së kësaj date. Kështu që gjyqi shtyhet se nuk ka mundësi që dokumentat e shumta të 1 prillit të përkthehen frëngjisht, të kuptohen e gjykohen për pesë ditë . Prandaj është mirë që cdo gje te shtyhet për në qershor se atëhere piqen qershitë, ngrohet koha dhe kullohen ujrat deri ato zgjedhore. Madje miku im më këshilloi se mos bën ndonjë gabim të qëllosh me ndonjë romuz Francën për këto që po ndodhin, se nuk është mirë. Këtë që po të them nuk e kam nga vetja, por ma ka thënë hapur një diplomat i rëndësishëm se Franca është mikesha jonë ,kurse Serbinë shajeni sa të doni. Madje desha të shtoja më tha miku, se po shatë Francën, mund të na merziten shumë ata të BE-së dhe punët shqiptare morin rrukullimë të keqe. Po BE-ja c’punë ka me gjyqet i them mikut tim? Politika e miqësitë e vjetra janë janë vepruese, ma këtheu ai, a nuk e dinë atë shprehjen se kush ka miq ha fiq. Madje edhe ajo shprehja “sheh rrushi rrushin e piqet” ka ndryshuar në “sheh rrushi rrushin e piqet fiku”.
Po Ramush Haradinaj c’punë ka në këtë rrokopujë? Jo rrokopujë, më tha miku, po zgjedhje, zgjedhje, politikë, politikë e përsëriti dy herë sikur të mos mjaftonte vetën njera. Nikoliqi, Vucici, Dacici kanë qenë miqt e ngushtë të Milloshevicit kur ai ishte në pushtet, tani ai nuk është më, por në pushtet është BE-ja përfshi këtu edhe mikeshën Francë. Madje harrova se edhe në Kosovë në kohën e luftës shumë ishin bashkë në UCK, por sot në pushtet ca po e ca jo.
Me që më përmende autoritetet kosovare, a mendon se ato kanë fuqi vepruese per Ramushin e pyeta mikun tim? Po më tha kanë , por edhe disa re pluhuri mbarsur me interesa që kanë për mbiemra : vetiake, neopotiste, klanore ,partiake etj, vërtiten vërdallë dhe ata shpesh të prishin busullën. Kështu që shigjeta e busullës në vend që të tregojë psh veriun ose perendimin, tregon lindjen. Punë pluhurash do me thënë? Por jo vetëm pluhurash, por edhe një tjetër që fillon me “p” por që për momentin nuk po më kujtohet se në Amerikë ka shenjen $.
I nderuar Ramush, me qenë se në këtë punën e gjyqit tënd në Colmar ka pleksje të shumta interesash, unë si miku juaj po ju jap një këshillë: Njoftojë nëpërmjet medias autoritetet franceze (dhe miq e tyre), se po largoheni nga Franca edhe në mënyrë klandenstine për të shkuar pranë familjes e miqve të to dhe se më 6 prillë dhe sa herë do t’ju njoftojnë për gjyq do të jeni i pranishëm. Kështu le të mbyllet ose të vazhdojë kjo komedi gjyqsore.

Dita e 13-të e Protestës: Basha kërkon dorëheqjen e Ilir Metës

March 2, 2017 by dgreca

*Republika e Re, Basha për herë të parë kërkon edhe dorëheqjen e Ilir Metës /

*Berisha: Shqiptarë, mendoni për votën tuaj të lirë. Karteli i drogës është në qeveri/

Kryetari i PD-së, Lulzim Basha, ka kërkuar për herë të parë edhe dorëheqjen e kryetarit të Kuvendit, Ilir Metës, aleatit të Kryeministrit Edi Rama, me të cilin kanë krijuar qeverinë e koalicionit.Basha e ka artikuluar qartë në një intervistë dhënë Report TV: “Skenari i vetëm është largimi i kësaj qeverie. Rama dhe Meta dhe kushdo tjetër të japin dorëheqjen dhe t’i hapin rrugë qeverisë teknike. Unë u them në emër të qytetarëve: Reflektoni dhe hapini rrugë qeverisë teknike; rrugë tjetër nuk ka.” Sot protesta e opozitës para Kryeministrisë ka hyrë në ditën e 13.

Berisha: Shqiptarë, mendoni për votën tuaj të lirë. Karteli i drogës është në qeveri /

Ish-Kryeministri Sali Berisha iu ka drejtuar një thirrje qytetarëve shqiptarë sot nga “çadra e lirisë” përpara kryeministrisë.Ai ka bërë thirrje që shqiptarët të mendojnë për votën e tyre që është e rëndësishme. Gjatë fjalës së tij, Berisha u shpreh se qeveria është kthyer në një bandë kriminale, e nuk është më qeveri.

Pjesë nga fjala e ish-kryeministrit Berisha:Thirrjen nëse i besoni apo votës së lirë, nëse duhet apo jo që ne të përcaktojmë votën e lirë si rrugën për të garantuar të ardhmen që meritojmë. Vetëm një moment ju ftoj të dashur shqiptarë, të mendoni për votën tuaj.Unë e di që qindra mijëra nga ju kur dëgjojnë këto fjalë thonë: “Ne s’kemi kafshatën për të ngrënë”. Unë jam me ju se kafshata është jeta, është më e rëndësishme se vota, por unë ju them ju të tjerëve që a ka një rrugë tjetër që këta njerëz të mos numërojnë kafshatën, të jetojnë me dinjitet në vendin e tyre, përveç votës së lirë?Të votojnë përmes votës së lirë edhe për ata që lotët e mjerimit ua kanë shuar sensin, kuptimin e votës.Problemin e kafshatës mund ta zgjidhim duke votuar të lirë.Këtu para tre ditësh këtu ishte një personalitet shumë i shquar i politikës ndërkombëtare, zonja Betancurt që karteli i drogës e grabiti kur bënte garën për President.Ajo tha këtu se Shqipëria nuk më duket si Kolumbia. Për zonjën ishte e drejtë sepse qeveria e drogës kishte angazhuar ushtrinë për të luftuar kartelin e drogës, kurse këtu karteli i drogës është qeveria. Në dallim nga Kolumbia, drogën e mbjell qeveria, që I ka shndërruar strukturat e saj në struktura kanabiste.

Sa drogë ka shkuar në vitin 2016 deri tani? 150 tonelata me statistika. Por italianët kanë kapur 10-15% se pjesën tjetër nuk e kapin drogë.

Pse u mbush vendi me drogë: u mbush vetëm për një qëllim, që të helmojë votën, që vota të kapet me çdo kusht, që kanabisi të përcaktojë vullnetin e shqiptarëve.

A mund të votohet në një vend ku në të katër anëtar sundojnë bandat e armatosura të kanabisit? Ky kriminel që rri në zyrën e Kryeministrit bërtet si i çmendur se po bën shtet!

Çfarë shteti po bën ti që ke bandat në çdo metër katror të këtij vendi, kur e ke mbushur vendin me banda kanabisi. Po ndërton shtetin e drogës, po ndërton banditokraci!

Kosovë-Imami Shefqet Krasniqi nën akuzë

February 28, 2017 by dgreca

Ka shtyrë të rinjtë t`u bashkohen ISIS-it dhe Al Nusra-s/

Venera Ademi kishte fituar tri çmime në fushën e muzikës, derisa ishte duke ndjekur mësimet në shkollë fillore. Kishte ndjekur edhe shkollën e pianos. Mirëpo, sjellja e saj kishte filluar të ndryshonte në shkollë të mesme.

Bashkë me disa shokë e shoqe të klasës kishin filluar të shkonin rregullisht në Xhaminë e Madhe në Prishtinë. Për dy muaj rresht nuk kishte dalë nga shtëpia dhe vazhdimisht kishte dëgjuar në kompjuter ligjëratat e imamit të kësaj xhamie, Shefqet Krasniqi. Pas një kohe ajo ishte arratisur në Siri, shkruan sot Koha Ditore.

Kjo është vetëm një pjesë e rrëfimit të nënës së Venerës, e përfshirë në aktakuzën kundër imamit Krasniqi, e cila u ngrit të hënën nga Prokuroria Speciale e Kosovës.

Krasniqi, sipas këtij dokumenti që e ka siguruar “Koha Ditore”, gjatë viteve 2013-2014, në cilësinë e imamit të Xhamisë së Madhe “Mehmet Fatih” në Prishtinë, në vazhdimësi kishte shpërndarë mesazhe për publikun, kryesisht në mënyrë indirekte. Përmes tyre, sipas prokurorisë ai ka shtyrë qytetarët që të marrin rrugën drejt zonës së konfliktit në Siri dhe Irak, duke kryer kështu vepra terroriste.Si pasojë imami është akuzuar për veprën penale: shtytje për kryerjen e veprave terroriste. Po ashtu, akuzohet edhe për dy vepra të tjera penale: nxitje të urrejtjes, përçarjes ose mosdurimit kombëtar, si dhe për shmangie nga tatami.

Lu e Vlahutin firmosin peticionin e Vetingut

February 26, 2017 by dgreca

Lu e Vlahutin, anëtarë të Operacionit Ndërkombëtar të Monitorimit të Vetingut/

Ambasadori i SHBA-ve në Tiranë, Donald Lu dhe ambasadorja e BE-së, Romana Vlahutin, do të jenë anëtarë të bordit menaxhues të Operacionit Ndërkombëtar të Monitorimit. SHBA dhe BE kanë firmosur një marrëveshje bashkëpunimi për ndihmesën që do të japin gjatë zbatimit të reformës në drejtësi në Shqipëri. Misioni i BE-së në Tiranë ka publikuar në faqen e vet zyrtare marrëveshjen e plotë si dhe korrespondencat që shefja e ONM-së, Genoveva Ruiz Calavera ka shkëmbyer me Sekretarin e Përgjithshëm të Kryeministrisë, Engjëll Agaçi. Pikërisht në një letër të saj, të datës 7 shkurt 2017, drejtuar Agaçit, por edhe ministres së Integrimit Klajda Gjosha, ministrit të Jashtëm Ditmir Bushati, Avokatit të Popullit Igli Totozani si dhe sekretares së përgjithshme të Kuvendit, Albana Shtylla, Calavera njofton anëtarët e bordit të menaxhimit të ONM-së.

Në këtë letër, shefja e ONM-së saktëson se: “Kreu i delegacionit të BE-së dhe ambasadori i SHBA-ve në Shqipëri mund të marrin pjesë në bordin menaxhues të ONM-së si anëtarë jo të përhershëm, veçanërisht kur takimet do të zhvillohen në Shqipëri”.

Ndërkohë, në marrëveshjen e firmosur mes SHBA-ve dhe BE-së qysh në nëntor të 2016-ës, mes Christian Danielsson, Drejtor i Përgjithshëm për Zgjerimin dhe Fqinjësinë në Komisionin Evropian, dhe James A. Walsh, Zëvendës Ndihmës Sekretar i Shtetit, në Byronë e Narkotikëve Ndërkombëtarë dhe Çështjeve të Zbatimit të Ligjit, në SHBA, palët angazhohen të mbështesin zbatimin e reformës në drejtësi në Shqipëri./GSH