Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Familja katolike e Gjakovës, shtron iftar për hoxhën nga Drenica

by

Jo rastësisht thuhet se Kosova është shembull i tolerancës dhe respektimit të ndërsjelltë të feve.Ku ka shembull më të mirë, si ky që ka ndodhë sonte në Bec të Gjakovës, që e ilustoron raportet e mira që kanë mes vete myslimanëve dhe katolikëve. Marian Ndoja nga fshati Bec ka ftuar për iftar imamin e xhmisë së Drenasit, Osman Musliun.Hoxha nga Drenica ka treguar për këtë akt që ai në radhë të parë e quan vëllazëror.

“Sot jam mysafir në iftar tek i nderuar dhe shume i respektuari Marian Ndoja nga fshati BEC Komuna e Gjakovës njëherit Drejtori i shkollës së fshatit, mik i imi dhe familjes time. Është i besimit katolik por me të cilët kemi jetuar me shekuj në respekt reciprok dhe mbajtur lidhjet vëllazërore. Ata te cilët fenë dhe besimin e kanë me bindje e përkushtim, dhe jo për para, interes apo kontrabandim jetojnë kësisoj pa asnjë problem. Shpresoj që të na shtohet numri i besimtarëve të sinqertë dhe mos të biem në grackën e atyre që fenë e kanë bërë para apo biznes …!? Për ata që kohet e fundit mundohen me mish e shpirt të na ndajnë në baza fetare kjo është një përgjigjeje. Edhe pas këtij iftari Mariani mbetet katolik e unë mbetem musliman por vëllezër të vërtetë. Ndërsa respekti ndërmjet nesh është shtuar dhe vazhdon. Shpresoj që kjo traditë e tolerancës të vazhdohet edhe nga gjeneratat e reja në të ardhmen… Respekt dhe nderim për familjen NDOJA, Zoti ju nderoftë.!”, shkruan Musliu në Facebook.

30 Vjetori i gjeneratës së Plavë Gucisë

by

Nga Esad Gjonbalaj/New York/

Vitet po ikin shpejt por kujtimet shokëve të gjeneratës ringjallen serish duke u takuar pas 30 viteve të maturës. Gjenerata e jonë nga Plave Gucia e dëshmoj se koha kalon por kujtimet e bukura të femërisë tonë ende janë të fuqishme dhe të pa harrueshme në mesin shoqërisë së kohës së gjeneratës që ne i përkasim.

Mbrëmë në ambientet e lokalit Sapori në White Plains, NY pronë e vëllezërve Selman dhe Skënder Balidemaj u mbajt një takim që do të mbetet për një kohe të gjat në kujtimet shokëve dhe shoqeve të gjeneratës tonë.

Bashkimi i shokëve dhe shoqeve të gjeneratës u be po sikur e bënim dikur ne vendlindje, në oborret e shkollave tona, aty pastaj po sikur ishim në vendlindje dhe të vegjël posa ra zilja e shkollës  hymë të gjithë  të bere në rresht për dy dhe kështu stimuluam kujtimet e femërisë të një ore të rregullt “orë kujdestarie”.

Posa u ulem si dikur në bankat shkollore dhe me fletore në dorë filluam “orën e kujdestarisë”.

Të gjithë të shtangur nga malli i kohës dhe emocionet e një ribashkimi pas një kohe kaq të gjat filluam orën e kujdestarisë.

Arsimtar të klasës e kishim shokun tonë te gjeneratës Vesel Qosaj i cili posa hyri në “klasë” që te gjithë u ngritëm në këmbë dhe e përshëndesim. Në përshëndetje e tij  Veseli shprehi kënaqësinë e Ribashkimit tonë dhe fjalën ia dhe “kujdestares së klasës” shoqes tonë Hatmane Prelvukaje cila theksoj se sot fatkeqësisht të dashur shoqe dhe shokë në mesin tone na mungojnë dhe janë shuar nga jeta shokët dhe shoqe të gjeneratës, për te cilët ne mbajtëm një minutë heshtje për të nderuar ata që na mungojnë  por edhe shprehur mallin tonë të thell qe ndiejmë për mungesën e tyre sonte. Ora e stimuluar e mësimit vazhdoj me fjalimin e “kryetarit të kasës” Esad Gjonbalaj i cili theksoj se meritat për këtë mbrëmje u takojnë ju të gjithëve që kjo natë të jetë kaq madhështore me pjesëmarrjen e 33 shoqeve dhe shokëve të gjeneratës.

Pastaj ne të gjithë shprehem respektin dhe mburrjen tone për shokët e gjeneratës, luftëtaret e lirisë Sadri Mehaj dhe Deme Hasangjekaj të cilët me veprën e tyre të atdhedashurisë nderuan Plave Gucinë por edhe tërë gjeneratën tonë.

Kolë Camaj theksoj se kjo mbrëmje duhet të shndërrohet në diçka tradicionale sepse vitet po ikin e ne duhet të takohemi sërish por duke marr edhe familjet tona në këso mbrëmjesh të kësaj natyre.

Kjo mbrëmje ishte një gërshetim malli , një gërshetim kujtimesh, kjo mbrëmje dëshmoj se  edhe pse vitet dhe koha bëjnë të veten ne plavë-guciasit kemi ngrohtësinë e sinqert njerëzore dhe vëllazërore te ruajtur  dhe kalitur thell ne sinqeritetin malësorëve dhe ma malësoreve te Plave Gucisë.

Po kjo mbrëmje nuk përfundoj pa dëshmuar edhe humanizmin dhe solidaritetin me dy shokët e gjeneratës qe sot jetojnë ne vendlindje te cilëve ne ua tubuam nga $1000 për shoq, para këto qe do ua dërgojmë së shpejti si dhuratë nga ne në mërgim për ata qe qëndrojnë ne vendlindjet tona.

New York.12 Qershor 2016

Banderola që zemroi Greqinë, ankesë në UEFA-Kotzias thërret ambasadorin shqiptar dhe francez

by

Shiheni këtë banderolë që kanë  shpalosur gjatë ndeshjes Shqipëri-Zvicër dje në Francë. Eshtë pikërisht kjo banderolë që ka shkakatuar reagimin e Ministrisë së Jashtme greke.

“Greqia është fajtore. Kujto gjenocidin në Çamëri. 100 mijë viktima shqiptare”, thuhet në banderolën e shpalosur.

Zëdhënësi i Ministrisë së Jashtme greke deklaroi se shpalosja e banderolës është me përmbajtje provokuese dhe nxitëse.

“Ky provokim flagrant shkel rregullat e UEFA-s, e cila është përgjegjëse për parandalimin e sloganeve me përmbajtje provokuese. Ajo duhet të marrë masa të menjëhershme për të ndëshkuar ata që janë përgjegjës”, thekson Ministria e Jashtme greke.

“Një ankesë është duke u bërë gjithashtu pranë qeverisë shqiptare, nga e cila ne presim ta dënojë këtë veprim të papranueshëm dhe provokativ”, thuhet më tej deklaratë.

“Është e qartë se këto veprime provokative janë duke u kryer nga grupe margjinale që janë të pakënaqur”, thotë zëdhënësi, duke shtuar se “Ministria e Jashtme shqiptare ka pranuar zyrtarisht se nuk ka çështje “Çamëri””.

Reagon Shoqata Çamëria: Greqia dyfytyrëshe, tregon se nuk është shtet serioz

Shoqata Çamëria i konsideron absurde deklaratat e Ministrisë së Jashtme greke, duke theksuar se çështja çame është një çështje që do të ekzistojë për sa kohë do të ekzistojnë shqiptarët.

“Dyfytyrësia e politikës greke që në Tiranë pranoi se ekziston çështja çame dhe në Athinë deklaron se kjo çështje nuk u diskutua tregon se kemi të bëjmë me një shtet joserioz, që duhet të vij në binarët e diplomacisë”, thuhet në reagim.

Shoqata Çamëria i bën thirrje qeverisë shqiptare të njoftojë të gjithë aleatët e NATO-s dhe BE-së mbi çështjen çame, si një detyrim i vetë që buron nga Kushtetuta dhe Rezoluta e miratuar në Kuvend.

“Për sa i përket banerit në ndeshjen Shqipëri-Zvicër, Shoqata Çamëria përshëndet veprimin e tifozëve të rreshtuar në tribunën zvicerane për këtë akt dhe përkujtim human e jopolitik. Politika nuk bëhet me futboll dhe qeveria greke duhet të kuptojë se tifozët zviceranë dhe shqiptarë nuk janë mjete për propagandën zerviste që ende në Athinë e kanë për zemër, sipas parimit “shpif, shpif se diçka do të mbetet”, thuhet më tej.

“Kathimerini” – Banderola për Çamërinë, ministri Kotzias thërret ambasadorin shqiptar dhe francez

Mediat greke e kanë në faqe të parë shpalosjen e banderolës për Çamërinë gjatë ndeshjes midis Shqipërisë dhe Zvicrës në Francë.

Një nga gazetat më të rëndësishme në shtetin helen “Kathimerini”, shkruan se qeveria greke do të thërrasë të hënën ambasadorin e Shqipërisë dhe atë të Francës për të diskutuar për këtë problem.

Sipas gazetës, ministri i Jashtëm, Nikos Kotzias do të marrë në zyrë dy ambasadorët duke shprehur “acarimin e fortë të qeverisë greke”.

E të njëjtit ton do të jetë edhe një letër e ministrit të Sportit, Stavros Kontonis drejtuar UEFA-s. Gazeta e cilëson të ashpër edhe deklaratën e zëdhënësit të Ministrisë së Jashtme greke rreth kësaj çështjeje.

Liga Qytetare Shqiptaro-Amerikane dhe reagimet e shqiptareve ndaj artikullit të Carlotta Gallit

by

Liga Qytetare Shqiptaro-Amerikane ka inkurajuar një përgjigje të  fortë nga ana e shqiptarëve dhe ekspertëve të Ballkanit ndaj artikullit të Carlotta Gallit/

“Ne ishim të mendimit, shkruajnë ata (Joe DioGuardi President dhe Shirley Cloyes DioGuardi – Këshilltare për Çështje të Ballkanit, se artikullit të Gallit duhej t’i përgjigjemi sepse ky artikull dështon që të shpalos qëndrimin pro-perëndimor, pro-demokratik, dhe tolerancën ndërfetare të shumicës dërrmuese të shqiptarëve të Kosovës, si dhe rolin e Kosovës si një kundërshtar kryesor i terrorizmit islamik në Evropë.”

OSSINING NY:   Në një postim të tyre në rrjetin social Facebook, dy kontribuesit e mëdhenjë të çështjes mbarë Shqiptare, ish Kogresisit Republikan i Nju Jorkut, Joseph J. DioGuardi Presidenti i Ligës Qytetare Shqiptaro Amerikane dhe bashkëshortja e tij Këshilltare e Çështjeve Ballkanike Shili Cloyes DioGuardi, analiste dhe shkrimtare, thonë se gjatë dy javëve të fundit, Liga Qytetare Shqiptaro-Amerikane ka inkurajuar një përgjigje të  fortë nga ana e shqiptarëve dhe ekspertëve të Ballkanit ndaj artikullit të Carlotta Gallit të  publikuar në faqën e parë të gazetës The New York Times, të titulluar “Shëndrrimi i Kosovës në tokë pjellore për ISIS.”

“Ne ishim të mendimit, shkruajnë ata (Joe DioGuardi President dhe Shirley Cloyes DioGuardi – Këshilltare për Çështje të Ballkanit, se artikullit të Gallit duhej t’i përgjigjemi sepse ky artikull dështon që të shpalos qëndrimin pro-perëndimor, pro-demokratik, dhe tolerancën ndërfetare të shumicës dërrmuese të shqiptarëve të Kosovës, si dhe rolin e Kosovës si një kundërshtar kryesor i terrorizmit islamik në Evropë.”
Më tej ata ju luten atyre që dëshirojnë të lexojnë përgjigjen e tyre, publikuar në faqen e internetit të www.aacl.com në  klikoni ketu )për t’i lexuar letrat që secili prej dyve i dërguan gazetës Times, duke premtuar se pas këtij publikimi ata,  do të ndajnë me ju edhe letrat e tjera të dërguara nga anëtarët e LQSHA Bordit të  LQSHA-së.

Drejtuar:  Carlotta Gall

Re: “Shëndrrimi i Kosovës në tokë pjellore për ISIS” (faqja e parë, 22 Maj)
Në përpjekjen e saj për të njoftuar lexuesit e gazetës The Times për inkursionin fillestar të Islamit radikal në Kosovë, do të doja që autorja e artikullit Carlotta Gall të na kishte informuar se kjo është një shkelje e rëndë dhe kërcënim për realitetin shqiptar në Kosovë dhe në tërë Ballkanin. Shqiptarët janë myslimanë (me shumicë dërrmuese laike), katolikë, të krishterë ortodoksë, dhe hebrenj, të cilët kanë jetuar krah për krah në harmoni për shekuj me radhë. Askund kjo nuk ishte treguar më mirë se sa gjatë Luftës së Dytë Botërore, kur si myslimanët ashtu dhe të krishterët kosovarë fshehën hebrenjtë dhe i nxorën ata nga Kosova e pushtuar prej serbëve dhe nazistëve për në Shqipëri-i vetmi popull që mund të thotë se çdo hebre që jetonte në Shqipëri ose kishte kërkuar strehim atje u shpëtua gjatë Holokaustit.
Ka ardhur koha që bashkësia ndërkombëtare të përballet me të vërtetën e rëndësishme që Carlotta Gall tha, por që  nuk e kuptoi plotësisht, kur ajo citoi ish-kryeministrin e Kosovës Bajram Rexhepi. Rexhepi raportoi se, kur ai u përpoq të paraqiste një ligj që ndalonte sektet ekstremiste në vitin 2004, “zyrtarë evropianë i thanë atij se një ligj i tillë do të shkelte lirinë e fesë.” Bazuar në shekuj të tolerancës së tyre fetare, kosovarët nuk kishin nevojë për hyrje në “lirinë e fesë.” Mirëpo, për shkak se Kosova u bë protektorat i OKB-së në fund të luftës me Serbinë në vitin 1999, ata nuk ishin në gjendje për të kundërshtuar përgjigjen e gabuar Evropiane.  Me rritjen e ISIS, dhe me informacione sidomos nga Shtetet e Bashkuara, Kosova që prej atëherë është bërë një nga kundërshtarët kryesorë të terrorizmit islamik në Evropë. A do ta konsiderojë gazeta The Times një artikull pasues?

Shirley Cloyes DioGuardi
Ossining, NY
23 Maj, 2016
Telefon: (914) 923-4702

Shirley Cloyes DioGuardi është autore e “Thyerja e heshtjes së zgjatur për përdhunimin gjenocidial në Kosovë,” në antologjinë Gratë dhe Gjenocidi: Përvojat Gjjinore të Dhunës, Mbijetesës, dhe Rezistencës, e cila doli në shtyp këtë muaj nga Canadian Scholars’ Press.

* * *

Drejtuar:  Redaktorit të Gazetës The Times

Re: “Shëndrrimi i Kosovës në tokë pjellore për ISIS” (faqja e parë, 22 Maj)

Meqë shumica e lexuesve amerikanë nuk janë të informuar mirë në lidhje me fenë dhe gjeopolitikat në Ballkan, artikulli i Carlotta Gall do ti lë ata me shqetësime të vazhdueshme, por të gabuara, rreth tolerancës fetare në mes të 92 për qind të popullatës shumicë shqiptare të Kosovës. Shqiptarët në Kosovë dhe në të gjithë Ballkanin janë ende njerëzit më tolerant të Evropës. Ata janë myslimanë, katolikë, të krishterë ortodoksë, dhe hebrenj që kanë jetuar krah për krah në harmoni për shekuj me radhë dhe të cilët shpesh martohen me anëtarë te besimeve të ndryshme.
Problemi që meriton më shumë vëmendje është mungesa e zhvillimit ekonomik e nxitur nga armiqësia e vazhdueshme e Serbisë dhe pengimi i popullit shqiptar të Kosovës, të cilët ishin qytetarë të klasës së tretë në ish-Jugosllavi – një shtet që në fund u shpërbë për shkak të krimeve të luftës dhe spastrimit etnik të iniciuarnga regjimi komunist serb dhe udhëhequr në vitet e ’90-ta nga i akuzuari për krime lufte Sllobodan Millosheviqi.  Habitshëm, Serbia po kërkon të anëtarësohet në Bashkimin Evropian, edhe pse ende ka për ta njohur Kosovën fqinje si shtet të pavarur, gjëtë cilin qeveria amerikane e bëri më 17 shkurt 2008, pasuar nga 110 vende që nga atëherë.
Pengimi serb në Kosovë ka shkaktuar pasiguri të madhe ekonomike, duke çuar në varfëri dhe papunësi masive në një vend në të cilin 70 për qind të popullsisë janë nën moshën 30 vjeç. Ndërkohë që kjo ka krijuar “terren pjellor”, që u theksua në artikullin e Gallit, për të mirën e sektit islamik vahabisttëArabisë Saudite, aty ka pasur shumë kundershtim nga qeveria e Kosovës, shoqëria civile dhe familjet shqiptare. Si rezultat i kësaj, relativisht pak shqiptarë të Kosovës janë përpjekur për t’iu bashkuar ISIS-it. Departamenti ynë i Shtetit tani duhet të bëjë një punë më të mirë në frenimin e makinerisë saudite të parave në Ballkan dhe promovimin e formave radikale të Islamit në të gjithë globin. Ai duhet gjithashtu të punojnë me udhëheqësit politikë të Kosovës për të krijuar zhvillim ekonomik dhe vende pune për popullsinë që është në fakt më pro-amerikane dhe pro-demokratike në Evropën Lindore sot – një realitet thellësisht i rëndësishëm, përtë cilën Carlotta Gall dështoi ti informonte lexuesit tuaj.
I nderuari Joseph J. DioGuardi
Ossining, NY
23 Maj 2016
(914) 671-8583

Autori ka shërbyer në Dhomën e Përfaqësuesve të SHBA-ve nga 1985 deri më 1989 dhe është themelues i Ligës Qytetare Shqiptaro-Amerikane./B.S/

Kosova në 17 vjetorin e lirisë edhe në festë futbolli shqiptar e evropian

by

Foto Gazeta DIELLI – Behlul Jashari: Edhe sheshet në Kosovë plot përkrahje për kombëtaren shqiptare të futbollit në  “Euro 2016”/

Nga Behlul Jashari/ PRISHTINË, 11 Qershor 2016/

Në Kosovë, transmetimet publike në sheshe nga kampionati evropian i futbollit “Euro 2016” të historikes Shqipëri-Zvicër sot ishin pjesë e festimeve të Ditës Lirisë  në 17 vjetor, e në qytein e Prizrenit, më të madhin në rajonin jugor, edhe të ditës së 138 vjetorit të Lidhjes Shqiptare.

Në kryeqytetin e Kosovës, Prishtinë, sheshet Skënderbej e Zahir Pajaziti, ku ishin vendosur ekrane të mëdha, po edhe sheshet tjera e teracat e lokaleve, ku poashtu kishte transmetime të organizuara, ishin përplot njerëz në festë e të veshur kuqezi, po edhe me plisa të bardhë, e kudo me valime flamujsh.

“Suksesi i madh historik është i mbërritur, Shqipëria për herë të parë është në finalet e kampionatit evropian të futbollit. Kjo është fitorja”, ishte opinioni që dëgjohej kudo, edhe pas një goli që mori skuadra gjithëshqiptare. E kishte edhe një batutë derisa në sheshe në Prishtinë shikohej loja e ekipeve kombëtare të futbollit Shqipëri-Zvicër: “Këtu veç te referët s’paska shqiptarë”.

“Shqipëria kishte një paraqitje dinjitoze, loja ishte e mirë dhe është premtuese”, janë opinonet e para të ekspertëve  të futbollit në Kosovë pas humbjes me diferencë minimale në përballje me Zvicren.

Edhe në qytetin më të madh verior të Kosovës, në Mitrovicë, në anën jugore të urës së lumit Ibër ka festë futbolli  shqiptar e evropian, në ditët e festimeve të përvjetorit të lirisë së Kosovës.

Në 17 vitet e lirisë në qytetet e Kosovës festohen ditët e çlirimit, duke nisur me Ditën e Lirisë – 12 Qershorin, ditën kur në vitin 1999 nisën të hyjnë forcat shpëtimtare të NATO-s. Në Prishtinë festohet edhe 11 Qershori, dita kur para 17 viteve forcat e Ushtrisë Çlirimtare të Kosovës hynë në kryeqytet.