Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Qeveria miraton MSA-në, e nënshkruan në 27 tetor në Strasburg

by

-Negociatat për marrëveshjen e Stabilizim-Asociimit, kanë filluar në 28 tetor të vitit 2013. Më 22 tetor 2015 Këshilli i Bashkimit Evropian miratoi Marrëveshjen e Stabilizim Asociimit ndërmjet Kosovës dhe Bashkimit Evropian./
-Marrëveshja ka strukturë dhe përmbajtje të njëjtë sikur marrëveshjet e të gjitha vendeve të rajonit dhe përfshinë të gjitha elementet e një bashkëpunimi të plotë politik, ekonomik ndërmjet Kosovës dhe Bashkimit Evropian./
-MSA është marrëveshja e parë kontraktuale ndërmjet Kosovës dhe Bashkimit Evropian./
-Ministri i Brendshëm, Skender Hyseni, ka njoftuar kabinetin qeveritar për gjendjen e sigurisë në Kosovë, duke vlerësuar se është e mire. “Fatkeqësisht, nuk mund të thuhet edhe për sa i përket përpjekjeve të ndryshme të grupacioneve të caktuara politike që me mjete dhune të realizojnë synime dhe objektiva të caktuara politike”, tha ai./
Nga Behlul Jashari/ PRISHTINË, 24 Tetor 2015/ Nisma për lidhjen e Marrëveshjes për Stabilizim-Asociimin ndërmjet Bashkimit Evropian dhe Kosovës, u miratua sot nga qeveria kosovare, në mbledhjen e drejtuar nga kryeministri Isa Mustafa. Ai e njoftoi kabinetin qeveritar se nënshkrimi i MSA-së do të bëhet në 27 tetor në Strasburg.
“Do ta nënshkruaj unë në emër të qeverisë, dhe poashtu do të kërkojmë sot autorizimin nga presidentja e Republikës së Kosovës edhe për ministrin Çollaku që të jetë së bashku me mua në nënshkrimin e marrëveshjes. Nga Bashkimi Evropian do ta nënshkruajnë përfaqësuesja e lartë Mogherini dhe komisioneri Hahn”, bëri të ditur kreu i qeverisë kosovare.
Për ne, vijoi ai, është një prej marrëveshjeve tepër të rëndësishme që po arrijmë në këtë periudhë dhe një sukses i madh i Republikës së Kosovës.
“Me këtë, ne po arrijmë që të krijojmë marrëdhënie kontraktuale me Bashkimin Evropian për herë të parë. Me marrëveshje po përkufizohet edhe territori i Republikës së Kosovës në të cilin zbatohen rregullat e Bashkimit Evropian. Dhe, ne zhvillojmë negociata me Bashkimin Evropian në procesin e anëtarësimit tonë në BE, që në një formë e përkufizon edhe njohjen, edhe rolin që Bashkimi Evropian do ta ketë ndaj Kosovës në veçanti”, u shpreh Mustafa.
Ministri i Intergimit Evropian, Bekim Çollaku foli edhe për përfitimet ekonomike nga MSA, që nënkupton liberalizimin e tregut me Bashkimin Evropian në tërësi, përpos disa produkteve specifike të përfshira në marrëveshje, rritjen e investimeve direkte në Kosovë.
Marrëveshjen Stabilizim Asocim ministri Çollaku e ka vlerësuar “të rëndësisë historike dhe jetike për integrimin politik, ligjor dhe ekonomik të Republikës së Kosovës ne Bashkimin Evropian”.
Negociatat për marrëveshjen e Stabilizim-Asociimit, kanë filluar në 28 tetor të vitit 2013. Më 22 tetor 2015 Këshilli i Bashkimit Evropian miratoi Marrëveshjen e Stabilizim Asociimit ndërmjet Kosovës dhe Bashkimit Evropian. Marrëveshja ka strukturë dhe përmbajtje të njëjtë sikur marrëveshjet e të gjitha vendeve të rajonit dhe përfshinë të gjitha elementet e një bashkëpunimi të plotë politik, ekonomik ndërmjet Kosovës dhe Bashkimit Evropian. MSA është marrëveshja e parë kontraktuale ndërmjet Kosovës dhe Bashkimit Evropian.
Qeveria e Kosovës sot mbajti mbledhjen e rregullt, të 54-të, që nga zgjedhja në 9 dhjetor nga Kuvendi i zgjedhjeve të parakohshme parlamentare të 8 qershorit 2014, derisa është duke u përballur me kundërshtime të opozitës së bashkuar.
Ministri i Brendshëm, Skender Hyseni, ka njoftuar kabinetin qeveritar për gjendjen e sigurisë në Kosovë, duke vlerësuar se gjendja është e mirë dhe se ka trende të rënies së krimit ordiner. “Fatkeqësisht, nuk mund të thuhet edhe për sa i përket përpjekjeve të ndryshme të grupacioneve të caktuara politike që me mjete dhune të realizojnë synime dhe objektiva të caktuara politike”, tha Hyseni, duke folur për hapat e Policisë së Kosovës dhe institucioneve të rendit në këtë rrafsh.
Në këtë pikë, kryeministri Mustafa ka përgëzuar Policinë për punën shumë profesionale, ligjore, dhe të përkushtuar që ka bërë në mbrojtje të institucioneve të Republikës së Kosovës.
Kryeministri po ashtu ka theksuar e vlerësuar sjelljen e kulturuar nga ana e deputetëve të pozitës përkundër punës shumë të vështirë dhe ambientit të pasigurt dhe të rrezikshëm, njëkohësisht punën e Kryesisë dhe kryetarit të Kuvendit për gjetjen e mënyrës për të evituar konfliktin, për të mundësuar që Kuvendi të kryejë punën në harmoni me rregulloren dhe me ligjin. “Me këtë, Kuvendi ka treguar se mund të funksionojë dhe se askush nuk mund ta ndalë punën e tij. Se Kuvendi është në gjendje të bjerë vendime, se koalicioni është krejtësisht stabil dhe i fuqishëm, është i përgjegjshëm, zbaton ligjin dhe Kushtetutën. Ne do të vazhdojmë edhe si qeveri të përkrahim krejtësisht punën e Kuvendit të Republikës së Kosovës, duke i bërë poashtu ftesë opozitës që t’i kthehet punës normale dhe të respektoj ligjin, Kushtetutën dhe rregulloren e Kuvendit”, u shpreh kryeministri Mustafa.
Edhe zëvendëskryeministri Hashim Thaçi shprehu mbështetje të fuqishme për qëndrimin e mbajtur. “Është shumë me rëndësi që partnerët e koalicionit janë të vendosur për të vazhduar punën në institucionet e vendit, me legjitimitetin e tyre të plotë, me tre të katërtat në Parlament që nuk janë vetëm numra por janë drejtpërdrejt legjitimitet qytetar”, tha ai.
Po ashtu, Thaçi falënderoi deputetët e koalicionit për durimin e tyre, kulturën e lartë të treguar dhe udhëheqjen e shkëlqyer nga kryetari i Kuvendit.
“Në anën tjetër, askush s’mund ta sfidojë demokracinë në Republikën e Kosovës. Në veçanti në këtë periudhë, kur jemi drejt anëtarësimit në UNESCO, nënshkrimit të marrëveshjes historike për vendin tonë, Marrëveshjes së Stabilizim Asociimit. Në vitin evropian për Kosovën, pamjet në Parlament nga opozita janë pamje me të vërtetë që nuk përkojnë me realitetin, me standardet, me vlerat, por as me traditën tonë”, u shpreh kryediplomati kosovar.
Ajo që është shumë me rëndësi, theksoi Thaçi, nuk do të ketë bllokim fizik për Kuvendin, do të jetë i pamundur, dhe do të vazhdojmë me axhendën tonë të zhvillimit dhe evropiane.
As në mesnatën e kaluar nuk ka përfunduar dita e gjatë e ngjarjeve në Kuvendin e Kosovës e rreth tij, një seancë në rrethana të jashtëzakonshme jo në sallën plenare, pa opozitën, u mbajt në orët e para të pas mesnatës, pasi gazi lotsjellës u hodh përsëri në mesnatë nga opozita në sallën e seancës plenares dhe e ndërpreu.
Kuvendi i Kosovës, kishte më shumë se një muaj nga fillimi i sesionit vjeshtor, nuk ka arritur të përfundojë asnjë nga seancat plenare të ndërprera nga opozita edhe me hedhje gazi lotsjellës e të vezëve, me “rrethime” të foltores e kryesuesit, mes fërshëllimash e fjalorit të ashpërsuar gjithnjë e më shumë. Opozita edhe me protesta e peticion kërkon anulimin e marrëveshjeve të 25 gushtit me Serbinë dhe të demarkacionit me Malin e Zi.
Sipas kryetart të partisë opozitare AAK, Ramush Haradinaj, “ngjarjet e djeshme ne Kuvend dëshmojnë se në Kosovë është përmbysur edhe jeta parlamentare edhe sistemi demokratik”.
“Unë po të isha në vendin e kryeministrit Mustafa”, ka thënë Haradinaj, “sot do të kisha dhënë dorëheqje”. “Janë të pa akceptueshme situatat kur në kuvendin e Republikës, më shumë ka policë se sa deputetë!”, është shprehur lideri i AAK në konferencën për shtyp.

Crawford- Rames: Në SHBA nuk arrestohesh për kuponin

by

Kreu i Dhomës Amerikane i përgjigjet Edi Ramës pas deklaratave të një dite më parë të kryeministrit në Këshillin Ekonomik Kombëtar./
Presidenti i Dhomës Amerikane të Tregtisë, Mark Crawford ka reaguar pas deklaratave të një dite më parë të kryeministrit Edi Rama në Këshillin Ekonomik Kombëtar. I kontaktuar nga Ora News me telefon, numri një i Dhomës Amerikane të Tregtisë në Shqipëri, Mark Crawford deklaron:“Ne nuk jemi kundër nismës anti informalitet. Nëse ka rezultat, aq më mirë për qeverinë. Nuk kemi qenë dje të ftuar në mbledhjen e Këshillit Ekonomik Kombëtar, pasi është rotacion. Qëndrimin për nismën anti informalitet e kemi dhënë. Në Amerikë ka politika fiskale të ndryshme për çdo shtet. Nuk futet njeri në burg se nuk lëshon kuponin tatimor. Madje, nuk lëshohen fare kupona apo faturë, pasi çdo transaksion kryhet me bankë. Ne ditën e enjte kemi mbledhjen e Bordit të dhomës dhe mund të dalim me një deklaratë”.
Dhoma Amerikane e Tregtisë ka lëshuar kritika të forta për mënyrën sesi qeveria po zbaton nismën anti informalitet, pasi sipas saj, biznesi po përballet me masa represive që rrezikojnë ta falimentojnë.
Rama kritikoi qëndrimin e mbajtur publikisht nga Crawford për mënyrën sesi po zbatohet nisma anti informalitet dhe i kujtoi përfaqësuesit amerikan të Dhomës sesi trajtohet moslëshimi i kuponit tatimor në Shtetet e Bashkuara të Amerikës.
” Më vjen keq që nuk e shoh përfaqësuesin e Dhomës Amerikane të Tregtisë, ti thosha se përpara se sa të bëjë deklarata pas deklaratash, duke iu kundërvënë këtij operacioni t’ju tregojë shqiptarëve se cfarë i ndodh në SHBA dikujt që kapet me evasion apo duke shitur pa lëshuar faturën tatimore. Pasi ta tregojë këtë le të na tregojë ne se çfarë të bëjmë më mire” deklaroi dje Rama.
****
JA CFARE THA KRYEMINISTRI NE KESHILLIN KOMBETAR
Në mbledhjen djeshme të Këshillit Ekonomik Kombëtar, teksa analizonte bilancin e aksionit kundër informalitetit, kryeministri Edi Rama ka shfrytëzuar rastin për të thumbuar Dhomën Amerikane të Tregtisë në Tiranë. Teksa një javë më parë, në një deklaratë për mediat, Dhoma Amerikane rendiste një sërë kritikash ndaj aksionit të qeverisë dhe ligjit të ri për gjobat ndaj evazonit fiskal. Dhe mesa duket, kritikat e ardhura nga biznesi amerikan që operon në Shqipëri nuk janë pritur mirë nga kryeministri Edi Rama. Në mbledhjen e Këshillit Ekonomik, ai është marrë personalisht me drejtuesin e kësaj organizate ekonomike, presidentin Mark C. Crawford.
“Më vjen keq që nuk e shoh këtu përfaqësuesin e Dhomës Amerikane të Tregtisë, sepse do kisha parapëlqyer që ta shikoja në sy (nënkupto: Mark C. Crawford) dhe t’i thosha që përpara sesa të bëjë deklarata pas deklaratash duke iu kundërvenë këtij operacioni dhe duke folur për masat e rrepta të qeverisë si masa penguese, t’ju tregojë shqiptarëve se çfarë ndodh në Amerikë kur dikush kapet me evazion apo kapet pa lëshuar faturën tatimore. Mbasi t’ua tregojë shqiptarëve këtë, atëherë le të vazhdojë dhe të na tregojë neve se çfarë duhet të bëjmë më mirë”, – u shpreh kreu i qeverisë.

Realisht ligjet amerikane për biznesin janë të ashpra dhe nuk krijonë asnjë lloj tolerimi për evazionin fiskal. Por debati që realisht hapi Dhoma e Amerikane e Tregtisë nuk kishte të bënte me kuponat, por me gjobat dhe modelin ekonomik që po vendoset në aksionet tatimore në vend. Si një institucion me traditë në financat e vendit biznesi amerikan i kujtoi kryeministrit se reformat e ministrit Shkëlqim Cani mund të sjellin efekte negative. Rasti më konkret ishte ai sesi një biznesi me 5 milionë lekë të reja xhiro në vit mund t’i vendoset një gjobë 10 milionëshe. Praktikisht, një masë e tillë do të thoshte falimentim. Në fakt Mark C. Crawford, pavarësisht kritikave për reformat e qeverisë, në fjalën e mbajtur pak ditë më parë për 15-vjetorin e krijimit të këtij institucioni deklaroi se kishte marrë kupon edhe për printimin e fjalimit të mbajtur. Ironi e egër ishte ndaj Edi Ramës ! Nuk kishte me shumë se kaq të tregonte Mark C. Crawford inatin dhe mërinë ndaj kësaj mënyre pune të tatimeve, gjithnjë sipas tij.
Nga ana tjetër, qëndrimi i Dhomës Amerikane të Tregtisë ka një forcë tjetër po të kemi parasysh se biznesi vendas ka një sjellje vasaliteti ndaj qeverisë. Këtu nuk flitet vetëm për qeverinë Rama, por për të gjitha qeveritë. Sa herë janë ndërmarrë reforma biznesi vendas është rreshtuar me qeverinë, jo se janë gjithmonë dakord me reformat, por se mbështetja e mazhorancës për biznesin përkthehet në përfitime të tjera që kanë të bëjnë me tenderat dhe me lehtësira ekonomike. Merrni shembullin e mbledhjeve në Këshillin Ekonomik, ku dhjetëra biznesmenë të fuqishëm në vend ulen dhe dëgjojnë njëlloj si të ishte mbledhja e qeverisë dhe nuk thonë atë që mendojnë. Të paktën publiku nuk dëgjoi gjë dje, live. Kjo është pa sens. Biznesi ka një mal me vërejtje ndaj qeverisë, por këto i thonë nën zë. Kur dalin në takime publike i miratojnë në heshtje reformat, duke i legjitimuar formalisht dhe duke pritur shpërblimin nga qeveria. Realisht, këta lloj biznesesh i dëmtojmë më shumë reformat sesa qëndrimet si ai i Dhomës Amerikane.
Basti i qeverisë në këtë aksion që dje mbushi 45 ditë nuk është vetëm marrja e kuponit, por se çfarë do të ndodhë kur aksioni të përfundojë. Biznesi nuk formalizohet me aksione, por me rregulla dhe ndëshkime të sipërmarrjeve të mëdha që deri më sot kanë abuzuar me miliarda lekë. Sfida e qeverisë është nëse do të arrijë të godasë edhe ato biznese që janë rreshtuar si fasadë në krah të saj, ndërkohë që deri dje kanë bërë evazion duke vjedhur jo vetëm qytetarët, por dhe arkën e shtetit. Sinjalet e fundit janë që gjërat po lëvizin në këtë drejtim. Ka njoftime se prokuroria po heton dhe pritet të bëjë arrestime të mëdha nga biznesi VIP. Por a do të cënohen e penalizohen VIP-at që rrijnë pas e para qeverisë? Të shikojmë!

Drejtoria e Tatimeve paralajmëroi arrestime në radhët e emrave të njohur të biznesit në vend. Arrestimet do të kryhen me akuzën e evazionit fiskal dhe emrat e përfolur janë në radhët e bizneseve që janë konstatuar me shkelje në fazën e parë të aksionit kundër informalitetit. Emrat e biznesmenëve që do t’u vihen prangat do të tregojnë edhe sesa seriozisht është gjithë aksioni i nisur prej 45 ditësh.
Dje kryeministri ia ktheu reston Mark C. Crawford për ironinë dhe reagimin e tij të para disa ditëve.
-Ku është ai ?- pyeti kryeministri- që ta shikoj përballë e në sy.
Në të vertetë debati dhe kundërshtimet nuk bëhen me deklarata shtypi, por direkt e në tavolinë aty ku ishte dje mbledhja në fjalë. Nëse Mark C. Crawford do të shkonte dje në takim dhe ti thoshte problemet e shqetsimet në sy ai do të fitonte pikë. Fakti që nuk shkoi tregon që ose kishte frikë ose indiferencë për ligjet shqiptare. Por ligjet janë mbi këdo, edhe mbi amerikanin Mark C. Crawford, edhe mbi çdo biznes tjetër të huaj që operon në Shqipëri.
Në të vertetë ka biznese të huaja ( nuk e dijmë për rastin në fjalë) që nuk paguajnë apo fshihen nën emrin të “huaj” dhe mbushin thasët me euro e ikin, duke mos paguar. E shikojnë Shqipërinë si një “Afrikë”, por Rama nëse arrin të jetë i drejtë dhe i barazlarguar nga të gjithë në zbatimin e ligjit ka bërë një akt të mirë për vendin.
Ndonëse taksat e tarifat kanë vend për diskutime. Dhe duhen riparë. Por kjo nuk do të thotë të mos zbatosh ligjin që është në fuqi. Një ligj sado i keq të jetë duhet zbatuar. Beteja mbetet që të marrësh vota e ta rrëzosh qeverinë ,nëse njërëzit janë të pakënaqur me politikën e taksave të qeverisë.
Rrugë tjetër nuk ka ! As në Amerikë.

Presidentja Jahjaga: Dialogu, gurthemel i demokracisë

by

-Deklaratë e Presidentes së Republikës së Kosovës/
PRISHTINË, 24 Tetor 2015/Presidentja e Republikës shprehet thellësisht e shqetësuar dhe e shpreh keqardhjen e thellë për zhvillimet në Kuvendin e Kosovës dhe jashtë tij.
“Skenat dhe veprimet e dhunshme në Kuvend janë të dënueshme dhe të papranueshme, mjetet e përdorura plotësisht në kundërshtim me parimet bazike të një rendi demokratik dhe një demokracie parlamentare”, thekon ajo sot në një deklaratë dërguar nga Presidenca kosovare.
Presidentja e Kosovës apelon te deputetët e opozitës të heqin dorë nga dhuna.
“Aspiratat e vendit tonë po rrezikohen thellësisht nga këto ngjarje dhe këto veprime po e dëmtojnë demokracinë që e kemi ndërtuar me mund. Apeloj te i tërë spektri politik që t’i kthehen normalitetit, që institucionet të vazhdojnë punën sepse kemi shumë sfida para vetes”, thekson ajo.
“Qytetarët që na kanë zgjedhur presin nga ne të jemi shembull i promovimit të sundimit të ligjit, respektim të procesit demokratik. Dialogu është gurthemel i demokracisë. Aty ku ka dialog, ka zgjidhje”, përfundon Jahjaga.
Presidentja e Republikës i ka ftuar “për dialog politik partitë parlamentare në përpjekje për të tejkaluar gjendjen e krijuar në vend”, ka takuar ndaras liderët e pozitës dhe opozitës, dhe kishte përpjekje që t’i takojë “përfundimisht, në mirëbesim, në tryezë të përbashkët”, para seancës së djeshme të Kuvendit./b.j/

Shtypi: Politika zhyt vendin në krizë e kaos

by

-Kryetituj gazetash sot në Kosovë: “Politika zhyt vendin në krizë e kaos”, “Turp”, “Seanca mbahet në bufe, ‘Zajednica’ nuk kalon”, “Në kushte jonormale pozita mbajti seancën” “Lufta e opozitës me gaz lotsjellës dhe gurë, mbyllet me arrestime!”/
PRISHTINË, 24 Tetor 2015/ “Politika zhyt vendin në krizë e kaos”, është kryetitull ne shtypin e sotëm në Prishtinë, pas zhvillimeve në Kuvendin e Kosovës.
Përpjekja për të debllokuar Kuvendin e Kosovës, të premten pasdite, ka përshkallëzuar krizën mes koalicionit qeverisës dhe opozitës, duke e zhytur legjislativin e vendit në krizë dhe kaos edhe më të thellë. Nga ora mes së premtes e së shtunës, një momentum i ri politik është krijuar, shkruan sot Koha Ditore.
Me orë të tëra ka zgjatur loja me nerva.
Subjektet në pushtet përpiqeshin të gjenin rrugë për të mbajtur seancën e Kuvendit, ndërsa opozita bllokonte çdo mundësi. Dhe, kur Kryesia e Kuvendit, nën udhëheqjen e kryeparlamentarit Kadri Veseli, vendosi që përmes sigurimit policor të rrethojë foltoren dhe pjesën ku qëndron kryeparlamentari e kabineti qeveritar, për ta pamundësuar kështu bllokimin nga koalicioni VV-AAK-Nisma, opozitarët sërish aktivizuan gaz lotsjellës brenda sallës.
Derisa rrëmuja e krijuar brenda Kuvendit u transformua në kaos të plotë, jashtë tij përkrahësit e opozitës u përplasën me njësitet e policisë, duke përshkallëzuar konfliktin edhe më shumë me hedhje gurësh e kokteje molotovi, për të krijuar një imazh të një krize shumë të rëndë për qytetarët e Kosovës.
Seanca e nisur pasditen e së premtes, më në fund është përmbyllur rreth orës 2 të së shtunës, por është mbajtur pa praninë e opozitës dhe pa u krijuar mundësinë gjithë medieve që ta përcjellin atë. Është organizuar në një bufe që ndodhet në katin më të lartë të godinës së Kuvendit.
Për rreth 14 orë, tempulli i demokracisë është kthyer në betejë muskujsh midis pushtetit e opozitës, shkruan gazeta.
Me titullin “Turp”, gazeta Zëri shkruan se, situata në Kuvendin e Kosovës ka dalë totalisht jashtë kontrollit, në seancën e së premtes. Deputetët e opozitës disa herë kanë gjuajtur gaz lotsjellës për ta parandaluar mbajtjen e seancës, përkundër vendimit të Kryesisë që brenda të futet edhe Policia. Seanca ka vazhduar deri rreth orës 02:00 të së shtunës në një sallë të improvizuar të Kuvendit dhe pa praninë e opozitës
Gaz lotsjellës, fyerje mes deputetëve të pozitës dhe opozitës dhe masa shtesë sigurie. Kështu është karakterizuar seanca maratonike e së premtes e Kuvendit të Kosovës, e cila ka filluar në orën 16:00 dhe ka zgjatur deri rreth orës 02:00 të së shtunës.
Para se të niste seanca, përkatësisht rreth orës 15:00 të ditës së premte, shefja e grupit parlamentar të AAK-së, Donika Kadaj-Bujupi, ka hedhur gazin lotsjellës në ambientet e Kuvendit të Kosovës, afër zyrës së kryetarit të Kuvendit, Kadri Veseli.
Të njëjtin veprim deputetët e opozitës e bënë një orë më pas, me rastin e fillimit të seancës, me ç’rast përsëri deputetja Kadaj-Bujupi dhe ish-kreu i “Vetëvendosjes”, Albin Kurti, njëkohësisht kanë gjuajtur gaz lotsjellës në seancë, ku kanë pamundësuar vazhdimin e seancës nga kryeparlamentari Veseli, i cili kërkoi një orë pauzë.
Mirëpo, seanca u ndërpre deri rreth orës 24:00, me ç’rast sërish opozitarët hodhën gazin lotsjellës, pavarësisht se aty ishin barrikaduar edhe forcat e sigurisë së Kuvendit…
“Seanca mbahet në bufe, ‘Zajednica’ nuk kalon”, është kryetitulli te gazeta Kosova Sot, “Në kushte jonormale pozita mbajti seancën” te Epoka e Re dhe “Lufta e opozitës me gaz lotsjellës dhe gurë, mbyllet me arrestime!” te Bota Sot./b.j/

U themelua shoqata “Kosova për Sanxhakun”

by

Në Prishtinë themelohet Shoqata Jo-qeveritare ‘Kosova për Sanxhakun’. Bëhet fjalë për një nismë që buron prej vullnetit të mirë për bashkimin kulturor dhe shpirtëror të trevës së Sanxhakut me Kosovën, duke u bazuar në historinë e përbashkët etnike.
Dikur para aneksimit nga Serbia e Mali i Zi, Sanxhaku bënte pjesë në Vilajetin e Kosovës, i cili ishte Vilajeti më i madh në përbërje të trojeve të Shqipërisë.
Nisma e profesor Ismet Azizit, synon avancimin e të drejtave të shqiptarëve në trevën e Sanxhakut dhe promovimin e kulturës së kësaj treve të harruar. Shoqata ‘Kosova për Sanxhakun’ do të jetë një shoqatë e pavarur me qëllim të avancimit të të drejtave të banorëve në trevën e Sanxhakut – të ruajë, konservojë, zhvillojë dhe promovojë kulturën shqiptare të trevës së Sanxhakut dhe të shtojë marrëdhëniet dhe kontaktet mes shqiptarëve -boshnjakëve të Sanxhakut dhe shqiptarëve të trevave tjera shqiptare.
Kuvendi themelues me vota unanime kryetar të kësaj shoqate ka emëruar profesor Ismet Azizin, njërin prej veprimtarëve shumë të dalluar të miqësisë mes Kosovës dhe Sanxhakut. Në Kuvendin themelues kanë marrë pjesë edhe personalitete të njohura të Sanxhakut e të Kosovës.
Në këtë tubim vëllazëror përveç shumë intelektualëve, studentëve, profesorëve universitar, punëtorëve shkencor, veprimtar e deputet, morën pjesë nga Bihori: Safet Hadroviq Vrbicki, dr. Kemal Kurtagiq ( Kutagaj), Prof. Dr Admir Muratoviq kryetar i Bashkësisë Kulturore të Sanxhakut, Prof. Dr.Rexhep Shkrijel, nga N. Pazari, Prof. Prof. Riza Gruda (ish deputet në Parlamentin Serbisë), nga N. Pazari, Jonuz Kola nga Kuksi, Musë Prevlukaj nga Plava, Rexhep Abazi nga Lugina e Preshevës, Shefket Hukiq, nga Peja me prejardhje nga Uglla e Peshterit, e shumë të tjerë.
Shumë emocionuese ishte prezenca e pasardhëseve të luftëtarëve të Luftës së Pazarit, siç ishte Xhavit Kastrati, nipi i Shaban Polluzhës, Fazli Muriqi, nipi i bajraktarit të Rugovës Sak Fazlisë, Agim Bërdyna , nipi i Mulla Zekë Bërdynjës, Aqif Blyta (nga familja e Aqif Efedi Blytës) të cilët përshëndeten kuvendin, me shpresë se kjo shoqatë të arrijë të ndriçojë të kaluarën heroike të para ardhësve të tyre.
Në punimet e kuvendit mori pjesë edhe deputeti Nait Hasani, përgëzoi nismëtarin, ndërsa shoqatës i dëshiroi sukses në ngritjen e urave të bashkëpunimit dhe zbardhjen e tragjedive të së kaluarës së kësaj treve. Ndërsa për gjendjen e popullatës shqiptare të Sanxhakut, z. Hasani potencoi edhe mundësinë dhe të drejtën e aprovimit të një rezolute të Kuvendit të Kosovës.
Punimet e kuvendit e përshëndetën Prof. Hakif Bjarami, Azem Vllasi, Admir Muratoviq, Rexhep Shkrijelj, Riza Gruda, Rexhep Abazi, Musa Prevlukaj, Kenan Kurtadiq, Jonuz kola Shefket Hukiqi të cilët kuvendit dhe organizatës i uruan sukses, duke shprehur kënaqësinë për themelimin e saj.

Nexhmedin Spahiu para pjesëmarrëseve deklaroi se shoqata “Kosova për Sanxhakun” ka për qëllim që t’i ngjall lidhjet kulturore, shpirtërore mes Kosovës dhe Sanxhakut .
“ Ka për qëllim që ti ngjall lidhjet kulturore, shpirtërore, mes Kosovës dhe Sanxhakut, mes Shqipërisë dhe Sanxhakut, lidhje këto të cilat kanë ekzistuar tradicionalisht, deri në dekadat e fundit, e për shumë e shumë arsye për shkak që janë zbehur në kuptimin fizik, por vet prania juaj në këtë tubim tregon se ato asnjëherë nuk janë zbehur në kuptimin shpirtëror”, tha Spahiu.
Ai gjithashtu tha se një ndër qëllimet e kësaj shoqate është që të ndikoj edhe në ngjarjet nga historia të cilat janë të injoruara.
“ Një ndër qëllimet e kësaj shoqate është që të ndikoj tani e tutje kjo dhe shumë ngjarje tjera nga historia të cilat janë të injoruara të bëhen pjesë e vetëdijes sonë , përmes kësaj shoqate tentohet që ti kthehet vëmendja e opinionit në Kosovë dhe në Shqipëri drejt Sanxhakut , si një njësi kulturore , shpirtërore të cilin duhet bashkëpunuar , të cilin nuk ka asnjë arsye që kjo të shmanget. Shpresojmë që në të ardhmen përmes veprimtarisë së kësaj shoqate, institucioneve tona tu kthjellohet mendja dhe të përqendrohen në aktivitetet, projektet të cilat do të orientohen drejt Sanxhakut”, tha Spahiu.
Nga ana tjetër Ali Daci propozoi bordin drejtues të shoqatës “Kosova për Sanxhakun” të i cili u votua nga anëtarët e kuvendit. Gjithashtu u zgjodh edhe kryetari i bordit Ismet Azizi për të cilin të gjithë kuvendarët votuan pro këtij propozimi.
Në fund të pranishmëve iu drejtua edhe bashkëthemeluesi i shoqatës Prof. Dr Mazllum Baraliu, i cili anëtarëve të kuvendit nga të gjitha trojeve iu dëshiroi mirëseardhje, ndërsa njëherësh shprehi bindjen se një bord me një përbërje të tillë premton shumë dhe se sukseset nuk do të mungojnë.