Kronike – Page 268 – Dielli

Kosovë-Urgjente, një etikë parlamentare

June 22, 2016 by dgreca

-Tryeza në Prishtinë në kuadër të bashkëpunimit në mes të Kuvendit të Kosovës dhe Komisionit të Kongresit të SHBA-ve për Partneritet në Zhvillimin e Demokracisë (HDP), me mbështetjen e USAID-it/

-Kryetari i Kuvendit të Republikës së Kosovës, Kadri Veseli: Etika parlamentare, në rrethanat aktuale, është nevojë urgjente institucionale. Të zgjedhurit duhet t’u japin zgjidhjeve brengave të qytetarëve dhe jo t‛i shtojnë ato/

PRISHTINË, 22 Qershor 2016-Gazeta DIELLI-B.Jashari/ “Parimet e etikës parlamentare dhe integriteti institucional”, është tryeza e zhvilluar sot në Prishtinë në kuadër të bashkëpunimit në mes të Kuvendit të Kosovës dhe Komisionit të Kongresit të SHBA-ve për Partneritet në Zhvillimin e Demokracisë (HDP), me mbështetjen e USAID-it.Kryetari i Kuvendit të Republikës së Kosovës, Kadri Veseli, ë fjalën e tij, theksoi se një institucion nuk e bëjnë demokratik vetëm kushtetuta dhe rregulloret administrative, por edhe standardet morale që afirmon dhe përvetëson ai institucion. Sfidat e Republikës së Kosovës, si një demokraci e re parlamentare, shtoi kryetari i Kuvendit, janë mbi të gjitha sfidat e fuqizimit të vlerave bazike demokratike, kushtetutshmëria, sundimi i ligjit e llogaridhënia. Kuvendi i Kosovës, si institucioni më i lartë përfaqësues në Kosovë, tha në vazhdim Veseli, duhet të jetë shembulli udhëheqës në këtë fuqizim.“Sot po diskutojmë, së bashku, për etikën parlamentare, e cila në rrethanat aktuale, nuk është luks, por nevojë urgjente institucionale. E them nevojë urgjente, sepse të gjithë sot në Kosovë, jemi dëshmitarë për degradimin e imazhit të politikës dhe funksionit publik. Politika është bërë sinonim i fenomeneve negative në shoqëri, korrupsionit, abuzimit, interesave të ngushta meskine, shkeljes së ligjit dhe fjalës së dhënë, akuzave të pambështetura dhe motiveve të ulëta. Ka vetëm një rrugë për ta ndryshuar këtë perceptim negativ të publikut dhe për t‛ia kthyer dinjitetin politikës: rivendosja e lidhjes së domosdoshme në mes veprimit politik dhe parimeve e vlerave morale”, theksoi kryetari Veseli, duke shtuar se Kuvendi i Kosovës duhet të jetë i pari në këtë proces.Në vazhdim të fjalës së tij, kryetari Veseli theksoi se bartësit e përgjegjësive publike duhet të jenë të gatshëm në çdo moment për të dhënë llogari mbi mënyrën se si janë duke ushtruar funksionin e besuar publik. Ai tha se të zgjedhurit duhet t’u japin zgjidhjeve brengave të qytetarëve dhe jo t‛i shtojnë ato.

“Ky Kuvend ka sjellë vendime historike për vendin, ka shpallur pavarësinë e Kosovës, ka miratuar ligje që garantojnë ecjen përpara të vendit tonë, por në shumë raste, jo më larg se para pak muajsh, ka lejuar që të shndërrohet në arenë përplasjesh, të cilat i kanë bërë qytetarët të ndihen të dëshpëruar me vendin e tyre dhe kanë vënë në dyshim kredibilitetin e vetë shtetit të Kosovës në sytë e partnerëve tanë”, theksoi Veseli, duke shtuar se në demokraci mosmarrëveshjet duhet të negociohen përmes dialogut, e jo imponimit me forcë.

“Prandaj është aq urgjente të kemi një etikë parlamentare. Jo vetëm si tekst i shkruar në një letër të zbukuruar, por mbi të gjitha, si bindje e brendshme në të cilën beson përnjëmend secili nga ne dhe në bazë të të cilës duhet të veprojmë”, theksoi kryeparlamentari Veseli.

Për Kosovën do të ketë një vendim meritor

June 21, 2016 by dgreca

-Presidenti i Parlamentit Evropian priti presidentin Thaçi, flasin për liberalizimin e vizave/

BRUKSEL, 21 Qershor 2016 – Gazeta DIELLI/ Presidenti i Republikës së Kosovës, Hashim Thaçi, është pritur sot në Bruksel nga Presidenti i Parlamentit Evropian, Martin Schulz.Njoftimi dërguar nga Brukseli thekson se, Presidenti Thaçi e njoftoi Presidentin e Parlamentit Evropian, Martin Schulz, për zhvillimet e fundit në Kosovë, me theks të veçantë në përkushtimin e Kosovës në rrugën drejt jetësimit të liberalizimit të vizave.

“Kosova i ka përmbushur kriteret për liberalizimin e vizave dhe pret një vendim meritor nga Bashkimi Evropian për punën e bërë nga institucionet e vendit”, ka thënë presidenti Thaçi.I pari i vendit theksoi se Kosova mbetet e angazhuar në konsolidimin e mëtejmë të shtetit, ndërsa e falënderoi presidentin Schulz për angazhimin e tij, të raportueses së BE-së, Tanja Fajon, si dhe të Parlamentit Evropian për mbështetjen e vazhdueshme dhe për shtyrjen përpara të procesit të liberalizimit të vizave për Kosovën.Nga ana tjetër, Presidenti i Parlamentit Evropian, Martin Schulz, theksoi se liberalizimi i vizave është tema kryesore që preokupon Kosovën në marrëdhëniet e saj me BE-në.

Ai ka shprehur bindjen se për Kosovën do të ketë një vendim meritor për angazhimin e saj në përmbushjen e kritereve për liberalizimin e vizave.Gjatë qëndrimit të tij në Bruksel, Presidenti i Republikës së Kosovës, Hashim Thaçi, do të pritet edhe nga Përfaqësuesja e Lartë e Bashkimit Evropian për Punë të Jashtme dhe Politika të Sigurisë, Federica Mogherini./b.j/

Në Vatikan, meshë për Nënë Terezën

June 17, 2016 by dgreca

-Nën patronazhin e Presidentit të Republikës së Kosovës/

Romë, 17 qershor 2016/ Nën patronazhin e Presidentit të Republikës së Kosovës, pranë Selisë së Shenjtë në Vatikan është mbajtur edhe një meshë për Nënë Terezën, në të cilën edhe një herë është kujtuar jeta, vepra dhe shembulli që ajo ka dhënë për botën.

Njoftimi dërguar nga Roma thekson se, në këtë meshë, përveç presidentit Hashim Thaçi, kanë marrë pjesë edhe shumë përfaqësues të korit diplomatikë në Romë, përfshirë edhe përfaqësuesit diplomatikë të Malit të Zi dhe Shqipërisë.

Mesha e kremtuar në kishën e Shën Gregorit u udhëhoq nga kardinali Angelo Comastri, kryeprift i Bazilikës së Shën Pjetrit në Vatikan, i cili është edhe njëri prej deponuesve të mrekullisë së Nënës Terezë, që mundëson shenjtërimin e saj.

Shenjtërimi i Nënës Terezë, sipas presidentit Thaçi, është mesazhi më i mirë që Vatikani bënë për një personalitet që dashurinë dhe shpirtin e saj solidar ia ka dhuruar njerëzimit.

“Ai shpirt solidar, ai mirëkuptim i saj, ato mesazhe të dashurisë, të kujdesit ndaj të gjithëve, ndaj njerëzve me nevojë kudo në botë, tregojnë edhe shpirtin e origjinës së saj, që ka qenë i mishëruar me vlerën e saj humane, njerëzore, që i ka dërguar gjithë botës. Shenjtërimi nuk është vetëm nder për kombin shqiptar, por është nderim edhe për vlerat universale që Nënë Tereza i ka përçuar anë e kënd botës”, ka thënë presidenti Thaçi, për shenjtërimin e Nënës Terezë.

Ati i Shenjtë, Papa Françesku, muaj më parë kishte miratuar dekretin e shenjtërimit të Nënë Terezës, ceremoni kjo që do të mbahet më 4 shtator të këtij viti në Bazilikën e Shën Pjetrit në Vatikan./b.j/

Vrasja e Joe Cox, lule dhe qirinj për deputeten e ndjerë

June 17, 2016 by dgreca

Lule dhe qirinj në të gjithë Britaninë e Madhe për deputeten Jo Cox, e cila u qëllua për vdekje në mes të rrugës, jo shumë larg zyrës së saj në një nga zonat elektorale në veri të Anglisë.

Një memorial është improvizuar në zonën para parlamentit në sheshin qendror të kryeqytetit britanik në nder të deputetes laburiste.

Vdekja e saj ka shkaktuar një tronditje të thellë në të gjithë Britaninë dhe ka pezulluar fushatën e referendumit që pritet të mbahet javën e ardhshme mbi qëndrimin ose largimin e vendit nga Bashkimi Evropian.

Mesazhe ngushëllimi kanë ardhur nga e gjithë bota për deputeten 41 vjeçare, e cila nuk arriti t’iu mbijetojë plagëve pas sulmit në Birstall, në West Yorkshire.

Është e tmerrshme dhe mizore që jeta e saj ndërpre kaq shpejt, Britania dhe Shtetet e Bashkuara “qëndrojnë së bashku kundër urrejtjes dhe dhunës, ka thënë Hilari Klinton, e cila shpreson në një fitore në garën presidenciale të Shteteve të Bashkuara të Amerikës. Sigurisht, politikanët britanikë kanë shprehur dhimbjen për vrasjen e koleges së tyre, mes tyre kryeministri David Cameron dhe lideri i laburistëve Jeremy Corbyn.

Në Prizren vihet gurthemeli i shtatores së Ukshin Hotit

June 17, 2016 by dgreca

Kosovë-Ukshin Hoti, filozofi i çështjes sonë kombëtare/

– Kryetari i Kuvendit të Kosovës, Kadri Veseli: Ukshin Hoti ishte ideologu që frymëzonte lëvizjen kombëtare me guximin e tij politik dhe mendimin e thellë intelektual. Ai ishte në kuptimin e plotë të fjalës, filozofi i çështjes sonë kombëtare/

PRISHTINË, 17 Qershor /Gazeta DIELLI-B.Jashari/ Kryetari i Kuvendit të Republikës së Kosovës, Kadri Veseli, sot, mori pjesë në ceremoninë e vënies së gurthemelit të shtatores së prof. dr. Ukshin Hotit, në oborrin e Universitetit “Ukshin Hoti”, në Prizren.

Në fjalën e tij para të pranishmëve, kryetari Veseli e konsideroi Ukshin Hotin njërin prej personaliteteve më të shquara të luftës sonë për liri dhe pavarësi, i cili mbeti deri në fund veprimtar i pakompromis i lëvizjes kombëtare.

“Ukshin Hoti ishte ideologu që frymëzonte këtë lëvizje me guximin e tij politik dhe mendimin e thellë intelektual. Ai ishte në kuptimin e plotë të fjalës filozofi i çështjes sonë kombëtare”, theksoi kryeparlamentari Veseli.

Duke bërë një elaborim të aktivitetit politik atdhetar të Ukshin Hotit dhe të qëndresës së tij intelektuale e kombëtare, kryetari i Kuvendit tha se në fillim të viteve ’80-ta, kur terrori i regjimit jugosllav po përgjakte rininë e Kosovës, ai kishte ngritur zërin e protestës e të kundërshtimit dhe nuk ishte joshur nga postet.

Kryeparlamentari Veseli shtoi se burgosja e Ukshin Hotit nga regjimi jugosllav dhe shpallja e tij ‘i burgosur i ndërgjegjes’ nga Amnesty International, më 1983, bënë që zëri i Kosovës së shtypur të dëgjohej në qendrat vendimmarrëse të botës.

“Ukshin Hoti nuk hoqi dorë kurrë nga parimet e tij, sepse gjithë jetën kishte vetëm një interes: interesin kombëtar, lirinë e popullit të tij. Në vitet ’90-ta, regjimi përsëri e burgosi Ukshin Hotin, sepse e dinte shumë mirë se filozofi i çështjes shqiptare do të bëhej filozofi i Ushtrisë Çlirimtare të Kosovës. Por përsëri dështuan, sepse tanimë Ukshin Hoti ishte kthyer në ikonë të lëvizjes sonë kombëtare”, tha në vazhdim kryetari Veseli.

Thënia e tij legjendare se ‘për atdheun mund të luftohet vetëm në emër të njerëzores dhe kurrsesi ndryshe’, shtoi kryetari Veseli, qëndron në themele të vetë platformës së UÇK-së, parim ky i cili bëri botën demokratike të mbështeste kauzën për çlirim në vitin 1999.

Kryetari Veseli e quajti cinizëm faktin se Serbia sot pretendon të bëhet pjesë e BE-së, ndërsa ende nuk jep përgjigje për fatin e mijëra qytetarëve të pagjetur Kosovës, në mesin e të cilëve edhe të profesor Ukshin Hotit, dhe mban në territorin e saj varreza sekrete të viktimave të pafajshme.

“Si mund të jetë pjesë e Evropës dikush që mban sekret fatin e intelektualëve të kalibrit evropian, sikurse është Ukshin Hoti? Është koha t’i jepet fund këtij cinizmi. Kosova ka të drejtë të dijë për fatin e qytetarëve të saj, ta ketë drejtësinë për ta, sepse vetëm drejtësia shëron plagët e së shkuarës, mundëson paqen dhe të ardhmen”, theksoi kryetari Veseli.

Ai shtoi se Prizreni duhet të jetë krenar që ka fatin të ketë i pari në gjirin e vet shtatoren e këtij ideologu dhe intelektuali të madh, ndërsa paralajmëroi se së shpejti një shtatore e përmasave edhe më të mëdha, do të ngrihet në mes të Fakultetit Filozofik të Universitetit të Prishtinës dhe Bibliotekës Kombëtare, afër vendit ku Ukshin Hoti derdhi djersën dhe shkriu mundin e tij atdhetar, intelektual e shkencor.