Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Përkujtohet rezistenca antifashiste e 7 prillit 1939

by

Shefqet Kërcelli*/

Dhjetra veteranë, qytetarë, detarë, ishushtarakë, përfaqsues të pushtetit qendror e vendor, media të ndryshme  etj, morën pjesë sot në ceremoninë e organizuar me rastin e rezistencës antifashiste të 7 prillit në Durrës. Më datën 7 prill 1939, patriotë durrsakë dhe marinarë të marinës mbretërore organizuan një rezistencë simbolike, por që bashkë me rezistencën e organizuar në qytetet e Sarandës, Vlorës dhe Shëngjinit, pati jehonë në shtypin evropian, përfshi shtypin anglez dhe amerikan. Në këtë luftë krejtësisht të pabarabartë, një popull i vogël, viktimë e agresionit, tregoi vlerat e tij të mosnënshtrimin ndaj pushtuesve fashiste dhe dëshirën për liri. Gjatë betejës në sheshin e portit të Durrësit dhe para Torrës Veneciane u vranë e plagosën dhjetra fashistë, ndërsa  ranë për liri, Mujo Ulqinaku, Kapter i Marinës Mbretërore, {Hero i Popullit} dhe dëshmorët Hamit Dollani, Haxhi Tabaku, Hysen Koci, Ibrahim Osmani, Isak Metalia, Ismail Reci dhe Ramazan Velia. Në vijim nga pjesmarrësit u vendosën kurora dhe buqeta me lule në përmendoren e Mujo Ulqinakut, ndërkohë që dëshmitarë të asaj dite dhe familjarë të të rënëve, sollën kujtimet e tyre për këtë ditë të rezistencës antifashiste.

* E falenderojme korespondentin e Diellit ne Shqiperi Shefqet Kërcelli per angazhimin e vazhdueshem per te sjelle ne faqet e gazetes informacione, fotografi,komente, analiza, reportazhe.

Zv/ndihmës Sekretari amerikan Hoyt Yee,në ceremoninë e inaugurimit e Thaçit

by

 PRISHTINË, 7 Prill 2016-B.Jashari/ Zëvendës-ndihmës Sekretari përgjegjës për çështjet europiane, Hoyt Yee, viziton Kosovën dhe do të takojë zyrtarët shtetërorë, bën të ditur ambasada e SHBA në Prishtinë në njoftimin e dërguar.Zyrtari i lartë  amerikan, Hoyt Yee, nga ora 11:00 do marrë pjesë nesër në ceremoninë e inaugurimit e pranim-dorëzimit të detyrës së Presidentit të Kosovës, Hashim Thaçi.

Sipas axhendës, nesër, Yee do ketë takime të veçanta me kryeministrin Isa Mustafa (ora 13:40), me zëvendëskryeministrin Branimir Stojanoviç (14:30), kryetarin e Kuvendit Kadri Veseli (15:15) dhe me Presidentin Hashim Thaçi (16:00).Ndërkohë, burime mediale bëjnë të ditur se Zëvendës-ndihmës Sekretari amerikan Hoyt Yee ishte sonte në takim me Presidentin kosovar Thaçi të përbashkët me ambasadorët e vendeve të Quintit – SHBA-së, Britanisë së Madhe, Francës, Gjermanisë dhe Italisë.

Rrëzohet një helikopter i Forcave Ajrore shqiptare në liqenin e Shkodrës

by

Ministria e Mbrojtjes njofton se sot në mesditë u rrëzua një helikopter I Forcave Ajrore në liqenin e Shkodrës.Sipas planit të fluturimit helikopteri EC 145, {Tip Coguar}, me numër bordi 637 dhe  me  ekuipazh të përbërë nga kapiten Florian Deliaj, toger Donald Hoxha dhe ushtari profesionist, Gerald Baramuca, janë nisur nga Farka sot në orën 12:10, në një fluturim stërvitor në përputhje me programin e planifikuar dhe miratuar më parë. Në orën 13:45 ka qenë kontakti i fundit që helikopteri ka pasur me Qendrën e Kontrollit dhe Raportimit në Rinas. Menjëherë pas humbjes së kontaktit, është nisur drejt zonës ku u humb kontakti një helikopter kërkim – shpëtimi dhe personel mjekësor. Në konferencën për shtyp, Shefi i Shtabit i FA, Gjeneral major Jeronim Bazo tha se, Helikopteri EC 145 u fut në përbërje të Forcave Ajrore nëntorin e vitit të kaluar. Dy pilotët që gjetën vdekjen në këtë aksident tragjik, Kapiten Florian Deliaj dhe togër Donald Hoxha e kishin përgatitjen e nevojëshme për të fluturuar, pasi ishin trajnuar brenda dhe jashtë vendit. I shprehim ngushellime familjeve te tyre. Kemi angazhuar burimet e nevojëshme për të hetuar këtë aksident tragjik, theksoi Gjeneral Bazo. Ndërkohë i mbijetuari i këtij aksidenti, ushtari profesionist II, Gerald Baramuca, po kurohet në spitalin rajonal të Shkodrës, jashtw rrezikut per jeten. {SH.K}

 

 

152 vjet burg për 9 rekrutuesit e ISIS-it

by

Prokuroria për Krime të Rënda kërkon dënimin me një total prej 152 vitesh burgim për 9 persona, pjesë e një grupi që rekrutonin dhe dërgonin shtetas shqiptarë për të marrë pjesë në luftimet në Lindjen e Mesme.

Prokuroria për Krime të Rënda, në bazë të një hetimi të zhvilluar në bashkëpunim me strukturat e tjera ligj-zbatuese, ka siguruar prova të mjaftueshme se të pandehurit, kryesisht në vitin 2013, kanë bindur dhe dërguar në Siri qytetarë të ndryshëm shqiptarë, me qëllim bashkimin e tyre me grupet radikale të armatosura që veprojnë në atë zonë.

Në përfundim të hetimeve, Prokuroria për Krime të Rënda, i akuzon të pandehurit për veprat penale, ”Rekrutimi i personave për kryerjen e veprave me qëllimeve terroriste ose të financimit të terrorizmit”; ”Stërvitja për kryerjen e veprave me qëllime terroriste” dhe ”Nxitja e urrejtjes ose grindjeve”.

Bazuar në materialet hetimore dhe shqyrtimit gjyqësor, Prokuroria për Krime të Rënda deklaron se është e provuar që të akuzuarit janë përgjegjës për konsumimin e veprave penale dhe kërkon dënimin: Genc Balla, të dënohet me 20 vjet burgim; Gert Pashai me 20 vjet burgim; Bujar Hysa me 20 vjet burgim; Erjon Reçi me 15 vjet burgim; Verdi Morava me 15 vjet burgim; Astrit Tola me 15 vjet burgim; Edmond Balla me 15 vjet burgim; Fadil Muslimani me 15 vjet burgim; Zeqir Ymeri me 17 vjet burgim. (I pandehuri i Ymeri akuzohet, krahas veprave më sipër, edhe për “Prodhimi dhe mbajtje pa leje të armëve luftarake)

Delegacioni nga Bundestagu gjerman viziton Kosovën

by

-Kuvendi kosovar do krijojë Grupin e miqësisë me Bundestasgun gjerman/

PRISHTINË, 5 Prill 2016-B.Jashari/ Një delegacion i deputetëve nga Bundestagu gjerman, në vizitën në Kosovë, u prit sot nga ministri i Integrimit Evropian, Bekim Çollaku, në një takim ku u diskutuar për axhendën evropiane të Kosovës dhe bashkëpunimin bilateral ndërmjet dy vendeve.Ministri Çollaku ka informuar deputetët gjermanë se Kosova ka përmbushur obligimet karshi procesit të liberalizimit të vizave dhe se është në pritje të një vendimi meritor në mënyrë që kosovarët të lëvizin pa viza. Për këtë ka thënë se është shumë e rëndësishme mbështetja e Gjermanisë si partner kryesor dhe strategjik i Kosovës brenda Bashkimit Evropian. 

Njëkohësisht ministri Çollaku ka folur edhe për fillimin e zbatimit të Marrëveshjes së Stabilizim Asociimit. Ai ka theksuar se hyrja në fuqi e MSA-së ofron mundësinë për rritjen e shkëmbimeve tregtare dhe investimeve gjermane në Kosovë.

Po ashtu, ministri Çollaku ka nënvizuar nevojën e  intensifikimit të përpjekjeve për punësim sezonal të profesionistëve kosovarë në Gjermani, për profile e sektorë të caktuar. 

Delegacioni gjerman në përbërje prej deputetëve: Peter Weiß (CDU/CSU), Andreas G. Lämmel (CDU/CSU) si dhe Josip Juratovic (SPD), kanë përgëzuar ministrin për hyrjen në fuqi të MSA-së, duke premtuar vazhdimin e mbështetjes së shtetit gjerman në procesin e liberalizimit të vizave dhe ndërmarrjes së reformave në kontekst të axhendës evropiane. 

Delegacioni i përbëre nga anëtarë të Grupit të miqësisë, të Parlamentit Gjerman, për marrëdhëniet me shtetet e Evropës Juglindore, në Kuvendin e Kosovës u takua sot edhe Komisionin për Integrime Evropiane, ndërsa dje zhvilloi takim me Komisionin për Punë të Jashtme. Me këtë rast u theksua se Kuvendi i Kosovës shumë shpejt do ta krijojë Grupin e miqësisë me Bundestasgun gjerman.

Kryetari i Komisionit për Punë të Jashtme, Enver Hoxhaj, ka shprehur gjithë respektin e thellë të institucioneve dhe të popullit të Kosovës për ndihmën e vazhdueshme të Gjermanisë dhe të popullit gjerman për vendin tone.