Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Evropë: Protesta kundër migrantëve dhe myslimanëve

by

*Kundër-demonstrata në pjesën tjetër të lumit Elbe, që e ndanë Drezdenin, kishte tubuar rreth 10 mijë vetë./
*Ne Foto:Protesta kundër migrantëve e myslimanëve/
Policia e Çekisë thotë se një grup prej afro 20 sulmuesve të panjohur të shtunën ia kanë vënë zjarrin një qendre që i ndihmon refugjatët në kryeqytetin Pragë, vetëm disa orë pasi mijëra njerëz kanë protestuar kundër myslimanëve dhe imigrimit.
Sulmuesit e shkatërruan qendrën Klinika, që dikur ishte kapacitet mjekësor në lagjen Zhizhkov në Pragë, dhe kanë hedhur koktej molotovi. Kjo qendër organizon mbledhjen e ndihmave në rroba për refugjatët.
Autoritetet thanë se së paku një person është lënduar nga sulmi.
Aktivistët që punojnë në këtë qendër thanë se sulmuesit ishin neo-nazistë.
Protesta kundër myslimanëve, e organizuar para Presidencës së Çekisë, ishte njëra nga shumë demonstratat e mbajtura të shtunën në gjithë Evropën, nga grupi PEGIDA , që është shkurtesë e lëvizjes Patriotët evropianë kundër islamizimit të perëndimit.
Ky grup është shumë tërheqës për personat me ndjenja të forta të së djathtës ekstreme dhe kundër imigrantëve, prej vitit 2014, kur ishte formuar në Drezden të Gjermanisë.
Në disa qytete të tjera evropiane, po ashtu, ka pasur tubime protestuese të lëvizjes PEGIDA.
Në Drezden, afro 8 mijë mbështetës të saj janë ballafaquar me mijëra demonstrues kundër kësaj lëvizjeje, por prania e madhe e policisë i ka mbajtur të ndara këto dy grupe.
Pjesëtari i PEGIDA-s , Siegfried Daebritz, në tubimin e Drezdenit tha se “ne duhet të kemi sukses në mbrojtjen dhe kontrollin e kufijve të jashtëm të Evropës, e po ashtu, edhe kufijtë e brendshëm”.
Organizatorët e protestës së lëvizjes PEGIDA thanë se kishin pritur pjesëmarrjen e së paku 15 mijë njerëzve në tubimin e tyre në Drezden.
Kundër-demonstrata në pjesën tjetër të lumit Elbe, që e ndanë Drezdenin, kishte tubuar rreth 10 mijë vetë.
Në demonstratat kundër myslimanëve dhe kundër imigrimit, në qytetet Varshavë, Amsterdam, Birmingem, pastaj në qytetet në Francë, Letoni dhe Danimarkë, PEGIDA dështoi mbledhjen e numrit më të madh të njerëzve. Janë parë vetëm disa qindra vetë.
Në Amsterdam, afro 200 mbështetës të lëvizjes PEGIDA, që ishin përpjekur ta mbajnë protestën e parë në një shesh afër ndërtesës së administratës lokale, janë përleshur me policinë.
Dhuna shpërtheu kur autoritetet e mbyllën këtë hapësirë pak para fillimit të protestës, për shkak të asaj që nga ekspertët për eksplodime është përshkruar si “pako e dyshuar”.
Por, në qytetin kufitar francez, Kale, policia përdori gaz lotsjellës dhe u përlesh me turmën e dhunshme prej afro 150 njerëzve, që demonstronin kundër migrantëve. Këta protestues brohoritnin diçka sikur “ne nuk guxojmë të lejojmë vdekjen e qytetit Kale”.
Disa demonstrues të krahut të djathtë ekstrem janë arrestuar nga autoritetet në Kale.
Këta protestues e kishin injoruar vendimin e autoriteteve lokale për ndalesën e tubimeve të tilla.
Qyteti kufitar francez, Kale, është bërë pikë kryesore e krizës së migrantëve në Evropë, për shkak se mijëra imigrantë janë tubuar atje dhe jetojnë në kampe pa kushte elementare, derisa presin rastin që të kalojnë në Britani nëpërmjet hekurudhës nënujore.
Përgatiti: Fatmir Bujupi

Në Gjakovë u mbajt tryezë shkencore kushtuar Aqif Blytës

by

Të shtunën (6 shkurt) në pallatin kulturës Asim Vokshi në Gjakovë është mbajtur tryezë shkencore me temën: Aqif Blyta dhe mbrojtja e Pazarit të Ri.
Ky aktivitet u organizua nga organizata “ Kosova për Sanxhakun” në bashkëpunim me shoqatën e intelektualëve “ Jakova” nga Gjakova. Aktiviteti poashtu u zhvillua edhe nën përkujdesjen e kryetares së komunës së Gjakovës, zonj. Mimoza Kusari- Lila.
Në tryezën shkencore pjesëmarrësit kanë paraqitur një kërkesë për presidenten e vendit,Atifete Jahjagën. Pjesëmarrësit kanë kërkuar që Aqif Blyta të nderohet me titullin Hero i Popullit.
Kërkesa është paraqitur me iniciativë të Ismet Azizit, kryetari i shoqatës “Kosova për Sanxhakun”, organizatë kjo që njëherit u kujdes edhe për organizimin e kësaj tryeze. Azizi, duke folur në lidhje me veprimtarinë patriotike të Aqif Blytës, arsyetoi kërkesën drejtuar presidentes:
“Qëllimi kryesor i takimit të sotshëm është që pikërisht sot nga ky tubim këtu, nga qytetarët e Gjakovës të dërgohet një kërkesë për kryetaren e shtetit, zonjën Atifete Jahjaga, që Aqif Blytën ta nderoj me urdhrin Hero të Popullit. Ky do të ishte kulminacioni i këtij tubimi”, tha Azizi.
Me këtë rast drejtori për kulturë në Gjakovë, Meriton Ferizi, në emër të kryetares Kusari-Lila, për Aqif Blytën ndau mirënjohjen “Post Mortum”. Ferizi, pos tjerash, deklaroi:
“Në emër të komunës së Gjakovës, sot të ndajmë edhe mirënjohje “Post Mortum” për Aqif Blytën me motivacionin – për vlerat e tij patriotike në pengimin e shpërnguljes së popullsisë nga trojet e veta të krahinës së Sanxhakut, si dhe për mbrojtjen e popullit të kësaj krahine nga gjenocidi i armikut”.
Përfaqësuesit e familjes Blyta, falënderuan kryetaren Kusari-Lila, Drejtoratin për Kulturë, shoqatën e intelektualëve “ Jakova”, sidomos organizatën “ Kosova për Sanxhakun” e cila bëri shumë dhe hapi edhe një dritare për ta njohur jetën dhe veprën e Aqif Blytës.
Në këtë tryezë morën pjesë përfaqësues të institucioneve komunale dhe historianë të cilët vlerësuan lart kontributin dhe figurën patriotike të Aqif Blytës. Me kumtesa janë paraqitur: Ali Daci nga Rozhaja, Fazli Muriqi nga Rugova, Zahir Kastrati nga Polluzha , Admir Muratoviq nga Pazari i Ri, Alban Dobruna nga Gjakova, Ismet Azizi nga Gjilani dhe Masar Rizvanolli nga Gjakova. Ndërsa në pamundësi pjesmarrjeje, punimet e tyre i dërguan: Nexhmedin Spahiu, Mazllum Baraliu dhe Sulejman Aliqkoviq.
Në fund u zhvillua debat i hapur dhe i frytshëm me pjesëmarrës për figurën dhe veprimtarinë e Aqif Blytës. Vlen të theksohet se në kumtesën e tij Prof. Dr. Admir Muratoviq, i cili është drejtor i Institutit për Hulumtim të Krimeve ndaj popullatës së Sanxhakut, kryetar i Bashkësisë Kulturore të Sanxhakut dhe ligjërues në Universitetin Internacional të Novi Pazarit, pjesëmarrëseve ua bëri me dije se personaliteti i Aqif Blytës për Sanxhakun është sikurse ai i Adem Jasharit për Kosovën.
Organizatorët u zotuan se aktivitete të ngjashme për Sanxhakun do të organizohen edhe nëpër vendbanimet tjera.( E dergoi per Diellin:Ismet Hazizi)

Ambasadorja e Kosovës në Bruksel, Mimoza Ahmetaj dekorohet me çmimin “Flaka e Paqes”

by

-Ky çmim është simbol i paqes globale dhe na përkujton në obligimin tonë per të qenë më aktiv në paqe përmes fjalëve dhe veprimeve/
-Ambasadorja Ahmetaj falënderoi të gjithë të pranishmit si dhe të gjitha institucionet dhe shtetet që e kanë ndihmuar Kosovën aty ku është sot/
Nga Behlul Jashari/ PRISHTINË, 5 Shkurt 2016/ Sot ne Bruksel, në një ceremoni të organizuar nga Asociacioni për Avancim të Paqes, nën udheheqjen e Arqidukes Herta Margarete Halsburg nga Austria, ambasadorja e Kosovës në Bruksel, Mimoza Ahmetaj, u dekorua me çmimin “Flaka e Paqes” (Flame of Peace).
Çmimi “Flaka e Paqes” u ipet personaliteteve për rolin aktiv në shoqeritë e tyre, e që ne rastin e Kosovës nënkupton bashkëpunimin drejt themelimit teështetit demokratik, nenshkrimin e MSA-se, hapjen e rrugës drejt integrimeve evropiane dhe të tjera.
Ky çmim është simbol i paqes globale dhe na përkujton në obligimin tonë per të qenë më aktiv në paqe përmes fjalëve dhe veprimeve.
Në ceremoni me çmimin e njejtë janë shpërblyer edhe ish kryetari i Keshillit Evropian Herman Van Rompey, njëherit edhe ish kryeministër i Belgjikes, ambasadorja e SHBA-ve prana Belgjikës Denise Bauer dhe ambasadori slloven Matjaz Shinkovec. Më parë, ndër te tjerëve, ky çmim iu është ndarë edhe personaliteteve si Presidentja e Kosovës, Atifete jahjaga, Lech Walesa (Poloni), Adolf Ogi (ish President i Federates Zvicerave), Princi Laurent i Belgjikes, etj.
Njoftimi dërguar nga Brukseli thekson se, gjatë pranimit të çmimit, në fjalen e rastit, ambasadorja kosovare Ahmetaj tha se, “në rrugëtimin tim të shkurtë, qe nga çlirimi i vendit tim, kam pasur priviligjin të shoh lindjen dhe ndërtimin e vendit tim, si dhe momentin më të rëndësishem që nga shpallja e pavarësisë, nënshkrimin e Marrëveshjes së parë kontraktuale me Bashkimin Evropian, gjë e cila e ka vulosur rrugën e Kosovës drejt BE-së”.
Kosova, vijoi ajo, ka bërë hapat e parë në rrugën e saj të gjatë drejt integrimeve evropiane, por ka ende shumë punë për të bërë.
“Institucionet e Kosovës kanë për qëllim ndërtimin e një shoqërie gjithpërfshirëse me diversitetin e saj religjioz, kulturor, me qëllimin e ndërtimit të një shoqërie që në bazë ka rendin dhe ligjin. Në kaq vite te pavarësisë kemi bërë ndryshime që kanë prekë jetët e qytetarëve, mendoni sa shumë ndryshime do të ketë deri në kohën kur Kosova do të jetë anëtare e barabartë e BE-së”, u shpreh ambasadorja kosovare në Bruksel.
Ambasadorja Ahmetaj në fund të fjalimit te saj falënderoi te gjithë të pranishmit si dhe të gjitha institucionet dhe shtetet që e kanë ndihmuar Kosovën aty ku është sot.

Fakulteti i Gjeoshkencave të Tiranës Viziton Mitrovicën

by

-Pritje edhe në Trepçë e në Universitetit Isa Boletini, në Mitrovicë/
MITROVICË, 5 Shkurt 2016-B.Jashari/ Dekani i Fakultetit të Gjeoshkencave në kuadër të Universitetit Politeknik të Tiranës, Prof. Dr. Përparim Hoxha dhe përfaqësuesi tjetër i këtij fakulteti Prof. Ibrahim Milushi, qëndruan sot në Mitrovicë, qytetin më të madh verior të Kosovës. Ata u pritën nga kryetari i komunës jugore, Safet Kamberi, i cili i ka njoftua me situatën e përgjithshme në komunë. Ai i njoftoi mysafirët nga Tirana edhe me pëpjekjet që komuna po bënë për zhvillimin e përgjithshëm, me theks të veçantë për zhvillimin ekonomik, të bujqësisë dhe industrisë.
Me këtë rast, ai tha se ndarja e qytetit dhe problemet politike që vazhdojnë të ekzistojnë në Mitrovicë, kanë bërë që investitorët e huaj të hezitojnë për të investuar këtu.
“Mungesa e investitorëve të jashtëm po reflektohet negativisht në zhvillimin më të përshpejtuar të komunës dhe në hapjen e vendeve të reja të punës”, tha Kamberi.
Profesor Përparim Hoxha, pasi e falënderoi për pritjen e bërë dhe për ofrimin e informatave për komunën, shprehu gatishmërinë e tij dhe dëshirën që të bashkëpunojë me institucionet komunale dhe me fakultetet përkatëse që funksionojnë në komunën e Mitrovicës.
Nënkryetari Kamberi, mysafirëve nga Tirana iu ka dhuruar hartën e Kosovës me gurë kristali të Trepçës.
Në takimin në komunën e Mitrovcës morën pjesë edhe drejtori për Mbrojtje dhe Shpëtim, Musa Dragaj dhe drejtori i Drejtorisë së Arsimit, Pajazit Hajzeri.
Mysafirët nga Tirana, gjatë qëndrimit në Mitrovicë janë pritur edhe nga menaxheri i Kombinatit Trepça, Ahmet Tmava dhe më pastaj kanë vizituar Minierën e Stantërgut dhe Muzeun e Kristaleve të Trepçës.
Po ashtu, ata i kanë bërë vizitë edhe Universitetit Isa Boletini, në Mitrovicë, ku janë pritur nga rektori Alush Musaj.

Kosovë, ish-punëtorët në ditën 620 të grevës

by

-Kryesuesi i Bordit të Drejtorëve të Agjencisë Kosovare të Privatizimit, Petrit Gashi takon përfaqësuesit e ish-punëtorëve të Fabrikës së Gypave të Ferizajt/
PRISHTINË, 5 Shkurt 2016-B.Jashari/ Ish-punëtorët e Fabrikës së Gypave në Ferizaj sot janë në ditën e 620-të të grevës në një tendë në Sheshin Skenderbeu në Prishtinë, pranë ndërtesës së qeverisë së Kosovë
Kryesuesi i Bordit të Drejtorëve të Agjencisë Kosovare të Privatizimit, Petrit Gashi dhe anëtari i Bordit, Ismail Januzaj, u takuan me përfaqësues të ish-punëtorëve të Fabrikës së Gypave IMK në Ferizaj.
Njoftimi i dërguar nga AKP bën të ditur se, në këtë takim përfaqësuesit e ish-punëtorëve të IMK-së e njoftuan Kryesuesin e Bordit me kërkesat e tyre.
“Kryesuesi i njoftoi përfaqësuesit e ish-punëtorëve që Bordi i Drejtorëve për shkak të kohës mjaft të shkurtër dhe axhendës së ngjeshur nuk ka arritë ende të trajtojë këtë çështje, mirëpo është në proces të njoftimit me rastin dhe se do ta trajtojë me prioritet”, thekson komunikata e AKP.
Ish-punëtorët e Fabrikës së Gypave në një njoftim për media kanë theksuar se kërkojnë zbatimin e vendimit të gjykatave, sipas të cilëve u njihet e drejta e kompensimit për vitet sa kanë qenë të dëbuar nga puna gjatë masave të dhunëshme në vitet e 90-ta të okupimit.
“Kërkesë e jona e vetme është që Bordi i AKP-së të marr vendimin për lejimin e mjeteve të nevojshme për pagesën e borxhit, sipas Udhëzimit të Dhomës së Posaçme të datës 30 maj 2014 dhe datës 13 qershor 2014”, thuhet në njoftimin e ish-punëtorëve .
Sipas ish-punëtorëve të Fabrikës së Gypave, pagat që duhet t’u kompensohen arrijnë vlerën më shumë se 25 milionë euro. 900 punëtorët e fabrikes janë dëbuar nga puna në vitin 1990 ashtu si janë dëbuar shqiptarët nga regjimi okupues serb edhe nga të gjitha ndërmarrjet e institucionet e Kosovës. Gjykata Komunale e Ferizajt në vitin 2002 vendosi që punëtorët kanë të drejtë të kompensohen, ndërsa në vitin 2010 Gjykata Kushtetuese e Kosovës obligoi qeverinë e AKP-në që për largim të padrejtë nga puna t’i dëmshpërblehen punëtorët.
Në procesin e privaizimit të ndërmarrjeve shoqërore, Fabrika e Gypave në Ferizaj është shitur për 3 milionë e 657 mijë euro në vitin 2007.
*Foto Gazeta Dielli: Tenda e greves