Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Papa Françesku, fjalim historik në Kongresin Amerikan

by

Papa Françesku mbajti një fjalim historik në Kongresin amerikan gjatë vizitës së tij në Shtetet e Bashkuara. Ati i Shenjtë, në fjalimin e tij shprehu respektin ndaj Amerikës dhe vlerave të këtij vendi, preku temat më të mëdha që shqetësojnë botën sot dhe frymëzoi sallën ku ishin mbledhur dy dhomat e Kongresit me mesazhet e tij.Eshtë hera e parë që një  Papë flet në një Kongres amerikan.  Dhe fjalimi ishte një ndër vetëm katër gjatë vizitës që ai mbante në anglisht. Të tjerët po i mban në gjuhën e tij spanjolle.

…dhe Ati i Shenjtë e përcaktoi tonin e fjalimit të tij që në fillim, duke thënë një nga shprehjet më simbolike amerikane.“Jam mirënjohës që jam këtu në tokën e të lirëve dhe në atdheun e trimave”, tha ai. Dhe duartrokitjet shpërthyen në atë moment dhe gjatë gjithë fjalimit. Pas tij ishin ulul dy katolikë amerikanë: Nënpresidenti Joe Biden dhe kreu i Dhomës së Përfaqësuesve John Boehner.Papa Françesku e hapi fjalimin e tij historik në Kongres duke e përshkruar veten si një “bir i këtij kontinenti të madh” i bashkuar me Amerikën në një qëllim të përbashkët.Papa preku të gjitha çështjet që shqetësojnë sot botën. Ai shprehu shqetësimin që bota është sot në konflikt. Papa bën thirrje për një “ekuilibër delikat” në luftën kundër ekstremizmit fetar për të garantuar se liritë themelore të njeriut nuk do të shkelen. Ai tha në fjalimin e tij para Kongresit se asnjë fe “nuk është e imunizuar nga format e keqkuptimit individual ose nga ekstremizmi ideologjik.”Papa Françesku shprehu shqetësim të thellë në lidhje me masakrimin e të krishterëve dhe pakicave të tjera fetare në Lindjen e Mesme nga duart e ekstremistëve islamikë, me frikën se prania e krishterë në rajon është e rrezikuar.Papa tha se liritë fetare, intelektuale dhe individuale duhet të mbrohen, ndërkohë që luftohet dhuna që kryhet në emër të fesë.Papa bëri thirrje që të tregohet kujdes për të mos e ndarë botën në mënyrë simpliste në dy kampe – e mira dhe e keqja.

Ati i Shenjtë foli me ndjeshmëri të lartë për çështjen e emigracionit, madje edhe me nota personale.“Të gjithë në kemi qenë dikur të huaj diku. E them këtë si bir imigrantësh”, tha ai duke iu referuar faktit që prindërit e tij ishin imigrantë italianë në Argjentinë.Duke folur për krizën e imigracionit në Evropë, si dhe për debatet në Shtetet e Bashkuara mbi emigracionin nga Amerika Latine, Papa Françesku u bëri thirrje ligjvënësve “për t’u përgjigjur në një mënyrë që është gjithmonë humane, e drejtë dhe vëllazërore.”“Ne nuk duhet të trembemi nga numri i tyre, por t’i shohim ata si njerëz, duke vështruar fytyrat e tyre dhe duke dëgjuar historitë e tyre, duke u përpjekur për t’iu përgjigjur sa më mirë që mundemi gjendjes së tyre,” tha Papa.Ai përdori si ilustrim atë që e quajti rregull të artë:“Trajtoi të tjerët ashtu siç do doje të të trajtonin ata ty. Kjo na jep një drejtim të qartë”, tha ai duke shtuar se gjithkush duhet të trajtohet me respekt.Nëse duam më shumë siguri, le të japim siguri, nëse duam jetë le të japim jetë, nëse duam mundësi, le të krijojmë mundësi.Papa Françesku foli për pabarëzinë dhe drejtësinë sociale dhe klimën. Papa bëri thirrje që t’i jepet fund dënimit me vdekje në SHBA dhe në botë. Ai tha se çdo jetë është e shenjtë dhe shoqëria vetëm mund të përfitojë nga rehabilitimin i njerëzve të dënuar për krime.Gjatë gjithë fjalimit, Papa përmendi katër figura qendrore amerikane, jetët e të cilëve mund të shërbejë si frymëzim ndërsa bota përballet me sfidat e vështira të sotme. Dy prej tyre ishin Abraham Lincoln dhe Martin Luther King. I pari për rolin e tij në lirinë dhe demokracinë amerikane. I dyti për ëndrrën, të drejtat civile. Ai tha se amerika vazhon të jetë tokë e shumë ëndrrave.Dy të tjerët ishin Dorothy Day, themeluese e Lëvizjes së Punëtorëve Katolikë që përdori fenë e saj për të punuar për drejtësi sociale. Ndërsa I katërti ishte Thomas Merton, që nuk pati patur origjinë katolike u bë një murg I njohur dhe autor I njohur që nxiste paqen.Pas fjalimit që u përshëndet me duartokitje të gjata, Papa foli edhe para të gjithë admiruesve të mbledhur para Kapitolit duke i përshëndetur ata ngrohtë.Ishte një ditë e pazakontë për Washingtonin dhe papa dukej në humor shumë të mirë. Solemniteti ishte kudo që nga pritja në Shtëpinë e Bardhë, tek entuziazmi i turmave në rrugët e Uashingtonit, tek Bazilika ku mbajtin meshën. Papa nuk hezitoi të përmendte tema delikate për politikën globale dhe amerikane si për shembull ngrohja globale. Papa Françesku u bëri thirrje Shteteve të Bashkuara të ndërmarrin hapa urgjente për të parandaluar shkatërrimin e mjedisit në botë dhe për të lehtësuar problemin e varfërisë. Ai tha se problemi i ndryshimeve klimatike, nuk mund t’i lihet brezit pasardhës.Pas një parade në Parkun Kombëtar të Uashingtonit, Papa do të drejtojë një takim lutjesh me peshkopët amerikanë, si dhe një meshë ceremoniale për shpalljen shenjtor të Junipero Serras, priftit françeskan, i cili themeloi misionin katolik në brigjet e Kalifornisë, gjatë marshimit me pushtuesit spanjollë.Shenjtërimi i atit Serra është një çështje që ka lënduar shumë amerikanë indigjenë, të cilët thonë se prifti Serra kontribuoi në abuzimin dhe eliminimin e shumë fiseve indigjene nga skllavërimi dhe sëmundjet.Papa, foli dje gjithashtu edhe për çështjen e abuzimit seksual nga priftërinjtë katolikë. Kjo ishte një nga pikat ku ai u kritikua nga avokatët e viktimave të këtij abuzimi, pasi sipas tyre ai tregoi mëshirë dhe kujdes për kishën for jo viktimat.Para se të shkojë në Nju Jork, papa do të shkojë në një kishë ku do të hajë drekë me të pastrehët dhe të varfrit. Në Nju Jork ai do të shkojë në Asamblenë e Përgjithshme të Kombeve të Bashkuara, do të mbajë një shërbim ndërfetar në Muzeun për Nder të 11 shtatori. Më pas ai do të vizitojë edhe Filadelfian.

TRAGEDI NE MEKE: 717 numri i pelegrinëve të vdekur, mbi 800 të plagosur

by

Hoxholli: Në Mekë janë 400 haxhinj shqiptarë, nga këta 80 janë shqiptarë dhe boshnjakë nga Mali i Zi, 320 janë shqiptarë të Shqipërisë. Nuk ka të vdekur, as të plagosur nga shqiptarët/

Mbi 717 të vdekur dhe mbi 800 të plagosur është bilanci tragjik i pelegrinazhit të haxhit në afërsi të qytetit të shenjtë të Mekës në Arabinë Saudite.Ngjarja ka ndodhur në Mina, rreth 5 km nga Meka, ku 2 milionë besimtarë po kryenin ritin e fundit të madh të haxhit.Aksidenti i rëndë ndodhi teksa miliona njerëz po hidhnin gurë në shtyllat që përfaqësojnë djallin.Drejtoria e Mbrojtjes Civile njoftoi se ne vendin e ngjarjes është dërguar një personel ndihme prej 4 mijë personash bashkë me 220 të tjerë pjesë e ekipeve tëemergjencës dhe shpëtimit. Të plagosurit janë dërguar në katër spitalet e zonës.

Nuk është ende e qartë se çfarë shkaktoi këtë kaos tragjik, por ajo që dihet është se ngjarje të tilla ndodhin shpesh në këtë festë të besimtarëve myslimanë.Më e fundit është ajo e ndodhur në xhaminë më të madhe të Mekës këtë muaj, ku një vinç u rrëzua duke lënë të vdekur 109 persona.Në vitin 2006, 364 vetë u vranë gjatë ritualit të gurëve. Që prej asaj kohe autoritetet saudite kanë p unuar në përmirësimin e transportit dhe infrastrukturën për të parandaluar incidente të tilla.Për myslimanët, Haxhi është shtylla e pestë dhe e fundit e Islamit. Është një udhëtim të cilin duhet ta kryejë çdo mysliman i rritur dhe i aftë për ta përballuar një herë në jetë.Ilir Hoxholli, kryetari i Komitetit Shtetëror për Kultet nga qyteti i shenjtë i Mekës qetëson të gjithë shqiptarët të afërmit e të cilëve kanë shkuar për haxhillëk në Mekë.Në një intervistë telefonike për Ora News, Hoxholli deklaroi: “E gjithë rruga e përshkruar nga shqiptarët nuk ka të bëjë fare me trajektoren ku ka ndodhur tragjedia. Ata kanë respektuar të gjithë itenerarin dhe janë shëndosh e mirë”Në Mekë janë 400 haxhinj shqiptarë, nga këta 80 janë shqiptarë dhe boshnjakë nga Mali i Zi, 320 janë shqiptarë të Shqipërisë.

 

Presidenti Obama dhe zonja Michelle urojnë besimtarët muslimanë

by

“Michelle dhe unë shpresojmë që dita e sotme të sjellë gëzim në familjet tuaja, qoftë këtu në Shtetet e Bashkuara, ashtu edhe në mbarë botën. Nga familja ime, në tuajën, Gëzuar Bajramin!”

– Presidenti Barack Obama

“Michelle and I hope today brings joy to all of your homes, both here in the U.S. and around the world. From my family to yours, Eid Al-Adha!”

Besimtarët myslimanë kremtojnë Kurban Bajramin

by

Federata “VATRA” dhe Gazeta “Dielli” urojnë të gjithë besimtarët myslimanë, në Diasporë dhe Vendlindje, me fat Kurban Bajrami!

Besimtarët shqiptarë, dhe ata në të gjithë botën, sot (e enjte) po festojnë Kurban Bajramin. Për nder të kësaj festë, e cila lidhet me sakrificën që bëhet në emër të profetit Ibrahim, besimtarët myslimanë flijojnë edhe një kafshë, zakonisht dele ose qengj, si kurban dhe mishin e ndajnë me të varfrit dhe familjarët. Besimtarët në Shqipëri janë mbledhur në bulevardin “Dëshmorët e Kombit” për të falur namazin e Kurban Bajramit, ndërsa në Kosovë, manifestimi qendror për këtë festë po mbahet në Xhaminë e Madhe në Prishtinë. Për nder të kësaj feste, nënkryetari i Komunitetit Mysliman të Shqipërisë, Bujar Spahiu uroi të gjithë shqiptarët, duke thënë se “në këtë festë afrohen zemrat, harrohen urrejtjet, njerëzit shtrijnë dorën e pajtimit, ripërtërihen lidhjet shoqërore e njerëzore, me dashuri e sinqeritet, derisa çdo shtëpi dhe familje të mbushet me gëzim e hare”. Me një urim për këtë festë, të gjithë besimtarëve myslimanë, iu është drejtuar edhe kreu i bektashinjve, Baba Mondi. “Mbarë bota myslimane do të përjetojë emocionet e ditës së Kurban Bajramit, mëshirës universale dhe mirësisë hyjnore. Si çdo ditë e vitit hyjnor, ne presim 24 shtatorin me urimet më të mira për familjen, për njëri-tjetrin, për fqinjët tanë, të kujtdo besimit të qoftë, për kombin që të ecë në rrugën e prosperitetit”, uroi ai. Ndërkohë, edhe myftiu i Kosovës, Naim Tërnava ka uruar qytetarët me rastin e festës së Kurban Bajramit, duke thënë se, vlerat e mirëfillta të kësaj feste manifestohen përmes sakrificës, devotshmërisë, solidaritetit e humanizmit.

Jahjaga viziton Bashkësinë Islame të Kosovës:GEZUAR KURBAN BAJRAMI!

by

 PRISHTINË, 24 Shtator 2015/ Presidentja e Republikës së Kosovës, Atifete Jahjaga vizitoi sot selinë e Bashkësisë Islame të Kosovës. Ajo u prit nga Myftiu Naim Tërnava dhe udhëheqës të tjerë të kësaj bashkësie, të cilët i uroi për festën e Kurban Bajramit. “Dëshiroj që t’iu uroj të gjithë qytetarët e Republikës së Kosovës të besimit mysliman për festën e Kurban Bajramit, me urimin që këtë festë ta kalojmë në mirëqenie, mirëkuptim në harmoni dhe me shtrirjen e dorës së ndihmës ndaj njëri-tjetrit”, tha Presidentja Jahjaga.“Uroj për këtë festë të gjitha familjet në tërë territorin e Republikës së Kosovës, dhe që në mesin e të gjitha familjeve tona të mbizotërojë shëndeti, mirëqenia dhe gëzimi”,u shpreh ajo.

***Kosovë- Festa e Bajramit me porosinë e mirëqenies dhe paqes mbarë njerëzore

-Festë me urime të gjithë vëllezërve e motrave, brenda dhe jashtë trojeve shqiptare, kudo që  gjenden nëpër botë/

Nga Behlul Jashari/ PRISHTINË, 24 Shtator 2015/ Urimet për festën e Kurban-Bajramit “të gjithë vëllezërve e motrave, brenda dhe jashtë trojeve tona, kudo që ata gjenden nëpër botë” i ka drejtuar sot kryetari i Bashkësisë Islame të Kosovës, myftiu Naim Tërnava, nga manifestimi qëndror në Xhaminë e Madhe në kryeqytetin kosovar, duke theksuar edhe mesazhet “për unitet dhe vëllazëri mes gjithë njerëzve”.

 “Vlerat e mirëfillta të Kurban Bajramit manifestohen përmes sakrificës, devotshmërisë, solidaritetit e humanitetit, duke bartur me vete porosinë e mirëqenies dhe paqes mbarë njerëzore”, është shprehur myftiu Tërnava në urimin e festës.

Kanë uruar edhe drejtuesit institucionalë e politikë të Kosovës, të cilët në këtë ditë të festës së Bajramit edhe vizitojnë e përgëzojnë Bashkësinë Islame të Kosovës.

“Republika e Kosovës është përcaktuar për ndërtimin e  të ardhmes euroatlantike, si pjesë e familjes së shteteve të lira dhe demokratike ku respektohen të drejtat dhe liritë e secilit qytetar pa dallim. Kjo festë e Kurban Bajramit, të na shërbejë si një mundësi për të reflektuar për punën dhe sukseset që kemi arritur si individë dhe si shoqëri në realizimin e këtij synimi”, thekson në urim presidentja Atifete Jahjaga.

 “Me respekt të veçantë, t’i kujtojmë të gjithë ata që u angazhuan dhe sakrifikuan që ne sot të jemi pjesë e popujve të lirë”, shprehet presidentja e Kosovës.

Kryeministri i Kosovës, Isa Mustafa, me rastin e Festës së Kurban Bajramit, uron “që edhe kjo festë të jetë festë e unitetit, e arsyes, që ne bashkërisht të zgjidhim problemet e këtij vendi, ta ndërtojmë Kosovën vend të mirëqenies, vend të zhvillimit dhe vend ku çdo qytetar do ta ndjente veten mirë”.

 “Dëshiroj që të gjithë njerëzit në Kosovë dhe më gjerë, ta ndjejnë veten mirë në këtë festë që simbolizon sakrificën, solidaritetin, tolerancën dhe besimin”, thkson kryeministri Mustafa.

 “Të gjithë besimtarëve islam në Republikën e Kosovës, gëzuar festa e Kurban Bajramit”, ka uruar kryetari i Kuvendit, Kadri Veseli.

“Mesazhi i kësaj feste është një vlerë e përhershme, sepse na përcjell idenë madhështore se adhurimi i Zotit, mbi të gjitha, nënkupton dashuri, mirëkuptim dhe solidaritet mes njerëzve. Kjo është festa që bashkon besimin fetar me kauzën e humanizmit”, shprehet kryeparlamentari Veseli.

Kryetari i Aleancës për Ardhmërinë e Kosovës, Ramush Haradinaj uron besimtarët për festën e Kurban Bajramit, duke u shprehur se gjithmonë ka një ditë, kur besimtarët ndjehen më afër njëri tjetrit dhe më afër krijuesit të tyre.

“E tillë është edhe dita e sakrificës, që ndryshe njihet si festa Kurban Bajramit. Sakrifica për të mirën e përgjithshmë është pjësë e qenjës sonë, prandaj në këtë Kurban Bajram, t’i kujtojmë edhe një herë, të gjithë ata që me sakrificën e solidaritetin e tyre, bënë që të jemi të lirë edhe në manifestimin e besimt tonë”, thekson Haradinaj.

Manifestimi qendror në Kosovë i Kurban Bajramit në Xhaminë e Madhe në Prishtinë nisi në ora 05:45 me faljen e namazit të sabahut,  ndërsa vazhdoi me ligjëratën tematike kushtuar kësaj feste nga kryeimami i Bashkësisë Islame të Kosovës, Sabri Bajgora. Faljes së namazi të Kurban  Bajramit i priu Resul Rexhepi, ndërsa Hytben – mesazhin, e mbajti myftiu i Kosovës, Naim Tërnava.

***

Kosovë-Mustafa: Bashkërisht t’i zhvillojmë proceset shumë të rëndësishme për ne

-Kryeministri Isa Mustafa vizitoi Bashkësinë Islame të Kosovës me rastin e Festës së Bajramit-

 PRISHTINË, 24 Shtator 2015/ Kryeministri i Republikës së Kosovës, Isa Mustafa, me rastin e Kurban Bajramit, vizitoi Bashkësinë Islame të Kosovës, ku u prit nga myftiu i Kosovës, Naim Tërnava dhe udhëheqësit tjerë të bashkësisë.

 Në vizitë ishin edhe zëvendëskryeministri i parë, njëherësh ministri i Punëve të Jashtme, Hashim Thaçi, ministri i Mjedisit dhe Planifikimit Hapësinor, Ferid Agani, ministri i Forcës së Sigurisë së Kosovës, Haki Demolli dhe ministri i Financave, Avdullah Hoti.

  “Jemi sot këtu në Bashkësinë Islame, t’i urojmë Myftiut dhe të gjithë besimtarëve islamë me fat Festën e Kurban Bajramit. Gëzohemi për një festë të përbashkët e cila ndërlidhet me paqen,  me sakrificën, me besimin që t’i ndihmojmë njëri- tjetrit, që të punojmë bashkërisht, t’i zhvillojmë këto procese që janë shumë të rëndësishme për ne, jo vetëm në Kosovë, por edhe në rajon edhe në botë”, u shpreh Mustafa.

 “Po ashtu, t’i falënderojmë njerëzit që po i kontribuojnë paqes, po i kontribuojnë stabilitetit, po i kontribuojnë sigurisë së vendit dhe sigurisë së rajonit”, përfundoi kryeministri i Kosovës./b.j/

***

CELEBRATION OF EID AL-ADHA (BAJRAM DAY)

 Pristina, 24 September 2015. General Guglielmo Luigi Miglietta, KFOR Commander, on the occasion of Eid al-Adha (Bajram Day) extends his sincere congratulations to the Islamic Community of Kosovo.General Miglietta, stressing the importance of cultural and religious heritage, wishes the Islamic Community to celebrate the holy day in an atmosphere of peace, harmony and solidarity.