Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVE-KFOR-i dhjetë herë më i vogël se në 1999

by

Figliuolo: KFOR-i dhjetë herë më i vogël se në 1999, siguria në Kosovë është edhe më shumë se dhjetë herë më e mirë/
Sot në Kampin “Film City”, Shtabi i Përgjithshëm i KFOR/NATO, u mbajt ceremonia e ndërrimit të komandës në mes të Komandantit në largim të KFOR-it, Gjeneral Major Francesco Paolo Figliuolo dhe Gjeneral Majorit të sapo ardhur Guglielmo Luigi Miglietta.
Në ceremoni morrën pjesë Presidentja e Kosovës, Atifete Jahjaga, Komandanti i Komandës së Forcave të Përbashkëta të NATO-s në Napoli, Admirali Mark Ferguson III, Shefi i Mbrojtjes së Italisë, Gjeneral Claudio Graziano dhe autoritete ushtarake, civile dhe fetare.
Admirali Ferguson III, falënderoi Gjeneralin Figliuolo për arritjen e rezultateve të rëndësishme dhe punën e jashtëzakonshme që ushtarët e KFOR XIX kanë treguar gjatë mandatit të tij, gjersa kanë ndjekur moton e KFOR XIX “Shembull, përpjekje, besim”. Më pas ai në mirëseardhje Gjeneralit Miglietta u shpreh se “jemi të bekuar me edhe një tjetër komandant nga Italia”.
Gjithashtu Komandanti i Komandës së Forcave të Përbashkëta të NATO-s në Napoli përgëzoi pjesëtarët e KFOR-it dhe theksoi rëndësinë e KFOR-it në ruajtjen e një ambienti të qetë dhe të sigurt në Kosovë dhe përmirësimin e sigurisë në Kosovë dhe në rajonin e Ballkanit.
Në fjalimin e tij Gjeneral Majori Figliuolo, nxjerri në pah që “sot KFOR-i është dhjetë herë më i vogël sesa që ishte në vitin 1999, gjersa siguria në Kosovë është edhe më shumë se dhjetë herë më e mirë”. Më tej ai përfundoi “situata e sigurisë është përmirësuar shumë gjatë vitit të kaluar për shkak të qëndrimit parandalues dhe veprimeve të marra nga trupat e mia të KFOR-it dhe dialogut të vendosur dhe bashkëpunimit që kemi krijuar në mes të akterëve”.
Komunikata dërguar nga KFOR thekson se, Forca e Kosovës, siç është përcaktuar me Rezolutën e Këshillit të Sigurimit të OKB-së 1244, do të vazhdojë që në mënyrë të paanshme të përparojë një ambient të qetë dhe të sigurt dhe të ruajë lirinë e lëvizjes në mbarë Kosovën, duke siguruar stabilitet dhe ofruar siguri në Kosovë për të mirën e të gjithë njerëzve në Kosovë.

Tetova në zi për viktimat

by

Në Tetovë, e mërkura dhe e enjtja janë shpallur ditë zie. Vendimin e mori Këshilli i Komunës së Tetovës pas motit të keq që përfshiu Tetovën gjatë së hënës, për shkak të të cilit humbën jetën 4 persona dhe një vajzë konsiderohet e zhdukur.
Shiu i rrëmbyeshëm dhe përmbytjet lanë pas vetes edhe dëme të mëdha materiale, në Tetovë e fshatrat përreth kësaj komune. Sipas të dhënave fillestare, në Tetovë dhe rrethinat e saj janë dëmtuar 200 objekte.
Dëmet e shkaktuara do t’i vlerësojë një komision i posaçëm qeveritar. Me vendim të Qeverisë së Maqedonisë, familjeve të dëmtuara nga reshjet dhe përmbytjet do u jepet një ndihmë fillestare prej 30 mijë denarësh, apo rreth 500 dollarë.

Ambasada e Gjermanisë: Azilkërkuesit nuk do të paguhen

by

Ambasada e Gjermanisë ka reaguar në lidhje me lajmin se azilkërkuesve që do të largoheshin vullnetarisht nga Gjermania, do u paguante para’ për kthimin në vendet respektive.
Ambasada sqaron: “Ky informacion është i gabuar. Informacioni i vërtetë është se në fillim të korrikut 2015, për azilkërkuesit nga Ballkani, u bë oferta e mëposhtme unike dhe e limituar në kohë: Personat, të cilët kanë tërhequr aplikimin e tyre për azil deri më 24 korrik 2015 dhe do të dalin nga Gjermania deri më 14 gusht 2015, mund të marrin një mbështetje financiare nga Qarku Federal Lörrach. Kjo ofertë nuk është më e vlefshme që prej datës 24 korrik 2015. Në të ardhmen nuk do të ketë shpërblim në para’ në rast kthimi vullnetar në atdhe”.
Në lidhje me akomodimin e azilkërkuesve, Ambasada e Gjermanisë thotë se “situata në të gjithë Gjermaninë muajt e fundit është përkeqësuar në mënyrë dramatike, aq sa dhe Qarku Federal Lörrach është i detyruar t’i strehojë azilkërkuesit e tjerë në vazhdim në çadra dhe palestra”.
”Për azilkërkuesit, strehimi në këto qendra të improvizuara në kushte urgjence, shoqërohet jo vetëm me rrethana banimi shumë të ngushta dhe mungesën e hapësirës private, por edhe me reduktimin e kuotës në para, pasi për shkak të shpërndarjes së ushqimit në mënyrë të përqendruar, hiqet pagesa në para’ për ushqim për azilkërkuesit”, shton ambasada.

Sauditet sjellin ndihma na Shqiper

by

180 ton ndihma nga Arabia Saudite për njerëzit në nevojë
/
180 ton ndihma humanitare i janë dërguar Shqipërisë nga qeveria e Mbretërisë së Arabisë Saudite. Avioni i parë mbërriti në orët e para të mëngjesit të sotëm në aeroportin e Rinasit, ndërkohë që në ditët e ardhshme pritet të vijnë edhe tre avionë të tjerë.
I pranishëm në pritjen e ndihmave në aeroport ishte ambasadori saudit në Tiranë dhe drejtori i përgjithshëm i Emergjencave Civile, Shemsi Premçi. 
Ndihmat konsistojnë në çadra strehimi, batanije, dyshekë dhe paketa ushqimore dhe do u shpërndahen familjeve në nevojë, ndërsa pjesa që do të mbesë do të qëndrojë në depozitat e rezervave të shtetit për t’u përdorur në rast të Emergjencave Civile.

Tetovë, rritet bilanci i viktimave nga përmbytjet. 5 viktima, 13 të plagosur

by

Rritet bilanci i viktimave të përmbytjeve të mbrëmjes së të hënës në Tetovë të Maqedonisë, ku deri më tani janë konfirmuar 5 të vdekur, ndër tyre 2 të moshuar dhe 3 fëmijë. Sikurse raportojnë mediat maqedonase, trupat e pajetë janë gjetur në ujërat e rrëmbyeshëm ditën e martë.

Më pas janë mbajtur edhe ceremonitë mortore të djalit 2-vjeçar, vajzës 14-vjeçare, si edhe të 83-vjeçarit. Ndërkaq, numri i të lënduarve ka arritur në 13 persona, ndërsa 113 vetë janë evakuar nga vendbanimet e tyre. Shipkovica, Selca, Xhepçishti, Reçica e Vogël, Ura e Vratnicës, Orashe, Poroj dhe Nerashte janë përfshirë nga vërshimet e vrullshme të ujërave. Këto shira kanë arritur të shkatërrojnë 20 shtëpi, të cilat i ka kthyer në të pabanueshme.
Për t’i ardhur në ndihmë kësaj situate të rëndë, qeveria maqedonase miratoi një vendim për ndihmë financiare fillestare prej 30 mijë denarësh secilit, e cila do u ndahet familjeve të prekura nga vërshimet dhe më pas këshilli i emergjencës do të vijojë vlerësimi i dëmeve.
Po ashtu ndihmë është ofruar nga organizata e Kryqit të Kuq, si dhe institucione të tjera. Pas ngjarjes së rëndë në Tetovë mbërriti kryeministri Nikola Gruevski, së bashku me disa përfaqësues të tjerë të qeverisë shprehur solidaritet, si dhe për të garantuar angazhimin maksimal, duke i ardhur në ndihmë banorëve të dëmtuar nga kjo katastrofë natyrore.
 Në Komunën e Tetovës gjate ditës është ngritur Shtabi i Emergjencës, në të cilin bënin pjesë edhe përfaqësues të Drejtorisë për Mbrojtje dhe Shpëtim, Armatës së Republikës së Maqedonisë, Sektorit për Punë të Brendshme në Tetovë dhe përfaqësues të bashkësive lokale nga vendet e goditura nga përmbytjet e së hënës.
Kryeministri Nikolla Gruevski mbrëmjen e së hënës ka udhëtuar urgjentisht për në Tetovë. Ai vizitoi Reçicën e Madhe, ku dëmet nga përmbytjet janë të mëdha dhe më pas ka vizituar spitalin e Tetovës. Kjo nuk është hera e parë që Tetova përballet me të tilla fatkeqësi natyrore. Një herë në rreth 30 vite, lumi Shkumbin që përshkon këtë qytet del nga shtrati dhe shkakton katastrofa të tilla natyrore. Rasti më i fundit i dokumentuar është ai i nëntorit të vitit 1979, ku edhe në atë kohë u shkaktuan dëme të shumta.

Sh.K