Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Dom Gjergj Meta:“Don Bosko” na përket të gjithëve

by

Bbashkësia e qendrës profesionale “Don Bosko” ka protestuar ndaj vendimit të Gjykatës së Apelit që u kthen pronarëve 15.000 m2 të territorit ku është ngritur qendra “Don Bosko”, për të ndërtuar pallat.
Në planin pjesor të kësaj zone parashikohet që në këtë truall të ndërtohen pallate 7-katëshe. Në vitin 1992, qeveria shqiptare ia kanë dhënë këtë terren nunciaturës apostolike për një periudhë 49-vjeçare, për të ndërtuar një qendër të forumit kulturor dhe profesional për të rinjtë.
Përfaqësuesi i Kishës Katolike, dom Gjergj Meta, pjesëmarrës në këtë protestë, veç shtetit i ka bërë thirrje dhe familjes Petrela, të cilëve u është kthyer prona, të mos i prishin këto ambiente.
“Pretendohet se është e familjes Petrela, një nga familjet më të mëdha dhe të nderuara të Tiranës. Këto hapësira të ‘Don Bosko’-s i përkasin gjithë qytetit, prandaj, përveç gjykatësve dhe sistemit gjyqësor, për të cilin shpeshherë kemi bërë kritika, u bëjmë thirrje dhe atyre që pretendojnë të ndërtojnë këtu që të vënë dorën në zemër, sepse kjo na përket të gjithëve”, – thotë Don Gjergj Meta.

Rivarrimi i Isa Boletinit, Kosova “vishet” me flamuj për Heroin Kombëtar

by

Ministri i FSK-së, Haki Demolli ka thënë se me rastin e rivarrimit të eshtrave të heroit kombëtar, Isa Boletini më 10 qershor të gjitha qytetet e Kosovës do të dekorohen me flamuj kombëtar dhe ata shtetërorë.
Ministri i FSK-së, Haki Demolli, gjatë mbledhjes së sotme të ekzekutivit ka shpjeguar në detaje se si do të bëhet ceremonia e rivarrimit të eshtrave të heroit kombëtar, Isa Boletini në Boletin të Zveçanit duke thënë se pjesa kryesore e saj do të bëhet në stadiumin “Adem Jashari” të Mitrovicës.
Sipas Demollit, më 10 qershor të gjitha qytetet e Kosovës do të dekorohen me flamuj kombëtar dhe ata shtetërorë,
Ministri i FSK-së ka bërë me dije se për sigurinë e ceremonisë do të përkujdeset policia e Kosovës dhe KFOR.
Ndërkohë qeveria e Kosovës në mbledhjen e djeshme ka akorduar 50 mijë euro për rivarrimin e heroit kombëtar Isa Boletini.

Aksidentohet sekretari Kerry

by

Gjenevë,, 31.05.2015/
Sekretari amerikan i Shtetit, John Kerry, raportohet të jetë në gjendje të qëndrueshme në spital, pasi është lënduar në një aksident me biçikletë në Francë.
Departamenti amerikan i Shtetit ka njoftuar se Kerry, 71 vjeç, është dërguar me helikopter në Gjenevë, ku edhe është duke u trajtuar.
Deklarata thotë se Kerry nuk e ka humbur vetëdijen dhe se ka pësuar lëndime në këmbë.
Aksidenti ka ndodhur në Scionzier të Francës.
Të shtunën, Kerry ka takuar në Gjenevë ministrin e Jashtëm të Iranit, Mohammad Javad Zarif, për të biseduar rreth programit bërthamor të Republikës Islamike.

TAKIMI ME ZARIF/
Sekretari amerikan i Shtetit, John Kerry, dhe homologu i tij iranian, ministri i Jashtëm, Mohammad Javad Zarif, kanë mbajtur takime në Gjenevë për t’i hapur rrugën një marrëveshjeje për programin bërthamor.
Një marrëveshje e tillë pritet të ndodhë deri në fund të qershorit.
Kerry dhe Zarif kanë pasur “takim të gjatë për të diskutuar për të gjitha çështjet”, tha një zyrtar i lartë i Departamentit të Shtetit.
Abaz Araqchi, zëvendës i kreut të ekipit negociator të Iranit, citohet të ketë thënë se “dallimet janë ende evidente”.
Bisedimet e fundit pasojnë një marrëveshje paraprake e arritur më 2 prill ndërmjet Iranit dhe gjashtë fuqive botërore.
Shtetet e Bashkuara, Kina, Rusia, Franca, Britania, dhe Gjermania, janë të përkushtuara për arritjen e një marrëveshjeje që synon ndalimin e Iranit për të punuar rreth programit bërthamor në këmbim të ndihmave dhe heqjes së sanksioneve.

Eshte ndare nga jeta djali i zv/presidentit amerikan

by

Djali i zv/presidentit amerikan Joe Biden, Beau, është ndarë nga jeta ditën e djeshme.
46-vjeçari u nda nga jeta pas një beteje me kancerin në tru.
Lajmin për vdekjen e tij e dha vet Joe Biden.
“Ai u përlesh me sëmundjen, me po atë integritet, guxim dhe forcë që kishte treguar gjatë gjithë jetës së tij”, tha në një deklaratë për median, nga Shtëpia e Bardhë Biden.
Beau Biden kishte ndjekur rrugën e babait në jetë, së pari në studimet për drejtësi pastaj në detyrat publike, duke mbajtur postin e Prokurorit të Përgjithshëm të shtetit Delaware. Ai kishte plane të kandidonte për guvernator në shtetin e tij.

“Hapja e dosjeve”, ligji publikohet në fletore zyrtare

by

TIRANË, 29 Maj- Agjensia Telegrafike Shqiptare njofton se: Ligji “për të drejtën e informimit për dokumentet e ish-Sigurimit të Shtetit”, i quajtur ndryshe ‘ligji i dosjeve’ është publikuar të enjten në fletore zyrtare, ndërsa pritet të hyjë në fuqi pas dy javësh.
Brenda dy muajve nga hyrja në fuqi e tij, Këshilli i Ministrave miraton aktet nënligjore për procedurën e kalimit në administrim të Autoritetit për Informimin mbi Dokumentet e ish-Sigurimit të Shtetit, të materialeve arkivore. Ndërsa brenda tre muajve nga fillimi i funksionimit të kësaj strukture, Ministria e Brendshme, ajo e Mbrojtjes dhe SHISH-i duhet të kenë kaluar në administrim tek Autoriteti të gjithë arkivin e ish-Sigurimit të Shtetit.
Neni 42 i ligjit përcakton ndër të tjera dhe kundërvajtjet administrative në raste shkeljesh, kur ato nuk përbëjnë vepër penale, dhe që do të dënohen me gjobë.
I miratuar me 84 vota nga parlamenti më 30 prill, ligji përcakton rregullat dhe procedurat për të bërë të mundur ushtrimin e së drejtës nga çdo i interesuar për informimin mbi dokumentet e ish-Sigurimit të Shtetit, ndërsa nuk parashikon procesin e lustracionit, i cili bie ndesh me Kushtetutën. Fusha e veprimit parashikon zbatimin e ligjit për dokumentet e ish-Sigurimit të Shtetit të Ministrisë së Brendshme për periudhën 29 nëntor 1944 deri në ditën e krijimit të Shërbimit Informativ Kombëtar, 2 korrik 1991, të cilat disponohen nga të gjitha arkivat e rrjetit arkivor të Republikës së Shqipërisë dhe që lidhen me veprat penale politike të parashikuara në ligjin ne vitit 1991, “Për pafajësinë, amnistinë dhe rehabilitimin e ish të dënuarve dhe të përndjekurve politikë”.
Dokumentet që disponohen nga autoritetet publike, persona fizikë dhe personat juridikë privatë, do të konsiderohen si dokumente të ish-Sigurimit të Shtetit, vetëm pasi të verifikohet vërtetësia dhe origjina e prejardhjes së tyre nga fondi i ish-Sigurimit të Shtetit.
Kreu i II-të i ligjit parashikon statusin e Autoritetit, i cili përbëhet nga 5 anëtarë, të zgjedhur nga Kuvendi, sipas propozimeve të mëposhtme: a) dy anëtarë të propozuar nga parlamenti; b) një anëtar nga Këshilli i Ministrave; c) një përfaqësues i propozuar nga shoqatat e të përndjekurve politikë, nga radhët e kandidatëve të mbështetur nga jo më pak se 28 deputetë; ç) një përfaqësues i propozuar nga Shoqata për Mbrojtjen e të Drejtave të Njeriut, nga radhët e kandidatëve të mbështetur nga jo më pak se 28 deputetë.
Kreu i IV-të i ligjit përcakton mënyrën e informimit dhe vënien në dispozicion të dokumenteve të ish-Sigurimit. Neni 19 flet për kërkesën për informim, ku personave të interesuar iu njihet e drejta për t’u njohur me dokumentet, kur ai ka cilësinë e të prekurit, të palës së tretë, të bashkëpunëtorit apo të favorizuarit të ish-Sigurimit të Shtetit, ose është një përfaqësues me prokurë i këtyre të fundit.
Autoriteti mund ta kufizojë pjesërisht ose plotësisht garantimin e së drejtës për informim, kur të dhënat përbëjnë kërcënim real për Sigurinë Kombëtare.