NJU JORK, 1 prill /– Cynthia Lennon, bashkëshortja e këngëtarit të ”Beatles”-ave, John Lennon, nga viti 1962 deri më 1968-ën, vdiq në moshën 75-vjeçare në Majorka të Spanjës, njoftoi sot djali i tyre Julian Lennon në faqen e tij të internetit.
”Cynthia Lennon ndërroi jetë në shtëpinë e saj në Majorka, Spanjë, pas një beteje të shkurtër, por kurajoze kundër kancerit. Djali i saj, Julian Lennon ishte krah nënës”, shkruhet në faqen julianlennon.com, pa specifikuar datën e vdekjes./
Frroku në Këshillin e Mandateve: S’kam kryer vrasje
Babai im ecën me të drejtën zakonore/
Mark Frroku deklaron para Këshillit të Mandateve se nuk ka kryer asnjë vrasje. Madje sipas tij në kohën kur ka ndodhur krimi ka qenë në Shqipëri, dhe jo në Belgjikë.
Deputeti prej ditësh në arrest shtëpie për dëshmi të rreme, foli dhe për mbledhjen e baballarëve.
Dokumentet per Frrokun janë të institucioneve ndërkombëtare
Përfaqësuesja e prokurorisë: “Interpol Tirana na solli urdhërarrestin ndërkombëtar më 27 mars pasdite. Informacioni që fshihet është konfidenuial dhe nuk mund ta bëj publik. Bëhet fjalë për urdhërarrest ndërkombëtar.
Dokumentet që kemi janë të institucioneve ndërkombtare dhe nuk besoj që institucionet ndërkombëtare të lëshojnë dokumente vërtetësinë e të cilave mund ta vëmë në dyshim”
Mark Frroku: S’kam qenë në Belgjikë kur ndodhi vrasja. Babai im ecën me të drejtën zakonore
“S’kam ndërmend ti fshihem drejtësisë. Kam pritur 4 orë tek lokali im policinë. Mark Frroku nuk ka vrarë njeri dhe nuk ka organizuar vrasjen e askujt. Autoritetet belge të më provojnë që unë kam qenë në Belgjikë dhe unë pranoj vrasjen dhe jam gati të shkoj atje kur do të më thërrasin. Unë kam qenë në Shqipëri dhe kjo është e garantuar.
Dëshmitari kyç: Nuk kam lidhje fare me atë çështje. Avokatët e mi do bëjnë publike provat që ka në shkresën e prokurorisë. Është e vërtetë që kanë pasur një takim shumë i vonshëm më shumë se 1 vit e një vit e ca më parë, sepse babai im është 85 vjec dhe ecë me të drejtën zakonore. Babai im i është përgjigjur atyre në të drejtën zakonore. Sa i takon të tjerave unë jam gati ti përgjigjem.
Sa i takon interpolit, jam kthyer më 22 shkurt nga Amerika e Veriut kam udhëtuar nëpërmjet shteteve Shengen dhe nuk kam pasur asnjë lloj problemi me drejtësinë as këtu as në shtetet shengen”
Avokatet: Mos miratoni autorizimin
Avokatët i kërkuan deputetëve të mos miratojnë autorizimin për arrestimin e deputetit Mark Frroku duke akuzuar prokurorinë se është anashkaluar me dashje. “ Nëse paraqitet qoftë dhe një provë të procedimit të transferimit penal prokuroria ka detyrim ligjor të regjistrojë këtë cështje” Po kështu për avokatët nuk ekziston mundësia e ikjes, pasi në kushtet kur ka një arrest shtëpia, kjo sfumohet.
S’ka pasur prova. Çështja është në gjykatë dhe nuk kemi pasur pozitë proceduriale dhe nuk jemi vënë në dijeni
Kjo është kërkesën e dytë Prokurorisë për arrestimin e deputetit Mark Frroku, por kësaj herë për llogari të drejtësisë belge, pasi deputeti akuzohet për një vrasje të një shqiptari në Belgjikë në vitin 1999.
Me kërkesë së dy avokatëve të Mark Frrokut, Saimir Vishaj dhe Genc Gjokutaj ditën e dielë, u vendos që në seancën e sotme të Këshillit të Mandateve do të jetë i pranishëm edhe vetë deputeti Frroku, i cili prej tre ditësh ndodhet i izoluar në shtëpi, pas masës “arrest shtepie”, caktuar nga Gjykata e Lartë për kallëzim të rremë.
Të martën pritet që Këshilli i Mandateve të hartoje relacionin për kristiandemokratin Mark Frroku dhe sikundër deri tani palët kanë deklaruar se nuk do pengojnë drejtësinë, pritet që në Parlament të votohet sërish për për heqjen e imunitetit të deputetit Mark Frroku duke pranuar kërkesën e Prokurorisë për autorizim për arrestimin e tij.
Belgjika kërkon arrestimin e deputetit, i dënuar në shkallën e parë në këtë shtet me 10 vjet heqje lirie për vrasjen në vitin 1999 të Aleksandër Kurtit.
Autor, sipas autoriteteve belge është deputeti Frroku, që në Belgjikë njihej me emrin Besnik Morina.
SHTYPI- Zbardhet vrasja e 1999 në Belgjikë: Porositësi ishte Arbeni, u krye nga Mark Frroku
Relacioni i Prokurorisë së Përgjithshme drejtuar Kuvendit për të kërkuar autorizimin për arrestimin e deputetit Mark Frroku zbardh ngjarjen e ndodhur 16 vjet më parë në Belgjikë.
Bëhet fjalë për vrasjen me thikë të Aleksandër Kurtit ndodhur më 5 mars 1999 në hyrje të stacionit “Midi” në Saint – Gilles, Bruksel për të cilën akuzohet se është kryer nga 4 persona mes tyre dhe Mark Frroku deputet.
Prokuroria kërkon autorizimin për arrestimin e deputetit të qarkut të Pukës me qëllim për t’i hapur rrugë një hetimi të plotë dhe të gjithanshëm nga Prokuroria.
Sipas dosjes së mbërritur nga autoritetet belge, ngjarja ka ndodhur më 05 mars të vitit 1999 në Bruksel.
Vëllai i viktimës i ka thënë prokurorisë belge se Arben Frroku, kishte paguar 10 mijë dollarë për vrasjen e Aleksandër Kurtit e kryer nga vëllai i tij Mark alias Besnik Morina.
Hetuesit belgë flasin dhe për një takim të baballarëve autorëve të dyshuar të krimit të ndodhur më 28 mars 1999 në Shqipëri.
Gjatë kësaj mbledhjeje, baballarët e përgjegjësve japin shpjegime mbi rrethanat e vrasjes dhe e pranojnë ose jo përgjegjësinë e tyre. Kjo mbledhje duhet t’i bëjë të mundur familjes së viktimës, të mund të ushtrojë më pas të drejtën e gjakmarrjes.
Megjithë mungesën e babait të Alex Vuka (Besnik Vuka), borxhi i gjakut është vënë dhe secila prej katër familjeve duhet që këtej e tutje “të paguante një jetë” që të vendosej serish paqja.
Sipas këtij zakoni, një dënim i rëndë në Belgjikë është i barabartë me një jetë.
Mbledhja konfirmoi se, arsyeja e vrasjes së Aleksandër Kurti ka qenë larja e hesapeve në lidhje me shtetasen L.A.
Sipas këtij dokumenti Motivi i vrasjes ishte: “Raporti midis viktimës dhe shtetases L. po bëhej më shumë se profesional dhe mund të vinte në rrezik organizatën e shfrytëzimit të qenieve njerëzore shqiptare nga Italia, Brukseli deri në Londër. “
Rrethanat e faktit
Prokuroria e Përgjithshme e Republikës së Shqipërisë, mbi bazën e materialeve të ardhura nga Zyra Qendrore Kombëtare Interpol Tirana me shkresën nr. 2851/1 datë 27.03.2015 dhe Ministria e Drejtësisë me shkresën nr. 266/2 datë 28.03.2015, ka regjistruar procedimin penal nr. 2, të vitit 2015, për kryerjen e veprës penale të “vrasjes me paramendim”, e kryer në bashkëpunim, parashikuar nga nenet 78/1 dhe 25 të Kodit Penal të Republikës së Shqipërisë, në ngarkim të shtetasit Mark Frroku, i biri i Prengës dhe i Lezes, lindur me 06.10.1972, në Pukë dhe banues në Tiranë, i njohur ndryshe si Besnik Morina, alias Mark Frroku, i lindur në Gjakovë më datë 6 tetor 1972, alias Dritan Frroku, i lindur në Gjakovë me datë 6 tetor 1972, alias Dritan Frroku, i lindur në Gjakovë më datë 2 korrik 1969, alias Piro Sofrani, i lindur në Korye (Shqipëri) më datë 2 korrik 1969, me kombësi serbe, pa vendbanim apo rezidencë fikse në Belgjikë.
Vrasja në Belgjikë
Në datë 05.03.1999, viktima Aleksandër Kurti, lindur me 03.01.1975, u qëllua me thikë për vdekje nga 4 autorë, ndërmjet të cilëve shtetasi Besnik Vuka, në hyrje të stacionit “Midi” në Saint – Gilles, Bruksel. Autor i kësaj ngjarje besohet të jetë shtetasi Mark Frroku, i njohur ndryshe si Besnik Morina, i njohur ndryshe si Dritan Frroku, i njohur si Piro Sofrani. Sipas disa dëshmitarëve, shtetasi Besnik Vuka ishte autori i goditjeve me thikë. Viktima kishte rënë në dashuri me një prostitutë, me emrin L.S. Kjo vrasje e paramenduar shtrihet brenda fushës së vrasjes mafioze e organizuar nga qarqet e tutorëve. Shtetasja L.S kishte lënë takim me viktimën në ditën e ngjarjes. Aleksandër Kurti kishte menduar se do të takonte prostitutën, por ai ra në grackë, e cila rezultoi fatale për të. Kristian Marinaj, i njohur si Arjan Bytyçi, si dhe Lek Bib Djafa ishin bashkëpunëtorë të Besnik Vukës. Dëshmitarët kishin përmendur numrin e autorëve. Ata u arratisen jashtë vendit, disa ditë pas ngjarjes.
Me vendim të datës 15 janar 2010 në mungesë, ndaj të akuzuarve Besnik Morina, Besnik Vuka, Arjan Bytyçi dhe Bib Lek Djafa, Gjykata e Krimeve të Renda të Rrethit të Brukselit, ka dënuar secilin prej tyre me nga 10 vjet heqje lirie. Duke qenë se, nga personat e dënuar është ankimuar vendimi i dënimit, Gjykata e Kasacionit me vendimin e datës 24 Mars 2010, ka kthyer çështjen për rigjykim Gjykatës për Krime të Rënda të Provincës Brabant-Wallon, Belgjikë. Avokati i të akuzuarit Besnik Morina, i identifikuar si Mark Frroku, ka kërkuar shtyrjen e seancës gjyqësore të datës 31 Janar 2014, për në datën 23 Shkurt 2015. Prokurori i Përgjithshëm i Brukselit e akuzon shtetasin Mark Frroku, për kryerjen e veprës penale të “vrasjes me paramendim”.
Hetimi pas vrasjes
Nga këqyrja e vendit të ngjarjes, më datë 5 Mars 1999, rreth orës 17:45, Policia e Saint-Gilles, ka zbuluar në një rrugë në hyrje të Stacionit “Gare du Mid”, nr. 47A të Avenue Fonsny, Bruksel, trupin e një djali të ri në agoni. Nga këqyrja rezultoi se hunda e tij ishte e mbuluar me gjak, kishte hematoma të rënda tek sytë, plagë në dorë dhe gjoksin e gjakosur me tre gjurmë goditjeje me thikë. Viktima, në bazë të dokumenteve të identifikimit që ju gjetën, është identifikuar si Azem Shkreli, lindur në Jugosllavi, më 8 shtator 1980. Policia ka konstatuar dhe marrë poshtë një kamioni, një thikë të madhe mishi, me një dorezë prej druri, tehu i të cilës ishte njollosur me gjak. Veprimet e para hetimore kanë treguar se bëhej fjalë për larje hesapesh ndërmjet personash të përfshirë në rrjetin e prostitucionit shqiptar.
Nga deklarimi i shtetasit Nikolas Kurti, vëllai i viktimës, i cili është pyetur nga hetuesit me 7 dhjetor 2000, ka rezultuar se vëllai tjetër i tij, i quajtur George, e ka informuar për “mbledhjen e baballarëve”, të mbajtur në Shqipëri, me 28 mars 1999. Zakoni shqiptar parashikon në rastet e gjakmarrjes se, baballarët e përgjegjësve të këtij krimi paraqiten para familjes së viktimës dhe japin informacionin mbi identitetin e autorëve. Gjatë kësaj mbledhjeje, baballarët e përgjegjësve japin shpjegime mbi rrethanat e vrasjes dhe e pranojnë ose jo përgjegjësinë e tyre. Kjo mbledhje duhet t’i bëjë të mundur familjes së viktimës, të mund të ushtrojë më pas të drejtën e gjakmarrjes.
Mbledhja e baballarëve
Në “mbledhjen e baballarëve” të zhvilluar në një fshat të Shkodrës, nga ku viktima është me origjinë, kanë qenë prezente: babai i viktimës, vëllai i viktimës, George Kurti, Preng Frroku, babai i Mark Frroku (Besnik Morina), Bibë Djafa, babai i Lek Bib Djaf, Fran Ded Joka, babai i Hile Joka (Arjan Bytyçi). Babai i autorit të katërt, Nikoll Vukol nuk është paraqitur në mbledhje pasi, djali i tij Alex Vuka (Besnik Vuka) nuk e vlerëson veten përgjegjës për vdekjen e viktimës, duke pretenduar se viktima kishte vdekur para se ai të ndërhynte. Megjithë mungesën e babait të Alex Vuka (Besnik Vuka), borxhi i gjakut është vënë dhe secila prej katër familjeve duhet që këtej e tutje “të paguante një jetë” që të vendosej serish paqja.
Sipas këtij zakoni, një dënim i rëndë në Belgjikë është i barabartë me një jetë. Mbledhja konfirmoi se, arsyeja e vrasjes së Aleksandër Kurti ka qenë larja e hesapeve në lidhje me shtetasen L.A. Sipas Nikolas Kurti, vëllai i tij Aleksandër, kishte disa probleme me një farë Ben, (Arben Frroku), me të madhin e tre vëllezërve Frroku, tutor i prostitutave me emrat L. M. dhe Z. Nikolas Kurti, ka deklaruar se Arben Frroku ishte porositës i vrasjes së shtetasit Aleksandër Kurti, e kryer nga vëllai i tij “Mark” alias Besnik Morina. Lek Bib Djafa (Xhafa) i ka deklaruar shumë shqiptarëve se, ka marre shumën 10.000 dollar amerikanë për ekzekutimin e shtetasit Aleksandër Kurti. Nga shpjegimet e shtetasit Nikolas Kurti, rezulton se ditën e ngjarjes, ka patur një debat midis viktimës dhe tre djemve të baballarëve, në ‘Gare du Midi’ në Bruksel. Një person i katërt ka ndërhyrë, toni është rritur dhe personi ka nxjerrë thikën.
Motivi i vrasjes
Motivi i vrasjes: Raporti midis viktimës dhe shtetases L. po bëhej më shumë se profesional dhe mund të vinte në rrezik organizatën e shfrytëzimit të qenieve njerëzore shqiptare nga Italia, Brukseli deri në Londër. Në shtator dhe tetor 2000, Nikolas Kurti deklaron në polici se kunati i tij është lidhur me Markun (Besnik Morina) dhe shtetasin Hile Joka për të vrarë shtetasin Aleksandër Kurti. Prindërit e Kurtit jetojnë në Amerikë me djalin e tyre, Nikolas. Vëllai i tij Georges është larguar nga Shqipëria për një destinacion të panjohur në Europë. Ai është i kërkuar nga banda e të katërve.
Marku, me vëllezërit e tij Nardi dhe Arben, ka qenë përgjegjës për tri prostituta, që banojnë bashkë. Sipas dëshmitarit anonim ata quhen “Frroku”. Viktima me origjinë nga Shkodra (Shqipëri) është hequr si polic i Interpolit dhe se në Shqipëri e njeh familjen e shtetases L. Nga frika se mos familja e saj mësonte mbi punën që ajo bënte në Belgjikë, shtetasja L. i telefonon tutorit të saj Nardi (Frroku alias Shkurt Lasku) i cili ndodhej në atë kohë në Shqipëri. Ai e këshillon të njoftojë të vëllain Dritan (Besnik Morina). Dritani e fton t’i ngrejë një kurth viktimës në “Gare du Midi”. Shtetasja L. kontakton me telefon me Aleksandër Kurtin dhe e siguron se ajo do të ishte vetëm me të në takim. Në orën dhe vendin e caktuar, nuk është L., e cila pret viktimën, por katër persona të cilët kanë për qëllim ta vrasin.
Këto veprime kualifikohen si elemente të anës objektive të veprës penale “vrasje me paramendim”, e kryer në bashkëpunim, parashikuar nga nenet 78/1 dhe 25 të Kodit Penal të Republikës së Shqipërisë.
Në këto kushte, nga Prokuroria e Përgjithshme është provuar se deputeti Mark Frroku ka konsumuar elemente të veprës penale të “vrasjes me paramendim”, e kryer në bashkëpunim parashikuar nga nenet 78/1 dhe 25 të Kodit Penal të Republikës së Shqipërisë.
Për këtë fakt është regjistruar procedimi penal përkatës nr. 2 i vitit 2015. Vepra penale e vrasjes me paramendim, e kryer në bashkëpunim, paraqet rrezikshmëri shoqërore shumë të lartë dhe në këto kushte kërkesa e organit të akuzës është për një masë sigurimi të karakterit shtrëngues “arrest në burg”, për shtetasin Mark Frroku.
Në aplikim të nenit 228 të Kodit të Procedurës Penale masat e sigurimit mund të caktohen vetëm nëse në ngarkim të tij ekziston një dyshim i arsyeshëm, i bazuar në prova. Sipas parashikimeve të nenit 229 të Kodit të Procedurës Penale, masat e sigurimit vendosen në raport me rëndësinë e faktit dhe sanksionet që parashikon vepra penale për të cilën dyshohet, respektivisht nenet 78/1 dhe 25 të Kodit Penal. Për sa më sipër, me qëllim për t’i hapur rrugë një hetimi të plotë dhe të gjithanshëm nga Prokuroria, bazuar në nenet 73/2 të Kushtetutës së Republikës së Shqipërisë, dhe nenit 288 të Kodit të Procedurës Penale, kërkoj nga Kuvendi autorizimin për arrestimin ose heqjen e lirisë, së deputetit të Kuvendit të Shqipërisë Mark Frroku.
CESHTJA”FRROKU- Dorëhiqet Drejtori i Policisë Artan Didi
Vendimi pas ndalimit mbrëmë të shefit të zyrës së Interpol Tiranës dhe një punonjëseje tjetër të cilët dyshohet se kanë mbajtur të fshehur një kërkesë arresti ndërkombëtar të lëshuar nga autoritetet belge ndaj deputetit Mark Frroku.
Në Shqipëri, drejtori i Përgjithshm i policisë së Shtetit Artan Didi dha sot dorëheqjen pas ndalimit një natë më parë të shefit të zyrës së Interpol Tirana Artan Bajraktari dhe një tjetër punonjëse të këtij sektori Loreta Alla të cilët dyshohet se mbajtën të fshehur kërkesën për arrest ndërkombëtar ndaj deputetit Mark Frroku. Ky i fundit dyshohet për një “vrasje me paramendim”, të ndodhur në Belgjikë në vitin 1999, ndaj një shtetasi shqiptar. Sipas autoriteve belge vrasja ka ndodhur gjatë një përplasjeje të grupeve që kontrollonin rrjete të prostitucionit në Bruksel. Gjykata e shkallës së parë për krimet e rënda në Bruksel e ka dënuar me 10 vite burg zotin Frroku, dhe tre shqiptarë të tjerë, ndërsa procesi gjyqësor është tani në Gjykatën e Apelit të kryeqytetit belg, pas ankesës së bërë nga të dënuarit. Kërkesa nga Belgjika ndaj Frrokut ka mbërritur në zyrat e Interpolit që në muajin janar, dhe zyrtarët e këtij sektori dyshohet se nuk kanë njoftuar autoritetet për këtë.
“Shkelja e procedurave ligjore të specialistit të Interpolit dhe shefit të këtij sektori, shkelje që i vuri ata përpara përgjegjësisë penale, cënoi në një farë mase imazhin e Drejtorisë së Përgjithshme të policisë, ndonëse ishte po ky institucion që e korrigjoi gabimin”, shkruan në deklaratën e dorëheqjes, drejtori i Përgjithshëm i Policisë Artan Didi duke shtuar se “për këtë arsye, duke vlerësuar si të papranueshëm për prestigjin e institucionit të Policisë së Shtetit, të cilin unë drejtoj, duke vlerësuar se nuk pata kapacitetin e mjaftueshëm për të parandaluar një fakt të tillë, vendosa të jap dorëheqjen e parevokueshme nga funksioni i Drejtorit të Përgjithshëm të Policisë së Shtetit”.
Partia demokratike reagoi sot duke u shprehur se kërkesa e autoriteteve belge ndaj deputetit Frroku është mbajtur qëllimisht e fshehur, për t’i bërë shantazh sipas tij, për cështen Doshi, deklaroi sekretari i Përgjithshëm Arben Ristani. “E kanë mbajtur të kapur dëshmitarin kyç, Mar Frroku, i kanë dhënë imunitet e mbrojtje në kundërshtim me ligjin, derisa ai dha deponimin në favor të Ilir Metës. Vetëm më 18 mars, pasi Mark Frroku e kishte dhënë dëshminë në prokurori në favor të Ilir Metës, lidhur me akuzat ndaj tij, për porositjen e vrasjes së dy deputetëve, policia shqiptare ka aktivizuar shkresën për kërkim ndërkombëtar të deputetit të mazhorancës”, u shpreh zoti Ristani, duke vlerësuar se sipas tij zyrtarët e Interpol Tiranës janë vetëm viktima të një skeme për të cilën përgjegjës direkt, u shpreh ai, janë kryeministri Edi Rama dhe kryetari i parlamentit Ilir Meta
Ngjarja për të cilën akuzohet deputeti Frroku u përmend për herë të parë publikisht pas zgjedhjeve të qershorit të 2013, në një shkrim të një gazete belge. Në atë kohë zoti Frroku mohoi të ishte përfshirë në vrasje, sikundër bëri edhe tani, pasi prokuroria kërkoi në fundjavë, për herë të dytë, autorizimin e parlamentit për arrestimin e tij. Kërkesa pritet të shqyrtohet sot nga Këshilli i Rregullores dhe Mandateve i parlamentit.
Javën e shkuar zoti Frroku u ndalua pasi parlamenti miratoi kërkesën e Prokurorisë për arrestimin e tij dhe të deputetit Tom Doshi, lidhur me hetimet ndaj deklarimeve të këtij të fundit për ekzistencën e një plani për vrasjen e tij dhe të deputetit demokrat Mhill Fufi. Plan, pas të cilit sipas zoti Doshi qëndronte kryetari i parlamentit Ilir Meta, por që sipas hetimeve, rezulton të ketë qenë i sajuar prej tij. Në fundjavë Gjykata e Lartë vendosi që deputetët Doshi e Frroku të lihen në arrest shtëpie.
Beogradi ende pa qëndrim për rastin e Sheshelit
Autoritetet në Serbi kanë reaguar pas vendimit të Tribunalit të Hagës për Krime të Luftës, me të cilin ka anuluar lirimin e përkohshëm të ish-liderit radikal serb, Vojisllav Sheshelj, duke urdhëruar kthimin e tij në qendrën e paraburgimit në Hagë.
Ky i fundit ka bërë të ditur se “nuk do të ikë”, por as nuk do të kthehet “vullnetshëm në Hagë”.
Tribunali i kishte dhënë mundësi atij të kërkojë trajtim mjekësor në Serbi, me kusht që të mos ndërhyjë te viktimat apo dëshmitarët dhe që të kthehet në gjykatë kurdo që kjo kërkohet prej tij.
Kryeministri i Serbisë, Aleksandar Vuçiq, ka thënë një ditë më parë se në ditët e ardhshme Serbia do ta qartësojë qëndrimin e saj për vendimin e Tribunalit që Shesheli, të kthehet në Hagë.
Përmes një shkrimi autorial në të përditshmen “Politika” në Beograd, ai ka theksuar se çfarëdo vendimi që do të marrin autoritetet serbe, “ai nuk do të jetë i pamoralshëm, sikurse, të gjitha vendimet politike të Hagës”.
“Para disa muajsh, shumë prej atyre, që nuk u pëlqeu rezultati i zgjedhjeve, ashtu sikurse as dominimi i politikës të Partisë Progresiste Serbe, filluan me fushatën për përhapjen e frikës nga kthimi i Sheshelit nga Haga”, ka thënë Vuçiq.
“Kur u zgjatet pritja, ndërkaq që ne vazhdojmë që, pa frikë, të zbatojmë politikë sovrane dhe kur unë vetëm dal dhe them se nuk do të harrojmë, asnjëherë, asnjë viktimë të bombardimeve të NATO-s, atëherë ata e kthejnë në kuti dhe presin që ne të vdesim nga frika”, ka theksuar Vuçiq.
Ndryshe, Dhoma e Apelit e Tribunalit të Hagës për ish-Jugosllavinë, të hënën e ka miratuar ankesën e prokurorisë ndaj lirimit të përkohshëm të Sheshelit dhe ka urdhëruar kthimin e tij në paraburgim në Hagë.
Ky institucion ka vendosur që Shesheli të transportohet nga Beogradi në Hagë dhe të caktohet mbledhja ku do të dëgjohen përfaqësuesit e qeverive të Holandës dhe Serbisë, në mënyrë që të merren vesh për kushtet e kthimit të të akuzuarit.
Por, lideri i partisë Radikale Serbe, Sheshel, ka theksuar se nuk i intereson vendimi i Dhomës së Apelit.
“Unë nuk do të kthehem vullnetarisht. Do të shohim se si do të duket kur të më arrestojnë bashkëpunëtorët e mi më të ngushtë në të gjitha krimet e luftës dhe krimet kundër njerëzimit, të cilat më atribuohen”, u ka thënë Sheshel medieve serbe, duke iu referuar në radhë të parë presidentit serb, Tomisllav Nikolliq dhe zotit Vuçiq.
Por, Rasim Lajiq, kryetar i Këshillit për bashkëpunim me Hagën, ka thënë se Qeveria e Serbisë, në rastin e të akuzuarit të Hagës, Sheshelit, do ta sjellë vendimin më të mirë, me qëllim të ruajtjes së stabilitetit të përgjithshëm në Serbi.
Ai gjithashtu ka theksuar se vetë-dorëzimi i Sheshelit, do të ishte vendimi më i mirë, për shkak se, sipas tij, është i mundur diskutimi për kushte të reja…
Megjithatë, Lajiq e ka cilësuar vendimin e Dhomës së Apelit, si një “kombinim të rrëmujës juridike dhe cirkut politik”. Sipas tij, një gjë e tillë është projektuar nga Tribunali i Hagës dhe siç ka thënë ai, kjo do të ketë implikime të mëdha politike.
“Ne, në vitin 2015, po merremi me Sheshelin, në vend se të merremi me problemet e rënda ekonomike dhe reformat, të cilat po i zbatojmë”, ka thënë Lajiq.
Por, Natasha Kandiq, koordinatore e projektit RECOM (Koalicioni për Komisionin rajonal për vërtetimin e fakteve për viktimat e luftës në hapsirën e ish-Jugosllavisë), ka shprehur mendimin se ekzistojnë gjasa të mëdha që Shesheli të mbetet në Serbi, nën arsyetimin e raporteve mjekësore.
“Shesheli, ditë më parë ka thënë se po e pret konstatimin dhe përfundimet e konsiliumit lidhur me sëmundjen e tij. Mund të ndodhë që, bazuar në gjetjet e konsiliumit, t’i caktohet operimi. Ai ka thënë se do ta pranojë çdo konstatim dhe rekomandim të konsiliumit. Kështu që, mund të presim që ai të dërgohet në operim dhe kur dikush është në operim, atëherë është e pamundur që të kthehet në paraburgim”, ka vlerësuar Kandiq.
Ndryshe, Shesheli ka qëndruar në Hagë që nga viti 2003, për t’u përballur me akuzat për krime lufte dhe krime kundër njerëzimit gjatë luftërave në fillim të viteve 90′ në ish Jugosllavi.
Prej andej ishte liruar përkohësisht dhe në formë të kushtëzuar në nëntor të vitit të kaluar, me arsyetimin se ka nevojë për trajtim mjekësor të sëmundjes së kancerit.
Spitali i përgënjeshtron raportet për depresion të Lubitzit
Zyrtarët gjermanë dhe francezë po i vazhdojnë hetimet për zbulimin e shkaqeve eventuale, që çuan në rrëzimin tragjik të aeroplanit të firmës ajrore, Germanwings, me ç’rast u vranë të 150 njerëzit në të.
Tash, në fokus të hetimeve është shëndeti fizik dhe mendor i bashkë-pilotit, Andreas Lubitz.
Spitali në Dyseldorf, ku Lubitz ka jetuar, tha se ai kishte qenë pacient gjatë dy muajve të kaluar. Mbrëmë spitali ka njoftuar se për herë të fundit Lubitz kishte qenë në spital për “vlerësim diagnostik” më 10 mars.
Spitali ka refuzuar të japë detaje për gjendjen e tij, por i ka përgënjeshtruar raportet në mediat gjermane se Lubitz ishte trajtuar në këtë spital nga depresioni.
Hetuesit mendojnë se Lubitz me qëllim e ka rrëzuar aeroplanin në malet e Alpeve, gjatë fluturimit nga Barcelona në Spanjë, për në Dyseldorf të Gjermanisë.
Prokurorët francezë thanë se të dhënat nga incizimet në kabinën e pilotëve sugjerojnë se 27-vjeçari, Andreas Lubitz, e ka mbyllur derën e kabinës, dhe nuk e ka lejuar kapitenin e aeroplanit të kthehet brenda.
Nga incizimet është vërejtur se mbretëronte heshtje, derisa udhëtarët kishin filluar të klithnin, ndërsa kapiteni përpiqej të hynte në kabinë.
Prokurori gjerman, Christoph Kumpa, u tha gazetarëve se dokumentet e gjetura në shtëpinë e bashkëpilotit, Andreas Lubitz, kanë çuar kah ekzistimi i sëmundjes dhe trajtimi nga mjekët.
Në këtë kuadër, ai ka thënë:
“Dokumentet me përmbajtje mjekësore, që kanë çuar kah ekzistimi i sëmundjes dhe trajtimi korrespondues nga ana e mjekëve, janë konfiskuar”.
“Fakti se atje ka pasur shënime për sëmundje të grisura, në mesin e gjërave të tjera që janë gjetur, që ishin aktuale dhe madje pak para ditës së krimit, e mbështesin vlerësimin e bazuar në shqyrtimin preliminar se i vdekuri e ka fshehur sëmundjen e vet nga punëdhënësi dhe kolegët profesionalë”, tha prokurori gjerman Kumpa.
Nga ana tjetër, policia e Francës që po punon në gjetjen e mbetjeve nga vendi i rrëzimit të aeroplanit, tha se deri tash janë gjetur prej 400 e deri në 600 pjesë njerëzore.
Duke folur në qytetin Seyne-les-Alps, në malet Alpe në Francë, koloneli, Patrick Touron, nga shërbimi i xhandarmerisë, tha se ekipet e kërkimit nuk kanë gjetur asnjë “trup të vetëm” të plotë.
Sipas tij, mostrat e AND-së janë marrë nga objektet që janë sjellw nga familjet e viktimave, siç janë për shembull brushat e dhëmbëve, të cilat mund të ndihmojnë në identifikimin e njerëzve të vrarë nga rrëzimi i aeroplanit Germanwings, më 24 mars.
Pas përplasjes, kompania ajrore gjermane Lufthansa, që është operuese e firmës ajrore me buxhet të ulët, Germanwings, tha se e ka emëruar një zyrtar për t’i shqyrtuar, “ekzaminuar dhe pastruar më tutje të gjitha procedurat e sigurisë së fluturimit” në këtë kompani.
Lufthansa thotë se firmat që operohen nga ajo, siç është Germanwings, do ta paraqesin rregullën për dy persona në kabinën e pilotit “sa më shpejt që të jetë e mundshme”, në konsultime me rregullatorët e tyre.
Ministrat e transportit dhe autoritetet e aviacionit në Gjermani, Austri dhe Portugali, kanë shpallur se do të kërkojnë miratimin e “rregullës për dy” që tashmë është standarde në Shtetet e Bashkuara.
Bashkimi Evropian tha se po e analizon çështjen nëse duhet të ndryshohen rregullat pas tragjedisë së aeroplanit të firmës Germanwings.
“Ne po presim për konkluzionet e hetimeve që po zhvillohen dhe, nëse është e domosdoshme, rregullat e sigurisë do të rishqyrtohen”, tha zëdhënësja e Komisionit Evropian, Mina Andreeva, në një konferencë për shtyp.
Asociacioni Ndërkombëtar i Transportit Ajror, që i përfaqëson afro 250 kompani, tha se “është thellë i shokuar dhe i pikëlluar” me katastrofën e kësaj jave, por udhëtarët duhet “të jenë përsëri të sigurt se fluturimi mbetet mënyra më e sigurt për udhëtim”.
E përgatiti: Fatmir Bujupi
- « Previous Page
- 1
- …
- 407
- 408
- 409
- 410
- 411
- …
- 596
- Next Page »