Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Thaçi në selinë e UNESCO në Paris

by

-Media: Në prag të votimit në UNESCO, shtohen masat për mbrojtjen e objekteve të trashëgimisë/
PRISHTINË, 21 Tetor 2015/ “Jam në selinë e UNESCO në Paris për të dhënë shtytjen e fundit para votimit për anëtarësimin e Kosovës”, bën të ditur kryediplomati kosovar, Hashim Thaçi.
“Jam falënderues miqve të Kosovës dhe qytetarëve për ndihmën në lobim”, shton ai.
Kosova sot votohet për kandidaturën e pranimit në UNESCO nga Bordi Ekzekutiv i kësaj organizate të OKB-së, në Paris, prej nga kryediplomati kosovar Hashim Thaçi jep mesazhin: “Të jemi aty ku meritojmë – të barabartë”.
Ndërkohë, sipas medias kosovare, procesi i anëtarësimit të Kosovës në UNESCO, në tërë këto javë, ka qenë përballë një propagande dhe lobimi për mos-pranim nga ana e politikanëve dhe institucioneve të Serbisë.
Për këtë çështje është dyshuar se mund të ketë inskenim të ndonjë incidenti, në ndonjë objekt të trashëgimisë kulturore ose fetare të Kosovës, që do të ishte në dëm të anëtarësimit të Kosovës në UNESCO, raporton Koha.net.
Policia e Kosovës ka konfirmuar për Koha.net se këto ditë kanë intensifikuar aktivitetet në mbrojtje të këtyre objekteve, me qëllim të parandalimit të ndonjë incidenti eventual.
“Disa nga këto objekte të (Trashëgimisë Kulturore dhe Fetare) ruhen 24 orë/7 ditë, ndërsa për të gjitha objektet tjera PK-ja kujdeset gjatë punëve të rregullta. Normalisht që edhe këto ditë ne i kemi intensifikuar aktivitetet në mbrojtjen e këtyre objekteve me qëllim të parandalimit të ndonjë incidenti eventual i cili kishte me pas ndikim edhe në këtë proces”, është përgjigjur Policia e Kosovës.
Më tej policia ka thënë se objektet e trashëgimisë kulturore e fetare sigurohen vazhdimisht nga policia, dhe se në bazë të vlerësimeve merr edhe veprime të nevojshme./b.j/

Ikona te shek XVI –XIX në Muzeun Ikonografik “Onufri”

by

*Për herë të parë për publikun në një pavion të ri/
*Muzeu Ikonografik ONUFRI është një vlerë e rëndësishme dhe identifikuese e trashëgimisë kulturore në qytetin e Beratit./
Nga Berati për Diellin Sulo Gozhina/
Dritaret një mbi një, keshtjella, ansamblet e papërsëritshme të Mangalemit e Kalasë, Gorrica me urën që lidh dy pjesët e qytetit, kishat e shumta e xhamitë me minaret elegante, kjo më së shumti është klisheja si e mendojnë qytetin e Beratit.
Por s’janë të paktë ata që kanë mundur të prekin e admirojne atë vlerën që rrjedh së brenëshm të vyer e orgjinale, të ikonave, ikonostasit, tavaneve, të veshjeve e zbukurimeve, të objekteve të mrekullueshëm të artit e artizanatit, dëshmi të çmuara të jetës së lartë qytetare të konservuara në fondet e muzeut Ikonografik ONUFRI dhe muzeut ETNOGRAFIK
I përshtatur që prej vitit 1986, në ambientet e kishës “Fjetja e Shën Mërisë”, në Kalanë e Beratit, në monumentin më përfaqësues të arkitekturës pas-bizantine njëkohësisht katedrale te Mitropolisë, një rindërtim i vitit 1797, Muzeu Ikonografik Onufri që në zanafillën e tij u konceptuar si një muze i vecantë ku autorët u kujdesën të risillnin mjedisin orgjinal dhe frymën në të cilën u krijuan këto koleksione. Në to admirohen vepra të mjeshtërve më të rëndësishëm ikonografë Onufri, Nikolla, Onufër Qiprioti, Shpataraku, Çetirët (familja Katro) e të tjerë të paidentifikuara, shumë objekte liturgjike si dhe ansambli i pakrahasueshëm i ikonostasit, një shëmbull i lartë i drugdhëndies i realizuar nga atelietë e mjeshtërve vendas, një koleksion që na bënë krenarë.

A G R O N P O L O V I N A, Drejtor Qendra Kombëtare e Muzeumeve Berat

Në vitin 2014 Muzeumet e QKMB ishin një destinacion i rëndësishëm turistik me 1 500 vizitorë ?.
Si një shifër e shkëputur nga konteksi krahasues 15 000 vizitorë nuk shpreh atë ndryshim të suksesshëm tashmë në promovimin e koleksioneve të kryer nga stafet e Muzeun Ikonografik “Onufri” dhe Muzeun Etnografik cilët janë aset i rëndësishëm me përvojën e grumbulluar në një periudhë shumë të gjatë kontaktesh e kërkimesh. Nëse në vitin 2013 muzeumet patën vetëm 8 700 vizitorë, gjatë këtyre 9 muajve të vitit 2015 në përfundim të Sezonit Turistik të Verës muzeumet patën 20 170 vizitorë, bëhet më e qartë sfida e asaj që ka ndryshuar duke filluar nga puna e përditëshme dhe e padukshme për të përmirësuar shërbimin ndaj publikut, në ndryshimet në paraqitjen e koleksioneve, hapja e muzeumeve e orientimi drejt grupmoshave të ndryshme, ndërhyrjet restauruese, bashkëpunimin për organizimin e veprimtarive të rëndësishme kulturore kombëtare, përmiresimi i imazhit etj.
Në vitin 2016 do të ketë surpriza për vizitorët, çfar pritet të ndodhë në Muzeun Ikonografik Onufri?
“18 Maj – Dita Ndërkombëtare e Muzeve” u përjetua si një ngjarje e veçantë që ndodh rallë edhe për muze shumë të rëndësishëm. 11 ikona u transferuarn në Koleksionin e Muzeut Ikonografik Onufri nga Fondi i DRKK-së Berat. Ikonat janë realizime rreth shekujve XVI – XIX. që u atribuohen mjeshtërve ikonografe, Onufrit, Nikollës, Qipriotit, ateliesë së familjes Çetiri, të realizuar kryesisht për kishat dhe manastiret e Kalasë të qytetit të Beratit të papublikuara më pare.
Prej gati dy vitesh Qendra Kombëtare e Muzeumeve Berat dhe Drejtoria Rajonale e Kulturës Kombëtare kanë nisur një bashkëpunim institucional cili konsiston në një koncept të ri në menaxhimin e vlerave të trashgimisë kulturore, në një mendësi të re për të ndryshuar mënyrat e deritanishme, për të qenë më aktiv në kujdesin ndaj tyre, për ti berë më të ekspozueshme, më të prekshme nga publiku por njekohësisht së bashku mund të jemi më efikas me profesioniste në ruajtjen dhe konservimin e tyre.
Duke parë interesin e madh që pati për 11 ikonat e transferuara e të ekspozuara në mjediset e Katedrales vetëm gjatë një muaji u bindëm përfundimisht që së bashku me disa ikona të rëndësishme te koleksionit te MO të pa ekspozuara më parë që u atribohen mjeshtër Nikollës dhe Onufër Qipriotit ti paraqesim për herë të parë për publikun në një pavion të ri. Ekspozita me emërin kuptimplotë “Thesare të Fjetura”, si nje grishje drejt trashegimise kulturore mbetet një sfidë per ti ofruar publikut cdo sezon një produkt të ri, një koleksion të pa ekspozuar si një thesar që ne kërkojmë ta nxjerim në dritën e diellit me të gjithë shkëlqimin duke synuar te risim vizitueshmerine dhe te nxisim turizmin vendas dhe te huaj.
Prej disa muajsh jemi duke e realizuar këtë projekt të rëndësishëm në sallën e katit të dytë të muzeut, një mjedis tepër i veçantë e impresionues që pas viteve 90 ka qenë i lënë pas dore. Salla me financim të Ministrisë së Kulturës do ti nënshtrohet një përmirësimi konstriktiv dhe më pas vlerësimit të ndriçimit i cili do të jetë profesional e konservues. Është duke u përgatitur nga specialistët tanë i gjithë materiali promocional që duhet për këtë ekspozitë kaq të rëndësishme, katalogu, fletëpalosjet, kartolinat, posterat, banerat etj.
Rivleresimi i këtij mjedisi dhe organizimi i ekspozitës, muzeun e bënë akoma më të rëndësishëm e më të vizitueshëm, aktiv për të ofruar publikut produkte të reja nga trashëgimia kulturore e qytetit të Beratit. Ky projekt po mbeshtetet në çdo hap nga Ministria e Kulturës.
Por nuk është vetëm ekspozita “Thesare te Fjetura” ajo që po përgatitet të ndodh në vazhdim. Kodikët e Beratit, “Codex Purpureus Beratinus Φ” 043 dhe “Codex Aureus Anthimi” 1143, janë vlera shumë të rëndësishme të fondit botëror të letërsisë biblike dhe njëkohësisht trashëgimisë sonë e cila na bënë tepër krenarë.
Historia e tyre është e vecantë në kufijtë e legjendës, lidhet pazgjithshmërisht me Beratin dhe dëshmon një nivel të lartë kulturor të tij.
Keta kodikë janë ruajtur me shumë përkushtim që prej shekullit të 11 kur kemi shënimet e para për kërkimin e tyre dhe së fundi janë gjetur në Katedralen “Fjetja e Shën Mërisë” (sot Muzeu Ikonografik Onufri) në Kala të Beratit (12 Gusht 1968). Sot ata ruhen në Fondet e Drejtorisë së Përgjithshme të Arkivave.
Duke parë që interesi për ta është jashtëzakonisht i madh, në projektet tona në vazhdim si domozdoshmëri po punojmë për të ekspozuar të kopjuar si replike e orgjinalit fillimisht “Codex Purpureus Beratinus” (Kodiku i Purpurt i Beratit) atje ku është gjetur së fundi, prapa ikonostasit të Katedrales.
Prej kohësh po punojmë dhe tashmë jemi në finalizim të transferimit nga Fondi i DRKK-së të dy objekteve të identifikuara si veshje në argjend të relikeve (këmbë) të një prej shënjtorëvë sllavë, shën Goratzi. Sic edhe dëshmohet nga lipsanat e Shën Gorazdit e Shën Angelarit të cilat ndodhen në Kishën Katedrale Fjetja e Shën Mërisë (në Muzeun Ikonografik Onufri) nga një ikonë të madhe të ikonostasit (me autor Joan Cetiri), dhe të një tjetre që është e një date të më vonë, me autor piktorin Kristo ku paraqiten shtatë shejtorët sllavë (Eptaritmi), Shën Gorazdi dhe Shën Angelari janë pikturuar “të fjetur” mbrenda mureve të Kështjellës së Beratit.
Në fakt sfida është të jemi një hap para. Për shumë vizitore të huaj që kanë destinacion dy muzeumet tona përbën surprizë funksionimi në mjediset e Muzeut Ikonografik Onufri dhe Muzeut Etnografik të guidës nëpërmjet sistemit QR code në 3 gjuhë në shqip, anglisht dhe italisht duke mundësuar që cdo kush të ketë lehtësinë e nevojshme të marrjes së informacionit në mënyrë individuale përpara veprës orgjinale.
Ndërkohë shumë prej tyre ndihen të përkedhelur kur vërejnë se në të dy muzetë e Q K M Berat mund të marrin informacion në gjuhën e vet pasi për vizitorët individuale funksionon dhenia e informacionit nëpërmjet fishave në 10 gjuhë që ndihmon krahas guidës gojore (me specialist guid didaktike), guidës me QR-cod për ti shërbyer cdo vizitori vendas dhe të huaj numëri i të cilëvë rritet çdo vit me rreth 30 – 35 % .

NISËM PËR SHPALLJEN E ARISTIDH KOLËS NDERI I KOMBIT SHQIPTAR

by

Nisma e një grupi intelektualësh të Tiranës dhe ish emigrantësh në Greqi, për dhënien Aristidh Kolës të titullit “Nderi i Kombit”, bëri mbledhjen e saj të parë me rastin e 15 vjetorit të vdekjes së studiuesit dhe veprimtarit të madh arvanitas.
Miq e lexues të pasionuar të veprave të këtij studiuesi, por edhe ish emigrantë shqiptarë në Greqi, u gjenden në kafe-bar Muza, një lokal ku mblidhen krijues kryesisht të dielave dhe folën për jetën e veprën e Aristidh Kolës. Fjalën e hapjes e mbajti shkrimtari Pandeli Koçi, ndërsa kineasti dhe poeti Kolec Traboini, që e ka njohur personalisht Aristidh Kolën dhe vitin e kaluar ka botuar një libër mbi atë, lexoi propozimin e përgatitur që do t’i dërgohet Presidentit të Republikës duke sjellë arsyet e këtij propozimi si dhe një biografi të shkurtër të veprimtarit të shquar arvanitas të cilat po i sjellim më poshtë: 1-Krenaria e tij si shqiptar, e cila e shoqëroi deri në fund të jetës e prej të cilës nuk hezitoi e nuk hoqi dorë kurrë sado presion dhe luftë që i bënin. 2-Guximi për të thënë të vërtetën, për të mbrojtur kulturën gjuhën e traditat shqiptare ndër arvanitët e Greqisë. 3- Dashuria e madhe për atdheun e të parëve dhe popullin shqiptar në Shqipëri, Kosovë, arbëreshët e Italisë, shqiptarët e Maqedonisë dhe kudo ku ata ndodheshin në botë. 4-Udhëheqës i madh i arvanitasve, veprimtar i palodhur në gjithçka që i shërbente indentitetit arvanitas; organizator i veprimtarive për mbajtjen gjallë të kulturës e traditave të popullit të vet. 5-Përkushtimi i jashtëzakonshëm për ngritjen e dinjitetit të shqiptarëve të Greqisë për të cilën la cdo gjë, dhe profesionin e avokatit, dhe u mor tërësisht me kërkime e studime në fushën e kulturës popullore dhe historisë. 6-Studiues që solli vepra voluminoze që bëjnë histori, mjaftojmë të kujtojmë “Arvanitët dhe prejardhja e grekëve”, që ka njohur mbi 14 botime dhe që konsiderohet si bibla e arvanitasve, vepër që ka hyrë në çdo shtëpi shqiptare dhe me fakte historike të ngjall krenarinë e të qenit shqiptar. Edhe “Gjuha e perëndive” është një vepër studimore që sjell argument që gjuha shqipe është vazhdimësi e gjuhës ilire dhe si një gjuhë të cilën e flisnin perënditë e Olimpit, çfarë e bën krenar çdo shqiptar në botë. 7- Publicist i madh, mbrojtës i patundur i kauzës së shqiptarëve në Ballkan, mbrojtës i shqiptarëve të Kosovës, për të cilën shkroi dhe veprën “Greqia në kurthin e serbëve të Millosheviçit” Athinë 1995, përkthyer edhe në shqip. 8-Njeriu i paqes, megjithëse luftëtar i madh i kauzës së kulturës dhe dinjitetit të popullit të vet, ai dëshironte që në mes të dy popujve më të vjetër në Ballkan të kishte miqësi e mirëkuptim, sepse vetë popujt kurrë nuk janë burime luftërash ata më së shumti e pësojnë prej politikës së mbrapshtë të kastave e qarqeve ekstremiste. 9- Sakrifikoi gjithçka për kauzën në të cilën besonte, pa kursyer asgjë, madje edhe jetën e tij, sepse gjithmonë jetoi nën kërcënime deri me vdekje, por kurrë nuk u zmbraps e kurrë nuk u mposht. 10- Figura e tij madhore, krenaria e tij për prejardhjen shqiptare, është sot një burim frymëzimi për të gjithë shqiptarët e Greqisë, por edhe në mbarë botën. Mbi figurën e Aristidh Kolës folën Vasil Premçi, Kujtim Dashi, Natasha Lushaj, Farida Ramadani që kishte ardhur nga Shkodra, Riza Braholli,Naum Kule- kryetar i shoqatës “Myzeqeja”, Dhimitër Xhoga, Namik Selmani, Agron Çalliku dhe Artur Zadrima ish-emigrant në Greqi. Në këtë takim u recituan edhe krijime kushtuar Aristidh Kolës, të autorëve Kolec Traboini, Sazan Goliku, Robert Goro, Arben Llalla, Xheladin Mjeku, Arqile Gjata, Sotir Goxhaj, Bardhosh Xhelaj si dhe elegji popullore arvanite. Pjesëmarrësit u informuan edhe për përhapjen e menjëhershme të kësaj nisme në tërë trevat shqiptare. Në Prishtinë kemi nismëtarë figurat e njohura atdhetare, Hydajet Hyseni, dhe Ismet Hajrullahu, në Prizren Neriman Braha dhe Nexhmi Lajqi, në Tetovë kemi nismëtar historianin Arben Llalla, i cili e ka njohur nga afër Aristidh Kolen dhe ka shkruar një libër për të. Në Tiranë ku lindi kjo nismë, Kolec Traboini dhe Pandeli Koçi. Nismëtarët e Prishtinës në bazë të njoftimeve nga Ismet Hajrullahu shprehin dëshirën e organizimit të një konference shkencore kushtuar jetës e veprës së Aristidh Kola. Së shpejti do të kemi një takim të grupeve nismëtare që mendohet të organizohet në Prishtinë, por edhe në qytete të tjera të Shqipërisë dhe Kosovës.
Informacioni u shpërnda nga grupi
“Miqtë e Aristidh Kolës”. 18 tetor 2015
http://traboini1.blogspot.al/2015/10/nisem-per-aristidh-kolen-nderi-i-kombit.html

Flet “Miss Queen of the Europe” dhe “Miss fotozhenia”

by

PERSONAZH/ Flet modelja Amina Shena, “Miss Queen of the Europe” dhe “Miss Fotozhenia”/
-Jam shumë ekspresive dhe mendoj, se sytë janë tipari që më veçon nga të tjerat/
-Të jesh e bukur të ndihmon, por nuk është arma kryesore për të ecur në jetë/
– Dashuria është një marrëdhënie dypalëshe që shkrihet në një trup të vetëm/
Nga Albert Z. ZHOLI/
Karrierën si modele e ka filluar që në moshën 15-vjeçare. Ka sfiluar dhe pozuar për firma te ndryshme, kalendarë, reklama. Në vitin 2009 mori pjesë në një konkurs bukurie, ku u vlerësua me çmimin “Miss Queen of the Europe” dhe “Miss fotozhenia”. Së fundmi ka qenë pjesë e një formati televiziv.
– Në sa sfilata keni marrë pjesë dhe si e kujtoni sfilatën tuaj të parë ?
Unë kam qenë pjesëmarrëse në shumë sfilata.
Sfilata ime e parë ka qenë në vitin 2009, ku unë kam qenë vetëm 15 vjeç dhe në këtë sfilatë dola si modelja me e duartrokitur.
-Cilat janë sfilatat më të preferuara në botën e modelingut për ju?
Mua më pëlqejnë të gjitha sfilatat, por do të veçoja sfilatat e “Victoria Secret “.
-Tashmë është rritur numri i modeleve shqiptare, a ndihet konkurrenca dhe sa e ndershme është kjo konkurrencë?
Unë deri tani nuk e kam ndjerë konkurrencën.
-Cilat janë pikat e tua më të forta si modele?
Bëhem njësh me aparatin. Jam shumë ekspresive dhe mendoj që sytë janë tipari që më veçon nga të tjerat.
-Imazh i kujt firme do të preferonit të ishit?
Imazhi i Versace edhe DG nuk do ishte keq.
– Përse tregu shqiptar i modelingut ende është shumë i ngushtë?
Në Shqipëri fatkeqësisht bota e modelingut është ende në hapat e para, kjo është arsyeja se nuk ka shumë mbështetje, por jo se mungojnë talentet dhe dëshira për të zhvilluar modelingun.
-Çdo të thotë te jesh e bukur dhe nëse ndihesh e tillë, cili është koncepti juaj lidhur me bukurinë?
Bukuria pa zgjuarsinë është pa vlerë për mua. Të jesh e bukur të ndihmon, por nuk është arma kryesore për të ecur në jetë .
-Cila është veshja e preferuar, sportive apo klasike?
Në veshjet e përditshme do të preferoja një veshje sportive, ndërsa për raste, normalisht diçka klasike.
-Cilat janë synimet tuaja?
Synimet e mia janë që të arrij të bëhem e famshme dhe në arenën ndërkombëtare aty.
-A jeni e dashuruar dhe cili është mendimi juaj për dashurinë?
Natyrisht jam e dashuruar dhe mendoj që dashuria është diçka sublime, ndjenja me e bukur, një marrëdhënie dypalëshe që shkrihet në një trup të vetëm.
-Ku i bëtë pushimet verore ?
Pushimet verore i bëra në Dhërmi. Adhuroj kaltërsinë e detit Jon dhe mrekullitë që na ofron Riviera Shqiptare, sepse është një vend i bukur dhe më pëlqen .
-Më mirë në dimër apo në verë?
Çdo stinë ka bukurin e vet, por mua me pëlqen me shumë vera .

NEW YORK, Dy Stiliste Shqiptare në “Java Ndërkombëtare e Fustaneve Martesore 2015”

by

Modelja shqiptare me banim në Nju Jork, Lola Luma, ka prezantur koleksionin e fustaneve të nusërisë së firmës angleze Venus Bridal UK, kurse sitlistet e njohura Katerina Boci dhe Ilmika Kulla, koleksionet e tyre 2015 të fustaneve të nusërisë/
Nga Beqir SINA – New York/NEW YORK CITY : 10-12 tetor kanë qenë dy ditët, e muajit që mbushet me dasma dhe që pamë më shumë veshjet martesor nga disenjatorët e gjithë bota, e ashtuquajtur si “Java Ndërkombëtare e Fustaneve Martesore” në qytetin e Nju Jorkut, e cila u zhvillua lagjen turisitike në Pier 94 në limanin kryesorë të qytetit.
Një prej evenimenteve më të mëdha të fustaneve të bardha të nusërisë, i mbajtur çdo vit në Romë, Parsisë, Londër, Berilin, Amsterdam, erdhi në metropolin e botës qytetin e New Yorkut, si një përpjekje, për të nxjerrë në pah stile të freskëta të reja për veshjet dhe fustanet martesore të vitit, shkruan shtypi njujorkez.
Kjo, pasarel e bukur mode, simbas tyre gjithashtu, është bërë një mënyrë e përshtatshme për shitësit, dhe blerësit anembanë Amerikës, dhe botës – ku desinjersit, nuset e reja, revistat rozë dhe shtypi kulturor dhe artistik, “hedhin” sytë në një super “dyqan” ku çiftet e reja kërkojnë, një prirje nga më të fundit për veshjen e ardhshme martesore.
Java Ndërkombëtare e Fustaneve Martesore – e këtij viti, është e ndryshme, sipas disa eksperteve të modes duke nisur nga tendencat e reja në veshjet martesore për këto dy muaj – por, edhe për ato martesa që do të vinë vitin e ardhshëm. “Disa mund të mendojnë se këto fustane martese janë të çuditshme, të tjerët mund të mendojnë se ato janë krijuese dhe unike për një suprizë”.
Trendi më i madh këtë vit, thanë ata është për veshje fustane martesore pa krah me një dekolte të theksuar dhe të hapura komplet në shpinë.
Ndërsa, një tjetër tendencë e dukshme thanë modelistët është që fustanet të jenë sa më të hapura dhe të çara shumë deri në “ekstrem” në pjesën e poshtme. Këto shihen përmes disa fustaneve të martesës të sjellë me një grimë të ri, që luajnë dhe të vën në lojë, duke i bërë nuset të duken sexy dhe konservatore në të njëjtën kohë.
Këtë vit në sfilatën e modës së fustaneve të nusërisë ka marrë pjesë edhe Lola Luma, vajza shkodrane, e cila ka mahnitur gjithnjë e më shumë me bukurinë dhe sharmin e saj.Modelja shqiptare me banim në Nju Jork, Lola Luma, ka prezantur koleksionin e fustaneve të nusërisë së firmës angleze Venus Bridal UK, në Nju Jork : “Java Ndërkombëtare e Fustaneve Martesore 2015” – “ New York International Bridal Week 2015”
Simbas faqes së saj – në internet në këtë javë – në festivalin e fustaneve të nusërisë ka në Nju Jork : “Java Ndërkombëtare e Fustaneve Martesore 2015” – “ New York International Bridal Week 2015”, ka marr pjesë edhe firma e njohur Katerina Bocci Couture.
Stilistja shqiptare, Katerina Boci vajza nga Lushnja, që gjeti ëndrrën në SHBA, dhe e ka ndarë jetën e saj mes Detroitit dhe New Yorkut të famshëm. Bocci, shkruan shtypi njujorkez, do të niste prezantimin e saj në këtë “botë marramendese” të prezantimit të fustaneve të bardha të nusërisë, me disa fustane martesor luksoze, nga koleksionin e saj i madh në festivalin New York Bridal Fashion Week 2015.
Bocci debutojë kësaj rradhe me koleksionin e saj të shtatë dhe bëri një prezantim “solo” në ora 10 ditën e diel, më 12 tetor me një spektakel mahnitës në “pistën” e pasarelave në London Hotel (151 West 54th Street), nëë New York City.
Kurse, një burim shqiptar në statusin e tij – në rrjetin social facebook, shkruan se në këtë festival në Nju Jork : “Java Ndërkombëtare e Fustaneve Martesore 2015” – “ New York International Bridal Week 2015”, ka pasur një paraqitje ekskluzive, duke shfaqur modelet e saj unike dhe artistija, nga Kenktiket (Connecticut) shqiptarja Ilmika Kulla.
Ilmika Kulla – u lind dhe 1987 në Berat, Shqipëri, dhe u zhvendos në Shtetet e Bashkuara në vitin 1998, shkruhet në statusin e saj në facebook. Nga mosha e re Ilmika, thuhet se ishte i interesuar në art dhe veçanërisht në pikturë dhe disanjë për modlet e fustanve të grave. Ajo është diplomuar në Connecticut State University me një diplomë të Arteve të Bukura, dhe ka një përqendrim në historinë e artit botëror.
Ndërsa, pikturat janë dashuria e saj e parë, Ilmika është gjithashtu një stilistee apasionuar, e specializuar në veshjet luksoze dhe me shije të femrave.