Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Studentët shqiptarë në Berlin, pritje publike për Joseph DioGuardin dhe LQSHA

by

Studentët shqiptarë në Berlin organizojnë një pritje publike për DioGuardin/

Ne fundjave Presidenti i Liges Qytetare shqiptaro-Amerikane, Joseph DioGuardi udheton drejt Berlinit, ku studentët shqiptarë do t’i ofrojnë një pritje të ngrohtë publike. Në një njoftim derguar për Gazetyën Dielli nga shoqata e studenteve OASA, shkruhet:Kemi nderin të ju informojmë për një manifestim për ditën e Diel, me datën 20. mars 2016 në Universitetin Teknik në Berlin, ku do të mirëpritet një delegacion i Lidhjes Qytetare Shqiptaro-Amerikane (LQSHA) nga SHBA, në krye me Joseph J. DioGuardin.
Ky manifestim organizohet nga studentët dhe alumni shqiptarë nga Gjermania. Organizimi përmban mirënjohje dhe nderime publik për Joseph J. DioGuardin, bashkshorten e tij Shirley Cloyes dhe drejtoret e LQSHA, ndër ta Faton Bislimi.
Një artikull përgaditur për shtyp të redaktuar gjeni bashkangjitur në këtë Mail
të cilin mund ta publikoni sipas vlersimit tuaj.

Për informacione shtesë në lidhje me këtë aktivitet si dhe për t’u regjistruar si pjesëmarrës, vizitoni webfaqen zyrtare të OASA-s: www.oasa.berlin

***

Studentët shqiptarë në Berlin organizojnë një pritje publike për DioGuardin

Nën organizimin e OASA e.V, Organizatës së Studentëve dhe Almuni Shqiptarë në Berlin, të dielen më 20 Mars duke filluar në orën 12:00 në ambientet e Universitetit Teknik të Berlinit (Str. des 17 juni, 133, Instituti i Kimisë), do të pritet delegacioni i udhëhequr nga ish-Kongresmeni Joseph DioGuardi dhe znj. Shirley Cloyes, respektivisht Kryetar dhe Këshilltare për Cështje të Ballkanit, të Ligës Qytetare Shqiptaro-Amerikane, në nderim të punës mbi çerekshekullore të lobit shqiptar në Shtetet e Bashkuara të Amerikës.

“Ne jemi të lumtur, që në mesin tonë të dielën, do të kemi dy figura kyçe të historisë kombëtare siç janë z. DioGuardi dhe znj. Cloyes. Ish-Kongresmeni DioGuardi është simbol i luftës së parezervë lobiste dhe diplomatike për kauzën kombëtare shqiptare dhe gurthemel i miqësisë moderne shqiptaro-amerikane,” ka thenë Agon Kamberi, udhëheqës i OASA-s. Roli I rendësishëm që lobi shqiptar në SHBA ka luajtur është i paçmueshëm. “Ne ndihemi krenar të mirëpresim delegacionin nga Amerika në krye me z. DioGuardi,” ka shtuar Kamberi.

Ndërsa, një ndër anëtarët e Bordit të Ligës Qytetare Shqiptaro-Amerikane, profesori Faton Bislimi, i cili ka organizuar visitën e DioGuardit në Berlin, ka theksuar se pa përkushtimin vetëmohues të diasporës shqiptare kudo në botë, e vecanerisht asaj në SHBA, Kosova nuk do të ishte shtet i pavarur e i lirë në miqësi të vërtetë më SHBA-në, a as Shqipëria nuk do të ishte një demokraci dhe anëtare e NATO-s. “Përkundër këtyre arritjeve, ne në vazhdimësi punojmë me miqët tanë në Kongresin dhe Administratën e SHBA-së për të çuar përpara cështjen shqiptare ne Maqedoni, Mal të Zi, edhe Luginën e Preshevës,” ka thënë Bislimi.

Përpos takimit publik të së dielës, ku të gjithë të interesuarit janë të mirëpritur, delegacioni nga Amerika do të ketë edhe takime tjera në Berlin me zyrtarë gjermanë. “Ne u jemi thellësisht mirënjohës Organizatës së Studentëve dhe Alumni Shqiptarë në Berlin për punën e palodhur në organizimin e këtij evenimenti, ku fjalime do të mbajnë z. DioGuardi, znj. Cloyes, fjalime të cilat do të ndiqen nga një diskutim me publikun, nën moderimin e znj. Vjollca Hajdari,” ka shtuar Bislimi, duke potencuar edhe ndihmesën e madhe që ka dhënë Kompania Ecolog International e drejtuar nga z. Lazim Destani për realizimin e kësaj vizite të delegacionit të kryesuar nga DioGuardi në Gjermani.

“Gjeneratat e reja shqiptare kudo që janë, e vecanerisht ato në diasporë, sikur ne në Gjermani, nuk duhet asnjëherë të harrojnë të kaluarën dhe kontributin e atyre, duke përfshirë këtu edhe figurën historike të DioGuardit, që bënë të pamundurën për kombin tonë. Historia jonë ka qenë e mundimshme, por duke e njohur atë sa më drejtë, ne po ndërtojmë një të ardhme më të qartë.” ka përfunduar Kamberi.

Për informata shtesë në lidhje me këtë aktivitet si dhe për t’u regjistruar si pjesëmarrës, vizitoni webfaqen zyrtare të OASA-s: www.oasa.berlin

Diaspora – Rinia shqiptare në Turqi, e vendosur për ruajtjen e identitetit kombëtar

by

-Themelohet rrjeti për të rinjtë dhe studentët në Republikën e Turqisë. Takim me përfaqësuesit e më shumë se 20 shoqatave shqiptare në Stamboll dhe rrethinë/

PRISHTINË, 14 Mars 2016/ Ministria e Diasporës e Qeverisë së Kosovës  ka dërguar sot këtë njoftim:

Angazhimi më i madh i rinisë dhe  i studentëve, si brez i ardhshëm i liderëve, është i domosdoshëm. Shqiptarët janë njohur në botë si një komb me rini kreative, inteligjente dhe punëtore, duke ia shtuar këtyre edhe numrin e madh, me të cilin përfaqësohen.Ministria e Diasporës, në kuadër të përgjegjësive e përmbushjes së objektivave dhe planit të veprimit që dalin nga Ligji i Diasporës dhe Mërgatës, si dhe Strategjia për Diasporën dhe Mërgatën, e ka iniciuar themelimin e rrjetit për të rinjtë dhe studentët në Republikën e Turqisë, në Stamboll,  rrjet ky që do të iniciojë bashkëpunimin ndërmjet shoqatave të të rinjve dhe studentëve në Turqi. Më pas, ky bashkëpunim do të bartet edhe në vendet e tjera të botës.Ky rrjet u krijua në praninë e rreth 20 përfaqësuesve të shoqatave të ndryshme rinore në Turqi dhe individëve, në mesin e të cilëve i pranishëm ishte edhe kampioni i Turqisë në pingpong, si dhe studentë të tjerë ekselentë në fushat e tyre përkatëse.

Pas një diskutimi dy orësh, në ambientet e një biznesi të suksesshëm shqiptar, u krijua edhe grupi koordinues prej 11 vetash, të cilët në një të ardhme të afërt do ta themelojnë edhe strukturën e rrjetit.Sekretari i Përgjithshëm i Ministrisë së Diasporës, Osman Shahini, bashkë me konsullin e përgjithshëm të Republikës së Kosovës në Stamboll, Rrahim Morina, dhe u.d. drejtori i Qendrës Kulturore në Turqi, Qamil Bytyqi, e përshëndetën organizimin, duke porositur se rinia shqiptare në diasporë është një fuqi e madhe si intelektuale, ashtu edhe artistike, dhe kjo fuqi, pasi të bashkohet, duhet të shfrytëzohet për ngritjen e kapaciteteve dhe fuqizimin e pozitës të të rinjve në vendet ku jetojnë.Po ashtu, sekretari i përgjithshëm i Ministrisë së Diasporës, Shahini, mbajti një takim me përfaqësuesit e më shumë se 20 shoqatave shqiptare në Stamboll dhe rrethinë, të cilët i njoftoi për punën e Ministrisë së Diasporës, në veçanti në ruajtjen e identitetit dhe gjuhës, për çfarë edhe kërkoi angazhim nga shoqatat që t’i japin prioritet sensibilizimit për mësimin e gjuhës shqipe nga diaspora shqiptare në Turqi.“Ruajtja e identitetit është një hallkë e rëndësishme e punës së Ministrisë. Por, ajo që,  po ashtu, është  e vlefshme është potenciali ekonomik për ata që mësojnë gjuhën shqipe”, theksoi Shahini, duke cekur shembuj të investitorëve të ndryshëm nga Turqia në Kosovë dhe të atyre që mbajnë pozita të larta në organizata ndërkombëtare në Kosovë e Shqipëri e që kanë prejardhje shqiptare.Në anën tjetër, konsulli i përgjithshëm i Kosovës në Stamboll, Morina, theksoi kontributin e diasporës shqiptare në ndihmën dhënë Kosovës para, gjatë dhe pas luftës./b.j/

DIASPORA- Mësimi i shqipes në Greqi

by

Federata e Shoqatave Shqiptare në Greqi hapi një tjetër shkollë të gjuhës shqipe në qytetin e Artemisës, në zonën e Atikës në Greqi.
Në Ditën e 7 Marsit, Federata tha se, shkolla ishte kontribut i mësuesve të komunitetit të emigrantëve shqiptarë që jetojnë në këtë zonë. “Është detyrim i të gjithëve ,u shpreh Kryetari i Federatës Edmond Guri, të përpiqemi për hapjen e sa më shumë kurseve të mësimit të gjuhës shqipe dhe të ruajmë identitetin kombëtar shqiptar “. Disa kurse të mësimit të shqipes funksionojnë prej 15 vitesh në disa qytete të Greqisë, ndërkohë që nevojat e fëmijëve të komunitetit të emigrantëve shqiptarë për të ruajtur gjuhën amtare janë të mëdha. Lidhja e Mësuesve Shqiptarë në Greqi dhe organizata të tjera kanë shprehur nevojën e mbështetjes me tekste mësimore dhe bazë materiale nga Ministria shqiptare e Arsimit. Në qytetin e Selanikut, Shoqata Nënë Tereza organizoi një ceremoni festive me prindër dhe fëmijë për 7 Marsin. Mësuesit e gjuhës shqipe u kërkojnë autoriteteve shqiptare që të kthejnë vëmendjen nga mbështetja e këtij komuniteti. Kriza ekonomike në Greqi e ka vënë në vështirësi komunitetin e emigrantëve shqiptarë që emigroi në këtë vend pas viteve nëntëdhjetë. Brezi i parë i fëmijëve të emigrantëve shqiptare është përballur me sfidën e ruajtjes dhe mësimit të gjuhës shqipe. Ndonëse nuk ka të dhëna zyrtare, vlerësohet se në dhjetëra kurse të mësimit të shqipes të hapura ne Greqi nga vetë komunitetet e shqiptarëve mësojnë çdo vit rreth 1500 fëmijë shqiptarë. Gjithsesi duhet të na shqetësojë numuri i pakët i fëmijëve shqiptarë që mësojnë shqip në Greqi, pasi këtu ndodhet shumica e emigrantëve shqiptarë mbas viteve ’90, ndërkohë që afërsia me fqinjin jugor, favorizon transportin e teksteve me cdo mjet e rrugë, s’është njëlloj si të cosh një abetare në SHBA dhe në Greqi.

Në Kolegjin Sankt Blasien- aty ku gërshetohen dija, tradita dhe kultura e punës

by

Shkruan: Enver Sulaj/

Një orë e gjysmë rrugë me veturë nga aeroporti i Baselit,  ndodhet qyteti i vogël St. Blasien (Sankt Blasien), në distriktin Waldshut, në landin e Baden-Vyrtembergut në Gjermani. I rrethuar nga kurora e malit ShWarcvald, në një lartësi mbidetare mbi 800 m, njeriu e ndjen bukurinë dhe qetësinë, që të imponon natyra e mrekullueshme. Në këtë qytet ndodhet Kolegji i njohur St. Blasien, historiku i të cilit nis në vitin 1596, kur shkolla filloi punën në Freiburg (Zvicër), u zhvendos në Feldkirch të Austrisë, në vitin 1856 dhe së fundi, në St. Blasien, në vitin 1934. Pas Luftës së Dytë Botërore, shkolla u rihap në vitin 1946, ndërsa sot nami i saj shtrihet në mbarë Evropën. Studentë nga më shumë se 20 vende vijnë në këtë kolegj, kryesisht për të studiuar gjuhën gjermane, por edhe gjuhën kineze dhe gjuhët klasike-latinisht e greqisht.

Kolegji Sankt Blasien ka një bashkëpunim të shkëlqyeshëm me “Loyola- Gymnasium”, në Prizren,  të cilin e ndihmon në fushën e trajnimit të mësimdhënësve. Njeriun e parë që takoj në aeroportin e Baselit, është profesori P. Leutenstorfer, i cili pasi më dëshiron mirëseardhje, nisemi drejt Sankt Blasienit. Me gjithë vitet, ai shquhet akoma për përkushtimin dhe disiplinën në punë. Është kënaqësi dhe rast i jashtëzakonshëm për mua, që të ndjek aty për dy javë ligjëratat e tij për gjuhën latine, në një kurs intensiv. Erudicioni, njohja e shkëlqyeshme e gjuhëve klasike, latinisht e greqisht, e bëjnë atë një enciklopedi të vërtetë. Ai me shumë dashuri shpreh mendimet e e tij për veprat e shkrimtarëve romakë, bëmat e ushtarakëve e pushtimet e tyre, për të ofsharë shpesh: Lufta është e keqe, nuk sjell gjë të mirë. Të gjitha perandoritë janë zhdukur, sado të kenë arritur lart, -thotë Leutenstorfer. Nuk na ikën gjatë ligjëratave edhe analiza etimologjike e fjalëve shqipe dhe ndikimi i latinishtes, ndikimi i greqishtes, etj. Ai ka përkthyer tekste të shumëta nga latinishtja e greqishtja në gjermanisht dhe mban leksione për studentë në gjuhët klasike e gjermane. Ai, poashtu është një bashkëpunëtor dhe mik i madh “Loyola- Gymnasium”, të cilin e viziton në mënyrë periodike, për të transmetuar te nxënësit dhe profesorët përvojën e tij të gjatë jetësore në fushën e dijes e të kulturës. Por, çdo punë e suksesshme, sigurist që lidhet me drejtuesin, andaj pa mbështetjen e drejtorit të “Loyola- Gymnasium“ P. Axel Boedefeld, nuk do të ihhte i mundur ky trajnim dhe kjo përvojë e arritur.

Pas leksioneve intensive për afër dy javë, bëhem gati për t’u kthyer në Kosovë, në “Loyola- Gymnasium”, në mesin e kolegëve e kolegeve e nxënësve të mi.

Një intelektual shqiptar në vitet ’30, në një libër të tij thoshte se popujt që janë çliruar vonë, e kanë më lehtë për të ecur shpejt- sepse kanë modelet e gatshme për të organizuar jetën e tyre. Gjermania për ne duhet të jetë, jo vetëm një vend ku shumë qytetarë drejtojnë sytë për të emigruar, por si model se si të punojmë për veten dhe pasardhësit tanë- për një jetë më të mirë e më të lumtur.

Gjatë tërë rrugës deri në aeroportin e Baselit, që shfrytëzohet nga tri shtete, Gjermania, Franca e Zvicra, bie dëborë vazhdimisht, sa për të na treguar se dimri akoma nuk ka ikur. Por, jeta këtu vazhdon me ritmin e rregullt, kultin për punën e respektimin e vlerave njerëzore- si kusht për të ndërtuar një të ardhme më të mirë e në paqe për të gjithë.

Sankt Blasien,

shkurt 2016

Takim i rëndësishëm me rektorin e Universitetit të Lundit

by

MERGATA NE SUEDI- Pos të tjerash përfaqësuesit e SHSHKSH “ Papa Klementi i XI Albani”të Suedisë shtruan nevojën e gjetjes së mundësive për financimin e një numri studentësh shqiptar për të magjistruar dhe doktoruar në këtë shtet/

Shkruan: XHAVIT ÇITAKU*/

Në kuadër të shumë aktiviteteve të pasura e përmbajtësore që po zhvillon Shoqata e Shkrimtarëve dhe Krijuesve Shqiptar “Papa Klementi i XI Albani” e Suedisë nga fushveprimtaria e saj, përfaqësuesit e kësaj shoqate punë të madhe po bëjnë edhe në kontaktet që po zhvillojnë me institucione të rëndësishme në shtetin suedez. Kësisoj, para disa ditësh kryetari i kësaj shoqate, z. Hysen Ibrahimi, dhe Saranda Iseni, nënkryetare, zhvilluan një bisedë të rëndësishme me rektorin e Universitetit të Lundit, z. Frederik Sjoholm. Takimi i zhvilluar me këtë rast ishte mjaft miqësor, por edhe përmbajtësor. Temë kryesore e këtij takimi ishte përgatitjet që po bëhen për mbajtjen e sesionit të pestë shkencor në një ndër sallat e këtij institucioni të lartë shkencor, të cilin do ta organizoj shoqata e shkrimtarëve e krijuesve shqiptar që vepron me sukses në këtë shtet të largët skandinav. Përfaqësuesit e kësaj shoqate, po ashtu, shtruan nevojën e gjetjes së mundësive materiale për financimin e një numri të studentëve shqiptar nga Shqipëria, Kosova dhe Tetova për të magjistruar dhe doktoruar në këtë tempull të diturisë. Rektori Sjoholm tha ndër të tjera se në fakultete dhe shkolla të larta të këtij universiteti studiojnë një numër i kënaqshëm i studentëve shqiptar dhe se shumë prej tyre janë të dalluar në mësime. Po ashtu, vazhdoi ai, nga ky universitet me sukses i kanë kryer studimet në fusha të ndryshme edhe shumë studentë shqiptarë.

Rektori i Universitetit të Lundit, z. Frederik Sjohlm, shprehu fjalë miradije edhe për aktivitetin e SHSHKSH” Papa Klementi i XI Albani”, e cila sipas tij po luan një rol të rëndësishëm në integrimin kulturor e shkencor të komunitetit shqiptar në shoqërinë suedeze si dhe të lidhjes së urave të bashkëbanimit ndërmjet Suedisë dhe viseve të ndryshme të Ballkanit. Duke ofruar një bashkëpunim të sinqertë tash e në të ardhmen, z. Sjohlm shprehu dëshirën që në sesionin e pestë shkencor të paraqitet me një kumtesë përmbajtësore dhjetë minutshe , të cilën e aprivuan përfaqësuesit e kësaj shoqate.

Në emër të shoqatës “ Papa Klementi i XI Albani” z. Hysen Ibrahimi falënderoj rektorin e Unversitetit të Lundit, y. Frederik Sjoholm për mbështetjen institucionale, por edhe për përkrahjen e tij morale e profesionale që dha, në rend të parë, për mbajtjen e sesionit të pestë shkencor në një ndër sallat e këtij tempulli të diturisë. Ai falënderoj edhe për mbështetjen materiale të Komunës së Lundit për mbajtjen e këtij sesioni në shumë prej 9000 koronash suedeze. Do theksuar se këtë takim arriti ta realizoj studentja e dikurshme e shkëlqyeshme e këtij universiteti, tani juriste e dalluar, Saranda Iseni.

Në fund do theksuar se Universiteti i Lundit është shtetëror, i cili punën e ka filluar me 19 dhjetor të vitit 1666. Pas Universitetit të Uppsales, ky institucion i lartë shkencor është më i vjetri në Suedi. Në të studiojnë mbi 47.700 studentë.

Ne Foto:Pamje ballore e Universitetit te Lundit ne Suedi