Politike – Page 419 – Dielli

Parisi i munguar në Tiranën e shallvareve

March 17, 2019 by dgreca

Nga Ilir Levonja

Pritshmëria për rrëzimin e Ramës sot ishte e madhe, por Rama po qësëndiset me të gjithë. Madje ri aplikoi kamerat me dron nga qielli, si e si ta zbehte protestën. Madje duke përdorur edhe webe oportunë ose as mish e as peshk.

Gjuajti me ligësi momentet a oraret. Dhe duke patur parasysh se gjatë gjithë këtyre ditëve u fol shumë për dhunë, skenarë rusë mbi destabilizimin e vendit etj., imazhin e Shqipërisë para sezonit turistik dhe çeljes së negociatave në qershor etj., me dashin amerikan dhe të tjera ambasada, duhet thënë se ia arriti qëllimit. Qe një protestë e vrullshme por që zgjati jo aq sa ajo e para. U dirigjua me kujdes farmaceutik që të shmangeshin provokimet, trazirat a të tjera, duke rënë plotësisht në pritshmërinë qeveritare. Apo policisë së sistemuar dhe kërcënuese dy herë më e fortë se në protestën e parë. Urrejtja e atyre në shesh ishte më e fortë se e liderve, megjithatë nuk triumfojë. Kushdo që mendon se ka një balancim mes lidershipit dhe protestuesve gabon, deri sa Rama ia hodhi edhe kësaj radhe. Se në raport me komunitetin europian, qytetarin e saj, Parisi i sotshëm përshembull u mbush tym e zjarr, nga jelekët e verdhë kurse Tirana nga policia e shtetit të Edi Ramës. Megjithatë tani studiot po përgatisin të nxjerrin të njëjtit surretër, të njëjtët fadroma plot xhel, të njëjtit shenjtorë të informalizmit dhe do flasin si zakonisht se a kish dhunë apo jo? Se, fitoi apo humbi Rama? Se e dënoi apo jo ambasada e iks shteti protestën, djegien e mandateve etj. Një kakoni Shqipërie të cilën kërkush tjetër pas Enver Hoxhës, si ky Edi Rama nuk e ka kthyer të gjithën në një front social demokratik. Tjetër ishte urrejtja e tyre në shesh, urrejtje faturash ilaçesh, urrejtje papunësie, urrejtje budallepsje, urrejtje sehirxhinjsh.

Megjithatë askush nuk e percepton dot Parisin, askush nuk krahasohet, askush nuk gjykon si atje, por i referohen ambasadës së pariszienëve, deklarateve të dhunshme pa bërë dhunë. I stepen aludimeve mbi skenarët rusë, i nënshtrohen unit provincial se sa ka bërë unë për ty, apo ti të ma punosh mua kështu e ashtu. Drejt një evaziviteti që i ngjan një dënimi që kurrë nuk ka për t’u zbatuar. Dhe ky jo nga Edi Rama dhe rilindja, por nga mos dakortësia e lidershipit me turmën.

MBËSHTETJA E FORTË AMERIKANO-GJERMANE PËR NATO-n PËRBALLË KËRCËNIMIT RUS

March 15, 2019 by dgreca

Nga Frank Shkreli

Sipas një studimi të kohëve të fundit nga firma amerikane e sondazheve, Gallup, Inc., 52% e amerikanëve e konsiderojnë fuqinë ushtarake të Rusisë si një “kërcënim serioz” ndaj interesave jetike të Shteteve të Bashkuara, ndërkohë që Rusia zë vendin e parë në listën e vendeve që amerikanët i konsiderojnë si “armiq kryesorë” të Shteteve të Bashkuara. I njëjti studim thekson, njëkohësisht, se 73% e amerikanëve kanë mendime jo të favorshme për Rusinë. Si përfundim, thuhet në raportin e entit Gallup, Rusia është tani vendi që shumica dërmuese e amerikanëve e konsiderojnë si vendin armik numër një të interesave amerikane. Sondazhi nenvijon se këto prirje në qëndrimin e amerikanëve ndaj Rusisë dhe politikave të saj, sidomos në fushën ndërkombëtare, janë venë re edhe para se televizioni shtetëror rus identifikoi, kohët e fundit, instalimet ushtarake amerikane të cilat do të ishin objekt agresioni në rast të një sulmi të mundëshëm bërthamor kundër tyre, nga ana e Rusisë.

Nuk është për tu habitur atëherë që në një atmosferë të tillë mosbesimi nga ana e amerikanëve ndaj Rusisë dhe qëllimeve të saja armiqësore kundër Shteteve të Bashkuara, që mbështetja për Aleancën e Atlantikut Verior, NATO është shumë e lartë në radhët e amerikanëve. Bazuar në një sondazh tjetër të firmës Gallup mbi mbështetjen që gëzon NATO-ja në Amerikë, 77% e amerikanëve mendojnë se NATO-ja duhet të vazhdojë të ekzistojë, ndërkohë që 66% e amerikanëve shprehin mbështetje edhe për Organizatën e Kombeve të Bashkuara, si një ent i nevojshëm ndërkombëtar për zgjidhjen e problemeve botërore, sipas të njëjtit sondazh.

Dihet se Presidenti Trump kishte shprehur skepticizmin e tij për ndihmat amerikane për organizatat ndërkombëtare, përfshirë NATO-n, gjatë fushatës për president dhe më vonë. Ai kishte venë në dyshim edhe nevojën për ekzistencën e NATO-s, një qëndrim ky që në atë kohë u kritikua ashpër nga evropianët dhe nga Senati Amerikan. Por, ky sondazh i kohëve të fundit, tregon qartë gjithashtu se edhe shumica e amerikanëve mendojnë ndryshe nga presidenti i tyre në lidhje me nevojën për ekzistencën e Aleancës më të fortë politiko-ushtarake që ka njohur ndonjëherë bota dhe e cila ka ruajtur paqn në Evropë për 70-vjet, pas Luftës së Dytë Botërore. Ndërkohë që pikëpamjet e Presidentit Trump ndaj NATO-s dhe Kombeve të Bashkuara duket se kanë ndryshuar me kohë. Ai nuk ve në pyetje më nevojën për ekzistencën e NATO-s dhe të OKB-së, por ngulë këmbë që të gjitha vendet anëtare të kontribojnë 2%, për mbrojtjen e përbashkët siç është rasti i vendeve anëtare të NATO-s dhe që vendet anëtare të OKB-së të japin kontributin e tyre për të mbajtur gjallë këtë organizatë. Realiteti në detyrën e presdientit të përballimit me zhvillimet e papritura në arenën ndërkombëtare, shpeshëherë shkaktojnë që të hidhen poshtë perceptimet e vjetra dhe të ndryshojnë pikëpamjet edeh të një preisdenti. Në një vend demokratik si Shtetet e Bashkuara është e pamundur që një president të ndjekë dhe të mbështesë qendrime dhe politika — qofshin të mbrendëshme apo të jashtme – në kundërshtim me vullnetin e një shumicë aq dërmuese të popullit amerikan, siç është sot mbështetja e shprehur prej 77% e amerikanëve për Aleancën e NATO-s. Sondazhi i firmës Gallup ve në dukje gjithashtu se mbështetja e amerikanëve për NATO-n është e fortë si në radhët e republikanëve ashtu edhe demokratëve, por edhe në radhët e atyre që nuk bëjnë pjesë në këto dy parti.

Studimi në fjalë thekson edhe mbështetjen e fortë të amerikanëve për Organizatën e Kombeve të Bashkuara, e cila sipas amerikanëve ajo luan gjithnjë një rol të dobishëm dhe të nevojshëm në botë. 86% e demokratëve amerikanë mbështesin OKB-në duke shprehur mendimin se roli i organizatës ndërkombëtare është edhe sot i nevojshëm, ndërsa 66% e atyre që nuk i përkasin asnjë partie dhe 49% e republikanëve amerikanë mendojnë se OKB-ja luan ende një rol të rëndësishëm. Gallup ve në dukje se mbështetja e fortë dhe e vazhdueshme për NATO-n dhe OKB-në, madje edhe në periudhën e platformës politike, “Amerika e para” e presidentit Trump, amerikanët e të gjitha prirjeve politike vlerësojnë rolin që luajnë organizatat dhe institucionet ndërkombëtare për zgjidhjen e problemeve me të cilat përballet bota.

Ndërkaq, eshte matur mbështetja për NATO-n edhe në Gjermani. Megjithë ndryshimet që ekzistojnë midis amerikanëve dhe gjermanëve mbi çështje të ndryshme ndërkombëtare dhe në marrëdhëniet dypalëshe, ata ndajnë mendime pothuaj të njëjta përsa i përket Aleancës NATO, si dhe Rusisë e Kinës, njoftojnë Qendra Amerikane Pju e sondazheve dhe enti gjerman Korber-Stiftung. Sipas këtij sondazhi, gjermanët ashtu si amerikanët mbështesin fuqishëm Aleancën e NATO-s. Si në Gjermani ashtu edhe në Shtetet e Bashkuara, sipas këtij sondazhi, mbështetja mbetet e lartë për NATO-n, madje edhe pas përplasjes midis Presidentit Trump dhe Kancelares gjermane Merkel, në lidhje me shpenzimet ushtarake dhe për influencën ruse, në takimin e Aleancës Perëndimore në Bruksel, korrikun që kaloi.

Raporti i këtyre dy firmave të sondazheve — njëra gjermane e tjetra amerikane – rithekson faktin se mendimet e amerikanëve dhe të gjermanëve ndaj Rusisë vazhdojnë të jenë jo të favorshme dhe se pikëpamjet pozitive ndaj Rusisë, janë në nivelin më të ulët në Gjermani dhe në SHBA ç’prej vitit 2011, kur anë e mbanë Rusisë u mbajtën protestat popullore dhe pas akuzave për vjedhje të votave në zgjedhjet parlamentare të atij vendi, duke arritur një nivel edhe më të ulët, në vitin 2014, pas aneksimit të Krimesë nga Moska.

Thirrjeve të Presidentit Trump për rritjen e shpenzimeve ushtarake, Gjermania u është përgjigjur pozitivisht. Mediat gjermane kanë njoftuar muajin që kaloi se qeveria gjermane ka siguruar Organizatën e Traktatit të Atlantikut Verior se ka vendosur të rrisë gradualisht shpenzimet për mbrojtje, megjithë ngadalësimin e pritshëm të veprimtarisë ekonomike në Gjermani. Ashtu si edhe vendeve të tjera anëtare të NATO-s, Shtetet e Bashkuara i kanë bërë thirrje Gjermanisë që të shtojë shpenzimet ushtarake me 2% të ardhurave kombëtare (GDP), në përputhje me objektivin e caktuar nga vendet anëtare të NATO-s, në vitin 2014. Pritet që të gjitha vendet anëtare të NATO-s të realizojnë angazhimin e marrë përsipër që të rrisin, gradualisht, shpenzimet ushtarake me 2% deri në vitin 2024.

Dje (të enjtën), Sekretari i Përgjithëshëm i NATO-s, Jens Stoltenberg botoi Raportin Vjetor të Aleancës politiko-ushtarake që ai drejton, një “Aleance moderne që u përgjigjet kërcënimeve të sotëme ndaj sigurisë, që u adaptohet sfidave të reja dhe e cila investon për të ardhmen”, thuhet ndër të tjera në parathënien e raportit vjetor. Raporti shënon edhe 70-vjetorin e themelimit të NATO-s me një përspektivë historike të arritjeve dhe sukseseve të Aleancës ç’prej themelimit të saj në vitin 1949 e deri më sot, përfshirë antarësimin në NATO të ish-vendeve komuniste, dikur kundërshtare të saj.

Midis shekujsh kontraversial

March 14, 2019 by dgreca

NGA ALFONS GRISHAJ/

George Soros  është njënga filantropët më të mëdhenj në botë. Në listën e filantropëve Amerikanë radhitet i gjashti pas Bill Gate. Ndryshe me filantropët e tjerë, Bloomberg, Buffet, Zuckenberg, Sanford (duke mos përfshirë filantropët nëpër botë si, Princ Alwaeed Bin Talal apo ata të brezave më të hershëm si Alfred Nobel, John Rockfeller etj), dëshira e Soros  konsiston në skllavërimin e nevojës. Ai nuk nguron të ndihmojë, por ndihma duhet tëkanalizohet nështratin e kontraversit të pikëpamjeve të tij filozofike dhe politike. Duke qenë se, “filantropizmi” i tij ka njëdefinicion tëtillë, ka krijuar imazhin e garuzhdës në shumë vende të botës, përfshi këtu dhe vendin tim. Si urithi punon nëntokë për politikat e majta dhe pse filozofia e kapitalizmit  i solli pasurim  marramendës. Ai është  narcist dhe ksenoman, kontravers ky i rrallëqë  bën sojin e tij malignant përtej imagjinatës.
         Lindur nëHungari, por i shpallur“armik i shtetit”. Izraelit me origjinëpor gjithnjë në kundërvënie të politikës Izraelite duke propozuardy shtete atë Palestinez dhe Izraelit. Përkrahës i shpalljes së Pavarësisë të Dardanisë… nuk mungon qëcfurkun e djallit ta fusë në zemrën e politikës botërore, Amerikë. Teoricien i kapërcimit të krizave finaciare, Sorosit i numërohen edhe disa spekulime “të ligjshme” në adresë të disa monedhave europiane.
    Në kohën kur George W Bush, President i Amerikës ishte në garë për mandatin e dytë, e gjithë makina Sorosiane do të ngrihei në sulm kundër tij… Soros do ta quante“jetë a vdekje” largimin e Presidentit, dhe nëse e siguronte njeri se kjo arrihej, do e shkrinte gjithë pasurinë për këtë qëllim. Të njëjtën përpjekje të egër bëri dhe kundër Donald Trump, por padobi. Mjafton kjo paqyrëe shkurtër për t’ia hequr petkun falls të filantropit.
       Filantropizmi është shkalla mëe lartëe ndërgjegjes dhe përgjegjësisëmorale që, si thirrje altruiste sakrifikon më tëmundshmen për humanizëm. Filantropizmi është ajo veprimtari konkrete që ushtrohet në shërbim të shtresave dhe individëve në nevojë, për të zbutur plagët që shkaktojnë varfëria, insuficienca e institucioneve, fatkeqësitë, dhe gjithashtu ndihmon inovacionet në shërbim të njerëzimit, jo si qëllim në vetvete,  kurth këmbimi i shpirtit me materien.
      Nganjëherë Soros sillet si Shenjt, çfarë tregon kulmin e ironisëdhe fodullëkut, sepse të pasurit si ai, kanëpetkun e materies por jo shpirtin pelegrin të Shenjtit. Materia dhe shpirti nuk mund të bëhen kurrësimbiozëpermanente. Siddartha Gautama (Buddha), la mbretërinëe materies për të fituar pavdeksinëe shpirtit. Ai braktisi mbretërin e vogël për t’u bërë mbret shiprtëror i 540 milion njerëzve në mbarërruzull.
         Vite të shkuara, kam shkruar kalimthi për Soros, i cili gjeti si djep agoninëe të majtës. Paratë e tija qarkulluan nën dhe e mbi dhe. Nën dhe…u financuan disa projekte biznesi të krahut të majtë, përfshi dhe politikën e majtë. Mbi dhe… u ndihmua ndonjë kopësht apo shkollë. Por, kontributi i tij më i dukshëm në vendin tonë është marketimi i disa figurave politike, të cilat, pasi e kanë përqafuar dhe përvetësuar sorosianizmin deri në detaje, po shesin asgjënë si produkt të cilësisë së parë, ndërsa realizimin e nganjëhershëm të detyrave rutinë si mrekulli, ndërsa pjesa dërrmuese e shoqërisë varfërohet  për ditë e më shumë. Tani Soros, ka shkuar dhe më larg!
     Fondacioni “Shoqëri e Hapur” i George Soros u akuzua nga Senati Amerikan, se ka ndërhyrë në zgjedhjet në Shqipëri dhe Maqedoni, duke sponsorizuar krahët e majtë. Siçdihet këto fondacione dhe pse janë pjesë  kapitalit fillestar dhe emërimit të Soros,  apo ndonjëtjetri si ai, mbahen me fondet e shtetit Amerikan, nëkuadrin e politikave të jashtme. Siç vërehet, Soros me shokë, paturpësisht shfrytëzojnëparatë e taksapaguesve amerikanë,  për egon dhe qëllimet e tyre delirante-destruktive.
     Sipas mendimit tim, një njeri që del kundër vendit ku ka lindur, kundër vendlindjes dhe qëllimit të prindërve, që pështjellon njështet të adoptuar si nuova patria, Amerika, s’e ka për gjë të pështjellojëShqipërinë tonë të varfër, vend që u shtyp prej afro pesë shekujsh nga Turku…, 47 vjet nga komunizmi, dhe  që… akoma eksperimenton  me metastazat e tyre.
     Mos u habisni, miqtëe mi! Kontraversi përkund kontraversin, se nuk është faji i Soros, por faji i ksenomanisë tonë, që duke urryer njëri-tjetrin për vdekje, bëjmë pronar djallin në tokën tonë. Ne notojmë midis shekujsh kontraversial. Eksperimentet i bëjmë gjithnjë me të huajt dhe njerëzit e këqinj, duke mos i lënë kurrëshans promovimit të mirëve. Një idiotësi e tillë i ka kushtuar Shqipërisë dhe shoqërisë tonë rrezikun:  “To be,  or not to be …”
         Dikur, Shkodranët e vjetër thonin: “ Mos e fut sherrin  nëSheriat se pagun…”, qëdo të thotë, mos e fut ngatërresën në rrugën e drejtë (në Kuran, mbrojtja e rrugës së fesë, rruga e vërtetë etj.), se e pëson.
         Që të përparojë vendi ynë, duhet të shërohemi nga ksenomania dhe urrejtja ndaj njëri-tjetrit. Të duam vetveten, duke u larguar njëherëe përgjithmonënga pasqyra e thyer.

NJERIUT TË ARDHUR NGA FERRI I KUQ – SHQIPTARËT PO I DREJTOHEN:IK!

March 11, 2019 by dgreca

NGA AGUSTIN M. MIRAKAJ

Thirrjet poshtë komunizmi, në protestën para Konsullatës Shqiptare në New York, tregojnë qartë se nomeklatura e vjetër drejton me bijtë e saj qeverinë shqiptare, e cila po zhyt vendin në një kaos total.Nga njëra anë tregojnë se Shqipëria është baçe me lule dhe nga ana tjetër baçja po thahet se nuk ka ujë.Tashmë sovrani është çuar në këmbë me protesta të përmasave të pa imagjinuara si kurrë më parë.Kryeministri Rama del ne media si dikur faqeziu Ramiz Alia. Bën të pafajshmin “SI NJË KUKULL CIRKU”, sulmon, ofendon, trillon, shantazhon shqiptarët, por harron një thënie te vjetër popullore që thot “fshati digjet e k… krihet”.Edi Rama s’tregon mungesë shqetësimi apo interes për dëshirat apo mendimet e Shqiptarëve.Sot ti tiran sundues absolut i pakufizuar nga ligj dhe kushtetuta, një uzurpator i sovranitetit. Sundimtar që ushtron pushtet absolut. Tashmë i ngjan E.H., “largqoftit” me autoritet dhe pushtet. I portretizuar si mizor e sundues, i pakufizuar ke rrëmbyer pushtetin legjitim.Portretizim i LargqoftitTirani mund të mbrojë qëndrimin e tij me mjete shtypëse.Në 28 vite tranzicion Shqipëria po rrëshket në një humnerë të pa fund. Sinjali telefonik “ZËRI i LIRË” ndërpritet.Sot bandat dhe krimi i organizuar drejtojnë shtetin shqiptar.Të ashtuquajturit analistë, analizojnë dhe ç’analizojnë kryeministrin për bëmat e tij.Sa të mira dhe sa të keqija ka, sa i gjatë sa i shkurtër, kollare të kuqe apo kollare të bardhë, thanë të huajt kështu apo ashtu, e mbështesin apo e shfajësoin si njeriun e rënë nga qielli.Kryeministri Rama, politikanët, analistët apo kukullat e cirkut, të kësaj kategorie shkatërrojnë çdo sekond Shqipërinë.E vetmja shpresë për Shqipërinë e për shqiptarët kudo që ata ndodhen i ka ngelur një betejë e pa mbaruar.Të çohen dhe ta rrëzojnë këtë sistem të marrë nga bandat me dhunë, me vota të blera të marrë padrejtesisht.“Edi Rama ik”. Politikanë keqbërës dhe keqdashës ikni.Koha tashmë është e shqiptarëve, e atyre që e duan Atdheun si një vend Perëndimor.

SHBA në përkrahje të plotë të pavarësisë dhe sovranitetit të Kosovës

March 9, 2019 by dgreca

Nënsekretarin për Çështje Politike në Departamentin Amerikan të Shtetit, David Hale: SHBA-ja nuk ndryshon pozicionin kur bëhet fjalë për shtetësinë e Kosovës – është në përkrahje të plotë të pavarësisë dhe sovranitetit/

-Presidenti i Republikës së Kosovës, Hashim Thaçi: Shprehëm edhe një herë falënderimin tonë për letrat e Presidentit Trump dhe mbështetjen për një marrëveshje që balancon interesat e të dyja vendeve, si të pavarura dhe sovrane/

Gazeta DIELLI nga korrespondenti në Kosovë Behlul Jashari

PRISHTINË, 9 Mars 2019/ Presidenti i Republikës së Kosovës, Hashim Thaçi, bën të ditur se, sot, së bashku me kryeparlamentarin Kadri Veseli dhe kryeministrin Ramush Haradinaj, zhvilluam një takim me Nënsekretarin për Çështje Politike në Departamentin Amerikan të Shtetit, David Hale.

Pas takimit Presidenti Thaçi është shprehur:

Temë e diskutimit ishte aktualiteti politik në Kosovë, e ardhmja euroatlantike e vendit dhe bashkëpunimi bilateral me SHBA-në. Biseduam edhe për zhvillimet aktuale në Ballkanin Perëndimor, me theks të veçantë për vazhdimin e dialogut në mes të Kosovës dhe Serbisë në këtë momentum të ri, si mundësi për një marrëveshje përfundimtare dhe gjithëpërfshirëse, që do t’i mbyllë të gjitha çështjet e hapura në mes të vendeve tona. Pra, për një marrëveshje ligjërisht obliguese, që do të sjellë njohjen reciproke dhe ulësen në Kombet e Bashkuara dhe që do të na mundësojë që të kalojmë nga gjendja e armiqësisë së përhershme në një gjendje të paqes, normalitetit dhe bashkëpunimit mes vendeve tona.

Duke mos u pajtuar me kushtëzimet e Beogradit, Kosova përsëriti zotimin se është gati për dialog sa më gjithëpërfshirës dhe transparent. Për këtë edhe Kuvendi i Kosovës e ka miratuar Platformën për Dialogun.

Ne i shprehëm edhe një herë falënderimin tonë për letrat e Presidentit Trump dhe mbështetjen për një marrëveshje që balancon interesat e të dyja vendeve, si të pavarura dhe sovrane. Por, edhe e shprehëm qëndrimin se Status Quo-ja dhe gjendja e konfliktit të ngrirë është e papranueshme.

KRYEMINISTRI HARADINAJ: MARRËVESHJE QË REZULTON ME NJOHJE NË KUFIJTË EKZISTUES TË KOSOVËS

Kryeministri i Republikës së Kosovës, Ramush Haradinaj, deklaroi: Pata nderin që sot në rezidencën e Ambasadorit Amerikan në Kosovë, Philip Kosnett, së bashku me Presidentin Thaçi dhe Kryetarin Veseli, të zhvillojmë një takim të hapur dhe të sinqertë me Nënsekretarin për Çështje Politike, David Hale.

Në këtë takim paraqita qëndrimin se tash Kosova është më e gatshme se kurrë, e unifikuar me një zë të vazhdojë dialogun me Serbinë dhe të kontribuojë në fqinjësi të mirë, paqe dhe stabilitet. Ky unitet është edhe më domethënës pas votimit të Platformës së Dialogut dhe Ligjit.

E ritheksova se ne jemi gati për dialog dhe ftojmë Serbinë që t’i kthehet tavolinës e të diskutojmë të gjitha çështjet e hapura duke përfshirë edhe tregtinë e lirë dhe të arrijmë një marrëveshje që rezulton me njohje në kufijtë ekzistues.

MEDIA: SHBA NUK KA POZICION RRETH REZULTATIT TË DIALOGUT KOSOVË-SERBI, POR INSISTON NË NJOHJE TË NDËRSJELLË, THOTË HALE

Përkrahja amerikane për Kosovën është e palëkundshme. SHBA-ja kujdeset thellë për mirëqenien, prosperitetin dhe sigurinë e Kosovës. Dhe këto janë bazat mbi të cilat zhvillohen diskutimet mes SHBA-së dhe Kosovës.

Kështu ka thënë nënsekretari amerikan për çështje politike, David Hale, të shtunën në Prishtinë, pas takimit me krerët e institucioneve të Kosovës.

Duke iu përgjigjur pyetjeve të gazetarëve nga tri media kosovare, përfshirë “Kohën Ditore”, nënsekretari Hale ka përsëritur qëndrimin amerikan rreth dialogut, duke theksuar se Uashingtoni konsideron se tani është një moment i përshtatshëm për të arritur një marrëveshje gjithëpërfshirëse me Serbinë, duke theksuar se në bosht të asaj marrëveshjeje duhet të jetë njohja e ndërsjellë.

Sidoqoftë, nënsekretari Hale e ka përsëritur se SHBA nuk ka një pozicion të vetin se cili duhet të jetë rezultati i dialogut, dhe se përmbajtja e marrëveshjes do të varet nga të dy palët.

Por, ai ka theksuar se ka një pajtim të gjerë mes aleatëve perëndimorë se çdo marrëveshje duhet ti kontribuojë stabilitetit rajonal dhe jo e kundërta.

Nënsekretari Hale, i cili të shtunën në mëngjes i ka takuar së bashku presidentin Hashim Thaçi, kryeministrin Ramush Haradinaj dhe kryetarin e Kuvendit Kadri Veseli, para vizitës në Prishtinë ka qëndruar në Beograd, ku ka dërguar të njëjtin mesazh për tejkalimin e pengesave që ti hapet rrugë dialogut.

Duke iu përgjigjur pyetjes së Kohës Ditore për të komentuar rreth Platformës për dialog, të cilën e ka miratuar Kuvendi i Kosovës të premten, nënsekretari Hale tha se e sheh këtë si pjesë të debatit demokratik në Kosovë, por shtoi se SHBA-ja nuk ka një pozicion rreth platformës.

Në çdo rast, siç tha nënsekretari Hale, SHBA-ja nuk ndryshon pozicionin kur bëhet fjalë për shtetësinë e Kosovës – është në përkrahje të plotë të pavarësisë dhe sovranitetit.

TAKIMI U ZHVILLUA NË REZIDENCËN AMERIKANE NË PRISHTINË

Liderët shtetërorë të Kosovës kanë qëndruar në Rezidencën Amerikane në Prishtinë për dy orë të shtunën paradite, ku janë ftuar në takim nga nënsekretari për çështje politike në Departamentin Amerikan të Shtetit, David Hale.

Burime të Radio Televizionit të Kosovës (RTK) tregojnë se Hale ka kërkuar suspendimin e taksës, duke folur për rrezikun e dështimit të dialogut. “Nëse Kosova mbetet përgjegjese për dështimin e dialogut do të paguajë çmim”, ka thënë Hale kanë treguar këto burime, duke thënë se ky ka qenë mesazhi kryesor i amerikanëve në takimin e sotëm.

Ndërkohë, të hënën, në Prishtinë për të njëjtën temë do të vijnë edhe dy këshilltarë të kancelares gjermane Angela Merkel, të cilët pritet të rrisin presionin mbi qeverinë kosovare për të suspenduar taksën dhe vazhduar dialogun.

DEKLARATA E PRESIDENTIT SERB VUÇIÇ

Presidenti i Serbisë, Aleksandar Vuçiç, pas takimit në Beogrd me zyrtarin e lartë Amerikan dje ka shkruar në Twitter:

“Nënsekretarit për çështje politke në Departamentin e Shtetit të SHBA David Hale i kam thënë se Platforma për dialog, miratuar dje, është në thelb vendim i Prishtinës ta ndërpresë dialogun me Beogradin. Serbia në afat të shkurtër do marrë masa me të cilat do reagojë në situatën e krijuar”.