Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

E VETMJA KRYETARE PARTIE FEMËR NDËR SHQIPTARË, DORËHIQET NGA PRESIONI I BURRAVE DHE….

by

…PSE NUK VJEN NGA KUZHINAT E UDB/
Kur prezantoi kryetaren e PPD-së zgjedhur nga Kongresi i VI-të i saj, zonjën Tetuta Llalla, gazeta Dielli ne SHBA, e vuri theksin posacërisht në faktin se për të parën herë një parti mashkullore shqiptare e delegoi udhëheqjen tek një femër, patriote, e perkushtuar ndaj Kombit, ishte luftetare e UCK, mesuese, nje personalitete pa cene. Vecanërisht në Maqedoni, kjo ishte një arritje historike që përcillte kumtin e zbutjes së politikës dhe mund të shërbente si model edhe ndër shqiptarët në Shqipëri, Kosovë, Mal të Zi, Luginën e Preshevës etj. Mirëpo pa ia nisur mirë veprimtarisë, zonja Llalla dha dorëheqjen. Përse? Duket se u trembën dirigjentët e politikës shqiptare në sinoret ku ka vepruar UDB-ja, e cila duket se ende ka mbipushtet tek faktori politik shqiptar ose servilet e maqedonasve, moren urdher te kundervepronin.
Ata burra që posedojnë pasaporta diplomatike, duket se paguajnë harac tek ustallarët e tyre, kështu që presioni i tyre e thyen kryetaren e parë të një partie burrash shiptarë, dhe emri i saj do te sherbeje vetem per statistike te perkohshme se dikur, pak kohe, na ishte nje kryetare partie femer ne trojet mashkullore te politikes!. Jo vetëm kaq, por burrat e PPD, që janë kujdesur që kjo parti të mos ngrejë krye, bllokuan edhe listat edhe vulat. Ja pra pse u thye gruaja që desh të zbusë politikën e burrave të PPD, por jo vetëm kësaj partie. Për të mësuar arsyet e plota të dorëheqjes, ndiqeni të plotë deklaratën e kryetares së dorëhequr Teuta Llalla.
D E K L A R A T Ë

Të nderuar delegat dhe kuvendar të Kongresit të VI të PPD, mbajtur më 17 Janar 2015!
Suksesi i Kongresit të VI dhe zgjedhja në krye të PPD një grua, një nënë, një ish-ushtare e UÇK, që rrjedh nga një familje kombëtare, kalli shqetësim të thellë në strukturat shtetërore sepse u zgjodh një njeri që nuk vjen nga guzhinat e UDB së vjetër jugosllave por nga bagazhi patriotik kombëtar.
Prej disa ditësh u shantazhova nga njerëz të caktuar që njihen si ish komunistët të cilët bredhin me pasaportë diplomatike që duhet të zgjidhen në mënyrë diktatoriale komuniste dhe jo me votë demokratike, Sekretari i Përgjithshëm dhe Kryetari i Kuvendit të PPD-s. Për 8 ditë unë nuk pranova që këto gjëra të ndodhin sepse nuk jam zgjedhur me vërtetim të dalë nga dera e shtëpisë sime, kryetare e PPD, por u zgjodha në mënyrë demokratike, me vota të lira, dhe për zgjedhjen time kanë qenë dëshmitarë qindra sy dhe dhjetëra media.
Prej disa ditësh kërkova listën e Kuvendarëve të votuar në Kongres, por ajo listë nuk mu dha asnjëherë, sepse nëntoka e strukturave shtetërore kishte ndryshuar emrat e Kuvendarëve. Kjo parti prej dy vitesh udhëhiqej nga një treshe të cilët kishin role të ndara: njëri përdorte diplomacinë, tjetri arrogancën dhe i fundit luante rolin e naivit. Këta të tre pas Kongresit bllokuan vulat e partisë, proces-verbalin e Kongresit të VI dhe të gjithë materialet që duheshin të dërgohen në Gjykatën e Tetovës që juridikisht të marr mandatin zyrtar si Kryetare e PPD.
Të respektuar delegat dhe Kuvendar të Kongresit VI të PPD që më votuat për një dëshirë, për ëndrrën e rikthimit me nder të PPD në skenën politike, që më mbështetët në kohët e vështira dhe që më besuat postin e kryetarit të PPD, ju premtova atë ditë në sy se nuk do t’ju tradhtoja, nuk do t’ju braktisja kurrë për asnjë interes e asnjë çmim dhe asnjëherë për ndonjë përfitim personal. Nuk do të bëja pas shpinës suaj asgjë që do të cënonte jetën, dinjitetin, të ardhmen dhe shpresën tuaj. Nuk do të merrja asnjë vendim pa e ndarë me ju, pa u këshilluar me ata që më besuan dhe votuan, sepse nuk do të gjeja paqe në shpirtin tim për shkak të trazimit të besimit dhe shpirtit tuaj.
Unë nuk mund të pranoja të bëhesha pjesë e marrëveshjeve nëntokësore në dëm të interesit të popullit tim, unë nuk mund të pranoja që duke u keqpërdorur vula e partisë të mblidhen fonde për larjen e borxheve të firmave të falimentuar.
Që nga themelimi i PPD-s në vitet 1990, ka ekzistuar një luftë e brendshme midis UDB Jugosllave komuniste dhe patriotëve shqiptar, por për fatin e keq gjithnjë ka fituar grupacioni i kuzhinës së UDB. Kjo tregon se, Logës, Emrit dhe Zgjimit të PPD i trembet shumë ky shtet.
Fjalët e mia janë të sinqerta, ato vijnë nga thellësia e shpirtit të pastër familjar, sepse unë jam Teuta Kamberi- Llalla,që nuk mund të shkeli mbi Betim Kombëtar.
Prandaj unë sot jam dorëheqjen e pakthyeshme nga posti i kryetares së PPD të sapo zgjedhur më 17 Janar 2015, me vota demokratike.
Dorëheqja ime dëshmon se ka disa interesa madhore që nuk mund të shkelen për asnjë interes personal. Përpara asaj që mu servua, unë zgjodha dorëheqjen me nder dhe nuk pranova të notoj në ujërat e ndotura.

Faleminderit të gjithëve dhe mirupafshim në Betejat e Ardhshme

Tetovë, 28 Janar, 2015
Teuta Kamberi Llalla

Basha: Nesër, të fikim makinat 5 minuta për ti thënë stop padrejtësive

by

Nga Arbi Fortuzi/
TIRANË, 25 Janar/ Kryetari i Partisë Demokratike, Lulzim i bëri thirrje te dielën qytetarëve shqiptarë të protestojnë ndaj padrejtësive ekonomike-sociale që, sipas tij Qeveria Rama po rezervon ndaj tyre .
Kryetari të Partisë më të madhe opozitare në vend gjatë një deklarate për shtyp nga selia blu bëri të ditur se nesër do të nis pranvera e protestave për PD-në dhe qytetarët Shqiptarë që ndihen të mënjanuar nga qeveria e drejtuar nga Kryeministri Edi Rama.
“Të gjithë shqiptarët, në të gjithë territorin e vendit tonë, ku do që të ndodhen nesër në orën 11:00’ të fikin mjetet e tyre për 5 minuta, në shenjë proteste ndaj rritjes së çmimit të naftës dhe të gjitha padrejtësive të tjera që kjo qeveri po i rezervon”, tha Basha.
Sipas tij, protesta e nesërme çel sezonin e ri të protestave për Partinë Demokratike. “Protesta e të hënës është hapja e një pranvere protestash të pandalshme masive dhe popullore”, cilesoi ai.
Sipas Bashës, qytetarët shqiptarë kanë nëvojë për përkujdesje dhe jo fjalë. “Do t’i dërgojmë një mesazh të qartë qeverisë së pushteti është një e mirë publike, se ky vend ka nevojë për një qeveri të dijshme që përkujdeset për fatet e qytetarëve, jo për një qeveri që zhvat paratë dhe shton ankthin e tyre”, tha Basha.
“Nafta është energjia e zhvillimit ekonomik. Ulja e çmimit të naftës ul koston e shërbimeve dhe të jetesës. Këtu rritet artificialisht. Dy herë në dy vitet e fundit qeveria rriti taksën e qarkullimit. Detyrohemi të paguajmë taksat Rama, në çdo litër karburant që blejmë. Eshtë një krim që duhet ndalur. Erdhi koha që njerëzit të mbrojnë veten”, bëri thirrje Basha, duke shtuar në fund se përmes kësaj proteste duhet t’i tregojmë qeverisë që nuk e pranojmë më rritjen e taksave dhe arbitraritetin.

PD U JEP FUND DILEMAVE PER ZGJEDHJET

by

Partia Demokratike duket se ka pranuar në mënyrë zyrtare pjesëmarrjen në zgjedhjet lokale të 21 qershorit. Kreu i PD-së, Lulzim Basha u shpreh në punimet e Asamblesë politike të Partisë Popullore Europiane, në Bruksel, se 21 qershori do të jetë një referendum popullor edhe kundër reformës territoriale.
Me deklaratën e tij, Basha iu jep fund dilemave nëse opozita do të marrë pjesë apo jo në zgjedhjet vendore të 21 qershorit. Duke qenë se referendumet nuk i hynë në punë për kundërshtimin e ndarjes së re, Basha ka thënë se demokratët do të kthejnë në një referendum të madh pikërisht 21 qershorin.
Deklarata e Bashës
“Partia Demokratike ka qenë dhe është e vendosur që sovranit, qytetarëve shqiptarë të mos u mohohet kurrë e drejta për të vendosur për hartën territoriale. Harta aktuale ka qenë, është dhe do të mbetet e papranueshme për Partine Demokratike .
Ajo bie ndesh me interesat e qytetarëve shqiptarë. Për këtë arsye, ne e konsiderojmë 21 qershorin një referendum të madh qytetar, për tu shprehur me votë, jo vetëm për kandidatët e opozitës por edhe kundër kësaj ndarjeje territoriale dhe për t’i hapur rrugë një procesi i cili nuk do të vonojë, ku së bashku me qytetarët shqiptarë do të vendosim hartën territoriale që është në favorin e interesave të tyre.
Kërkova monitorim të plotë të këtyre zgjedhjeve, duke pasur parasysh që qeveria Rama-Meta e ka dhënë provën e saj të përgjithshme të shitblerjes së votës në 23 qershor dhe e ka përsëritur para kamerave në zgjedhjet e Korçës, duke amnistuar nga ndjekja penale keqbërësit e këtij krimi penal dhe mora garanci se jo vetëm Partia Popullore Europiane por të gjitha institucionet e BE do të jenë tërësisht të angazhuara për këtë kauzë madhore që është kauza e lirisë dhe demokracisë në Shqipëri”, u shpreh Basha gjatë fjalës së tij.

Albin Kurti tërhiqet nga kreu i “Vetvendosje-s”

by

Visar Ymeri, Kandidat për Kryetar i Lëvizjes VETËVENDOSJE-s/
Albin Kurti ka vendosur të mos rikandidohet për postin e kryetarit të Lëvizjes “Vetëvendosje!”, në Kuvendin Zgjedhor të këtij subjekti, i cili pritet të mbahet muajt në vazhdim.
Burime të Koha.net të afërta me zhvillimet, tregojnë se si kandidat konsensual i cili do ta zevëndësonte Kurtin për një mandat trevjeçar në krye të “Vetëvendosjes!” është shefi i tashëm i Grupit Parlamentar, Visar Ymeri.
Kurti pritet të mbetet vetëm aktivist i subjektit.
Lajmi pritet të bëhet i ditur gjatë ditës nga vetë “Vetëvendosje!”.
Statuti i “Vetëvendosje!”-s parasheh që një person mund të zgjedhet vetëm dy herë në postin e kryetarit. Kurtit do t’i mbetet mundësia për t’u rizgjedhur edhe një herë në këtë post, nëse vendos të rikthehet.
Visar Ymeri, Kandidat për Kryetar i Lëvizjes VETËVENDOSJE/
Në ora 12:00 të ditës së sotme ka përfunduar afati i dorëzimit të kandidaturave për kryetar të Lëvizjes VETËVENDOSJE!. Me përfundimin e këtij afati, Komisioni Zgjedhor i Përgjithshëm (KZP) i Lëvizjes VETËVENDOSJE! ka konstatuar se është dorëzuar vetëm një deklaratë për kandidaturë, ajo e deputetit të Lëvizjes VETËVENDOSJE!, Visar Ymeri.
Në përputhje me Statutin dhe Rregulloren e Zgjedhjeve të Brendshme të Lëvizjes VETËVENDSOJE!, Komisioni Zgjedhor i Përgjithshëm e ka shpallur të mbyllur procesin e pranimit të deklaratave të kandidaturave për kryetar, dhe konstaton se kandidati për kryetar, Visar Ymeri, duke qenë edhe kandidatura e vetme, do të jetë kandidati i vetëm që do të vazhdojë procesin e brendshëm zgjedhor.
Në ditët në vijim, KZP-ja do të njoftojë lidhur me afatet e tjera kohore sa i përket fushatës së kandidatit për zgjedhjet e brendshme, si dhe në lidhje me ditën e votimit kur anëtarësia do të ketë të drejtën të votojë për, kundër, ose abstenim, sipas parimit një anëtar – një votë, në lidhje me kandidaturën e Visar Ymerit për kryetar të Lëvizjes VETËVENDOSJE!.(Ne Foto: Visar Imeri)

Me vizione të reja, na priftë e mbara!

by

NJE FEMER NE KRYE TE NJE PARTIE SHQIPTARE, SHANS PER ZBUTJEN E AGRESIVITETIT POLITIK- NJE SHEMBULL QE VJEN NGA PPD E SHQIPTAREVE NE MAQEDONI/
NGA TEUTA LLALLA/*
Të nderuar delegatë,
Të nderuar simpatizantë dhe anëtarë të PPD-së,
Më lejoni që t’Ju falenderohem për përkrahjen dhe votëbesimin që më dhatë në këtë detyrë të lartë politike, qëllimi i të cilës është rikthimi i shpresës dhe i dinjitetit kombëtar. Që prej kaq vitesh sa nuk ishte PPD aktive në Kuvendin e Maqedonisë këto cilësi janë shkelur.
Ky rikthim kësaj rradhe ishte më i mundimshëm se herëve tjera sepse dolën nga burgu i padrejtë Vullneti, Adnani dhe Amiri, nga guximi dhe dëshira e 1.000 qytetarëve që haptazi para notarit të nënshkruajnë fletë aderimin për PPD-në si dhe nga guximi i 186 qytetarëve që ta mbrojnë platformën politike të PPD-së para gjykatës dhe ai lindi nga vullneti dhe këmbëngulja e nismëtareve të PPD-së për ta rikthyer këtë fole të demokracisë në jetën politike.
Më lejoni që me këtë rast ta falenderoj Përfaqsuesin dhe Prezantuesin e deritashëm të PPD-së zotin Vullnet Halilin i cili dha kontributin e tij rinor për rregjistrimin e partisë si dhe anëtarët e deritashëm të Kuvendit Qendror dhe Kryesisë së Partisë për mundin e pafund që e dhanë për këtë kauzë.
Të nderuar delegatë,
Sot gjendja e shqiptarëve në Maqedoni është me keq se në komunizëm. Partia shqiptare në pushet, disa vite me radhë nuk arrin të zgjedhë problemin e emërtimit të tabelave të rrugëve dhe shkollave. Ata nuk janë në gjendje të kuptojnë ende se çfarë është parlamenti dhe çfarë është qeveria si koalicion politik. Ata, nuk mund të kuptojnë kush i sulmon nxënësit shqiptarë në Shkup prej kaq kohësh. Ata, nuk mund të kuptojnë se ku shkojnë paratë e shqiptarëve dhe sa harxhohen për Shkupin 2014. Po ashtu, ata nuk mund të kuptojnë ende pse ikin të rinjtë në kurbet. Askush nuk merret me çështjen pse u mbyllën shkollat shqipe? Pse braktisja e fshatrave po bëhet përditë dhe duke filluar nga Likova e Kërcova, Dibra, Shkup etj.
Sot Shqiptarët janë pa mbrojtje. Partitë shqiptare në Parlament grinden njëra me tjetrën. Partia në pushtet është shndërruar në zëdhënëse të politikës së VMRO-s. Kuadri i paaftë i sajë është bërë objekt diskutimi i Komisionit dhe i Parlamentit Evropian dhe ambasadave të huaja në vend. Partia tjetër shqiptar në opozitë, kënaqet duke luftuar dhe shkatërruar partitë shqiptare opozitare më të dobta dhe kur i duhet atij për interesa, ia voton buxhetin VMRO-DPMNE, duke e nxjerr nga balta. Nuk duhet njerëzit të mashtrohen me fjalë boshe dhe fjalime emocionale, duhet më shumë dije e guxim, prandaj nuk duhet që shqiptarët të humbin kohën me premtime të parealizueshme. Duhet të veprojmë bashkërisht si një trup, duke protestuar fortë për çdo të drejtë që na shkelet. Vetëm në këtë mënyrë do të ndalen proceset degraduese siç ishin enciklopedia, Brodeci, Radusha, Odri, Vaksinca, rrahjet e nxënësve, dhunimi i lokaleve në emër të ndaljes së duhanit, etj., etj.
Për shkaqet e mësipërme vëllezër dhe motra kërkojmë përkrahjen tuaj. Vetëm ju mund të na ndihmoni të ringrihemi përsëri lart, krenar pse jemi shqiptar. Ne, publikisht ua shtrijmë dorën që të na përkrahni ashtu si qëmoti, pra Uniteti është ai që bënë fuqinë dhe përparimi tonë.
Ne, do jemi si gjithnjë në ballë të nismave madhore kombëtare si më 1990, në 1994 dhe në 2001, ishte PPD ajo që i bëri ballë presioneve të pushtetit afatgjatë të diktaturës komuniste, ishte PPD përkrahësja kryesore për themelimin e UT, ishte PPD që u gjend pranë ushtarëve të UÇK, ishte këmbëngulja e PPD për arritjen e një marrëveshje për ndalimin e konfliktit të 2001. E ku s’ka qenë PPD, në krye të lëvizjeve tona kombëtare, por kuptohet këto s’kanë qenë të lehta për ne. Shumë padrejtësi dhe kurthe ju bënë PPD, shumë punuan strukturat shtetërore dhe vasalët e tyre për ta zhdukur rrënjësisht PPD, por nuk ja arritën qëllimeve dashakeqëse sepse PPD nuk jam vetëm unë, PPD nuk jemi vetëm ne që ndodhemi këtu në këtë sallë, por PPD janë të gjithë shqiptarët në Maqedoni dhe Diasporë. PPD është promotoria e lëvizjeve të mëdha kombëtare jo vetëm në Maqedoni, por kudo. Ajo ishte e para dallëndyshe që lajmëroj rënien e diktaturës komuniste, ajo ishte e para që lajmëroi pranverën e demokracisë në Maqedoni.
PPD, ka qenë dhe është pronë e popullit dhe jo e liderit, PPD nuk ka duruar dhe nuk do të durojë asnjëherë diktaturën e liderit, këtë ua premtoj edhe unë që më keni besuar sot këtë detyrë kaq të lartë dhe të vështirë. PPD ka punuar dhe punon për mbrojtjen e vlera kombëtare, për ruajtjen e dinjitetit njerëzor, besimin e njeriut në Zot, që do të thotë se ne ekzistojmë.
PPD ka qenë dhe mbetet ambient demokratik që nuk duron diktatura. Ne do të ndërtojmë ambientin tonë tradicional ku kryetari i partisë do të bashkëveprojë me organet e saja për ndërtimin e platformave politike, ekonomike, sociale, arsimore, kulturore. Do të zbatojë platformat dhe nuk do të vihet në pozitën e të gjithë të diturit. Anëtarët e organeve udhëheqëse të PPD-së do të punojnë për realizimin e vizionit të përbashkët politik ashtu siç kanë vepruar rilindësit tanë në të kaluarën e jo ashtu siç veprojnë politikanët ballkanas: paraja mbi të gjitha.
PPD ka qenë dhe mbetet burim i pashtershëm i platformave politike. Koncepti ynë fillestar ka qenë dhe ende më tej mbetet ai i shtetit dykombësh. Nëse për një arsye ose tjetër forca politike të caktuara nuk janë në gjendje ta pranojnë këtë filozofi politike atëherë alternativa jonë do të ishte ajo e qytetarëve të barabartë dhe jo ajo e një kategorie qytetarësh të pagëzuar me emër e mbiemër dhe e qytetarëve numra me përqindje. Thënë shkurt, PPD parimet e veprimit të saj politik i ka paraqitur qysh në Deklaratën e Grupit parlamentar për barazinë e shqiptarëve në Republikën e Maqedonisë në vitin 1992 dhe ato janë parime bazë të veprimit tonë politik.
Pas 25 vitesh zhvillim demokratik platforma e PPD-së ende nuk është realizuar plotësisht, ende duhet kohë për realizimin e saj. Nuk është ndonjë thënie e mençur po qe se themi se aktiviteti ynë politik do të mbështetet kryekëput në Marrëveshjen e Ohrit. Fundja ajo marrëveshje bazë politike ka pasur platformën e PPD-së, madje edhe e hartuar nga ekspertë të PPD-së, e hartuar për kohë të caktuar dhe rrethana të caktuara. Por, çdo gjë jeton në kohë dhe hapsirë. Marrëveshja e Ohrit e humbi shansin të hyjë në histori si marrëveshje e realizuar, si një marrëveshje që i dha fund luftës dhe pabarazisë. Sot ajo duhet riplotësuar, rishkruar.
PPD, gjithnjë ka qenë partia që ka vërtetuar se për çështjet e mëdha kombëtare dhe shoqërore, ka afruar zgjidhje dhe bashkëpunim. Është PPD, ajo që i mundësoi formacionit ushtarak të papranuar nga komuniteti ndërkombëtar që të paraqitet me subjekt politik, por kjo parti e nëpërkëmbi sinqeritetin e PPD-së dhe anëtarëve të saj dhe u angazhua për zhdukjen e saj nga skena politike. Të mos harrojmë se PPD është partia mëmë e këtyre dy partive dhe është mëkat të sulmohet dhe shpifet pa fakte për të. PPD-ja afirmon vendosjen e partneritetit dinamik me tërësinë e organizmave dhe asociacioneve të shoqërisë civile.
Juve që më votuat për një dëshirë, për ëndrrën e rikthimit me nder të PPD në skenën politike, që më mbështesni në kohët e vështira dhe që më keni besuar postin e kryetarit nuk do t’ju tradhtoj, nuk do t’ju braktis kurrë për asnjë interes e asnjë çmim dhe asnjëherë për ndonjë përfitim personal. Nuk do të bëj pas shpinës suaj asgjë që do të cënojë jetën, dinjitetin, të ardhmen dhe shpresën tuaj. Nuk do të marrë asnjë vendim pa e ndarë me ju, pa u këshilluar me ata që më kanë besuar dhe votuar, sepse nuk do të gjej paqe në shpirtin tim për shkak të trazimit të besimit dhe shpirtit tuaj.
Rruga jonë, e juaja dhe imja, e anëtarëve dhe simpatizantëve të PPD ka qenë e vështirë për të ardhur deri në këtë Kongres sepse zhurma për riorganizimin e PPD ishte shumë e madhe dhe shqetësimi i kallur brenda nesh nga skenarë të sajuar nga dashakeqët ishin tmerrsisht shqetësues, por ne shkuam tek çdo njeri që në zemër kishte PPD, biseduam me çdo shqiptar që ende ruante me fanatizëm librezën e anëtarësimit të PPD, folëm me fjalë zemre. Fjalët e mia dhe të bashkëpuntorëve të mi janë të sinqerta, ato vijnë nga thellësia e shpirtit të pastër, prandaj ne triumfuam dhe jemi bashkë këtu sot, në këtë Kongres për tju treguar se, PPD me popullin shqiptar vazhdojmë të ecim përpara.
Ju gjyshër, e prindër, të rinj, kudo që jeni, në këtë sallë, në Maqedoni dhe jashtë saj keni pritur me zemër të dridhur nëse PPD do riorganizohet apo të zhduket.
E pra, na kujtohet të gjithëve koha e PPD kur lumi i njerëzve nuk ndalej përballë hermelinave dhe kordoneve policore për të votuar për intelektualët e vërtetë, për të dërguar me votën e lirë profesorë të dëshmuar përballë të tjerëve.
Më lejoni t’jua them sot, hapur, në sy, se ne punojmë dhe përpiqemi të rikthejmë krenarinë dhe dinjitetin kombëtar, të rikthejmë besimin dhe shpresën për një të ardhme më të mirë, të dërgojmë me votën tuaj njerëzit më të suksesshëm në institucionet shtetërore. Por gjithnjë ua kam përsëritur miqve, bashkëpunëtorëve të mi se na duhet votëbesimi i gjithë popullit, për të dalë faqebardhë, më të fortë me qëllimin e mirë që rinia shqiptare të mos largohet për të emigruar. Na ndihmoni pra, për të kontribuar të gjithë bashkë për të mundur të keqen, për të dalë nga balta ku na kanë futur prej kaq vitesh politikanët vasal, planprishës dhe keqpërdorues të besimit të popullit. Duke kontribuar të gjithë bashkë për të mirën e njerëzimit, për një të ardhme më të sigurt për fëmijët tanë, për brezat që vijnë pas. Duhet të dimë se është mëkat që PPD të mbetet jashtë Kuvendit të Maqedonisë, sepse ajo ka qenë dhe është partia e vlerave të larta, partia që bëri historinë e vërtetë të shqiptarëve në Maqedoni.
Me vizione të reja, na priftë e mbara!
* Fjala e kryetares së sapo zgjedhur e PPD Teuta LLALLA