Politike – Page 426 – Dielli

ME 27 JANAR 1990, DIASPORA SHQIPTARE NË SHBA I DHA LAMTUMIRËN NIK MRNAÇAJ

January 27, 2019 by dgreca

27 JANAR 1990- Ishte një ditë e ftohtë dimri 27 Janari i viti 1990. Komuniteti shqiptar ishte tronditur nga një ngjarje e pazakontë; 5 ditë më parë ishte përcjellë lajmi se një aksident i pazakontë në rrethana të dyshimta kishte marrë jetën e të riut Nik Mrnacaj. Me 27 Janar u përcoll trupi i të ndjerit…. Shërbimet funerale u kryen në Bronx, New York, ku të riut Mrnaçaj, i dhanë lamtumirën e fundit mijëra bashkatdhetarë të komunitetit shqiptar të Amerikës. Mesha e Dritës u celebrua me datën 27 Janar 1990, në Kishën Katolike Shqiptare, nga të Pëndershmit Don Rrok Mirdita dhe Don Pjetër Popaj…./

***

Vitin 1990 kishte nisë me demonstrata të shumtë në Diasporën Shqiptare të Amerikës. Dredhat e Ramiz Alisë në Shqipëri dhe urdhërat që përcilleshin në Misionin Shqiptar të Nju Jork-ut i kishin hedhur më shumë benzinë zjarrit.Me 20 Janar ishte zhvilluar një demonstratë e madhe për lirinë dhe demokracinë në Nju Jork. Demonstrata u zhvillua para Misionit të asaj që quhej Republika Popullore Socialiste e Shqipërisë. Mijëra njerëz, burra, gra dhe të rinj, shkruante Dielli në faqen e parë, morën pjesë në protestë. Turma e madhe u mblodh rreth orës 11 paradite dhe manifestoi me thirrje të fuqishme:” Lironi Shqipërinë”!, Reforma për Popullin Shqiptar”!…”Demokraci dhe Liri!” si dhe parrulla të tjera.

Shkëpusim nga kronika e Diellit(editor në atë kohë ishte Eduard Liço) : “Ndërmjet atyre që merrnin pjesë në këtë demonstartë na zuri syri edhe bashkëkombasin tonë Tom Christo nga New Hampshire, i cili është kandidat për Senatin Amerikan, profesori amerikan nga New Jersey John Cardino… Ishte i pranishëm edhe Reverand Sassu, përfaqësuesi i Kishës Orthodokse Rumune në New York. Krahas fjalimeve, u recituan edhe poezi nga tribuna e protestës, ku më së shumti duartrokitje fitoi poezia e Zef Pashko Dedës, shkruar enkas për këtë rast.

Shqiptarët e New York-ut, shkruante Dielli, ishin mbledhur me mijëra, po kishin ardhë edhe nga qytete të tjera, të afërta dhe të largëta. Nga Chicago kishte ardhë Rev. Jusuf Azemi me shumë shokë të tjerë; nga Detroiti Ekrem Bardha me shokë dhe bashkëpunëtorë të tij të Këshillit Kombëtar Republikan Shqiptaro-American; nga Connecticut Ligori dhe Kostandin Vangjeli,Ali Demiral ; nga Nju Jorku Dr. Turdiu me zonjën dhe vajzat, Luan Isufi me zonjën, Ramiz Dani, Abdulla Kaloshi, Seid Kryeziu, Rexhep Krasniqi, Nerim Kupi, vëllezërit Bytyçi dhe shumë të tjerë.Po ashtu kishin ardhur edhe nga Florida e shtete të tjera të Amerikës. Në krye të turmës binte në sy një grupim energjik i të rinjëve me në krye Nikoll (Nik) Mrnaçaj, që i jepnin ritëm demonstrimit. Nikolla kishte motive të forta për të dalë në krye të protestës: Vuajtjet e fisit të tij në Shqipëri, kalvari në burgje dhe kampet e internimit, burgosja dhe vdekja e axhës së tij, Nikolla Mrnaçaj nga torturat e diktaturës,e kishin mbushur shpirtin e tij, dhe e kishin bërë aktiv në demonstratat antikomuniste në SHBA. Atë e gjeje kudo ku demnstrohej, në Washnigton, New York, Michigan etj…(Lexoje te plote en Diellin ne Print)

Lirohet me kusht nga burgu Sylejman Selimi

January 25, 2019 by dgreca

Paneli për lirim me kusht, e ka liruar nga burgu, ish-komandantin e Shtabit të Përgjithshëm të Ushtrisë Çlirimtare të Kosovës, Sylejman Selimi./

1 Selimi

Avokati i tij, Tomë Gashi ka konfirmuar për Radion Evropa e Lirë, se Paneli i themeluar nga Këshilli Gjyqësor ka marrë një vendim për lirimin me kusht të Selimit.

“Para pak minutash, pas mbajtjes pa të drejtë për mbi 5 vjet dhe pas mbajtjes në vuajtje të dënimit për 227 ditë pa vendim gjyqësor, më në fund është liruar komandanti i Shtabit të Përgjithshëm të UÇK-së, Gjeneral Sylejman Selimi”, tha Gashi.

Më 24 maj 2013, Sylejman Selimi ishte arrestuar dhe më vonë ishte shpallur fajtor për një vepër penale të krimeve të luftës kundër popullatës civile nga Gjykata Themelore në Mitrovicë. Ai ishte dënuar me 6 vjet burg.

Në qershor të këtij viti, të akuzuarit nga rasti që njihen si Drenica 1 dhe Drenica 2, janë kthyer në rigjykim.

Në rastin “Drenica”, janë gjykuar disa nga ish-komandantët e UÇK-së të cilët bartnin funksione publike, qoftë deputetë apo edhe kryetarë komunash, si Sylejman Selimi, Sami Lushtaku, Fadil Demaku, Nexhat Demaku e të tjerë.

Haradinaj: Taksa ndaj Serbisë mund të mbetet përgjithmonë

January 23, 2019 by dgreca

Kryeministri, Ramush Haradinaj e kryetari i Kuvendit të Kosovës, Kadri Veseli u takuan të martën me ambasadorin e SHBA-së, Philip Kosnet. Pas takimit Haradinaj theksoi, se taksa ndaj prodhimeve serbe mbetet në fuqi.

Nga Bekim Shehu/

Kryeministri, Ramush Haradinaj dhe kryetari i Kuvendit të Kosovës, Kadri Veseli takuan ambasadorin e SHBA-së në Kosovë, Philip Kosnet, një takim ky i shumëpritur nga opinioni për të qartësuar, nëse qeveria e Kosovës do vazhdojë të qëndrojë prapa vendimit të mosheqjes së taksës ndaj produkteve serbe megjithë presionin ndërkombëtar që kjo taksë të hiqet.

Veseli: Ta ruajmë miqësinë dhe partneritetin strategjik me SHBA

SHBA i ka kërkuar qeverisë së Kosovës që të hiqet taksa, sikundër edhe Bashkimi Evropian që kërkon që kjo taksë të hiqet, sepse shkelet marrëveshja e CEFTA-a. Serbia nga ana e saj, thotë se dialogu me Kosovën nuk mund të vazhdojë, përderisa qeveria në Prishtinë nuk e heq taksën. Takimi i sotëm me ambasadorin amerikan është thirrur nga kryetari i Kuvendit të Kosovës, Kadri Veseli. Në një komunikatë për medie pas takimit, Veseli tha, se me ambasadorin e Shteteve të Bashkuara të Amerikës, Philip Kosnett kanë diskutuar “për sfidat që e presin Kosovën gjatë këtij viti”.

“Ne do të punojmë bashkë që vendimet e institucioneve të Kosovës, për procese të rëndësishme, të jenë në interes të qytetarëve tanë dhe në koordinim të plotë me SHBA-të dhe partnerët e tjerë ndërkombëtarë. Kosova është e vendosur që përjetësisht ta ruajë miqësinë dhe partneritetin strategjik me Shtetet e Bashkuara të Amerikës dhe kjo nuk do të ndryshojë asnjëherë”, shkroi Kadri Veseli.

Albanien PDK Kadri Veseli Politker (Shpresim.M.Shala)

Haradinaj: Taksa nuk hiqet, sepse nuk kemi garanci

Ndërsa Kryeministri i Kosovës, Ramush Haradinaj nga ana e tij, në një konferencë për medie pas takimit tha, se qeveria e Kosovës, nuk e heq taksën përderisa nuk ka garanci për një marrëveshje gjithëpërfshirëse për Kosovën. “Ne kemi mbajtur një takim të thirrur nga Veseli. Ka qenë prezent edhe ambasadori i Amerikës, biseda ka qenë dialogu dhe zhvillimet rreth dialogut, të ndërlidhura edhe me taksën e vendosur nga Kosova. Edhe me mundësitë që në të ardhmen të arrijmë një avancim në dialog. Nuk ka ndonjë ndryshim të madh, por ka qenë bisedë e mirë”, tha kryeministri Haradinaj duke shtuar se do të ishte i lumtur, nëse do të kishte mundësi që ta hiqte taksën, nëse Serbia reflekton.

“Edhe ne kemi dëshirë ta heqim taksën dhe synojmë ta heqim atë, sepse është edhe sugjerim i aleatëve tanë, pra i Shteteve të Bashkuara të Amerikës, por e ndërlidhim heqjen e saj me një marrëveshje gjithëpërfshirëse me Serbinë për njohje reciproke”, tha kryeministri Haradinaj.

Kosovo Präsident Hashim Thaci (picture-alliance/AP Photo/V. Kryeziu)

Unitet shoqëror dhe konsensus politik

Serbia nga ana e saj, sipas Presidentit Aleksandër Vuçiq, nuk e vazhdon dialogun me Kosovën përderisa qeveria në Prishtinë nuk e heq taksën e vendosur ndaj prodhimeve të Serbisë. Për pasojë dialogu vazhdon të mbetet i bllokuar. Nga ana tjetër është Presidenti i Kosovës, Hashim Thaçi ai, i cili po koordinon punët me ekipin negociator të Kosovës lidhur me dialogun me Serbinë. Në një takim të zhvilluar të hënën ndërmjet dy bashkëkryesuesve të grupit negociator, Fatmir Limaj dhe Shpend Ahmeti, Presidenti Thaçi u dorëzoi kryenegociatorëve një raport me disa pika lidhur me dialogun Kosovë-Serbi.

“Në funksion të koordinimit dhe harmonizimit të veprimeve tona shtetërore, edhe në formë të shkruar, i informova dy kryesuesit për temat që janë diskutuar deri më sot dhe rolin konstruktiv që ka ndjekur dhe duhet të vazhdojë të ndjekë Kosova në këtë proces. Ne u pajtuam që ky proces, i cili kërkon unitet shoqëror dhe konsensus politik, do të përfundojë me një marrëveshje gjithëpërfshirëse dhe ligjërisht të obligueshme. Kjo marrëveshje do t’ia sigurojë Kosovës anëtarësimin në BE, NATO dhe OKB”, është shprehur Presidenti i Kosovës, Hashim Thaçi.

Pejë-Te Shtatorja dhe Kulla e atdhetarit Haxhi Zeka

January 23, 2019 by dgreca

-Kryeministri Haradinaj bëri homazhe te Shtatorja dhe Kulla e atdhetarit Haxhi Zeka: Kontributi i Lidhjes së Pejës, e njohur edhe si Besëlidhja e Pejës, sepse njëri dokument është vetë besa e dhënë mes prijësve shqiptarë, të të gjitha trojeve, na mban edhe neve sot dhe falë asaj lidhje, falë angazhimit të atëhershëm mund të themi se e kemi Pejën sot, e kemi Kosovën/PEJË, 23 Janar 2019-Gazeta DIELLI/Per me shume foto shih ne facebook dielli vatra/

“Kontributi i Lidhjes së Pejës, e njohur edhe si Besëlidhja e Pejës, sepse njëri dokument është vetë besa e dhënë mes prijësve shqiptarë, të të gjitha trojeve, na mban edhe neve sot dhe falë asaj lidhje, falë angazhimit të atëhershëm mund të themi se e kemi Pejën sot, e kemi Kosovën”, kështu tha kryeministri Ramush Haradinaj, pas homazheve te Shtatorja dhe Kulla e atdhetarit Haxhi Zeka, me rastin e shënimit të 120 vjetorit të Lidhjes së Pejës.

Kryeministri Haradinaj tha se sot janë dy data, fillimi i punimeve të Kuvendit të Lidhjes së Pejës, që ka zgjatur deri më 28 janar dhe ka nxjerrë në atë kohë dy dokumente të rëndësishme, me të cilat është definuar e drejta e shqiptarëve.

“Lidhja e Pejës, të cilës i ka prirë Zekë Byberi, i njohur si Haxhi Zekë Byberi, edhe pse nuk ka arritur ta kryej misionin e vet, ka dërguar një porosi të shqiptarët, për të drejtën e shqiptarëve në atë kohë. E drejta jonë në atë kohë ka qenë e rrezikuar nga fqinjët, por kontributi i Lidhjes së Pejës, e njohur edhe si Besëlidhja e Pejës, sepse njëri dokument është vetë besa e dhënë mes prijësve shqiptarë, të të gjitha trojeve, jo vetëm të vilajetit të Kosovës, na mban edhe neve sot dhe falë asaj lidhje, falë angazhimit të atëhershëm mund të themi se e kemi Pejën sot, e kemi Kosovën”, tha kryeministri Haradinaj.

Kryeministri Haradinaj, tha se në të njëjtën kohë, është përvjetori i vrasjes së heroit, atdhetarit shqiptar Isa Boletini dhe në nderim të këtyre figurave janë bërë homazhe, duke dërguar porosinë se jemi në tokën tonë, nuk i kemi askujt borxh dhe nuk do të lejojmë më tutje të vazhdojnë projektet e të tjerëve që të merret prej nesh, prej shqiptarëve, prej tokës tonë, prej të drejtës tonë.

”Ne jemi të respektuar si popull, dimë t’i respektojmë ata që jetojnë me ne, dimë t’i respektojmë fqinjët, jemi mik për mikun, dimë ta respektojmë edhe armikun, por kanë ndryshuar kohërat, shqiptarët nuk japin më”, tha kryeministri Haradinaj.

Kryeministri Haradinaj, tha se këtë vit do të fillohet me autostradën më të madhe në Kosovë, atë Pejë-Prizren, dhe se Dukagjini nuk ka qenë kurrë më i përkrahur sesa tash me projektet nacionale./b.j/

Emërohen Ministri i Mbrojtjes dhe Komandanti i Forcës së Kosovës

January 22, 2019 by dgreca

-Zbulohet pllaka me mbishkrimin Ministria e Mbrojtjes e Republikës së Kosovës/

1 Prezantohet Min Mbro 2 zbulohet 1 mins Mbrojtjes 1 Betimi

-Ministri i Mbrojtjes, Rrustem Berisha: Falënderoj të gjithë partnerët ndërkombëtarë, Shtetet e Bashkuara të Amerikës, përfaqësuesit e NATO-s që janë këtu, në veçanti dua ta falënderoj kryeministrin e Kosovës, i cili në vazhdimësi, në të gjitha etapat e ka përkrahur transformimin e FSK-së dhe do të vazhdojë ta përkrahë 1 berisha Minister edhe në procesin e tranzicionit/

Gazeta DIELLI nga korrespondenti në Kosovë Behlul Jashari/

PRISHTINË, 22 Janar 2019/ Zyrtarizohen emërimi i Ministrit të Mbrojtjes së Kosovës dhe Komandantit të Forcës së Sigurisë të Kosovës.

Kryeministri i Kosovës, Ramush Haradinaj me vendimin e nxjerrë më datë 17 janar 2019, ka emëruar Ministër të Mbrojtjes Rrustem Berishën, i cili edhe më parë ishte ministër – i FSK-së. Vendim ka hy në fuqi më 20 janar 2019.

Po ashtu edhe Presidenti i Kosovës, Hashim Thaçi, ka emëruar sot zyrtarisht Komandant të FSK-së gjenerallejtënant Rrahman Ramën me mandat 5 vjeçar.

“Komandantin e Forcës së Sigurisë, gjenerallejtënantin Rrahman Rama, duke u bazuar në përgjegjësitë e mia kushtetuese dhe ligjore, e dekretova edhe për një mandat të ri pesëvjeçar. Komandanti Rama u betua se do të vazhdojë t’i shërbejë atdheut dhe mbrojtjes së qytetarëve tanë. Jam i bindur se gjenerallejtënant Rama do t’i kryejë me zell, nder dhe dinjitet të gjitha detyrat e tij. Ai ka dhënë kontribut të rëndësishëm në tranzicionin e deritashëm dhe mandati i tij i ri do të jetë vazhdim i forcimit dhe konsolidimit të mëtejmë të forcës sonë.”, shprehet Presidenti Thaçi.

Edhe Ministria e Mbrojtjes së Republikës së Kosovës bën të ditur se Komandanti i Forcës së Sigurisë të Kosovës, gjenerallejtënant Rrahman Rama u betua para Presidentit të Republikës se do të vazhdojë t’i shërbejë atdheut dhe mbrojtjes së qytetarëve të Kosovës.

Pas votimit të tre projektligjeve për Ministrinë e Mbrojtjes dhe FSK-në, nga deputetët e Kuvendit të Kosovës, nënshkrimit nga Presidenti Hashim Thaçi, si dhe pas publikimit në Gazetën Zyrtare, dje më 21 janar 2019, solemnisht u bë zyrtarizmi i Ministrisë së Mbrojtjes dhe procesi i tranzicionit të FSK-së në Ushtri të Kosovës.

Kryeministri i Republikës së Kosovës, Ramush Haradinaj, së bashku me ministrin e Mbrojtjes, Rrustem Berisha dhe komandantin e Forcës së Sigurisë së Kosovës, Gjenerallejtënant Rrahman Rama, dje kanë bërë zbulimin e pllakës me mbishkrimin Ministria e Mbrojtjes, ceremoni kjo e zhvilluar në Ministrinë e Mbrojtjes.

Pas zbulimit të pllakës, kryeministri Haradinaj ka zhvilluar një takim me ministrin e Mbrojtjes, Rrustem Berisha, komandantin e Forcës së Sigurisë së Kosovës, Gjenerallejtënant, Rrahman Rama, dhe përfaqësues tjerë të ministrisë së Mbrojtjes, të cilët i ka uruar për këtë fazë të re të funksionimit, duke vlerësuar se Forca e Sigurisë së Kosovës do të jetë forcë multietnike dhe profesionale, e gatshme për të kontribuuar në forcimin e paqes dhe të stabilitetit në Kosovë, rajon dhe më gjerë.

Pas zbulimit të pllakës, ministri i Mbrojtjes, Rrustem Berisha, tha se sot është një ditë e veçantë për Ministrinë tonë, për Forcën e Sigurisë së Kosovës, për të gjithë qytetarët e Kosovës dhe që nga sot do të ndryshojë emërtimi i Ministrisë në Ministri të Mbrojtjes.

Më pas, ministri Berisha falënderoi të gjithë ata që kontribuuan që Ministria e Forcës së Sigurisë të shndërrohet në Ministri të Mbrojtjes dhe Forca e Sigurisë të shndërrohet në ushtri të Kosovës.

“Zyrtarisht që nga sot është dita e parë kur fillon procesi i tranzicionit të Forcës së Sigurisë së Kosovës në ushtri të Kosovës. Dua t’i falënderoj të gjithë partnerët ndërkombëtarë, Shtetet e Bashkuara të Amerikës, përfaqësuesit e NATO-s që janë këtu, në veçanti dua ta falënderoj kryeministrin e Kosovës, i cili në vazhdimësi, në të gjitha etapat e ka përkrahur transformimin e FSK-së dhe do të vazhdojë ta përkrahë edhe në procesin e tranzicionit”, tha ministri Berisha dhe shtoi se i tërë procesi i tranzicionit do të jetë një proces gradual, transparent dhe është paraparë një plan dhjetëvjeçar i arritjes së kapaciteteve të mbrojtjes.

Duke folur rreth mandatit të ri, ministri Berisha tha se Forca e Sigurisë së Kosovës do të jetë forcë multietnike, profesionale që do të jetë e përfaqësuar nga të gjithë qytetarët e Kosovës, në interes të gjithë qytetarëve të Kosovës, por edhe në interes të ndërtimit të paqes dhe stabilitetit në rajon dhe më gjerë.

Ministri Berisha falënderoi kryeministrin Haradinaj për mbështetjen dhe përkrahjen e dhënë në të gjitha etapat.

Në ceremoninë e zbulimit të pllakës me mbishkrimin Ministria e Mbrojtjes, përveç kryeministrit të Republikës së Kosovës, Ramush Haradinaj, ministrit të Mbrojtjes, Rrustem Berisha, komandantit të FSK-së, gjenerallejtënant Rrahman Rama, ishin të pranishëm edhe zëvendësministri Agim Çeku, zëvendësministri Burim Ramadani, sekretari i përgjegjshëm Shkëlzen Sylaj, gjenerali Gëzim Hazrolli, gjenerali Zymer Halimi, si dhe stafit i lartë i Ministrisë dhe FSK-së.

Në 13 shtator 2018, Qeveria e Kosovës, bazuar në të drejtën e saj kushtetuese, ka miratuar pakon e projektligjeve që rregullojnë rolin, funksionin dhe shërbimin në Forcën e Sigurisë së Kosovës.

Në 18 tetor 2018 në Kuvendin e Kosovës në shqyrtim të parë pa asnjë votë kundër e asnjë abstenim u miratuan tre Projektligjet – për Ministrinë e Mbrojtjes, për Forcën e Sigurisë së Kosovës dhe për shërbim në Forcën e Sigurisë së Kosovës.

Pakoja e tre projektligjeve për Forcën e Sigurisë së Kosovës Ushtri është miratuar me unanimitet edhe në shqyrtim të dytë nga Kuvendi i Republikës së Kosovës 120 anëtarsh me 107 deputetë në sallë në seancën e 14 dhjetor 2018 dhe kjo vlerësohet ngjarja e vitit.

Pas seancës së Kuvendit – të vendimit për transformimin e FSK-së, është zhvilluar edhe një ceremoni – pritje shtetërore festive në ambientet e Ministrisë së Forcës së Sigurisë së Kosovës, e cila me ligj tani është Ministri e Mbrojtjes.

Në 28 dhjetor 2018 Presidenti i Republikës së Kosovës, Hashim Thaçi, ka dekretuar tre ligjet që e ndryshojnë mandatin dhe misionin e Forcës së Sigurisë së Kosovës.

Pas shpalljes së pavarësisë së Kosovës në 17 shkurt 2008, Forca e Sigurisë së Kosovës është aktivizuar nga janari 2009, kur u deaktivizuan Trupat Mbrojtëse të Kosovës, të cilat lindën nga transformimi i Ushtrisë Çlirimtare të Kosovës dhe lujtën rolin e tyre shumë të rëndësishëm në nëntë vitet e pas luftës së përfunduar në qershorin 1999.