MUSLI MULOSMANAJ, ATDHETARI QË ECI GJURMËVE TË BINAK ALISË

May 3, 2017 by dgreca

Nga Harry Bajraktari /Mbrëm vonë në New York ndërroi jëtë Musli Mulosmanaj, nacionalist i shquar, legalist dhe antikomunist i përbetuar i komunitetit shqiptar në SHBA dhe trashëgimtari më vjetër i familjes së Binak Alisë. Vdekja e mori pas një sëmundje të rëndë, duke e lënë familjen e tij të pikëlluar, miq e dashamirë të shumtë në SHBA, në Shqipëri, në Kosovë dhe në viset tjera shqiptare, e sidomos në Malësinë e Gjakovës, nga edhe është origjina e tij. I ndjeri Musli Mulosmanaj është bartës i titullit” Kalorës i urdhërit të Skënderbeut”, të ndarë nga presidenti i Shqipërisë, Bujar Nishani.

***

Musli Mulosmanaj, vjen nga dera e madhe e familjes së Binak Alisë, një burrë i përkushtuar pas Shqipërisë etnike dhe Monarkisë Mbretërore, i cili, me dashuri të jashtëzakonshme, kultivoi traditat, ndjenjën dhe virtytin e të parëve të tij, Binak Alisë, Shaban Binakut, Ali Binakut dhe të plejadës tjetër të Mulosmanajve që luftuan me vite kundër Perandorisë Osmane, kundër serbëve e malazezëve, kundër fashizmit, nacizmit dhe kundër komunizmit të Enver Hoxhës.

I ndjeri, Musli Mulosmanaj, ishte një burrë fisnik e bujar, inteligjent, me një qytetërim tradicional shqiptar, gjithmonë të vërtetën dhe të drejtën e ka vlerësuar si virtyt dhe moral në hap me kohën. Qysh në moshë të re i ra të përballej me tiraninë komuniste të Enver Hoxhës, ku arriti të shpëtonte kokën me një pjesë të familjes së tij, pasi u arratis në Kosovë, në Janarin e vitit 1949. Këtij nacionalisti të familjes së Binak Alisë i ra të përplasej me shumë sfida: me fashizmin e Musolinit, me Shqipërinë komuniste të Enver Hoxhës, pastaj si emigrant në Kosovë për 17 vjet dhe një vit me punë të detyruar në Serbi dhe Vojvodinë, me UDB-en e Jugosllavisë dhe, më në fund, fati për të mos qenë aq mizor ndaj tij, e solli në Amerikë në vitin 1967. Përkundër kësaj, shpirtit i tij kishte mbetur tek pjesa tjetër e familjes, ku regjimi i Hoxhës i kishte torturuar dhe zhdukur në kampet e internimit në Shqipëri.

Në New York, në qendrën më të madhe botërore, gjeti emigracionin politik nga Shqipëra dhe Kosova me të cilin filloi të bashkëpunonte ngusht për çështje kombëtare, për një Shqipëri etnike me një rend demokratik perëndimor. Emigracioni politik i asaj kohe, kur emigroi i ndjeri Musli Mulosmanaj në SHBA, ishte i organizuar në parti të ndryshme nacionaliste dhe vinte nga anë të ndryshme të atdheut etnik. Së bashku me Canin, Hysenin dhe Abedinin, iu bashkuan Organizatës Kombëtare, Lëvizja e Legalitetit (OKLL). Musli Mulosmanaj i njohur si antisllav e antikomunist, ka mbajtur kontakte me gjithë përfaqësuesit e organizatave nacionaliste që ideal dhe përkushtim kishin bashkimin e Shqipërisë me Kosovën dhe me viset tjera shqiptare në një shtet të përbashkët demokratik, si me Dr. Rexhep Krasniqin, Ing. Xhafer Devën, Selim Damanin, Abaz Kupin, Mehmet Agë Rashkocin, Vasil Germënjin, Fuad Myftinë, Ago Agajn, Hysen Tërpezën, Hysen Beg Prishtinën, Mexhid Dibrën, Dom Zef Uroshin, Xhemail Laçin dhe me të pandashmin, Imam Isa Hoxhën, që vinte nga Bytyçi i Malësisë së Gjakovës.

Në vitet e 70-ta, më herët e më pas, ky emigracion i paraqiste Departamentit të Shtetit Amerikan kërkesat që të mbështeste rrëzuarjen e regjimit komunist dhe t’ i hapej rruga e demokracisë edhe popullit në Shqipëri, dera e të cilit ishte e blinduar nga diktatori Hoxha.

Musli Mulosmanaj u lind më 10 Gusht 1930 në Fang të Bujanit, në Malësinë e Gjakovës. Është djali i madh i Çelë Shabanit, sëtrnip i Binak Alisë dhe nip i Shaban Binakut. Kjo familje ka dhënë shumë heronj e dëshmorë të kombit, dhe në kohën kur Shqipëria ra në duar të komunizmit – regjimi i Enver Hoxhës ekzekutoi, burgosi dhe internoi familjen e tij.

Pas një aktiviteti intensiv që zhvilloi për një kohë të gjatë për çështjen kombëtare, në vitin 1986 mori detyrën e kryetarit të Degës së Organizatës Kombëtare Lëvizja e Legalitetit për New York dhe New Jersey, që ishte një ndër degët më të mëdha në botën e lirë shqiptare. Këtë detyrë e kreu me përgjegjësi të lartë deri në vitin 1991. I ndjeri Musli që nga ardhja e tij në Amerikë, ishte edhe anëtar i Këshillit të Xhamisë, ku bashkëpunoi ngusht me klerikët atdhetarë, tani edhe ata të ndjerë, Isa Hoxhën, Sali Efendi Miftinë dhe me priftin Zef Oroshin. Është i njohur bashkëpunimi dhe kontributi i tij me komunitetet fetare të shqiptarëve të Amerikës.

Musli Mulosmanaj ka marrë pjesë në të gjitha demonstratat dhe protestat që komuniteti i shqiptarëve nacionalistë në SHBA i ka organizuar kundër regjimit serb e jugosllav për çështjen e Kosovës dhe kundër regjimit diktatorial të Enver Hoxhës.

Musli Mulosmanaj dhe Mulosmanajt e tjerë në SHBA, duke u nisur nga tradita shumëvjeçare e bashkëpunimit me Mbretin e Shqiptarëve Zgu I, ku këto ndërlidhje i kishte vendosur Ali Binaku, u thelluan edhe më fuqishëm me Mbretin Leka I dhe me Princin Leka II. Musli Mulosmanaj, Mbretin Leka I, për herë të parë e kishte takuar në New York në vitin 1968. Sa herë që ai vinte në SHBA, e ka takuar dhe ka biseduar me të për Shqipërinë etnike. Mbreti ishte shumë i përkushtuar ndaj kësaj çështje të madhe kombëtare, e sidomos për Kosovën, e cila ndodhej e okupuar nga Serbia.

Me të ndjerin Musli Mulosmanaj dhe familjen e tij ishim në miqësi të përhershme. Ai ishte i lidhur ngusht me babain dhe gjyshin tim. Këtë miqësi me të ndjerin e vazhdova pastaj unë. Gjatë dy dekadave të fundit, në të gjitha udhetimet për çështjet kombëtare në Kosovë, Shqipëri dhe në trojet tjera etnike kemi qenë bashkë. Bashkë vepruam edhe në aktivitetet tona për lirinë dhe pavarësinë e Kosovës, si dhe për shqiptarët në përgjithësi në Washington dhe në New York.

Në Qershor të vitit 1988 kur ishte kryetar i Degës së OKLL-së për New York dhe New Jersey, në Kishën Katolike Sant Ritas në Bronx, takoi dhe përshëndeti të famshmën e shqiptarëve, Nënë Terezen, fituesen e Çmimit Nobel për paqe.

Mik të tij e kishte edhe presidentin e Kosovës, Dr. Ibrahim Rugova, kongresmenin Eliot Engel, Dr. Sali Berishën, Ramush Hardinajn, ish presidentin Fatmir Sejdiun, presidentin e Shqipërisë z. Bujar Nishani etj. Duke qenë përkrahës i politikës së Dr. Ibrahim Rugovës, bashkë me të morëm pjesë edhe në varrimin që u bë më 26 Janar 2006 në Prishtinë. E donte shumë Kosovën. Atje kaloi 17 vjet në një moshë relativisht të re. Ka përcjellë të gjitha ngjarjet dhe ka kontribuar për lirinë dhe pavarësinë e saj. Mori pjesë në të gjitha protestat dhe demonstratat që u organizuan në New York dhe Washington kundër politikës hegjemoniste serbe dhe kundër diktatorit Hoxha.

Përballë ekzekutimeve e burgosjeve të meshkujve të familjes së tij, vizitoi Avdyl Qerimin në burgun e Burrelit dhe Hazir Sylën në burgun e Durrësit, në kërkim të këtij të fundit për t’ i dërguar disa rrobe të nevojshme dhe pak ushqim. Kujtimet e tij nga ato ditë ishin trishtuese, aq më tepër, kur ky si i ri ndodhej përballë mizorive. Pas vdekjes së babait Çelë Shabanit në mënyrë misterioze në një spital të Nishit, merr drejtimin e familjes, derisa bënte jetë emigranti në Kosovën e pushtuar.

Musli Mulosmanaj mbetet njëri ndër nacionalistet e shquar nga Komunitetit i shqiptarëve të Amerikës, për kontributin e tij që ka dhënë në çështjen kombëtare që nga vitet e 70-ta të shekullit të kaluar. Këtë aktivitet e vazhdoi deri në frymën e fundit kur i mbylli sytë përgjithmonë.

Vepra që la pas i ndjeri Musli Mulosmanaj, do të zë vend gjithmonë në zemrat e nacionalistëve shqiptarë, të legalistëve dhe të antisllavëve. Do të përkujtohet gjithnjë si një atdhetar i devotshëm, që ai dhe paraardhësit e tij i dhanë Shqipërisë, Kosovës dhe viseve tjera etnike shqiptare.

I qoftë dheu i lehtë!

New York, 3 Maj, 2017.

TAKIMI I BASHES ME RAMEN NE PRESIDENCE, PA MARREVESHJE, VIJOJNE KONTAKTET

May 3, 2017 by dgreca

CFARE THA BASHA NE CADER DHE RAMA NE KRYEMINISTRI PAS TAKIMIT 3 ORESH?/

Me ftesë të Presidentit të Republikës, Sh.T.Z. Bujar Nishani sot, e Merkure 3 Maj 2917, u zhvillua një takim midis Kryeministrit të vendit z. Edi Rama dhe Liderit të opozitës z. Lulzim Basha.

Gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj.

Presidenti i Republikës vijon të mbajë kontaktet me palët për gjetjen e një zgjidhjeje të mundshme mbi bazë kompromisi.

Ky eshte njoftimi i percjelle nga Presidenca pas takimit, por burime nga partite pjesmarrese ne takim konfirmojne se nuk eshte arrité marreveshja aq shume e mirepritur edhe nga faktori nderkombetar. Pas 3 oresh bisedime, ka ene Edi Rama dhe Gramoz Ruci, qe kane dale nga presidenca, nderkohe qe Basha me Paloken kane dale 50 minuta me pas. Pas dalles nga présidence Lulzim Basha ka thirre aleatet ne seline e PD per t’i informuar per bisedimet dhe rrugezgjidhjen.

CFARE THANE PAS TAKIMIT

Basha: Do eksplorojmë të gjitha mundësitë për kompromis/

Lulzim Basha, nga çadra e opozitës në bulevard, ka deklaruar se do të shqyrtojë të gjitha mundësitë për një marrëveshje politike me rivalin e tij politik.“PD dhe unë personalisht nuk do të lëmë asnjë mundësi pa eksploruar për një kompromis politik, që të garantojë zgjedhje të lira e të ndershme”, ka deklaruar Basha. Sipas tij, situata kritike në të cilën ndodhet Shqipëria ka tërhequr vëmendjen e kancelarive perëndimore, pavarësisht lobistëve të punësuar nga qeveria për pasqyrimin e një situate tjetër. “Pa zgjidhje për krimin e veshur me pushtet dhe drogën e paratë e drogës, zgjedhje politike nuk ka e nuk do të ketë”, ka thënë Basha, që ka shtuar se nga ana tjetër nuk do të ketë as bojkot. “Nuk do të ketë as bojkot, se ne duarkryq nuk do të rrimë ndaj kësaj kupole krimi, që përpiqet të tërheqë qytetarët për t’u mohuar atyre të drejtën për të zgjedhur parlamentin pa paratë e krimit dhe drogës”, ka thënë Basha. “Shanset për një kompromis po zëvendësohen dita ditës nga shanset e një republike të re që do të vijë për të gjithë shqiptarët. Të dielën në orën 11 do të jemi në Kavajë, paqësorë, për të çliruar Kavajën nga krimi, droga, pasiguria e poshtërimi”, ka shtuar kreu i PD.

Rama: PD-së, sistem monitorimi të strukturave shtetërore/Kryeministri Rama ka deklaruar pasditen e së mërkurës se opozitës i janë dhënë të gjitha mundësitë për të monitoruar procesin zgjedhor në nivele të barabarta me qeverinë.“Një monitorim si asnjëherë më parë të gjithë strukturave të shtetit, policisë, drejtorive të arsimit, sistemit të burgjeve, ku janë dhe pikat e adresuara si problematike në raportet e mëparshme të ODIHR-it”, ka deklaruar Rama. Dhe njëkohësisht, ka shtuar ai, me PD është rënë dakord për një rregullore që të shmanget përdorimi i aseteve shtetërore në fushatë, përfshirë një kategori të caktuar aktivitetesh qeveritare që nuk mund të përdoren gjatë saj. “Më shumë se kaq nuk mund të ketë. Është një mekanizëm monitorimi që në kohën e Saliut nuk do ta kisha menduar”, ka thënë Rama. Ai ka shtuar se, mazhoranca nuk është në pritje të një përgjigjeje nga PD, por po vazhdon punën për t’u përgatitur për procesin elektoral të Kavajës dhe më pas atë të qershorit. “Ne nuk presim përgjigje, ne jemi në angazhim të plotë elektoral. Unë s’kam një takim tjetër, por këtu jam, i gatshëm për të ofruar garanci. Shtyrja e datës së zgjedhjeve nuk është diskutuar”, ka shtuar Rama.

PPE: Bojkoti i zgjedhjeve jo në përputhje me standardet e BE

May 2, 2017 by dgreca

Presidenti i PPE-së, Joseph Daul zbarthi në mbrëmje në detaje të gjithë mbledhjen e grupit parlamentar demokrat me dyer të mbyllura.Ne njoftimin për shtyp thuhet se Daul bëri të qartë se bojkoti i zgjedhjeve apo i Parlamentit nuk është në përputhje me standardet e BE-së dhe PPE-së.

NJOFTIMI I PLOTE I PPE

Pas një bisede telefonike me Kryetarin e Partisë Demokratike të Shqipërisë (PDSH), Lulzim BASHA dhe grupin parlamentar të PDSH, Presidenti i PPE Joseph DAUL bëri deklaratën e mëposhtme:

“Kam pasur një shkëmbim të frytshëm dhe të sinqertë të pikëpamjeve me kryetarin e PDSH-së Lulzim Basha dhe grupin parlamentar të PDSH-së. Objektivi i video konferencës së sotme ishte para së gjithash thirrja e partisë anëtare të PPE në Shqipëri që të kontribuojë në mënyrë konstruktive drejt një zgjidhje që çon në pjesëmarrjen e PDSH- së në zgjedhjet e ardhshme parlamentare dhe në ruajtjen e qetësisë dhe përmbajtjes nga çdo lloj dhune.

PPE dhe partia e saj anëtare PD ndajnë mendimin se një luftë më e fortë kundër drogës është vendimtare si për Shqipërinë ashtu edhe për BE. Unë përgëzoj partinë tonë anëtare për vënien e luftës kundër drogës në krye të axhendës politike. Në lidhje me këtë, pajtohem dhe do të mbështes, se BE duhet të forcojë monitorimin e zbatimit të planit të veprimit 2017-2020 për luftën kundër kultivimit dhe trafikimit të kanabisit. Për më tepër, BE duhet të forcojë mbështetjen e saj financiare për përfundimin e vëzhgimit ajror të të gjithë territorit shqiptar me qëllim identifikimin e plantacioneve të kanabisit dhe monitorimin e shkatërrimit të tyre.

Regjistrimi dhe pjesëmarrja në zgjedhjet e ardhshme të të gjitha palëve është e domosdoshme. Gjithashtu kam përsëritur se asnjë bojkot i zgjedhjeve apo i Parlamentit nuk janë aspak në përputhje me standardet e Bashkimit Evropian apo të PPE-së. Në këtë kontekst unë u sigurova nga PDSH se partia do të angazhohet në negociata të mëtejshme konstruktive me shumicën qeverisëse në mënyrë që të gjejë një zgjidhje për këtë qëllim.

Për më tepër, unë theksova se kompromisi i propozuar nga nënpresidenti i PPE-së, David McAllister, javën e shkuar përcaktoi prioritetet e duhura për të siguruar që zgjedhjet të jenë në përputhje me standardet ndërkombëtare. Në këtë drejtim, u bëj thirrje të gjitha palëve të angazhohen sinqerisht në gjetjen e një zgjidhjeje politike “

Rama e Basha: Gati të ulemi te Nishani… Basha: Rama të japë dorëheqjen

May 2, 2017 by dgreca

*Basha: Duam garanci të vërteta. Gati të shkojmë tek Nishani/

*Në Shqipëri kryeministri Edi Rama dhe kryetari i opozitës Lulzim Basha ju përgjigjën sot pozitivisht thirrjes së presidentit Bujar Nishani që palët të ulen në tryezën e bisedimeve me vullnetin për kompromis. Ndërkohë pasdite zoti Basha ka njoftuar një mbledhje urgjente të grupit parlamentar të partisë së tij ku pritet që të ketë dhe një komunikim direkt të deputetëve me Komisionerin për Zgjerim Johannes Hahn.

1 Rama Basha Duket se një përpjekje e re do të ndërmerret për gjetjen e një zgjidhjeje që do të mundësonte pjesmarrjen e opozitës në zgjedhjet e 18 qershorit. Pasdite, presidenti Bujar Nishani përmes një deklarate u shpreh “i shqetësuar për përmasat që po merr kriza politike në vend”. Presidenti ju drejtua me një thirrje kryeministrit Edi Rama dhe kreut të opozitës “të ulen në tryezën e bisedimeve me vullnetin për kompromis, për të tejkaluar këtë situatë të vështirë për vendin” duka saktësuar se ai “ofron të gjithë gatishmërinë dhe angazhimin e tij institucional në shërbim të këtij dialogu”.

I pari që ju përgjigj publikisht ftesës, përmes një statusi në Facebook, ishte kryeministri Rama, i cili shkruante se ishte “po aq i shqetësuar për krizën” e cila sipas tij, ndryshe nga vlerësimi i Presidenti, është “krizë e Partisë Demokratike”. Ndonëse e cilëson “të vonuar” thirrjen e presidentit, ai shton se është gati të ulet me Lulzim Bashën.

Nga ana e saj opozita tha se e mirëpret ftesën e presidentit Nishani, ndërsa vë në dukje se “ndonëse shkaktari i kësaj krize, Edi Rama, me veprimet dhe qëndrimet e tij ka vendosur interesin e tij vetjak para interesave të qytetarëve shqiptarë, opozita dhe Partia Demokratike kanë kërkuar gjithmonë rrugën e dialogut të vërtetë dhe jo fasadë për t’u bashkuar në luftën kundër krimit, drogës, korrupsionit dhe kthimit të shtetit në garnizon elektoral të pushtetit, që kërcënojnë asgjësimin e zgjedhjeve, demokracisë dhe stabilitetit përmes zgjidhjes së ofruar”, shkruhet në deklaratën e koalicionit opozitar.

Javën e shkuar përpjekja për ndërmjetësim e eurodeputetëve David McAllister dhe Knut Fleckenstein dështoi. Palëve ju paraqit një dokument kompromisi, por opozita këmbënguli në kërkesën për qeveri teknike. Dje disa prej figurave të Partisë Demokratike e konsideruan një shans të humbur, refuzimin e propozimeve të eurodeputetëve. Deputeti Eduard Selami, i cili foli në një interviste për Zërin e Amerikës, deputetja Majlinda Bregu apo dhe ish numri dy i partisë Demokratike për shumë vite Jozefina Topalli, kritikuan publikisht zotin Basha se po merr vendime pa i diskutuar ato më parë me forumet e partisë.

Pas këtyre kritikave zoti Basha ka njoftuar thirrjen sot pasdite të mbledhjes së grupit parlamentar të Partisë Demokratike, ndonëse gjatë fjalës së tij në çadrën ku opozita proteston prej më shumë se dy muaj nënvizoi se nuk do të ketë tërheqje: “Kush më kërkon mua, shqiptar apo i huaj, pazar me Edi Ramën, për hir të stabilitetit pa demokraci, duhet ta kuptojë se ajo që ka lindur me 18 shkurt, është më e madhe se Partia Demokratike, është më e madhe se opozita, patjetër, është më e madhe se Lulzim Basha, më e madhe se Shqipëria dhe shqiptarët”.

Megjithatë duket se përpjekjet edhe të komunitetit ndërkombëtar nuk kanë rreshtur. Gjatë mbledhjes së sotme të grupit parlamentar të PD pritet që të ketë një komunikim direkt edhe me Komisionerin europian për Zgjerimin Johannes Hahn.

Nga ana tjetër komuniteti ndërkombëtar duket se po e shton trysninë e tij edhe duke i mëshuar faktit se zgjedhjet do të njihen dhe në rast të mospjesmarrjes së opozitës. Pas ambasadorit amerikan Donald Lu, I cili tha se “zgjedhjet mund të jenë të ligjshme dhe legjitime dhe pa pjesmarrjen e opozitës”, sot edhe ambasadorja gjermane Suzanne Schutz, u shpreh se “nëse Partia Demokratike dhe partitë e tjera opozitare vazhdojnë t’i mbeten qëndrimit të tyre për të mos marrë pjesë, ky do të jetë një vendim i trishtueshëm për ne. Por ne do t’i njohim këto zgjedhje”, deklaroi ambasadorja gjermane.

***

Basha: Duam garanci të vërteta. Gati të shkojmë tek Nishani/

Kryetari i Partisë Demokratike, Lulzim Basha, tha se për opozitën mjafton që kryeministri Rama të japë dorëheqjen e të ndërtohet një qeveri teknike dhe kjo është garancia për zgjedhjet e ardhshme.

“Rama po mban peng vendin, duke refuzuar të japë dorëheqjen. Ne nuk jemi problemi dhe ne nuk mund të lëmë qytetarët në dorë të një qeverie të delegjitimuar”.

Zoti Basha tha, pas një mbledhje të gjatë të grupit parlamentar, se opozita është e gatshme të diskutojë dhe kërkon të ofrojë garanci të vërteta nga qeveria për zgjedhjet.

Më herët Partia Demokratike dhe Koalicioni Opozitar deklaruan se mirëpritnin ftesën e Presidentit të Republikës Bujar Nishani për dialog, që të zgjidhet kriza politike.

“Shkaktari i kësaj krize, Edi Rama, me veprimet dhe qëndrimet e tij ka vendosur interesin e vetjak para interesave të qytetarëve shqiptarë, ndërsa opozita dhe Partia Demokratike kanë kërkuar gjithmonë rrugën e dialogut të vërtetë dhe jo fasadë, për t’u bashkuar në luftën kundër krimit, drogës, korrupsionit, të cilat kërcënojnë asgjësimin e zgjedhjeve” – theksohet në deklaratën e opozitës.

(Zeri i Amerikes)

Basha mbledhje urgjente me grupin parlamentar

May 2, 2017 by dgreca

Pas më shumë se dy muaj nga vendimi për të radikalizuar protestën me hyrjen në çadër, kreu demokrat Lulzim Basha ka thirrur këtë të martë në selinë e partisë mbledhjen e grupit parlamentar.

Mbledhja është thirrur në orën 18:30 dhe zërat brenda PD-së bëjnë me dije që ajo të ketë lidhje me kritikat që një ditë më parë adresuan për lidershipin deputetët Bregu, Topalli dhe Selami.

Tre deputetët i kërkuan një ditë më parë kryetarit të PD-së të mbledhë urgjent forumet drejtuese të partisë për të diskutuar vendimmarrjen e bërë publike për të mos hyrë në zgjedhje, një vendimmarrje që nuk është diskutuar në asnjë nga forumet drejtuese.

Një muaj më parë kryetari i PD-së e thiri mbledhjen e grupit në praninë edhe të Kryesisë së partisë si dhe të krerëve të Departamenteve në selinë blu.

Mbledhja pritet të ketë në thelb të diskutimit situatën politike dhe vendimin për të mos u bërë pjesë e zgjedhjeve, vendim që do të shoqërohet me debate brenda grupit.