Ilirian Agolli – Dielli

Tiranë: Ambasada Amerikane gati të marrë masa ndaj atyre, që nxitin apo pranojnë dhunën gjatë zgjedhjeve

March 26, 2021 by dgreca

KQZ ka kërkuar hetime të thelluara për 28 kandidatë për deputetë: 5 nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.

Nga Ilirian Agolli/ VOA

Me hapjen zyrtare të fushatës zgjedhore për parlamentin e ri ambasada e SHBA-ve në Shqipëri gjeti edhe një herë rastin t’u bëjë thirrje publike udhëheqësve partiakë që të refuzojnë qartas dhunën, dhe kandidatët për deputetë të zbatojnë ligjet vendase dhe standartet ndërkombëtare.

Ambasada amerikane deklaroi se Shtetet e Bashkuara i kanë bërë të qarta pritshmëritë dhe shpresat e veta, si mike dhe aleate e Shqipërisë.

“Ne do të marrim masat e duhura në përgjigje të atyre që pranojnë ose nxisin dhunën, pranojnë ose nxisin shkeljen e ligjeve zgjedhore dhe standardeve ndërkombëtare, apo përpiqen të minojnë integritetin dhe besimin në procesin zgjedhor dhe rezultatet e tij” – thuhet në deklaratën e ambasadës amerikane. – Ne do t’i mbajmë përgjegjës udhëheqësit, që janë në poste drejtuese dhe kanë përgjegjësinë e parë dhe më të rëndë për të vepruar në interesat e vendit”.

Ambasada amerikane i ftoi qytetarët të zgjedhin ato parti dhe kandidatë, që ofrojnë të ardhmen më të mirë për Shqipërinë, në partneritet me Shtetet e Bashkuara dhe drejt anëtarësimit të plotë në Bashkimin Europian.

Prej shumë muajsh ambasada amerikane po këmbëngul që partitë politike të mbajnë larg listave të kandidatëve personat me rekorde kriminale dhe korruptive.

Në deklaratat e saj është përmendur emri i Tom Doshit, që institucionet të pengojnë hyrjen e tij në parlamentin e ri.

I pyetur për këtë, kryetari i Komisionit Qendror Zgjedhor, Ilirjan Celibashi, deklaroi në konferencën e sotme të shtypit se e ka dërguar për verifikim emrin e Doshit në institucionet përkatëse.

“Në rastin e zotit Doshi KQZ ka marrë shtysën nga të dhëna publike, që e nxitin t’i kërkojë prokurorisë informacione të tjera, veç atyre që ai ka dhënë në formularin e vetëdeklarimin, për të bërë vlerësim më të plotë mbi përputhshmërinë e kandidimit të tij për deputet. Por edhe në formularin e vetëdeklarimit ka të dhëna që shërbejnë si indicie për KQZ-në, për të kërkuar hetim të thelluar për kandidatin” – tha zoti Celibashi.

Ai shtoi se bashkë me zotin Doshi, KQZ ka kërkuar hetime të thelluara për 28 kandidatë për deputetë: 5 nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.

Tiranë: Opozita angazhohet që reforma zgjedhore të kryhet brenda majit

May 26, 2020 by dgreca

Nga Ilirian Agolli-Tirane- Zeri I Amerikes/

Opozita u angazhua sërish sot që të bëjë gjithçka sa i takon asaj për të përmbyllur reformën zgjedhore brenda datës 31 maj.

“Jemi të vendosur për këtë betejë. Do të bëjmë gjithçka që të garantojmë vullnetin politik për ta zbatuar ligjin, në mënyrë që kjo krizë e thellë politike, kushtetuese dhe institucionale të marrë rrugëzgjidhje përmes zgjedhjeve të lira e të ndershme” – tha kryetari i Partisë Demokratike, Lulzim Basha.

Ai i bëri këto këto komente pas një takimi me ambasadoren e SHBA-ve në Shqipëri, Yuri Kim.

“Shqiptarët duhet të zgjedhin parlamentin dhe qeverinë, që meritojnë me votën e tyre dhe Shqipëria të ecë përpara, të mos mbahet peng i së shkuarës, por të hapë rrugën e integrimit europian dhe anëtarësimit të Shqipërisë në BE, që është dhe mbetet një nga zotimet kryesore ekzistenciale të PD që nga dita e saj e parë” – tha zoti Basha.

Ambasadorja e SHBA-ve, Yuri Kim, deklaroi se diskutimi me zotin Basha u bazua në të ardhmen, jo për të shkuarën.

“Udhëheqësit shqiptarë duhet të përmbushin pritshmëritë e popullit shqiptar për të përfunduar reformën zgjedhore deri në 31 maj. Ky është një afat kohor që e kanë vendosur vet udhëheqësit në bindjen e tyre. Opozita ka një punë të madhe përpara, por ndihem e inkurajuar nga diskutimi i sotëm dhe pres rezultate” – tha ambasadorja Kim.

Partia Demokratike falenderoi diplomaten amerikane për mbështetjen ndaj reformës zgjedhore.

“Organizimi i zgjedhjeve të lira e të ndershme është përparësi absolute e Partisë Demokratike, i opozitës së bashkuar dhe i të gjithë shqiptarëve. Ne jemi të vendosur të bëjmë gjithçka për t’u garantuar shqiptarëve mundësinë që t’u drejtohen një orë e më parë kutive të votimit dhe të zgjedhin qeverinë e tyre me votën e tyre të lirë, të pandikuar nga bandat kriminale, të pandikuar nga shitblerja e votës, të pandikuar nga paratë e korrupsionit” – tha zoti Basha.

Po sot, rinisi punën Këshilli Politik i Reformës Zgjedhore. Opozita paraqiti aty propozime për transparencën e financimeve partiake.

Fondet e dyshimta në arkat e partive politike kanë sjellë prej vitesh shqetësimin se prapa tyre qëndrojnë kapja e shtetit nga korrupsioni i niveleve të larta.

Opozita jashtë-parlamentare shkoi sot në tryezën e reformës zgjedhore me disa propozime mbi financimin e partive, mbi kuotat gjinore dhe përcaktimin e periudhave zgjedhore.

Ndërsa opozita brenda-parlamentare propozoi rregulla të reja për të lehtësuar mbajtjen e referendumeve.

Përfaqësuesit partiakë ranë dakord që një në tre kandidatë elektoralë të jetë zonjë, që zgjedhjet të mbahen në një muaj të pranverës ose të vjeshtës dhe që financimet private të partive politike të reduktohen me ligj, duke shtuar fondet shtetërore, për të larguar partitë nga korrupsioni politik.

Opozita propozoi uljen në minimum të financimeve private ndaj partive politike, forcimin e transparencës, verifikimin e financimeve dhe ndëshkimet për shkelësit.

Një ndër propozimet e opozitës është edhe përjashtimi i privatëve që financojnë partitë politike nga tenderat, koncesionet dhe kontratat publike.

Opozita propozoi që financimi nga privati të jetë sa gjysma e financimit nga shteti, i cili nga e vet angazhohet të paguajë më shumë për të mbajtur partitë.

Aktualisht ky raport është 1/10. Pra, partitë lejohen të marrin financime private 10 herë më shumë se sa financimet publike.

Raporti i ri nuk është vendosur ende nga tryeza, por qëllimi është që hendeku të ngushtohet sa më shumë.

Projekt – ligji i sjellë nga opozita, shton mekanizmat shtetërorë në kontrollin e shpenzimeve në fushatë, me qëllim që të ulet përdorimi i parave të pista në zgjedhje.

Takimi tjetër është pas dy ditësh, ai vlerësohet si më i rëndësishmi nga pjesëmarrësit, sepse ka të bëjë me fshehtësinë e votës.

ODIHR dhe SHBA – deklarata për zgjedhjet Shqiptare

June 26, 2017 by dgreca

1 ODHIR

Vëzhguesit pohuan se procedurat zgjedhore nuk u respektuan plotësisht në shumë qendra votimi, dhe ndodhën përsëri votimi në grup dhe ndërhyrja e aktivistëve të partive. Po ashtu, transparenca e numërimit të votave nuk është e garantuar. Dita e zgjedhjeve kaloi në mënyrë të rregullt, thuhet në deklaratë, por disa procedura të rëndësishme nuk u respektuan plotësisht, në një numër të konsiderueshëm qendrash votimi të vëzhguara./

Nga Ilirian Agolli/Voa/Vëzhguesit ndërkombëtarë, që vëzhguan zgjedhjet parlamentare këtë të dielë në Shqipëri, theksuan deklaratën e tyre paraprake të paszgjedhjeve në një konferencë shtypi se zgjedhjet u mbajtën pas një marrëveshje dypartiake, dhe kjo siguroi pjesëmarrjen e opozitës, por zbatimi i saj krijoi një sfidë për administratën zgjedhore dhe rezultoi në një zbatim selektiv dhe jo të qëndrueshëm me ligjin.

Misioni ndërkombëtar i vëzhgimit të zgjedhjeve pohoi se partitë ishin në gjendje të bënin fushatë lirisht dhe liritë themelore u respektuan.

“Politizimi i vazhdueshëm i organeve dhe institucioneve të lidhura me zgjedhjet, akuzat e gjera për blerjen e votave, dhe presioni ndaj zgjedhësve ulën besimin e publikut në procesin zgjedhor” – tha Roberto Battelli, Koordinator i Posaçëm dhe udhëheqës i misionit të vëzhguesve afatshkurtër të OSBE-së, në deklaratën e përbashkët të vëzhguesve ndërkombëtarë.

“Praktikat e të kaluarës u përsëritën, veçanërisht shqetësimet për frikësime dhe presione ndaj votuesve, duke krijuar një atomosferë negative.

Marrëveshja PS-PD ishte një zhvillim pozitiv, por ajo solli tendosje në procesin zgjedhor.

Marrëveshja e 18 majit ishte e rëndësishme për të mbajtur zgjedhjet dhe solli disa përmirësime, pohuan vëzhguesit në deklaratën e përbashkët, por disa zhgënjime erdhën prej zbatimit të selektiv dhe të paqëndrueshëm në kurriz të ligjit.

Vonesave në formimin e komisioneve të shkallëve më të ulta dhe të numrit të madh të zëvendësimeve, – thuhet në deklaratë, – një pjesë e mirë e stafit zgjedhor nuk arriti të trajnohej. Të gjitha këto e ulën efektivitetin e administrimit të zgjedhjeve.

Zgjedhjet u zhvilluan në klimën e ndarjeve të thella dhe të gjata politike mes Partisë Socialiste dhe Partisë Demokratike të opozitës, si dhe në klimën e një besimi të ulët të publikut tek procesi zgjedhor.

Vlerësimi përfundimtar i zgjedhjeve, thuhet në deklaratë, do të varet pjesërisht nga mënyra se si do të zhvillohen fazat përfundimtare të procesit zgjedhor, duke përfshirë numërimin e votave, shpalljen e rezultateve dhe trajtimin e ankesave apo apelimeve të mundshme.

Misioni ndërkombëtar i vëzhgimit të zgjedhjeve përbëhet nga 330 vëzhgues nga 43 vende, duke përfshirë 255 vëzhgues afatgjatë dhe afatshkurtër të vendosur nga OSBE/ODIHR-i, 36 parlamentarë dhe punonjës nga Asambleja e OSBE-së, 25 nga APKE dhe 11 nga PE-ja.

Ambasada e Shteteve të Bashkuara të Amerikës uron qytetarët shqiptarë

Shtetet e Bashkuara uruan qytetarët shqiptarë për ushtrimin e të drejtës së tyre demokratike të votës në zgjedhjet parlamentare të 25 qershorit, 2017. Në një deklaratë të ambasadës së Shteteve të Bashkuara thuhet se votimi u krye me efikasitet dhe në mënyrë paqësore në pjesën më të madhe të Qendrave të Votimit.

“Ne përgëzojmë punonjësit dhe vëzhguesit e përkushtuar të zgjedhjeve së ditës së votimit, të cilët punuan gjatë një dite feste kombëtare dhe të nxehti ekstrem, për të përmbushur detyrat e tyre” – vlerësohet në deklaratë.

Vëzhguesit ndërkombëtarë, thotë ambasada e SHBA-ve në Shqipëri, dëshmuan incidente të blerjes së votës, fotografimit të fletës së votimit, dhe presoni ndaj votuesve, por zyrtarët e zgjedhjeve dhe forcat e rendit iu përgjigjën pjesës më të madhe të këtyre ankesave, disa prej të cilave përfunduan në arrestime.

“Edhe pse disa nga shkeljet zgjedhore të dëshmuara ishin serioze dhe duhen adresuar, ato nuk ishin aq të përhapura sa të ndryshonin rezultatin e përgjithshëm të zgjedhjeve” – thuhet në deklaratë.

Presidenti Nishani dërgon në Gjykatë Kushtetuese Ligjin e Pronave

January 23, 2016 by dgreca

Presidenti i Shqipërisë, Bujar Nishani, vendosi të dërgojë për shqyrtim në Gjykatën Kushtetuese ligjin “Për Trajtimin e Pronës dhe Përfundimin e Procesit të Kompensimit të Pronave”, ndërsa parlamenti e votoi për herë të dytë atë pasi ai e ktheu për rishqyrtim.
Presidenca njoftoi se zoti Nishani e ktheu ligjin në parlament me shpresën për një debat më serioz, profesional dhe të kujdesshëm rreth tij.
Sipas presidentit Nishani, ky ligj cenon parimet bazë kushtetuese të sigurisë juridike, barazisë para ligjit, zhbën konceptin e ekonomisë së tregut si dhe bie ndesh me vendimet e Gjykatës Kushtetuese dhe standardin e vendosur nga Gjykata Europiane e të Drejtave të Njeriut.
Ai theksoi se çështja e pronës është e një rëndësie madhore për qytetarët shqiptarë dhe ndikon drejtpërdrejt në përparimin e vendit ndaj është përcaktuar si një nga pesë prioritetet kyçe për hapjen e negociatave të anëtarësimit në Bashkimin Evropian.
Qeveria shqiptare u angazhua për të trajtuar çështjen e pronarëve, me synimin për ta eliminuar me ligj dhe në praktikë zvarritjet burokratike, dhe për të sjellë barazi të të gjithë pronarëve, të cilëve u është njohur prona për kompensim, me qëllim realizimin e një shpërblimi të drejtë.
Ligji i ri ndeshi në kundërshtimet e menjëhershme të shoqatave të pronarëve, sepse sipas tyre, formula e re zhvlerëson nga dhjetë deri në njëqind fish pronat dhe kompensimet e tyre.
Pronarët vazhdojnë ta hedhin në gjyq qeverinë shqiptare në Gjykatën Europiane për të Drejta Njerëzore për të fituar pronat e tyre.
Shumica dërrmuese e tyre po i fitojnë këto gjyqe, ndërsa gjykata po e ngarkon qeverinë përherë e më të madhe për t’u kthyer dhe kompensuar pronat, të cilat pronarët nuk i marrin dot me ligjet ekzistuese të Shqipërisë.(Ilirian Agolli-VOA)

Regjistrimi i emigrantëve dhe sfidat e diasporës

December 27, 2015 by dgreca

Nga Ilirian AGOLLI- VOA/
Në Tiranë, qeveria njoftoi se do të nisë regjistrimin e emigrantëve shqiptarë për t’u ofruar shërbimet civile që u nevojiten.
Megjithatë, vëzhgues të çështjeve shoqërore mendojnë se po aq e rëndësishme është të ndërtohet një komunikim i rregullt me gjithë diasporën shqiptare kudo në botë.
Publicisti Ahmet Dursun mendon se diaspora ka mundësi të mëdha për të ndihmuar zhvillimin dhe për të investuar në Shqipëri.
Qeveria shqiptare sapo ka paraqitur projektin për regjistrimin e shqiptarëve që jetojnë jashtë vendit.
Brenda dy vjetësh synohet të përfshihen në një regjistër gjithë shqiptarët e emigracionit për të marrë shërbime nga shteti i tyre dhe për të marrë pjesë në votime.
Por publicisti Ahmet Dursun thotë se diaspora është një çështje shumë më e gjerë se sa regjistrimi i emigrantëve.
Ai mendon se një program i veçantë shtetëror duhet ngritur për të regjistruar diasporën shqiptare kudo në botë, e cila gabimisht ngatërrohet me emigrantët.
Sipas tij, shqiptarët mund të bëhen ekonomikisht, politikisht dhe kulturalisht të fortë vetëm nga mbështetja e diasporës.
“Rreth 95 për qind të diasporës shqiptare jetojnë në vende me kushtetuta bashkëkohore dhe gati të gjitha këto vende jane vende antare të NATO-s. Diaspora shqiptare nuk ka patur kulturë apo pasoja nga një trysni politike si Bashkimi Sovjetik apo Kina. E gjithë Diaspora shqiptare e ka të kthyer kokën nga Perëndimi. Si të tillë, ata janë gati të mbështetin dhe të çojnë përpara çdo reformë në hapësirën shqiptare, pa u përdorur për politikat e ditës, për synime politike javore apo elektorale” – thotë zoti Dursun.
Ahmet Dursun është pasardhës i një familje shqiptare nga Nishi, e cila u dëbua me dhunë drejt Kosovës më 1878 dhe pas saj u përzu në Turqi.
Ai dhe shumë shqiptarë të tjerë e kanë të vështirë tani pas një shekulli e gjysmë të provojnë me dokumenta prejardhjen shqiptare, edhe pse flasin gjuhën dhe ruajnë traditat.
Ahmeti thekson se diasporë quhen ata që lindin jashtë Shqipërisë nga prind shqiptarë, ndërsa emigrantë janë ata që lindën në atdhe dhe u larguan më pas.
Ahmeti thotë se diaspora e përhapur në të gjithë globin interesohet të investojë dhe të ndihmojë Shqipërinë, por nuk i jepet mundësia të komunikojë përmes ndonjë institucioni rregullues të shtetit shqiptar.
Kosova, për shembull, ka një ministri enkas për diasporën, ndërsa Shqipëria ka një zyrë që merret me çështje kulturore dhe konsullore.
“Një zyrë në ministrinë e jashtme të Shqipërisë nuk mjafton për diasporën. Nuk mjafton as një zëvendës ministër, por duhet një ministri e posaçme të merret në radhë të parë me regjistrimin e diasporës. Të angazhohen sa të munden të gjithë përfaqësitë diplomatike për të hartuar një regjistër dhe me zhvillimin e teknologjisë, sot këto kontakte kryhen shumë më shpejt se sa dy dekada më parë” – thotë zoti Dursun.
Shqiptarët nuk e humbin identitetin e tyre kombëtar në asnjë shtet tjetër, ku shkojnë dhe kjo është një vlerë e madhe e tyre si edhe e vendeve pritëse.
Ahmeti thotë se trajtimi i diasporës në dobi të Shqipërisë kërkon një projekt të thelluar dhe jo veprime të shpejta në shërbim të politikës së ditës, për t’i kthyer shqiptarët jashtë vendit në vota.
Ai thotë se shqiptarët e diasporës janë shumë herë më tepër në numër se shqiptarët brenda Shqipërisë.
Diaspora mund të ndihmojë në diplomaci Shqipërinë dhe Kosovën, mund të ndihmojë në fuqizimin e arsimit etj., por Shqipëria duhet të hapet dhe të mirëpresë vlerat e saj.
Sipas tij, diaspora dhe Shqipëria kanë nevojë të ngutshme për njëra tjetrën.
Ahmeti mendon se veçmas zyrave që ndihmojnë emigrantët, çdo ministri duhet të ketë një zyrë të diasporës për të mbledhur ndihmesën dhe investimet e tyre në çdo fushë të jetës së vendit, madje mund të sjellin investime dhe me shtrirje ballkanike.
“Shqiptarët e diasporës vijnë nga haësira të gjera si SHBA me 400 milionë banorë dhe nga BE-ja me 400 milionë të tjera, si dhe nga shtete te tjera. Shqipëria atyre u intereson për të patur një vend të sigurtë të origjinës së tyre, ku shteti u krijon të gjitha lehtësitë për ta patur gjithë tregun e Ballkanit. Nuk bëhet fjalë që ata të prodhojnë vetëm brenda dhe për Shqipërinë. Por natyrisht edhe për të dalë jashtë vendit, në shtetet përreth ku kufizohen me bashkëkombas të tyre, si edhe më gjerë” – thotë zoti Dursun.
Për herë të parë nga krijimi i shtetit shqiptar Shqipëria po nis një proces të regjistrimit të emigrantëve të saj për të zgjidhur problemet e tyre me identitetin dhe pronat, si dhe shumë shërbime të tjera civile, për të cilat vuajnë zvarritje të mëdha.
Regjistri i gjendjes civile shënon se Shqipëria ka 4.4 milionë banorë, por afro një e treta e tyre në fakt janë në emigrim.
Por nga viti 1990 deri më sot, jashtë Shqipërisë prej tyre kanë lindur 300 mijë bebe, të cilët janë pjesa më e re e diasporës shumë-shekullore shqiptare, e cila edhe kjo meriton një trajtim dinjitoz nga shteti i vet.