Nga Behlul Jashari/ PRISHTINË, 18 Gusht 2015/.- Shkon drejt shpërbërjes e ashtuquajtura ‘Mbrojtja civile”, strukturë ilegale e paramitare që prej vitesh vepron në veri të Kosovës e që serbët i thonë “Civilna zaštita”.
Sipas shtypit të Kosovës, “në miniqeveri do të transformohet Mbrojtja Civile. Brenda pak ditësh pjesëtarët e kësaj strukture paramilitare do të nisin të zhvillojnë ‘aktivitetin shtetëror’ në zyra të njëjta në veriun e banuar me serbë, ku kanë vepruar prej vitesh ilegalisht”.
“Deri tash institucionet shtetërore të Kosovës kanë lidhur 105 kontrata me ta. Në Agjencinë e Menaxhimit të Emergjencave janë rekrutuar 80 e në Shërbimin Korrektues 25.
Në pritje të firmosjes së kontratave janë edhe 378 pjesëtarë të tjerë të Mbrojtjes Civile. Prej tyre 184 do të rekrutohen në 9 ministri. Të tjerë pjesëtarë do të shpërndahen në 7 agjenci, në Administratën Tatimore e në Doganë.
Ndërkaq një fond kontingjent do të përbëhet prej 50 pjesëtarësh që parashihet të marrin paga, por vendet e tyre përfundimtare të punës do të përcaktohen në sektorin publik përbrenda tre vjetësh.
Edita Tahiri, ministre për dialog, ka treguar të hënën se si do të kthehen në zyra qeveritare ndërtesat në të cilat Mbrojtja Civile ka zhvilluar veprimtarinë, e të cilat ndodhen në Mitrovicën Veriore, Leposaviç, Zubin-Potok e Zveçan”, shkruan sot gazeta Koha Ditore me kryetitullin “Mbrojtja Civile transformohet në ‘qeveri të veriut’.
Në 22 korrik, qeveria e Kosovës ka aprovuar konkluzionet e dakorduara për shpërbërjen e të ashtuquajturës “Mbrojtje Civile” e cila ka funksionuar në komunat veriore dhe integrimin e tyre në institucionet e Kosovës. Këto konkluzione janë arritur në kuadër të dialogut në Bruksel.
Vendimi është pjesë e përmbushjes së obligimeve të qeverisë së Kosovës që dalin nga dialogu dhe ofron bazën legale për institucionet e Kosovës që të bëjnë integrimin e 483 personave në institucionet legjitime të Republikës së Kosovës dhe shuarjen e këtyre strukturave ilegale.
Qeveria e Kosovës njoftonte në 26 mars 2015 se, me ndërmjetësimin e Bashkimit Evropian ishte arritur Marrëveshja për çështjen e të ashtuquajturës “Mbrojtja civile”. Me këtë rast ministrja për Dialogun Edita Tahiri, e cila ka udhëhequr negociatat për këtë çështje ka deklaruar se, “arritja e kësaj marrëveshje mes tre palëve, Kosovës, Serbisë dhe BE-së e cila është përmbyllur ka një rëndësi të madhe sepse i jep fund strukturës ilegale të ashtuquajtur ‘Mbrojtja Civile’ dhe mundëson integrimin e ish-pjesëtareve të sajë në institucionet e Republikës së Kosovës”.
“Marrëveshja parasheh procesin e zhbërjes së kësaj strukture paramilitare dhe procesin e integrimit të individëve në institucionet civile të shtetit të Kosovës, specifikon obligimet e palëve dhe afatet kohore të zbatimit. Marrëveshja parasheh mbylljen e të gjitha objekteve, zyrave dhe depove që kanë qenë në shfrytëzim nga kjo strukturë ilegale në komunat veriore të Kosovës dhe dorëzimin e tyre institucioneve të Republikës së Kosovës. Kjo marrëveshje duhet të zbatohet deri më 1 shtator 2015”, theksonte ministrja Tahiri.
PRIZREN-PËRMBYLLET DOKUFEST XIV, SHPALL FITUESIT
Nga Behlul Jashari/ Prizren 16 Gusht 2015/ Edicioni i 14 i Festivalit Ndërkombëtar të Filmit të Shkurtër dhe Dokumentar DokuFest u mbyll në mbrëmjen e 16 gushtit, në qytetin e Prizrenit, në Kosovë.
Edhe Presidentja e Republikës së Kosovës, Atifete Jahjaga mori pjesë në përmbylljen dhe ndarjen e çmimeve. Ajo i ka përgëzuar drejtuesit e Festivalit, për punën dhe angazhimin e tyre të vazhdueshëm për organizimin e kësaj ngjarje kulturore me jehonë ndërkombëtare.
DokuFest 2015 në qendër të tij kishte temën e migrimit me filma nga e gjithë bota dhe rajoni i Ballkanit, masterklasa, punëtori, debate dhe diskutime në panel.
Rekordi i ri i shitjeve të biletave është 14,000, gjatë nëntë ditëve të festivalit. Performancat muzikore të mesnatës – DokuNights – kanë shitur një rekord prej 13,000 biletave për programin muzikor me njerëz që vallëzonin deri në agim.
Programi i filmave të këtij viti përbëhej nga 228 filma të metrazhit të gjatë dhe të shkurtë, 124 prej tyre bënin pjesë në programet garuese. Fituesit nga secila kategori garuese u shpallën sonte në Kino Lumbardhin e Prizrenit, vendin e ceremonisë së mbylljes së festivalit.
Pas ceremonisë së çmimeve, filmi përmbyllës ishte Iris nga Albert Maysles. Këtë vit DokuFest prezantoi programin homazh në kujtim të filmëbërësit legjendar Maysles dhe vëllait të tij David. Pas shfaqjes së filmit, festivali vazhdoi në Lumbardh me performancën e fundit të DokuNights me muzikë tradicionale të Nezafete Shalës dhe familjes së saj.
Filmat fitues nga çdo kategori u shfaqen edhe nga një herë në kinematë e ndryshme të festivalit përgjatë natës.
DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.—-
Më poshtë gjeni çmimet e këtij edicioni:
ÇMIMI I PUBLIKUT: REMAKE, REMIX, RIP-OFF nga Cem Kaya
PROCREDIT EKO VIDEO:
1st Je polic i vetvetes nga Albulena Veliu
2nd Shit nga Vali Gjinali
3rd Ruaje Ambientin nga Imer Veliu
GARA KOMBËTARE – FITUES: TË PAFAJSHMIT by Amir Vitija
Juria: Izer Aliu, Delphine Jeanneret, Bujar Kabashi
Deklarata: Filmi përdor një mekanikë të vjetër kinematografike që të na mbajë pezull, dhe ngadalë zbulon një problem shoqëror që i referohet luftes pa na detyruar ta rijetojmë atë.
GARA E FILMAVE TË SHKURTËR – FITUES: LISTEN nga Hamy Ramezan dhe Rungano Nyoni
Juria: Laurence Reymond, Gunhild Enger, Diana Nenadić
Deklarata: Rreth një gruaje të gatshme për të shprehur veten, filmi përshkruan se si gjuha është një mjet paradoksi. Kjo fytyrë e paparë i bën jehonë shumë çështjeve sociale dhe politike, në një pasqyrim të shkëlqyer të “dështimit” të artit të të dëgjuarit.
GARA E FILMAVE TË SHKURTËR – ÇMIMI SPECIAL: SUPPORTING FILM nga Douwe Dijkstra
Deklarata: Një film argëtues që përdor një përzierje mbresëlënëse të teknikës për të përcjellur ndjenjën e gëzuar të të shikuarit filma.
GARA E DOKUMENTARËVE TË MJEDISIT – FITUES: VIRUNGA nga Orlando von Einsiede
Juria: Flo Stone, Vasif Kortun, Sebastian Mez
Deklarata: Ne shikuam një seri të filmave të bukur, të sofistikuar dhe gjerësisht divergjent për garën. Bërja e disa prej tyre kërkon fonde të mëdha dhe ekipe të konsiderueshme të post-prodhimit, ndërsa bërja e disa tjerave kërkon hulumtime rigoroze dhe përdorimin e ndërlikuar të arkivave të filmit. Disa ishin shumë të sinqertë në lidhje me mesazhin e tyre, të tjerët përgjigjeshin përmes mjeteve të fiksionit.
Të gjithë ata ishin të bashkuar në sensin e këmbënguljes, dëshpërimit dhe shpresës si kur jemi në përfundim të karburanteve fosile ekonomike që ne do ti shterrim vetëm nëse ato nuk i shkatërrojnë shumicën e specieve në tokë, duke përfshirë edhe ne njerëzit.
Pas një shqyrtimi të kujdesshëm ne zgjodhëm filmin “Virunga” për hetimin intensiv dhe krahasimin e tregimeve në zhvillim, për urgjencën në ndjekje të trimërisë fisnike të subjekteve të saj dhe për kompozimin e fuqishëm narrative.
GARA E DOKUMENTARËVE TË MJEDISIT – ÇMIMI SPECIAL: WHITE COAL nga Georg Tiller
Deklarata: Juria e Garës së dokumentarëve të mjedisit jep çmim special filmit “White Coal” për qetësinë e tij delikate dhe minimale, për imazhet e tij magjepsëse dhe tregimin e një historie me shumë pak fjalë.
GARA E DOKUMENTARËVE PËR TË DREJTAT E NJERIUT – FITUES: DEMOCRATS by Camilla Nielsson
Juria: Charlotte Selb, Oskar Alegria, Agon Maliqi
Deklarata: Ne kemi gjetur në filmin fitues një qasje shumë freskuese, të nuancuar dhe të ndershme për një histori tjetër shumë delikate – luftën e individëve dhe shoqërive për të arritur kompromis dhe harmoni në fytyrën e strukturave përçarëse dhe abuzive të energjisë. Nëpërmjet një kinematografie të mrekullueshme dhe redaktimit, një tregim joshës dhe mahnitës në qasje në prapaskenë. Filmi fitues portretizon funksionimet e brendshme të një procesi të rrallë për shekullin e 21 – përpjekjen e një vendi për të vendosur themelet për të drejtat e njeriut dhe institucionet e përgjegjshme dhe për të sfiduar pushtetin arbitrar të papërpunuar. Fituesi i çmimit për filmin më të mire për të Drejtat e Njeriut është “Democrats” nga Camilla Nielsson.
GARA E DOKUMENTARËVE NDËRKOMËTARË/METRAZHI I SHKURTË – FITUES: THINGS by Ben Rivers
Juria: Ben Fowlie, Thomas Logoreci, Michael Pattison, Lois Patiño, Jean Pierre Rehm
Deklarata: Çmimi i filmit më të mirë të shkurtë ndërkombëtar i dhurohet regjisorit Ben Rivers për filmin Things, për humorin e tij përmes subjketeve të ndryshme, i cili i mblodhi së bashku në mënyrë interesante dhe personale.
GARA E DOKUMENTARËVE NDËRKOMËTARË/METRAZHI I SHKURTË – ÇMIMI SPECIAL:SCRAPBOOK nga Mike Hoolboom
Deklarata: Çmimi Special shkon për filmin Scrapbook të Mike Hoolboom për trajtimin e tij të sofistikuar të një subjekti kinematografik i cili është personal dhe historik.GARA E DOKUMENTARËVE NDËRKOMËTARË/METRAZHI I GJATË – FITUES: MACHINE GUN OR TYPEWRITER nga Travis Wilkerson
Deklarata: Machine Gun or Typewriter nga Travis Wilkerson fiton çmimin e filmit më të mirë ndërkombëtar për eksplorimin e tij të gjallë politik dhe etnik të romancës dhe qytetit.
GARA E DOKUMENTARËVE NDËRKOMËTARË/METRAZHI I GJATË – ÇMIMI SPECIAL: THE ROYAL TOAD nga Jenni Olson
Deklarata: Filmi i resgjisorit Jenni Olson The Royal Road është shpërblyer me Çmimin Special për kapsulimin e një qyteti kinematografik përmes mjeteve të thella personale dhe rigjallërimit të bukur.
GARA E DOKUMENTARËVE TË BALLKANIT – BALKAN NEWCOMER: COLONY nga Gürcan Keltek
Juria: Pavel Smejkal, Iva Radivojevic, Alexei Dmitriev
Deklarata: Elementet e peisazhit të cilat nxjerrin në dritë gjurmët e ngjarjeve torturuese në këtë film lakonik dhe të ndjeshëm.
GARA E DOKUMENTARËVE TË BALLKANIT – FITUES: FLOTEL EUROPA nga Vladimir Todorovic
Deklarata: Regjisori arrin në kujtesën kolektive dhe përvojën kolektive përmes një historie shumë personale, që tejkalon veten dhe gurgulimet përmes historisë për të paraqitur një ditë. Largimi. Zhvendosja. Pritja. Një ekzistencë e lërë për të notuar në Flotel Europa.
SHBA-të dhe Gjermania do të tërheqin raketat “Patriot” nga Turqia
Pas rivlerësimit të kërcënimeve nga konflikti në Siri duket se Shtetet e Bashkuara dhe Gjermania do të tërheqin bateritë e mbrojtjes raketore nga Turqia, të paktën sipas një deklarate të përbashkët të lëshuar të dielën nga SHBA-të dhe Turqia. Në fundjavë, ministrja gjermane e Mbrojtjes, Ursula von der Leyen njoftoi se Berlini nuk do të zgjatë mandatin ei mbrojtjes së kufirit jugor turk përtej afatit të parashikuar. Po kështu, bashkë me bateritë do të tërhiqen dhe 250 ushtarët gjermanë që janë aktualisht pjesë e misionit.
“Së bashku me partnerët e NATO-s e kemi mbrojtur popullin turk nga sulmet e mundshme raketore prej Sirisë. Raketat tona Patriot e kanë kryer me sukses misionin e tyre”, tha ministrja gjermane. Turqia i pati kërkuar më herët NATO-s ta ndihmonte në forcimin e mbrojtjes ajrore ndaj sulmeve të mundshme nga Siria. Pjesë e misionit të mbrojtjes raketore u bënë SHBA-të, Gjermania, Holanda,e së fundi dhe Spanja. Forcat e NATO-s janë të dislokuara pranë qytetit të Kahramanmaras-it, në jug të Turqisë, dhe që prej janarit të vitit 2013 kanë shërbyer në mision rreth 400 gjermanë.
Ambasadori amerikan në Beograd, Kirby për normalizimin Serbi-Kosovë
– Deri tani nuk është miratuar kurrfarë dokumenti, e në çfarë forme do të jetë, i takon Serbisë, Kosovës dhe Bashkimit Evropian të vendosin e të pranojnë atë që janë marrë vesh/
Nga Behlul Jashari/ PRISHTINË, 16 Gusht 2015/ Ambasadori amerikan në Serbi, Michael Kirby, në një intervistë sot ka folur edhe për normalizimin e marrëdhënieve Beograd-Prishtinë, duke u shprehur se për dokumentin duhet të vendosin së bashku me BE-në dhe ta pranojnë.
“Që nga tetori i vitit 2012 kur sekretarja amerikane e shtetit, Hillary Clinton, dhe përfaqësuesja e lartë e BE-së Catherine Ashton erdhën në Beograd është biseduar për normalizimin e marrëdhënieve të Beogradit dhe Prishtinës, por as atëherë nuk është thënë se çfarë nënkupton konkretisht kjo. Deri tani nuk është miratuar kurrfarë dokumenti, e në çfarë forme do të jetë, i takon Serbisë, Kosovës dhe Bashkimit Evropian të vendosin e të pranojnë atë që janë marrë vesh”, ka thënë ambasadori amerikan Kirby, cituar në intervitën për agjencinë e lajmeve Beta.
Intervista e agjencisë së lajmeve nga Beogradi citohet edhe nga media në Prishtinë, duke bërë të ditur edhe se kryeministri i Serbisë, Aleksandar Vuçiç, në shtator viziton SHBA-të dhe do të takohet me zëvendëspresidentin amerikan Joe Biden
Një shteg i përbashkët turistik Shqipëri- Kosovë- Maqedoni
TIRANË, 14 Gusht / Nga Nikolla Lena/ – Në qytetin e Prizrenit u organizua një takim për të diskutuar në lidhje me realizimin e projektit për hapjen e një shtegu turistik ndërkufitar Shqipëri- Kosovë – Maqedoni, i cili do të kalojë nëpërmjet zonave të mbrojtura të tre vendeve, duke filluar nga Parku i Shebenik – Jabllanices, Korab- Koritnikut dhe Sharrit.
Në këtë takim morën pjesë përfaqësues të AdZM Kukës, AdZM Librazhd, Agjensionit të Zonave të Mbrojtura Prizren, përfaqësues të Komunës Shtërpce Kosovë, Shërbimit Turistik, komuna Gostivar, përfaqësues të Shërbimit Turistik, komuna Tetovë, përfaqësues të operatorëve turistikë nga të tre vendet.
Ky shteg do të kontribuojë në përgatitjen e paketave turistike të përbashkëta, në promovimin e vlerave natyrore, turistike e etnokulturore të rajonit. Projekti mbështetet nga GIZ, Shqipëri, Kosovë dhe Maqedoni
- « Previous Page
- 1
- …
- 144
- 145
- 146
- 147
- 148
- …
- 201
- Next Page »