Në vazhdën e takimeve me drejtues të lartë të shtetit francez, gjatë vizitës zyrtare në Paris, kryetari i Kuvendit të Republikës së Kosovës, Glauk Konjufca, i shoqëruar nga ambasadori Mehdi Halimi, shefi i stafit, Ilir Kërçeli dhe këshilltari Donik Sallova, zhvilloi sot një takim me kryetarin e Senatit Francez, z. Gerard Larcher, që shoqërohej nga Nënkryetari i Parë, ish-ministri Roger Karoutchi, nga Kryetari i Komisionit për Punë të Jashtme, Mbrojtje dhe Forca të Armatosura, z. Christian Cambon, nga Kryetarja e Grupit të Miqësisë Francë – Ballkan Perëndimor, zj. Marta de Cidrac dhe nga Kryetarja e Grupit të Miqësisë për Kosovën, zj. Laure Darcos.

Gjatë takimit u diskutua për zhvillimet aktuale në Kosovë dhe rajon, si dhe për marrëdhëniet midis Kosovës dhe Francës.

Bashkëbiseduesit ndanë mendimin e përbashkët se këto marrëdhënie janë vlerë e padiskutueshme për tejkalim të çdo sfide dhe përparim të gjithanshëm brenda bashkësisë së vendeve të partneritetit të demokracisë.

Kryetari Konjufca falënderoi z. Larcher për angazhimin e shtetit francez në Republikën e Kosovës, duke theksuar se sa e domosdoshme është që vendet tona aleate të ecin bashkërisht drejt zhvillimit të mëtejmë të raporteve dhe forcimit të partneritetit tonë strategjik.

Kryetari i Kuvendit theksoi se Franca është nga vendet e traditës së hershme të demokracisë dhe institucioneve të saj, andaj shprehu interesimin dhe përkushtimin në lidhje me përfitimin nga kjo përvojë e gjatë dhe e pasur e shtetit francez sa i përket parlamentarizmit, si dhe në lidhje me intensifikimin e bashkëpunimit mes dy vendeve në fusha të ndryshme të interesave të përbashkët.

Presidente Osmani, Kryeministër Kurti, Kryetar i Kuvendit Konjufca, anëtarë të korit diplomatik, mysafirë të nderuar.

Laura dhe unë ju urojmë mirëseardhje në ambasadën amerikane dhe ju falënderojmë që jeni së bashku me ne dhe ekipin e Ambasadës së ShBA-së për të festuar përvjetorin e 247-të të Ditës së Pavarësisë së Shteteve të Bashkuara.

Sot festojmë një moment tepër të rëndësishëm.

Plot 247 vjet më parë, në një ditë të nxehtë e me zagushi të 4 korrikut, në Filadelfia të Pensilvanisë, Etërit tanë Themelues u betuan me „jetën”, „pasurinë” dhe „nderin e tyre të shenjtë” për të vërtetat që ata pohuan se ishin „të vetëkuptueshme”.

Që „të gjithë njerëzit janë krijuar të barabartë, se ata janë pajisur nga Krijuesi i tyre me të drejta të patjetërsueshme, se midis këtyre të drejtave janë jeta, liria dhe kërkimi i lumturisë”.

E me këtë ata themeluan Shtetet e Bashkuara të Amerikës dhe ndryshuan botën.

Këto ide – barazia, liria dhe qeverisja që rrjedh nga „pushteti i drejtë” përmes „miratimit nga të qeverisurit” – janë ide përkufizuese në projektin dhe përvojën amerikane.

Por, historia jonë është histori e përpjekjeve për t’i përmbushur këto ideale. Edhe pse shpesh nuk ia kemi dalë, kurrë nuk kemi hequr dorë nga këto parime shumë ambicioze.

Gjatë Samitit të parë për Demokraci Presidenti Biden tha: „Demokracia amerikane paraqet përpjekje të vazhdueshme për t’i jetësuar idealet tona më të larta dhe për të shëruar ndasitë tona; për tu rizotuar ndaj idesë themeluese të vendit tonë të mishëruar në Deklaratën tonë të Pavarësisë”.

Idealet në Deklaratën tonë të Pavarësisë nuk i kanë prirë përparimit vetëm në Shtetet e Bashkuara. Ato kanë qenë frymëzim i shumë vendeve, përfshirë Kosovës.

Sa herë kam nderin të takohem me Kryetarin e Kuvendit Konjufca në zyrën e tij, gjithmonë ndalem për të shikuar dhe reflektuar për Deklaratën origjinale të nënshkruar të Pavarësisë së Kosovës, të përmbyllur në një ditë të ftohtë dimri më 17 shkurt 2008.

E di se gjatë hartimit të Deklaratës së Pavarësisë së Kosovës dhe Kushtetutës, themeluesit e Kosovës – e shumë prej tyre na kanë nderuar me praninë e tyre sonte – u frymëzuan nga Deklarata e Pavarësisë së SHBA-së dhe Kushtetuta jonë.

Në ato dokumente janë disa deklarata të fuqishme të parimit dhe aspiratave, por dëshiroj të theksoj një nga Deklarata e Pavarësisë së Kosovës:

„Ne e shpallim Kosovën një republikë demokratike, laike dhe multietnike, të udhëhequr nga parimet e jodiskriminimit dhe mbrojtjes së barabartë sipas ligjit. Ne do të mbrojmë dhe promovojmë të drejtat e të gjitha komuniteteve në Kosovë”.

Ky tekst elokuent është pjesë e premtimit të Kosovës dhe e themeleve të pavarësisë së saj.

Shtetet e Bashkuara janë krenare për mbështetjen e tyre për popullin e Kosovës në konceptimin dhe realizimin e këtij vizioni ambicioz.

Mbesim të palëkundur për këtë.

Njëjtë siç vazhdojnë Shtetet e Bashkuara të përpiqen për të përmbushur idealet e tyre themeluese pas 247 vjetësh, shpresoj se do të pajtoheni që në disa raste as Kosova nuk ka arritur t’i përmbushë idealet e saj themeluese, pavarësisht përparimit të jashtëzakonshëm të arritur në 15 vitet e fundit.

Në këtë frymë, dëshiroj të konfirmoj se Shtetet e Bashkuara dhe partnerët tanë qëndrojnë me popullin e Kosovës në mbështetje të plotë të avancimit dhe arritjes së vizionit të saj themelues për një shtet demokratik, laik dhe multietnik.

Ju lutem, ta dini që:

Kur ju japim këshilla;
Kur ju kërkojmë të bëni gjëra që duken që janë të vështira ose që janë të vështira; apo
Kur marrim veprime si pasojë ose në reagim ndaj vendimeve që nuk janë në përputhje me këshillat apo kërkesat tona, e bëjmë këtë në përputhje me përkushtimin tonë afatgjatë për të mbështetur popullin e Kosovës për tu përafruar pikërisht me ato ideale ambicioze që i synon.
Prandaj, sot, përderisa festojmë 247 vjet të Shteteve të Bashkuara të Amerikës si shtet i lirë, i pavarur dhe sovran, gjithashtu rikujtojmë dhe festojmë së bashku 15 vjetorin e Pavarësisë së Kosovës, si dhe përparimin e jashtëzakonshëm që populli i Kosovës e ka arritur në këtë periudhë të shkurtër kohore dhe premtimin për përparim të mëtejmë për të mirën e tërë popullit të Kosovës.

Në përmbyllje, gjithashtu dua të vë në pah se ngjarjet si kjo nuk organizohen vetvetiu.

Ju lutem, bashkohuni me mua për të falënderuar qindra vullnetarë, të cilët e kanë organizuar këtë ngjarje nën udhëheqjen e aftë të Claudio Ballesteros me mbështetjen e Jess Gumucio.

Gjithashtu, dëshiroj t’i falënderoj sponsorët e shumtë, pa të cilët kjo ngjarje nuk do të mundësohej. Ju faleminderit për zemërgjerësinë tuaj.

Ju faleminderit shumë të gjithëve dhe urime Dita e Pavarësisë!

Skënder Karaçica/

Pse nuk bëhet publike “ftohja politike” në mes Kosovës dhe Shqipërisë…?! Pse opozita parlamentare në Prishtinë, kujtoj se nuk është në dijeni se çfarë po ndodhë në relacionet shtetërore në mes të dyja qeverive Rama-Kurti…? Në politikë në artin e të mundshmes, Kuri në Prishtinë dhe Rama në Tiranë, duhen të mbajnë qendrim më të matur dhe pa huqet e të dyja palëve me sindromin allaballkançe.

Kosova dhe Shqipëria dy shtete sovrane, nuk duhet të emitojnë, larg qoftë modelin e dy koreve me rrafshet e tyre me dorën e ftohtë akull të politikës! Sa larg Prishtina nga Tirana! Sa larg Kurti me Ramën, pa marrë parasysh dallimet e kabinetit qeveritar Kurti 2, do të duhej të takohet me kryeministrin shqiptar Edi Rama në Prishtinë!

Albin Kurti (partia politike VV) i pati fituar zgjedhjet parlamentare dhe erdhi në pushtet. Kjo krejt në rregull me vlerat e demokracisë dhe të votës së lirë të sovranit, por askush dhe as Albin Kurti nuk e ka të drejtën të pushtojë e të largojë shtetin e Kosovës përmes “fletës poseduese” dhe të sillet si në pronën e tij private në relacionet ndërkombëtare BE-SHBA.

Relacionet Prishtinë-Tiranë të qendrojnë në rrafshet kombëtare dhe të jenë më afër njëra-tjetrës, kjo e drejtë e natyrshme në frymën vëllazërore për zhvillimin e kaheve të forta ekonomike për të ardhmën e kombit shqiptar jo të varfër edhe në ketë fillim të shekullit të ri!

Albin Kurti dhe Edi Rama, bashkë për çështjen kombëtare dhe nisja në udhën e integrimeve në Evropën e bashkuar, ku hisja e kombit shqiptar po na pret në sirtarët e Brukselit.

Kryeministri i Republikës së Kosovës, Albin Kurti, priti në takim Ndihmës Sekretarin e Përgjithshëm të NATO-s për operacione, Thomas Goffus. Kryeministri Kurti e falënderoi atë për kontributin dhe rolin e domosdoshëm të NATO-s për çlirimin dhe sigurinë e Kosovës. Kosova me Forcën e saj të Sigurisë, të trajnuar e orientuar nga perëndimi duhet të bëhet anëtare e Partneritetit për Paqe të NATO-s sa më shpejt që është e mundur, theksoi Kryeministri.

Ai e informoi z.Goffus për kornizën kohore të ngjarjeve nga 5 nëntori i vitit të kaluar kur dhanë dorëheqje të organizuar katër kryetarët në komunat në veri të Kosovës, dhe tha se është i angazhuar për de-eskalim dhe normalizim.

Sundimi i ligjit, mungesa e protestave të dhunshme e aktiviteteve kriminale dhe zgjedhjet e hershme janë rruga përpara drejt de-eskalimit dhe për këtë qeveria është maksimalisht e angazhuar. Megjithatë, masat negative të Bashkimit Evropian ndaj Kosovës si vendi më demokratik në Ballkanin Perëndimor, që ka sanksionuar agresionin rus në Ukrainë dhe që është në harmoni me politikën e jashtme të BE-së, kanë krijuar asimetri në dialog, theksoi Kryeministri.

Ai gjithashtu ngriti shqetësimin për mungesën e ofrimit të qartësisë nga KFOR-i për ngjarjen e 14 qershorit 2023, kur u rrëmbyen tre zyrtarë të Policisë së Kosovës, përkundër evidencës së bollshme të ofruar nga institucionet e Kosovës. Po ashtu ngriti edhe shqetësimin për raportimet se në kishat ortodokse serbe është kontrabanduar armatim përmes ambulancave.

Kryeministri tha se Qeveria e Kosovës është e përkushtuar për bashkëpunim dhe bashkërendim të plotë me misionin e NATO-s, KFOR-in, dhe se ndarja e informacionit dhe koordinimi i mirë duhet t’i kontribuojnë si sundimit të ligjit në veri të Kosovës po ashtu edhe përmirësimit të situatës së sigurisë.

Në këtë takim të përbashkët ishin të pranishëm edhe Zëvendës shefi i stafit i operacioneve, Gjeneralmajor Mattew J. Van Wgenen, Shefja për operacione aktuale të NATO-s, znj. Ariella Viehe, komandanti i KFOR-it, Gjeneral Major Angelo Michele Ristuccia, Shefi i kabinetit në Komandën e KFOR-it, Giuseppe Sgueglia, Drejtori i Përgjithshëm i Policisë së Kosovës, Gazmend Hoxha, Koloneli i Forcës së Sigurisë së Kosovës, Ejup Maqedonci, këshilltari i Kryeministrit, Jeton Zulfaj dhe asistentja e lartë ekzekutive e Kryeministrit, Valë Gjonbalaj.