Sociale – Page 56 – Dielli

SARA TITKA, VAJZA SHQIPTARE, QË KA SHKËMBYER LETRA ME PRESIDENTIN E AMERIKËS, XHORXH W. BUSH…

November 12, 2013 by dgreca

Nga: Murat Gecaj/

Një mbasdite nëntori 2013, sipas bisdës së bërë më parë, mora udhën për në Lagjen “Ali Demi” të kryeqytetit tonë. Kam qenë edhe më parë në atë Qendër të mësimit të gjuhëve të huaja, të cilën e drejton kolegia e mikja, Lindita Titka-Pasholli. Njohja jonë lidhet me një ngjarje të shumë viteve të kaluara, pra kur ajo ishte në moshë të vogël. E kam treguar këtë gjë edhe në një rast tjetër, prandaj nuk do të zgjatem më këtu. Shënoj vetëm se, atëherë, kisha publikuar një shkrim modest për gjyshën e saj, mësuesen veterane të arsimit tonë kombëtar, Nazmie Pasholli. Ajo kishte hapur, për herë të parë, një shkollë shqipe për vajzat malësore, në Peshkopi. Kështu, mbeti e nderuar dhe e paharruar, në kujtesën e nxënëseve të saj, si dhe të prindërve të tyre.

Pasi Lindita kishte gjetur adresën time e-mail, më dërgoi një mesazh falënderues dhe më tregoi, se ku punonte. Pa humbur kohë, shkova në Qendrën e mësimit të gjuhëve të huaja, që ajo drejton dhe u njoha nga afër me punën e mirë, që bëhej aty. Në vijimësi, kursin për mësimin e gjuhës angleze e ndoqi aty edhe mbesa ime 9-vjeçare, Dorela. Pra, lidhjet tona u forcuan.

Siç nisa të tregoja në fillim të këtyre pak radhëve, këto ditë, shkova atje për t’i dhënë Linditës një “libërth” të vogël, me disa recensione rreth librit tim, me titullin “Dorela”(Tiranë, 2012) dhe dy vëllime të librit “Thesar Kombëtar”, botuar nga Shoqata e Shkrimtarëve, Artistëve e Krijuesve Shqiptarë, “Papa Klementi XI-Albani”-Suedi, që u përuruan në dy ditët e fundit të tetorit 2013, në Tiranë e Durrës.

Në atë pasdite, kursin e gjuhës angleze për 8 nxënës, e drejtonte vajza binjake e Linditës, Sara Piro Titka, e cila vetë ndjek degën e gjuhës gjermane, në Universitet, bashkë me motrën, Xhesikën. Me atë rast, hymë në klasë dhe me aparatin fotografik shkrepa një pozë. Kur dolëm që andej, mami i saj m’u drejtua: “Sara ka një kujtim shumë të bukur e të paharruar, të 8-9 viteve më parë, kur jetonim, familjarisht, në Çikago të Amerikës. Ajo dhe motra e saj binjake, Xhesika, mësuan shpejt anglisht, në shkollën e tyre. Një ditë, mësuesja u kishte kërkuar që t’i shkruanin nga një letër Presidentit të Amerikës, Xhorxh W. Bush. Kështu, secila e bëri një gjë të tillë, pra në to shprehën mendimet e veta. Mësuesja ua postoi letrat atyre, për në Shtëpinë e Bardhë. Ndërsa të dyja vajzat tona nuk na treguan gjë, në shtëpi, për detyrën e dhënë nga mësuesja dhe as për dërgimin e letrave!…Kaluan disa ditë e ndodhi diçka e pabesueshme dhe emocionuese, si për vetë binjaken tonë, Sarën, bashkënxënësit e mësuesit e saj dhe për gjithë familjen tonë. Postjeri na solli një zarf jo të zakonshëm. Vinte nga Shtëpia e Bardhë, i drejtohej personalishet Sarës dhe ishte e nënshkruar nga Presidenti i SHBA-ve, Xhorxh W. Bush…Këtë letër dhe fotografinë e Bushit, me të shoqen, Laurën, që i dërgoi ai atëherë, Sara i ka të vendosura në dhomën e saj dhe i mban si një “diplomë” tw çmuar. Është një kujtim i rrallë, që jo çdokush mund ta ketë, në jetën e tij…”.

Për kureshtjen e lexuesve të këtij shkrimi, po e japim faksimilen e kësaj letre, anglisht, si dhe përkthimin e saj, nga znj.Lindita Titka-Pasholli. Pra, ja çfarë shkruhej aty:

“4010, Rruga “North Bernard-Çikago-Ilinois, 60618-2216

E dashura Sara (Titka),

Ju falënderoj për letrën tuaj, si dhe mendimet e sugjerimet, që ju ndani me ne, gjë që unë kam dashur ta dëgjoj gjithmonë, nga amerikanët e rinj.

Ashtu siç ju vazhdoni me studimet tuaja, shpresoj se po përpiqeni të lexoni dhe mësoni më shumë rreth çështjeve, që ju interesojnë më tepër, ngjarjeve ose ndodhive të fundit, si dhe historinë e vendit tonë, duke ndjekur më shumë bibliotekën e vendit tuaj ose duke hyrë në Website-in e Shtëpisë të Bardhë: www.Whitehousekids.gov dhe www.whitehouse.gov. Gjithashtu, ju nxis që të arrini qëllimet tuaja të larta, duke mësuar ose studiuar shumë e të ndihmoni të tjerët, në nevojë.

Me përkushtimin, që keni ndaj shkollës dhe me dashurinë për të tjerët, mund të arrini aftësi

të plota dhe të bëheni e përgjegjshme për komunitetin tuaj.

Unë dhe Zonja Bush, ju dërgojmë urime me dëshirat tona më të sinqerta: Zoti të bekoftë ty dhe Amerikën!

Sinqerisht: George W. Bush,

Shtëpia e Bardhë-Vashington, më 20 shkurt 2004”.

…Në mbyllje të këtyre pak radhëve, pasi treguam për këtë ngjarje interesante dhe të paharruar në jetën e Sara Titkës, tashmë e kthyer përgjithnjë në Shqipëri, bashkë me familjen, i urojmë nga zemra asaj: Jetëgjatësi, shëndet e mbarësi në punë, gëzime dhe lumturi në jetë!

Tiranë, 12 nëntor 2013

VITAMINA B NDIHMON TRURIN

November 10, 2013 by dgreca

Vitamina B luan një rol të rëndësishëm në mbrojtjen e trurit.Studiuesit e Universitetit të Oksfordit morën në analizë 158 persona që vuanin nga sëmundja Alzheimer. Këta pacientë kishin nivel të larta të homocIsteine, e cila çon në përkeqësim të aftësive të tyre njohëse.

Në këtë studim, grupi i parë mori një shtesë me vitaminë B dhe grupi i dytë një qetësues të padëmshëm. Këto teste treguan se grupi që mori vitaminë B kishte dy herë më pak gjasa për t’u prekur nga ulja e aftësisë njohëse.
Sipas këtij studimi, ata që kanë marrë 0.8 miligramë acid folik çdo ditë, 20 miligramë vitaminë B6 dhe 0.5 miligramë vitaminë B12 ngadalësojnë shenjat e rënies së aftësisë njohëse.o.k/noa(Lajmi shqip)

SHQIPERIA ZBRET 5 SHKALLE

October 29, 2013 by dgreca

“Doing Business”, Shqipëria humbet 5 vende/

Banka Botërore publikoi sot raportin vjetor Doing Business 2014, një vëzhgim mbi lehtësirat e të bërit biznes në 189 vende të botës. Krahasuar me vitin e kaluar kur Shqipëria renditej e 85-ta në klasifikim, këtë herë ajo ka humbur 5 pozicione, duke u renditur në vend të 90-të.
Raporti merr në shqyrtim 10 tregues të cilët lidhen me kompleksitetin dhe kostot e proceseve rregulatore si dhe me kuadrin ligjor dhe institucional me të cilin ndeshet një aktivitet biznesi. Pothuajse të gjithë treguesit për Shqipërinë kanë mbetur të pandryshuar, sipas raportit të këtij viti, dhe vendi përmendet vetëm se ka lehtësuar pagesat për korporatat, të cilat, taksat mbi të ardhurat mund t’i paguajnë tanimë cdo tremujor.
Përkeqësimi i pozicionit të Shqipërisë duket se është ndikuar më së shumti nga përmirësimet e vendeve të tjera, ndërkohë që në ndryshim nga një vit më parë, në listë janë shtuar edhe katër shtete të tjera.
Shqipëria vazhdon të ruajë një vlerësim mjaft pozitiv përsa i përket treguesve që lidhen me marrjen e një kredie apo me mbrojtjen që gëzojnë investitorët, ku ajo është respektivisht në vend të 13 dhe 14, në përmirësim nga viti i shkuar. Ajo është gjithashtu në pozicion të mirë edhe me treguesit që lidhen me zgjidhjen e problemeve të likuiditetit (klasifikohet e 62-ta) apo dhe me hapjen e një biznesi, ku klasifikohet e 76-a, 14 pozicione më keq se një vit më parë e ku rezulton që të ketë një shtim në procedura dhe një rritje të lehtë të kostove.
Ndërkohë që Shqipëria vazhdon të mbetet e fundit në treguesin për lejet e ndërtimit, ashtu si dhe gjatë viteve të shkuara. Një vlerësim negativ sërish edhe për kriterin e energjisë, që mat lehtësinë me të cilën një biznes mund të sigurojë furnizimin elektrik. Shqipëria është e 158-a.
Ndonëse ende në brezin e fundit të klasifikimit, Shqipëria ka përmirësuar pozitën e saj përsa i përket pagesës së taksave, duke u renditur e 146, nga vendi i 160 në të cilin ndodhej vitin e shkuar. Ndërsa ka një përkeqësim të fortë, duke humbur 39 pozicione, në treguesin e respektimit të kontratave, ku nga vendi i 85-të ka shkuar në të 124-in.

Analiza premtuese kanceri

September 1, 2013 by dgreca

Hulumtuesit janë duke eksploruar një strategji të re për zbulimin e kancerit të vezoreve. Prej një kohe të gjatë, mjekët përdorin një analizë gjaku për të zbuluar këtë lloj kanceri tek gratë që dyshohen të jenë prekur nga sëmundja. Tani ata shpresojnë se kjo mënyrë mund të funksionojë edhe për gratë e shëndetshme. Njofton korrespondentja e Zërit të Amerikës Jessica Berman.
Sipas Fondit Ndërkombëtar të Studimeve për Kancerin, ai i llojit ovarian apo i vezoreve është përgjegjës për gati 2 përqind të të gjitha llojeve të kancereve që diagnostikohen çdo vit. Sëmundja është mjaft vdekjeprurëse pasi nuk ka simptoma specifike në fazat e para dhe kur gruaja shkon tek mjeku me ankesat për fryrje barku dhe dhimbje, është shumë vonë për të filluar trajtimin.
Karen Lu është shefe e Departamentit të Onkologjisë dhe Gjinekologjisë në qendrën Anderson në Universitetin e Teksasit.
“Ne dimë se mbi 75 përqind e grave me kancerin e vezoreve paraqiten në fazat e vonëshme kur shanset për një kurim të qëndrueshëm janë shumë të pakta. Ne e dimë se nëse e zbulojmë në fazat e para shanset për kurim afatgjatë, mund të jenë deri në 90 përqind.”
Shansi për ta zbuluar kancerin herët mund të vijë nga një analizë gjaku që është përdoryr për gati 20 vjet. Mjekët e përdorin këtë analizë, që kontrollon nivelin e një proteine të quajtur CA-125, për të konfirmuar diagnostikimin e kancerit të vezoreve ose për të monitoruar përparimin e grave që tratohen për sëmundjen.
Lu dhe kolegët e saj hetuan mundësinë e përdorimit të niveleve CA-125 për të kontrolluar gratë në fazat pas menopauzës për kancer.
Ato ishin të përfshira në një studim 11 vjecar me gati 4 mijë gra të shëndetshme në mbarë Shtetet e Bashkuara. Pjesëmarrëset, 50 deri në 74 vjeç pa histori të kancerit të gjirit apo të vezoreve në familje, bënë një analizë gjaku për proteinën CA-125 në fillim të studimit dhe u ndanë në grupe. Gratë bënë analiza të regullta për gati një dekadë.
Zonja Lu thotë se ato gra që e kishin nivelin e proteinës CA-125 të ulët vinin çdo vit për të përsëritur analizën. Gratë me nivel mesatar e bënë analizën çdo tre muaj. Gratë me nivel të lartë të proteinës CA-125 u dërguan tek specialisti i kancerit për një ekzaminim me ultratinguj. 85 gra u referuan tek mjeku bazuar tek kjo analizë. Për 10 gra u rekomandua operacion, katër nga të cilat kishin kancerin e vezoreve në faza të hershme. Mes grave të tjera, njëra kishte kancer endometrial, tre kishin tumore beninj dhe dy kishin ndryshime të dyshimta të qelizave.
Metoda e ndarjes së grave në tre grupe rreziku, sipas zonjës Lu, provoi të ishte gati 100 përqind e efektshme në zbulimin e kancerit të vezoreve perms analizës së proteinës CA-125.
“Kur pamë shtim të nivelit të proteinës i referuam gratë për analizë me ultratinguj që diktoi kancerin në fazat e para.”
Studiuesit britanikë kanë përfunduar një studim me gati 200 mijë gra të shëndetshme për të parë nëse rreziku i tyre për vdekje nga kanceri ovarian u pakësua përmes analizave të përvitshme.
Zonja Lu thotë se në varësi të rezultatit, analiza mund të rekomandohet edhe për gratë e shëndetëshme. Rezultatet e studimit nga zonja Karen Lu dhe kolegët e saj u publikuan në revistën Cancer.(VOA)

JA SI MUND TA FITOSH NE PAK MINUTA DESHMINE E TRASHEGIMISE

September 1, 2013 by dgreca

Më shumë se 30.000 qytetarë në vit nuk do shkojnë më në gjykatë për të kërkuar dëshminë e trashëgimisë, nuk do të harxhojnë me mijëra lekë për shpenzime gjyqësore dhe afërsisht një muaj kohë, por do të përfitojnë këtë shërbim në pak minuta, nga noteri…/

Ministri i Drejtësisë, Eduard Halimi, me anë të një postimi në faqen e tij zyrtare në rrjetin social “Facebook”, ka njoftuar se sot hyn në fuqi paketa civile, e cila i vjen në ndihmë mijëra qytetarëve.

“Thyejmë tabutë dhe sjellim një traditë të re në fushën civile. Më shumë se 30.000 qytetarë në vit nuk do shkojnë më në gjykatë për të kërkuar dëshminë e trashëgimisë, nuk do të harxhojnë me mijëra lekë për shpenzime gjyqësore dhe afërsisht një muaj kohë, por do të përfitojnë këtë shërbim në pak minuta, nga noteri. Nga nesër qytetarët që kanë fituar një proçes gjyqësor nuk do të detyrohen të shkojnë sërisht në Gjykatë për të filluar një tjetër proçes, atë të lëshimit të urdhërit të ekzekutimit”- shkruan Halimi.

Sipas tij, gjykime për lëshimin e urdhërit të ekzekutimit nuk do të ketë më.

Qytetarët do të informohen edhe nëpërmjet sms-ve apo e-mail-it për ditën e gjyqit, për çfarë ka ndodhur në seancë dhe do të kenë mundësi monitorimi 24 orë në 24.

Halimi sqaron se reforma civile që hynë sot në fuqi, ndihmon në rritjen e efiçencës së sistemit gjyqësor, duke eleminuar muajt e pritjes për daljen e datës së gjyqit apo zvarritjen me vite në Gjykatën e Apelit dhe Gjykatën e Lartë.

Gjyqtarët do të kenë më pak proçese, ndaj trupat gjykues më fleksibël si dhe kalendari elektronik për proçeset civile do të shkurtojnë kohën e gjykimit për këdo që i drejtohet gjykatës.

“Hyrja e kësaj pakete në fuqi është siguri e shtuar edhe për sistemin bankar i cili do të ketë mundësi të ekzekutojë më shpejt kreditë e këqija, do të mund të kontrollojë on-line se çfarë bën përmbaruesi me çështjen e tyre si dhe të sigurojë kolateralin”- shkruan ai.

“Të dashur miq,

Sot hyn në fuqi paketa civile. Thyejmë tabutë dhe sjellim një traditë të re në fushën civile. Më shumë se 30.000 qytetarë në vit nuk do shkojnë më në gjykatë për të kërkuar dëshminë e trashëgimisë, nuk do të harxhojnë me mijëra lekë për shpenzime gjyqësore dhe afërsisht një muaj kohë, por do të përfitojnë këtë shërbim në pak minuta, nga noteri. Nga nesër qytetarët që kanë fituar një proçes gjyqësor nuk do të detyrohen të shkojnë sërisht në Gjykatë për të filluar një tjetër proçes, atë të lëshimit të urdhërit të ekzekutimit. Gjykime për lëshimin e urdhërit të ekzekutimit nuk do të ketë më.

Qytetarët do të informohen edhe nëpërmjet sms-ve apo e-mail-it për ditën e gjyqit, për çfarë ka ndodhur në seancë dhe do të kenë mundësi monitorimi 24 orë në 24.

Reforma civile që hyn sot në fuqi, ndihmon në rritjen e efiçencës së sistemit gjyqësor duke eleminuar muajt e pritjes për daljen e datës së gjyqit apo zvarritjen me vite në Gjykatën e Apelit dhe Gjykatën e Lartë.

Gjyqtarët do të kenë më pak proçese; ndaj trupat gjykues më fleksibël si dhe kalendari elektronik për proçeset civile do të shkurtojnë kohën e gjykimit për këdo që i drejtohet gjykatës.

Hyrja e kësaj pakete në fuqi ështe siguri e shtuar edhe për sistemin bankar i cili do të ketë mundësi të ekzekutojë më shpejt kreditë e këqija; do të mund të kontrollojë onlinë se çfarë bën përmbaruesi me çështjen e tyre si dhe të sigurojë kolateralin.

E realizuam këtë reformë dhe nga sot çdo shqiptar do të gëzojë frutet e saj. Paketa Civile si të gjitha proçeset transformuese që ndërmorri Ministria e Drejtësisë, u mbështetën nga ekspertë të misioneve të huaja, u përkrahën nga grupet e interesit dhe për to u investua stafi i Ministrisë, një ekip profesionistësh, të cilit i jam mirënjohës për reformat e guximshme të këtyre viteve.”shkruan Halimi