Rafaela Prifti/
Kampionati botëror i Futbollit filloi sot në Katar. Nga data 20 nëntor deri më 18 dhjetor ekipet më të mira kombëtare do luajnë për të fituar titullin Kampion përpara spektatorëve në stadiume dhe audiencës sportdashëse në mbarë botën. Për herë të parë në historinë e sportit të futbollit, 32 skuadrat pjesëmarrëse do luajnë në muajt nëntor e dhjetor. Kalendari u ndryshua sepse në sezonin e verës zakonisht qershor – korrik kur është luajtur kampionati, temperaturat në gadishullin arabik arrijnë dhe mund të tejkalojnë 40 gradë celsius. Për shkak të këtij ndryshimi lojrat e rregullta të futbollit evropian u ndërprenë dhe koha e trajnimit të ekipeve kombëtare ishte e kufizuar. Kjo ishte vetëm një nga argumentet në debatet për ngjarjen më të madhe dhe më të shikuar të botës së futbollit. Sipas burimeve mediatike, shikueshmëria e kampionatit arrin rreth një milardë. Katari është vendi me sipërfaqen më të vogël (pak më shumë se 11,000 km katrorë) nga të gjithë pretendentët për vend nikoqir të kampionatit. Midis konkurentëve në vitin 2009 ishin Shtetet e Bashkuara dhe Japonia.
Pavarësisht faktorëve jo të favorshëm lidhur me sipërfaqen dhe mungesën e traditës në futboll, Katari derdhi miliona dollarë për të influencuar votën e kryesisë së FIFA-s. Vendosmëria e vendit të vogël të gadishullit arabik për të treguar veten dhe përkarshi fqinjëve si Arabia Saudite dhe Emiratet e Bashkuara nuk duhej nënvlerësuar. Koncepti tingëllonte ‘fantastik’ dhe akuzat për korrupsion filluan menjëherë pasi lajmi u dha nga Al-Jezeera përpara se të hapej zarfi me emrin e Katarit në konferencën për media. Hetimet e mëtejshme i vërtetuan dyshimet dhe detyruan drejtuesit e FIFA-s të jepnin dorëheqje nën paditë dhe dënimet gjyqësore për pranimin e rryshfeteve të majme nëpërmjet të cilave Katari e bleu me lekë vendin e mikpritësit të kampionatit botëror të futbollit 2022.
Sipas njoftimeve mediale, vendi është “rindërtuar i tëri” për ngjarjen sportive një mujore.
Grupet për mbrojtjen e të drejtave të njeriut kanë njoftuar se mijëra punëtorë kryesisht nga Azia Jugore kanë punuar dhe janë lënduar ose kanë humbur jetën në kushte shumë të rënda pune përfshirë ngritjen e 7 stadiumeve të reja dhe një të rikonstruktuar, të gjithë të pajisur me klimatizatorë.
Një askpekt tjetër në listën e kontradiktave është kriminalizimi i homoseksualitetit në Katar. Presidenti i FIFA-s Gianni Infantino, i cili ndonëse kishte kritikuar mediat që të “mos përziejnë politikën me sportin” mbajti një orë konferencë përpara hapjes së kampionatit, ku e quajti ‘hipokrizi’ qendrimin e disa vendeve evropiane për bojkotimin e ndeshjeve. Por edhe mbrojtësit e të drejtave njerëzore thonë se gjendja e krijuar nuk është faji i lojtarëve dhe se FIFA i ka vendosur të gjithë në një situatë të vështirë. Të gjithë pranojnë se klima e përgjithshme është shumë e politizuar. Për disa historianë si Abdullah Al-Arian, kampionati e ka vendin e vet në Lindjen e Mesme.
Gjithsesi vendet e Gjirit persik midis tyre Katari kërkojnë të fitojnë prestigj dhe kredibilitet politik nëpërmjet sportit dhe me influencën e tyre të fortë financiare kanë blerë ekipe private si Paris Germain në Francë si dhe lojtarë të njohur futbolli në botë. Por për tani në qendër të kampionatit janë vetëm lojrat. Sot ndeshja e parë Ekuador – Katar përfundoi 2-0. Ekipet tona kombëtare nuk marrin pjesë në këtë kampionat. Ndërsa në grupin 2, Shtetet e Bashkuara luajnë nesër me Wales.
Në shumë qytete ndihet atmosfera sportive dhe tifozët kanë organizuar tubime në klube për të ndjekur ndeshjet dhe mbështetur skuadrën amerikane. Në qytezën Hoboken në Nju Xhersi u shfaq një mural i punuar enkas për t’i shtuar jehonën Kampinatit të Futbollit 2022.
Franca eshte fituesja e Kampionatit Botëror 2018.
