Kosova po merr pjesë në Tarragona 2018 me 40 sportistë

June 28, 2018 by dgreca

-Ministri Kujtim Gashi i pranishëm në Lojërat Mesdhetare Tarragona 2018/

-Kosova po merr pjesë në Tarragona 2018 me 40 sportistë, 13 trajnerë dhe katër gjyqtarë/

PRISHTINË, 28 Qershor 2018-Gazeta DIELLI/ Ministri i Kulturës, Rinisë dhe Sportit, Kujtim Gashi, ndodhet në vizitë zyrtare në Tarragonë të Spanjës, ku ekipi Olimpik i Kosovës po merr pjesë për herë të parë në Lojërat Mesdhetare Tarragona 2018.Ministri Gashi është takuar me drejtuesit e Komitetit Olimpik të Kosovës, në krye me presidentin, Besim Hasani, si dhe kryetarin e Federatës së Xhudos së Kosovës, Agron Kuka, të cilëve iu uroi suksese të mëtutjeshme në Lojërat Mesdhetare Tarragona 2018.

Ministri Gashi është duke përkrahur sportistët, derisa të enjten po i ndjek nga afër garat e xhudistëve tanë, Akil Gjakova dhe Laura Fazliu, të cilët po kërkojnë të ndjekin rrugën e Nora Gjakovës dhe Distria Krasniqi. Nora Gjakova dhe Distria Krasniqi fituan të mërkurën medaljet e arta, të parat për Kosovën nga Lojërat Mesdhetare Tarragona 2018.Ministri do të jetë i pranishëm edhe në garat e sportistëve tjerë, të cilët po ashtu po e promovojnë shtetin e Kosovës, në vendin që nuk e njeh Pavarësinë e vendit tonë. Përndryshe ministri Gashi, është ministri i parë që zyrtarisht ka udhëtuar në shtetin Spanjës për të ndejkur garat mesdhetare të cilat po zhvillohen atje. Kosova po merr pjesë në Tarragona 2018 me 40 sportistë, 13 trajnerë dhe katër gjyqtarë./b.j/

ZVICRA FLUTURON ME KRAHËT E SHQIPONJAVA XHAKA E SHAQIRI

June 22, 2018 by dgreca

Blick: Falë shqiponjave Xhaka e Shaqiri ëndërrojmë të fluturojmë lart/

E përditshmja zvicerane, Blick ka lavdëruar paraqitjen fantastike të dyshes shqiptare te kombëtarja e Zvicrës, Granit Xhaka e Xherdan Shaqiri pas fitores ndaj Serbisë.Në titullin e lajmit Blick ka shkruar, “Falë shqiponjave Xhaka e Shaqiri ëndërrojmë të fluturojmë lartë”, transmeton Koha.net.

Xhaka e Shaqiri mposhtin Serbinë

Xhaka me një supergol barazoi së pari rezultatin ndaj Serbisë, kurse Shaqiri me një mjeshtëri të jashtëzakonshme në minutën e 90 i dha fitoren Zvicrës ndaj Serbisë.Që të dy festuan me shqiponjë.

The Guardian: Është dashur të jenë ata – Xhaka e Shaqiri

Gazeta prestigjioze “The Guardian” nga Britania e Madhe është përkujdesur që ta shkruajë njërin prej shkrimeve më të veçanta për fitoren e madhe të shqiptarëve të Zvicrës ndaj Serbisë në Botërorin që po mbahet në Serbi.

“The Guardian” e nis artikullin me fundin e zjarrtë të ndeshjes, për të cilin u përkujdes Xherdan Shaqiri.

“Është dashur të jenë ata. Papritmas, në minutën e fundit, Xherdan Shaqiri po vraponte, serbët e ndiqnin por nuk arritën ta ndalnin para se ai të lëshonte topin nën Vladimir Stojkoviqin. Ishte gol që mposhti Serbinë dhe e vuri Zvicrën në pozitë të fortë për të kaluar grupin, por kjo kishte më shumë domethënie”, ka shkruar “The Guardian”.

“Derisa kthehet dhe bërtet, heq fanellën, shfaq muskujt dhe bën shqiponjën. Përkrah tij, Granit Xhaka e bëri të njëjtën – për herë të dytë në ndeshje”, shkruan më tej prestigjiozja britanike, transmeton Koha.net.

“The Guardian” kujton se për dyshen golashënuese kjo ishte më shumë se një ndeshje mes përfaqësueseve. Ajo përmend burgosjen e babait të Granitit, Ragip Xhakën që kishte protestuar për pavarësinë e Kosovës në ish-Jugosllavi.

“Xhaka barazoi, me një goditje të fuqishme prej 20 metrave, tani Shaqiri u përkujdes për fitoren. Dy kosovarë, dy golashënues, në një stadium ku rusët dhe serbët u bën bashkë për të përkrahur një ekip që Shaqiri dhe Xhaka nuk e shohin si kundërshtar të zakonshëm. Shaqiri ka flamurin e Kosovës në këpucë. Babai i Xhakës u burgos dhe u keqtrajtuar në ish-Jugosllavi”, shkruan “The Guardian”.

“Së bashku me Valon Behramin, vërshëlleheshin nga turma që këndonte: ‘Serbia-Rusia! Serbia-Rusia’. Një baner i deklaroi dy shtetet si ‘vëllezër’”, shkruan ajo.

Xhaka: Moj Serbi rrjetën ta shpova, se mu m’thojnë Granit Kosova

Granit Xhaka i cili shënoi gol kundër Serbisë, ka komentuar në rrjetin social Instagram fitoren e Zvicrës.“Mos Serbi rrejtën ta shpova, se mu m’thojnë Granit Kosova”, ka shkruar Xhaka në faqen e tij zyrtare në Instagram.

Këtë mbishkrim e ka shoqëruar me fotografinë e tij ku shihet duke bërë shqiponjën.“Po po poooo! Ne kurrë s’dorëzohemi dhe gjithmonë luftojmë. Xhakaboom u rikthye”, ka shkruar në një postim tjetër të tij në Instagram. Në postimin e radhës, ka etiketuar edhe Xherdan Shaqirin. “Ia dolëm vëlla”, ka shkruar ai

Shaqiri komenton festimin e golit të tij, dhe fishkëllimat e tifozëve serbë

Xherdan Shaqiri, ishte padyshim protagonisti kryesor i sfidës së sotme ku Zvicra fitoi përballë Serbisë, 1-2.Pas ndeshjes ai foli me pjekuri ku anashkaloi polemikat në lidhje me festimin e tij.

Ai ka treguar duke treguar se nuk kanë qenë shkaqet politike ata qe e kane shtyre per te festuar me shqiponje. Shaqiri u fokusua te loja dhe deklaroi se skuadra e tij e kishte merituar fitoren.

“Nuk dua të flas për këtë, në futboll ke emocione dhe mund ta shihni çfarë bëra. Është vetëm emocion, jam shumë i lumtur që shënova. Nuk mendoj se është koha të flasim për këtë festim. Ne kemi treguar moral të madh në këtë takim dhe e kemi merituar fitoren. Nuk është diçka e re për mua që dikush të pres nga unë për ta vendosur ndeshjen. Unë jam këtu për ndeshje të mëdha. Luajtëm si ekip, jam shumë i lumtur që me një gol timin i jap tri pikët skuadrës”, ka thënë ai, transmeton kp.

Në fund gjilanasi foli edhe për fishkëllimat që i dhanë tifozët serbë.

“Ishte e pabesueshme ato që dëgjuam. Por ne dëshironim të bënim vetëm punën tonë dhe atë e bëmë. Nuk ishte për politikën, por për futbollin”, përfundoi Shaqiri.

Edhe Lichtsteineri festoi me shqiponjë

Kapiteni i kombëtares së Zvicrës, njëjtë si Xhaka e Shaqiri festoi me shqiponjë në duar.

Kur Granit Xhaka shënoi golin e parë ndaj Zvicrës, e festoi duke ngritur duart në formë të Shqiponjës. Edhe Xherdan Shaqiri, njësojë iu gëzua golit të dytë.

Por, entuziazëm të tillë pati edhe kapiteni Stephan Lichtsteiner.

Salih”BAM” Bacaj, ne Federaten Nderkombetare te Badybuilders

May 20, 2018 by dgreca

Salih “BAM” Bacaj ngadhënjen dhe hyn në Federatën Ndërkombëtare të BodyBuilders/19 Maj 2018 Charlestown, South Carolina-Salih “BAM” Bacaj 24 vjeçar i lindur në New York me origjinë nga fshati Pepaj i Plavë Gucisë merret me bodybuilding që kur ishte 14 vjeçar. Ai konkurroi dje në nivel kombëtar të SHBA-ve në Charlestown, South Carolina, ku ai qe nga dje 19 Maj 2018, hyri në ligen profesionale të bodybuilding në SHBA me çrast mori titullin profesional IFBB PRO CARD (International Federation of BodyBuilders).

Kortezi: Esad Gjonbalaj

Kryeredaktori i parë i Gazetës Sporti

March 26, 2018 by dgreca

Kujtesë- Në 1945 Tuni Papuçiu do të vazhdonte fushën e publicistikës si kryeredaktor i parë i gazetës « Sporti » dhe në Ballkaniadën e vitit 1946 , do të gjendej përkrah Andon Mazrekut për të përjetuar emocionet e fitores së parë ballkanike për Shqipërinë, që solli Loro Boriçi (1922 – 1984), simboli dhe legjenda e sportit shqiptar, e futbollit shqiptar./

Sa herë vjen qershori, koha e evenimentit më të rendësishëm të këngës për fëmijë, Festivalit Mbarëkombëtar të Fëmijëve që zhvillohet në qytetin e Shkodrës, gjallon kujtesa për personalitetin artistik të Tuni Papuçiut. Ai ishte pena e artë e këtij eventi që në bashkëpunim me kompozitorët e shquar Çesk Zadeja, Tonin Harapi, Avni Mula, Tish Daija, Pjetër Gaci, etj do të vlerësohej herë pas here me çmimet e para për tekstet e këngëve .

Po kush ishte Tuni Papuçiu?

Tuni Papuçiu lindi më 23 mars 1922 në një familje arsimdashëse të qytetit të Fierit. Mësimet e para i mori në vendlindje. Të mesmen dhe studimet e larta i vijoi në Tiranë. Përsa i përket jetës artistike, ai së bashku me shkrimtarin e njohur Jakov Xoxa, para çlirimit të vendit ideuan dhe nxorën gazetën “Përpjekja e rinisë » në Sevaster të Vlorës, ku Tuni ishte inkuadruar në Zonën e Parë Operative prej 1943.

Në 1945 ai do të vazhdonte fushën e publicistikës si kryeredaktor i parë i gazetës « Sporti » dhe në Ballkaniadën e vitit 1946 , do të gjendej përkrah Andon Mazrekut për të përjetuar emocionet e fitores së parë ballkanike për Shqipërinë, që solli Loro Boriçi (1922 – 1984), simboli dhe legjenda e sportit shqiptar, e futbollit shqiptar.

Trashëgimia publiçistike dhe letrare e Tuni Papuçiut është pasuri e pazëvendësueshme në arkivën e medias së shkruar të viteve ’40-`70. Prej qershorit të vitit 1959 deri sa u nda nga jeta më 3 qershor 1975, Tuni drejtoi të përdyjavshmen letrare dhe artistike të ilustruar për fëmijë, revistën « Fatosi » që tërhiqte vemendjen jo vetëm për gjallërinë e përmbajtjes, por edhe për paraqitjen artistike dhe estetike.

Krijimet e tij letrare për fëmijë janë botuar përgjithësisht tek vëllimet « Midis shelgjesh buzë lumit », « Një sirtar i veçantë » , « Supa dhe karamelet » etj.

Në tërësi libri “Një sirtar i veçantë” duket si një biografi e shkurtër e revistës “Fatosi”, ku Tuni Papuçiu shkriu talentin e vet të spikatur.

Krijimet e tij përmbajnë vjersha, tregime, skeçe, gazmore, pjesë teatrale, tekste këngësh për fëmijë dhe qindra e qindra artikuj në shtypin shqiptar. Energjia e tij buronte nga dashuria e madhe për botën e fëmijëve, nga humanizmi i tij.

Veprimtaria e tij letrare është përfshirë edhe në Fjalorin enciklopedik « Gazetarë dhe publiçistë shqiptarë », hartuar nga prof. dr. Hamit Boriçi dhe botuar nga « Unioni i Gazetarëve Profesionistë të Veriut (UGPV), « Figura të shquara të rrethit të Fierit », si dhe tek « Lexikon » me titull « Shkrimtarët shqiptarë për fëmijë » (1872-1995) hartuar nga prof. Odhise K. Grillo.

Tuni Papuçiu këndonte me shpirt këngët popullore. Ky passion bëri që të mblidhte në një fletore tekste të këngëve popullore të trevave të jugut dhe të veriut të Shqipërisë dhe t`i dorëzonte në Institutin e Folklorit, siç quhej atëherë, për të përcjellë në breza vlera etnografike, leksikore, historike etj.

Portreti i tij në sytë e shokëve dhe të gjithë atyre që e njohën do të vinte si njeri me zemër të bardhë, një njeri i dhembshur, i dashur me njerëzit, punëtor, i paepur, tepër optimist, si miku më i mirë i fëmijëve, që dinte të përcillte vetëm mirësi. Një rrugë në qytetin e Fierit, mban emrin e tij.

Është dekoruar disa herë për veprimtarinë e tij letrare dhe publiçistike. Disa mendime për Tuni Papuçiun marrë nga libri: “Figura të shquara të rrethit të Fierit”, 2002

“Tuni Petro Papuçiu ka qënë një personalitet i tipit unikal. Ai i ngjante minierës. Sa më shumë të kërkoje, aq më shumë vlera do t’i njihje, aq më shumë xhevahire do të gjeje te ky njeri.

Qe “njeri i mirë”, siç e ka përcaktuar akademiku Alfred Uçi, njeri i pazëvëndësueshëm i gazetës….’Piktori i merituar Agim Faja ka shkruar se Tuni Papuçiu “qe njeri në kuptimin e vërtetë të fjalës, me zemër të madhe dhe shpirt fisnik”.

“Tuni Papuçiu i përket elitës së publiçistëve. Aty ku ndodhej Tuni, aty buronte kënga, buronin gëzimi dhe humori. Aty ku ishte Tuni, aty takoje ndershmërinë, gatishmërinë, besimin dhe optimizmin për jetën.”

Kronika për festivalin e fëmijëve bëri që sot të kujtoj pervjetorin e figurës së shquar fierake, shkrimtarit për fëmijë, gazetarit dhe publiçistit Tuni Papuçiu, njeriut të qyteteve të mëdha, Fierit që e lindi, Tiranës , Vlorës dhe Shkodrës ku ai la gjurmët e tij. ( V.Dafa)

Kosova në Lojërt Olimpike Dimërore, Edhe Thaci ne hapje

February 9, 2018 by dgreca

1 Kosova Olimpiade

-Në Lojërt Olimpike Dimërore në Pyeongchang, në hapjen edhe Presidenti i Republikës së Kosovës, Hashim Thaçi/

1 Thaci Olimpiade

-Pas pjesëmarrjes në Lutjet e Mëngjesit në Uashington, presidenti kosovar ka udhëtuar për në Pyeongchang të Koresë së Jugut/

1 ok Kosova-Olimpiade-1

PRISHTINË, 9 Shkurt 2018-Gazeta DIELLI-B.Jashari/

Presidenti i Republikës së Kosovës, Hashim Thaçi, mori pjesë në hapjen e Lojërave Olimpike Dimërore në Pyeongchang.“Parakalim madhështor i ekipit olimpik me Flamurin e Kosovës në Pyeongchang të Koresë së Jugut, para miliona teleshikuesve nga mbarë bota. Kjo është hera e parë në historinë e shtetit tonë, që përfaqësohemi në Lojërat Olimpike Dimërore. Është dhurata më e mirë për dhjetëvjetorin e pavarësisë së Kosovës, bashkë me medaljen e artë të Majlinda Kelmendit, dy vjet më parë në Olimpiadën e Rios”, shprehet presidenti Thaçi nga Pyeongchang.Pas pjesëmarrjes në Lutjet e Mëngjesit në Uashington, presidenti kosovar ka udhëtuar për në Pyeongchang të Koresë së Jugut.Me ftesë të Presidentit të Komitetit Olimpik Ndërkombëtar, Thomas Bach, presidenti Thaçi do të marrë pjesë në hapjen zyrtare të Lojërave Olimpike Dimërore në Kore të Jugut”, theksonte njoftimi dërguar sot nga Presidenca.

Bëhet e ditur se, gjatë pjesëmarrjes në Lojërat Olimpike, presidenti Thaçi do të vizitojë fshatin olimpik, ku është i vendosur ekipi olimpik i Kosovës, duke i dhënë mbështetje Albin Tahirit, i cili përfaqëson shtetin e Kosovës në këtë olimpiadë.“Pjesëmarrja e Albin Tahirit në Lojërat Olimpike Dimërore në Pyeongchang 2018 të Koresë së Jugut është një tjetër fitore për Kosovën në dhjetëvjetorin e pavarësisë”, është shprehur presidenti Thaçi, duke ia dorëzuar solemnisht flamurin e Kosovës, të cilin do e përfaqësojë në mesin e shumë shteteve.“Pjesëmarrja e Kosovës në Pyeongchang 2018 është një jetësim i ëndrrës së shumë gjeneratave të sportistëve tanë”, është shprehur presidenti Kosovar.Presidenti Thaçi do të zhvillojë takime edhe me përfaqësues të lartë të shteteve pjesëmarrëse në këtë olimpiadë.Në Lojërat Olimpike në Pyeongchang të Koresë së Jugut janë duke marrë pjesë mbi 20 burrështetas, si dhe shumë liderë dhe përfaqësues shtetërorë nga mbarë bota.