Zelande e Re – Dielli

TRIUMF I SHQIPONJAVE NË FINALE

September 18, 2018 by dgreca

Shkruan: Sabit Abdyli/

Futboll, Zelandë e Re/

Ekipi futbollistik “Shqiponja” në finale për kupën e qytetit të Auckland-it fitoi me rezultat bindës 2 me 0. Shqiponjat gjatë gjithë ndeshjes dominuan, por vetëm në pjesën e dytë arritën te avancojnë nga penalltia pas ndërhyrjes së palejueshme të portierit kundërshtar. Pas golit të avantazhit ekipi i West Wanderers u përpoq me të gjitha forcat për ta barazuar rezultatin, por ndërhyrjet e mbrojtësve e portierit të shqiponjave ditën ta mbrojnë të paprekur rrjetin e portës së tyre. Në minutat e fundit me një aksion të koordinuar mirë shqiponjat shënuan për herë të dytë.

Në fund të ndeshjes në praninë e shikuesve dhe organizatorëve kapitenit të ekipit “Shqiponja”, Erzen Zekës ju dorëzua kupa. Për angazhimin në lojë, përgjegjësinë ndaj emrit të ekipit, disiplinës e fitores së merituar shqiponjat u duartrokitën e përgëzuan nga simpatizantët shqiptarë dhe të pranishmit tjerë të ardhur nga gjitha anët e qytetit. Organizatorët për lojtar më të mirë të kësaj finale shpallën Rrezon Cakin.

Ekipi futbollistik “Shqiponja”, ne foto ne kembe nga e majta:
Paul Benei, Miro Major, Erzen Zeka, Ideal Huskaj, Ervin Zeka, Josh Fisher, Alban Salihu,
Ulur: Rrezon Caki, Endrit Jonuzi, Edon Jonuzi, Yll Fejzullahu, Yll Caki, Shkelzen Polisi

Ekipet finaliste “Shqiponja” – “West Wandereres”

Kupa ne duar te kapitenit te ekipit “Shqiponja” Erzen Zekes

Keshillat e fundit per vazhdimin e pjeses se dyte te lojes

FESTA E FLAMURIT KUQ E ZI NE AUCKLAND, ZELANDE E RE

December 2, 2017 by dgreca

Shkruan: Sabit Abdyli/

Auckland, 2 dhjetor 2017/

DREKË E PËRBASHKËT ME RASTIN E E FESTËS SË FLAMURIT/

Me rastin e Ditës së Flamurit mërgata shqiptare festuan së bashku në vikendin e parë pas Festës, pikërisht me 2 dhjetor 2017. Gjithë ditën e kaluan së bashku nëpër mot të bukur e ambient të mrekullueshëm në parkun gjigant të qytetit. U kënaqen me llafe, mahi e humor, pije e ushqime tradicionale tona. Emocione malli e krenarie tek manifestuesit zgjoi Ilir hoxha me recitimet e poezive të tija për Flamurin kombëtar . Nuk besoj të ketë në planetin tokë shqiptar më larg nga vendi i origjinës se ne shqiptarët në Zelandë të Re. Për të ardhur në Kosovë na duhet së paku 25 orë fluturim me avion. Shqiptarët këtu janë te përqendruar në qytetin e Aucklandit. Jemi diku 100 -150 familje nga gjitha tokat shqiptare. Ardhje në numër të madh shqiptarësh pati në vitin 1951. 1997 dhe 1999. Të parët ishin të ikurit nga ardhja në pushtet e komunistëve në tokat tona në vitin 1945, të dytët pas trazirave e shkatërrimeve të vitit 1997 në Shqipëri, kurse këta të fundit janë të përndjekurit me dhunë nga shtëpitë e tyre gjatë gjenocidit në Kosovë nga regjimi shovinist i Beogradit, Shqiptarët e ardhur kanë gjetur vetën në ketë shtet me demokraci të konsoliduar. Gëzon fakti se shumë të rinj shqiptarë kanë kryer studimet në universitet prestigjioze të Aucklandit. Më duhet ta them se në shënimin e festave nuk është më ai entuziazmi si dikur. Zbehja e entuziazmit ndoshta po ndodh për faktin se mërgata priste shumë më shumë punë, angazhim e arritje në Kosovën e çliruar. Mërgimtari brengën e mallin më të madh e ka për atdheun. Gëzohet për sukseset, por edhe merakoset shumë për ngecjet.

HAPET KONSULLATA E NDERIT E R. SË KOSOVËS NË ZELANDËN E RE

October 28, 2017 by dgreca

Shkruan:Sabit ABDYLI/ Auckland, 27 tetor 2017 -Në qytetin metropol të Aucklandit të cilin nga gjitha anët e spërkasin valët e Paqësorit herë qetësisht herë me rrëmbim në praninë e përfaqësueseve të Komunitetit shqiptar, strukturave politike të qytetit dhe pushtetit qendror, konsuj të shteteve të ndryshme të akredituar në Auckland dhe miqve tjerë në mënyrë solemne u bë hapja e Konsullatës së nderit të Republikës së Kosovës me seli në qytetin e përmendur.

Konsullata do të drejtohet nga Prof. Dr. Kenneth Eduard Jackson, i cili ka qenë pjesë e misionit të USAID-it në Kosovë, ka vizituar shpesh Kosovën dhe është mik i mirë i shqiptarëve.

Me këtë rast ambasadori i Republikës së Kosovës dr. Sabri Kiçmari falënderoi Guvernatoren e Përgjithshme dhe Qeverinë e Zelandës së Re për aprovimin e propozimit për konsull nderi të prof. Jackson duke vlerësuar ketë si ndërmarrje të rëndësishme për marrëdhëniet mes dy shteteve. Në këto nëntë vjet pavarësie, vazhdoi dr. Kiçmari, Kosova tregoi se është faktor paqeje e sigurie në rajonin e Evropës juglindore dhe pjesë e pandashme e saj (Evropës) në rrafshin politik, gjeografik, historik e kulturor me synime të qarta integrimi në BE e NATO. Ambasadori falënderoi Qeverinë dhe popullin zelandez për pranimin dhe pritjen e një numri refugjatësh shqiptarë në vitin 1999, falënderoi për votën pro Kosovës në UNESCO në vitin 2015 dhe për angazhimin konstruktiv në debatet në KS të OKB-ës në vitet 2014-2015. Në fund ambasadori Kiçmari uroi Qeverinë e re në krye me znj. Jacinda Ardern e dal nga zgjedhjet parlamentare të këtij muaji. Pastaj doli në podium Konsulli Jeckson i cili në fjalën e tij tha se është i nderuar që tash e tutje do të përfaqësojë Republikën e Kosovës në Zelandën e Re duke premtuar kështu se do të punojë me zellin më të madh në thellimin e bashkëpunimit në mes dy vendeve dhe shprehu bindjen se Kosova do të jetë pjesë e BE.

Në emër të Korit diplomatik të pranishmit i përshëndeti Konsulli i nderit i Panamasë, i cili përcjelli urimin e Korit konsullor për hapjen e Konsullatës së nderit të Republikës së Kosovës, duke shprehur gatishmërinë për bashkëpunim dhe koordinim të aktiviteteve me Konsullatën e nderit të Republikës së Kosovës.

————-

Konsulli i nderit Prof. Dr. Kenneth Jackson u lind në Merton (Angli). Në vitin 1972 emigroi në Zelandën e Re. Katër dekada me radhë ka punuar në Universitetin e Aucklandit. Ka mbajtur ligjërata në universitete të shumta: në Indi, Kinë, Japoni dhe Kosovë. Në vitin 2016 ka punuar në një komision profesional të Parlamentit të Republikës së Kosovës për hartimin e raportit rreth industrisë së resurseve, minierave dhe ekonomisë.

Sabit Abdyli

Foto 1. Dr. Kicmari, 2. Konsulli Prof. Jeckson, 3… pjesmarres ne ceremoni

SHQIPTARËT NË ZELANDËN E LARGËT SHËNUAN DITËN E SHPALLJES SË PAVARËSISË

February 19, 2017 by dgreca

Pergatiti per Diellin:Sabit Abdyli/

Me rastin e festës sonë të madhe të 17 Shkurtit. Mërgata shqiptare organizoi drekë të përbashkët në parkun e njohur të qytetit “One Tree Hill. Ata” krejt mbas ditën u kënaqën së bashku nën hijen e drurëve gjigant dhe ambientin e mrekullueshëm të parkut. Pranë sofrës së përbashkët me ushqime tona tradicionale e pije uruan njëri tjetrin, shprehen gëzimet e shqetësimet e tyre për gjithçka që po ndodhë në tokën e origjinës së tyre. Krijuesi Ilir Hoxha zgjoi emocione malli e krenarie me recitime të poezive të tija të shkruara ekskluzivisht për Pavarësinë dhe vendlindjen (Kosovën), kurse Osmon Lleshi me shakat e tija të këndshme, herë-herë edhe me thumba, krijoi çaste gëzimi e hareje në mesin e manifestuesve.

Sabit Abdyli, 19 shkurt 2017