Kosovë-Kuvendi, seancë të jashtëzakonshme për Haradinajn

-Të martën, në 10 janar, në orën 11:00, Kuvendi i Kosovës mblidhet në seancë të jashtëzakonshme, në të cilën do të debatojë për mbajtjen në arrest të kryetarit të AAK-së, Ramush Haradinaj, në Francë/

-Në 4 janar, kryetari i AAK-së, Ramush Haradinaj, është ndaluar në aeroportin e Baselit, sipas një urdhërarresti të lëshuar nga Serbia në vitin 2004, dhe po mbahet në paraburgim në Francë, ndërsa Beogradi ka kërkuar ekstradimin/

-Ramush Haradinaj është dorëzuar vullnetarisht në Tribunalin e Hagës në 9 mars 2005, pasi një ditë më parë kishte dhënë dorëheqje nga funksioni i kryeministrit të Kosovës, menjëherë pasi ishte njoftuar për ngritjen e aktakuzës. Nga Tribunali i Hagës Haradinaju shpall  i pafajshm për të gjitha pikat e akuzës, në 29 nëntor  2012/

PRISHTINË, 7 Janar 2017-B.Jashari/ Kuvendi i Kosovës, edhe pse në kohë pushimi mes dy sesionesh, do mblidhet ditën e martë në orën 11:00 në seancë të jashtëzakonshme me vetëm një pikë në axhendë: “Mbajtja në arrest e kryetarit të Aleancës për Ardhmërinë e Kosovës, Ramush Haradinaj, në Francë”. Seanca ishte kërkuar për sot pasdite, por shkaku i kohës së pushimeve në Kuvend e mosndodhjes së një numri të deputetëve në Kosovë u vendos që seanca të mbahet në 10 janar.Shqyrtimi i kërkesës për mbajtje të seancës së jashtëzakonshme, u bë në mesditë në një mbledhje të Kryesisë së Kuvendit të Kosovës me kryetarët e grupeve parlamentare, të ftuar mbrëmë. U vlerësua se kërkesa me 43 nënshkrime të deputetëve i plotëson kushtet për të thirrur seancë të jashtëzakonshme të Kuvendit. Pas një proteste në Prishtinë, marshimi të qetë deri të Ambasada e Francës, Aleanca për Ardhmërinë e Kosovës dje pasdite njoftonte se grupi parlamentar i saj në nismën për thirrjen e një seance të jashtëzakonshme të Kuvendit të Kosovës kishte mbledhur nënshkrimet e nevojshme, “me kërkesë që kthimi në atdhe i Ramush Haradinajt të konsiderohet detyrë shtetërore, si dhe të pezullohen bisedimet me Serbinë”.

Në 4 janar, kryetari i AAK-së, Ramush Haradinaj, është ndaluar në aeroportin e Baselit, sipas një urdhërarresti të lëshuar nga Serbia në vitin 2004, dhe po mbahet në paraburgim në Francë, ndërsa Beogradi ka kërkuar ekstradimin.Qeveria e Kosovës deklaroi dje se  “fletarresti për Haradinajn është i motivuar politikisht dhe armiqësisht nga Beogradi” dhe se “do të vazhdojë angazhimin e gjithanshëm që aktakuzat e paligjshme, të padrejta dhe tendencioze të Serbisë ndaj personaliteteve kosovare, sa më parë të shpallen të pavlefshme”.Ramush Haradinaj është dorëzuar vullnetarisht në Tribunalin e Hagës në 9 mars 2005, pasi një ditë më parë kishte dhënë dorëheqje nga funksioni i kryeministrit të Kosovës, menjëherë pasi ishte njoftuar për ngritjen e aktakuzës. Nga Tribunali i Hagës Haradinaju shpall  i pafajshm për të gjitha pikat e akuzës, në 29 nëntor  2012.Kuvendi i Kosovës, me miratimin me procedurë të përshpejtuar të Ligjiit për veteranët e luftës së Ushtrisë Çlirimtare të Kosovës, të ndryshuar dhe plotësuar, në seancën e zhvilluar në mbrëmjen e 30 dhjetorit përmbylli sesionin vjeshtor dhe punën  e vitit 2016,  ndërsa sesioni i ri, pranverori, u paralajmërua të niste në 16 janar të vitit të ri 2017.