AGIM XH.DËSHNICA-BOSTON-

Shhkrimtares disidente  Musine Kokalari-

Motër e muzave, Musine, /

të pret qyteti ndër legjenda, /

 Mali i Gjerë, shtëpitë përpjetë, 

me lule, gjethe sipër muresh, 

teqe, selvi në qiell lartuar

 tek sillen retë mbi kala, 

mbi Argjironë ndër mendime,

 në gji fëmijën me dridhërimë!

Ja, Palortoja po hap dritaret!

 Ka mall, të pret mëhallë e bukur! 

Me çantën plot  visare, 

lehtë e lehtë, e qeshur 

ngjitesh nëpër sokak! 

O motër moj, o Musine!

Të pret krahëhapur portë e lartë, 

shtëpi e gurtë, zemër e mirë,

oda e qetë, vatër e ngrohtë 

O motër moj, o Musine!

Por çfarë të thoshte  nënua plakë

 atje, rreth vatrës, urtë e butë?

 Mos vallë kërkoje nëpër shkëndi 

për miturinë yjet e bukur,

 shpresat si ëndrra për rininë,

 o motër moj, o Musine?

Në qiell  shpirti të harrohej, 

me fjalë të arta për Naimin, 

për ditë me dritë nga perëndon, 

kur qark fantazma mbi botë endej, 

me gjak e tmerr sa tundej jeta!

 Më kot  grusht i rreptë i dhunës, 

padrejtësisë nëpër zymti,

 ngrihej mbi ty me kërcënim, 

kur ne me mall kërkonim vjollca, 

për ty, që deshe të ishe lule, 

o motër vuajtjesh, moj Musine!