-Ish-Sekretarit të Përgjithshëm të NATO-s, Robertson i dorëzohet “Medalja e artë e lirisë”, dekoratë nga Presidenti historik Rugova/
-Presidentja Atifete Jahjaga priti lordin George Robertson, ish-Sekretar i Përgjithshëm i NATO-s-
Nga Behlul Jashari/ PRISHTINË, 19 Janar 2016/ Presidentja e Republikës së Kosovës, Atifete Jahjaga priti në takim lordin George Robertson, ish-Sekretar i Përgjithshëm i NATO-s, të cilit i dorëzoi “Medaljen e artë të lirisë” për kontributin e lartë për lirinë e Kosovës, që i është ndarë nga Presidenti historik i Kosovës, Ibrahim Rugova në vitin 2004.
Presidentja Jahjaga shprehu mirënjohjen e qytetarëve dhe institucioneve të Kosovës për ndihmën që Britania e Madhe i ka dhënë Kosovës në periudhën më të rëndë dhe në fazën e shtetndërtimit të saj. Presidentja Jahjaga tha se intervenimi i NATO-s, pjesë e cilës ishte edhe Britania e Madhe, ishte vendimtar për të ndaluar gjenocidin në Kosovë dhe për ta shpëtuar popullin e Kosovës.
Presidentja Jahjaga çmoi kontributin e Lordit Robertson në çlirimin e Kosovës dhe në mbrojtjen e vlerave demokratike të botës të përparuar. Ajo tha se Kosova do të jetë gjithmonë mirënjohëse për kontributin e mijëra djemve dhe vajzave që shërbyen në Kosovë në kuadër të forcës paqeruajtëse të KFOR-it dhe misioneve ndërkombëtare, duke garantuar paqen dhe stabilitetin në Kosovë dhe në të gjithë rajonin.
Lordi Robertson shprehu falënderimin e tij për dekoratën dhe nderimin që i është bërë dhe e cilësoi ndërhyrjen e NATO-s në Kosovë si një veprim të drejtë, i cili përcaktoi edhe jetën e tij. Ai shtoi se është krenar me të arriturat e Kosovës, duke u shprehur se e ardhmja e Kosovës është në duart e vet qytetarëve të saj.
Në Ditën e Lirisë, 12 qershor 2004 – në 5 vjetorin e hyrjes shpëtimtare të NATO-s në Kosovë në 12 qershorin e vitit 1999, Presidenti në atë kohë Ibrahim Rugova në akademinë solemne njoftonte se me rastin e atij përvjetori kishte vendosur të dekorojë me “Medaljen e Artë të Lirisë” burra shtetesh dhe personalitete të njohura të botës për meritat e tyre për mbrojtjen e lirisë së Kosovës dhe për ndërtimin e lirë të Kosovës.
Në tekstin e Dekretit Presidencial thuhej:
“Në pesëvjetorin e hyrjes së trupave të NATO-s/KFOR-it në Kosovë, 12 qershorit, Ditës së Lirisë së Kosovës, në bazë të fuqive kushtetuese të Presidentit të Kosovës me Dekret të veçantë kam vendosur të dekoroj me ‘Medaljen e Artë të Lirisë’ shefa të shteteve, të qeverive, senatorë, kongresmenë, deputetë, ushtarakë, ministra, personalitete të Amerikës e të Evropës për meritat e tyre për mbrojtjen e lirisë së Kosovës, dhe për ndërtimin e vendit të lirë të Kosovës, si dhe për integrimin e tij në bashkësinë e kombeve të lira të botës”.