Dita e Flamurit – Page 2 – Dielli

Nga Keze Kozeta Zylo/

Miliona shqiptarë rreth rruzullit tokësor e festojnë Ditën e Flamurit Kombëtar si ditën më të shenjtë të vitit.Edhe shoqata e mirënjohur “Ana e Malit” me kryetar z.Ismet Kurti në Amerikë si pjesë e Diasporës shqiptaro-amerikane mbledh së bashku shqiptarët për çdo vit për të fesetuar me nderime e madhështi Ditën e Flamurit, 28 Nëntorin, Pavarësinë e Shqipërisë.

Në ishullin e “Staten Island” të Nju Jorkut, ku rrezet e shndritshme të diellit të lëbyrnin sytë edhe pse fund nëntori, në restorantin “Brook Catering Hall” me pronar z.Shaban Seferi së bashku me stafin e punës kishin përgatitur cdo gjë dhe iu uronin pjesëmarrësve mirëseardhjen për Festën e Flamurit.

Është një ishull që tërheq shumë turistët sepse lidh Manhattanin që udhëton me anijen “Ferry” anijen që mund të udhëtosh pa para dhe shikon fare afër Statujës së Lirisë, apo mund të shkosh në Brooklyn nëpërmjet urës së famshme “Verrazano Bridge”, urës së vetme në botë që mbahet nëpërmjet forcës së tërheqjes.

Mbrëmja festive e Nëntorit e konceptuar nga anamalasit ishte tipike festive, plot kulturë, ishte një festë spektakolare pa asnjë lloj fjalimi pompoz, ishte një shfaqje spektakolare nga shoqata “Tradita”, “Biznis Klub Anamalit” dhe Buzuku të ardhur enkas nga Ana e Malit, Kraja, Ulqini, nga trevat autoktone shqiptare të pushtuara padrejtësisht nga sllavët. Anamalasit shtruan një darkë për mysafirët të cilët kishin ardhur për Ditën e Flamurit nga Ulqini i largët, ndërsa festimin zyrtar këtë vit e organizojnë me mjaft shoqata të tjera të Diasporës të udhëhequr nga asnambleisti i shtetit të nju jorkut, shiqptari i parë i zgjedhur z.Mark Gjonaj.

Kjo shfaqje spektakolare mund të jepej pa frikë në sallat mondane të New Yorkut dhe me siguri do të mahniste artdashësit e shumtë shqiptarë dhe të huaj nga vallëzimet, këngët dhe kostumet marramendëse shumëngjyrëshe të asaj treve.

Mbrëmjen e ka hapur n/kryetari i shoqatës “Ana e Malit” z.Xheladin Zeneli i cili iu ka uruar të gjithë pjesëmarrësve Gëzuar Ditën e Pavarësisë dhe e festofshim perjetësisht këtë ditë të shenjtë, ndërkohë ka falënderuar dhe iu ka uruar punë të mbarë shoqatës “Tradita”, Bisnez Klub Anamalit” dhe Buzukut për mirëseardhjen në Festën e Pavarësisë.

Z.Zeneli ftoi në skenë kryetarin e “Biznis Klub Ana e Malit z.Kabil Kurti i cili kishte ardhur nga Ulqini ku midis të tjerash tha:

“Ana e Malit në të cilën kryen veprimtarinë “Biznis Klub Anamalit” është një zonë me potenciale të mëdha natyrore dhe ekonomike. Kjo shoqatë ka në axhendën e vet një sërë aktivitetesh ku dy projektet më serioze të saj janë Dita e Shegës dhe Dita e Diasporës.

Dita e Shegës është një manifestim gjithëpopullor që ka qëllim promovimin e prodhimeve vendore të cilët do ndikojnë në rritjen e mirëqenies sociale të banorëve për nder të pemës autoktone të trevës sonë Shegës. Shega ka qenë simbol i trashëgimisë dhe jetëgjatësisë për popuj autokton ku së bashku me ullirin dhe fikun janë pemët më të vjetra që kanë mbi 5 mijë vjet lashtësi. Lulet e shegës janë simbol i dashurisë kurse fryti i saj simboli i pjellorisë.

Dita e Diasporës është një projekt me shumë rëndësi dhe bëhet në bashkëpunim me shoqatën “Ana e Malit” në New York dhe kjo bëhet për nder të bashkëvendasve tanë që vinë gjatë pushimeve në vendlindje”.

Koncertin madhështor e ka prezantuar aktivistja e dalluar zonja Zyra Mehani

e shoqatës “Tradita” me drejtor z.Sabri Salaj e cila iu uroi gjithë të pranishmëve: “Mirë se u bashkuam” urim që u mirëprit me duartrokitje të nxehta.

Ajo falënderoi “Anën e Malit” dhe të gjitha shoqatat që i kanë mbështetur vazhdimisht dhe e filloi programin duke kujtuar aktivitetet historike të mëparshme për Flamurin shqiptar.

Grupi i valltarëve interpretoi duke vallëzuar një kolazh të valleve të trevës së Anës së Malit, lëvizjet e tyre, krahët e bashkuar në fluturim shqiponje rrahja e këmbëve në tokë burrash shprehte qartë dashurinë si bij të lashtë të Mëmëdheut tonë të shumëvuajtur.

Këngëtari Edi Luka interpretoi “Lulëkuqja e Gjakovës” dhe “Dashuroj kuq e zi”, dashuri që del nga palca e shpirtit.

E magjishme ishte dhe “Vallja e Shegës” krejtësisht tradicionale që u shoqërua nga këngëtarja e re anamalase Egzona Salaj.

Artisti i shquar shqiptar anamalas Gezim Salaj interpretoi me profesionalizëm këngën “Ana e Malit” vendlindja ime.

Mbremja vazhdoi me plot intensitet, emocion dhe duartrokitje kur në skenë u interpretua vallja e dasmës anamalase e cila në festivalin mbarëkombëtar folklorik të Gjirokastrës në këtë vit u kurorëzua me çmimin e tretë mbarëkombëtar.

Këngëtari Suad Mehmeti u prezantua me një potpuri këngësh autoktone ulqinake i cili u mirëprit plot emocion nga të gjithë pjesëmarrësit artdashës.

Me mjaft duartrokitje të nxehta u mirëpriten këngët “Çohem nadje pa dal drita” dhe sidomos kënga patriotike “Mos m’i prek trojet e mia” interpretuar mjeshtërisht nga Gëzim Salaj.

Kanarina shqiptare e Anës së Malit, Ulqinit dhe Krajës këngëtarja simpatike Egzona Salaj e cila ka fituar çmimin e parë në festivalin kombëtar të Gjirokastrës si interpretuesja më e mirë e vitit në rrafshin gjithëpërfshires kombëtar me “Këngën e Gjergjefit” u paraqit para publikut me një potpuri këngësh shkodrane si: “Për mu paska kenë kismet”.

Këngëtarët e mirënjohur Viktor Ndrekaj dhe Luigj Llukiqi interpretuan këngë të ndryshme, por ajo më me humor të hollë ishte: “Bisedojnë dy plaka të veja” , këngë që u mirëprit plot duartrokitje.

Programi artistik tejet i bukur dhe plot kulturë shoqeruar nga DJ Samy u mbyll me vallen e interpretuar magjishëm nga shoqata “Tradita” e quajtur “Vallja e Bashkimit”. Vallja është përgatitur nën mbikqyrjen e Din Zenelit, aktorit Shefqet Luca, me koreografi të valltarit kryesor të “Ansamblit Shota” nga Kosova Besnik Grajcevicit.

Vallja e Bashkimit duhet të pushtoje gjithë ekranet shqiptare me vajzat dhe djemtë me kostumet me ngjyra marramendëse sidomos grupi me kostumet e Shestanit, veshje katolike e trevës së Krajës do të më bënte një përshttypje të jashtëzakonshme, ato dukeshin sikur kishin ardhur nga një planet tjetër, por në fakt ato ishin shtojzovallet shqiptare, ardhur nga Illyria këtu e qëkur ka lindur njerëzimi.

Duke u bashkuar të gjithë në vallëzim, pjesëmarrës dhe artdashës në “Vallen e Bashkimit” ndjeja dhe shikoja në sytë e tyre dashurinë dhe urimin gjithëshqiptar: “U bashkofshim sa më parë” se kush ka marrë pjesë në aktivitetet pranë shoqatës “Anës së Malit” jemi ndjerë si pranë Ulqinit pranë Bashkimit!

28 Nëntor, 2015-Staten Island, New York

Thirrje e ish të përndjekurve politikë shkodranë me rastin e 28 Nëntorit./
Nga Filip Guraziu/Për‘Shoqatën e ish të përsekutuarve politikë’Shkodër*/
‘Shoqata e ish të përndjekurve politikë Shkodër’ organizon sot këtë takim përkujtimor me rastin e 102 vjetorit të pavarësisë nga pushtuesi shekullor turk që u konkretizua me themelimin e shtetit të ri Shqiptar me 28 Nëntor 1912 nën drejtimin e Ismail Qemalit si dhe në përkujtim të Ditës që forcat gjermane naziste u Larguan nga Shqipëria.
Është bërë zakon që në çdo ceremoni përkujtimore që lidhet me ditën e pavarësisë ose me ditën e largimit të nazistëve gjermanë nga territori shqiptar, të përshkruhet historiku i atyre ngjarjeve duke dhënë detaje dhe duke kujtuar emërat e protagonistëve të paharruar , gjë, që ne, nuk po e bëjmë, thjeshtë për çështje kohe, por edhe për arsye se ‘Shoqata e ish të përndjekurve politikë Shkodër’ në respekt të traditave të nacionalistëve shqiptare, duke konsideruar primar interesin kombëtar, sot dëshiron që të kontribuojë për ndërtimin e së ardhmes duke bërë thirrje që të vlerësohet me drejtësi dhe ndershmëri e kaluara përçarëse.
Gjejmë rastin, pra, që të ftojmë sot, të gjithë shqiptarët e ndershëm pa dallim partiak, drejtuesit e religjoneve, politikanët e majtë dhe të djathtë por sidomos historianët profesionistë dhe intelektualët e shquar që të kontribuojnë për arritjen e një qëndrimi unik mbi ngjarjet historike që përçajnë shqiptarët . Mungesa e një konsensusi, mbi interpretimet e ngjarjeve historike dhe sidomos të atyre që lidhen me luftën e shqiptarëve kundër pushtuesve të huaj në vitet e luftës së dytë botërore si dhe mbi luftën e klasave gjatë diktaturës komuniste, çedukon dhe çorjenton brezin e ri duke ja zbehur ndjenjën patriotike kombëtare ! Personalitetet dhe ngjarjet historike nuk duhet të trajtohen sipas konceptit komunist ‘bardh dhe zi’, duhet të largohemi nga fanatizmi partiak dhe klasor, dhe të vendosim interesin kombëtar mbi pasionin meskin personal.
Sot në këtë ditë përkujtimore, përulemi me respekt të thellë në nderim të të gjithë atyre shqiptarëve patriotë që me sakrifica sublime, në kushtet jashtëzakonisht të vështira të një lufte çfarosëse antishqiptare të koalicionit serb-grek-malazez , arritën të shpallin Shqipërinë e pavarur dhe të lirë me 28 Nëntor 1912.
Gjithashtu sot, ‘Shoqata e ish të përndjekurve politikë Shkodër’ respekton dhe përulet me nderim edhe ndaj të gjithë atyre që dhanë jetën për idealet e lirisë në luftë kundër pushtuesve të huaj, në vitet e luftës së dytë botërore, pavarësisht nga bindjet e tyre politike. Por këtu duhet të dallojmë ato fatkeqë që vdiqën në luftë vëllavrasëse civile, (shqiptari kundër shqiptarit) dhe dhanë jetën jo për lirinë e atdheut kundër pushtuesit, por për idealin komunist, ideal të cilin populli shqiptar, i majtë dhe i djathtë e flaku me përbuzje në vitin 1991. Këto ‘fatkeqë’ nuk mund të konsiderohen ‘heronj’ kombëtar, pasi ato qenë dhe mbetën vetëm ‘heronj’ të një ideologjije të dështuar komuniste që i solli aq fatkeqësi popullit shqiptar dhe sot ka urrejtjen unanime të shqiptarëve.
Shoqata vlerëson Luftën Nacional Clirimtare si dhe përpjekjet e Formacioneve Nacionaliste për luftën që bënë kundër okupatorit gjatë luftës së dytë botërore, por në të njëjtën kohë dënon qëndrimin sektar të udhëheqies komuniste shqiptare, të drejtuar nga Enver Hoxha, që për të kapur dhe mbajtur pushtetin, shkeli marrëveshjet dhe bëri kompromise në dëm të interesave kombëtare (Ju kujtojmë Mukjen, Bujanin, Masakrën e Tivarit, Marrëveshjen për kthimin me force të të arratisurve në Jugosllavi, etj. ) si dhe praktikoi luftën civile për pushtet, të cilën e vazhdoi deri në shëmbjen e komunizmit nën emërin e luftës së klasave, duke çfarosur dhe asgjësuar elitat fetare, intelektuale dhe nacionaliste shqiptare.
Gjejmë rastin sot, të përkujtojme me nderim të thellë dhe mirënjohje edhe të gjithë ato patriotë të ndershëm që u flijuan dhe u persekutuan nga diktatura komuniste e Enver Hoxhës . Nuk po japim shifra se ato janë rënqethëse ! Nga ato të burgosur politikë që i mbijetuan kalvarit të vuajtjeve, fatkeqësisht sot, fare pak janë gjallë dhe pothuaj të gjithë të sëmurë. Ato që jetojnë, dhe familjarët e tyre, edhe këto bashkëvuajtës, formojnë sot shtresën më të varfër të shoqërise shqiptare.
E mbyllim këtë bisedë edhe me një tjeter apel të fuqishëm drejtuar politikës dhe ligjvënësve shqiptarë; ‘ Shoqata e ish të përndjekurve politikë Shkodër’ kërkon me këmbëngulje të drejtat e mohuara kësaj shtrese, si:
1. Dhënia e Statusit Juridik për çdo ish të përndjekur politik.
2. Dënimin zyrtar të krimit të diktaturës komuniste Hoxhiste.
3. Shlyerja përfundimtare e shperblimit për ish të përndjekurit politikë sipas ligjit në fuqi.
4. Rivlerësimi i shpërblimit për të pushkatuarit politikë.
5. Dhënia e shpërblimit për të internuarit politikë.
Shpersojmë dhe urojmë që kjo thirrje mos të bijë në vesh të shurdhër!
Rroftë Shkodra, rroftë Shqipëria , rrofshin Shqiptarët kudo që ndodhen !
Rroftë Dita e Flamurit !
* Redaksia e Diellit falenderon z. Filip Guraziu per bashkepunim me Diellin.

Shkodër, 26.11.2014

Në Staten Island”, Anamalasit rreth “Valles së Bashkimit” me Flamurin kuq e zi

‘Dita e Flamurit’ Apelon!