Nga Ramiz LUSHAJ/
1.Bota moderne kur ngre hotele luksoze iu vno’ yje për me i dallue ndërveti. Kështu dhe kullat malësore në Shqipërinë e Veriut. Edhe Kullat e Doçit të Lurës, dera e Parë e Lurës, kanë shumë yje flamurtarë, martirë, prijës, dijetarë, qyshse nga koha e Skënderbeut, me Preng Nikollë Doçin, tevona – me Llesh Nikollë Doçin e “Treqind duvakëve të Lurës”, Dod Llesh Doçin, me Dodë Llesh Doçin (Sulltani), me Kolë Bush Doçi, me Bibë Kol Doçi, me Doç Gjergj Doçi, me Llesh Preng Doçi, me Kol Bibë Doçin e shkollës së parë shqipe në Lurë, …me Gjok Doçi – Hero i Popullit…dhe Llesh Zef Doçi e, i sotmi, i kësaj kohe, i kësaj dite, qytetari dinjitar e biznesmeni humanist Dod Llesh Doçi.
Këshilli i komunës Lurë më 24 maj 2015, bash në Fushë-Lurë, në Festën e Shën Kollit,ka me e dekorue me titullin e lartë “Qytetar Nderi” edhe lurasin e saj, një protoganist fisnik, biznesmenin lartësor, meritor, bajemirë, Dod Llesh Doçi, që është një nga aktet mirënjohëse ma të mira që ka krye tashti së vonit ky truall i lavdive etno-historike e bukurive natyrore prej se nga koha e Shkambit të Kuq dhe e Liqejve të Lurës
Dod Doçin e kam njoft në Fierzë, në vitet ’70, asokohe kur ndertohej vepra e madhe e dritës. Ai ishte një nga emrat e njohur të këtij gjigandi energjitik -si një teknik i zoti, si drejtues sektori (kantieri) me qindra punëtorël, si veprimtar i shquar. Punonte atje sëbashku me të tjerë të gjakut e pragut të tij. Ata ishin një “Lurë e vogël” në brigje të Drinit e Valbonës. Kësokohe e pata takue dhe Llesh Zef Doçin, babën e Dodës, kur erdhi atje, si zakonisht, me i pa njerëzit e vet. Dr. Nikollë Loka e ka botue vjet një monografi “Llesh Zef Doçi i Lurës, Forca e mendjes, pesha e fjalës” e, në ditën e përumit të saj, më 31 mars 2014, në atë ceremonialitet të drejtuar nga Osman Vladi, iu dorëzue titulli i lartë “Qytetar Nderi” i Lurës. Tashti, babë e djalë – “Qytetar Nderi” të Lurës. Ecë tradita. Te dy janë emra në kalendarin e kohës.
Dod Doçi është i lidhun fort, rrënjë e degë, me Lurën e tij. E ka mbajt lart emrin e vendlindjes së vet. Ai, si biznesmen, tue pasë përkrah dhe vllaznit e vet, e ka ngritë në Gjirin e Lalzit në Durrës një fshat turistik me emrin “Lura”. Kjo është Lura e Dytë në brigjet e Detit Adriatik. Edhe gjelbrimin e ka nga Lura, nga pyjet e saj. Vjet, në tetor 2014, e ndërtoi nga projekti e deri tek pajisjet e mjediset përrreth dhe e përuroi Kishën katolike në Lurë, kishën me emrin e Nënës së Jezu Krishtit. Ai ka investue për dhjetë vjet për kujdestari të mirëmbajtjes së saj.Nga A tek ZH gjithçka ishte mendja e dora e tij, xhepi i tij, i firmës e familjes së tij. Si astenji rast tjetër kësisoj në historinë shqiptare. Ai është dhe njeri bamirës. Përndryshe, siç e tha në simbolikë, me metaforë të bukur, një intelektual luras atje tek liqeni i Bruçit në gusht 2014: “Dod Doçi është një kishë tek i cili faleshim të gjithë, po nuk e dinim se një ditë ai do të ndërtonte dhe vet një kishë në Lurë”.
2.Isha i ftuar nderi në përurimin e Kishës katolike në Lurë, sëbashku me gazetarin e “Zëri i Amerikës”, Pëllumb Sulo, i ardhun në këtë ngjarje të veçantë nga Shkodra, i cili herët, në rininë e tij, ka qënë mësues edhe në Tropojën time, në Nikaj-Mërtur.
Prania jonë në Lurë më solli në mendje Fan Nolin, që në Konferencën e Paqes në Gjenevë më 1919, tue iu kundërpërgjigj akuzave kundërshqiptare se shqiptarët nuk qënkan të zotët të bajnë shtet, sepse nuk merren vesh e të bashkëjetojnë me njëri-tjetrin, iu deklaroi aty: “Dëshiroj që zotëria Juaj të më tregojë një vend tjetër në Evropë apo gjetkë ku të gjallojnë bashkë më së miri në një shtëpi familjarë dy besimesh, të krishterë e myslimanë. Kurse kjo ndodh në dy krahina të vendit tim, në Lurë e në Nikaj-Mertur”.
Interesant është fakti se përfaqësues të tri familjeve tipike që kanë pasë në trungun e madh të familjes e në kullat e veta edhe katolikë, edhe muslimanë, si ngahera,janë të pranishëm në Festën e Shën Kollit në Lurë. Ata janë të derës të Nikollë Kaçorrit, të Doçit dhe të Morisenëve. I përmendin dhe personalitete e udhëtarë të huaj. Dy përfaqësues të tyre nderohen me titullin “Qytetar Nderi” si biznesmeni Dod Llesh Doçi – një ndër 100 biznesmenët ma të shquar të Shqipërisë Londineze dhe ish luftëtari e kuadri i meritave e i sakrificave, Gjon Dedë Moriseni (pas vdekjes).
3.Në krye fill të këtij lajmi e kisha në mendje me i shkrue veç katër-pesë rradhë, po më erdhën fjalët e morën udhë, ndaj nuk po due me fol ma gjatë, veçse po i marr nga fletorja do fjalathanie nga dreka e pas përuimit të Kishës katolike Shën Maria në Lurë – vepër bamirëse e biznesmenit Dod Llesh Doçi i Lurës.
Nga urimi im në tetor 2014 në hotel “Hoti” në Lurë:
-Tungjatjeta! Po gotëzoj me Ju disa fjalë të mijat në këtë ditë nga ma të rrallat të jetës time, pasi në Ditën e bekuar të Bajramit marr pjesë në përurimin e Kishës katolike Shën Maria në Lurë, ku jena këtu në bashkari katolikë e muslimanë. Folëm me gazetarin e “Zërit të Amerikës”, Pëllumb Sulo, e ndajmë të njëjtin mendim: veprimtaria e sotme e përurimit ishte tejet e veçantë.
-Miq luras e të ftuar, e kam njoft Dod Doçin krejt të ri, para disa dekadash, në vitet ’70. Shumçka ka ndryshue në kohnat tona, edhe regjimet, edhe vendi ynë, po Doda ka mbet’ i njëjti – i pandryshueshëm në shpirtin e tij, në zemrën e tij, në jetën e tij. Unë jam një vit ma i madh se Doda po a ka më duket nja dhjetë vjet ma i ri. Dy fjalë – dy vlerësime: E para: Dod Doçi është njeriu që e ka ruajt gjithmonë Buzëqeshjen. E dyta: Dod Doçi është njeriu që vazhdimisht prodhon energji.
Gotëzimi tjetër: Dod Doçi i ka krye katër universitete Universiteti i parë Lurë, vendlindjen e tij. Është “Universiteti Popullor i Lurës”. E ka pasë fat genetik, jetik, se në këtë Universitet është i Derës së Doçit, i Derës së Parë në Lurë dhe ka pasë për dekan akademik Llesh Zef Doçin – babën e tij. Universiteti i dytë i tij është Universiteti i Veprave të Dritës. Kur ka punue në Fierzë, në Koman e në Banjë.Universiteti i tretë është Universiteti Shtetëror i Tiranës, ku u diplomua për inxhinier para ’90-tës.Universiteti i tij i katërt është Universiteti i tij i Biznesit. Shembulli ma i mirë është vet firma e tij “Lura”.
Me këtë gotëzim po iu them se jeta e Dod Doçit ka tri të veçanta: Jeta e tij është Sakrificë. Jeta e tij është Sukses. Jeta e tij është Meritë…”
4. Në përmbyllje, në këtë ditëmirë të dekorimit edhe të Dod Llesh Doçit kujtojmë një thanie: “As profetët nuk vlerësohen në vendlindjen e tyre”. Raste si ky përbajnë përjashtim. Biznesmeni lurjanë, Dod Doçi, ndonëse disi vonë, u nderua me titullin e lartë “Qytetar Nderi i Lurës”. E gëzoftë! I nderuari nderohet, veçanërisht nderi rritet kur të nderon Lura.
Ne foto: Dod Doci me zonjen e tij Alda Laçi-Doçi tek liqeni i Bruçit në Lurë.