Në ditën e dytë të vizitës zyrtare në Washington, DC, kryetari i komunës së gjilanit Lutfi Haziri, ka patur një takim të rëndësishëm me zyrtarë të lartë të Departamentit të Shtetit, duke përfshirë edhe Thomas Yazdgerdi, drejtor për Evropën Qendrore dhe Jugore.
Në takim u biseduan disa çështje të rëndësisë nacionale për Kosovën, dhe ndër më kryesoret ishte çështja e Gjykatës Speciale, bën të ditur sot njoftimi nga Komuna e Gjilanit.
Yazdgerdi shprehu insistimin e thellë të SHBA-ve si miku më i madh dhe më kryesor i Kosovës për themelimin e Gjykatës Speciale përmes Kuvendit të Republikës së Kosovës.
“Ne kërkojmë me ngulm që Gjykata Speciale të krijohet përmes institucioneve të Kosovës dhe besojmë se kjo do të ndodhë. Përndryshe, çështja do të mbetej në duartë e OKB-së dhe Këshillit të Sigurimit dhe kjo nuk do të ishte fare e mirë për Kosovën”, ka thënë Yazdgerdi.
Tutje ai ka shtuar se, “mosvotimi eventual i Gjykatës Speciale nga Kuvendi i Kosovës do të vinte në pikëpyetje të madhe kredibilitetin e SHBA-ve, dhe ne këtë nuk e meritojmë nga Kosova”.
Drejtori për Evropën Qëndrore dhe Jugore në Departamentin e Shtetit, Thomas Yazdgerdi, tutje ka falënderuar kryetarin Haziri dhe LDK-në për përkushtimin e tyre për këtë çështje, duke kërkuar që të njejten gjë ta bëjë edhe partneri tjetër i koalicionit, Thaçi.
Lutfi Haziri pasi ka falënderuar z. Yazdgerdi për përkushtimin dhe përkrahjen e parezervë të SHBA-ve ndaj Kosovë e ka siguruar atë se, “Kosova është ballafaquar me sfida të vështira edhe në të kaluarën dhe me sukses i ka kaluar ato. Edhe kësaj rradhe, unë besoj se Kosova do të dalë faqebardhë nga ky proces dhe Gjykata Speciale do të krijohen nga Kuvendi ynë”.
Ai me tej ka shtuar se, “ne jemi të vetëdijshëm për rëndësinë jetike që kanë marrëdhëniet e shkëlqyera në mes SHBA-ve dhe Kosovës dhe se asnjë politikan apo përfaqësues i denjë i popullit të Kosovës nuk do të merrte ndonjë veprim që do t’i lëndonte as edhe pak këto marrëdhënie”.
Në fund, duke kujtuar bashkëpunimin e suksesshëm të tij me Hazirin që nga koha e bisedimeve për statusin në Vjenë, drejtori Yazdgerdi ka thënë se, “esenca e lidershipit të mirë e të suksesshëm mbërthen në vete marrjen e vendimeve të vështira dhe jopopullore, duke vënë në rend të parë interesin kombëtar dhe atë shtetëror para çdo interesi tjetër, duke përfshirë edhe atë personal apo partiak”./b.j/