Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KRYETARI I VATRËS U PRIT NË TAKIM TË PËRZEMËRT NGA KRYETARI I PRISHTINËS PËRPARIM RAMA

by

Prishtinë, 19 Nëntor 2022- Kryetari i Federatës Pan-Shqiptare të Amerikës VATRA z.Elmi Berisha u prit në një takim të përzemërt e vëllazëror nga Kryetari i Komunës së Prishtinës z.Përparim Rama. Temë diskutimi ishte situata e përgjithshme në Kosovë, planet për ndryshimin e Prishtinës dhe transformimin në një kryeqytet europian, rritja e investimeve të huaja dhe plan-projekteve afatgjata për një zhvillim të qëndrueshëm e ndryshimin e filozofisë urbane e sociale të kryeqytetit të Kosovës.
Po ashtu u bisedua për rolin e Federatës Pan-Shqiptare të Amerikës Vatra dhe intensifikimin e angazhimeve në pranë institucioneve amerikane.
Kryetari i Komunës së Prishtinës z.Përparim Rama e falenderoi kryetarin e Vatrës z.Berisha për punën dhe angazhimin e Vatrës në dobi të çështjes shqiptare, komunitetit shqiptar në Shtetet e Bashkuara dhe sidomos festimet për 110 vjetorin e Vatrës e Pavarësisë së Shqipërisë.

Në prag të kremtimit të “Përvjetorit të Artë” të Kolegjit Universitar “Qiriazi”

by

Elmi Berisha, President i Federatës Panshqiptare “Vatra”, nderohet me Medaljen “Mirënjohja e Përvjetorit të Artë”

Në prag të kremtimit të “Përvjetorit të Artë”, sot në sallën “Charles R. Crane”, të Kolegjit Universitar “Qiriazi”, në Kodër-Kamëz, u organizua ceremonia e dhënies së Medaljes “Mirënjohja e Përvjetorit të Artë”, z. Elmi Berisha, President i Federatës Panshqiptare “Vatra”, në SHBA.

Medalja me motivacionin: “Në vlerësim të kontributit të Tij të çmuar dhe vlerat e treguara në drejtimin e Federatës Pan-Shqiptare në Shtetet e Bashkuara të Amerikës, “VATRA”. Personalitet i shquar, me vizione dhe rol të spikatur për forcimin e marrëdhënieve ndërmjet Shteteve të Bashkuara dhe Shqipërisë. Për konsolidimin e lidhjeve institucionale ndërmjet VATRA-së dhe Kolegjit Universitar “Qiriazi”, si vazhdimësi historike me ikonat e arsimit tonë kombëtar, Sevasti & Parashqevi Qiriazi dhe Kristo Dako, që janë trashëgimia e Kolegjit Universitar “Qiriazi”, por edhe pjesë e historisë së Federatës Pan-shqiptare “Vatra””, e akorduar nga Senati Akademik, iu dorëzua nga Presidenti i këtij Kolegji, Prof. Dr. Gjokë Uldedaj.

Në ceremoninë e dekorimit të z. Berisha, merrnin pjesë studentë dhe pedagogë të këtij universiteti. Të pranishëm ishin edhe Dr. Naim Dedushaj, drejtor i Rrjeteve të Bizneseve të Diasporës Shqiptare dhe Hazis Vardar, biznesmen, kryetar i Rrjetit të Bizneseve në Francë, të cilët shoqëronin kryetarin e “Vatrës” në turneun e Tij. Gjithashtu ishin të pranishëm edhe Robert Dako, nipi i Sevasti e Kristo Dakos dhe themelues i “Shkollës së Lartë Universitare Jopublike “Sevasti e Parashqevi Qiriazi”; Irfan Hysenbelliu, President i “Hysenbelliu Group”; Maksim Meço, rektor i Kolegjit Universitar “Qiriazi”; Kadri Morina, president i INSIG, biznesmen e humanist dhe të tjerë.

Z. Berisha duke përshëndetur të pranishmit tha, se ndihet i nderuar që pikërisht nga Kolegji Universitar “Qiriazi”, merr një vlerësim të tillë. “Vatra” me “Qiriazin”, u shpreh ai, kanë të përbashkët kontribuesit: motrat Qiriazi dhe rilindasin Kristo Dako, i cili në një kohë ka qenë kryetar i kësaj Federate dhe redaktor i “Diellit”, organit legjendar të “Vatrës”. Miku nga Shtetet e Bashkuara, tha në vijim se, dy institucionet tona, “Vatra” dhe “Kolegji Universitar Qiriazi”, mund të bëjnë më shumë për vlerësimin e këtyre figurave emblematike të Rilindjes dhe të arsimit kombëtar shqiptar. Përpara se të hapnin Institutin Femëror “Qiriazi” në Kodër-Kamëz, në afërsi të Tiranës, të tre themeluesit dhanë një kontribut të çmuar në organizimin e mësimit të gjuhës dhe të shkrimit shqip, në mesin e diasporës në Shtetet e Bashkuara.

Presidenti Uldedaj e garantoi kryetarin Berisha, se institucioni Tij, do të jetë gjithmonë e më tepër në krah të Federatës Panshqiptare “Vatra”, për përmbushjen e misionit të saj edhe si kontributore në realizimin e projekteve të përbashkëta.

KRYETARI I VATRËS VIZITË NË FAMILJEN JASHARI

by

Kryetari i Federatës Pan-Shqiptare të Amerikës VATRA z.Elmi Berisha zhvilloi një vizitë shumë emocionuese në familjen Jashari, Kompleksin Memorial të Varrezave të Familjes Jashari në Prekaz duke u përulur në nder e respekt të Komandantit legjendar Adem Jashari, familjes Jashari e të rënëve për lirinë e Pavarësinë e Kosovës. Kryetari i Vatrës nderoi sakrificën historike të Adem Jasharit familjarisht. Kryetari i Vatrës gjatë vizitës vëllazërore zhvilloi homazhe duke vënë kurora me lule te varri i Adem Jasharit, u prit ngrohtësisht në kullën e Rifat Jasharit ku u kujtua qëndresa e familjes Jashari, lufta e lavdishme e Ushtrisë Çlirimtare të Kosovës, gjëndja në Kosovë e perspektiva e popullit shqiptar në Kosovë. Në takimin e përzemërt u diskutua rreth rolit të shqiptaro-amerikanëve dhe kontributit të jashtëzakonshëm për lirinë dhe pavarësinë e Kosovës. Rifat Jashari e falenderoi kryetarin Berisha për vizitën duke i shprehur mirënjohjen e veçantë Vatrës e shqiptarëve të Amerikës si mbrojtës të çështjeve kombëtare. Kryetari Elmi Berisha e garantoi Bacën Rifat Jashari se Vatra do bëjë gjithçka për vëllezërit e motrat në Kosovë, për zhvillimin e Kosovës, me qëllim që çdo shqiptar jo vetëm në Kosovë por edhe në Shqipëri e në trojet etnike të ndjehet i sigurtë, i përfaqësuar dhe nën mbikëqyrjen e veçantë të Vatrës e shqiptaro-amerikanëve. Historia, sakrifica, lavdia e Jasharëve është unike në historinë e kombit tonë. Nderim përjetë komandantit legjendar Adem Jashari, Jasharëve heroikë dhe gjithë të rënëve për Lirinë e Kombit tonë.

KOSOVA ËSHTË E PA PREKSHME

by

Prishtinë, 14 Nëntor 2022- Kryetari i Federatës Pan-Shqiptare të Amerikës VATRA z.Elmi Berisha u prit përzemërsisht në një takim të nivelit të lartë nga Ambasadori i Shteteve të Bashkuara të Amerikës në Prishtinë z.Jeffrey Hovenier. Në këtë takim Kryediplomati Amerikan në Kosovë z.Hovenier i garantoi kryetarit të Vatrës se Integriteti territorial i shtetit të Kosovës do të jetë i pa prekshëm. Ai kërkoi që të forcohet bashkëpunimi mes Vatrës dhe Ambasadës në Prishtinë dhe roli i shqiptaro-amerikanëve të intensifikohet sidomos në kohët që jetojmë, ku të gjithë të angazhohen për paqe, siguri dhe stabilitet në Kosovë e rajonin e Ballkanit. Ambasadori i Shteteve të Bashkuara të Amerikës në Prishtinë z.Jeffrey Hovenier theksoi në takim nevojën që spektri politik në Kosovë të jetë i unifikuar dhe të gjithë të punojnë për forcimin e institucioneve dhe të demokracisë në Kosovë. Kryediplomati Amerikan në Kosovë z.Hovenier i garantoi kryetarit të Vatrës se Kosova do të jetë gjithmonë nën ombrellën e Shteteve të Bashkuara dhe se shteti i Kosovës duhet të veprojë kurdoherë sipas Planit Amerikan për një Kosovë të sigurtë, në zhvillim, në paqe dhe prosperitet.

Kryetari i Vatrës z.Elmi Berisha e garantoi Ambasadorin Hovenier se Federata Vatra do të ecë në të njëjtën linjë me Departamentin e Shtetit Amerikan dhe institucionet amerikane dhe se do të mbrojë në çdo kohë interesin e popullit shqiptar, popullit amerikan dhe shteteve tona.

Në takimin e përzemërt në Prishtinë, Kryetari i Vatrës z.Elmi Berisha i dorëzoi Kryediplomatit Amerikan në Kosovë z.Hovenier Mirënjohjen si anëtar nderi i Federatës Vatra.

“Është në privilegjin dhe nderin tim të jem anëtar nderi i Federatës Vatra, kësaj organizate me 110 vite histori” u shpreh Ambasadori i Shteteve të Bashkuara të Amerikës në Prishtinë z.Jeffrey Hovenier.

KRYETARI I VATRËS ELMI BERISHA U PRIT PËRZEMËRSISHT NGA KRYEPARLAMENTARI I KOSOVËS GLAUK KONJUFCA

by

Prishtinë, 14 Nëntor 2022- Kryetari i Federatës Pan-Shqiptare të Amerikës VATRA z.Elmi Berisha u prit në një takim të përzemërt e vëllazëror nga Kryetari i Parlamentit të Republikës së Kosovës z.Glauk Konjufca. Një takim shumë i frytshëm dhe domethënës në këto kohë kur Kosova e kombi ynë kalon kohë të vështira. Ky takim në nivel institucional i hap rrugë bashkëpunimit të vazhdueshëm në të ardhmen mes Vatrës dhe Institucioneve të shtetit të Kosovës në intensifikimin e angazhimeve të përbashkëta për të mirën e shtetit të Kosovës e qytetarëve të saj. Vatra do të jetë në çdo kohë e angazhuar me të gjitha strukturat e saj në mbrojtje të interesit kombëtar, të popullit e kombit shqiptar.