-Presidenti Thaçi: Do të promovoj dialogun mes liderëve politikë në pushtet dhe atyre opozitarë. Dialogu nuk ka alternativë dhe është rruga e vetme për zgjidhjen e problemeve. Axhenda evropiane bashkon politikën kosovare/

-Normalizimi i plotë i raporteve Kosovë-Serbi promovon paqen në rajon/

PRISHTINË, 12 Maj 2016-B.Jashari/ Presidenti i Republikës së Kosovës, Hashim Thaçi, tha sot se gjatë mandatit të tij presidencial do të angazhohet fuqishëm për promovimin e dialogut në Kosovë. “Do të promovoj dialogun mes liderëve politikë në pushtet dhe atyre opozitarë. Dialogu nuk ka alternativë dhe është rruga e vetme për zgjidhjen e problemeve”, theksoi ai duke shtuar se axhenda evropiane bashkon politikën kosovare, dhe se do të punojë të kultivojë edhe dialogun e mëtejmë mes institucioneve të vendit dhe komuniteteve.

Presidenti Thaçi tha se do të vazhdojë të inkurajojë politikën kosovare që të promovojnë dialogun e jashtëm dhe të mos lejojnë që dialogu me Serbinë në Bruksel të shndërrohet në një proces monoton. “Kosova ka marrëdhënie të shkëlqyer me vendet e rajonit, ndërsa edhe raporti me Serbinë është më korrekt. Normalizimi i plotë i raporteve Kosovë-Serbi promovon paqen në rajon”, theksoi ai.

Presidenti po ashtu tha se do të vazhdojnë dialogun me BE-në në mënyrë që qytetarët e Kosovës sa më shpejt të gëzojnë lirinë e lëvizjes.

Për themelimin e Forcave të Armatosura të Kosovës, Presidenti Thaç tha se politika kosovare në vitin 2014 e humbi hapin për themelimin e Forcave të Armatosura të Kosovës  dhe jo me fajin e të tjerëve, por me neglizhencën e faktorit vendor. “Kam besim se Forcat e Armatosura do të themelohen në një të ardhme të afërt”, tha presidenti Thaçi.

Prioritet tjetër i presidentit Thaçi është fuqizimi i sistemit të dretesisë.

“Nuk ka dyshim që kemi një kornizë ligjore shumë moderne, megjithatë kemi identifikuar disa hapësira apo boshllëqe në Kodin Penal të Republikës së Kosovës. Kam biseduar me ministrin për inicimet e ndryshimit të kodit penal, që përfshin aspektin e prokurorive, gjyqësorit dhe shtëpive korrektuese”, tha ai.

Thaçi theksoi se edhe çështja e të pagjeturve, atyre të zhvendosur, gratë e dhunuar gjatë luftës etj, do të jenë në axhendë të tij.

Lëvizja Fol ka mbajtur sot diskutimin e radhës së forumit Fol Hapur, ku i ftuar ishte Presidenti i Republikës së Kosovës, Hashim Thaçi.

Petrit Zogaj, nga Lëvizja Fol tha se sot, në debatin e radhës të Forumit FOL Hapur kemi Presidentin e vendit me të cilin do të diskutojmë për axhendën presidenciale me theks të veçantë politika e jashtme; dialogu i Brukselit si dhe konsolidimi i dialogut politik.