Faleminderit Dr.Elez Biberaj!/
Faleminderit Dr.Elez Biberaj për broshurën që na dërguat rreth 70 Vjetorit të Zërit të Amerikës në shqip që u organizua vjet në mjediset e zyrave të saj në Washington DC.
E lexova dhe i shfletova faqet dhe fotot me vëmendje dhe emocion për shumë arsye…, por edhe pse ishja e ftuar atje si TV Alba Life në New York, çka më kujton thënien e presidentit të Amerikës dhe mikut të shqiptarëve që shpëtoi coptimin e Shqipërisë i cili thotë: Unë kurrë nuk e lexoj një liber në qoftë se ka qenë e mundur të bisedojë një gjysmë ore me autorin qe e shkruajti atë. Dhe ishte kënaqësi që ju intervistova ju dhe shumë gazetarë të tjerë të Zërit të Amerikës që punuan dhe punojnë me devotshmëri dhe kulturë për Atdheun tonë të shumëvuajtur.
…Zëri i Amerikës është një nga mediet më kryesore dhe që ka realizuar një nga misionet më fisnike për të frymëzuar popujt që jetonin nën diktaturë që të çliroheshin nga ajo dhe të fitonin Lirinë e mohuar. Për rrjedhojë kurrë shqiptarët nuk do ta harrojnë emisionin: “Ju flet Zëri i Amerikës” veçanërisht në luftën dhe përpjekjet e përmbysjes së sistemit komunist dhe ardhjen e demokracisë. Zëri i ikonës së gazetarisë Dr.Elez Biberaj u bë një nga zërat më të dashur dhe më besues se shumë politikanë të tjerë që morën frenat e drejtimit pas përmbysjes së diktaturës… ( pjesë e shkëputur nga reportazhi: Zëri i Amerikës 70 vjet në shërbimin shqip K.Zylo)
Kozeta Zylo
Staten Island, New York
Gusht, 2014
Shënimi ynë : Kjo broshurë ka shkuar tek të gjithë pjesmarrësit në festimet e 70 vjetorit të Zërit të Amerikës. Një kopje e tillë ka ardhë edhe në Vatër.Faleminderit!
SHAQIR SALIHU, njëri nga ata që na mbajti gjallë me zërin e shpresës
Nga Beqir Sina /
WASHINGTON D.C : Ka qenë 70 vjetori i Zërit të Amerikës, i cili përkoi për koicidencë edhe me 70 vjetorin e ditëlindjes së njërit prej gazetarëve më të “vjetër” të Shërbimit Shqip, të cilin vetëm pensioni mundi t’a largojë nga Zëri i Amerikës, se “gjë tjetër” ska mundur t’a largojë atë nga Zëri i Amerikës, shqip. Ai doli në pension pas një kariere të larmishme dhe 30 vjeçare. Ai është Shaqir Salihu, i cili filloi punën në Zërin e Amerikës në fillim të viteve 80, pasi kishte ardhur në Amerikë si refugjat politik nga Kosova.Kur Shaqiri erdhi të punojë për Zërin e Amerikës në Uashington, Shqipëria ishte e izoluar, ndërsa në Kosovë vazhdonte shtypja dhe diskriminimi ndaj popullatës shqiptare, thuhej në një koment të kësaj radio kushtuar gazetarit të njohur të Zërit të Amerikës Shaqir Saliu.
Por , ai ende nuk ka “ikur” nga Zëri i Amerikës sepse trashgimtari i tij – Ilir Salihu, punon prej disa vitesh në departamentin e teknikës të Zërit të Amerikës dhe shpesh i takon të punojë edhe për programin Ditari, ku Shaqiri i ri dhe i vogël është producent, është pjesë e Zërit të Amerikës.
Zëri i tij :”Ju flet Zëri i Amerikës nga Uashingtoni! në programin e mbrëmjes i cili i binte në orën 6 të darkës me orën e Shqipërisë dhe në orën 21 sipas orës në Shqipëri, ishte ai zë që vinte nga larg ashtu si lind një mëngjes i bukur, i një dite të bukur.
Nuk mund ta numërojë sesa herë e dëgjoja zërin e tij “unë Shaqir Salihu dhe kolegu im ……” teksa na përcillnin emisionin e radhës që transmetonte në Radioprogramin e Zërit të Amerikës seksioni i gjuhës shqip, në barangat e errta mes skamjes dhe frikës se po na dëgjonin dhe muret, teksa isha i “mbuluar me jorgan ose ndonjë batanie të vjetër. Dy emisonet e Zërit të Amerikës, për atë kohë ishin e vetmja shpresë dhe nga i mbanim syt unë dhe ata mijëra bashkëvuajtësit e mi në kampet e interrnimit.
Në mëngjes kur bëhesh apeli (leximi i emrave të të interrnuarve), nuk kishte ditë që të mos përhapej “vesh më veshë” lajmi se regjimi i Enver Hoxhës së bashku me regjimet e tjera komuniste po binin, era e lirisë po fryente në Kosovë qysh me demostratat e 1981. Nuk kishte ditë që të interrnuarit të mos merrnin ndonjë lajmë, që u hapte zemrat e lirisë , sepse Zëri i Amerikës për shtresën tonë, ishte e vetmija liri dhe ëndërr që kishim ne ndërkohë që lajmet e saj ishin oksigjeni dhe ushqimi i përditëshëm jo vetëm i imi por dhe i atyre mijërave bashkëvuajtësve të mi – fatkeq.
Kur flasim për Zërin e Amerikës ku Shaqir Salihu ka shërbyer me profesionalizëm, vullnet dhe ndershmëri do të kujtojë se isha vetëm 6 vjeç kur nga Zëri i Amerikës , xhaxhai i ndjer mori lajmin se të premten më 22 nëntor 1963 u vra Presidenti i SHBA John Kennedy dhe ai erdhi e na tha se “koministët” Rusë e vranë Presidentin e Amerikës. Dhe isha vetëm 15 vjeç kur plasi skandali i “Watergate” dhe Presidenti Richard Nixon dha dorëheqjen dhe ne të presekutuarve sikur na “vdiqen” shpresat mbas asaj vizite historike të të parit Sekretar Shteti në Kinën komuniste të Henry Kissinger.
Këtij shqiptari që na mbajti gjallë me zërin e tij të shpresës, lirisë e demokracisë për aq vite sa ai shërbeu “Shtëpisë së Lirisë dhe Demokracisë” nga Uashingtoni zotit Shaqir Salihu( ose Shaqes i i thërrisin shpesh herë kolegët e ti) i urojë nga zemra të ketë vite më bukura, më të lumtura dhe më të begatë, me gjithë familje, ndërkohë që trashgëmtarit të tij, dhe kolegëve të tij në Zërin e Amerikës, u urojë që ta ngrenë më lartë Zërin e këtij programi dhe emrin e kësaj “shtëpie” informacionesh të besueshme dhe që është bërë e vetmja shpresë e lirisë dhe demokracisë në botë, për popujt anembanë botës dhe që janë ende në thundrat e regjimeve komuniste.