Interviste per Diellin – Dielli

Flet për “Diellin” Rudina Hajdari, e bija e Heroit,që “braktisi’ Amerikën për Shqipërinë

June 7, 2017 by dgreca

RUDINA HAJDARI: BABAI IM GODITI MURIN DIKTATORIAL TË KOMUNIZMIT, UNË DHE BREZI IM DO TË NXJERRIM SHQIPËRINË NGA TRANZICIONI/

Intervistë me zonjën Rudina Hajdari, e bija e heroit të Demokracisë Azem Hajdari, Kandidate për deputete e Parisë Demokratike në Tiranë dhënë Kryeredaktorit të Gazetës”Dielli” në SHBA, Dalip Greca./

Rudina Hajdari, “braktisi’ Amerikën për ti shërbyer Shqipërisë/

Çfarë do t’i japë Kuvendit, Rudina Hajdari, e bija e themeluesit të PD-së, parlamentarit më aktiv, heroit të demokracisë, Azem Hajdari? Është kjo një nga pyetjet që i drejtuam Rudina Hajdarit, kandidate për deputete e Partisë Demokratike të Shqipërisë në zgjedhjet e 25 Qershorit. Përgjigja e saj është e sigurtë:”Do të luftojë fort duke nxjerrë në pah të gjithë cilësitë më të mira të babait, por në mënyrën time”.

Rudina synon që të jetë një politikane e ndershme dhe me këtë nënkupton besimin se: të gjithë jemi të lirë, lindim të barabartë dhe se të gjithë duhet të jemi në gjendje të përparojmë bazuar në aftësitë dhe pasionet tona, dhe se do të flasë hapur dhe do mbrojë të vërtetën, edhe nëse ajo bie ndesh me më të fuqishmit e shoqërisë. Moto e saj është: Interesat e Shqipërisë para çdo interesi tjetër!

Rudina i ka të gjitha kualifikimet për të qenë një përfaqësuese e denjë e qytetarëve shqiptarë në Parlament: Ka kryer studimet universitare Bachelor në Shkencat Politike në SHBA, ka vijuar studimet e nivelit Master Shkencor në Gjeopolitikë, Territor dhe Siguri në Londër për të përfunduar me studimet e nivelit Master Shkencor në Të Drejtat e Njeriut po në SHBA. Vec kësaj ajo ka trashëgiminë dhe vizionin për të ardhmen e Shqipërisë Evropiane. Le ta ndjekim intervistën:

Gazeta Dielli:-Si ndihet Rudina në garën elektorale si kandidate për deputete e PD-së?

–Rudina Hajdari:-Ndjesia e parë nuk është thjesht kënaqësi personale. Ajo është përkatësia ime reale, realizimi i një rruge të gjatë, jo vetëm e imja, por i një rrugëtimi krenar pasi i përket forcës politike së cilës i përkas çdo orë e sekondë të jetës sime.

Nuk ka rëndësi fakti i renditjes time në listën e Tiranës dhe nuk e bën këtë betejë më të lehtë. Ajo që e bën garën e fortë, konkurrimin të vërtetë dhe real, ajo që i jep përmasën e natyrshme kësaj fushate, më të veçantës nga të gjitha të tjerat, është fakti i ndërthurjes së natyrshme të trashëgimisë, forcës, vërtetësisë së Partisë Demokratike dhe vizionit të së ardhmes, vizionit të Republikës së Re. Jam e sigurt që me vullnetin e duhur do hyjmë në një etapë të re për Shqipërinë që i ofron shqiptarëve një politikë frytdhënëse dhe një demokraci të drejtpërdrejtë dhe gjithëpërfshirëse.

–Dielli:– A ishte një surprizë për ju përfshirja në listën e kryetarit të Partisë Demokratike,z. Lulzim Basha?

–Rudina Hajdari:-Personalisht, i jam mirënjohëse Kryetarit te Partisë Demokratike z. Lulzim Basha që vlerësoi prezencën time në ekipin e tij. Për mua është një privilegj dhe një përgjegjësi e madhe të garojë si nën siglën e PD-së, të një partie që përfaqëson frymën e parë të demokracisë dhe vlerat euro-atlantike, si një prirje e natyrshme e shqiptarëve.

–Dielli:– Çfarë do t’i japë Kuvendit, Rudina, e bija e themeluesit të PD-së, parlamentarit më aktiv, heroit të demokracisë, Azem Hajdari?

–Rudina Hajdari:-Dua të nxjerr në pah të gjithë cilësitë më të mira të babait tim, por në mënyrën time. Këtu, më lejoni të veçoj disa. Dua të jem një politikane e ndershme dhe me këtë nënkuptoj besimin se të gjithë jemi të lirë, lindim të barabartë dhe se të gjithë duhet të jemi në gjendje të përparojmë bazuar në aftësitë dhe pasionet tona. Unë dua të flas hapur dhe do mbroj të vërtetën, edhe nëse kjo bien ndesh me më të fuqishmit në shoqëri. Gjithashtu, dua të vendos interesat e Shqipërisë para çdo interesi tjetër.

–Dielli:- Besoni që brezi juaj me të vërtetë do të integrojë Shqipërinë në BE, Çfarë nuk është arritur në këtë tranzicion të zgjatur?

–Rudina Hajdari:-Në këto 26 vite tranzicion Shqipëria ka pasur përparime të mëdha. Sot, Shqipëria ka një sistem politik të gjallë, është anëtare e NATO-s dhe është në rrugën e integrimit në Bashkimin Europian. Shqiptarët udhëtojnë lirisht në Europë dhe kemi në krah aleatë të fortë perëndimorë si Shtetet e Bashkuara të Amerikës dhe vende të tjera të Europës. Por s’duhet harruar që Shqipëria ka përjetuar një tirani komuniste të pashembullt në Europë dhe se tranzicioni është me i ndërlikuar sesa mund ta kemi perceptuar. Deri tani, ka qenë qeverisja e djathtë ajo që ka dhënë kontributin më të madh në plotësimin e kushteve të Bashkimit Europian, në kuadër të çeljes së negociatave të anëtarësimit. Kemi akoma shumë punë për të bërë përsa i përket zbatimit të ligjit të dekriminalizimit në Parlament dhe reformës në drejtësi, por jam e lumtur që këto hapa po ndërmerren në mënyrën e duhur, duke përfshirë kontributin e padiskutueshëm të Opozitës. Krizat politike dhe institucionet e dobëta e kanë lodhur procesin e anëtarësimit. Gjithsesi mendoj se përfshirja e të rinjve në politikë është një shenjë pozitive për sa i përket përfundimit të tranzicionit në vend dhe integrimit të Shqipërisë në strukturat Euro-Atlantike.

–Dielli:– Sipas mendimit tuaj, duke qenë se keni jetuar për një kohë të gjatë në SHBA, çfarë duhet të bëhet ndryshe në Shqipëri?

–Rudina Hajdari:-Eksperienca ime në Amerikë ka qenë e vlefshme për të fituar një kulturë perëndimore, por kjo s’do të thotë që vendi im nuk ka qenë pjesë e kultivimit të karakterit tim. Mendoj se demokracia e drejtpërdrejtë është një nga gjërat që akoma i mungon Shqipërisë si dhe gjithëpërfshirja e te gjithë faktorëve shoqërorë në vendimmarrjet publike. Gjithashtu mendoj se sipërmarrja private duhet të operojë në mënyrë më të pavarur dhe bizneset duhet të jenë më pak të ndikuara nga rrethanat politike në vend.

–Dielli:- Ju keni përfunduar studimet universitare Bachelor në Shkencat Politike në SHBA. Më tej keni vijuar studimet e nivelit Master Shkencor në Gjeopolitikë, Territor dhe Siguri në Londër për të përfunduar me studimet e nivelit Master Shkencor në Të Drejtat e Njeriut po në SHBA? Si e shikoni politikën shqiptare, nga këndvështrimi juaj me këtë background të pasur arsimor?

–Rudina Hajdari:-Partneriteti strategjik i Shqipërisë me aleatët euroatlantikë, veçanërisht me SHBA-në, është shpresa dhe rruga e vetme e së ardhmes, e cila jo vetëm shëron çdo plagë të së shkuarës, por e bën të qartë dhe të vërtetë vizionin e saj për këtë ardhmëri. Shqipëria dhe faktori shqiptar në Ballkan, pavarësisht rrethanave, sfidave dhe përpjekjeve të të gjithë atyre që nuk e duan të ardhmen e këtij kombi, kanë një aleat të natyrshëm të ngulitur thellë në ndërgjegjen e këtij kombi, vokacionin perëndimor. Të gjitha përpjekjet e politikës shqiptare duhet të jenë në koherencë të plotë me këtë vokacion. Çdo lloj deviacioni është në dëm të kombit shqiptar dhe të ardhmes së tij.

–Dielli:– A mendoni se Shqipëria mund të dalë nga gjendja e rënduar e kultivimit, trafikut të drogës dhe korrupsionit të nivelit të lartë?

–Rudina Hajdari:-Absolutisht po. E gjithë përpjekja e Partisë Demokratike, jo vetëm në 90 ditët e çadrës, por dhe në më tej ka qenë ndërgjegjësimi i këtij fenomeni të shëmtuar dhe ndalimi sa më parë i trafikut të drogës dhe kultivimit të saj në vend. Lufta e të gjithë institucioneve shqiptare të papërfshira në këtë trafik, përpjekjet e mijëra punonjësve të Policisë, të paimplikuar, të njerëzve të ndershëm, të shërbimeve të inteligjencës, në bashkëpunim me aleatët perëndimorë, sigurisht, që e bëjnë të mundur.

Është e dhimbshme që ne, një shtet me bukuritë e mrekullitë e natyrës, vendi me moshën më të re në Europë, të etiketohemi si Kolombi e Europës dhe qindra mijëra të rinj të braktisin këtë vend për të kërkuar të ardhmen diku tjetër.

–Dielli:-A e shihni përfshirjen tuaj në politikë si vazhdim të punës së atit tuaj, ose më shumë se kaq?

–Rudina Hajdari:-Im atë pati guximin, karakterin dhe inteligjencën të ngrihet kundër diktaturës. Përplasjet e tij si luftëtar i lirisë, pluralizmit dhe demokracisë i dhanë atij një rol historik. Në qoftë se im atë goditi murin diktatorial të komunizmit dhe pati rolin e tij në ardhjen e lirisë, unë kam synimin dhe vizionin të kontribuoj në mbrojtjen dhe avancimin e mëtejshëm të këtyre të drejtave.

–Dielli:– Ndërkohë, ju jeni larguar nga SHBA! A mendoni se do të pendoheni për këtë vendim që keni marrë?

–Rudina Hajdari:-S’do pendohem kurrë për këtë vendim që kam marrë. Amerika është aty dhe nuk pret për mua, kurse Shqipëria është vendi im dhe pret të rinj e të reja që gjallërojnë jetën politike, ekonomike dhe kulturore me ide inovative, bazuar në eksperiencën më të mirë Perëndimore. Për mua, largimi nga Shqipëria krahasohet me atë ndjesinë kur nëna të jep lirinë të ikësh në momentin që ti kërkon pak pavarësi, për t’u kthyer sërish tek ajo në momentin që ka nevojë për ty, për mbrojtjen tënde.

–Dielli:-Çfarë mesazhi do t’u jepnit mijëra të rinjve shqiptarë që janë arsimuar në SHBA apo Europë?

–Rudina Hajdari:-Demokracitë e zhvilluara nuk janë të përsosura. Fakti që Shqipëria është akoma duke ndryshuar, u ofron më shumë hapësirë të gjithëve për t’u bërë pjesë e këtij ndryshimi. Besoj se kjo do të ishte më e çmuar se sa një gjurmë e vogël në një vend të zhvilluar. Këtu të rinjtë dhe të rejat kanë mundësinë të japin kontributin e tyre dhe të kenë një ndikim të drejtpërdrejtë në zhvillimin e Shqipërisë. Ne nuk duhet të shohim Shqipërinë si inferiore ndaj shteteve që janë më të zhvilluara, sepse kemi shumë arsye për t’u krenuar me vendin tonë. Sa më shpejt të rinjtë të na bashkohen aq më shpejt do t’i arrijmë objektivat për një Shqipëri me një demokraci dhe ekonomi të zhvilluar, sikurse e meriton vendi ynë i mrekullueshëm.

–Dielli:-Rudina, faleminderit për Intervistën dhe urime në zgjedhje!

Rudina: Faleminderit Diellit!

LUTFI HAZIRI PER GAZETEN”DIELLI” NE SHBA: VATRA, NJE NDER FAQET E NDRITURA TE HISTORISE SONE KOMBETARE

July 28, 2015 by dgreca

*Është fakt i pamohueshëm që diaspora shqiptare ka luajtur një rol vendimtar në çështjen kombëtare shqiptare në Ballkan. Vatra është një simbol i veçantë i kësaj pune vetmohuese… /
* Cështja e Gjykatës Speciale ka zënë vend të rëndësishëm në takimin ne Departamentin e Shtetit,por ishte shumë miqësore. Kosova është me fat të madh që ka mbështetje kaq të madhe nga SHBA-të./

KRONIKA
Të Enjten me 23 Korrik, në Shtëpinë e Vatrës ishte për vizitë Kryetari i Komunës së Gjilanit në Republikën e Kosovës, njëkohësisht zv/Kryetar i LDK, z. Lutfi Haziri. Ai u prit nga zv/kryetari i Federatës Pan-Shqiptare të Amerikës, z. Asllan Bushati, anëtari i Këshillit të Vatrës z. Zef Bala dhe editori i Diellit Dalip Greca.
Z. Lutfi Haziri shoqerohej në këtë vizitë zyrtare nga profesori Faton Bislimi, ligjërues në Universitetin e Albertës në Kanada dhe një nga lobistët e rinjë shqiptaro-ameriakan, si dhe Xhevat Latifi, gazetar nga Gjilani dhe drejtor i Qendrës së Kosovës për Politika Publike.”
Zv/Kryetari i Vatrës z. Bushati pasi i uroi mirëseardhjen mysafirit, i përshkroi zhvillimet e fundit Vatër, foli për fokusimin e saj në çështjen Kombëtare, informoi rreth Kuvendit të fundit të Vatrës, që i zhvilloi punimet në Jacksonville-Florida, informoi rreth shtrirjes së anëtarësisë së Vatrës nëpër shtete të ndryshme të Amerikës dhe në Kanada.Ai foli dhe për qëndrimet e Vatrës ndaj klasës politike të korruptuar në Shqipëri, Kosovë e Maqedoni etj.
Mysafiri Lutfi Haziri, i cili ishte i ftuar në këtë vizitë zyrtare nga “Sister Cities International”, tha se ndjehej i gëzuar dhe i emocionuar që ndodhej në Vatrën historike dhe nuk mund të mos e përfshinte në axhendën e tij Vatrën e Shqiptarëve të Amerikës.Ai tregoi më pas për axhendën e vizitës së tij në SHBA, takimet në në Minneapolis, Washington, përfshi atë në Departamentin e Shtetit, dhe takimet e tjera.
Anëtari i Këshillit të Vatrës z. Zef Balaj, pasi i uroi mirëseardhjen mysafirit, u përqëndrua tek çështja e debatuar e Gjykatës speciale në Kosovë, trysnia e faktorit ndërkombëtar dhe qëndrimi shqiptar.
Editori i Diellit bëri një përshkrim historik të 103 viteve të Vatrës dhe 106 viteve jetë të Gazetës Dielli.
Në fund të vizitës së tij në VATËR, z. Haziri dha një intervistë për Gazetën “Dielli”.

INTERVISTA
Dielli- Z. Haziri, në axhendën tuaj të vizitës në SHBA, ju kishit parashikuar dhe një takim në Vatër? Cilët ishin motivet e këtij takimi?
Z. Lutfi Haziri: Është fakt i pamohueshëm që diaspora shqiptare ka luajtur një rol vendimtar në çështjen kombëtare shqiptare në Ballkan. Vatra është një simbol i veçantë i kësaj pune vetmohuese. Diaspora jonë në përgjithësi, e kjo në Amerikë në veçanti, kanë shërbyer si shtylla të pamposhtura të ndërtimit dhe zhvillimit të shoqërisë shqiptare në trojet e veta etnike në Ballkan. Prandaj, unë ndihem krenarë që po takohem sot me përfaqësuesit e Vatrës, dhe po njihem për së afërmi me një histori kaq të suksesshme të angazhimit shqiptar në SHBA për kauzën tonë kombëtare. Vatra zë vend ndër faqet më të ndritura të historisë sonë kombëtare, besoj unë.
Dielli- Si u ndjetë në Shtëpinë e Vatrës?
Z. Haziri: Si në shtëpinë time, të kombit tim. Është një muze që flet dhe vepron. Pra, jo vetëm një muze që shpërfaqë të kaluarën, por një shtëpi historike që ka vizion dhe përkushtim edhe për të ardhmen. Jam i nderuar për pritjen tuaj bujare, dhe besoj fuqishëm që me angazhim të përbashkët nga të dyja anët e Atlantikut ne do të mund ta çojmë deri në fund misionin e themeltarëve të Vatrës, patriotëve të vërtetë të kombit tonë.
Dielli – Ju ishit të ftuar në SHBA me ftesë zyrtare nga “Sister Cities International” në Minneapolis, ku ishit folësi kryesor. A mund ta informoni lexuesin e Diellit rreth Samitit të atjeshëm dhe rreth kumtesës tuaj? Si u prit ajo? Nga vinin pjesmarrësit?
Z. Haziri: – Po, unë isha ftuar si folësi kryesor për Samitin Botëror të Lidershipit të Rinj, që ishte një nga sesionet kryesore plenare të konferencës në fjalë, nën temën e Ndërlidhjes së Gjeneratave për Paqe. Fjalimi im u fokusua në sfidat dhe barrierat që shpeshëherë nga dalin përpara dhe mënyrën se si duhet t’I kalojmë ato. Si popull, ne kemi përjetuar vuajtje, tmerr, luftëra, dhe përkundër të gjithave, kemi dalur kokëlartë, faqebardhe, dhe me vizion drejt së ardhmës. Historia e kombit tonë është histori e suksesit jo vetëm të mbijetesës por edhe të arritjes. Sot shqiptarët po thyejnë rekorde botërore në shumë fusha. Sot shqiptarët po zhvillohen si komb edhe si shtete. Mirëpo, përkundër suksesit, vështirësitë egzistojnë. Prandaj, ne duhet të jemi të kujdesshëm që të mos dorëzohemi para vështirësive dhe sfidave që na dalin përpara. Ato mund t’i kalojmë me vullnet të mirë, punë të përkushtuar, dhe përpjekje të parreshtur. Nuk ka sfide tejet të madhe, nuk ka vështirësie tejet të rëndë. Është çështje perspektive kjo. Ne duhet të kemi perspektive vizionare drejtë të ardhmes, gjithëmonë duke mos harruar dhe reflektuar në mësimet e së kaluarës. Pra, ky ishte mesazhi i fajlimit tim.
Pjesëmarrësit u ndanë të kënaqur dhe pas përmbylljes së fjalimit, kemi patur thuajse një gjysëm ore pyetje e përgjigje. Pjesmërrësit vinin nga shumë shtete të SHBA-ve dhe nga e mbare bota, mbi katërqind sosh. Disa ishin studentë, të rinjë, e disa kryetar e kryebashkiakë më përvojë. Pra kishte një audience shumë të mirë dhe me sfond të llojllojshëm.
Dielli- A patët takime të veçanta gjatë qëndrimit atje ?
Z. Haziri: – Po, patëm një takim shumë miqësor me drejtoreshën e konferencës, znj. Aveen Karim, si dhe me zëvendës presidentin e Sister Cities International, z. Adam Kaplan. Biseduam për vazhdimin e bashkëpunimit dhe involvimin e Gjilanit si anëtar institucional të SCI-së në të ardhmen e afërt. Besoj se në bashkëpunim me SCI, shumë shpejtë ne do të realizojmë një samit rajonal komunash në Gjilan.
Mandej, takuam dhe biseduam për mundësi bashkëpunimi edhe me disa përfaqësues të tjerë të pranishëm në Konference nga shtete të ndryshme të SHBA-ve, si New Mexico, California, si dhe me Konsullin e Përgjithshëm të Kanadasë në Minneapolis. Të gjitha këto takime kishin për qëllim njohjen me Gjilanin e Kosovën të këtyre miqëve tanë.
Dielli : – Në axhendën tuaj përfshiheshin edhe takime të tjera, kë do të veçonit nga ato takime?
Z. Haziri: -Përveç pjesëmarrjes në konferencën e SCI-së në Minneapolis, unë kam patur një darkë pune me disa investitorë potencialë amerikanë në Wisconsin të cilët kanë shprehur interesimin e tyre të sinqertë për të investuar në një projekt prodhues në Gjilan. Besoj se këta miq shumë shpejtë do të vijnë në Gjilan për të finalizuar një marrëveshje për këtë investim që do të krijonte vende të reja pune dhe do shënonte investimin e parë direkt amerikan në komunën tonë. Pastaj, në Washington DC kam patur takime të ndryshme ndër të cilat do ta veçoja atë me Drejtorin Yazdgeri në Departamentin e Shtetit, drejtuesit e International City Management Association, Ambasadorin Walker, etj. Këtu në New York, takim i veçantë është ky me Vatrën, si dhe disa tjera që kam zhvilluar më zyrtarë të OKB-së, përfaqësues të biznesit nga komuniteti shqiptaro-amerikan këtu, etj.
Dielli- Ndërkohë që ju patët takime edhe në Departamentin e Shtetit.A mund të sillni detaje? Çfarë vendi zuri në këtë takim çështja aq e debatuar e Gjykatës speciale.
Z. Haziri: -Është e kuptueshme që çështja e Gjykatës Speciale ka zënë vend të rëndësishëm në këtë takim që përndryshe ishte shumë miqësor. Kosova është me fat të madh që ka mbështetje kaq të madhe nga SHBA-të. Unë besoj se Kosova nuk do ta rrezikojë këtë miqësi në asnjë mënyrë, dhe se do ta votojë krijimin e Gjykatës Speciale, ashtu që ajo të mos mbetet në duartë e Këshillit të Sigurimit të OKB-së ku mandej mund të ndikohet fuqishëm nga Rusia. Drejtori Yazdgeri ka shprehur falëmnderimin e tij për përkushtimin serioz të LDK-së dhe Qeverisë Mustafa në kalimin sa më të shpejtë të Gjykatës Speciale përmes Kuvendit të Kosovës. Përveç kësaj, ai ka shprehur edhe gatishmërinë e SHBA-ve për rritje të përkrahjes ndaj Kosovës që edhe këtë sfidë të rradhës ta kaloj faqebardhe. Ju e dini së Kosova ka kaluar me sukses dy sfida pranë Hagës dhe nuk kam dyshim se edhe këtë sfidë, pra Gjykatës Speciale, do ta kalojë më sukses dhe kështu ta përmbyllë njëherë e mirë këtë çështje.
Dielli:- Partia juaj, ku ju jeni nënkryetar, po kritikohet shumë për korrupsion dhe për mosndaljen e hemoragjisë së mërgimit, cila është strategjia për të dalë nga ajo situatë?
Z. Haziri: – Jo, korrupsioni nuk është partiak. Nuk mund të kritikohet partia për këtë. Janë individët që korruptohen. Ne si LDK jemi më së të vendosur që qeverisja të jetë transparente dhe në shërbim të qytetarëve dhe prioriteteve të vendit. Ju rikujtoj se LDK ka marrë timonin e qeverisjes tani e vetëm disa muaj dhe nuk ka as edhe ndonjë indikacion më të voglin për ndonjë formë korruptive të punës. Përkundrazi, Qeveria Mustafa ka filluar të çrrenjosë korrupsionin aty ku e ka hasur dhe kjo dukuri duhet të eliminohet. Ne jemi të përkushtuar për këtë dhe besoj se këtë përkushtim më së miri e vërtetojnë çmimet, përkrahja, dhe bashkëpunimi që na është dhënë e ofruar nga institucionet ndërkomëbtare, veçanërisht nga USAID, si në nivel lokal, në Gjilan, përshembull, sikur në atë qëndror.
Dielli-Së fundi, diçka më shumë për veten tuaj për lexuesit tanë, Cili është Lutfi Haziri?
– Ku keni lindur, ku u shkolluat? Si u përfshitë politikë? ….
Z. Haziri: -Unë jam nga Gjilani. Shkollimin fillor dhe të mesëm e kam përfunduar në Gjilan, kurse studime universitare pranë Universitetit të Prishtinës. Jam involvuar në politikë qysh si i ri, si student fillimisht, dhe jam mishëruar më LDK-në në kohën e Presidentit historik Ibrahim Rugova, pra menjëherë pas themelimit të LDK-së. Gjatë okupimit serb, kam shërbyer edhe në strukturat e Ministrisë së Mbrojtjes së Kosovës në atë kohë për çka dhe jam burgosur nga regjimi serb në vitin 1998. Kurse, pas luftës, në moshën 29 vjeçare mora barren e të qenurit kryetar i Komunës së Gjilanit pas zgjedhjeve të para komunale të fituara nga LDK-ja në vitin 2000, dhe që nga ajo kohë i kam shërbyer qytetarëve të Gjilanit dhe Kosovës në pozita të ndryshme edhe në Qeverinë e Kosovës edhe si Deputet. Përndryshe, jam i martuar dhe baba i katër fëmijëve.
Dielli: Ishte kënaqësi që biseduam !
Z. Haziri:Kënaqësia ishte imja! Faleminderit !
Bisedoi:Dalip Greca

ADRIATIK SPAHIU:JA SI I NGRITËM DEGËT E VATRËS NË FLORIDA

January 9, 2015 by dgreca

Bisedë me kryetarin e degës së Vatrës në Jacksonville, z. Adriatik Spahiu/
Dielli- Keni përfunduar ngritjen e degës më të re të Vatrës në Tampa, ku kontributi juaj dhe i vatraneve te tjere ne Jacksonville ishte i ndjeshem. A mund t’i përshkruani rrethanat se si lindi ideja për ta pasur një degë të Vatrës në Tampa dhe cilët ishin inisiatorët.
Z. Adriatik Spahiu-Ju falenderoj për mundësinë që po më krijoni për këtë intervistë në këtë fundviti. Festimi i 101 vjetorit panvarsisë dhe 1 vjetorit të krijimit të degës vatra në Jacksonville celi mundësitë e reja organizuse për krijimin e degëve në Orlando dhe në Tampa. Mënyra e organizimit e mikpritjes dhe e bashkpunimit me miqtë dhe të ftuarit, ku për herë të parë në këtë aktivitet madhështor mernin pjesë dhe Ambasadori i Shqipërisë në SH.B.A z Gilbert Galanxhi kryetari i Vatrës Dr .Gjon Bucaj dhe kryetari i degës së Fort Lauderdale z. Kolec Ndoja. Inisiatorët e krijimit të degës në Tampa ishin zotërinjët Isuf Spahiaj ,Sali Mustali, Tasim Ruka Murat Halilaj, Zamira Rubejka, Iva Nallbani etj
Dielli- Cila është përbërja e degës. Kush është anëtarësuar, moshat, arsimimi, krahinat nga vijnë? Kush u zgjodh në struktuarat drejtuese?
A. Spahiu- Dega e shoqatës Vatra në Tampa u krijua me datën 10 dhjetor me 38 antarë të moshave të ndryshme të krahinave të ndryshme me shkallë arsimi të ndryshme. Në strukturat drejtuese u zgjodhën z.Tasim Ruko- Kryetar, z. Isuf Spahiaj- nënkryetar, zj. Zamira Rubjeka- sekretare, zj Iva Nallbani- financjere si dhe disa antarë të bordit drejtues.
Dielli- Ju jeni inisiator edhe për ngritjen e degëve të Vatrës në Orlando, madje edhe në Hartford në shtetin CT? Cili është motivi, që ju bën kaq energjik në përhapjen e frymës kombëtare të Vatrës dhe ngritjen e degeve te saj?
A. Spahiu-Vetë emri i Vatrës dhe dëshira për bashkim kombëtar si një pasardhës i një familje fisnike me tradita patriotike në zonën e Dëshnicës, janë motivet që më nxisin në veprimtarinë time.
Dielli- A mund ta përshkruani gjendjen e degës tuaj në Jacksonville? Cilat janë hapat e rritjes së saj?Cilët janë aktivitetet më kulmore? Sa e pranishme është dega e Vatrës së Jacksonville në jetën e shqiptarëve të atjeshëm, në gëzimet dhe në hidhërimet e tyre? Sa e pranishme eshte Vatra ne institucionet amerikane atje, po bashkepunimi me komunitetin?
A.Spahiu -Sot dega e Vatrës në Jacksonville ka 100 antarë dhe vazhdojmë të kemi rritje me antarësime të reja. Suksesi është puna e madhe që ne bëjmë si ekip,bordi drejtus po ashtu dhe antarët në tërësi, të cilët janë shumë aktivë. Aktivitetet e degës tonë kanë qenë të shumta në të gjitha drejtimet. Kemi festuar ditën e pavarsisë dhe përvjetorin e krijimit të degës, festën e pavarsisë së Kosovës, festën e nënave, përvjetorin e lindjes të poetit kombëtar, rilindasit të madh, Naim Frashërit, festojmë festat e Vitit të ri. Kemi ndihmuar në raste të ndryshme si familjet vatrane dhe komunitetin me ndihma financiare dhe kemi marrë pjesë në gëzime dhe hidhërime të shqiptarëve . Kemi bashkpunuar dhe kemi bërë takime si me degën në Fort Lauderdale me kryetar z. Kolec Ndoja si dhe me degën e Orlandos. Bashkpunimi i degës tonë me kryesinë e Vatrës dhe vleresimi që na është bërë nga kryetari i Vatrës,dr. Gjon Bucaj, duke marë pjesë disa herë në aktivitetet tona, ka qenë sukses i degës së Jecksonville. Dega jonë ka marrë pjesë aktive si në Kuvendet e Vatrës me delegatët e saj, po dhe në takimet e tjera, që ka organizuar Vatra si në takimin me presidentin Bujar Nishani, në takimin me konsullin e Kosovës, si dhe takimet ne shtëpinë e Vatrës në Nju Jork etj. Jemi në kontakte me institucionet dhe po punojmë për të bashkpunuar .
Dielli- Vatra ka dhe degë në shtete të tjerë, por jo të gjitha kanë këtë ritëm rritjeje të anëtarësimeve, që ka në Florida. Ku është shkaku i suksesit tuaj?
A. Spahiu-Bashkpunimi, përkushtimi, këmbëngulja si dhe puna me njerëzit faktorë si domosdoshmëri suksesi. Ekipi ynë fatmirsisht funksion kolektivisht.
Dielli: Po ashtu ju keni hapur për të parën herë shkollën shqipe në Jacksonville. Si ka ecur ajo dhe a ka të ardhme?
A. Spahiu-Shkolla që ne kemi hapur vazhdon me kontributin e mësuesve që punojnë falas vlerësoj dhe falenderoj punën dhe kontributin që japin dhe në mënyrë të vecantë dua të falenderoj të gjithë ata që ndihmuan në hapjen e kësaj shkolle dhe ndihmën me tekstet që na dhuroi konsullata e Kosovës.
Dielli- A mund t’ua kujtosh lexuesve të Diellit, takimin e parë me vatranët, zotimi për të ngritur një degë vatre në Jacksonville dhe c’ndodhi pas kësaj?
A. Spahiu- Z. Editor ju jeni personi që unë kam kontaktuar nëpërmjet telefonit dhe ju kam shprehur dëshirën si një familje e lidhur me Vatrën, pasi gjyshi im Asllan Maksut Tolari, ka qenë një nga krijusit dhe i zgjedhur në bordin drejtues të degës nr 19 në vitin 1912 në New Hampshire. Mora pjesë familjarisht në aktivitetin e Vatrës me rastin e 100 vjetorit.Vlerësoj shumë respektin dhe mundësinë që më dhatë për të bërë një përshëndetje dhe ju premtova se do punoja për të hapur dhe një degë të Vatrës në Jacksonville Florida. Në bashkpunim me gjithë antarët e tjerë që morën pjesë u bë realitet me dt 18 Nëndor 2012. Do ngelet një kujtim i bukur dhe i pa haruar për familjen time takimi me të gjithë pjesmarsit si dhe personalitetet dhe figurat e nderuara që ishin në këtë takim
Dielli- Cili është mesazhi i kryetarit të vatranëve në Florida në prag të festës së vitit të ri?
A. Spahiu-Vatra sic ka emrin, shenjtorët dhe patriotët, që e krijuan ka dhe pasardhësit që kanë ruajtur vlerat dhe historikun. Vlerësimi i saj është histori suksesi për bashkim kombëtar. Zoti i bekoftë shqiptarët kudo që ndodhen!
Zoti e bekoftë Vatrën dhe vatranët! Mbarësi për të gjithë!Gëzuar Krishtlindjet! Gëzuar Vitin e Ri 2015!( Intervista u botua ne Diellin e printuar te fundvitit, 30 Dhjetor 2014)