Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kërçovën e shpëtuan mërgimtarët

by

SHKRUAN: Emin AZEMI/

Nëse miti mbi Anteun konfiguronte një arketip të lidhur me tokën dhe vendin e të parëve, miti i kërçovarëve për t’urikthyer në vendlindje me kontributdhënie në favor të një dominimi të caktuar politik e etnik, duhet marrë si diçka normale për faktin se pikërisht kjo popullsi e dyndur anekënd botës kishte nevojë të rishfaqte në skenë fuqinë e munguar të saj me dekada të tëra.

REGJIA E PADUKSHME E MIZANSKENËS ATDHETARE: Kërçova është një krahinë specifike shqiptare në të cilën ndërthuret historia me aktualitetin, gjeografia me politikën. Sa më shumë që kthehemi prapa në histori, aq më të qartë e kemi luftën e sotme për ta dominuar atë politikisht. Për dallim nga e kaluara kur Kërçova pati trysni nga të gjitha perandoritë, aktualisht ajo përjetoi një trysni specifike nga faktorët politikë që në pushtetin qendror ndajnë përgjegjësi të caktuara vendimmarrëse. Katër, pesë vitet e fundit makineria e Gruevskit kishte punuar intensivisht që ta ndryshojë strukturën demografike të rajonit të Kërçovës, duke favorizuar dhe sforcuar elementin sllav, të importuar madje edhe nga disa krahina të varfra të Shqipërisë. Në Kërçovë kishte edhe një kontingjent ushtarakësh, të cilët u bënë rezidentë, jo se kishin ndonjë lidhshmëri familjare e farefisnore me këtë mjedis, por pse ishin të komanduar politikisht që t’i bëjnë një shërbim të vockël demografisë etnike maqedonase.

Por, në fakt, çka ndodhi ditën e zgjedhjeve në Kërçovë dhe kush ishin komanduesit realë e faktikë të zgjedhësve shqiptarë, të cilët treguan një mobilizim të paparë? Të gjithë e thonë se mërgimtarët shqiptarë nga Amerika dhe Europa ishin ata që e shpëtuan Kërçovën. Sensi i tyre i atdhedashurisë u tregua më i fuqishëm se makineria institucionale e Gruevskit, kurse komanda e kësaj atdhedashurie nuk ishte thjesht politike, por ishte diçka më sublime. Nëse miti mbi Anteun konfiguronte një arketip të lidhur me tokën dhe vendin e të parëve, miti i kërçovarëve për t’u rikthyer në vendlindje me kontributdhënie në favor të një dominimi të caktuar politik e etnik, duhet marrë si diçka normale për faktin se pikërisht kjo popullsi e dyndur anekënd botës kishte nevojë të rishfaqte në skenë fuqinë e munguar të saj me dekada të tëra. Prandaj, më shumë se politikë, në skenën e konfrontimeve ndëretnike e ndërpartiake në Kërçovë, u luajt mizanskena e një kontinuiteti të ndërprerë dhunshëm nga pushtetet e kaluara. Regjia e padukshme që ridimensionoi vitalitetin e kësaj popullate, nxori në pah nevojën metaskenike të gjallimit aty ku edhe e ka burimin krenaria kombëtare e kësaj krahine.

“ÇADRAT” E PUSHIMIT PËR ZGJEDHJET E ARDHSHME PARLAMENTARE: Zgjedhjet e porsambajtura lokale në Maqedoni konfirmuan edhe njëherë diversitetin jo vetëm etnik, por edhe brendaetnik, sa i përket disa sensibiliteteve ditore. VMRO u ballafaqua me LSDM për ta marrë Ohrin, Shkupin, Kumanovën, Velesin etj., ndërkohë që BDI me PDSH garuan për të udhëhequr me Tetovën, Strugën, Çairin etj. Në këtë garë komplekse u identifikuan disa prirje e dukuri që mbeten për t’u analizuar në periudhën e ardhshme. Ajo që mund të thuhet tani, është lehtësia e habitshme e partive politike maqedonase për të hequr dorë nga sensi i shtetësisë në favor të dominimeve të tyre nëpër kasaba e lagje, për dallim nga partitë politike shqiptare, tek të cilët funksionoi konkurrenca në mes të diskursit dhe argumenteve. Përderisa PDSH opozitare u mundua të imponojë një diskurs publik denigrues për BDI, kjo e fundit me argumente bindi se drejtuesit e deridjeshëm të komunave nga radhët e oponentëve nuk kishin përmbushur pritjet e qytetarëve. Epërsia e BDI (në rrethin e parë) në Tetovë, rikonfirmimi i sërishëm i drejtimit të Çairit, fitorja impozante në Kërçovë, avantazhi në Gostivar, janë treguesit relevant për një stabilitet të vazhdueshëm që kjo parti po instalon në mendësinë dhe gjeografinë elektorale të shqiptarëve të Maqedonisë. Se sa kjo mendësi ka brenda kualitet dhe qëndrueshmëri, kjo ngel për t’u analizuar, por ajo që hëpërhë nuk mund të kontestohet është fakti që BDI me Ali Ahmetin pushtetmbajtjen e tyre edhe në nivelin lokal do ta udhëheqin edhe për disa vite pa ndonjë alternativë serioze që do ta cenonte këtë vijimësi.

Por, dimensioni aktual i këtyre zgjedhjeve nuk do të zinte vend meritor në vëmendjen e shumë analistëve dhe vëzhguesve, sikur ato të mos reflektonin ndikim edhe në një dimension më të gjerë në perspektivën e ardhshme kohore. Ngulitja e “çadrave” të pushimit të përkohshëm në komunat ku dominoi dukshëm vota e partive VMRO e BDI, duhet lexuar si projeksion matematikor për zgjedhjet e ardhshme parlamentare, tek të cilat do të shkohet me elanin dhe bilancin e tanishëm zgjedhor. Argumenti kryesor i partive fituese në zgjedhjet e tanishme është se ata që dinë të menaxhojnë mirë një bashki të madhe siç është Shkupi, bie fjala, mund të menaxhojnë edhe një shtet të tërë. Në anën tjetër, një parti politike shqiptare që arrin të sfidojë konkurrentin e saj në Kërçovë, ka arsye të besojë që e ardhmja e saj në arkitekturën e ardhshme pushtetmbajtëse nuk do të jetë vetëm mbajtja e disa shtyllave anësore, por edhe drejtimi dhe administrimi me disa resurse të rëndësishme të shtetit. Fakti tjetër që e bën këtë argument edhe më të fortë është ndjesia e zgjedhësve për të deleguar më tepër besim tek ata kandidatë të cilët flijuan kolltukët e tyre të ministrit dhe deputetit në këmbim të një drejtuesi lokal.

A DO TË NDODHË TORBESHIZIMI POLITIK I PDSH NË STRUGË?

Epërsia e PDSH opozitare në Strugë, i atribuohet më tepër karizmës dhe angazhimit individual të kandidatit Sela, se sa vetë partisë së cilës ai i takon. Ka zëra që thonë madje se ai sikur të kishte dalë pa siglën e kësaj partie do të triumfonte që në raundin e parë. Se sa e komplikuar do të jetë fitorja e kësaj partie në rrethin e dytë, dëshmon edhe matematika në terren ku votat e torbeshëve të udhëhequr nga Fiat Canovski janë çelësi vendimtar i fituesit përfundimtar. Fitorja e Selës mund të jetë e vështirë pikërisht nga fakti se përfaqësues të ndryshëm të kësaj partie pa kurrfarë sensi etik e qytetar nuk kursyen sharje e ofendime në llogari të Canovskit, votat e të cilit ata tani i kërkojnë për të vendosur primatin e drejtimit të Strugës. Por, edhe nëse ndodh ky primat atëherë duhet nënvizuar se PDSH nuk mundi të fitojë në Strugë pa torbeshizimin e fuqisë së saj politike.

ZGJEDHJET NE MAQEDONI: SHQIPTARET FITOJNE KERCOVEN, DIBREN, CAIRIN, NE BALOTAZH STRUGA, TETOVA

by

Fitoren në Kërçovë, ku zhvillohej betejë mes koalicioneve në baza etnike e shpalli vetë lideri i BDI-së, Ali Ahmeti. Ai tha se për herë të parë me këtë qytet do të udhëheqë një kandidat shqiptar. BDI-ja  ka fituar gjithashtu në Çair, Dibër, Zhelinë, Bogovinë, Saraj, Likovë dhe Pllasnicë. Ndresa PDH e Thacit ka shpallur fitoren në dy komunat në atë të Tearcës dhe në komunën e Strugës,e cila kalon te balotazh./

Nga Zërijeta Hajro Jajaga/

Sipas rezultateve të para të KSHZ-së, partia  e kryeministrit Nikolla Gruevski, VMRO- DPMNE, prin me numrin më të madh të komunave të fituara. Po sipas KSHZ- së, pjesëmarrja  e votuesve gjatë ditës së djeshme ka qenë 61 për qind.
Kryeministri Nikolla Gruevski, njëherësh dhe lider i VMRO DPMNE,  pak pas mesnateka shpallur fitoren bindëse të kandidatëve të partisë së tij, duke bërë të ditur se VMRO DPMNE, ka fituar në 25 komuna që në raundin e parë, derisa në 35 të tjera prin para opozitës maqedonas.
“VMRO DPMNE dhe ‘Koalicioni për Maqedoni më të mirë’ ka shënuar fitore bindëse. Do të thosha se fitorja është më e madhe edhe se pritjet tona”, është shprehur Gruevski
Ndërkohë, lideri i LSDM-së, Branko Cërvenkovski, duke komentuar zgjedhjet e djeshme, ka numëruar parregullsitë e shumta, të cilat sipas tij, nëse nuk përmirësohen nga institucionet, LSDM-ja nuk do të marrë pjesë në rrethin e dytë zgjedhor.
Cërvenkovski u ka bërë thirrje simpatizantëve të partisë së tij se beteja për fitore finale ndaj Gruevskit vazhdon, duke këmbëngulur për zgjedhje të parakohshme parlamentare.
“Dua të porosis se të gjitha parregullsitë, të cilat ishin regjistruar, nëse nuk zgjidhen nga institucionet, për ne të gjitha opsionet janë të hapura, përfshirë këtu edhe mospjesëmarrjen opozitës në raundin e dytë zgjedhor”, është shprehur Cërvenkovski.
Ndërkaq, fitoren në Kërçovë, ku zhvillohej betejë mes koalicioneve në baza etnike e shpalli vetë lideri i BDI-së, Ali Ahmeti. Ai tha se për herë të parë me këtë qytet do të udhëheqë një kandidat shqiptar.
“Kjo fitore u takon të gjithë qytetarëve të Kërçovës, sepse kryetarët që janë zgjedhur dhe që do të zgjidhen, kanë obligim të kujdesen dhe punojnë për të gjithë ata njerëz, për të gjithë komunitetin që punon aty. Të jemi sa më të përmbajtur në shprehjen e ndjenjave tona. Ne nga viti 2002 deri më sot vazhdimisht kemi siguruar fitore”, ka deklaruar Ahmeti.
Ahmeti, pasi falënderoi të gjithë ata që kanë kontribuar për fitoren e BDI-së, ka thënë se në këto zgjedhje lokale, BDI-ja  ka fituar gjithashtu në Çair, Dibër, Zhelinë, Bogovinë, Saraj, Likovë dhe Pllasnicë.
“BDI fitore të shkëlqyeshme ka shënuar në Tetovë, gati 4 mijë vota epërsi. Epërsi të lehtë kemi edhe në Gostivar, Haraçinë, Studeniçan, Bërvenicë, Vrapçishtë dhe Dollnen”, ka thënë Ahmeti.
Gjithashtu, kreu i BDI-së shtoi se BDI në raundin e parë të këtyre zgjedhjeve e ka humbur Strugën, me ç’rast është zotuar se partia e tij në raundin e dytë do t’i dalë në ndihmë kandidatit të PDSH-së për Strugën, Zijadin Selës.
“Kandidatit të mundshëm për kryetar të Strugës, ne do t’i urojmë sukses dhe shfaqim gatishmërinë dhe thërrasim elektoratin tonë të dalë në mënyrë masive në përkrahje për Komunën e Strugës”, është shprehur Ahmeti.
Fitoren e BDI në Gostivar e ka kontestuar RDK. Nënkryetari i RDK-së, Artan Dika, ka thënë se partia e tij është në epërsi në Gostivar. Sipas tij, RDK-ja nga 14 mijë vota të numëruara në këtë qytet, ka siguruar mbështetjen e 52 për qind të qytetarëve, ndërsa BDI-ja, sipas tij ka siguruar mbështetjen e 40 për qind të votuesve. Nga RDK-ja gjithashtu kanë thënë se listat e tyre për këshilltarë, kanë siguruar mbështetje të konsiderueshme edhe në Strugë dhe Studeniçan.
Kurse, kandidatja fituese në raundin e parë nga radhët e BDI-së në Tetovë,Teuta Arifi, ka falënderuar të gjithë ata që kanë treguar vullnet gjatë tërë kohës sa ishin në fushatë.
“Sipas rezultateve të mbi 80 për qind të votave të numëruara, kandidati dhe lista e BDI-së ka udhëhequr në pjesën më të madhe në të gjitha vendvotimet. Dëshiroj të tregoj se diferenca që kemi ndaj oponentit tim është e madhe, pra me mbi 3600 vota”, është shprehur Arifi.
Derisa, edhe kryetari i PDSH-së, Menduh Thaçi, mbrëmë ka  pranuar humbjen ne komunën e Tetovës me dallim prej 2 apo 3 mijë votave, ndërsa ka shpallur fitoren e PDSH-së në dy komunat në atë të Tearcës dhe në komunën e Strugës.
Sipas Thaçit, partia e tij ka dalë fituese në këto zgjedhje duke rritur trupin votues për 21 mijë vota plus,  krahasuar me zgjedhjet e 2011-s.
“Kjo është një fitore për partinë tonë. PDSH-ja do të shkojë në raund të dytë edhe në komunën e Vraçishtit, Studeniçanit, Likovës, dhe do të mundohemi të fitojmë këta komuna”, ka deklaruar Thaçi.
Ndërkaq, kryetari i KSHZ-së, Boris Kondarko, ka thënë se dita e djeshme ka kaluar pa dhunë dhe incidente fizike, megjithëse sipas njohurive dhe informacioneve të shumta që kanë arritur në KSHZ, janë regjistruar parregullsi të shumta si në vendvotimet dhe jashtë vendeve të caktuara për mbajtjen e zgjedhjeve.
“Duke pasur parasysh natyrën dhe përmbajtjen e vërejtjeve, të cilat janë regjistruar në më shumë këshilla komunalë, shpresoj që KSHZ-ja të njëtat me seriozitet do t`i shqyrtojë dhe do t’i verifikojë në tërësi”, ka deklaruar Kondarko.
Për një varg parregullsish ka njoftuar dhe Asociacioni qytetarë “MOST”, si dhe organizata qytetare “CIVIL”, si ndërprerje të votimit, votim në grupe dhe lexim në zë të emrave të votuesve si dhe prani e personave të paautorizuar, të cilët  u kanë ndihmuar votuesve.