Kosovo hopeful Uefa admission can lead to place in 2018 World Cup qualifying

September 17, 2015 by dgreca

Kosovë, Thaçi vizitë zyrtare në Mbretërinë e Bashkuar/

LONDËR, 16 Shtator 2015/ Zëvendëskryeministri i parë, njëherësh ministër i Punëve të Jashtme i Kosovës, Hashim Thaçi, ka udhëtuar për vizitë zyrtare në Mbretërinë e Bashkuar.

Gjatë vizitës dyditore, zëvendëskryeministri Thaçi do të zhvillojë takime me përfaqësues shtetëror të Mbretërisë së Bashkuar, përfaqësues të Parlamentit, të shoqërisë civile, përfaqësues të bizneseve dhe të mediave.

Krahas bisedave për thellimin e bashkëpunimit bilateral me homologun e tij dhe deputetë të parlamentit, në këto takime do të flitet edhe për mbështetjen e Britanisë së Madhe në procesin e anëtarësimit të Kosovës në UNESCO, thekson njoftimi dërguar nga Londra i MPJ-së kosovare.

Në Londër, zëvendëskryeministri Thaçi do të takohet edhe me përfaqësues të bizneseve të cilëve do t’ua prezantojë mundësitë për të investuar në Kosovë.

Kryediplomati kosovar Thaçi sot ka shkruar në ‘Facebook’: “Jam në vizitë zyrtare në Britani të Madhe, ku kam takime te shumta zyrtare por sot në mëngjes e pash këtë artikull në shtypin britanez! I dëshiroj Federatës sonë të futbollit dhe futbollisteve që më në fund t’ju realizohet – atyre dhe neve, ëndërra e kahmotshme të luajmë me përfaqësuesën tonë në Botërorin 2018! Presim me padurim”. /b.j/

Organizata e Bashkëpunimit Islamik përkrah anëtarësimin e Kosovës në UNESCO

September 13, 2015 by dgreca

Zëvendësministri i Jashtëm i Kosovës, Petrit Selimi, është duke qëndruar në një vizitë njëditore pune në selinë e Organizatës së Bashkëpunimit Islamik në Jeddah të Arabisë Saudite. I shoqëruar nga Ambasadori i Kosovës në Arabinë Saudite, Rexhep Boja, zëvendësministri Selimi ka pasur takim pune me Sekretarin e Përgjithshëm të Organizatës së Bashkëpunimit Islamik, shkëlqesinë e tij Iyad Ameen Madani, si dhe me ekipin e ekspertëve të OBI-së.

Zëvendësministri Selimi ka njoftuar shkëlqesinë e tij Madani për ecurinë e lobimit për anëtarësimin e Kosovës në UNESCO dhe për hapat që kanë mbetur deri në mbledhjen e radhës së Komitetit Ekzekutiv dhe konferencës së UNESCO-s, ku pritet të votohet për Kosovën. Dyzetë e katër shtete kanë bashkë-sponsoruar kërkesën e Kosovës për t’u futur në agjendën e Komitetit Ekzekutiv, përfshirë edhe shumë anëtarë të OBI-t.

Sekretari i Përgjithshëm i organizatës më të madhe që tubon shtetet islamike në botë, zëvendësministrit Selimi i ka premtuar angazhim të plotë të organizatës për anëtarësimin e Kosovës në UNESCO. Bashkëbiseduesit po ashtu janë pajtuar që në ditët e ardhshme Ministria e Jashtme e Kosovës dhe OBI të punojnë se bashku në informimin e saktë të anëtarëve të OBI-it dhe UNESCO-s për situatën në Kosovë dhe për nevojën e Kosovës që të integrohet në rrjedhat globale të arsimit, shkencës, kulturës dhe trashëgimisë.

Kosova e përfundon në nëntor “autostradën” energjetike drejt Shqipërisë

September 13, 2015 by dgreca

-Në Kosovë është realizuar mbi 80% projekti i linjës 400 kV drejt Shqipërisë/ Nga Behlul Jashari*/ PRISHTINË, 13 Shtator 2015/ Në Kosovë, fundi i nëntorit 2015 do të shënojë përfundimin e projektit të “autostradës” energjetike drejt Shqipërisë, është bërë e ditur pas një vizite inspektuese punimeve, gjatë javës. Kështu, finalizimi i projektit pritet para afatit, ndërkohë që me qëllim të krijimit të kushteve të sigurisë në punë në kuadër të projektit për ndërtimin e linjës 400 kV Kosovë-Shqipëri, ditëve të fundit ka shkyqje në disa linja lokale në rajonin e Gjakovës, në perëndim të Kosovës afër kufirit me Shqipërinë.Dy ministra të qeverisë kosovare, Blerand Stavileci – i Zhvillimit Ekonomik dhe Ferid Agani – i Mjedisit dhe Planifikimit Hapësinor, së bashku me ambasadoren e Gjermanisë në Prishtinë, Angelika Viets, si dhe anëtaren e Bordit të Drejtorëve të Bankës Gjermane për Zhvillim (KfW), Ingrid Hengster, zhvilluan një vizitë inspektuese të punimeve që po zhvillohen në linjën 400 kV Kosovë-Shqipëri.

Kryeshefi ekzekutiv i Operatorit të Sistemit, Transmisionit dhe Tregut të energjisë elektrike të Kosovës-KOSTT, Naim Bejtullahu, ka njofuar se në pjesën kosovare interkoneksioni 400 kV Kosovë-Shqipëri deri më tani është zbatuar më shumë se 80% e projektit. Janë montuar 215 shtylla elektrike të tipit Y, janë shtruar mbi 50 km përçues elektrik, ndërsa procesi i shpronësimeve ka përfunduar për të tre segmentet.

Para fillimit të punimeve, në fazat e përgatitjeve, burimet në Prishtinë kanë njoftuar se projekti për ndërtimin e linjës interkonektive 400 kV Kosovë-Shqipëri konsiston në ndërtimin e një linje te tensionit të lartë me gjatësi rreth 238 km, prej së ciles 85.5 km në territorin e Kosovës dhe 153.5 km në territorin e Republikës së Shqipërisë.

Kosova dhe Shqipëria në vitin 2016 inaugurojnë “autostradën” energjetike, ka thënë kryeministri kosovar Isa Mustafa, i pyetur në konferencën e fundit për shtyp në muajin gusht, ku ka folur edhe për bashkëpunimet në fushën e energjetikës e të tjera.

“Rrjeti energjetik mendojmë se vitin e ardhshëm duhet të aktivizohet. Sivjet presim që të kryhen të gjitha punimet në pjesën tonë, edhe në pjesën e Shqipërisë kryhet vitin e ardhshëm dhe do e inaugurojmë”, ka theksuar kryeministri kosovar.

Kreu i qeverisë së Kosovës ka bërë të ditur se, është duke u punaur që të sigurohet edhe tregu i përbashkët i energjisë elektrike, që të bëhet këmbimi i saj.Në 21 dhjetor të vitit 2013, në praninë e ministrit të Energjetikës dhe Industrisë të Republikës së Shqipërisë, Damian Gjiknuri, ministrit të atëhershëm të Zhvillimit Ekonomik të Kosovës, Fadil Ismajli, dhe ambasadorit të Gjermanisë në Kosovë në atë kohë, Peter Blomeyer, në hapësirat e Lidhjes së Shqiptare në Prizren, në një ceremoni solemne, është nënshkruar kontrata për ndërtimin e linjës interkonektive 400 kV Kosovë-Shqipëri.

*Foto: Shtrirja e përçuesve elektrik në shtyllat nr 1 dhe 2 në linjën 400 kV në Kosovë drejt Shqipërisë

Kosova, përjetësisht mirënjohëse për Shtetet e Bashkuara të Amerikës

September 12, 2015 by dgreca

-Mesazh i kryeministrit kosovar Isa Mustafa në 14 vjetorin e sulmeve terroriste në SHBA/Nga Behlul Jashari/ PRISHTINË, 11 Shtator 2015/ Kosova ka përkujtuar sot 14 vjetorin e sulmeve terroriste të 11 shtatorit 2001, në Shtetet e Bashkuara të Amerikës.Kryeministri i Republikës së Kosovës, Isa Mustafa, në një mesazh thekson: Para 14 vjetësh, më 11 shtator 2001, kombi amerikan ishte cak i sulmeve më të tmerrshme terroriste që bota demokratike kishte përjetuar ndonjëherë. Mijëra njerëz të pafajshëm u vranë, objekte të rëndësishme u shkatërruan dhe bota demokratike u vu para sprovës së madhe të terrorizmit global. Sulmet e 11 shtatorit 2001 na tmerruan të gjithëve, por nuk arritën për asnjë moment të thyejnë shpirtin e paepur të kombit amerikan, i cili u ringrit edhe më i fuqishëm dhe më i vendosur kundër të keqes, duke dëshmuar fuqinë, vizionin dhe unitetin global në mbrojtje të vlerave të shenjta të lirisë dhe të civilizimit perëndimor.

14 vjet pas këtyre akteve, Shtetet e Bashkuara të Amerikës dhe mbarë bota demokratike vazhdojnë të jenë të bashkuara në luftën kundër të keqes, duke garantuar triumfin e vlerave të demokracisë përballë kërcënimit permanent terrorist.

Në këtë ditë përkujtimi dhe krenarie, qytetarët e Kosovës qëndrojnë bashkë dhe solidarizohen me familjet e viktimave dhe mbarë popullin amerikan.

Kosova dhe populli i saj janë përjetësisht mirënjohës për kontributin e pazëvendësueshëm që Shtetet e Bashkuara të Amerikës kanë dhënë për çlirimin e Kosovës dhe për zhvillimin e gjithëmbarshëm të vendit tonë.

Zoti i bekoftë Shtetet e Bashkuara të Amerikës!

Zoti e bekoftë kombin amerikan!, shprehet Isa Mustafa,kryeministër i Republikës së Kosovës.Sot, në të gjitha kazermat e Forcës së Sigurisë së Kosovës, në orën 14:45, në shenjë nderimi dhe përkujtimi të viktimave të sulmeve terroriste në Shtetet e Bashkuara të Amerikës, të gjithë flamujt janë lëshuar në gjysmë shtize si dhe është mbajtur një minutë heshtje.Në Kazermën “Adem Jashari” në Prishtinë, për t’i nderuar viktimat e sulmit terrorist të 11 shtatorit të vitit 2001, ishte edhe Komandanti i Forcës së Sigurisë së Kosovës, gjenerallejtënant Rrahman Rama, i cili tha: “Jemi këtu për t’i nderuar viktimat e sulmit terrorist të 11 shtatorit, që ka ndodhur në Shtetet e Bashkuara të Amerikës. Sulmi i 11 shtatorit pati tronditur jo vetëm popullin amerikan por edhe popullin shqiptar. Populli i Kosovës kurrë nuk do ta harrojë ndihmën e jashtëzakonshme që SHBA-të dhanë për lirinë e saj, prandaj edhe në këtë përvjetor shprehim falënderimin e veçantë për popullin amerikan dhe për Shtetet e Bashkuara të Amerikës”.

Shoqata Miqtë e Amerikës dhe Garda e Nderit e Policisë së Kosovës ngritën sot flamurin amerikan në gjysmë shtize në sheshin Bill Clinton në Prishtinë. Në këtë shesh, Rinia e PDK-së mbajti një minutë heshtje pranë flamurit të ulur në gjysmështizë pranë shtatores së ish presidentit amerikan Clinton.

Kosova, marrëdhënie ndërparlamentare me Poloninë

September 10, 2015 by dgreca

-Kryetari i Kuvendit të Kosovës, Veseli takime me udhëheqës të Senatit dhe Parlamentit të Polonisë/

PRISHTINË, 10 Shtator 2015/ Kryetari i Kuvendit të Republikës së Kosovës, Kadri Veseli, sot, gjatë pjesëmarrjes në Forumin e 25-të ekonomik, me temën: “Drejt një Evrope të qëndrueshme. Strategjitë për të ardhmen”, ka takuar drejtues të Senatit dhe Parlamentit të Polonisë. Në këto takime u diskutua nevoja e thellimit të bashkëpunimit ndërparlamentar dhe diplomatik të nivelit më të lartë. Gjatë ditës, Veseli ka takuar zv/kryetarin e Senatit të Polonisë, Stanislaw Karczewski, me të cilin ka diskutuar për nevojën e thellimit të bashkëpunimit në mes të dy shteteve, veçanërisht në nivel të dy Kuvendeve. Në takim, Veseli diskutoi për zhvillimet në vend dhe rajon, duke u fokusuar në axhendën e Republikës së Kosovës drejt integrimit në BE, sfidat e kësaj agjende dhe nevojën e përkrahjes nga vendet mike, si Polonia. Bashkëbiseduesit u dakorduan për mundësitë e thellimit të marrëdhënieve ekonomike dhe diplomatike me interes të të dyja vendeve.

Gjatë ditës, kryetari i Kuvendit, Veseli ka takuar edhe zv/kryetarin e Kuvendit të Polonisë, Eugeniusz Grzeszczak. Çështjet e ngritura në këtë takim ishin: zhvillimi i bashkëpunimi ndërparlmentar, vizitat reciproke dhe marrja e përvojës nga Polonia në procesin e integrimit.

Veseli theksoi rëndësinë e stabilitetit në Ballkan, bashkëpunimin rajonal, integrimit të Kosovës dhe kësaj pjese të Evropës në Bashkimin Evropian, duke kërkuar që Polonia të bëhet mbështetëse e këtij procesi.

Konkludim i përbashkët ishte se vizitat reciproke do ta ndihmonin bashkëpunimin ndërparlamenatar me fokus procesin e integrimit të Kosovës në BE.

Kryeparlamentari Veseli është i ftuar në Forumin Ekonomik në Poloni si panelist, ku marrin pjesë shtetarë, ekspertë dhe drejtues nga fusha politike, ekonomike dhe sociale nga Evropa dhe më gjerë./b.j/