Kozeta Keze Zylo – Dielli

Vëllezërit Lucaj dhe shoqëria Trieshjane grumbulluan fonde për rrugën e Gozdecit

September 9, 2023 by s p

Nga Keze Kozeta Zylo/

Në Restorantin Tesoro D’Italia 160 Marble Avenue Pleasantville NY, 10750, vëllezërit e nderuar Lucaj, Tony Dedivani shtruan një darkë me shoqërinë Trieshjane. Qëllimi i këtij tubimi ishte sa patriotik po aqe dhe njerëzor. Të ndihmosh Atdheun në nevojë dhe familjen është një nga detyrat më të bukura dhe më prekëse. Vëllezërit Lucaj nuk e kanë për herë të parë për tubime të tilla.

Fushata ishte për ngritjen e fondeve për ndërtimin e rrugës së Gozdecit, pasi Gozdeci eshtë i vetmi fshat në Malesi të Madhe pa rrugë automobilistike.

Fshati Gozdec është afër zonës së Trieshit i cili është shumë i dëgjuar për kishën e saj më të vjetër në Budëz, por deri në shekullin e 17-të ishte në gërmadha. Pjetër Bogdani shkruan në vitin 1672 se famullia nuk kishte prift dhe kishte nevojë për misionarë dhe mësues shkolle. Kisha e Trieshit në atë periudhë kishte një regjistër që nga viti 1753, data më e hershme e konfirmuar e përdorimit të ndërtesës. Informacioni për famullinë e Trieshit në vitin 1745 është gjithashtu informacioni më i hershëm i saktë mbi figurat e popullsisë së fisit. Asokohe kishte 84 familje me 580 besimtarë katolikë.

Zakonet funerale të Trieshit si ato të Malësisë në përgjithësi përfshijnë vajtimin (gjamën) të të ndjerit në mënyrë kolektive nga një grup burrash (gjamatarë).

Bujaria dhe urtësia e vëllezërve Lucaj bënë që të shtronin darkën për të pranishmit dhe me respekt vëllazëror mblodhën fonde në këtë nismë bamirësie.

Vellezerit Lucaj janë dalluar për fushtata për ngritjen e fondeve, si për kanndidat për kongresist, senator apo politikanë të dryshëm.

Familja Lucaj, është një familje e njohur e Trieshit, për çështjen kombëtare. Gjyshi i tyre është nderuar nga Presidenti i Republikës së Shqipërisë me urdhrin “Kalorsi i Skëndërbeut”.

Në restorantin e tyre kane drekuar gjithashtu Presidenti Clinton, Hillary Clinton dhe shkrimari i famshëm amerikan James Patterson.

Në këtë tubim për mbledhje fondesh morën pjesë aktivistë të mirënjohur në Komunitet si gazetari i shquar i Zërit të Amerikës Gjekë Gjonlekaj, kryetari i Shoqatës së Shkrimtarëve Shqiptaro Amerikan z. Mhill Velaj, Zeke Kalaj një donator i vecantë i komunitetit, Shaqir Gjokaj kryetar i Shoqatës “Malësia e Madhe”, Vase Ulaj, Nikoll Juncaj, Prend Qeta, Kole Cacaj etj.

Me plot dashamirësi dhe kulturë mori pjesë dhe Shoqata Shqiptaro Amerikane “Skënderbej” Inc. e perfaqësuar denjësisht nga z. Faton Zogiani anëtar i Bordit të Drejtorëve të Shoqatës. Z. Zogiani në fjalën e tij tha se udhët e Atdheut duhen rregulluar dhe në emër të shoqatës do të japim një shumë simbolike që dhe vëllezërit tanë të kenë mundësi të jetojnë si gjithë të tjerët. Unë e cmoj shumë patriotizmin tuaj dhe si student i Kosovës e kam ndjerë nga afër solidarizimin vëllazëror të shqiptarëve anë e mbanë trojeve tona dhe globit, përfshire dhe Malësinë e Madhe. Ne e pranuam me shumë dëshirë këtë ftesë pasi është një bamirësi që duhet ta bëjmë për Atdheun tonë.

Ne kemi grumbulluar një shumë simbolike dhe urojmë që ajo rrugë të shtrohet si dhe cdo pëllëmbë tokë shqiptare të begatohet. Nga Shoqata “Skënderbej” kishin ardhur anëtaret e saj si Faton Zogiani, Elisa Qehaja, Esat Seci, Lulzim Nika, Doris Zefi, Selim Kortoci, Fatbardha Xama, Hysenim Xama, simpatizanët si Prek Nilaj dhe Ndok Nilaj, pra një grup i konsiderueshëm.

Tubime të tilla nga njerëz atdhetarë e shtojnë dhe më shumë përparimin e Kombit si dhe unitetin midis shqiptarëve.

Karadaku, Bir i Kosovës dhe i Labërisë që luftoi heroikisht në Grykën famëmadhe të Mezhgoranit të Tepelenës

January 30, 2023 by s p

Nga Keze Kozeta Zylo/

Përmbi mal si shqiponjë/ zbriti Xhelo kapedani/ Tok me Asimin luftoi/ Në grykë të Mezhgoranit/ Populli s’do t’i harrojë/ Bijtë e ndritur të vatanit!

Borxhet duhen shlyer bija ime, më mësonte babai…
Jam rritur me bëmat e mëdha të heronjve të të gjitha epokave, jam rritur me Heronjtë Xheladin Beqiri “Karadaku” nga Gjilani i Kosovës dhe Asim Zenelin nga Progonati, ndoshta se aty në tokën e Brahim Gjonit (Atit tim) u derdh gjaku lum, u derdh gjaku i Heroit Asim Zenelit kundër pushtuesve fashistë italianë. Kur ishja e vogël kjo tokë përbënte një çudi, një mister, fantazi…
Mezhgorani kjo vatër e prushtë atdhetarie, plot mistere të çuditshme ka një pozitë gjeografike të shkëlqyer. Jo vetem që ka një bukuri të pashoqe e rrethuar mes dy malesh kryelartë si Trebeshina dhe mali Shëndëllia me emër të shenjtë, ku këmbët e tyre lagen nga lumi Vjosa, por është dalluar për kulturë dhe për heroizëm si gryka famëmadhe Mezhgorani.
Shumë prej brezit tim e dinë mirë këngën: Një zë po del nga gryka e Mezhgoranit, të interpretuar nga basi i madh lirik shqiptar Mentor Xhemali, me tekst nga shkrimtari Qamil Buxheli dhe kompozitor Mustafa Krantja, mjerisht nuk po njihet si duhet nga pasardhësit tanë. Kjo këngë lindi në ditën që u vra Asim Zeneli nga Progonati balli i djemve, i cili ishte në krye të Çetës “Hajredin Tremishti” me komandant Birin e Gjilanit, djalin shqiptar nga Kosova Xheladin Beqir “Karadaku”.
Më 2 Korrik 1943 u shkrua Epopeja e Mezhgoranit, ku u zhvilluan luftime trup me trup kundër pushtuesve fashistë italianë, në këtë betejë që udhehiqej nga Asim Zeneli dhe Xheladin Beqiri.
Komandant Karadaku në Grykën e Mezhgoranit, para trupit të tij u betua:
“Fli i qetë Asim, se hakun do ta marrim, gjakun që derdhe ti për Shqipëri, shtrenjtë do
ta paguaj fashist italiani, ti je një Hero për Liri”.
Ky bir trim ky kapedan i Kosovë s dhe i Labërisë ku jetoi dhe banoi dëbuar nga genocidi serb të kujton thënien e Winston Churchill ish kryeministrit ë Anglisë i cili thotë për vendin e tij në kohën e Luftës së dytë botërore si: “Ne do të mbrojmë ishullin tonë, sido që të jetë kostoja, do të luftojmë në plazhe, do të luftojmë në terrene, do të luftojmë në fusha dhe në rrugë, do të luftojmë në kodra; nuk do të dorëzohemi kurrë”.
Në çdo festë pelegrinazhi të 2 korrikut kur ftonin im at per t’ju rrëfyer nxënësve të shkollave për këtë epope, ose në bisedat private gjithmonë ishja kurreshtare dhe cuditesha se si ishte e mundur që Heroi Xheladin Beqiri të gjendej në Mezhgoran? Këto ishin pyetjet e një adoleshenteje dhe natyrshëm merrja përgjigjen e duhur. Ai tregonte: Xheladin Beqiri lindi në Gjilan – Kosovë. Të atin ia vranë serbët. Për këtë arsye për të mbijetuar, ishte shtrënguar të punonte si shërbëtor që në moshën e fëmijërisë, duke shkuar nga krahina në krahinë, deri sa u vendos në Nivicë të Kurveleshit. I rritur me urrejtjen për pushtuesit serb, për genocidin që kishin ushtruar, ai
rrëmbeu armët për të luftuar kundër pushtuesit fashist italian dhe gjerman.
Hyri në çetën e parë të Kurveleshit, më 1942. Pastaj kaloi komandant i çetës “Hajredin Tremishti” me komisar Asim Zenelin. A e kupton bija ime rrëfente im at se kur populli i Mezhgoranit, Peshtanit dhe përreth panë këto çeta që erdhën nga Dragoti nga mbrapa malit të Shëndëllisë morën krah, zjarr, vrull për të luftuar trup me trup me fashistët. Ata ishin të bukur, në lulen e rinisë dhe të djalërisë. I dolën Zot vatanit. Ata dukeshin si shqiponjat e Lirisë, ata ishin Luan të vërtetë edhe pse përballeshin me një armik të madh në numër dhe me autoblinda super të sofistikuara. Po ja që një popull kur lufton për Lirinë vjen një ditë që e fiton, sepse Liria nuk njeh çmim deri sa të fitohet.
Në tetor 1942, me krijimin e Brigadës së Parë Sulmuese, emërohet zv/komandant i batalionit të parë dhe më vonë të pestë. Ra heroikisht, më 6 qershor 1944, në Qafën e Gjarprit. Kur morëm vesh se Xheladin Beqiri Karadaku ra heroikisht në Luftë, shumë bashkëfshatarë tanë qanë, mbajtën një minutë heshtje. Populli i Mezhgoranit i këndoi: Përmbi mal si shqiponjë/ zbriti Xhelo kapedani/ Tok me Asimin luftoi/ Në grykë të Mezhgoranit/ Populli s’do t’i harrojë/ Bijtë e ndritur të vatanit! Ndërkohë shoku i tij i armëve, Heroi Asim Zeneli ndodhej i varrosur në Hojmodh në varrezat e Mezhgoranit ngase ishte luftë dhe s’mund t’i çonin eshtrat e tij në vendlindje në Progonat.
Xheladin Beqiri nderohet dhe përkujtohet me plot nderime si Bir I Kosovës dhe i Labërise atje ku jetoi dhe krijoi familjen e tij. Nuk e lajmë dot borxhin e vëllait prej Kosove vazhdonte Ati im edhe pse vëllai i tij Ismet Gjoni i inkuadruar në luftë shkoi deri në Kosovë dhe u plagos tri herë në fushat e saj kundër pushtuesve. Borxhet duhen larë në mos sot, mot, por jo kurrë edhe pse Xheladini e kishte në mish e në gjak dashurinë për tokën amë dhe jo për borxhe.
Sidoqoftë mbetemi borxhlinj gjithmonë. Në mos t’jua shpërblejmë me pushkë ka forma te tjera. Sa herë marrim mësuese nga Kosova apo aktivistë që i janë bashkuar Misionit Kombëtar të mësimit të Gjuhës Shqipe, gjithmonë më vjen në mendje Heroi i Kosovës dhe Labërisë Karadaku dhe më duket sikur shlyej sadopak amanetin e të parëve.

Të isha një natë në Hënë

Këto ditë dëgjova me shumë emocion këngën e kënduar me titull: “Sikur të ishja një natë në Hënë” të nipit të tij që e kanë pagëzuar me të njejtin emër si Gjyshi Hero: Xheladin Beqiri.
Kënga më e re: “Të isha një natë në Hënë” është një lirikë e mrekullueshme. Fillon me nje instrument frymor fyellin, një nga veglat me origjinë të lashtë. Eshte vegël që përdoret nga barinjtë, dhe në këtë rast ndjell të zotin e këngës per t’i dhuruar publikut një perlë nga viset e Labërisë.
Kënga shoqërohet me natyrën e bukur shqiptare, një ndër to është dhe e vendlindjes sime Tepelenës me kalanë hijerëndë dhe Vjosën që gurgullon poshtë saj. Kënga shoqërohet nga orkestra Bledian Beqiraj dhe klarinet Artan Majko. Dhe ja disa nga vargjet e këngës lirike: Të jesha një natë në brinjë/ bashkë me bejkën kërthinjë/ Si Helena mbi bedena/ për një vajzë nga Tepelena.
Strofa tjetër vazhdon me një ëmbëlsi të natyrës së qetë dhe dëshirore si: Të isha në Hënë një natë/ Të ma bënte zemra fap/ Aty do ja bëja fora/ Për një vajzë këndej nga Vlora.
Ndërkohë valëzat e ujit të detit të Vlorës që shfaqen në ekran janë në sinfoni harmonie me fjalët e përzgjedhura për vajzën labe.
Jam shumë krenare që kënga labe ruhet si diamant në botë nga UNESCO dhe kjo më jep një ndjesi të papërshkrueshme. Në vitin 2005 “Iso-polifonia popullore shqiptare” futet në listën e “Kryeveprave të trashëgimisë gojore të njerëzimit” mbrojtur nga UNESCO.
Kënga e kënduar vetëm nga artisti është dëshmi e civilizimit, shpirtbardhësië dhe e dashurisë së sinqertë për traditën popullore labe.
Nipi është shumë krenar për gjyshin e tij hero dhe natyrisht ka shkuar disa here për të vizituar rrënjët e të parëve të tij atje në Gjilanin e bukur. Komuna e Gjilanit gjendet në pjesën juglindore të Kosovës, rajoni i Anamoravës. Është njëra nga komunat e mëdha të vendit. Pozita gjeografike që ka, i mundëson asaj lidhje të mira me qendrat e tjera të Kosovës dhe të rajonit.
Cfare lidhje e hatashme shpirtërore është midis Labërisë, Nivicës dhe Bëncës atje ku u rrit nipi i tij Xheladini dhe sot në nderim të gjyshit të tij në qendër të Nivicës ndodhet busti i Heroit Xheladin Beqirit.
Në krah të tij është busti tjetër i Hodo Nivicës që ra heroikisht nga pushtuesit malazezë, pra një djalë i Labërisë shkon në Veri për të luftuar pushtuesit, ndërsa një djalë nga Gjilani i Kosovës vjen në Mezhgoran dhe lufton kundër pushtuesve italianë dhe gjerman në gjithë vendin ku bie heroikisht në “Qafën e Gjarprit”. Varri i Kryekapedanit Hodo Nivica ndodhet në Shpuzë të Malit të Zi.
Bijtë e vërtetë nuk njohin dallime, nuk njohin Veri-Jug, gegë a toskë, por njohin se kanë vetëm një Atdhe: Shqipërinë etnike. Ata janë dëshmi autentike e saj. Këta heronj i përkasin qiellit shqiptar, janë një dashuri për gjithë botën e madhe, për gjithë popujt që luftojnë kundër klikave fashiste dhe skllavërisë.
Në betejën e Qafës së Gjarprit e Guri i Prerë, (Skrapar), midis forcave gjermane e ato partizane më 6 qershor të vitit 1944, dhanë jetën 32 partizanë, midis tyre edhe biri i Kosovës, komandant Xheladin Beqiri (Karadaku), Hero i Popullit. Pseudonimi Karadaku është mali i vendlindjes së tij që s’e harroi kurrë.
Kur populli dëgjoi për rënien e tij heroike i këndoi me ligje labërie:
Bir i tokës kosovare/ Karadaku me halle/ Maliherin tënd të rrallë/ gjithmonë mbushur e kam pare…
Nipi i tij i interpeton magjishëm këngët labe dhe është një nga bilbilat e këtij thesari botëror. Kurse Golik Jaupi ky gjeneral i këngës labe që e shoqëronte në udhëtimin për në Nivicë për të nderuar Heroin Xheladin Beqiri, i këndoi: Xheladin strall me rremba/ Bir i halleve të rënda/ Bonjaku me shumë nëna/ ndau zemrën në shumë zemra…
Karadaku, ky bir i Kosovës dhe i Labërisë që luftoi heroikisht në grykën famëmadhe të Mezhgoranit të Tepelenës dhe ra ne Qafën e Gjarprit në Skrapar nderohet dhe përkujtohet me plot respekt nga gjithë populli shqiptar. Ata do të jetojnë përjetësisht në zemrën e Kombit.

28 Janar, 2023
Staten Island, New York

Komunitet- Kryesia e Shoqatës “Skënderbej”diskutoi rreth veprimtarive gjatë Pandemisë

March 15, 2021 by dgreca

Nga Keze Kozeta Zylo/Ndonëse vazhdojmë të jemi në pandeminë botërore, Kryesia e Shoqatës Shqiptaro Amerikane vazhdon të jetë së bashku dhe të punojë në programin që kanë miratuar si anëtarë të shoqatës.

Në ditën më të bukur të vitit, atëhere kur jeta gjallërohet nga gjumi i rëndë i dimrit, dhe në vendin tonë festohet me aq bukuri dita e Verës, kryesia e shoqatës u mblodh në restorantin “Victory Shop” Astoria në Queens për të diskutuar rreth punës që ata kanë bërë gjatë kësaj kohe pandemike. Të gjithë të gëzuar dhe plot respekt për njeri tjetrin u përshëndetën në distancë sipas rregullave shëndetësore. Takime të tilla në këtë kohë pandemike bëhen dhe më të dashura dhe më me kuptim.

Mbledhjen e moderoi znj.Alketa Veshi sekretare e Shoqatës Shqiptaro Amerikane Skënderbej.

Z.Mark Qehaja kryetar i Shoqatës bëri konkluzionet rreth festimit të 13-Vjetorit të Pavarësisë së Kosovës. Ai tha se: “Aktiviteti rreth 13-të Vjetorit të Pavarësisë së Kosovës ishte një konferencë shkencore që u realizua me plot sukses”.

Kumtesat e mbajtura ishin të një niveli të lartë ku referuesit nëpërmjet temave të ndryshme sollën Kosovën, luftën e saj heroike dhe përpjekjet e shumta derisa arriti ditën e Pavarësisë. Z.Qehaja shtoi se shoqata ndihej shumë e nderuar që në këtë konferencë përshëndetën si: Ambasadori Frymëzim Isufaj, Konsull i Përgjithshëm i Kosovës i cili i falënderoi për këtë aktivitet të rëndësishëm. Ne kete konferecë nderoi me pjesëmarrjen e tij Ambasadori Amerikan, Heroi i Kosovës William Walker. Fjala e tij u dëgjua me shumë interes nga të pranishmit dhe më gjerë.

Përshëndeti gjithashtu dhe Prof. Rrustem Berisha me banim në Pejë

Z.Imer Lacaj n/kryetar i shoqatës diskutoi rreth punës me websitin e shoqatës.

Znj.Alketa Veshi rekomandoi për disa aktivitete të shoqatës në të ardhmen. Kur të ketë më shumë mundësi duhet që të organizohemi me anëtarë të shoqatës për të vizituar vende historike në Amerikë përfundoi ajo.

Znj.Arta Xhaferri anëtare e kryesisë diskutoi për anëtarësimin e të rinjve, të cilet janë e ardhmja e Diasporës.Glen Nukaj anëtar i kryesisë solli mendime rreth aktiviteteve me të rinjtë e shoqatës.

Z.Nikollë Nilaj anëtar i kryesisësë së shoqates diskutoi rreth komunikimit me anëtarët e shoqatës ne forume të ndryshme të hapura nga shoqata.

Z.Qemal Zylo Anëtar Nderi i shoqatës diskutoi rreth aktiviteve të ndryshme, punës në media etj.

Z.Faton Zogiani anëtar i kryesisë diskutoi rreth sigurimit të një zyre për shoqatën, vend që i jep mundësi më të rehatshme për mbledhje dhe punë që i përkasin shoqatës.

Kryesia e Shoqates nderoi me çertificatë mirënjohje Prof. Rrustem Berishën me banim në Pejë i cili në konferencën shkencore për 13-të Vjetorin e Pavarësisë së Kosovës mbajti kumtesën me temë: “Genocidi serb në Kosovë qysh prej shekullit të 18-të”. Atë e nderuan, si luftëtar për çështjen kombëtare, si mësimdhënës, gazetar, politikan dhe publicist. Së shpejti do të sjellin librat e tij të botuara rreth genocidit dhe krimeve serbe në New York. Çertifikata e mirënjohjes do t’i dorëzohet në emër të kryesisë nga z.Faton Zogiani në Kosovë.

Ishte një aktivitet i këndshëm nga Kryesia e Shoqatës Shqiptaro Amerikane “Skënderbej” me kryetar z.Mark Qehaja i cili vazhdon të punojë me përkushtim dhe patriotizëm së bashku me n/kryetarin z.Imer Lacaj, sekretare znj.Alketa Ktona Veshi dhe anëtarët e kryesisë si: Arta Xhaferri, Faton Zogiani, Nikollë Nilaj dhe Glen Nutaj. Ata kanë punuar fort për të realizuar programin e kësaj shoqate që në themelimin e saj.

14 Mars, 2021

Astoria, New York

Vëllai i George Floyd bëri thirrje për Paqe

June 1, 2020 by dgreca

Mr. Terrence Floyd, George’s younger brother said violent actions and non-peaceful protests “won’t bring my brother back.”

Dhuna nuk do ta rikthejë vëllain tim tha Terrence Floyd.

Nga Keze Kozeta Zylo

Është shumë e dhimbshme dhe tejet emocionuese të shikosh dierket nga ekranii TV-s Në Mineapolis në vendin ku oficeri i policisë mbyti një afrikano amerikan të pa armatosur, vëllain e të ndjerit George Floyd, z.Terrence Floyd duke bëre thirrje për Paqe.

Si grua dhe qytetare e botës duke e dëgjuar vëllain e viktimës i cili pati një vdekje makabre, qava dhe ne të njejtën kohë e vlerësova pamasë për aktin e tij aq të qytetëruar dhe tejet njerëzor. Si pasojë e mbytjes së një qytetari me ngjyrë Amerika u përfshi në zjarr e tym pothuajse në cdo shtet te saj duke dalë jashtë kontrollit. Sot pikërisht në vendin ku ndodhi krimi më monstruoz i mbytjes së vellait të tij z.Terrence tejet i shqetësuar dhe dy herë gati të kolapsej nga humbja e vëllait, udhëhoqi lutjen para disa dashamirësve të familjes së tij ku midis të tjerash ai pyeti: “Për propaganduesit e dhunshëm dhe të egër te cilët hedhin në erë sende, çfarë kërkojne?” pastaj shtoi përsëri vetë “Kjo nuk do ta rikthejë fare vëllain tim”.

Ai tha se familja e tij është paqësore dhe adhuruese e Zotit. Ai u bëri thirrje protestuesve ta bëjnë këtë ne mënyrë tjetër duke votuar.

“Edukoni vetveten, dhe ta dini për kë po votoni. Kështu do t’i godasim ata … Le ta ndryshojmë.”

Rev. Kevin McCall, i cili udhëtoi në Minneapolis nga Brooklyni, tha se dhimbja e familjes Floyd i frymëzon demonstruesit të vazhdojnë të protestojnë – por bëjeni atë në mënyrë paqësore.

Ai protestoi bashkë me turmën duke drejtuar thirrjen si: “Familja ka bërë thirrje për Paqe. Familja ka bërë thirrje për Paqe. Familja ka bërë thirrje për paqe,” tha McCall në vendin përkujtimor.

“Ne po u dërgojmë një mesazh njerëzve në të gjithë këtë vend për të ndaluar plaçkitjen. Ngrini shenjën e paqes,” shtoi ai. “Fuqia është në numër. Mos ndaloni së protestuari, por hidhni shenjën e Paqes.”

Z.Terrence vëllai viktimës George Floyd me buzë të dridhur dhe lot në sy tregoi edukatën dhe dashurinë për Amerikën, burrin me një llogjikë njerëzore që zemërimin karshi dhunuesve ta shprehin jo me shkatërrime, plaçkitje, vrasje, por në mënyrë demokratike ashtu siç e ka traditë vendi ku u lind dhe u rrit.

Vëllai i tij George Floyd vdiq në Minneapolis barbarisht. Një video nga celulari i një kalimtari u bë virale ku aty shfaqet një ish oficer policie, Derek Chauvin i cili vë gjurin në qafën e Floyd, ndërkohe George Floyd me zë të mbytur lutej: “Unë nuk mund të marr frymë”.

Këto fjalë të fundit janë bërë një himn për lëvizjen “Black Lives Matter”.

Në këtë situatë tejet shqetësuese për cilindo qytetar amerikan që e do me zemër këtë vend nga mëdemokratikët dhe më humanët në botë, lutja e Z.Terrence Floyd për Paqe para turmës dashamirëse shpresoj të dëgjohet dhe protestuesit të kërkojnë drejtësinë paqësisht, pa dhunë, barbarizma dhe vrasje të tjera. Bota qytetare kërkon të jetojë bashkë paqësisht, dhuna e bën botën barbare, hakmarrja është atavizëm, ndaj e vlerësoj dhe bashkohem me lutjen e vëllait të viktimës për PAQE dhe DREJTËSI!

Zoti i dhëntë forcë familjes Floyd për ta përballuar tragjedinë familjare!

Zoti e bekoftë Amerikën e vlerave të mëdha!

1 Qershor, 2020

Staten Island, New York

Artistja shqiptare dha koncert në Majin e trëndafilave

May 18, 2015 by dgreca

Nga Keze Kozeta Zylo/
Në ishullin e Staten Island, një lagje e bukur e Nju Jorkut shqiptarët e Diasporës amerikane u mblodhën së bashku si një familje si për të përshëndetur Majin e trëndafilave, muajin më të bukur të pranverës me muzikë.Sopranoja Lindita Mezini Lole krejt ndryshe nga mbrëmjet rutinë e kishte konceptuar në formë koncerti të muzikës pop këtë aktivitet të bukur. Në restorantin “Brook Catering Hall”, me pronar Shaban Seferi, stafi i të cilit e kishin përgatitur sallën ku do të zhvillohej aktiviteti si një mjedis të bukur teatri ku do të shfaqej një koncert i bukur me muzikën pop etj.
Mbrëmjen e ka hapur pianisti Petrika Melo i cili pasi ka përshëndetur të gjithë të pranishmit ka ftuar në skenë artisten Lindita Mezini Lole e cila është mirëpritur me duartrokitje nga të pranishmit.
Programi ishte ndërtuar me bazë të disa këngëve të lehta klasike shume të njohura për publikun si shqiptar dhe atij ndërkombëtar të viteve 60 -të, 70-të dhe 80 të.
Zëri dhe interpretimi i saj brilant me profesionalizëm dhe kulturë gjithmonë ka tërhequr artdashësit e shumtë shqiptarë dhe në botë. Artistja Mezini Lole shoqërohej nga Andrea Lole bashkëshorti i saj, një tjetër artist që ka mbaruar Artet e Bukura për Oboe dhe janë në harmoni të përkryer të dy për të realizuar koncertin e muzikës në një mjedis të ngrohtë dhe tejet dashamirës.
Programi ishte ndarë në 4 grupe me 8 këngë në secilin grup. Midis secilit grup Andrea Lole luajti në DJ valle të ndryshme tradicionale shqiptare duke përmbledhur këtu dhe muzikën folklorike dhe gjithashtu muzikë për kërcim të kompozuar nga autorë të huaj.
Ndërmjet këngëve të programit po përmed disa prej tyre:
Programi u hap me këngën “ Love changes everything” Kompozuar nga kompozitori shumë i njohur amerikan Andrew Lloyd Webber, me poezi të Charles Hart and Don Black kënduar në Brodway shows.
Ka vazhduar me “Rivers of Babylon” kënduar nga grupi in Boney M, in krijuar në Gjermani nga 4 këngëtarë të lindur në Jamaika. Kjo këngë është kënduar në vitin 1978 dhe ka qenë nga më të dëgjuarat në atë kohë në Europë dhe Amerikë.
2 ) “I will survive” kënduar nga by Gloria Geiner në 1979 dhe ka qenë nga më te famshmet për kohën.
3 ) Kënga shumë e njohur dhe nga filmi “God Father ““ The love story song” kompozuar nga kompozitori Italian Nino Rota në vitin 1972.
4) “Mamma Mia”, një tjetër këngë shumë e njohur për publikun ndërkombëtar interpretuar nga grupi suedez ABBA në vitin 1975 .
5 ) Kënga shumë e njojtur Greke “ Milise mou” kompozuar nga kompozitori njohur grek Manos Hatzidakis.
6 ) “Under the sky of Paris” është kënga e kënduar në filmin Francez me të njejtin titull tëkompozuar nga Hubert Giraud dhe tekst të Jean Drejac e recorduar nga këngëtarja e njohur Edith Piaf në vitin 1951.
7 ) “Good by my love good by” Këngë tepër e dëgjuar e viteve 70 të kënduar nga këngëtari grek me një zë hyjnor Demmis Rousos.
E veçanta e këtij koncerti ishte konceptuar si një surprizë e bukur dhe për vëllain e saj kompozitorin nga Vlora Shpëtim Mezini i cili merrte pjesë në këtë mbrëmje të bukur festive. Ardhjen e tij e ka përshëndetur nxënësja e shkolles shqipe “Alba Life”, Kristina Melo, një artiste e vogël në moshë, por me një popullaritet të gjerë në Diasporë duke i bërë surprizë me këngën “1 Qershori”, me tekst dhe të kompozuar nga Shpëtim Mezini, këngë që ka fituar çmim ne festivalin e fëmijëve të organizuar në Shqipëri dhe që vazhdon të këndohet dhe nga nxënësit e Shkollës Shqipe”Alba Life” në Staten Island, Brooklyn dhe Manhattan. Z.Shpëtim Mezini ka falënderuar të gjithë të pranishmit që ishin mbledhur së bashku për t’u takuar me njeri-tjetrin dhe për të dëgjuar muzikë të bukur, pasi këtë kanë bërë gjithmonë çifti Andrea dhe Lindita Lole, ndonëse shpesh harrojnë vehten e tyre, por ne ata na kanë mbledhur gjithmonë së bashku të gëzohemi dhe të argëtohemi. Duke e dëgjuar me vëmendje dhe kënaqesi fjalët plot dashuri dhe përkushtim për të motrën, kompozitorin Mezini, dhe si e larguar nga Mëmëdheu medoemos që e ndjejmë dhe më shumë ndarjen nga familjet tona që jemi ndarë në disa pjesë nëpër botë, më dukej si Kostandini i ringjallur që kishte dhënë besën dhe kishte ardhur për të marrë Doruntinën, 9 male kaptuar, ndonëse me humor artdashesi Agim Pira më tha që nuk do e lemë ta marri se e duam ta kemi një motër artiste në Diasporë.
Fjala e z.Mezini dhe përqafimi motër e vëlla u prit me emocion dhe duartrokitje në sallë.
Z.Mezini ka përshëndetur me Dy këngë të shoqëruara nga vetë ai në kitarë si: “Pranvera filloi me ardhë” nga kompozitori i shquar shqiptar Tonin Arapi, dhe këngën kosovare “Zambaku i bardhë”
Midis këngësh në fund të programit me muzikë shumë të këndshme vlen të përmend Tangon Argjentinase “La Cumparsita”, “Caminito”, këngët e bukura ritmike “Bamboleo dhe Baila Morena” të bëra shumë të njojtura për publikun internacional nga këngëtari shumë i njojtur Spanjoll, Julio Iglesias, që thuhet se është një nga artistët me albume më të shitura në botë.
Artistja Lole ka ftuar të gjithë të pranishmit të këndojnë së bashku këngën e mirënjohur shqiptare që është aq popullore midis “Eja Lule Bore”, të kompozuar nga kompozitori i famshëm shqiptar Gjon Simoni.
Në këtë koncert u kënduan dhe disa këngë të bukura korçare të interpretuara nga Hektor Lole.
Artistja shqiptare ka interpretuar në skena të ndryshme të botës duke filluar me Tiranën me disa koncerte me Operën Kombëtare, pasi emigroi në Greqi për një jetë më të mirë u pranua në TV-n kryesore dhe dha koncerte nëpër Europë.
Në Amerikë pa mbështetjen e askujt arriti të mbaroje Master në Mannes College of Master of Music in Voice from Mannes College of Music at New School University dhe për një vit vazhdoi “Professional Studies Program at Mannes College of Music”.
Në bazë të kësaj merite sot po punon si mësuese muzike e liçensuar në shtetin e Nju Xhersit. Mbijetoi duke vazhduar studimet edhe pse koha fluturonte…
Është e vetmja shqiptare që ka dhënë koncert në Carnegie Hall në New York, por mjerisht shumë media në Shqipëri ju bëjnë jehonë ahengjeve dhe muzikës tallava…
Ka bashkëpunuar ngushtë me artistë ndërkombëtarë.Si pjesë e Diasporës ka dhënë disa koncerte në disa festa të organizuara si nga gazeta “Illyria”, Motrat Qiriazi, Vatra, New York, Mass Besa, Holy Trinity Albanian Church në Boston etj.
Lindita eshte një mbështetëse krenare për popullin e Kosovës për të cilin ka dhënë koncert në Kombet e Bashkuara për të sensibilizuar botën.
Herën e fundit ke qenë për Shoqatën “Ana e Malit” në 100 vjetorin e Pavarësisë, por jo e fundit siç thanë organizatorët në Ditën e 7-8 Marsit ku mori çmimin e lartë të mirënjohjes nga kjo organizatë atdhetare. Ka kontribuar për Diasporën si dhe në programin artistik të Shkollës Shqipe “Alba Life” dhe koncertin klasik që u organizua në Manhattan që hapi siparin në 100 Vjetorin e Pavarësise, në Diaspore, organizuar nga TV “Alba Life” dhe nje grup artistësh me udhëheqës pianistin e talentuar, artistin Petrika Melo.
Të pranishmit kaluan një natë të këndshme në një të shtunë të bukur Maji, në muajin e trëndafilave dhe luleve me ngjyra marramendëse, gjithë aromë, si muzika dhe interpretimi që solli artistja e shquar shqiptare me origjinë nga Vlora Lindita Mezini Lole.

Staten Island,
New York, 2015