Kozeta Zylo – Dielli

Ismail Qemal Vlora ngriti Flamurin Kombëtar në mes të Staten Island, Nju Jork

June 5, 2023 by s p

Nga Keze Kozeta Zylo/

Në një të shtunë të bukur dhe historike në ishullin e Staten Island, New York, u mblodhën shqiptarët në ceremoninë zyrtare dhe festive në pagezimin e një rruge me emrin e burrështetasit të madh Ismail Qemalit. Ati i Pavarësisë së shtetit shqiptar u përjetësua në një rrugë në Sea View e cila pritet me “Father Capoddano” Bulevard.

Ndërsa shihja nga skena oqeanin, dallgët e tij dukej sikur sillnin këngën labe aq të njohur si: Cili je ti more burrë që na vjen nga Shqipëria/ Une jam Ismail Qemali/ mbrapa më vjen historia.

Të vish si Diasporë gjer në këtë ditë historike më duhet të pohoj si anëtare e grupit organizativ se nuk ka qenë aq e lehtë sa duket për nismëtarët atdhetarë si z. Naser Nika dhe

Dr. Bari Ceka, doktori i 27 mijë pacientëve, Këshilltarin e Bashkisë së Nju Jorkut David Carr. Ata bashkë me grupin organizativ ia arritën qëllimit, sepse emëruesi i përbashkët tek të gjithë shqiptarët dhe bij shqiptarësh është dashuria për Atdhe e për Flamur! Kur dëgjova se Ismail Qemal Vlora do të vendosej pranë Father Capoddano” Bulevard këu në Amerikë u magjepsa dhe lotova: sepse historitë për Atdheun janë si dy pika uji kudo në botë. Prifti At Capoddano u vra në një fushë beteje në Vietnam duke mbrojtur marinsat e Shteteve të Bashkuara. Në betejë dhe nën zjarr, u jepte kurajo nën stres të madh dhe në fund e vranë dhe vdiq me ta. Të dy burrat e mëdhenj At Capodanno me origjinë Italian dhe Ismail Bej Vlora vdiqën për trojet e tyre!

Programi artistik me përgatitje dhe udhëheqës nga z. Qemal Zylo u moderua plot profesionalizëm, kulturë, elekuencë në shqip dhe në anglisht nga zonja simpatike, gazetarja e njohur Kozeta Turishta dhe artisti plot të ardhme Bledar Maqellara.

Ceremoninë dhe këtë ditë historike e bekoi Imam Tahir Kukaj i cili është zgjedhur si përfaqësuesi kryesor i detyrave islame në policinë e Nju Jorkut ose siç njihet ndryshe NYPD Muslim Chaplin.

Përshëndetën Kryegjyshi Botëror i sektit të Bektashinjve Haxhi Dede Edmond Brahimaj.

Dy Hymnet Kombëtare: Amerikan dhe Shqiptar u interpretuan në shqip nga sopranoja e shquar Dëshira Ahmeti Kerliu që ka debutuar me koncerte në skena të ndryshme të botës dhe drejtuese e programit artistik për Alba Life. Hymni Amerikan u interpretua nga Dea Kërliu nxënëse në La Guardia një nga shkollat më të njohura në botë për art dhe muzikë. Hymnet u shoqëruan me parakalimin e punonjësve te polisicë së NY-ut, American Albanian Law Enforcement Association, me president z. Elton Shametaj.

Në fillim përshëndeten nismëtarët si z. Naser Nika dhe Dr. Bari Ceka, Këta dy zotërinj bënë të mundur që kësaj rruge në Staten Island, New York t’i vendoset emri: ISMAIL QEMALI.

I ftuar i nderit ishte Nipi i Ismail Qemalit që kishte ardhur nga larg Qamil Vlora i cili u mirëprit me plot emocion nga pjesëmarrësit.

Pjesëmarrësit i përshëndetën gjithashtu Ambasadore e Republikës së Shqipërisë në Washington Floreta Faber, Z. David Carr këshilltari i shtetit të Nju Jorkut i cili bëri të mundur ligjerisht t’i vendoset emri kësaj rruge, Kryetari i Bashkisë së Prishtinës arkitekt Përparim Rama, Vito Fosella President i Staten Island.

Në emër të Vatrës përshëndeti Z. Elmi Berisha Kryetari i Federatës PanShqiptare Vatra, organizates më të Vjetër shqiptare dhe më jetë gjatë.

Z. Dritan Matraku, kryetari i Shoqatës Bijtë e Shqipes përshëndeti në emër të saj.

Diskutante të tjerë ishin Kozeta Zylo, Dr. Paulin Marku.

Z. David Carr iu dha mirënjohje kryetarëve të Komunave Malishevë e Skënderaj, Ekrem Kastrati e Fadil Nura. Njëkohësisht u vlerësuan si Dr. Bahri Ceka, Përparim Rama, Shpetim Qorraj, Hekuran Duka, Faik Nika, Kastriot Blakaj, Dash Miftari, Agim Kotaj, Ruki Hajdari e shumë të tjerë.

Ndër personalitetet e shquara ishin Xhim Xhema, kryetar shoqatash, aktivistë të shumtë, media si gazeta Dielli me editor Sokol Paja, Botuesi i gazetës “Illyria” Vehbi Bajrami së bashku me bashkëshorten e tij menageren e gazetës zonjën e nderuar Gena Bajrami.

Politikanë të shumtë morën pjesë dhe përshëndetën si: Kongresistja Nicole Malliotakis, Prokurori i Qarkut të Richmond County z.Michael E. McMahon, znj.Kamilla Hanks, Sam Pirozzolo etj.

Vito Fosella Presidenti i Staten Island vendosi partneritet mes Staten Island dhe Komunës së Prishtinës. Zoti Fosella nderoi z. Përparim Rama me Proklamatë vlerësimi.

Përshëndetje e veçantë erdhi nga kryeministri i Kosovës z.Albin Kurti.

Aktorët e mirënjohur shqiptare si Shaban Lajqi, Tom Gjergji, Agim Rugova, interpretuan “Shpallja e Pavarësisë”, në nderim të figurës së ndritur të Kombit Ismail Qemali, Isa Boletini dhe Luigj Gurakuqi.

Të pranishmit u argëtuan me një program të pasur të nxënësve të Shkollave Shqipe “Alba Life” Ambasador i Kombit si me këngën “Do të rrojë Shqipëria dhe me, Vallja e Tropojes, Vallja e Tiranës, Vallja e Bariut përgatitur nga mësueset e shkollës, nxënës të talentuar dhe stafi si: znj. Elona Shkreta, Entela Muda, Anxhela Alushaj, Fatlinda Gashi, Gela Bulku, Mehrije Shala, Kade Lajqi, Edona Gjidija, Erlinda Shala dhe Kaltrina Gecaj.

Me duartrokitje u mirëpritën Ansambli Autokton Rugova.

Zbulimi i emrit të rrugës Ismail Qemali ishte momenti i shumëpritur nga të gjithë dhe me emocion të papërshkrueshëm shihnim të shkruar emrin e Atit të Pavarësisë ISMAIL QEMALI.

Të pranishmit u argëtuan me artistët shqiptarë si: Entela Ilirjani e cila përshëndeti dhe në emër të superyllit shqiptar Ylli Baka. Artistët interpretuan plot pasion dhe dashuri këngë nga trevat shqiptare. Ata ishin: Valbona Peraj, Agim Gërbeshi, Entela Ilirjani, Ilsi Ademi, Arbërije Hadërgjonaj, Agron Maqellara, Valdet Luka, Dëshira dhe Arian Kërliu, Besim Murriqi, Flamuri Bicaku, Rati, Hejdi Mehmeti, Greta Tafa, Sead Asllani, Evelina Shabani, nën shoqërimin e

DJ Fati Doda.

Ne u gëzuam së bashku dhe kaluam një ditë të paharruar si motra dhe vëllezër shqiptarë, këtu ku na kanë hedhur fatet në emigracion dhe që na lidh të gjithëve së bashku Kombi dhe Gjuha Shqipe, “Ashti i Kombit”. Na mblodhi në këtë folezë të argjendtë shqiptare Ismail Qemal VLORA Ati i Pavarësisë së Kombit Shqiptar.

Duke pare emrin e rrugës “Ismail Bej Vlorës” s’mund të më hiqeshin nga mendja fjalimi i Atit të Pavarësisë në Ditën e Shpalljes së saj në Vlorë si dhe vargjet e popullit për Vlorën aty ku u ngrit Flamuri si: “Vlorën edhe Vlorën thelp e kam në zemër/ Ditën e kam Dritë, natën e kam Ëndërr.

Zoti e bekofte Amerikën që na jep mundësi të pashoqe dhe të krenohemi për shtepinë tonë të dytë!

Ta gëzojmë Rrugën “Ismail Qemali” në Amerikë!

Ceremonia u filmua nga TV “Alba Life” themeluar nga Qemal Zylo me bashkëpunëtorët gzetarin e njohur Valon Gërbeshi, Valon Dervishi dhe u morën intervista nga zonjusha simpatike Kendra Duli që do të transmetohen së shpejti në kanalet televizive.

3 Qershor, 2023

Staten Island, New York

Memoriali në dy kartolina gjigande që mban 274 viktima nga 11 shtatori i zi

April 12, 2023 by s p

Nga Keze Kozeta Zylo/

None of us will ever forget this day. Askush nga ne nuk do ta harrojë kurrë këtë ditë.

George W. Bush, 43rd U.S. President

Në çdo 11 Shtator Amerika përkujton me dhimbje tragjedinë më tronditëse që ndodhi në zemër të botës, në Manhattan, të shkaktuar nga terroristët botërorë. Por kjo datë nuk është e thënë të përkujtohet vetëm në atë ditë, unë bashkë me Qemalin shkuam t’i përkujtonim sot në parkun përballë Oqeanit Atlantik në Staten Island në një ditë pushimi.

Heronjtë frymëzojnë në çdo kohë ngase janë të pavdekshëm.

Këtë vit është 22 vjetori i përkujtimit. Më 11 shtator katër avionë u rrëmbyen nga grupi radikal Al Kaeda dhe shkrumbuan dy kullat binjake qendrat më të mëdha tregëtare botërore.

Tremijë njerëz u dogjën, vdiqën atë ditë, midis tyre më shumë se 400 punonjës të urgjencës.

Skulptorët e memorialeve i kanë ndërtuar nga dëshira për të krijuar një vend që lidh të gjitha viktimat me ne.

Memoriali ne Staten Island në nderim të viktimave është konceptuar si dy kartolina gjigande, që simbolizojnë komunikimet private mes të dashurve. Ato janë kartolina të palosura për të pasqyruar mesazhet që janë personale dhe cilësia e saj abstrakte formale i frymëzon njerëzit që të gjejnë kuptime të ndryshme në të.

Muret janë vendosur në mënyrë simetrike në parkun përballë ujit, duke inkuadruar boshtin e pamjes që dikur lidhte komunitetin dhe Kullat Binjake përgjatë portit. Ato hapen drejt ujit në plan dhe drejt qiellit në lartësi, duke krijuar një hapësirë me një ndjenjë privatësie dhe çlirimi brenda sferës publike.

Çdo qytetar i Staten Island qe ka humbur jetën në këtë ditë të zezë nderohet në mure me siluetën e profilit, emrin dhe faktet e tjera në pllakën e granitit 9″x11″. Boshtet e dritës të futura pas çdo profili krijojnë thellësi dhe lëvizje, duke lejuar gjithashtu që dritat natyrore dhe ndriçuese të kalojnë për të nxjerrë në pah siluetat e tyre. Të gjitha profilet shikojnë përtej portit drejt vendit të WTC, Kullave Binjake, si kujtues paqësor të së kaluarës dhe shpresës për të ardhmen.

Siluetat janë të gjitha në të njëjtin drejtim, drejt Ground Zero. Ndërkohë gjithmonë në lëvizje është anija, Ferri me Staten Island dhe Manhattanin që i ndan uji në mes. Nga larg i përshëndet me dorën e bekuar, flakadanin, Statuja e Lirisë, Lirinë që aq shumë e ëndërrojnë miliona njerëz në botë.

Duke qëndruar përballë tyre në heshtje, një paqe e përzjerë me nota trishtuese, efekti i qëndrimit midis mureve ishte mjaft i fuqishëm. Si qenie humane ajo që na ndan nga kaosi,nga antihumanët që mjerisht ka plot, është aftësia jonë për të vajtuar dhe respektuar njerëzit që nuk i kemi takuar kurrë, por respektojmë heroizmin e tyre. Nëse nuk mësojmë asgjë tjetër nga kjo tragjedi, duhet te mësojmë se jeta është e shkurtër dhe nuk ka asnjë sekondë për urrejtje.

Ata rrinë të heshtur përballë kullave, ku njera është ringritur përsëri madhërishëm çka të kujton vargjet e poetes së famshme botërore Maya Angelou e cila shkruan si: “Njësoj si Dielli, njësoj si Hëna/ Në baticat në harmoni/ Njësoj si shpresa që çohet lart/ Unë do ngrihem përsëri…”

Sulmi mbi kullat shkaktoi djegie dhe shkatërrim kaq masiv saqë pak mbetje të identifikueshme u gjetën për varrim. Ndoshta 60 për qind e atyre njerëzve, profili i të cilëve është këtu, të afërmit e tyre, të dashurit e tyre, nuk morën eshtra. Këtu janë varrezat përkujtimore të tyre.

Është një memorial i përhershëm që nderon 274 banorët e Staten Island të vrarë në sulmet e 11 shtatorit të vitit 2001 dhe në bombardimin e Qendrës Botërore të Tregtisë në vitin 1993 dhe eshte ndërtuar në vitin 2004.

Këtu janë policë dhe zjarrfikës që iu bashkuan përpjekjeve të shpëtimit dhe u vranë, kur kullat u shembën, dhe një pasagjer në fluturimin 93 të United Airlines, i cili vdiq në përplasjen në Shanksville, Pensilvani. Përfaqësohet gjithashtu një individ që u vra në bombardimin e Qendrës Botërore të Tregtisë në vitin 1993.

Ishte nder për ne qe ndodheshim përballë në nderim të veprës së tyre përjetësuar në Memorialin i cili qëndron madhërishëm në dy kartolina gjigande që mban 274 viktima nga 11 shtatori i zi dhe në bombardimin e Qendrës Botërore të Tregtisë në vitin 1993 në bregdetin e “Shën Gjergjit”.

11 Prill, 2023

Staten Island, New York

Lamtumirë Blerina Bardhok Loka -Lamtumirë Blerina Jonë

March 2, 2023 by s p

Nga Keze Kozeta Zylo/

Vdekja jote më la nje boshllëk në zemër, por ajo do të mbushet me dashurinë që ndamë u shpreh bashkëshorti i saj Lekë Preçi.Me dhimbje dhe lot në sy e morëm lajmin e trishtë nga Marko Kepi për ikjen e parakohshme të mikes sonë Blerina Bardhok Loka. Komuniteti Shqiptar në New York dhe më gjerë u trondit thellë nga ikja e parakohshme e Blerinës e cila e la jetën e saj përgjysmë në moshën e trëndafiltë, 36 vjeçe.Shoqata Shqiptaro Amerikane “Skënderbej” Inc. anëtare e së cilës është prej vitesh, ndërsa bashkëshorti i saj Lekë Preçi është n/kryetar, me lot ne sy e pritën vdekjen e saj. Lekë Preçi bashkëshorti i saj, kur vajtëm në spital me Qemalin në Manhattan këto ditë tek Blerina për ta vizituar, më tregoi se e dinte që ishte e sëmurë që kur u martuan në Itali, më 2014, por dashuria dhe sinqeriteti i saj triumfoi mbi të keqen. Ne e jetuam jetën të dy si bashkëshort, sepse ajo e donte jetën me shpirt, e donte familjen, e donte Amerikën. Unë pashë tek ajo magjinë e shpirtit të kristaltë, bukurinë e sjelljes dhe më bënte që të mos i ndjeja kurrë sakrificat. Ajo që më dhëmb në shpirt ( ndërkohë ndalon dhe ngashëehet në lot) është princesha Altea se do të rritet pa nënë. Sa e dobët ishja përballë kësaj situate, por natyrshëm mora forcë pë t’i dhënë kurajo, për t’i qenë pranë familjes në këto momente duke i thënë se Altea ka një baba që do t’i jetë pranë gjithë jetën e saj. Ajo e kishte ëndërr tha Leka që vajza jonë princesha Altea të lindte në Amerikë dhe e realizuam. Ajo u kurua në spitalet më të mira në botë. Amerika ia zgjati jetën, ndërkohë që në Shqipëri dhe Itali i kishin dhënë shumë pak vite shpresë. Sa herë e takoja shihja tek Blerina se kishte një sens humori dhe paqe në sytë e saj të mëdhenj dhe të bukur. Kur ai fliste për virtytet e mrekullueshme të Blerinës, i thashë nuk më duket çudi Lekë, ngase ajo është mbesa e Zef Lokës, një nga burrat e rrallë dhe shumë finsik që kam njohur. Është shumë e dhimbshme të shikoje Nënë Davën duke i ndenjur tek koka ardhur enkas nga Shqipëria për të qenë pranë ditëve të fundit të saj, apo vëllain Ndrecën i cili nuk pushonte së gëlltituri lotët e tij. Ndërkohë telefonatat binin papushim si psh e vëllait të saj Gjovalinit nga Tirana i cili po bëhej gati për të ardhur në New York. Çfarë situatash të dhimbshme sheh dhe që nuk ke si i mposht, por ja duke qenë bashkë tha Mark Qehaja kryetar Nderi pranë kësaj shoqate dhe duke ngushëlluar njeri-tjetrin dhimbjet bëhen dhe më të lehta. Blerina iku në muajin e çeljes së gjethit, në muajin e pranverës, në muajin që do të blerojnë fushat, pemët, ashtu siç kishte emrin e blertë. Ajo lindi, më 5 Maj 1986 në Fan të Mirditës dhe mbaroi sot, më 1 Mars, 2023, në New York. Ajo është bijë e Fanit të Mirditës dhe shkollën e mesme e ka kryer atje, ndërsa më vonë jetoi në Tiranë, Itali dhe New York. Që nga viti 2015 ajo është banore e Nju Jorkut bashkë me Lekën i cili ka hapur një kompani ndërtimi dhe është I suksesshëm. Ajo la pas vajzën e saj Altea e cila e rriti plot pekule nëne. Altea është 8 vjeçe dhe jetoftë sa malet e Shqipërisë.Blerina dha frymën e fundit në spital në Manhattan, në “Memorial Sloan Kettering Cancer Center”, rrethuar nga bashkëshorti i saj Leka, nënë Dava, vëllezërit Gjovalini dhe Ndreca, motra Diana, dhe dy kunatat e saj Martine dhe Tone. Humbja e një bashkëshorteje është një nga dhimbjet më të vështira emocionale që një person duhet të durojë, por gjen ngushëllim kur kujton jetën e bukur që ka kaluar dhe pasurinë e patundshme që i ka dhuruar si princeshën Altea.Dashuria e Blerinës është gjithmonë me Altean e saj. Humbja e nënës është një nga dhimbjet më të thella që një zemër mund të njohë. Por mirësia, kujdesi dhe mençuria e saj do te jetojnë – si një trashëgimi dashurie per Altean dhe Lekën. Të qoftë dheu i lehtë Blerina jonë!Drite të pastë të shpirti në Parajsë atje ku ke vendin nuse e bukur dhe e blertë!1 Mars, 2023Staten Island, New York

Konsulli i Përgjithshëm i Kosovës në New York Ambasador Reka organizoi pritje madhështore për 15 Vjetorin e Pavarësisë së Kosovës

February 20, 2023 by s p

Nga Keze Kozeta Zylo/

Në mjediset e ngjyrave blu dhe te florinjte, simbolet e Flamurit të shtetit të Kosovës në Kimberli Hotel, Konsulli i Përgjithshem i Republikës së Kosovës në New York, Ambasador Blerim Reka organizoi një pritje madhështore për 15 vjetorin e Pavarësisë së Kosovës.

Në këtë natë të shndritshme të Kosovës në Manhatan në kryeqendrën e botës u mblodhën shqiptarët e Diasporës, biznesmenë të suksesshëm me shumë kontribute për Kosovën, diplomatë, politikanë të lartë amerikanë, ambasadorë të shteteve anëtare të OKB-së për të nderuar Kosovën martire, Kosovën e Shqipërisë etnike.

Që në hyrje të mirëprisnin cifti simpatik me buzëqeshjen e trëndafiltë mësuese Vlera dhe Luan Thaqi, diplomati Fatmir Zajmi dhe gjithë stafi. Tingujt e violinës dhe të pianos të interpretuara mjeshtërisht nga Margaret Radovani dhe Erga Halilaj mbushnin atmosferën dhe e bënin më të këndshme dhe më të bukur këtë mbrëmje festive.

Mbrëmja filloi me egzekutimin e Himnit shtetëror të Kosovës dhe Amerikës.

Konsulli i Përgjithshem i Repbulikës së Kosovës në New York Ambasador Reka përshëndeti të gjithë të pranishmit dhe iu uroi atyre: Gëzuar 15 Vjetorin e Pavarësisë së Kosovës! Fjala e tij që kishte në thelb sakrificat e themelimit të shtetit të Kosovës, gjakun e UÇK-së -së, gjakun e popullit lumë nga kucedra serbe si dhe mirënjohjen për Amerikën u mirëprit me duartrokitje dhe plot dashuri për Kosovën.

Nderonte me pjesëmarrjen e saj Ambasadorja Lisa Carty, përfaqësuese e SHBA-së në ECOSOC në OKB dhe përshëndeti të pranishmit me plot dashuri dhe premtim.

Në këtë ceremoni nderonte gjithashtu Ansambleisti Charles Fall i cili përfaqëson Distriktin e 61-të të Asamblesë së Nju Jorkut dhe që mbulon Bregun Verior të Staten Island, ku ai ka banuar gjithë jetën e tij. Asambleisti Fall është anëtari i parë mysliman dhe afrikano-amerikan i Asamblesë i zgjedhur nga Staten Island.

Asambleisti Fall vleresoi me pllakatë mirënjohjeje me rastin e 15 Vjetorit të Pavarësisë së Kosovës Ambasadorin Blerim Reka.

Ambasadori Reka ishte nën shoqërimin e bashkëshortes së tij, pedagoges Ymrane Reka, diplomates Teuta Hyseni dhe gjjithë stafit të Konsullatës së Përgjithshme që punojnë me përkushtim dhe profesionalizëm për Kombin.

Ishte një natë festive, një natë e shenjtë kombëtare për të festuar 15 Vjetorin e Pavarësisë së Kosovës. Në mendje s’më hiqeshin vargjet:

Atdhe, Zoti im,

Edhe pse larg, vetëm tek ty përkundem me ninulla,

Në të vetmin djep me shqiponjë gdhendur,

Me emrin Kosovë, me emrin Shqipëri!

Gëzuar perjetësisht!

TV “Alba Life” po transmeton në kanalet televizive 27 në paketën digitale TV “Alb” kronikën e përgatitur enkas për këtë aktivitet të rëndësishëm për Diasporën.

Photo Credit: Amir Suka AlbaPro dhe Alba Life

17 Shkurt, 2023

Manhattan, New York

Koncert Madhështor për festat e fundvitit nga Shkollat Shqipe “Alba Life” Ambasador i Kombit

December 19, 2022 by s p

Nga Keze Kozeta Zylo/

Në një ditë të dielltë me pak thëllim të ftohtë Shkollat Shqipe “Alba Life” Ambasador i Kombit që operojnënë në të gjitha lagjet e Nju Jorkut u mblodhën për të dhënë koncertin tradicional të fundvitit 2022. Nxënësit u mblodhën si bletët punëtore rreth kosheres që bën mjaltë, rreth familjes së madhe shqiptare “Alba Life”.

Mësuesit prindërit, nxënësit erdhën plot dashuri dhe gëzim për të festuar këtë ditë nga më të bukurat dhe me plot kuptim për fëmijët e tyre dhe për Kombin. Bota e fëmijëve është e jashtëzakonshme, e pastër si ujët e bjeshëve dhe për këtë ajo vazhdon të më magjeps dhe të më jap energji të pashtershme. Asnjë punë në këtë botë nuk bëhet vetëm, prandaj së bashku me mësueset dhe gjithë ekipin e Alba Life është arritur një sukses i dukshëm dhe meritor.

Në këtë koncert nderoi me pjesëmarrjen e saj Konsullja e Republikës së Shqipërisë në New York zonja Valentina Loka. Zonja Loka falënderoi të gjithë të pranishmit, mësuesit, prindërit, nxënësit themeluesin z.Qemal Zylo dhe të gjithë kontribuesit në këtë Mision Kombëtar. Ajo tha se Gjuha Shqipe është indentiteti Kombëtar, prandaj duhet ta mësojmë, ushtrojmë dhe të vazhdojë ndër breza.

Programi tejet i pasur me larmishmëri në interpretime poezish, këngësh dhe vallesh shqiptare tregonte qartë për profesionalizmin dhe pëkushtimin e mësuesëve.

Programi u drejtua nga Artistja e shquar e Kombit, Dëshira Ahmeti Kerliu. Sopranoja e mirënjohur e drejtoi me plot kulturë, profesionalizëm, art dhe elegancë. Elekuenca e saj në të folur i jepte dhe më shumë hijeshi dhe klas programit artistik. Ajo tha se kam dhënë koncerte në shumë skena të njohura kombëtare dhe botërore, por kur vijë pranë nxënësve të Shkollës Shqipe “Alba Life” e kam ndër më të vecantën, më emocionuese dhe më të dashurën, sepse vijë pranë nxënësve, pranë Gjuhës Shqipe.

Programin e Shkollës Shqipe në Staten Island e drejtoi mësuesja plot pëvojë, dashuri dhe përkushtim Entela Muda. Mësuese Muda tha se Shkolla Shqipe në Staten Island është fidanishtja e parë e shkollave Shqipe “Alba Life”. Këtu filloi për gati 16 vjet më pare mësimi shqip, themeluar nga z.Qemal Zylo dhe familja e tij, i cili është dekoruar me titullin e lartë “Urdhri i Flamurit” dhënë nga Presidenti i Republikës së Shqipërisë.

Ne e urojmë themeluesin e Shkollave Shqipe z. Qemal Zylo dhe familjen e tij që e ka mbajtur me kaq jetëgjatësi, me profesionalizëm dhe plot sukses këtë Shqipëri në Amerikë.

Në fund të programit z.Zylo falënderoi përzemërsisht Konsullen e Përgjithshme të Republikës së Shqipërisë znj. Valentina Loka pë mirëseardhjen e saj dhe në emër të bordit i shprehu mirënjohjen e pakufishme. Falënderoi me plot respekt të gjitha mësueset që punojnë aq fort për të ardhur në këtë mision Kombëar. Ato harxhojnë, kohë, energji për t’ju mësuar fëmijëve Gjuhën Shqipe që është dhe identiteti ynë. Duke i falënderuar publikisht ai i ftoi në skenë të gjitha mësueset të kualifikuara të cilat janë licensuar nga shteti amë si mësuese, apo dhe asistente, ato janë: Entela Muda, Elona Shkreta, Anxhela Alushaj, Gela Bulku, Edlira Teferici, Jonida Alla, Vjollca Skënderi, Mehrije Shala, Kade Lajqi, Vjosa Gruda, Davida Hasanaj, Merita Efndija Sinanaj, Dr. Manjola Duli.

Pas koncertit të pranishmit u argëtuan me këngë e valle të traditës nën kujdesin e Dr. Valbona Zylo Watkins.

Aktiviteti u filmua nga Todd Watkins anëtar i stafit të TV “Alba Life” dhe në bashkëpunim me zonjushen simpatike Kendra Duli morën intervista rreth aktivitetit madhështor.

Koncerti se shpejti do te transmetohet ne kanalet televizive.

Programi artistik

Koncerit u hap me këngën: “Ty Flamur të duam shumë” nën dirigjimin e sopranos së shquar Dëshira Ahmeti Kërliu.

Nxënësit e Shkollës Shqipe ne Bronx të përgatitura nga mësuese Mehrije Shala, Kade Lajqi Vjosa Rraci, Davida Hasanaj dhe Merita Efendija Sinanaj sollën një program me këngë, valle dhe recitime. Mësimi në këtë shkollë zhvillohet në mjediset e Qendrës “Illyria” siguruar nga z.Mark Gjonaj Nderi I Kombit. Kjo shkollë ka një sukses të madh dhe vazhdon të jetë në rritje të vazhdueshme, fal punës së mësuesëve.

Programi vazhdoi me Marshin e UCK-së nga Diellor Lajqi, i cili pati shumë sukses.

Kori këndoi Gjuha Shqipe Gjuha onë nën dirigjimin e artistes Kërliu.

Dua Cipa interpretoi: “S’ka si ty”, poezi për Gjuhën/ Eliona Shala, Mërgimtari/

Mikail dhe Apollonia Saiti: Flamuri kuq e zi/ Ilirida Lajqi: Flamuri/ Hana Osmani: Gëzuar Vitin e Ri/ Nina Gjonbalaj: Po vjen Viti I Ri/ Eliona Shala: Babagjyshi.

Në Queens, nxënësit ishin përgatitur nga mësuese Vjollca Skënderi.

Klesta Xama: interpretoi “Vjeshta”.

E vecanta në këtë aktivitet ishte se kishin ardhur nxënës që zhvillojnë mësimin në Online nga mësuese Gresila Basha. Shkolla Shqipe “Alba Life” Ambasador i Kombit ishte e vetmja shkollë në Diasporë që e hapi e para mësimin në Online dhe i bëri sfidë pandemisë botërore. Që prej atij viti të tmerrshëm ne e kemi vazhduar mësimin në Online. Nxënësit që kishin ardhur nga larg ishin: Alexa Ziko “Flamuri”/ Anna Gaffar: Jam shqiptare/ Ian Kulla “Fjalët e qiririt”, Naim Frashëri/ Isabela Bala “Sa të dua o Shqipëri” Asdreni

Nxënësit në Brooklyn ishin përgatitur nga mësueset Edlira Teferici, Jonida Alla dhe për programin artistik nga Gela Bulku.

Ata ishin Aria Stoja “Gjuha Jonë’’/ Rei Musta Vitin e Ri dhe për Nënën Shqipëri/ Ergis Capo poezi për Vitin e Ri.

Kënga Rroftë Shqipëria u këndua mjeshtërisht nga Altea Bala dhe Kelvin Rustani

Altea Bala: “Ja na erdhi Viti i RI”/ Anja Kojku: “Gjuha jonë“/ Delfi Zeqo: “Erdhi Dimri në qytet”/ Enzo Rustani: “Festat“/ Jori Lamçe: “Fjala është e vogël shumë” Odhise Grillo/ Ersijona Gjapi “Ti Shqiperi me ep nder”/ Kelvin Rustani: “Bagëti e Bujqësi”

Në Staten Island nxënësit ishin përgatitur nga mësueset: Entela Muda, Anxhela Alushaj dhe Elona Alikaj. Poezi kushtuar Atdheut dhe Vitit të Ri. London Skara/ Amina Duka vjersha Mirë se erdhe Vit i Ri/ Ema Martini dhe Klea Martini – poezia Atdheu. Bora Alikaj – Thënie. Rayan Leka – vjersha Babagjyshi/ Emma Watkins: Cili je ti more burrë?

Dea Watkins: Gjuha Shqipe nga Gjergj Fishta. Nxënësja e talentuar Laura Leka luajti në piano.

Kori i Shkollave Shqipe interpretoi këngën tradicionale: “Ja na erdhi Viti I Ri”.

Vallet e bukura u intepretuan nga nxënës të Shkollës Shqipe në Brooklyn të cilët ishin të veshur me kostumet kombëtare dhuruar nga zonja e nderuar Lindita Pira.

Ata interpretuan: Vallja kosovare. Ndërsa nxënësit në Staten Island intepretuan: Vallja e Tiranës. Programi u mbyll me “Vallja e Bariut” nga nxënësit e Shkollës Shqipe në Brooklyn përgatitur plot kujdes dhe profesionalizëm nga znj. Gela Bulku e cila në këtë koncert ndihmoi me dy valle.

17 Dhjetor, 2022

Staten Island, New York