-Kryeministri Isa Mustafa: Ministrat dhe deputetët serbë kosovarë duhet t’i përfaqësojnë interesat e qytetarëve të Kosovës, e jo politikat e një shteti tjetër/

-Qeveria e Kosovës mbledhje dhe konferencë shtypi të fundvitit, edhe me bilanc ndryshimesh/PRISHTINË, 28 Dhjetor 2016-Behlul Jashari/ Ministrat dhe deputetët serbë kosovarë duhet t’i përfaqësojnë interest  qytetarëve-serbëve të Kosovës, e jo politikat e një shteti tjetër, Serbisë, tha kryeministri Isa Mustafa sot në konferencën për shty të fundvitit, ku ka folur edhe për ndryshimin më të ri në qeveri shkarkimin e një ministri serb dhe emërimin e një ministrje serbe.Në 16 dhjetor, kryeministri i Kosovës shkarkoi Lubomir Mariçin nga detyra e ministrit të Administrimit të Pushtetit Lokal dhe njëkohësisht emëroi në këtë detyrë Mirjana Jevtiçin, e cila deri tani ishte zëvendësministre e Punës dhe Mirëqenies Sociale.“Këto vendime janë marrë me propozimin dhe në konsultim me përfaqësuesit e Listës Serbe në Kuvendin e Kosovës”, theksonte njoftimi nga Kryeminsitria, ndërkohë që nga një pjesë e  Listës Serbe në institucionet kosovare dhe nga zyrtarë në Beograd pati reagime kundërshtimi.Ministrja Jevtiç mori derisa prej më shumë se dy muajsh, nga 9 tetori 2016, Lista Serbe kishte deklaruar “ngrirjen” e pjesëmarrjes në qeverinë e Kosovës dhe në Kuvend, në kundërshtim të Ligjit për Trepçën, lidhur me të cilin iu drejtua edhe Gjykatës Kushtetuese, e cila në 31 tetor  shpalli vendimin se ky ligj është kushtetues. Kryeministri Mustafa sot në konferencën për shtyp tha se, sa i përket Listës Serbe, gjithnjë do angazhohem që të kthehet sa më shpejtë në Kuvend që të normalizohet puna e saj, që ministrat serbë t’i kemi në qeverinë e Republikës së Kosovës, por jo me çdo kusht individë të caktuar. “E, sa i përket ndryshimeve, Mariç është shkarkuar si ministër dhe shkarkimi i tij sa i përket këtij mandati është i përhershëm dhe në asnjë rast nuk do vie në shprehje që ne të pendohemi për vendimet, sepse nuk e kam pru vendimin që ta rikthej, por që ai të shkojë dhe më mos të kthehet, sepse nuk e ka merituar të jetë anëtar i qeverisë”, theksoi kryeministri Mustafa.Ai tha edhe se, sa i përket ministrave që emërohen është në vullnetin e tyre se a duan apo jo të jenë anëtarë të qeverisë, por edhe se nuk mund të qëndrojnë në qeveri nëse nuk e bëjnë punën si u takon.“Unë mendoj se ‘shkrirja’ dhe ‘ngrirja’ e pozitës së Listës Serbe është e pakuptimtë edhe për neve dhe poashtu nuk është në interes të tyre. Një shkas që ata e kanë shfrytëzuar ose e kanë marrë si motiv për ta ‘ngrirë’ aktivitetin ka qenë Trepça, Ligji për Trepçën, por unë kam konsideruar dhe konsideroj se është nga ligjet më të mira, ofron zgjidhje afatgjate, stabilitet për punëtorët shqiptarë e serbë dhe për herë të parë i bën punëtorët bashkëaksionarë të një koorporate”, u shpreh kryeministri i Kosovës.Ai theksoi se, serbët kosovarë duhet të kenë parasysh se ata duhet të shfaqin dhe të realizojnë interest e tyre në Kosovë dhe brenda Kosovës, jo që deputetët dhe ministrat serbë të realizojnë dhe përfaqësojnë në Kosovë politikat e pushtetit serb, sepse ne nuk do të pajtohemi në asnjë rast që këtu të përfaqësojnë politikat e një shteti tjetër, Serbisë, përmes përfaqësuesve të tyre në qeveri ose në Parlamentin e Kosovës.“Serbët mund t’i përfaqësojnë interest e tyre në Parlamentin e qeverinë Serbisë ata që jetojnë në territorin e Serbisë, ata që jetojnë në territorin e Kosovës duhet t’i përfaqësojnë interest e banorëve, qytetarëve të Kosovës në Parlamentin e qeverinë e Kosovës, qofishin ata shqiptarë, serbë, turqë, malazezë, boshnjakë, etj”, tha kryeministri MustafaPrandaj, vijoi kryeministri i Kosovës, në këtë aspekt pozicionimi i qeverisë së Beogradit është shumë i gabuar, është tepër destruktiv, është i papranueshëm.“Dhe, këte ne do t’ia bëjmë me dije edhe një herë Bashkimit Evropian që kemi të bëjmë me një qeveri dhe me një shtet, i cili nuk po i respekton marrëveshjet elementare që ne po i bëjmë, nuk është i interesuar të stablizojmë relacionet dhe të normalizojmë dhe çdo ditë po merr veprime të cilat e binë në pyetje seriozitetin e saj në dialog”, tha kreu i qeverisë kosovare.Kryeministri Mustafa sot mbajti një konferencë shtypi, ku shpalosi rezultatet e punës njëvjeçare të qeverisë që e drejton. “Unë vlerësoj se qeveria e Republikës së Kosovës ka arritur suksese të jashtëzakonshme, jo vetëm karshi situatës me të cilën jemi ballafaquar, por edhe karshi sfidave të cilat kanë qenë këtë vit”, theksoi ai.Këtë, vijoi kryeministri Mustafa, e mbështes në fakte, e mbështes në rritjen ekonomike më të lartë në rajon për dy vite me radhë, në buxhetin më të lartë në histori të Kosovës mbi 2 miliardë euro, në uljen rekorde të papunësisë nga 35 % në vitin 2014 në 26 % në vitin 2016, në nënshkrimin e MSA-së, në përmbushjen e kritereve dhe marrjen e rekomandimit për liberalizimin e vizave, në marrjen e kodit telefonit, në rritjen më të madhe të pensioneve dhe përkrahjes sociale që ka ndodhur ndonjëherë mbi 25 % deri në 70 %  për pensionet, në adresimin e çështjes së veteranëve e cila është zgjidhur pas 17 viteve, në anëtarësimin në UEFA dhe FIFA, në vlerësimet më të larta ndërkombëtare të FMN-së dhe Bankës Botërore lidhur me qëndrueshmërinë makroekonomike dhe buxhetore.“Por, konsideroj se një prej sukseseve është që kemi demonstruar stabilitet institucional e shtetëror dhe lidership politik për të mos lejuar zhytjen e vendit në kaos dhe anarki”, theksoi kryeministri i Kosovës.

Qeveria e Kosovës e kryeministrit Isa Mustafa zhvilloi sot edhe mbledhjen e 55-të të rregulltë në vitin 2016, të 123-tën që nga zgjedhja në dhjetorin e para dy viteve, ku miratoi vendime nga fusha e përgjegjësive kushtetuese dhe ligjore.Qeveria e Kosovës, e koalicionit të dy partive më të mëdha, PDK e LDK, ku përfshihen edhe parti të vogëla dhe minoritetet, është zgjedhur në 9 dhjetor 2014 në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit. Mbledhja e parë e kësaj qeverie është mbajtur në 12 dhjetori 2014.Qeveria e Kosovës e kryeministrit Mustafa gjatë dy viteve dhe në fillimin e vitit të saj të tretë ka pasur edhe ndryshime tjera, para shkakrimit e emërimit të fundit në këtë dhjetor, në përfaqësimin e komunitetit serb.Ndryshimi paraprak ndodhi në 27 tetor 2016, kur në postin e zëvendëskryeministrit në qeverinë e Kosovës është emëruar Ramiz Kelmendi, i cili sapo kishte kaluar në LDK derisa ishte deputet një kohë pa grup parlamentar, po me mandat të fituar si kandidat i PDK.Në 9 shtator dha dorëheqjen ministri i Integrimeve Evropiane, Bekim Çollaku, për të shkuar në kabinetin e Presidentit të Republikës. Ministria e Integrimeve vazhdon të jetë pa ministër.Më herët, në mbledhjen e qeverisë, në 25 gusht, kryeministri ka njoftuar lirimin nga detyra e zëvendëskryeministrit të Kujtim Shalës, me kërkesën e tij, që t’i përkushtohet tërë kohën Ministrisë së Kulturës, Rinisë dhe Sportit, ku është ministër.Gjatë kësaj kohe në qeverinë Mustafa ka pasur edhe disa ndryshime tjera dhe më i rëndësishmi ishte dorëheqja e zëvendëskryeministrit të parë e ministrit të Jashtëm, Hashim Thaçi, pasi në 26 shkurt 2016 u zdhodh President i Republikës në një seancë të jashtëzakonshme të Kuvendit të Kosovës.Në qeveri, në vend të Thaçit, në pozitën e zëvendëskryeministrit të parë u emërua Hajredin Kuçi, e në vend të tij në krye të Ministrisë së Drejtësisë u emërua Dhurata Hoxha, ndërsa ministër i Jashtëm u emërua Enver Hoxhaj.Në qershor 2016, kryeministri Mustafa e ka liruar nga detyra ministrin e Mjedisit e Planifikimit Hapësinor, Ferid Agani, me kërkesën e tij “deri në momentin e shpalljes së pafajësisë së plotë” pasi prokuroria kishte ngritur aktakuzë për korrupsion ndaj 64 personave, ku përfshihej edhe ai. Ushtruesi i detyrës së ministrit të Mjedisit e Planifikimit Hapësinor aktualisht është Ferat Shala, që ishte zëvendësministër.Ndryshimi i parë në qeverinë Mustafa u bë më pak se dy muaj pas zgjedhjes së saj në Kuvendin e Kosovës. Në 3 shkurt 2015 kryeministri i Kosovës shkarkoi ministrin serb për Komunitete dhe Kthim, Aleksandar Jablanoviç, pasi deklarata e tij ku protestueset në Gjakovë, familjare të personave të zhdukur gjatë luftës, i kishte quajtur “egërsira” shkaktoi shumë reagime dhe protesta, madje edhe të dhunëshme. Dalibor Jevtiç, po nga Lista Serbe,  u emërua në pozitën e ministrit për Komunitete dhe Kthim në 24 prill 2015, pasi  serbët i dhanë fund bojkotit institucioneve kosovare  që po vazhdonte në muajin e tretë si reagim kundërshtimi pas shkarkimit të ministrit Jablanoviç.