Lamtumira e fundit – Dielli

IU DHA LAMTUMIRA ATDHETARIT, BAMIRËSIT, “AMBASADORIT” TË NËNË TEREZËS, LEKË GOJÇAJ….

August 7, 2020 by dgreca

NGA DALIP GRECA-*

Shkoi të pushojë atdhetari i përkushtuar Lek Gojçaj. Shqiptaro-amerikanët ia dhanë të gjithë respektin që meritonte. Kisha po ashtu. Po shtetet shqiptare sa e vlerësuan? Njeriu që së bashku me vëlla, sponsorizoi dhe vendosi shtatoret e Shënjtëreshësh Nënës TEREZË në Trojet Shqiptare,njeriu që dhuroi shtatoret e argjendta për Vatikanin(Papen) dhe Washingtonin, kongresmenëve e senatorëve, për t’i afruar ata më shumë më Kombin e Nënë Terezës, nuk u vlerësua nga shtete shqiptare as me dekoratën që mbanë emrin e shenjtëreshës ”Nënë Tereza”,-ndërkohë që patriotë të dyshimtë u ngjitën deri në titujt dhe urdhërat më të lartë, që mbajnë emrin e heroit kombëtar , tituj e urdhëra kalorësie, Nder e Flamur… etj….!Natyrisht se të turpëruar mbeten shtetet shqiptare, Jo Leka.Ai shkoi me nder e respekt edhe pa dekorimet e merituara!

Komuniteti shqiptaro-amerikan e ka nderuar me plot respekt patriotin me sjellje e bëma fisnikërije Lekë Gjeto Gojçaj, i cili ndërroi jetë me 4 gusht 2020. Të Enjten me 6 gusht, edhe pse në kushtet e rrepta të diktuara nga Pandemia e koronavirusit, me rregulla strikte të mbrojtjes dhe ruajtjes së distancës sociale, kanë qenë të panumërt pjesmarrësit në homazhet e organizuar në në Shtëpinë Mortore YORKTOWN FUNERAL HOME,New York. Për shtatë orë vargu i bashkatdhetarëve (po edhe i amerikanëve) që kryenin homazhe nuk pushoi. Vatra ngushëlloi familjen Gojçaj me një pjesmarrje të madhe.

Në meshën e Dritës, që u drejtua nga famullitari Don Pjetër Popaj, ditën e Premte, 7 gusht 2020, duke filluar që nga ora 11 A.M.,pjesmarrja ishte e jashtzakonshme duke marrë parasyshë distancimin social dhe rrezikun e koronavirusit.

Në Meshë dhe në ceremoninë e varrimit ishin të pranishëm edhe përfaqësues të Vatrës: Kryetari Elmi Berisha, Presidenti i Nderit Agim Rexhaj, anëtari i Kryesis Zef Balaj,Arkëtari Marjan Cubi me Familje,anëtarët e kryesisë Anton Raja, Mark Mrnaçaj,vatarni Aleks Mrnaçaj, Mhill Gjuraj-anëtar i Këshillit, Kryeredaktori i Diellit Dalip Greca, e të tjerë.
Gjatë Meshës Dom Pjetër Popaj vlerësoi Lek Gojçaj, jo vetëm se besimtar i përkushtuar i fesë, por edhe si një atdhetar, që punoi pa u lodhur dhe pa u kursyer për Kombin, e vlërësoi për bamirësi, por edhe si qytetar i sjellshëm, komunikues,si njeri fisnik, I shkueshëm me të gjithë, i qeshur, i dashur. Leka të bënte për vete me karakterin e tij, të qeshurën e tij, shpirtin e tij fisnik.Leka shkoi, por pas ka lënë gjurmët e një jete që i bën krenarë pasardhësit dhe miqtë e tij. Dom Pjetri tha se ne po japim lamtumirën për ndarjen fizike prej nesh, por ai do të jetë përherë mes nesh me veprat dhe kujtimet që ka lënë pas. Kontributi i Gojçajve është aty në Kishën Zoja e Shkodrës, që nga fillimi, ndërtimi, është tek Shtatorja e Shenjtëreshës Nënë Tereza,para Kishe, që u uron e para mirëseardhjen besimtarëve të gjakut të saj. Atë e dhuruan vëllezërit Gojçaj. Shtatore të tilla ata ndërtuan e dhuruan jo vetëm në New York, por edhe në Michigan, Tuz (Malësi), Prishtinë, Mitrovicë, Strugë etj.

Varrimi i të ndjerit u bë në varrezat “GATE OF HEVEN”, New York.(Më shumë lexoni në Gazetën Dielli në print)

*Me shume fotografi gjeni ne FB

Iu dha lamtumira Ibrahim Bashës, mijëra qytetarë në homazhe

June 25, 2015 by dgreca

Pas ceremonive fetare ne Xhamine Et’hem Beu ne Kryeqytet,në Pallatin e Brigadave prej orës 14 .00 u organizuan homazhe në nderim të Ibrahim Bashës, efektivit të RENEA -s të vrarë në krye të detyrës mëngjesin e djeshëm(24 Qershor 2015) në Lazarat.Mijëra qytetarë, miq, e familjarë, por dhe përfaqësues më të lartë të shtetit, qeverisë e trupit diplomatik, i kanë dhënë lamtumirën e fundit 31 – vjeçarit, i mbetur i vrarë gjatë një shkëmbi zjarri me një grup kriminal në Lazarat.Në një ceremonial të organizuar në Pallatin e Brigadave për Ibrahim Bashën, mbajtën fjalime, Kryeministri Edi Rama, Ambasadori amerikan, Donald Lu dhe Ministri i Brendshëm, Saimir Tahiri. I pranishëm ishte edhe Presidenti i Republikës, Bujar Nishani.Në orën 16.00 trupi i pajetë i Bashës ështe varrosur në varrezat e Dëshmorëve të Kombit.

Rama: Ibrahim Basha, simbol i sakrificës

Kryeministri Edi Rama ka bërë vlerësimet maksimale në homazhet në nder të efektivit të vrarë një ditë më parë në Lazarat.“Ibrahimi sot do të varroset si dëshmor në kohë paqeje. Jemi sot këtu që ta nderojmë atë, edhe pse nderimi ynë nuk mund t’i kthejë atij të ardhmen që ia morën. Jeta e tij ndaloi për shkak të detyrës, ndaj ne jemi këtu për ata që sakrifikojnë jetën e tyre për një vend më të sigurt”, ka thënë Rama.

Ai është shprehur se, të gjithë njerëzit e mbledhur sot në këto homazhe ndodhen përpara një heroi, “provë e gjallë e një vlere të paçmuar, që duhet të na kujtojë se paqja nuk është dhuratë e zotit, por përkushtim dhe sakrificë i njerëzve që nuk i njohim”.“Ndaj përulem me ndjenjën më të thellë të respektit përpara prindërve dhe familjes së Ibrahim Bashës”, ka thënë Rama.“Unë nuk e kam njohur Ibrahimin, as ju që jeni të pranishëm këtu nuk e keni njohur. Ne nuk dimë asgjë për Ibrahimin. Nuk dimë as si u ndje kur iku të luftonte jashtë atdheut, Ne nuk e njohim dhe nuk kemi për ta njohur ndonjëhërë, por erdhem për ta nderuar. Prania jonë është një kujtim për rrugën e tij të re. Fjalët tona nuk mund ta zbusin zemrën e bërë gur të familjes së tij. E ardhmje dhe endrra e tij kanë mbaruar.Duke nderuar këtë njeri që nuk na lidhe asgjë nuk ulemi para një të vdekur, por përpara një simboli të sakrificës. Trupi që kemi përara është shëmbëlltyra e një ideali.Ai ishte në anën e cdo familje shqiptare. Ju familja e Ibrahimit i mësuat vlerën e nderit të respektit dhe të detyrës. Mëund të duket e kotë cdo frymëmarrje teksa djali juaj nuk merr frymë. Mos e troturoni veten me kujtime që ju la. Mendoni sesa shumë familje shqiptare janë mirë falë sakrificave të dajlit tuaj”, vijoi ai.

Ambasadori Lu: Në emër të SHBA, mirënjohje Ibrahim Bashës

Ambasadori i SHBA, Donald Lu, duke folur në homazhet në nder të efektivit Ibrahim Basha, ka vlerësuar maksimalisht kontributin e tij në misionet paqeruajtëse.“Ne nderojmë kontributin e nëntetar Ibrahim Bashës në Irak e Afganistan. Ai ka marrë medalje për shërbimin e ofruar në këto misione të rrezikshme”, ka thënë Lu.Në emër të NATO-s dhe Shteteve të Bashkuara, ai i ka shprehur ngushëllimet familjes së tij dhe shqiptarëve.“Sfidat na bëjnë më të fortë, vështirësitë na e bëjnë rrugën më të qartë”.

TAHIRI:DORA E PABESE DO TE NDESHKOHET!

Tahiri në homazhet e zhvilluara për efektivin e RENEA-s, Ibrahim Basha, i cili u vra në Lazarat.“Thonë se heronjtë njihen kur flenë nën dhe’, po ti ishe hero dhe për së gjalli me shokët e tu, të vendit tënd dhe të huaj. E gjithë Shqipëria u shtang se dora e krimit dhe terrorit të mori jetën, këtu në vendin tënd, ku luftë nuk ka, po ku për më shumë se dy dekada ka pabesi të pashoqë që kanë mbjellë plagë të neveritshme në trupin e vendit tonë, siç është dhe fshati ku ca kriminelë të morën jetën ty. Luftove për të bërë të lirë e të sigurt vende të tjera e popuj të tjerë, po jetën tënde e dhe për popullin tënd, këtu në vendin tonë”, vijoi ministri.Tahiri u shpreh më tej: “Dora e pabesë që u ngrit mbi ty ka mbi dy dekada që rritet për t’i bërë karshillëk Shqipërisë, për të sfiduar shtetin, ligjin, drejtësinë. Ajo dorë mori jetën tënde, në atë fshat plot me njerëz të ndershëm, po ku kanë mbetur ende disa kriminale të përdorur. Në atë fshat që vjet e çliruam nga droga e krimi po që nuk kemi mbaruar ende. Ti dhe shokët e tu dini diçka që nuk e thoni kurrë, dini diçka që publiku nuk e di shpesh, krimit i mjafton të ketë sukses një herë në 100 apo 1000 raste, ndërsa policisë i duhet të ketë sukses çdo herë. E djeshmja ishte dita jote e pafat, Ibrahim. Na kanë vrarë të gjithëve nga pak, ajo dorë ka goditur shtetin”, tha Tahiri.

Meta: Shteti të reagojë me forcën e drejtësisë

Kreu i Kuvendit, Ilir Meta, në fjalën e tij është shprehur se, Ibrahim Basha e kreu me nder detyrën e tij, ndaj meriton nderim dhe mirënjohje të përhershme.“Ti dhe kolegët e tu na keni bërë krenarë me kontributin tuaj. Fatkeqësisht, terrorizmi goditi në mënyrë të pabesë. Eshtë detyra jonë, e shtetit dhe shoqerisë, të vendosim drejtësi”, ka thënë Meta.Ai ka shtuar se, “kjo sakrificë sublime duhet të shërbejë për të krijuar një shoqëri të drejtë dhe një drejtësi të fortë”.Tahiri: Dora e pabesë do të ndëshkohet

I ESHTE DHENE LAMTUMIRA NIPIT TE HASAN PRISHTINES

March 28, 2015 by dgreca

Me 22 Mars 2015 iu dha lamtumira e fundit Nipit te Hasan Prishties, Hakan Ismet Berisha-Veliu. Varrimi u be ne qytetin e Mitrovices.
Hakani nderroi jete ne moshen 85 vjecare dhe ka lene pas vetes miresi.
i leht i qofte dheu nipit te Patriotit te shquar. Hasan Ahmet Berisha (Prishtina)!
(Njoftimi iu percolli Gazetes Dielli nga FERKI VELIU BERISHA, anetar I Vatres.)
I ndjeri ne te gjalle te tij e kishte sqaruar publikisht pemen gjenalogjike te familjes si pasardhes I heroit Kombetar Hasan Prishtina. Po e bashkengjisim njerin prej shkrimeve.
***
E vërteta e trungut gjenealogjik të Hasan Prishtinës!
Hakan Ismet Berisha, nga Mitrovica, është familjari më i afërt i Hasan Prishtinës. Hakani shpjegon për familjen e tij se ajo kishte jetuar në Vushtrri, dhe prej kohësh ishte shpërngulur në Mitrovicë. Në Vushtrri kjo familje jetoi deri në vitin 1933/34. Atëherë këtë shtëpi, me më shumë se 30 ari truall, e kishin marrë serbët dhe e kishin shfrytëzuar për punë të Gjyqit Komunal.
Zejnullah begu dhe Hasan bej Prishtina kanë qenë djemtë e dy vëllezërve. Zejnullahu ka qenë i Abdullahut, kurse Hasani i Ahmetit. E, Abdullahu dhe Ahmeti kanë qenë të Aliut. Zejnullah begu kishte vetëm një motër, e cila ishte e martuar në Turqi, kurse Hasani e kishte vetëm një vëlla, Ymerin. Zejnullah begu, gjyshi i Hakanit, kishte katër djem, Qemajlin, Ismetin, Abdullahun dhe Besimin, si dhe dy vajza: Shukrijen dhe Naziren. Hasan Prishtina nuk kishte fëmijë. Ndër më të afërmit e tij ka qenë, Elma, vajza e të vëllait, Ymerit. Hakani i ka dy djem, Afrimin dhe Agronin dhe një motër e cila jeton në Prishtinë, e cila ka një djalë dhe një vajzë, që të gjithë me pasardhës.
Hakan Berisha: Veliqët (Veliu) e Polacit janë më të afërmit e Hasan Prishtinës!
Hakani shpjegon se si kishte qenë i ftuar në Lagjen Veliqi (Veliu), në Polac të Skënderajt, kishte qëndruar në truallin e të parëve të tij, aty ku i pari i tyre, Abdullah Veliqi, e ka varrin. Hakani aty, pas kaq viteve, ishte njohur me djalin e Rexhep Veliqit, me Zeqirin, babanë e të cilit gjithmonë e kishte respektuar për kushëri të vetin, si dhe ishte takuar e çmallur edhe me shumë të afërm e kushërinj, që konsiderohen dhe në realitet janë të afërm të Hasan Prishtinës. Hakani sot ka një fotografi ku janë Zejnullah begu dhe Rexhep Veliqi, por ka edhe fotografi familjare e dokumente arkivale që vërtetojnë se Hasan Prishtina dhe Zejnullah begu trungun familjar e kanë nga Lagjja Veliqi (Veliu) të Polacit.
Mehmet Prishtina (Aliuka mbiemri origjinal) s’ka lidhje me trungun e familjes së Hasan Prishtinës!
“Kur kam dëgjuar se ka dalë një njeri me mbiemrin (Mehmet) Prishtina dhe i njëjti njeri sot dezinformon se ai kinse qenkësh stërnip i Hasan Prishtinës, unë, Hakani, i kam i telefonuar stërnipit të Isa Boletinit, Gazmendit, me të cilin bashkë kemi shkuar në Shkup, dhe më dha dëshmi e fakte se, unë, Hakan Berisha, isha dhe jam pjesë më e afërt e Trungut të Hasan Prishtinës! Kjo është e vërteta që s’e luan as topi”, thotë Hakani.
Për prejardhjen dhe për gjenealogjinë e Hasan Prishtinës, historiani Prof. Dr. Muhamet Pirraku kishte filluar të interesohej nga fundi i viteve të ‘60-a të shekullit të 20-të, në të gjitha arkivat shtetërore të Jugosllavisë, të Vjenës, të Tiranës e të Shkodrës. Ai ka shënuar Kujtesën historike në Drenicë e në të gjitha viset e Kosovës, në Shkup, Tiranë e në Shkodër. Dhe, si në burime, ashtu edhe në kujtesën historike Hasan Prishtina, thuhet se rrjedh nga Vëllazëria stërgjyshore Veliqi (Veliu) të Polacit të Drenicës. Nëna e Hasan Prishtinës, gruaja e Ahmet Haxhi Ali Veliqit-Berishës, ishte vushtrriase, Nexhibe Haxhi Sallahu (sipas Fahri Buçincës është quajtur edhe Salih). Realisht, Haxhi Ali Veliqi, e dimë nga burimet arkivale se i ka pasur tre djem që kanë pasur trashëgimtarë. Të bijtë e Haxhi Ali Veliqit kishin miqësi e krushqi me: Mulla Haxhi Zekën (Pejë), me Ali pashë Dragën (Mitrovicë) me Zija pashë Gjinollin (Prishtinë) me Sylejman pashë Berishën-Prishtinën, me të bijtë e Emin Agës.
Unë, Hakan Berisha: Betohem në flamurin e kombit, e them të vërtetën
“Ky far Mehmeti Prishtina, mund t’i ndërrojë një mijë mbiemra, por një gjë duhet ta ketë të qartë ai, dhe krejt shqiptaria, se ky njeri mashtrues, lakmues i pasurisë së patundshme të Hasan Prishtinës, rrenacak dhe pa ndërgjegje prej njeriu, nuk ka lidhje, as me trungun familjar, e as me gjakun, as me gjenealogjinë familjare të Hasan Prishtinës! Ai nuk është dhe nuk mund të jetë pasardhës i Hasan Prishtinës, sepse Hasani nuk ka pasur as motër, as s’ka lënë pasardhës të vetin. Ngritjen e përmendores së Hasan Prishtinës, pastaj Mirënjohje për kontributin e patriotit e luftëtarit për bashkimin e trojeve etnike, është dashur ta bëjë shteti i Shqipërisë apo shteti i Kosovës, sepse Hasan Prishtina ka dhënë më shumë se çdokush për liri, për atdhe, për arsim, për bashkim… prandaj nderimet, Mirënjohjet, apo përmendoret, e të tjera, u takojnë t’i bëjnë dy shtetet: Shqipëria dhe Kosova, dhe jo të përqafohen, të puthen, ta falënderojnë atë njeri mashtrues, rrenacak, lakmitar mbi pasurinë dhe krejt çka la pas vdekjes i madhi Hasan Prishtina. Jam i befasuar”, shton Hakan Berisha, loza e Hasan Prishtinës, me faktin se si ka mundur të ndodhë që për 100-vjetorin e Pavarësisë së Shqipërisë, në Kosovë të dekorohet me dekorata e mirënjohje si më i afërmi i Hasan Prishtinës, kurse në Shqipëri e në Maqedoni të dekorohet njeriu tjetër, që sipas Hakan Berishës nuk ka lidhje farefisnore me familjen e Hasan Prishtinës.
Hakan Berisha – loza më e afërt e trungut të Hasan Prishtinës!
Hakani në fund na i tregoi të gjitha dekoratat dhe mirënjohjet që ndër vite i ka ruajtur si trofe të vlefshme në shenjë nderi e respekti për Hasan Prishtinën. Prandaj, duhet të shkruhet e të thuhet, të reagohet e të punohet drejt e mirë, t’u thuhet ndal punëve jo të mira, sidomos keqinterpretimit (shtrembërimit) të fakteve historike për njerëzit e mëdhenj. Hakan Berisha mban Mirënjohjen që e ka pranuar në emër të familjes së Hasan Prishtinës.
“Epo, qe pra, unë, Hakan Berisha, si loza më e afërt e trungut të Hasan Prishtinës, asgjë më shumë nuk kërkoj, pos të mos i besohet, të mos përfillet, të mos ndihmohet dhe përkëdhelet njeriu i cili Hasan Prishtinën, ama nuk e ka as fis, as farefis. Unë nuk kam asgjë kundër Mehmetit, as kundër askujt që kontribuon për shtatoret dhe veprën e Hasan Prishtinës, por mos të ëndërrojë kush që do të mund ta blejë Hakanin me pare e ta shtrembërojë historinë e një njeriu aq të madh, siç ishte Hasan Prishtina… Na nuk mund të durojmë më, jemi shumë të zhgënjyer me këto veprime skandaloze”, thotë Hakani.
“Vëllezër, kujdes! Mos besoni këtij mashtruesi, rrenacaku, profiteri, sepse, sipas të gjitha burimeve tona, ky mashtrues me mbiemër të rremë të trungut të Hasan Prishtinës, gjithsesi është me dijeni dhe me përkrahje të armiqve të të gjitha fytyrave kombëtare që u vranë nga dora tradhtare e armiqve të Shqipërisë, të Kosovës, të shqiptarisë”, shton Hakani. /Riza Grajqevci/Shqipëria e bashkuar/

Prof. dr. Ylli Vejsiuit iu dha Lamtumira e fundit

March 26, 2015 by dgreca

Ditën e mërkurë, dt. 25.03.2015 u nda nga jeta në moshën 73 vjeçare akademiku dhe politikani i shquar prof. dr. Ylli Vejsiu.
I diplomuar në Fakultetin e Shkencave të Natyrës për matematikë dhe ekonomi Prof. dr. Ylli Vejsiu u bë i njohur si matematikan, ekonomist dhe
demograf. Ndër vite ka kryer punën e pedagogut në Fakultetin e Shkencave të Natyrës e më pas është transferuar në Drejtorinë e Statistikës si kryespecialist në Komisionin e Planit të Shtetit.
Pas zhvillimeve demokratike në fillim të viteve ’90 të shekullit të kaluar, Prof. Dr. Ylli Vejsiu u përfshi në politikë, ku zhvilloi një karrierë të shquar dhe plot kontribute. Në vitet 1992 – 1996 ai u zgjodh deputet i Kuvendit Popullor të Republikës së Shqipërisë. Gjatë kësaj kohe ka mbajtur edhe postin e Ministrit të Arsimit dhe Shkencës.
Ka qenë anëtar i Asamblesë Parlamentare të Bashkëpunimit Ekonomik të Detit të Zi.
Si akademik është autor dhe bashkautor i njësërë monografive dhe teksteve mësimore. Që prej vitit 2009 ka qenë anëtar i Bordit Drejtues të Institutit Shqiptar të Mendimit dhe Qytetërimit Islam (AIITC). Pavarësisht gjendjes jo të mirë shëndetësore në vitet e fundit, ai dha kontribut të vyer në Institut me staturën e tij si njeri i shkencës dhe i politikës.
Ceremonia funerale dhe nderimet e fundit u kryhen ditën e enjte, dt. 26.03.2015, ora 14.00, në adresën Rr. Mihal Grameno, 100 metra mbi shkollën e Baletit.
(Njoftim i INSTITUTIT SHQIPTAR TE MENDIMIT DHE QYTETËRIMIT ISLAM)