Zëvendëskryeministri Thaçi hapi te premten me 29 Janar 2016 konsullatën e Republikës së Kosovës në Iowa të SHBA-së/
Des Moines, SHBA/Zëvendëskryeministri i parë, njëherësh ministër i Punëve të Jashtme të Republikës së Kosovës, Hashim Thaçi, hapi sot(29 Janar 2016) konsullatën e Republikës së Kosovës në Des Moines, kryeqyteti i Iowas, në Shtetet e Bashkuara të Amerikës.
“Miqësia e Kosovës me Iowan është edhe më e vjetër së shteti i Kosovës. Ajo ka filluar me trupat e Gardës Kombëtare të Iowas që kanë marrë pjesë në kuadër të trupave paqëruajtëse në Kosovë, që nga viti 2003”, ka thënë zëvendëskryeministri Thaçi.
Thaçi ka thënë më tej se kjo miqësi, e cila kishte filluar me bashkëpunimin në ndërtimin e paqes dhe sigurisë, tani do të zgjerohet edhe në fusha të tjera të jetës.
Zëvendëskryeministri Thaçi kujtoi se më 2011 ishte nënshkruar marrëveshja për partneritet mes Forcës së Sigurisë së Kosovës dhe Gardës Kombëtare të Iowas.
Më 2013, guvernatori i shtetit të Iowas, Terry Branstad kishte vizituar Kosovës me ç’rast, së bashku me presidenten Jahjaga, ka nënshkruar marrëveshjen e partneritetit të ndërsjellë, ajo e binjakëzimit mes Republikës së Kosovës dhe shtetit të Iowas.
Me këtë rast, zëvendëskryeministri Thaçi e falënderoi guvernatorin Branstand, Gjeneralin Timothy E. Orr dhe Gjeneralin Xhavit Gashi, atashe i parë i Republikës së Kosovës në SHBA, për angazhimin e tyre për të thelluar bashkëpunimin mes dy vendeve. Ai u shpreh se konsullata është një portë e re për forcimin e komunikimit dhe bashkëpunimit.
Në ceremoninë e hapjes së konsullatës morën pjesë zyrtarë më të lartë të shtetit të Iowas dhe përfaqësues të Departamentit amerikan të Shtetit.
Guvernatori Branstad u shpreh i kënaqur që Kosova po hapë konsullatë në Iowa, që është njëherësh zyra e parë diplomatike ndërkombëtare në shtetin e Iowas. Ai u shpreh së të Iowa dhe Kosova gëzojnë bashkëpunim shembullor në fushën e sigurisë dhe të arsimit dhe se duhet të kërkohet edhe në sektorin ekonomik.
I pranishëm ishte edhe Thomas K. Yazdgerdi, Drejtor pranë Zyrës për Çështje të Evropës Jugore dhe Qendrore. Ai u shpreh i kënaqur që Kosova dhe SHBA po i thellojnë edhe më marrëdhëniet e shkëlqyeshme. Yazdgerdi lavdëroi lidershipin politik të Kosovës që po punon për paqe, stabilitet dhe për një të ardhme më të mirë për vendin dhe për tërë rajonin, duke e përsëritur porosinë e Sekretarit amerikan të Shtetit, John Kerry se SHBA nuk do të lejonte asnjëherë që Kosova të detyrohet të pranojë marrëveshje që nuk janë në interes të Kosovës.
Në mesin e të pranishmëve ishin edhe zyrtarë të tjerë, prefekti i Iowas, Thomas Michael Franklin Cownie, senatorja nga shteti i Iowas, Joni Kay Ernst, ambasadorja e Kosovës në SHBA, Vlora Çitaku, ish-ambasadori kosovar në SHBA, Akan Ismaili, i cili kishte punuar shumë që të jetësohej hapja e konsullatës së shtetit kosovar në Iowa, dhe zyrtarë të tjerë të lartë të shtetit të Iowas, përfaqësues të biznesit, akademisë, e kështu me radhë. Hapja e konsullatës është ndjekur nga gazetarë të shumtë.