Nga Behlul Jashari/PRISHTINË, 22 Gusht 2015/Ambasadori i ri i Shteteve të Bashkuara të Amerikës në Prishtinë, Greg Delawie, në takim me kryeministrin Isa Mustafa ka shprehur përkushtimin e tij gjatë misionit në Kosovë për thellimin e mëtejshëm të bashkëpunimit ndërmjet dy shteteve.
Ambasadori Delawie po ashtu vlerësoi progresin që po arrihet në Kosovë, duke shprehur përkrahjen e mëtejshme të SHBA-ve për Kosovën.
Gjatë takimit njoftues, kryeministri Mustafa e informoi ambasadorin Delawie për progresin në Kosovë, duke theksuar prioritetet e Qeverisë për zhvillimin e qëndrueshëm ekonomik, punësimin dhe mirëqenien, sundimin e ligjit, luftën kundër korrupsionit dhe krimit të organizuar si dhe axhendën integruese euroatlantike, e reformat thelbësore në fusha të tjera, si pjesë e zhvillimit të vendit.
Kryeministri Mustafa shprehu mirënjohjen e popullit dhe të Qeverisë së Kosovës për përkrahjen dhe kontributin e pazëvendësueshëm që SHBA-të kanë dhënë dhe po japin për Republikën e Kosovës.
Kryeministri Mustafa po ashtu shprehu përkushtimin e plotë të Qeverisë së Kosovës për thellimin e mëtejshëm të bashkëpunimit dhe partneritetit strategjik me Shtetet e Bashkuara të Amerikës.
Takimi u zhvillua pasi ambasadori i ri i Shteteve të Bashkuara të Amerikës në Kosovë, Greg Delawie, dje pasdite dorëzoi letrat kredenciale në pritjen me ceremoni solemne shtetërore te presidentja e Republikës, Atifete Jahjaga, bashkë me të cilën edhe shëtitën më këmbë shesheve të Prishtinës Ibrahim Rugova, Gjergj Kastrioti-Skënderbeu e Nëna Terezë, ku vizitoi edhe panairin e mjedrave që promovon prodhimin vendor dhe që mbështetet nga USAID-i, i mirëpritur e përshëndetur përzemërsisht nga shumë qytetarë, edhe duke u takuar me shtrëngime duarsh.